|
كيف أجعل زوجي يقوم بمشاويري بدون مشاكل؟
السلام عليكم
انا متزوجه وعندي طفلين انا واختي متزوجين اخوان وساكنين في نفس الحي لما اروح لاهلي اروح مع اختي واجي مع اختي احيانا ولد اختي يودينا واحيانا زوجي المشكله انو زوجي يقول ارجعي معاهم واختي تحب تبات عند اهلي واطفالها كثير واختي الثانيه برضو تبات عند اهلي واطفالها كثير والبيت يكون ازعاج ودايم تصير مشاكل بيني وبين اختي عشان انو نرجع للبييت ومانبات عند اهلي بس اختي ماترضى واعصب ولما اتصل على زوجي يرفض يجي ياخني بحكم انو المشوار بين بيتي وبيت اهلي ثلث ساعه يقول تعالي مع اختك طيب انا ايش دخلني في اختي هم يبغو يباتون وانا ما ابغى ابات ابغى ابات في بيتي وهذا من حقي والله انا لي 8 سنوات متزوجه لو اقولكم كم مره جى وخذني من اهلي تنعد على الاصابع مره كنت حامل في الشهر الثامن وازعاج في بيت اهلي اتصلت عليه قلت انا تعبانه تعال خذني رفض وقال تعبان ومشوار قلت انا تعبانه وكنت ابكي يقول والله ما اقدر تخيلو بعدين اختي شافتني ابكي اتصلت على زوجها وقالت تعال خذنا وجى زوجي مع زوجها بسياره زوجي واخونا تخيلو انا لما قلت له رفض بس لما اخوه قاله جى ولما قلت له قال لا انا جيت عشانك قلت انا ترجيتك وكنت ابكي ورفضت ولما اتصلت اختي جيتو شلون المهم مازعلت وعديتها الاسبوع الي فات رحت لاهلي وبت عندهم انا واختي كالعاده والجمعه كنت ابغى اروح بدري عشان اجهز العيال للمدارس بس اختي ماتبغى تروح بدري انا عصبت وقالت احنا مالنا علاقه فيك عندك زوجك مسؤال عنك تبي تروح بدري ما تبي تباتي قولي لزوجك وهو يجي لا تتحكمي فينا وفعلا كلامها صح كل واحد يسوي الي يريحه وكلمت زوجي وعصبت عليه قلت ليه انت تذلني قال انتي تكبرين المشاكل االيوم رحت لاهلي مع اختي والساعه ثامان كلمت زوجي قلت تعال خذني قال انا معزوم ما اقدر ياروحي كالعاده قلت تعال قبل لاتروح للعزيمه مرنا تسع وروح للعزيمه عشر قال اسوف جت الساعه تسع الاربع ارسلت له بتجي قال لا ماضنيت قالت له كالعاده مو شي جديد عليك لازم اذل نفسي لك عشان تجي تاخني مو عيشه هذي قال انتي تكبرين الموضوع ليه تروحين لهم اجل كان جلستي قلت اهلي بزورهم وارجع بيتي مو لازم ابات قلت المهم اذا ما جيت المره هذي من جد بازعل ولو العيال ماعندهم مدارس كان جلست عند اهلي على طول وعصب علي وقال خلاص انا جاي في الطريق انا الان في البيت ومن ركبت السياره ماكلمته مع اني كنت معصبه وكنت لازم اتفاهم معاه بس قلت بلاش يابنت الوقت مومناسب وهو معصب ويسوق الان هو نزلني وراح للاستراحه وش اسوي معاه انا لازم الاقي حل للمعاناه هي ابغاه يقتنع انو هو يوديني ويجيبني على فكره انا كل مشاويري اغلبها مع اهلي او مه اختي يودينا ولدها زواجات عزايم اي مناسبه ولد اختي يوديني يعني زوجي يمكن مره وحده في الاسبوع يوديني مشوار واحيانا يمر اسبوعين مارحت معاه مشوار عشان تكونو في الصوره ووضحت لكم كيف اتفاهم معاه بدون مشاكل ابغاه يحس انو ها واجبه وانو ظالمني في الموضوع هذا خاصه انو كل صحباتي واخواتي ازواجهم هم الي يودونهم ويرجعو ياخونهم في نفس اليوم وانا لا كأن ماعندي زوج مسؤل عني ارجوكم ردو علي ضروري ولاتطنشوني لاني لازم اتفاهم معاه الان بعد مايرجع |
خوذيه ياقلبي بهداوه ..
اذا كان معصب باقي لاتكلمينه هالليله .. لازم تحسنين اختيار الوقت .. بس انتي عشانك معصبه ومتشرهه عليه تبغين الليله تكلمينه .. واذا جيتي تناقشينه .. خوذي الموضوع بالعموم .. يعني ماتضيقي النقاش على روحتك لاهلك ... وابدائي بالمدح والكلام الطيب ووانه مو مقصر .. وانا مسؤوله عنك وانت مسؤول عني .. ولكن .... وادخلي من هنا ع الموضوع ومايصير ياقلبي اقط عمري على فلان وعلان .. وانت موجود يالغلا .. ومن هالكلام وتضربين عدة امثله منها روحتك لاهلك .. اديتك رؤس اقلام للموضوع .. وانتي رتبيه بالوضع المؤثر لزوجك ( اقصد الاسلوب وطريقة الكلام ) .. الله ييسر امرك يارب .. وان شاء الله الموضوع بسيط.. |
شكرا لك اختي
بس انا زهقت ثمان سنوات وانا اترجاه اذا بغيته يجي ياخذني من اهلي مو معقوله كا ممكن ما اكلمه اليوم بس لازم اتفاهم معاه والاقي حل انا فكرت انو اروح اسبوع لاهلي واسبوع ما اروح كذا يصير مره كل اسبوعين يجي ياخذني من اهلي يعني اسبوع اجلس في بيتي والاسبوع الثاني اروح مع اختي بس هو يجي ياخذني في نفس اليوم بس كذا احس اني اظلم نفسي واشجعه على اهمالي وش اسوي لازم حل |
اسألته عن الأسباب التي تمنعه من الخروج معك؟؟
|
والله اختي الفاضله اذا كنتي كل يوم تروحي لأهلك هذا خطاء منك
الرجال مو فاضيلك كل يوم رايح جاي ليه حمار مكده هو ؟؟؟ اما اذا كان كل اسبوع زيارة لأهلك او مسيار كل جمعه ولا يوديك هذا اكرشيه ولا عليك منه وقولي له اذا ماوديتني بروح بالتكسي او ااشر على الطريق انا واولادي واروح بس انتبهي تناقشيه وانتي يوميا عند اهلك اسف على كلامي اتمنى لك بهذه الساعه المباركه حياه سعيدة مع زوجك واولادك |
بصرتحه ياقلبي انتي عودتيه من البدايه على قل المسووليه
وان اختك وولدها يقضون لك مشاويرك والحين شي طبيعي يستثقلها شوفي حبيبتي قولي له اختي وولدها يتضايقون يودوني ويجيبوني خاصه ولد اختي مو مسوول عني وصير انتي اطلبيه يوديك |
هو مايحب المشاوير يقول مشوار اجي اخذك من اهلك اخر الليل
اما بالنسبه اني اروح لاهلي كل يوم لا انا اروح لاهلي يوم الخميس فقط |
الكل يقول انا الي عودته بس انا كنت اقول خلاص دام مشاويري انا واختي وحده ليه ما اروح معاهم وليه امشور زوجي على شي مايستاهل بس مشاويري لاهلي هي الي مضايقتني المفروض يجي ياخذني
مو كل الرجال هم الي يودون زوجاتهم ويجيبوهم من اهلهم ولا كل واحد لازم يخلي زوجته تبات عند اهلها بحجه المشوار |
شوفي حبيبتي لاتزعلين نفسك ولاتظغطين على زوجك الحمدلله انه مخليك على راحتك متى مابغيتي تروحين عند اهلك انا والله ان سواق اهلي يجي ياخذني ويرجعني ويوديني السوق سنين وزوجي ماطب السوق معي بس وش نسوي وانا تاركته اهم الشئ عندي انه موافق وكثر خيره
الله يوفقك |
سؤال لك هل انتي وأختك ترحون سوا وترجعون سوا مع ولد اختك ؟ أو أختك تنام عندهم وأنتي تبغين ترجعين ؟ |
بالتدريج عوديه شويه شويه وبكلام الحب والدلع راح يرجع يتحمل مسؤليتك. لكن لو فكرتي بالقوة ومره وحده تغيرينه راح
تجيبين لنفسك مشكله كبيره .. أولا : ابتعدي عن النق والكلام الكثير.. ثانيا: ابدي الكلام بالمدح واثناء.. دلعيه في البيت واهتمي فيه.. هو الي راح يجيبك وما راح يخليك تباتين بعيد عنه .. ثالثا: لا عاد تروحين مع اختك وولدها.. خليك في البيت وشجعيه بالتدريج أن تخرجحين معاه.. الله يوفقك ويصلحلك حياتك وبيتك.. موفقه.. |
ابو شذى
نعم نروح مع بعض ولازم ارجع معاها لكن هي تنام عند اهلي وانا ابي ارجع لبيتي ولما اقوله تعال خذني يقول تعالي معهم بكره طيب انا ما ابغى انام عند اهلي ابغى اروح لبيتي |
اليوم الجمعه صحيت وحطيت له فطور ورحت غرفتي
وطبعا محد يكلم الثاني شايف اني انا الي غلطانه بس انا انتظر اكثر الردود عشان اتفاهم معاه بدون مشاكل انتظركم |
اول شي اسأليه كيف العزومه أمس؟؟وش صار فيها..يعني اي سواليف عاديه
وبعدينأساليه سؤال؟؟؟ ليش مايتحمل مسؤليتك ويقضي مشاويرك؟؟على الاقل يجيبك من بيت اهلك...وباقي المشاوير اعفيه منها..واتفقوا.. وفهميه ان اختك متضايقه..لانها مرتبطه فيك...يمكن يحس ويستحي شوي.. |
لا تجعلي الموضوع معلق , أسأليه مثل ما قالت ليه الغرور
و بيني له أنك أعفيتيه من مشاوير عدة,و تستحقين بالمقابل كرمه لباقي المشاوير أو اجلسي أسبوع في بيتك و اجعلي الحزن و الملل بادي على وجهك حتى يعرف مدى أهمية ذهابك لأهلك لتغير نفسيتك و هذا يعود عليه و ينعكس عليه,,, أو قولي له ترى بسوق السيارة إذا ما وصلتني (": |
والله يا اختي فهمته اكثر من مره بالهدوء وبالطقاق بس يجي الاسبوع الي بعده واروح مع اختي او يوديني هو ماعنده مشكله انه يوديني لانه يكون لسى صاحي ومروق لكن اني اطلبه يرجع لي لو اموت ماسواها ولو حتى اروح مع اختي واتصل عليه انت اليوم فاضي تعال خذني لااااااااااااااااااااااازم يطلع اعذار ونرجع لنفس الموال انا لازم اتخذ موقف جاد مو مثل كل مره ابربر وبعدين اسكت لازعل ولا شي وهذي مشكلتي الثانيه اني ما اعرف ازعل
المسداني انا فعلا لازم اتناقش معاه بس المشكه في طبعه انو حط الحق علي واني انا ابي المشاكل والحين المفروض انا الي ازعل زعل هو اما بالنسبه للسواقه هو يقول اول مايسمحون بالسواقه اول شي اسويه اشتري لك سياره امنيه حياته مثل ماهي امنيه حياتي انفع نفسي ولا منه احد |
الله يكون في عونك بس الصراحه انتِ اللي معودته من البدايه وهو شايف انه الموضوع انتِ مكبرته
ومحد يحس فيك الا اللي في وضعك قوليله انا ترى صرت انكسف اطلب من اختي وولد اختي يودوني وقد مرة من المرات اختي زهقت مني وقالتللي انا مالي دخل بمشاويرك...... زوجك هو المسؤول عنك خلاص ياانك توديني وتجيبني ولا جبلي سواق يوديني ويجيبني من مشاويري بس انتبي لاتوصل معاه مع كثرة الزن .... ويقولك لاتروحي عند اهلك اقعدي في بيتك ابرك لك |
صح انا الي عودته بس ماكنت متوقعه انه بيكون بالسلبيه هذي ويعتمد على الغير خلاص انا تعبت وابغى حل جذري للموضوع
|
طيب يا أختي ليش ما تروحي بيت أهلك بكير , يعني بعد الغداء , و ترجعي بعد آذان المغرب يكون لسه صاحي,,
يمكن انتي ترجعي متأخرة |
انا رايحه لاهلي العصر مع اختي
والساعه ثمان اتصلت عليه قلت تعال خذني اليوم قال انا معزوم على الساعه عشر قلت خلاص تعال الساعه تسع يعني جلست بس ثلاث ساعات عند اهلي وهو ماعنده نوم سهران |
الصراحة هو تعود وارتاح وفي نفس الوقت اختك رائحه
وليه كثرة المشاوير اتفقي معاه يوديك كل خميس والجيه اذا كانت اختك سوف ترجع في نفس الليله ارجعي معاها واذا كانت سوف تنام عند اهلك خليه يرجعك هو يعني اتفاق معه ووضحي ليه عواقب تجمع الاطفال ونومهم في بيت واحد وتطبعهم بطبائع بعض يعني اشرحي له السلبيات حتى يتقل الامر بتفاهم |
معليش انتي الي سمحتيله ليش اصلا تروحين وتجين مع اختك حتى لو مشواركم واحد يعني مالك طلبات ماتمرين تاخذين شي ماتعتبرون المشوار تمشيه ليش تروحينها على نفسك اما حكاية انك كنتي حامل وتعبانه ولاجاك غير اختك دقت على زوجها ويجي يعني هو الي يحس اكثر من زوجك هذي الي تحتاج زعل ليش تمررينها اذا ماراعاك في ظرف خاص زي كذا متى بيراعيك طالما زعلانه الحين معليش قوي قلبك وخلك زعلانه وريه الفرق بين لما تكوني مبسوطه وبين الحين اتخذي موقف التزمي الصمت لاتكلمينه جهزيله اكله ولبسه وخلك بعيده عنه لاتروحي لاهلك هذا الاسبوع وخلي اختك دق عليك كالعاده وتقولك يالله بنروح وانتي قوليلها انا تعبانه ما قدر خليه يسمع عسى ولعل يحس ويتغير وضعك فعلا واذا حصل ودخلتو في نقاش وان شاء الله يكون بعد مايعتذر على اهماله قوليله انك شكلتي عبء على اختك وضايقتيها وانتي مو مضطره لانو عندك زوجك وبعافيه وشبابه وسياره وظروف ماديه تمام ليش تخليني عاله على احد وبعدين قوليله انتي من لك غيروه هو الي يتحملك وانتي الي متحملته وريه انه مالك احد بالدنيا غيروه خليه يتشبع رجوله وقوامه وبعد كذا اتفقي معاه قبل اي خرجه اذا رحت تجيبني لاتخرجي اي مكان الا واخذه منه كلمه عشان يتحملها وان شاءالله ربي ياخذ بيدك ويسعدك معاااااااااااه ويحققلك الي تتمنيه |
المشكله انك عودتيه , وزوجك خلاص ااعتاد وما يشوف انه من حقك يوديه
<< هذا اساس المشكله طيب اذا اختك تروح الخميس خلي روحتك لاهلك بيوم ثاني علشان ما يقول روحي مع اختك .. واعتذري عن روحة الخميس بحجة ان عندك شغل غسيل او بيجونك ضيوف ......الخ واذا قالك انا عندي عذر , استنيه لحد ما يخلص هالعذر ..يعني مثلا انا عندي استراحه وماراح ارجع الا متاخر مثلا الساعة 2 ,, قوليله انا بستناك لحد الساعة ثنتين وخليك صارمه قوليها بحزم (اختي تضايقت مني ومن مشاويري بس تقول عندك زوج يوديك ويجيبك ,, انت اللي توديني وانت بتجيبني , او بروح مع تاكسي , اختي ماراح اروح معها لو بتروح لنفس المشوار) ياختي كلنا كذا لو بنطاوع ازواجنا على اعذارهم لكان طول عمرنا معتمدين على اخواننا |
اختي سحابه صحرا
انا دايما اقوله انا بروح معاهم بس اا اتصلت عليك وقلت لك تعال تعال لان اختي لازم تبات عند اهلي وكل ما اتصل عليه نفس الشيء يصرف ويتعر ويقول ليه ماتجلسين انتي بس تحبين العناد ولازم اترجاه وحتى اذا ترجيته مايجي مجموعه حروف انا اروح مع اختي لانو احنا ساكنين بجمب بعض ويودينا زوج اختي واحيانا اختي تروح معاي يودينا زوجي بس لازم نروح مع بعض لان المشوار واحد واا انتي تقولين فرصه نتمشى مع بعض والله اخر مره طلعت معاه نتمشى من ثلاث شهور تغدينا برا حتى الخميس اقوله خلينا نطلع نتغداء مع بعض وبعدين توديني لاهلي يرفض كل الناس يحددون يوم في الاسبوع تطلع العائله مع بعض يغيرون جو الا هو رافض واا قلت له يتضايق ويقول ماله داعي رغم ان فيه صفات حلوه انه كريم وطيب ومو عصبي ولا عمره غلط علي بكلمه بس فيه كسل مو طبيعي ولا يحب نطلع نتمشى مع بعض الا اذا سافرنا بس اما وحنا في الرياض نادر مانطلع مع بعض المشكله يا اختي اني مسويه الي قلتي عليه ما اكلمه واحط له اكلمه اجهز ملابسه بس يعني عارف اني زعلانه المشكله انه هو مسوي زعلان ولا يكلمني ولا شي حتى انو مقاضي البيت مخلصه ارسلت له رساله جيب مقاضي وجيب غداء تخيلي لاجاب مقاضي ولا جاب غداء قلت طيب ليه ماجبت غداء البيت فاضي قال عاد ماجبت ولا يتكلم حتى رحت للمطبخ وحست فيه سويت غداء وارسلت عياله يقولون له الغداء جاهز قال مابي شي تغدينا وبقينا له وش اسوي معاه هذا المفروض انا الي ازعل يزعل هو ؟؟؟ اختي اصيله الخميس جمعه اخواتي وانا ما اشوفهم الا الخميس لازم اروح الخميس ولو رحت يوم ثاني بيوديني وهو احيانا الخميس يوديني بس المشكله في الرجعه لاني اطلبه يرجع لي الليل وهو يبي يسهر وما يحب يجي ياخذني الليل رغم اني اقوله تعال خذني بدري متى مافضيت اي وقت وحطني في البيت وروح اسهر عادي |
المشكله انو الان هو الي زعلان كيف اتعامل معاه
انا مستحيل اتنازل دايما هذا اسلوبه اا في مشكله يحط العتب علي ويزعل ولا يراضيني ابدا لانه يشوف انه مو غلطان بس انا المره هي مستحيل اراضيه بس كيف افتح معاه الموضوع واتناقش في المشكله وهو مطنش |
حبيبتي
بيني له بيوم من الأيام إنه أختك صارت تتضايق و إنك تحسي حالك ثقيلة و ما تبغي أحد يتكلم عن زوجك و زي كذا |
وين البقيه
|
جربي تخلين زوج اختك (اللي هو اخوه) يكلمه ...
لكن خليه يكلمه مو يقول انك انتي تشكين منه لأ.. لكن خليه يقول انو هو وزوجته يتضايقون من هالشي عشان يحس على دمه ويستحي شوي |
والله زوج اختي راضي يعني مافيها شي لونروح مع بعض لان زوجته احيانا تروح معنا ويودينا زوجي
بس زوج اختي اذا اتصلت عليه اختي عشان ياخذها يجي على طول |
الان هو زعلان لا ياكل معنا ولا شي وبعدين مع النوعيه هذي كيف احسسه انه هو الغلطان مو انا
|
انتي سمحتي له من البدايه
بصراحه مره انتي ممسختها وربي لو بدل اختك مااخذك معي بس انتي قومي ع زوجك قوليله تفشلني مع اختي ولا عاد تروحي لاهلك الا هو يوديك ويجيبك مره غلطتي من البدايه لكن ان شاء الله تقدري تعدلي وضعك |
ابنك على ماتربيه وزوجك على ماتعوديه
للاسف ماكان المفروض انك تعودينه من البدايه كان خليتيه يتكفل وتعوديه انه محد يوصلك ولا يقضي مشاويرك غيره مشكلة الرجل اتكالي وهو ماصدق يلاقي احد بتكفل بمشاويرك غيره ع العموم مالك الا ان تدعين ربك يهديه لك والله يسخره لك |
شكرا لكم
|
معليش تأخرت فالرد أبقولك شي أحمدي ربك ان زوجك طيب وكريم ولا غلط عليك وبعدين هذي ماتعتبر مشكلة بالنسبة للمتزوجين انه ماوداني وماجابني ولو قلنا انه هو اللي وصلك لبيت أهلك مثلا خلي ولد اختك يرجعك أو العكس يعني مثل ماهو متساهل معك خليك متساهله معاه وحتى لو ماخلاكي تروحين يعتبر من حقه لو افترضنا اسواء الامور لأنه زوجك وهو المسؤل عنك وأنا أقول أنتي من حقك انك تطلبين زوجك يوديك ويرجعك من عند أهلك اذا بغيتي ترجعين بس أنا أرى انك تكوني ماخذه الامور عاديه لأني حسيت من كلامك انه يقول خلي عنك العناد ومن كلامك انكم تعاندون بعض في شي عادي ولا تحطينها مشكله اجلسي معه وتفاهمي معه وقولي له من الكلام الحلو وأنت زوجي وأبو عيالي ولا لنا غيرك من بعد الله ومن هالكلام اللي يخلي الواحد يطير فالعجه |
عزيزتي ..
الآن اصلحي مع زوجك بطريقتك الخاصة بدون ما تفتحين معه موضوع المشاوير .. ما راح تقنعينه ولا بجيب فتح الموضوع نتيجة وهو بهالحالة ..! لأنه زعله أكثر شئ من الكلمة الي قلتيها : اقتباس:
ومع ذلك جاء وأخذك مما يدل إن (زعلك أثر فيه وتهديك أثر فيه )>>> ما أعنيه هنا ليس استخدام نفس الأسلوب التهديد بقدر ما أعني أن زوجك القوة تجيبه بس قوة (محفوفة بأدب وحذر وحزم ). .. >> حقيقة لا أستطيع وصف ما يجب عليك القيام به بحذافيره لكنك تحتاجين إلى وقفة قوية ! هذا إذا إنت بذلت كل الطرق الي أشاروا عليها الأخوات من ترجي ودلع ومسكنة .. أقدر لك طفشك .. من حقك يرجعك من بيت أهلك .. لكن يا عزيزتي كونك ما عودتيه على هذا الشئ من البداية بتتعبين كثير عشان يتغير الوضع فتحملي ... الله يسخره لك وتعرفين مفتاحه : ) |
شكرا لعودتك مره ثانيه اخوي
اقتباس:
انا طلبت انه يرجعني لانه كان يوم الخميس رحت مع اختي ودانا ولدها وهو من صحى جالس طلع راح لمكتب اخوه قريب من البيت وانا اتصلت عليه وهو في المكتب وقلت له تعال خذني يعني كان فاضي وماعنده اي مشاوير ليه مايجي ياخذني مو من حقي انا الي ازعل ؟؟ اما مسأله العناد هو كا اذا اصريت ولا زعلت انه ماجى ياخذني يقول تعاندين مدري ليه رغم انه له اكثر من شهر ماطلبت منه يجي ياخذني مره طلبت منه وزي العاده صرفني اتصلت على سواق وداني للبيت لاني ما ابي مشاكل من جد تعبت من هذا الموضوع اختي شيهانه ماقصرتي على الرد انا ماغلطت معاه في اي شي بس هو الان زعلان واول مره من تزوجنا يزعل ولا ياكل في البيت اي وجبه انا مازعلته انا طالبت بحقي ليه الزعل وكل ماقلت له تبي شي قال مابي منك شي اكلي عيالك واهتمي فيهم وانا ماعليك مني قلت له الحين تزعلني وتزعل انت يعني انت تبي زوجه ماتطالب بحقوقها يعني اسكت وانطم واذا تكلمت وطالبت بحقي تزعل وش الظلم هذا طنشني وراح بس انا مصره كل ماجى وقت الاكل اسأله نحط لك اكل يقول لا مثلا العشاء قلت ترا مسويه بيتزا ترا بتندم اذا ماتعشيت قال مابي شي وبعد مارحت انام سمعته يحوس في المطبخ ياكل بس ما اكل من البيتزا الي سويتها رغم انه يموووووووووووت فيها شفتو من الي يعاند انا ولا هو |
| الساعة الآن 10:35 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©