|
هل مازالت السرقة في السوق مستمرة(قصتي)
السلام عليكم ورحمة الله وبركاته
الحمد لله كما ينبغي لجلال وجهه وعظيم سلطانه أمس رحت للسوق وكان معاي زوجي وأطفالي .وكنت اتسوق في المول من محل لمحل وانا عادتي لما ادخل لمحل ادخل بسرعة اشوف واطلع واروح للي بعده مااطول في نفس المحل حتى يكفيني الوقت دخلت لمحل واشتريت وجيت طالعة بسرعة للمحل اللي بعده وزوجي جنبي يقول لي ليش تمشي بسرعة شوي شوي وانا اتنرفزت لأن وقتي محدود المهم شدينا في الكلام وقال لي روحي لوحدك انا والأولاد ننتظرك في السيارة (قالها وهو زعلان) أنا ماصدقت وقلت طيب وعلى طول عكست طريقي ورحت في حالي اتسوقت واشتريت ودخلت اخر محل وكان محل ملابس داخلية معروف مافيه الا أنا والبايع دخلت ودق زوجي وقال لي يالله ننتظرك روحي للمصعد وانزلي انا بالمواقف قلت له بس اخلص راح انزل وانا واقفة بالمحل جو ثلاث حريم يدورو حولي مو مبين منهم شي عباياتهم عالراس ومتغطيين كااامل حتى ايدهم جو جنبي وصرت انا بوسطهم وحدة راحت برا المحل تراقب يمين ويسار ووحدة عطتني ظهرها وصرت انا بينها وبين الجدار ووحدة قدامي تكلمني قالت لي لو سمحتي ممكن شوي؟ قلت لها نعم اتفضلي . عاد أنا استغربت اشفيهم في شيئ غريب قربت مني تقول لي (صدري كبير) وتمسك صدرها عشان اشوف وتقول : إيش أشتري أفضل نوع عشان يصير صغير أنا رجعت على ورى شوي قلت لها خذي هذا النوع مثلا (كان معروض جنبي ) وحاولت أطلع من بين حلقتهم المريبة وهذيك الثانية سادة علي المكان بظهرها طلعت ورحت للمحاسب وقلت له بسرعة الله يخلليك وحاسبت وطلعت قبل لاأطلع شفت اللي كانت برا المحل تراقب دخلت وصارو يتكلمون بصوت واطي كأنهم مختلفين على موضوع مدري ايش بينهم ركبت المصعد ودخلت السيارة بسرعة وقلت لزوجي وقال ماعاد فيه سوق لوحدك من اليوم ورايح (هذا اللي استفدته :)) ودي اعرف على ايش كانو ناوين . الحمد لله الله كفاني شرهم ورجعت سالمة . مدري هم كانو ناوين علي او على الشنطة الله وأعلم لكن وضعهم وأشكالهم وهيئتهم غريبة اللهم رد كيدهم في نحرهم |
االحمدلله على سلامتك طيب مابلغتي عنهم آمن المركز
والواحد يكون حذر اثناء التسوق ومنتبهه لحقيبته وخاصة مع وجود الاطفال |
الله يعينك
والله مااعرف |
الحمد لله على سلامتك
بجد خوفتيني |
السلام عليكم
هل ذكرتي وردك ذلك اليوم؟ هل نظرتي مباشرة الى عين من حدثتك؟ احذر من النظر لعيني هذا النوع من النساء خوفا من ان يقمرن الضحية وهو نوع من السحر يسلب إرادة الضحية ويسرق او يخطف دون اي اعتراض منه وأنصحك أيضاً بعدم كثرة الأخذ والعطاء معهم وكلمة مدري تكفي دون النظر لها والله يحفظنا ويحفظكم من كل شر |
و الله لا زالت منتشرة
انا شفت وحدة طلعت جوالها تكلم و جات وحده بحركه سريعه حاولت تخطف الجوال لكن الله ستر و الله يهدي الحراميه و يغنيهم بالحلال عن الحرام |
زين الكاشير وينه
ليش مااستنجدتي فيه!! يمكن لاحظو انه زوجك راح !! او يمكن يكونون رجال وليسوا نساء المهم الحمدلله هلى سلامتج |
سمو الأميرة منذ فترة كنا بالسوق أنا وأمي أختي كنا أنا وأختي نمشي مع بعض والوالدة ورانا وتكلم على الجوال وماسكة شنطتها وهي مفتوحة وباينة المحفظة وماشاء الله محفظة الوالدة منفوخة بس ترى لايغرك كلها أوراق المهم انا وأختي كنا نتكلم وسرحانين وبعدين إلتفتنا لنرى والدتنا لنرى حولها خمس حريم عبايات على الراس ضخام وطوال ومو يابن منهم غير عيونهم وطبعا أمي على الجوال وبعالم آخر نظرت إلى إحداهن بغضب أنا وأختي وتوجهنا لأمي ليتفرقوا ويبتعدوا عنها سبحان الله لوهلة شككنا أنهم رجال ولكن الحمد الله الله قدر ولطف وبالنسبة للسرقة أنا السنة الماضية انسرقت مني محفظتي وفيها سبع آلاف ريال يعني لازم الوحدة فينا تنتبه كثير وفعلا السوق من غير زوجك أو حتى أحد معك يخوف الله يحمي الجميع وانتبهي على نفسك عزيزتي رسيل مافهمت عليك بالسحر اللي تكلمت عنه ممكن توضحيلي أكثر ؟ دمتم جميعا في حفظ الرحمن تحياتي |
الحمدلله على سلامتك احرصي ماتكوني لوحدك فالسوق
الله يستر والله الدنيا صايره تخوف |
السوق يخوف حتى في غرف القياس جدا مخيفه
لازم يكون معك رجل مش مرأة الله سلمك |
الدنيا بكبرها تخوف مو بس السوق الله يحمينا يارب ويرد كيد كل كائد في نحره ..
اتوقع مقصدهم سرقه لانه مره حصلت لي هالحركه التفاف مجموعة حريم علي ومعي وحده مااعرفها وسط محل اكسسوارات ضيق جداً بعد ماطلعت اكتشفت ان محفظتي انسرقت وجوال اللي معي بعد انسرق ومن المضحك ان اللي انسرق جواله كانت تلاحقني عقب الحادثه ظنا منها اني من سرقت جوالها .. |
للاسف موجوده وانتبهي اختي تكونين بالحالك لازم يكون معك رجل
انا صار لي موقف واضطريت انزل لوحدي السوق طبعا مع السواق وفي سوق معين انا اروح له .. وشافني واحد وحسيت من تحركاته ومن نظراته ان يحاول يبي يوصل لشي وقاصدني مع العلم ان ( هالولد كل مارحت للمجمع اشوفه بالصدفة وحركاته غريبة ونظراته مرعبة ) يمشي وراي .. ونا بسرعة مشيت وطلعت من المجمع وركبت السيارة ومشيت من غير اشتري شي .. لان خفت وصلت سوبر ماركت ونزلت اشتري اغراض للبيت وكذا .. وانا مشغولة بالاغراض حسيت في حركة وراي واناظر لقيته وايده جوا شنطتي ويبتسم لي .. والله اني خفت وقلبي طاح صرخت لاشعوريا وهو مشى بكل هدوء وشفت ايده مافيها شي وفتحت الشنطة مافي شي مستغربـة لهذا اليوم ايش سوى .. معقول لاحقني بالسيارة ويمشي وراي وبالاخر ماسرق طيب ايش يبغى ؟؟؟؟؟؟؟؟؟؟؟؟؟ |
اقتباس:
امشي وراي ... يمشي وراه .. عطني محفظتك ... يعطيه المحفظة بكل طواعية .. وأخشى ما أخشى من قصة سمو الأميرة أنهن كانون ينوون تغييبها عن الوعي ومن ثم التعاون في حملها والخروج بها من السوق والمتاجرة بها الله يكفيها ويكفينا وياكم الشر ... ولهذا أهم نصيحتين المحافظة على الأوراد لأنها لا تستطيع التأثير على من قرأ ورده .. و عدم النظر في مباشرة في أعين الأغراب عند محادثتهم أياك .. يعلم الله أنه كلما حصل موقف أن أتتني مرأة تريد سؤالي عن أي شيء ... اسمعها وأرد عليها دون النظر الى عينها أو أن اميل رأسي وأعطيها أذني تحججا بالضوضاء ...حتى لا تجبرني على النظر الى عينيها .. والله يكفي الجميع كل شر |
| الساعة الآن 09:25 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©