|
زوجي واللاب توب
مساء الخير
بدايه اشكر كل من ساعدني بمشكلتي الاولى سواء بحل او دعاء .. بكتب كلام وااااااجد يمكن حد يقولي شي مو منتبهه له ويريحني واعذروني راح اتكلم بالعامي لان افضفض براحتي كذا اولا انا تزوجت عن حب .. تعرفت على زوجي بأحد المنتديات وكان عمري 18 سنه وصار بيننا ماسنجر سنتين وبعدها جوال سنه والعلاقه كانت 3 سنوات خلال هالثلاث سنوات كنا ع المسن اغلب يومنا يعني اجي من المدرسه ع طول مسن وحتى ايام الاختبارات كتابي بحظني ومسن ونقعد نسولف للصبح اما المكالمات بس قبل النوم وماتتعدى العشر دقايق بعد 3 سنوات تمت خطبتنا لمدة 6 شهور وتزوجنا تزوجت وعمري 21 وكان عمر زوجي 26 سنه اول ماتزوجت استغربت الوضع زوجي هااااادئ جدا وقليل الكلام وبس ع اللاب توب يتصفح منتديات وحدده ولايغيرررها ابد ولليوم على هالمنتدى رياااضي وبس حتى صباحية زواجنا لما صحيت حصلته ع اللاب توب بس ذاك الوقت ماستغربت او بالاصح ماكنت فاضيه بتجهز قبل يجون اهلي واهله .. المهم مرت الايام وزوجي بس لاب توب ولاطفشت قلتله بنطلع وقال يلا وسكره وطلعنا ماعندنا نظام ظليت سنه مأجلين فكرة الحمل وهالسنه راحت طلعات وجلسة نت بس كننا بمقهى "لاتقولون هذي حياتكم من قبل وتحملي" لا ع الاقل اول نسولف مع بعض مسن دوامه شفتات ولا يوم مثل دوامه اليوم الثاني فنومنا خرابيط المهم لاجا من الدوام يتروش ويرجع يجلس ع اللاب لين يقول مشينا نتمشى او ينام الحين عمري 24 سنه وهو 29 سنه ومازلنا ع نفس الموال اول مايجي بس اسأله كيف دوامك يايقول حليو يايقول تعب وبسسس ضقت من هالحال ويامى شلت لاب توبه ورميته بالدولاب حتى تكسر الشاشه مو ثابته فاشتريت له لاب توب جديد هالأيام كهديه انا ضايقه منه كاتمه لانه ماعاد ينفع الكلام وصايره ارفض كل شي بيننا وفهمكم كفايه بس بدون اقدم اسباب ولي ع هالحال اسبوع وشوي .. واحيانا اتنرفز فجأه لاني بس اجلس اراقبه وهو ع اللاب توب وانتظر يتكلم فلو يقول عطيني الريموت ودي اعتبرها سبه !! قبل اسبوع قلتله فلان طالع لي كم لنا متزوجين وقام يتمسخر وكذا وانا عارفه جالس يعد السنين قال سنتين وكم شهر قلت الا قول 3 سنين الا شهرين طيب قولي اش الشي اللي يربطنا خلال اليوم ؟ وسكت قلتله قووولي عمرك جيت من الدوام وقلتلي كيف يومك ؟ قال ماقول لان ماحس شي مهم اسأل قلت لاتبرر ايه ولا لا بسسس قال لا قلت عمرك جيت من الدوام انت وانا ماقلتلك كيف يومك ودوامك ؟ قال لا والله دايم تسأليني قلت ليه حتى لو بالغلط ماقلت وانتي كيف يومك ؟ وسكت وصديت عنه ورجع للاب توبه يتصفح لانه هو طبعه كذا مايواجه ولاياخذ ويعطي لانحرج يصمممممممت وبعدين يجي ويسوي حركه انه بااين ندمان او بيعوضني بس انا مابي كذا ابيييييه يسووولف معي .. بتقولون خلصتو السوالف خلال معرفتكم لبعض بقول لا لا لا انا مرت علي حياتي كلها بعد ماخذته لاني قلت مو معقوله فيه خلل بين وضعنا اول واحين لاننا نحب بعض للحين يوم فكرررت مالت علي طلعت انا اللي ماسكت اول واسولف له كل شي ابوي قال اخوي فعل امي طبخت وكل شي اسولف فيه وهو شكله مستمع اول ويرد ع كلامي بس ولكن مانتبهت وبرضو مو عذر الناس تتزوج 30 سنه ويسولفون مع بعض وبينهم حوار اما حنا حتى مكالماتنا كانت ومازالت لاكنت عند اهلي "اخبارك ؟ اخبار بنوتتنا ؟ ويسألني يبيني اسولف واقعد اقول سكون سكون كل شي زين ويقول اوك تصبحين ع خير بنام ونسكر ياناس ابيه يلغي اللاب توب شوي ويسولف معي صرت افتح لاب توب وماسكه بي بي اسولف واقلب بالتلفزيون وهو قدامي مايرمش بس يقلب بالمنتدى اففففففف نطلع كثير تقريبا بشكل شبه يومي نتمشى بالمجمع نتعشى ونرجع يعلق ع مواقف كذا يضحك ونبسط ونرجع صامتييين بالبيت الصمت الغالب على يومنا حتى بنتي صارت نفسيه بيننا تمشي بالمشايه لاقربت للاب توبه دفهااا بعيد وجت يمي دفيتها < ومبسوطه اوي !! ههههههه اضحك وكلي ضيقه ادري يحبني ويموت بترابي واثقه وكلامه لما نطلع واسلوبه وتلبيته لطلباتي كلها عارفه انه يحبني بس طبعه ذبحني تكفون اللي عنده حل لحالتنا يقول واللي ماعنده يدعي ربي يسخرنا لبعض ع طوووول ويحفظ بنتنااااا أبي ردود مقنعه الله لايهينكم لان اتسبب بمشاكل لها اول مالها تالي ادور اي زله والسبب طفشي من هالوضع فانتقده وادور الزله عليه .. ويامى كلمته وبطل نت وعطني من وقتك لو ساعه بالبيت ابشري ابشري ولااشوف تغيير .. ولا يقول بالبيت ماحصل شي اسولف فيه شوفيني برى البيت .. الله حق برى البيت يسولف ويعلق وكذا ونضحك وبجاوب على اسئلتكم يمكن تطلعونه من حالة الصمت اللي تتملكه بالشقه طول ماهو ع اللاب توب اااااه واعذروني لو تكرر كلامي ولا لاني فتحت موضوع جديد وكتبت بدون ترتيب |
طيب افترضي ترك اللابتوب ,, ايش البديل الي محضرته له ؟؟
ثانيا ً , الزواج شرطه الاساسي الرضى لازم ترضين بزوجك مثل ماهو وتغيري عيوبه بهدوء تام من غير ما يشعر يعني اذا هو دايم على اللابتوب , ليش ما تسوي مثله سولفي معاه على اللابتوب العبي وياه لعبة انتي بلابتوب وهو بلابتوب اذا جلس يسولف سولفي له عن اخر صيحات اللابتوبات ادخلي عالمه وكوني قريبه منه افهميه عشان تعرفي اهتماماته بعدها دخليه على مواقع علمية مواقع تعلمه حقوق الزوجه وتعلمه كيف يهتم بزوجته شوي شوي وراح يجي معك ان شاء الله |
كم ساعه يجلس على اللاب ؟
وماهي اهتماماته كمتصفح في النت ؟ |
اختي في الله حين يجلس على الشاشة اجلسي بجانبه و لا تتركيه ابدا اذا كنت مشغولة بعمل ما احضري هذا العمل و ضعي كرسي بجانبه و اجلسي معه احضري ابنتك بالغرفة التي هو فيها حسسيه بحالة البيت حتى و ان كان جالسا على الجهاز يوما بعد يوم سوف ينزعج من جلوسك و من البنت و سيمل من هذا الجهاز لانه سيشعر انه مقيد و سيتركه وفقك الله ورعاك |
اقتباس:
وانا راضيه فيه بس ماني راضيه بهالطبع الى متى يعني بيظل صامت هو اهتماماته الرياضه وصاير يقرى سياسه اخبار وكذا ودايم التلفزيون ياقنوات الجزيره الرياضيه ولا العربيه عن ادخل عالمه انا مالي بالرياضه ولاجت مباراة مره يتحمس ويسولف صححح لكن مايسولف الا بالشي اللي مالي فيه ابددد .. نفسي احب الكوره عشانه وكذا بس يبان علي اجامل واسوي روحي اتابع دقيقه وعشر دقايق عيوني بلاب توبي وعن ادخله منتديات كنت ارسله ايميلات بس هو اعتزل فتحة الايميل من تزوجنا افتح ايميله القى رسايلي مافتحها فمامر على ايميله ابد :( مشكوووور |
اقتباس:
قبل الدوام لاصحى بساعتين او 3 او عشر برضو لاب توبه يكون مفتوح يعني من تزوجته ماذكر شفته جالس الا ورى شاشة لاب توبه سوااء جالس يقرى شي او بس مخليه مفتوح عشان لاقلب قنوات التلفزيون وماحصل شي رجع للنت واهتماماته مثل ماذكرت لاخوي ابن المكلا منتديات رياضيه .. واخبار .. ويتصفح سبق اكثر شي |
عزيزتي.. الله يفرج همك إن شاء الله.. ويسعدك انتي وزوجك.. ابغى أسألك.. هل حاولتي.. تتكلمي معاه في الموضوع (كتابةً)..؟ عن طريق الماسنجر.. مدامه مايتحاور غير بهذه الطريقة.. >> الحل << الإنسان ممكن يتغيير ويطور نفسه للأفضل.. لو شخص عنده طبع سيئ.. بالتدريج يغييره.. بس يكون مقتنع من الداخل ويخليه هدف في يومه.. " قولي له انه هذا الموضوع مهم ويؤثر على علاقتكم بشكل سلبي ولازم تلاقو حل.. ومعليش لو تضغط على نفسك شوية عشان حبنا وحياتنا" اتفقي معاه.. انه يتكلم معاكي نص ساعة في اليوم_ مثلاً ولو يفكر في المواضيع الي حيتكلم معاكي فيها يكون أفضل.. عن شغله.. عن الأخبار .. عن بنتك وأهلكم.. وأمور البيت وأشياء كتير.. طبعاً حتساعديه واللاب توب يخصص له أوقات معيينة.. ويحاول يلاقي اهتمامات ثانية تشغله.. أتمنى أكون أفدتك.. |
اقتباس:
ازعل واروح العب بجوالي بغرفتي ونص ساعه بالكثير ويجي يقول وينك اجلسي عندي هو مايحس انه مقيد هذي طبيعته ويحس انه طبيعي جلسته ع النت طول الوقت مشكوره حبيبتي |
اقتباس:
شوفي انا يمكن عشان تعودت دوم اتواصل معه واحين مو محصله هالشي مثل ماابي كبرت المشكله وصارت محور اهتمامي وكل شي متعلق بسوالفه فأدقق واجد واتعب واتعبتني المقارنات وادري انه غلط والوضع تغير وكل شي والروتين و و لكن مو لهدرجه خفيت عن اول ومقارناتي لكن احس من حقي يسولف معي بالبيت وعلى قولتك نص ساعه بالضبط مثل ماطلبت قلتله من اليوم ورايح اول ماتجي اجلس معي نص ساعه سولف بدون لاتفتح اللاب توب وقال ابشري واول يوم نسى وفتح اللاب فسكت وتحطمت طبعا هالكلام من اسبوع وشوي ومن بعدها وانا شايله عليه واتخاصم معاه يامى قلتله افتح الماسنجر ابيك شوي مع انه قدامي واسولف ويقعد يضحك ويحسبني امزح وانا جاده اقول يمكن مايعرف يسولف معي الا هنا .. لكن القاه شوي ويقول هذا انا قدامك ويسكر الماسنجر ويكمل بالنت وانا اجلس متحطمممه .. كنت احفظ محادثاتنا ايام الملكه وكلامه ومتى يجمعنا بيت و و واوريها له بعد زواجنا ابيه يحن ويدري اني حنيت لهاللهفه لا لا خلاص مابي لهفه ابي بس يحس اني احتاجه لو شوي يعيييين الله .. وربي تعبت واتعبته معي من كثر ماتهاوش معاه على هالسالفه ولا اي شي بس لاني شايله بقلبي عليه ولاني مقتنعه بحياتنا كذا دعواتك |
ياختي دنيتي بنتي...اذا هو يعزك ويغليك بقولك علي شي اطلبي منه ان هالشهر مايجدد اشتراكه في النت قولي له فتره بس لاني انا كنت مثله احيانا اجلس علي النت ومادريت الا زوجتي جايه وتقول يانا يالاب توب وراحت زعلانه وبعدها نادر مادخل النت في البيت...وذا كان يحب منتديات الرياضه خليه يشترك بقنوات الرياضه ولا جيبي له هديه كرت الجزيره..
|
يا أخية:
في مجتمعات الرجال نجد رجالاً لا يتحدثون إلا لماماً أو على طريقة السؤال المتبوع بجواب. غير ذلك لن تجدي...هذه طبيعتهم. بخصوص زوجك أظن ظناً أن الملل قد بدأ بالتسرب، إضافة إلى إحساس الرجل أنه ليس هناك جديد لديك كي يراه أو يسمعه. علاوة على ذلك فإن بعض الرجال ينصرفون عن الحديث مع زوجاتهم بسبب غلبة الأفكار في أذهانهم عن أحوالهم وأحوال أسرهم الحياتية. ::: يا أخية: إن الثلاث سنوات من عمر الزواج تكون منعطفاً هاماً لكمون الحب بين الزوجين كما تقول الدراسات. لذا فيحتاج الزوجان إلى التجديد كي يعيدان الحياة في أوصال المحبة والمودة بينهما. ::: يا رعاك الله: ما يمنعك أن تقومي بالتجديد في الشكل والهيئة؟ ما يمنعك أن تجدّدي في ترتيب وتنسيق بعض الأثاث في البيت؟ ما يمنعم أن تستخدمي معه بعض الأحيان سياسة الصمت كي يحاول هو بنفسه الحديث؟ ما يمنعك أن تعرفي وتجمعي بعض المعلومات الرياضية للحديث معه فيها؟ ما يمنعك أن ترسلي له بريداً الكترونياً عبر ماسنجره (اقتراح الأخت قلب حنون)+عبّري له عن كل عواطفك، ومحبتك، واحتياجك له+وضّحي له احتياج المرأة للحديث، وإحساسها باهتمام الرجل بها وبوجودها+عاتبيه بلطف...بعد أن يقرأها لا مانع من التدلل الأنثوي بعض الشيء. أيضاً حاولي –مثلاً-أن تقدمي الدعوة لوالدتك أو والدته بزيارتكم ذات يوم، وامدحي زوجك أمامها. استعملي معه أسلوب الأسئلة المفتوحة. على سبيل المثال: كيف فاز ذاك الفريق؟ ماذا كانت خطة اللعب؟ وهكذا دواليك... |
اقتباس:
وبالنسبه لكرت الجزيره موجووود هو يتابع المباراة بالتلفزيون ويتابع التعليقات وكذا ويعلق بالمنتدى .. لدرجة احيانا مباراة الفريق اللي يحبه لو مباراتهم 10 ونص بالليل ودوامه 11 يقوم يتصل ويتعذر بإنه بينشغل ساعه !! وهالشي ناااادر لكن دامه حصل فهو مدمن كوره بس منضبط بدوامه مشكور |
زوجك هذا طبعه للأسف ، نفس زوجي .. :25:
المشكلة لو شلتي اللاب توب منه ، أو هو استغنى عنه .. فراح تلاقيه يخرج برة و يسهر و ما يرجع غير متأخر و يمكن يتعرف له على شلة سيئة لا سمح الله و يلقى معهم شئ اخر يشغله .. من جد أتكلم ،. أنا خلاص صرت مثل زوجي ، ما أتكلم .. و بيني و بينك اريح :d و ما صرت أسأله و أهتم في ولدي و في نفسي .. و هو وقتها بيبدأ يهتم فيك إذا شافك مطنشته |
اقتباس:
طيب بالنسبه للشكل والتغيير اوك مقدور عليها .. طيب هل فعلاً هذا حل ؟ لانه لو بفكر يوم اني عروس كان هذا طبعه فهل تغيير بالشكل الحين بيصنع فارق بالنسبه للاثاث وكذا ماتوقع ميزانيته تساعد بهالشي ولااحسه يهتم لهالامور حيل انا اتمنى بس هو مايفرق عليه كثير اجمع معلومات رياضيه انا فكرت فيها بس لو سولفت رياضه لاني حاولت كذا مره ابيّن له اني اعرف اوقات لعب فريقه .. وكذا وفعلا ياخذ ويعطي ويبدى يسرد حياة اللاعبين وكذا لكن كيف اخليه يسترسل بالسوالف الثانيه طيب ؟ يجي من نفسه ويقولي سويت وفعلت وبنخطط ونفعل وبنغير وبنسافر و و و ليه مايقولي كذا ؟ بالنسبه للايميل مثل ماقلت كنت ارسل ايميلات اللي حقوق وواجبات الزوجين اتجاه بعض ولازم بينهم موده ومن هالكلام اشتريت كتاب الرجال من المريخ والنساء من الزهره وظليت اقرى واقرى قدامه ويستمع لي وصح استمتع لكن فتره وبنص كلامي عيونه لشاشة اللاب كنه ينتظرني اخلص فبطلت اقرى .. وقريت كتاب اسعد زوجين بالعالم وقمت اضرب له مثال من حياتنا واحسسه اننا فعلا سعيدين وحياتنا مثاليه .. قلت يمكن صمته لانه ضايقته بكثر ماقوله سولف فصار يرتبك فبحسسه بأني احبه مثل اول واكثر ولااثر هالشي لكن برضو مانفع ولاحرك فيه شعره سواء مدحت حياتي معه او حسسته بالتقصير اشتريت دفتر وحطيته جنب راسه وقلت كل فتره يصدر من احدنا تصرف حلو ويسعد الثاني يعبر له هنا وكنت مبسوطه انه خطر ببالي شي احسه حلو .. ومدري هو صح تصرفي او كذا اجبره انه يعبر لي غصب كتبت مره بس انا ولا علق فتحطمت وقمت وخبيت الدفتر بدولاب ولاعاد طلعته // اعترف ان نفسي قصير اجرب عدة طرق بس ماعندي عزيمه استمر بسرعه ايأس حالياً النفوس مش ولابد .. لكن لاتصافينا بستخدم الاسئله المفتوحه وبجلس اقرى بأخبار الرياضه بس اتمنى اعرف كيف اخليه يسولف باشياء غير الرياضه لانه مو صعب اسأله بالرياضه ويجلس يقولي معلقات لكن ماراح يلفتني هالشي او يرضيني شكراً لك |
اقتباس:
اقول تعالي انتي وولدك سولفي لي واسولف لك وولدك يسولف لبنتي :d طيب ماعرفتي تغييرينه لو شوي ؟ وش حسيتي اثر فيه غير التطنيش ؟ يختي انا اخاف ابطل اهتم فيه وينبسط وتصير حياتنا كذا على طول ! ماراح اقتنع كذا ومو اريح ابد لاني احبه وماتخيل حياتي معه تطنيش وعايشه عشان نفسي وبنتي !! لا ابي اعيش لنفسي ولبنتي وله ابي اعيش حياة يملاها حب واخذ وعطى وتفاهم وكل شششي حلووو للحين مايأست ياخوفي بعد سنه اجي واقول تصدقين ياروح صرت اهتم ببنتي وبنفسي وريحت راسي يوم شلته من بالي ههههههههههه الله يستر الله يسعدك ياخيّه |
أختي الفاضلة ...
مشكلتك ليست فريدة من نوعها , وزوجك ليس الرجل الوحيد الذي يفعل ذلك فهو يتصرف وفق طبيعته وهواياته هوني عليكِ ولا تتكدري , فحل مشكلتك من خلال المشكلة نفسها تعاملي مع هوايات زوجك كمحبة لها , ولست كارهة لها . أقبلي عليه واجعليه بصفك لا ضدك , وشاركيه جلساته واهتماماته على النت وتابعي معه القتوات الرياضية والإخبارية واخلقي حواراً معه عن الأمور التي يهتم بها تحدثي معه بالرياضة والسياسة وأشعريه أنكِ مهتمة باهتماماته ومن خلال الحوار أخرجي من الموضوع الأساسي بتدرج ( على طريقة موضوع يجر موضوعاً ) لموضوع يهمك , وبإمكانك استخدام نفس الألفاظ التي يستخدمها في حديثه لموضوعك الذي تودين الحديث فيه . خروجكم يومياً من البيت معاً أمر طيب , وهذا يدل على أن زوجك مهتم بكِ وليس سيئاً بكل شيء , ولكنه مقصر بعض الشيئ . |
اقتباس:
يعني اعصب وازعل ويصير بيننا نقاش حاد وتوصل لقل احترام وكله بسبة هالمشكله ماعاد يحب يتقبل اني اقوله سولف .. ويصير يقول من تقولين لي سولف يحتررر جسمي واتوهق مدري بإيش اسولف .. كسر خاطري يوم قال كذا وحسيته فعلاً مو قادر يفتح اي موضوع معاي فبطلت فتره اقول سولف وصرت اسولف انا عن اللي قريته بالمنتديات ومشاكل المتزوجين و و و فماحصلته مستمع جيد بعد فرجعت لطبعي الاول وطلبي "سولف" وهالمشكله اجزم ان كل اللي ردووو خذوها ببساطه وانها مشكله تافهه وبكل البيوت بس انا اعاني من اللي ورى هالمشكله حياتنا صايره لاتطاق بالبيت بحال تضايقت من هالسالفه لاني ان كبرتها كبرررت بقوه ويصير اليوم جدا سيئ واتعب حيل من المشكله اللي تصير معنا لانفتح هالموضوع بإذن الله بسمع لنصيحتك ونصائح الاخوان والاخوات واحاول قدر الامكان اني احب هواياته بس تمنيت احد يلقى لي حل تكون المبادره منه لان من تزوجنا لليوم وانا اللي ابادر بخصوص هالمشكله مشكووور |
لا نستطيع أن نقول له: بادر.
فلا توجد طريقة للتواصل معه إلا إذا أقنعته بالتسجيل هنا. ::: لا بأس! بادري أنتِ، واحتسبي الأمر. |
اقتباس:
وان شاء الله بحتسب الامر |
يا أختنا الفاضلة:
إن من أسهل المداخل على الناس وشخصياتهم كي يستأنسوا بالحديث للآخرين هو أن نتحدث معهم عما يحبون ويزاولون، ونضغي لهم بكل جوارحنا. ومع الحديث نستطيع جرّهم إلى نقاط أخرى وهكذا. أيضاً بإمكانك ممارسة سياسة الصمت معه من فترة لأخرى، أو الجلوس في الغرفة الأخرى كي يفتقد تواجدك حوله فيأتي للحديث معك. |
بصراحة يا اختي..انتي امنيتك حلوة بس طلبك منه صعب يتحقق...كيف تجبرينه يتكلم وهو ماعنده كلام...لو كان عنده كلام تأكدي بيتكلم بدون ماتطلبين منه... هل زوجك بيتوتي ؟؟؟
واعتقد ان الوضع طبيعي..بس لأن زوجك كثير يجلس بالبيت تحسين ان الوضع مو طبيعي اتوقع ان شخصية زوجك من النوع الثــقيل والجاد في حياته...يعني مو مثل اللي يسولف ويعطي ارانب وكلمه صحيحه وعشر من راسه ههههههه لو تابعتي الوضع اللي حولك..أخوانك أو الأقارب عموما راح تحصلين فيهم من اسلوبه مثل اسلوب زوجك ويمكن أشد حاولي أنتي بنفسك تزورين اهلك واهله وصديقاتك وراح تحصلين مواقف وسوالف وسولفي عليه واكيد راح يدخل معك بالسوالف ويتناقش معك..ترى كل سالفه تجر سالفه...يعني يمكن من سالفه تذكرينه بمواقف صارت له او شافها وعاش احداثها حتى لو كانت لغيره |
ياحلوووووووووه الرجال ماينفع تبيني لهم أنك مهتمه فيهم وتلصقين فيهم ,,, لازم تبعدين شووي خليه يشتااق لك ... سجلي بمعهد أو كملي دراسة أو تووظفي ........ الخ أهم شي لا تخلينه كل اهتمامك !!! والله يوفقك ياقمر
|
اقتباس:
جزاك الله كل خير .. وان شاء الله راح اتبع هالسياسه من فتره لفتره بجانب الحديث عن هواياته :28: كل الشكر |
اقتباس:
اي نعم بيتوتي جداً .. وماخالط احد خارج مجال العمل الا فترة النفاس فقط اما قبلها سنتين ابد .. والحين لارحت لاهلي بس يروح لهم اما طول ايام الاسبوع فدوام وبيت وطلعه معاي .. تبارك الرحمن مابظلمه زوجي يمتلك كثير من الصفات الحلوه بس من يكون بالبيت احس يقصف كل شي حلو فيه من خلال تجاهل وجودي .. عن اني اسولف بمواضيع وكذا اي يتفاعل بس لما نكون برى البيت وكذا بالبيت من اشوفه ع اللاب توب تتقفل نفسيتي ولو سولفت ماحسه يعيرني اهتمامه بجد يجامل وباله مشغول وده يرجع يتصفح صبرا جميل والله المستعان مشكوره اختي |
اقتباس:
عارفه حبيبتي هالنقطه لكن غصبن علي .. وبعدين ابتعد فأنا اجلس اسبوع هنا واسبوع عند اهلي او اكثر يعني بسبب عمله واني امل هنا وهو مايقصر ففترة البعد وجي صايره بيننا لكن ماتغير الوضع اما دراسه حاولت مرتين وبديت لكن مالله كتب والوظيفه قبل زواجي توظفت فتره ومليت .. اتمنى ادخل نادي رياضي لاني استمتع فيه قبل زواجي واتعرف على بنات ووناسه بس دوامه مايساعده يوديني ويجيبني وماحصلت نادي فيه حضانه للحين :15: ولا كان تشجعت اروح بسواق ولو اني اخاف بس يمكن يحصلي احد ثقه ويتنظم نومي وماامل اغلب الوقت وو و < حست انه الحل هههههههههههههه يسعدك ربي خيتو |
يابنت الحلال مافي أمل الرجال يتكلمو زينا أو يجارونا احنا محصلناش :24: فوضعك طبيعي جدا جدا . ابحثي عزيزتي عن شيء آخر يلهيك عن سالفة الصمت أتوقع أنك الآن تدرسين بالجامعة , فانشغلي بدراستك و إذا انقطعتي أكملي إذا كانت ظروفك تناسب و زوجك ماعنده مانع ,, بتصير عندك أحداث و صديقات , و تعرفي البنات سوالفهم ما تخلص:21: , بيكون عقلك مليان من الكلام و وقت يحكي زوجك أنتي بتقولي خلاص اسكت خليني أرتاح:17: الحمد لله بما أنك تقولين أن زوجك يحبك و مايدخله بالنت شيء عادي , اهتمامات و هوايات لا تضر حياتكم و بما أنك قرأتي كتاب النساء من الزهرة و الرجال من المريخ , فالأغلب أنك كونت فكرة عن طبيعة هذا الشيئ نعم يوجد رجال ثرثارون لكنهم قلة ,,و الأغلب كزوجك تأقلمي مع الوضع ,,,فأنت بسعادة |
اقتباس:
اقتباس:
محدثك من صنف الذكور وليس انثى احم احم طيب يا اختي دامك قلتي ان زوجك بيتوتي فهذا معناه ان السوالف عنده محدوده لانه من الدوام للبيت طبعا راح يتغير..خاصه اذا كبرت البنت شوي وتبدأ بالكلام وحركات وشقاوة الاطفال فزوجك راح يتغير بالبيت طيب عندي اقتراح ليش ماتطلعون يوميا لمدة ساعه او نصف ساعه على الاقل يعني منتزه او سوق او مقهى منها راح تشوفون الناس واحداث خارجيه..تزيد من الكلام بينكم وشوي شوي والحمدلله اهم شي ان زوجك فيه الصفات الحلوه ومحترمك وبالنهاية اوصيك بالصبر واشغال وقتك وعدم التفكير والاحساس بإن هناك مشكله |
أختي الكريمة أظن أن المشكلة الأساسية في حياتك هو ما يعتريك من تغير غير متوقع من جهتك وهذا التغير هو بين الحياة الماضية التي عشتيها معه وبين الحياة الزوجية التي تعيشونها الآن انت استمريتي معه فترة من الزمن على نمط الشوق والحب واللهفة في أن تجتمعوا تحت بيت واحد , وكانت طريقة التواصل الوحيدة بينكم هو أن تلتقوا على المسنجر ... وبعد هذا تحقق الحلم وأصبحت أنت وهو تحت ظل بيت واحد فتغير نمط الحياة وتحقق المراد ولعله كان أقصى آمالكم ورغباتكم ... في السابق جمعكما الهدف الواحد وحققتماه , واليوم حياتكما روتينية ولا توجد أهداف مشتركة بينكما سوى ماهو مخزن في عقليتكما عن كل زوج وزوجة ... الحل : في أن تنشئي روابط جديدة بينك وبينه تناسب طبيعة حياتكما الآن فحياة المحبين ليست كحياة الأزواج تماما ... فلتكن الأهداف دينية مثلا : - التشارك في بعض العبادات كالصيام والصلاة .. - قراءة كتب واستماع محاضرات وحضور ندوات أهداف اجتماعية - برنامج صلة رحم دوري مرة عند أعمامك ومرة عند أعمامه مرة عند أخوالك ومرة أخواله بالاضافة لوالديكما ... - انشاء صداقات قوية قائمة على تقوى الله أولا مثلا صديقتك وزوجها تعرفين عنهم أناهم أناس خيرين يخافون الله ليس لهم في القيل والقال ... أهداف صحية - ممارسة الرياضة مثلا - المشي يوميا أنت واياه أهداف ثقافية - قراءة كتب - حضور ندورات للأسرة وغيرها أختي لابد أن تكون هناك أنشطة بينك وبين زوجك تخرجه من حالة الصمت فهذه هي طبيعته ولابد أن تحاكيها ببديل, زوجك لا يعرف كيف يبادر بالكلام ولكن لو فتحتي معه نقاش يناقش وعليكِ أنت المسؤولية وفقكما الله تعالى |
اقتباس:
الحمد لله على كل نعمه والله ادري اني بنعم كثيره بس هالمشكله ومن فراغي بالبيت وانتظاري لجيته من الدوام عشان يغير جوّي تخليني اكبرها حيل وتسبب لي مشاكل بحياتي ماعلينا عن الدراسه مثل ماسبق وقلت مالله كتب مع انها دراسه عن بعد فماتشجعت لا بنتي كانت صغيره وكذا غير انها دراسه عن بعد فمافيه ذاك الحماس ان ربي كتب بحاول السنه الجايه يعني كل الرجال ع الصامت ؟ قليلين كلام بس لهدرجه كلهم معقوله ؟ :( الله يعطيهم مما عطانا ان شاء الله يااغيره او آخر الحلول اتأقلم :21: < عنيييده مشكوره |
اقتباس:
لو تتبعت ردودي كان عرفت انه نطلع واجد ويعني تقريبا خمس ايام بالاسبوع ونسولف او نعلق على موقف يمر علينا وكذا بس اللي انا اتكلم عنه واستغربه الصمت كلش بالبيت كنه برى البيت انسان وبالبيت انسان ثاني :( فهو ع الاقل يطلع للدوام يمديه يتكلم عن الدوام انا ماعندي الا بنتي وشقاوتها او مالي الا اقوله تتذكر وتتذكر كلام بالماضي عشان كذا اتمناه يسولف من حاله عن اللي يصادفه بدوامه خصوصا دوامه يصير فيه اكشن :24: وشكراً مره ثانيه |
اقتباس:
لكن لاجينا للجد وفكرررت هالكلام اول سنه ونص السنه الثانيه يمكن انه مصدومه انه مابيننا تواصل قوي بالكلام لكن يمكن اثاره للحين فعلاً يمكن والله مدري يمكن يمكن جد انه للحين احننن لسوالفه معي واهتمامه لأي شي اقوله :( واحللللى ماقلتي انه انشئ روابط جديده بيننا .. لكن وين الزوج اللي يساعد ؟ انا قلتله نطلع يوميا نمشي في الممشى منها نغير جو وبعيد عن المجمعات وزحمتها تحمس مره مرتين وبعدين بطططل بحجة تعب ويكفيني ارتباط الدوام وحررر وقرف ومن هالكلام هو مستعد نطلع دايم بس على مزاجه وبدون ارتباط وخصوصا دوامه جد مو مساعدنا مره اخر ليل مره اول ليل مره اول نهار ومن هالكلام كل يوم غير الثاني ومتى ماصحى طلعنا وتمشينا شوي قبل دوامه فمانقدر نرتبط بأي شي يجمعنا غير هالطلعه اللي تكون حسب وقت دوامه بس يعني نادي ابيه يدخل لمصحلته ومنها بنفس الوقت اروح النادي فيكون يوديني مايتعذر بأن الدوام عليه كفايه لكن مو مقتنع انه يرتبط بأي شي غير الدوام بس لاجا من الدوام وحسيت بخاطري اتكلم معاه راح افتح هالموضوع وانه لازم شي يكون يشغلنا ويربطنا بعيد عن طلعة مجمعات وتمشيات ومطاعم ابي شي نستفيد منه مشكوره غلاتي |
زوجك واللاب توب .. زوجي والجريدة ;)
يقرأ الجريدة وكأنه سيمتحن فيها :d عزيزتي.. أدرك أن الأمر ليس تافهاً ولا بسيطاً .. وأن تكوني مع شخص .. أي شخص في مكان واحد ولفترة زمنية طويلة دون كلام هو أمر غريب .. فما بالك بزوجكِ! هو عيب .. ولكن في نفس الوقت هو طبع .. وأنا شخصياً اعتدت أن أركز على إيجابيات زوجي ـ وهي كثيرة مثل زوجكِ تبارك الرحمن ـ حتى أتمكن من التكيف مع سلبياته. لن أقول لكِ إنني لا أسأله .. بل أفعل أحياناً وعلى فترات متباعدة .. دون ضغط ودون إلحاح .. فقط حتى يتذكر أنني لازلت صابرة على هذا الطبع ;) .. أما أن نكبّر الأمر ويتحول إلى زعل وخصام ونقاش حاد وقلة احترام فلا أؤيدكِ في هذا بالطبع .. لأنك في كل الأحوال ـ وقد رأيتِ ذلك بنفسكِ ـ لن تكوني سعيدة عندما يجاملكِ وترينه يبحث عن شيء يقوله ولا يجد! |
مرحبا
بصراحه ماعندي شي ازيده على كلام الاخوان بس بسالك اذا انتي بالرياض ممكن اساعدك في ايجاد نادي فيه حضانه |
انصح بالدخول على خطه بهدوء ومناقشته في بعض اهتماماته وشوفي قد ايش ممكن يفك ويفضفض
الحب المندفع او المستبد قبل الزواج ممكن يخلي الحياة رتيبة بعده لكن ممكن تكون الحياة قبل الزواج لها لون وبعد الزواج لها لون مختلف آخر لكن جميل . |
اقتباس:
اول مره انام قبل يجي رحت انام قبل ساعه ونص وتوني صحيت الا حصلته جاي من الدوام من ساعه وجالس ع اللاب توب :21: فقلت يابنت مشيها سألته يبي عشا فقال لا وفتحت لاب توبي على ردك حبيبتي ماشاء الله الجريده تنتهي بسرعه :22: مشكلتك اللي صفحات وصفحات ماتنتهي :29: لكن الله قادر يطفشه منه قادر ياكريم الحين صامته هههههههههه وبصمت حتى يمل الصمت من صمتي خخخخخخ الله يسعدك ويخلي زوجك يكره الجريده شوي شوي يارب نورتي |
اقتباس:
لا والله مو في الرياض بس عموما ماقصرتي شكراً |
اقتباس:
وجاري البحث عن اللون المختلف الآخر للحياة الزوجيه ويارب يكون جميل شكراً لك |
للأمانه قمت من عند جهازي ورحت وجلست جنبه ع اللاب توب
وقمت اقول وش تتصفح وقام يقرى عن دوامه وانظمه جديده ومدري وشو وبعدين سكر شاشة اللاب وقال ايوه وش عندك نايمه ؟؟ < انا عيوني طارت معقوله كذا سكر اللاب وسألني اخيرا اي سؤال قلت ابد تعبانه ماتشوف اليوم مانمت الا ساعتين وقال اها وجيت للاب توبي وخليته اول ماخلصت الجواب هههههههههههههههه انتظر هاللحظه من 3 سنين ويوم بدى بالكلام كشيت او بالاصح ماصدقت ع الله فقمت على طول عند لاب توبي هههههههههههههه برب برجع اجرب هههههههههههههههههههههه مهره لاتيأسين فيه احد دعى لي اكيد لايكون قرى موضوعي وقام يطبق من نفسه ؟ |
اي صح حنا ماكنا نتكلم من امس متخاصمين يمكن لاني بادرت وجيت جنبه قال برد لها الحركه انا بعد < يافرحه ماتمت
خلاص غيرت رايي ماراح ارجع اجرب :( |
يأختي ترى كثر الطلب منه انه يتكلم تزيد المشكله
اجلسي معاه على اللاب توب وتصفحي معاه المواقع التي يتصفحها وتابعيها معه وناقشيه في المواضيع الي يحبها والمواقع التي يدخلها زوجي مع انه قليل الكلام ويجلس صامت على النت فصرت ادخل في المنتديات التي يشارك فيها واناقشه في المواضيع التي فيهامع انها لاتستهويني لكن لكسر جدار الصمت بيننا |
| الساعة الآن 12:58 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©