مصيبه ما بعدها من مصيبه
 

بسم الله الرحمن الرحيم السلام عليكم كيف حالكم وكيف الصيف معكم ؟؟؟؟


كل عاده لا اجد مكان انثر فيه واتحدث بطلاقه وبدون قيود الا هنا بلمنتدي عساني الاقي الحل الي عجزت الاقيه

بمكان ثاني بلعربي وبدون لف ودوران اخوي تملك وقبل ما يملك على زوجته راح وسئل عنهم بحكم انهم

مو من منطقتنا سافر هو والوالد وسئل عنهم امام المسجد وقالهم انهم ناس دين وخلق واصل وفصل وووالخ

خطبو وحددو الملكه وسارفنا ودقينا مشاور الف كيلو اكثر من 13 ساعه بطريق واخر شي مصيبه

ما بعدها من مصيبه لابسه فستان مشلع ومخلع ولابسه باروكه والبنت طلعت سمراء قلنا ما عليه

امي تطالع فيني بنص عين وشويه وتبكي وانا من القهر شوي وابكي وبعدها جو خواتها والمعازيم

حسبت نفسي في امريكا الجنوبيه لابسين قصير فوق الركبه وعاري ومحلقين شعورهم ولابسين باروكات

ودخلو رجال اخوان العروس وعيال عمها ويرقصون مع بعض بنات ورجال استغربت كني مو في السعوديه ويصورن بلجولات والكميرات وقمت لبست عبايتي انا وامي واتصل علينا الوالد وطلعنا على طول
والاغاني شغاله من بعد صلاه العصر ولا شفتهم صلو لا مغرب ولا عشاء اقسم بالله اني حسيت
بقهر عمري ما حسيته حنا ناس اصل وفصل ودين واخلاق اخرتها يكذبون علينا يقولون انهم قبايل واخرتها طلعو ؟؟؟ ووالدها يقول انه شغال بشركه ارمكو وانه صاحب شركه بس عشان
يغري الوالد ويعلمه ان حنا عيال نعمه وناس ؟؟؟؟
الي الحين رافع ضغطي ليش يكذبون علينا وليش امام المسجد ما خاف الله فينا يوم يقولنا انهم ناس دين وخلق وهم عكس ذالك لا دين ولا اخلاق بنتاهم لابسين ملابس عريانه والاغاني شغاله
والرجال داخله خارجه بينهم ويرقصون حريم ورجال تقل انك في بلد اوربي وليش والدها يقول انه من القبيله الفلانيه وبعد ما اثبت المملك عقد الزواج قرا اسمه بلكامل طلع من قبيله ثانيه ؟؟؟؟ونعم فيها بس ليش يكذب وما خاف الله ؟ما نقول الا حسبي الله ونعم الوكيل محتارين واخوي كنه مسحور والوالد مرتفع ضغطه وامي تصيح وتبكي
وانا من قوه الصدمه اسبوع صايمه ليله ونهار وحسبنا الله ونعم الوكيل

اخوك ملك وانتهى الأمر وهو راح يعاشرهم ويعرف خيرهم من شرهم

لا تتدخلي بشيء هي زوجته الآن

:eek::eek: لبسها للباروكه بحد ذااته مصيبه

حبيبتي اسمعي كلامي وخوذي بنصيحتي اخوك هو اللي تزوجها يعني في الاول والاخير هذي حياته وانتي المفروض ماتتدخلي فيها يمكن هم لعبو عليكم صح بس يمكن البنت تتغير بعد الزواج والبركه بااخوك ان شاءالله والله الهادي .. موفقين ان شاءالله

اولا اختي انتم اخطأتم كان من المفروض ان ترون الفتاه وتتعرفون عليهم انتم بأنفسكم لكن الان انتهى كل شي ..
وانا مع اختي (شوقه2009) اوافقها في رأيها ,,

الله يعوضكم خير

بكل بساطه اذا لم يقتنع بها وبأخلاقها ولبيها

يفسخ العقد ويا دار ما دخلك شر

لابد انه يختار الزوجه الصالحه والام المربيه لأبنائه على الصلاح

اشكركم من اعماق قلبي على الردود والله يجازيكم كل خير

بنسبه لخوي كلمته كنه مهبول مره يقول ايه ابيها ومره يقول لا ما عرفت له واخرتها امس قالي اكلم البنت وانهي معها الموضوع طبعا رفضت وقلت لا مقدر صعبه وشلون اكلمها ما ودي اجرح مشاعرها مشاعر الناس مو لعبه ؟؟؟
وانا معكم ان الغلط غلطنا وحنا ما سئلنا عنهم الا امام المسجد وهاذا ما يكفي بس غلطه وصارت وان شاء الله راح ينتهي الموضوع على خير بس اتمني من الله ثم منكم الدعاء لنا بتيسير

اسأل الله ان ييسر امركم
ويوفق اخوك لما هو خيرآ له في دينه ودنياه
’’

المووضوع سهل جدا

افسخوا الخطبه وكل واحد يرووح بطريقه

يعني وين المشكله

والله يرزق اخوك البنت العفيفيه النقيه

انا اتفق مع اخواتي الكلمه الاولى والاخيره لأخوك علشان لا يندم بعدين ويقول انتم الي خلتوني الفسخه الخطوبه
ويمكن بعد الزواج تتغير البنت ع يد اخوك :) والله الهادي ..

عليكم بالاستخاره والدعاء وايضا السؤال
عنهم مرة اخرى
والكلمة الاخيرة لصاحب الشأن
الله يبصركم بالطريق الصحيح والقرار الصائب

أنا رأي من رأي الأخت شذى ،، فعلا القرار لازم يصدر من أخوكـ ،، ونصيحه لا تتدخلون بقرارهـ ومصيرهـ ،،
والأهم من هذا كله لآزم يستخييييييير

تقبلي مروري أختي ،، وإن شاء الله تنحل الأموره ،،

افكر هاذي وشلون بتربي اعياله اذا اتزوجها اذا ما عندها حياء

معليش اختي كيف تقولي انكم قبايل وناس محترمين وتخطبون لولدكم بهذه الطريقة
وبعد ما عرفتوهم على حقيقتهم لازلتم متمسكين فيهم واخوكي يقول مشاعرهم وما مشاعرهم
احس انو الموضوع فيه شي ناقص القصة ما دخلت مخي فيها غموض
يا اما الموضوع في سحر وشعوذه او القصة مفبركة

برأي خلي اخوك يروح للمطوع يقرأ عليه ويصلي صلاه استخاره ون شاء الله خير
ون شاء الله ربي يبعدكم الشر والناس الي ماتخاف ربها

اؤيد هذا الراي مو شرط تكون المسألة سحر و مس

هم استعجلوا و ما سألو بما فيه الكفايه و ممكن تكون البنت خلوقه

و عائلتها عندهم اخطاء و بلاوي لان ما فيه عوائل كامله و كلهم ملتزمين حتى القبايل

و لا تجي عائلة كلها فاسده هذي سنة الله يخرج من ظهر الفاسد عابدا صالحا

و يخرج من ظهر الصالح فاسدا مفسدا في الارض

لا تستعجلو بالفسخ لعل الله يهديها و يكون زواجها من اخوك سببا في هدايتها ..

اشكركم على ردودوكم والله يوفقكم يارب

بنسبه لخوي والوالد مو طبيعين فيهم شي كلمت الوالد ما خذيت منه لاحق ولا باطل كلمت اخوي نفسي الشي وربي احسهم مسحورين بس ابشركم اخوي اقتنع وبدي يغير رايه ان هذول الناس ما يناسبونا ابد ابد
استغفر الله لا دين ولا خلق ولا جمال وانا معكم ان الغلط غلطنا المفروض الوالده تروح تشوف البنت بس هم رفضو بحجه ان مافي احد وانهم برا المملكه ؟؟؟؟؟
وحددو وقت ورحنا نبي نشوف البنت ونتعرف عليهم ورطونا بلمملك وعلى طول ملكو بسرعه وجو اهلها وطقطقه وازعاج
وحريم ورجال مع بعض وتصوير وهوشه ومضاربه البزران شي فضيع مدري وش اقول
استغفر الله العلي العضيم اسئل الله السلامه

هربوهم مع الباب هن وباروكاتهن