|
اخواتي والمنتديات
السلام عليكم
اكتشفت من فتره ان اخواتي يدورون المنتديات الجديده ويشاركون فيها ويتراسلون مع الشباب في الخاص في أمور المنتدى وفي الأعضاء والعضوات وحاطينهم الشباب مشرفات ويغرونهم بالأسلوب الزين يعلم الله اني حزين مره ولا ادري وش اسوي ، قمت وسويت لهم منتدى نسائي لكن ما يدخلونه ولا يهتمون ويدخلون المنتديات الثانيه المختلطه اللي مالها فايده وانا اسميها منتديات المراهقين ما ادري هذي عقوبة ربي فيني؟ لان كنت في فتره ماضيه اكلم بنات وش الحل لاتقولون كلمهم لاني ما راح اكلمهم ابي حل من بعيد لبعيد هل اخبر الوالده؟ اخاف اخبرها وتكلمهم ويعاندون اكثر وش العمل؟ |
حلوة غيرتك على اخواتك ماشاءلله ..
اتفاهم معاهم بشوويش وبكل هدااوة .. وان شاءلله مايسير في خاطرك الا كل طيب .. دمت بوود =) |
أصلح حالك يصلحون خواتك
وبعدين ليه ظن السوء في خواتك أخوي شارك خواتك هواياتهم وبعدين مو شرط سجلو في منتديات أنهم راح يضيعون |
ملامح قمر
انا ما ظنيت ظن السوء بس ما ارضى يتكلم احد مع اخواتي وكأنهم من محارمه لمحت لأمي بس ما فهمت وبقولها ان شاء الله هي لها شخصيه قويه عليهم وبعدين انا قلت فتره ماضيه يعني راااحت والحمدلله |
ما احد شار علي
اعلم الوالده او لا؟ انا دخلت على منتدى من اللي يشاركون فيه لقيت ان فيه شباب يتلاطفون معهم ويذكر كلمات غير لائقه مثل فديتك - وياقلبو - وهالكلمات اللي طايحين فيها الراهقين والغير مراهقين برضه لو كانو يشاركون في منتدى راقي ومفيد مثل منتدى المجتمع والأسره (على عيني وراسي) او منتديات نسائيه لكن منتديات المراهقه هذي انا اخاف منها ولا احب اخواتي يشاركون فيها شورو علي |
انا اشوف الوحده تدخل المنتدى ولا تقبل الا نساء للصداقه غير كذا لا وكمان تراسل رجال وش رايحه تستفيد قولها هاذلو يتسلون على راسك المنتدي للثقافه والقراءه مو للعلاقات التافه
انت حاول تتقرب منهم لازم تكون حريص على خواتك في شباب تقول ابليس ممكن توصل لاكثر من مراسله من بعيد لبعيد وش رايح تستفيد خواتك يغرقون وانت تتفرج حاول تاخذهم معاك مشوار اخوي وكلمهم باسلوب حكاية انك كنت تكلم بنات سبحان الله نسيت ان الدنيا سلف ودين حتى لو نظره مو كلام بس نظره انشاء الله تكون توبة والله يتقبل والله يصلح خواتك ويبعد عنهم عيال الحرام وربي نت سلاح ذو حين لو مافى احد واعي وربي يغرق الله المستعان |
أحييك على رجولتك وغيرتك على أخواتك
بس القوه معاهم ماراح تنفع يعني ماله داعي تخبر الوالده لأنهم بيكونون المره ثانيه أحرص وبعدها ماراح تشوف أي شئ وبيكونون حريصين منك لو شافوك للذللك انصحهم يسجلون بمنتدى عالم الأسره والمجتمع والله يحفظهم يارب |
كم أعمار أخواتك ؟؟
|
26
و 15 يوم كلمت اخوي اكبر مني قال وش تبيني اسوي لهم وماعليهم ليه خايف وما ادري ايش |
اأخي الكريم اللي
فهمته ان اخواتك مشرفات , يتحدثن مع المشرفين في القسم الخاص عن امور المنتدى تنظيم الأقسام , كيف يزيدعدد القراء , حذف مواضيع ,,,الخ كيف تقول يغرونهم بالأسلوب يعني هل يتمادون معهم بأمور خارج مواضيع المنتدى ام ماذا اقتباس:
|
يتحدثون في أمور غير المنتدى
مثلاً الحمدلله على السلامه بعد السفره ووين هديتي؟ ومن هالأمور وضحك واستهبال |
بالنسبة لأختك الصغيرة لازم لما تستخدم النت تكون عليها رقابة
أو يكون الجهاز في مكان تراها فيه أمك أو أي أفراد الأسرة بحيث لا تنفرد بالجهاز فيسهل استخدامها للممنوع خصوصا أنها في سن مراهقه أما أختك الكبرى فإذا كنت تستطيع محادثتها ومواجهتها جيد تقول لها أختي انت الكبيرة العاقلة وانا ما اقول فيك شيءوانت اختي وتاج راسي بس هالالعاب ما اشوف انها تليق بك أو بتربيتك والتميع مع الجنس الآخر مو من ديننا ولا من عاداتنا والوقت يُسأل عنه ابن آدم ما أظن ان هذا هو الجواب اللي تبين تجاوبينه ، حاول يكون أسلوبك معها هادي ما يكون في عناد ورفع صوت عشان لا تصير المسألة تحدي وأنت أرى بأمك وطبعها وكيف بتاخذ الموضوع هل راح تتحاور معاها او تمنعها من الانترنت وصراخ وصياح كتب الله أجرك على غيرتك على أخواتك وخوفك عليهن |
مع كلام ام عمر الله يهديهم
|
الله يهديهم ويصلحهم خذهم باللين والنصح والكلام الطيب شوي شوي واذكر لهم قصص وعبر ولاتدقق عليهم كثيير لايطفشوا وخل عينك عليهم الله يصلحهم مع إنه اختك الكبيرة واعية وفاهمة المفروض هي اللي تنبه أختها المراهقة |
الله يجزاكم خير
اختي ام عمر كلامك حلو جداً وراح اجرب واقولكم |
أخوي نصيحه لاتكبر السالفه
وأمك أحنا نعرف تفكير الأمهات وأكيد أمك قريبه من تفكير أغلب الأمهات لاتخلي خواتك ينفرون منكم بالعكس ودهم وجبهم وصدقني لو كل أخو أهتم بخواته ماراح يضرهم شي إن شاءالله وخلهم يحسون أنك سند لهم وبعدين على التربيه مثال أنا لي فترة في المنتديات وسجلت في اكثر من منتدى ومشرفه لكن الحمدالله محد لعب علي ولين شفت الوضع مو جيد أنسحبت من المنتدى وأنا اول مادخلت في سن صغيره كبره أختك الثانيه أخوي الوقت تغير وأغلب البنات في منتديات ويشاركون وخواتك أكيد صديقاتهم يشاركون في نفس المنتديات وخلهم في المنتديات منشغلين أحسن من تنفتح عيونهم في شي ثاني هذا رايي وتكلمت من باب انتي بنت وأعرف تفكير البنات وحتي من تجربتي مع البنات في مرحلتين الجامعه والثانوي |
الله يحفظ خواتك من كل شر ويبعد عنهم كل أذاء وبنات المسلمين
|
اقتباس:
يعني تنصحيني اسكت عن الموضوع وكنه ما صار شي؟ |
اقتباس:
والمفترض انها كبرت على هيك شغلات كلنا بنات ونعرف تفكير البنات ونعرف انه لازم الأخ يكون قريب من أخته قرب يحسسها بالأمان مو بالنفور عشان لا صارت لها مشكلة تقدر تلجأ له مو تهرب لغيره من شباب المنتديات البنت تحتاج للجنس الآخر وجميل لو كان هذا الآخر هو أخوها لا تطنش الموضوع اخوي ولا تقعده وتكرهها فيك هي كبيرة وتحتاج لتذكرة فقط اما الصغرى فتحتاج لرقابة وتوجيه وفقك الله |
يعني اكلم اختي الكبيره
ولا الوالده ولا اسكت من وجهة نظركم كـ بنات واعيات |
عشانها كبيره وفاهمه من رايي أنه لايتكلم أهي راح تستكثر الموضوع أكثر من الصغيره
وخاصه لو أنت أصغر منها طيب أنتو خلو أنفسكم في هالموقف مثلا أخوك أصغر منك يجي ينصحك قويه في نفسها والله , وبتجي أفكار ثانيه خلك بعيد لو فيه شي مايصلح هنا تدخل يالغاليه أم عمر أنا كنت في منتدى بنات متزوجات ويتكلمون وضحك وسوالف مع شباب كأنها أخوها أنا كنت صغيره وأتضايق من أسلوبهم وهم متزوجات وفي الثلاثين تدرين ليه ؟ عشانها وأهي كبيره فتحت عيونها على هالأشياء وحست أنها محرومه منها ولازم تعوض لكن لما الوحده في صغرها خلاص يكون عندها رادع أكبر وأنا أتكلم عن تجربه مو شي ثاني أول مادخلت النت أنبهرت فيه وكنت ماودي أفارق المنتديات لكن ألحين لي 5 شهور تاركته مااأفتح اللاب ولا أحبه ورجعت له وشفت هالمنتدى ودخلت فيه وأجلس قليل بعد الفجر شوي وبعد الفطور وتكفي وحتي فهمت كثييييير في الحياه الحمدالله والسبب النت والمنتديات أختك مثل ماقالت أختي أم عمر محتاجه للجنس الأخر وشوي وتعود لصوابها وتعرف خطاها مو قصدي أنها تترك علي كيفها لكن لا نكبر الامور وبعدين أهي أشوف ماتعدت الحدود ولا أضافت عندها أحد ولو أني مو مع هالأسلوب لكن مانكبر السالفه تكبر وتجي في النفوس وهاذي إلي ماتروح مهما طال الزمن أخوي أنتبه علي خواتك لكن لاتجرحهم وتحسسهم أنك الأخو القاسي البنت مهما كانت عاطفيه لو رفقت فيهم ودلعتهم والله يرجعون لي أنفسهم ولو منعت ألحين ماراح تقدر تمنع كل شي مهما كنت عشان كذا اللين أحسن والحكمه في مثل هالأمور أفضل |
انا ما راح ارفع صوتي
طيب وش رايكم ارسلها رساله خاصه في المنتدى وش اكتب لها؟ |
اقتباس:
أنا ما قلت يكون الأخ القاسي أنا قلت يحاورها على أنها أخته الكبيرة الواعية اللي تعرف مصلحة نفسها ما يكلمها على انه القاسي هو يلفت نظرها للي جالسة تعمله بس ويخليها هي بنفسها تقرر ان اللي تعمله غلط بالنبة لتدخل أمك أخي غريب انت ادرى بأمك وبوعيها وأسلوبها إذا كانت متعلمه وقريبه من أخواتك وتحتويهم أو أنها من أمهات أيام زمان كل شيء ممنوع البنت مالها الا الحبسة بين اربع جدران !! أعانك الله |
حلوة فكرة الرسالة الخاصة ممكن تكتب لها الكلام اللي كتبته لك بثاني تعقيب لي |
يااخوي اذا كانت الوالدة لها شخصيتها القوية و الاسلوب المناسب فتحدث اليها و اخبرها بالموضوع
لان الامر مستحيل جدا ان يسكت عليه الا شخص ديوث و لا يغار على عرضه و شرفه واحيي فيك غيرتك على اخواتك و خوفك عليهم من الشباب الصايع والله يوفقك في ايجاد الحل المناسب لابعادهم عن مثل هذه المنتديات الهابطة |
^^
ماتمنيت انك تغلط بكلمة (ديوث) لانها كلمه غير لائقه وحاشانا عنها لا يا أخوي انا ادور اسهل الحلول واللي لها تأثير كبير انا ارسلت رساله خاصه واذا شفت ما فيه ارتداع اخبرت الوالده واذا ما شفت فيه فايده اخبرت الوالد والوالد شخصيته قويه جداً وبيفصل الإنترنت على طول بس انا اعرف ابوي مستحيل يطق لكن شخصيته قويه شكراً لكم |
اقتباس:
اش اللي يطق الله يرضى عليك اختك كبيرة وغلط تتعاملوا معاها بهالأسلوب ما توصل أبدا للطق لو تشك 1% ان ابوك بتوصل معاه لهالدرجة لا تدخله في الموضوع ابداااا الله يهدي بالك ويحمي أخواتك وبنات المسلمين يا رب |
أعط أختك فترة بعد قراءتها للرسالة ولا تتوقع النتيجة بين يوم وليلة حاول معها أكثر من مرة وأعطها بدائل عن تلك المنتديات وربي بيهديها ان شاء الله |
((ماكان الرفق في شيء إلا زانه ولانزع من شيء إلا شانه))
بالحكمه والرفق واللين تكسب القلوب وتبعد المشاكل عن أسرتك |
راح اصبر واشوف
ولا بيكون لي معهم تعامل ثاني |
كلمهم انت..قولهم البنت المحترمة ماتسمح احد غريب يخاطبها ياعزيزتي ويطيح لميانه معاها
الله يحميكم ويحفظكم |
ملامح القمر اللي يهديك إذا إنتي شايفة اللي تسويه الكبيرة عادي ولايكلمها ويتركها مليون غلط الكلام الدلع والتميع عيب وحرام وقبل كل شي إحنا ماقلنا يروح يطقها ولايهزئها ولايشرشحها إحنا قلنا يكلمها باللين والهداوة وأسلوب طيب زي ماقالت الأخت أم عمر طريقتها حلوة هذا أولا ثانيا وإيش فيها يعني لما يجي أخوي الصغير وينصحني أكيد يحبني ويبي مصلحتي لنفسي ليش كبرتي السالفة |
أنا أتفق مع الأخت ملامح القمر ، المشكلة لازالت بسيطة وممكن هي ولا شي بالنسبة لأخواته ، فإذا تدخل الأخ وخصوصاً انه الأصغر راح تكون مشكلة! .
يعني أتخيل أخوي الصغير يوجهني ؟! ، قوية جداً ! لكن إن جت من الأم أكيد أهون ، لكن بدون مايكون عندهم علم بأنك أنت اللي تكلمت عنهم تجنباً لمشاكل أعظم . وهالكلام أكيد بعد ماتشوف ردهم ، لكن إيش ارسلت لهم بالضبط ؟! |
ترى الأخ هذا اللي شايفينه صغير لو لا سمح الله توفي الوالد وكان هو الأخ الوحيد راح يكون ولي أمرهااااا اش اللي صغير صغير !!! ، يبقى أخوها وخايف عليها ما قلنا له قل أدبك عليها ولا صغر منها وهزئها ، لا يكلمها بما يليق به وبسنها وبخوفه عليها الله يستر على بنات المسلمين |
الله يعافيكم
استفدت كثير منكم خصوصاً ام عمر وكلمت اختي وان شاء الله الأمور طيبه شكراً لكم |
| الساعة الآن 11:34 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©