|
طلقني زوجي مرتين بسبب اهله حسبي الله عليهم .. ساعدوني الله يخليكم
السلام عليكم ورحمة الله وبركاته
حبيت منتداكم كثير .. كنت دايم ادخل اقرا واطلع واليوم فكرت اني اسجل واعرض لكم مشكلتي ان شاء الله القى الحل عندكم ... انا متزوجة لي سنة ونصف عمري 19 سنة عندي بنت الله يحفظها اول ماتزوجت اهله كانوا عسل معايا وهوا للاسف انسان لسانه طويل مايحترم احد يسب و يشتم و يضرب و راعي بنات وراعي سفررات بعد شهرين من زواجي اكتشفت كل شي عنه بس ماطلبت الطلاق لااني للاسف الشديد حملت بدري مع اني كنت اخد مانع للحمل بس ارادة ربي فوق كل شي لما تم على زواجنا 4 شهور سارت مشكلة كبيرة بينا بسبب اخته ورحت بيت اهلي وطلبت الطلاق .. مااتحمل انسان يحرضوه اخواته ولاامه مع اني كافيه خيري شري وربي الشاهد عليا اخته تكلمت في شرفي وشرف اهلي وهوا راضي وموافق ولامنعها .. انا قلت هذا اولها بعدين ايش راح يسير فيا ياليتني اصريت ع الطلاق واتطلقت من ذاك الوقت اللي رجعني له .. ابوي كان يقولي بيتعدل حافظي على بيتك انتي حامل دحين ورجعت له وبعدها اهله كرهوني بسبب اخته حسبي الله عليهم والله اكتب وقلبي محروق وهوا المشكلة عمره مااخذ حقي عمره ماحسسني اني زوجتة ودافع عني ماعنده الا يمد يده ولا يشتمني انا واهلي وضلينا فترة مع بعض تقريب شهرين زي العسل وحمدت ربي وشكرته انه تعدل معايا وجى اليوم المشؤووم كنت قبلها قاعده انظف البيت من 6 الصباح وماخلصت الا 12 الظهر وهوا عنده دوام الساعة 2 وقلت خليني اريح ساعتين واحط المنبه وانام نمت من التعب ماسمعت المنبه لما دق الساعة 2 ونص سمعت التلفون يدق وقمت اجري عليه وارد طلعت لي امه .. تقولي زوجك راح العمل قلت لا دحين اصحيه .. قامت تهاوش عليا وتقولي انتي ليش متزوجة انتي اتزوجتي ولدي عشان تنامي معاه تخيلوووا ؟؟ وتقولي روحي خلي امك واختك خارابين البيوت يعلموكي كيف تقومي في بيتك وقفلت السماعة .. وانا وربي مانطقت ولا بكلمة صحيته للعمل سويته الفطور راح عمله رجع من العمل في الليل سويت له العشا واتعشى وقعدنا شويا مع بعض وبعدها قلت له اللي سار قالي خلاص بكلمها ومراح ينعاد الشي هذا حسبي الله عليها امه بعد السالفة هذي سارت بس تحرضه عليا وتتحكم فيه وفي بيتي الشي اللي تبغاه لازم ينفدو ماادري ليش اتصرفت كذا بعدها انا لما كنت حامل في الشهر التاسع دقت امه على جوالي وانا ماانتبهت له كان هو نايم وانا قاعده في الصالة وجوالي صامت ولاانتبهت له انه دق دقت عليه .. وتقوله ليش زوجتك ماترد عليا انا مريضة انا معايا الضغط قام زوجي ضربني .. وتفل عليا اعزكم الله وهاوشني ورماني ع الارض هذا كله وانا حامل وبسبب امه حسبي الله ونعم الوكيل فيها وسارت مشاكل كثيرة وانا في النفاس كله يهاوشني بسبب امه طبعا مايقدر يمد يده لااني في بيت اهلي :d بعد ولادتي بشهرين نقلنا بيت جديد .. سكنا بنفس عمارة اخوه المهم كانت اخته عند اخوه وقالي هاتي بنتي اختي بتسلم عليها قلت خدها وانت جاي جيبها معاك لاتخليها البنت صغيرة ووقت نومها دحين جى بدونها .. قلت له وينها ليش ماجبتها قالي عناد فيكي انا بخليها عند اختي ؟؟؟؟؟؟؟؟؟؟؟؟؟؟؟؟؟؟؟ انا متاكده ماحد مشيشه الا العقربة اخته ليش يعاندني انا ماسويت له شي ولاقلت له شي المهم اتصل على اخته وقالها بنتي راح تقعد عندك لين الظهر وانا قلت له جيب بنتي من عندها بااي حق تقعد عندها قام يصارخ عليا ويسبني وهي ع السماعة تتسمع وشويا من كثر صوته مو عالي جات مرة اخوه وعيالها وشغالتها وهوا قاعد يهاوشني قدامهم ويذلني مسح فيني البلاط خلا الارض احسن مني والله ساعتها حسيت اني فعلا عايشة بدون كرامه واليوم ي ياناس ايش سوى فيا قالي ليش مادقيتي على امي قلت له راح ادق عليها قالي متى قلت له خلاص قلت لك راح ادق قالي انتي حقودة ومريضة نفسيا و وسخة واهلك ماعرفوا يربوكي كله عشان مين؟ عشان امه حسبي الله عليها قام مسك جوالي وكسره لي ... والجوال انا اشتريته لنفسي .. (( مسكين ماعنده فلوس)) قلت له انت مو دافع حقه لو دافع حقه ماتكسره قلت له روح حسبي الله فيك وفي امك ( الهرجة مو هرجة جوال بس محترة مقهورة تقعد تعبي راسه ويحط الحرة فيا ) والجوال انا جبته لنفسي .. هوا مايصرف عليا ولا يديني فلوس ولما اقوله ابغى مصروف ليا يقولي انتي تدرسي وتنصرف لك مكافاة اديكي ليش ؟؟؟؟؟؟؟:eek: ملابس اشتري لنفسي ملابس لبنتي اشتري كتبي اشتريها لنفسي جوال لنفسي اشتريت شحن جوالي احيانا يشحن لي واغلب الوقت انا اشحن لنفسي ... وهذا كله بـ الف ريال مين يصدق :29: كااني مني متزوجة انا اصرف على نفسي وعلى بنتي وهوا لاهو فقير ولاهو على قد حاله عنده من الله خير بس البخل اللي مقطع قلبه (( للعلم هو انسان مايصلي ويجري ورى الفلوس)) .. نرجع للسار اليوم قمت من عنده لغرفة النوم لحقني وقالي انتي ماتحترمي احد ولاتقدري احد قليلة ادب ولسانك طويل وراكبه راسك كل شي تبغيه تجيبي لنفسك .. (( كله عشان اشتريت جوال )) قلت له الجوال وكسرتو روح افرح فيه والله من كثر ماعصبت مدري كيف طلع مني هالكلام بس ياناس فاض بيا قلت له (( اقل شي تحمد ربك عليه انك اتزوجت وحده شريفة ماعندها ماضي زي ماضيك الاسود بنات وزنا وشرب وقلة ادب .. قلت له انت مقامك تتزوج وحده من الشارع مو انا .. انا اشرف منك ومن اهلك كلهم )) قالي انا اشرف منك ومن امك وامك هذي ماتجي ربع ضفري .. قلت له حدك الا امي لاتتكلم عليها فاهم ولالاء قالي الا اشرف منكم انا قلت زنيت ببننات قد شعر راسك واشرف مننا قويه :( قالي انتي طالق طالق :eek: (( قبلها كان مجامعني وانا قريت فتوى عن الشيخ بن باز وقال لايقع طلاق في طهر جامعها فيه اللي يعرف هل الطلاق وقع ام لا )) وغير كدا يقولي راح اخد بنتي واحرق قلبك عليها واجيب اللي اتربيها انا قعدت ابكي لااني متعلقة في بنتي واحبها موت مقدر اخليها قلت له سامحني الله يخليكم لو اطلب الطلاق بالمره يقدر ياخد بنتي ولالاء انا والله ذليت نفسي ع الاخر مقدر اتحمل والله والله وربي شاهد عليا مني قاعده الا عشان بنتي مقدر اخليها احبها مره واي ام ماتقدر تبعد عن ضناها الله يخليكم ساعدوني واعذروني على كثر الكلام ملخبط والله اكتب وقلبي محروق وتعبانه ع الاخر طلبتكم ساعدوني وشورو عليا |
حبيبتي .. خذي بنتك وبعدين روحي بيت اهلك كـ زياره ولاترجعين له ..
البنت لك لحد ماتكمل 7 سنين .. وتقدرين تخلين حضانتها لامك وتتزوجين انتي .. عموماً .. انتي روحي لاهلك ببنتك وبعدين فهميه ليش تركتيه .. ولاترجعين له الا بشروطك مايمد يده عليك ويحترمك ويمشي لك مصروف شهري وكل الشروط اللي تبينها .. واذا مانفذها لاترجعين له هذا ماينعاش معه ... الله يعينك وطمنينا عليك |
ياحياتي انتي كيف صابرررررررره
ضرب وأهاانه وقله حيا علئ ايش متحملته وين اهلك لازم يتدخلووووووون اخوانك ابوك عمانك ساكنه وصابره الله لايضرررك اول شي روحي لاهلك ولاترجعين ومن ناحيه بنتك الله يخليها لك الدوله فيها قانوون الدعوه موب فوووضه واذا يبيك بشررررررروط قسما بالله ارتفع ضغطي مدري انتي كيف صابره على لسان امه البيت اللي مايحفظ كرامتك لاتجلسين فيه والحضانهمن حقك انتي وبعدك امك ربي ييسر امررررك ويفرجها عليك عاجلا غير اجل |
اذاانتي حابه تطلقي بدون رجعه روحي عنداهلك واذاعندك امل انه يتعدل معاكي اصبري عليه ولاتستفزيه ومشي لاهله وطنشي وكنتي سبتي بنتك عندعمتهااحسن من الفضايح والصراخ ولاتحطيه بينك وبين اهله لان الي بيسمع كلمت اهله شوبنقوله شاطرشاطر
|
-لا حول و لاقوة إلا بالله.
-هل أنتِ الآن في بيتك أم عند أهلك؟ -هل والدك وإخوانك الرجال يعلمون بما حصل؟ -هل لديك رغبة فيه، وإكمال الحياة معه، أم تريدينه أن يتأدب معك، أم ماذا تريدين بالضبط؟ |
لآ حول ولآ قوة الا بالله ..
حبيبتي لآزم تخلي ابوكي واخوانك الكبار يتفاهمو معااه ماايسير في حقك الشي يلي بيسير دآآ الله يعينك ويفرررج همووومك ياارب =) |
الله يصلح حالكم
يا اختي اتصلي اول على شيخ او دار الافتاء حتى تعرفي الحكم في الطلاق وفي الحضانه وفي كل الاحوال لازم احد يوقفه عند حده رجل لا يصلي ويرتكب المحرمات وش تبغي فيه الله يعوضك احسن منه |
ما وجدت ولا خير فيه
على شو صابره يشتم امك بيت هلك يا يتربى يا الطلاق ليه تعتذري ليه خايفه على بنتك بنتك معك اين اخلاق المسلمين اين الرفق بالقوارير |
|
هذا مو رجال للاسف واحد وصل فيه يتكلم في شرفك وش تترجي منه وربي يبغى من يأدبه لازم يوقفه عند حده قولي لاهلك تكلم في الشرف عشان يتربى بنات الناس مو لعبه عنده وعند اهله
حسبي الله على بعض الرجال ظلمه |
أعانك الله وفرج همك أختي أختي الا الطعن في الشرف ، صعب السكوت عنه أنا مع رأي أختي الملاك يونا روحي لأهلك كزيارة وبنتك معاك ولا ترجعي كان الله في عونك |
ممكن أفهم على إيش مستحملة هالبني آدم عشان بنتك ؟؟؟ بنتك وتقدري تاخذيها والله زوجك مو كفو تجلسي معاه انفذي بجلدك ضعف شخصيتك هو اللي خرب عليك وينا حنا عايشين بأي كوكب شي يشيب الراس |
اختي كان الله في عونك وفرج همك وابدلك خيرا منه
اذا كان لايصلي مايجوز تجلسين او ترجعين اليه مهما كان واذا كان يفعل المحرمات شرفي نفسك عنه وقد ينقل لك الامراض وبنتك لك حتى السابعة واذا رأى الشيخ انك افضل منه دينا وهو ليس كفوا لذلك قد يحكم لك البنت لك حتى بعد السابعة |
مالي الا ادعي لك
الله يفرج لك همك عاجلا غير اجل ويكتب لك اللي فيه الخير |
زوجك يبغى من يوقفه عند حده لاتسكتين له وخاصة اذا مد يده يمكن علشان انتي صغيرة مستقوي عليك خليكي حازمه معاه وكلمي اهلك ربنا معاك والله يوفقك*
|
حسبي الله ونعم الوكيل علي كل ظالم
حسبي الله ونعم الوكيل علي كل ظالم حسبي الله ونعم الوكيل علي كل ظالم الله يكون في عونك |
حسبي الله ونعم الوكيل
انتي شلون صااابره خوذي بنتك معك والحضانه معك وخلي اهلك يتدخلوووون ولاتخليين بنتك عنده اذا بتتطلقين وخاايفه انه بنتك تقعد عنده قووولي انا ماقدر اممن بنتي عند وااحد له سووابق وبيخاف |
أنا نظرتي بعيدة شوي
وردي بيكون على أساس نظرتي اذا انحسبت عليك الطلقتين يصير باقيلك طلقه وتحرمي عليه ولا يقدر يرجعك الا اذا تزوجتي غيره وتطلقتي! اذا شايفه انه ممكن يتعدل أو حابه تستمري عشان بنتك أو حابه تصبري سنة يمكن ربي يهديه لازم تروحي بيت أهلك وماترجعيله أبداً إلين تخلص عدتك بعد انتهاء العدة يقدر يرجعك بعقد جديد وبكذا بديتو من جديد والطلقتين ماتنحسب عليك خلاص لأنه عقد جديد . هذا رأيي لأنك ببداية حياتك وهو متأثر بأهله وبعد فترة يفكر ويعرف مصلحته ويمكن ربي يكتبله هداية على يدك ماتدري . بس طبعا إذا رجعتي أجلي الحمل الين تتأكدي من صلاحه |
يجب عليك اخبار اهلك
الظاهر انه شافك ساكته فتمادى هو واهله في اهانتك. |
أم رمووو
بارك الله فيك وفي بنيتك أقولك لا تطلعين من بيتك ... لا تطلعين ترى والله المشكلة بتكبر وانتي الخسرانة صح ما يصلي ......... وفيه عيوب كثيييرة... لكن انتي من البداية ما كان همك الصلاة ولا غيره الآن فيه بنت وممكن تروح فيها.... لذلك أنصحك بالصبر والتروي احنا في ليالي فضيلة اسألي الله فيها صلاح زوجك ونفسك وحياتك واسمحيلي يا أختي انتي مشاركه في الغلط من ناحية أهله!! حس انك تكرهينهم ودك تحطين راسك براسهم فانقلب الموضوع عليك طلبك للبنت انها ما تقعد أحد أخطاءك فهم انك ما تبين البنت تقعد عند عمتها وحطها براسك كان المفروض تجهزين البنت وترسلينها وانتي ساكتة صدقيني ماراح تتحملها وراح ترسلها ونقطة ضعفك بنتك .... ليش تلفين وتدورين لين كشفتي نفسك وذليتيها كان مسكتي نفسك وعديتيها اسمحيلي يا اختي أهله شينين صح ومعاك قلباً وقالباً لكن انتي ساعدتيهم على انهم يخربون حياتك ويخربون زوجك عليك بجهل منك في البداية أو غيره ... طاااحت في راسك لذلك انسي الماضي تماماً ابدأي ببيتك رتبيه واهتمي بالروائح الزكية فيه ... بنتك دايم كاشخه .... وانتي خليك عادية .. أنيقة وعادية لا كلام زيادة ولا غيره زوجك باين يجي بطريقة أو أخرى بس انتي عاميه نفسك بأهله وهم عامينه ومكملينها وحاس انك تكرهينهم وهنا مربط الفرس لو حس انك أقل شي في سيرتهم طيبة .... كان قلبتي السحر على الساحر وقلب عليهم هم لأنهم أهل مشاكل وما يشوف منك إلا عكس ما يقولون.... استعيني بالله واسألي الله يهديه ولا عاد تناقشينه في اللي صار وشوفي موقع لأحد المشايخ الثقات وضعي استفسارك هناك هل وقع الطلاق؟؟ وحتى لو وقع فلا تخرجي من بيتك لأنهم سيصعدون الأمر تماماً وعليك اجتنابه ولكن القيام بأموره وهذا في الشرع ولا تتزيني له مطلقاً حتى يراجعك في الثلاثة قروء فإن لم يفعل سواء بكلمة أو غيرها من الأفعال الزوجية فحينها خرجتي من عصمته ولك أن تغادري هذا في حالة أن الطلاق وقع والله المستعااان العصبية ما تفيد مع الرجال يابنت الحلال |
لاحول ولا قوة إلا بالله العلي العظيم يعتبر زوجك ناقص رجوله لايحترمك كإنسانه وزوجه يقوم بالسب والشتم عليك وعلى أهلك حاولي تناقشيه بهدوء إذا تحسن الوضع كان بها لا يوجد اي تحسن عليك بمخاطبة أحد أي شخص على الأقل يوقفه عند حده بحيث لا يتمادى عليك مستقبلاً لابد الأحترام المودة يكون موجود الكلمة الطيبة الثناء الحسن ولكن ما أقوله لكي أسأل الله الكريم رب العرش العظيم في هذا الشهر الكريم أن يهديه لك ويسخره لك ويحفظ لك بنتك يارب وبالتوفيق ,,,
|
يعني ضرب ... وشتم ... وإهانة ... وسفريات ... وحركات مع نساء ... وبخل ... وفوق هذا كله أهله اللهم عافينا منهم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ معلش سؤال ؟؟؟ على إيش مستحملتيه ؟؟؟؟؟ يا بنتي .. إن لنفسك عليك حق ...................... اتق الله في نفسك ... اتق الله في نفسك ... خذي بنتك وروحي لعند أهلك وخليه ((((( يبلط البحر )))) |
اقتباس:
لاحولة ولا قوة الا بالله الله يصلح حالك ويهديه يارب |
الله يصلح بينكم ويغير حالكم الى احسن حال ويحفظ بنتج
|
اقتباس:
ولا التزم .. مدري ايش اسوي انا دحين في بيت هلي ومحد يدري عن السالفة ومحتارة ارجع له ولا لاء |
اقتباس:
الله يسهلك امرك ويحفظك والله تعبت اهلي من كثر ماادخلهم ويكلموه ومحد يرجعني له الا امي وابوي وابوي والله كبير في السن ومريض وتعب مني كل يوم والثاني اكلمو وهو اللي يرجعني انا والله نفسيتي متحطمة ع الاخر |
اقتباس:
والله اني اسكت واطنش كثير بس اهله راعيين مشاكل يدورها من تحت الارض ويحرضوه عليا الله المستعان وجزاك الله خير |
اقتباس:
جزاك الله خير |
زهرة الرمان : والله مادخلت احد الا الان في الموضوع ولاحد يدري . الله يجزاكي بالخير حبيبتي
قلبي معاك : ياما وياما ابوي كلمه بس لا حياة لما تنادي .. للاسف لما ادخل ابوي .. يقولي هدا ابوكي مو رجال تخيل ؟. GREEN222 : الله يسلمك ويجزاك بالخير سيدة الموقف : الله يجزاكي بالخير والله يعين انا دحين عند اهلي وقاعده افكر بـ موضوع الانفصال عنه ظل انثى : قلت واتكلمت وابوي كلم ابوه وكلمه لكن للاسف لاحياة لما تنادي الله المستعان |
احكي مع احد اقاربك غير ابوك
ولا تخلي ابوك يحكي مع قريبك بل انتي قومي بالامر يظن زوجك ان ما وراك الا ابوك التعبان ولا هو محترمه حتا اياك ترجعي ذليلة خانعه لانه حينها سيزيد العيار |
ام عمر ، روح المساء : ربي يكتب اللي فيه الخير وجزاكم الله خير
مستعجل بس : انا بس لو اضمن بنتي والله اليوم انفصل عنه اليوم وافتك منه .. الله يجزاك بالخير ام سارة : الله يعطيك العافيه حبيبتي وجزاك الله الف خير Daimond : شكرا ياعسل الله يجزاك بالخير ملامح قمر : شكرا ياعسل بلسم النسيان : انا مستغربة من هالانسان مايخاف من احد ولا له كبير لما اقولو سوابق وسويت انت كذا ولا كذا .. يقولي عادي انا رجال اقدر اسوي كل شي تخيلي ؟؟؟؟؟؟؟؟؟؟؟؟ الله يجزاك بالخير |
لا حول ولآ قوة الا بالله ..
فاهم الرجوولة غلط يوم يقولك انا رجال اقدر اسوي كل شي .. الله يهديه ويبعد شره عنك وعن بنتك يارب .. =) |
اقتباس:
والله انا ماافكر في الاستمرار معه الا عشان بنتي والطلقتين انا قريت فتوى لـ بن باز وابن عثيمين انها لاتقع وبعض الشيوخ يقولوا انها تقع ومحتارة ومني عارفة الله يجزاك بالخير وكثر الله من امثالك و الله يسعدك |
اقتباس:
الله يجزاك بالخير ياعسل ويسعدك |
كاتم اهات : امين الله يسمع منك
الروح الهائمة : مستحملة وقاعده مو حبا فيه .. بس عشان بنتي .. وانا حاليا قاعده افكر في موضوع الطلاق نونو4 , ام الغالي .. جزاكم الله خير |
اقتباس:
والله البنت تستاهل تصبري عشانها وربي وعد الصابرين ومايخلف الله وعده والشي الثاني من ترك شيئاً لله عوضه الله خيراً منه يمكن إذا تركتي مصلحتك في الطلاق عشان مصلحة بنتك ربي يعوضك بصلاحه وتسخيره لك ربي قادر على كل شي وأنا أئيد روحتك لأهلك في الوقت الحالي أولا أنتي بترتاحي شوي وتفكري أكثر وثاني شي هو بيتأدب من جفاك له بس مو تروحي اسبوع اسبوعين وترجعي لا طبعا اجفيه الين يندم .. وبالنسبة لفتاوى الطلاق دقيقة وتختلف من حالة لحالة وتحتاج لشيخ يسمع منك ومنه عشان يفتي هل وقعت أم لا الله يصلح أمرك غاليتي |
أنا كنت حاسه يا أم رمو ان أهلك طفشوا
ومو بس أهلك والله كل الأهالي اللي يخافوا على بناتهم ما يتدخلوا كثير وأنا أولهم وعرفت كيف آخذ حقي وأحل مشاكلي بنفسي صدقيني يا غاليه لازم تتعلمي الصبر قلتلك الرجال ماخذ فكره انك ما تحبيهم علشان كذا برهني بالأفعال خلاااص الكلام ما ينفع وخليها براسهم يعني زوريهم قريب وقولي تعال نسولف عند أمك زهقت وأنا قاعده هنا وما في أحلى من سواليفها ياليتك طلعت زيها فرفوووش وتحب السوالف..... تقربي من الأم وابدأي بيها وسيبي الباقين على جنب .... صدقيني إذا كسبتيها ضاعوا الباقين وصار يشوفهن صاحبات مشاكل وعمايل سودا عشان بنتك استحملي واركبي الصعاب.... كلنا مرينا بظروف كثييييير صعبة في بداية حياتنا والله لو ما الله أولاً ثم الصبر كان حالنا حااال وادعيله يا أختي بالهداية ... أنا عارفه انك مانتي راضيه بوضعوه بس ما أبغاك تكبرين السالفه في راسك وتعمين نفسك وتتصرفين بعصبيه وقهر ويزيد هو الطين بله لا تذكري ماضيه خلاااااااص قدامه عشان ما يغلط فيكي ولا في أهلك وأكثري من الدعااااااااااااااء وسهام الليل والله ثم والله لا تخطيء صلي في الثلث الأخير من الليل ......... والأيام المباركه هذي لك فرصة يمكن توافقين ليلة القدر واجتهدي أكثر الأيام مصيرها تمشي وتعدي ويرجع لك زوجك وأمه خلاص ما قعد في عمرها كثر ماراح وأخواته بيتزوجوا وينشغلوا وبيلاقوا مشاكلهم لا تخافي وكل شي بيكون في يدك انتي الآمرهـ الناهية في بيتك ولا تنسي ........ ضاقت فلما استحكمت حلقاتها******* فرجت وكنت أظنها لا تفرجُ وعجبتيني والله باهتمامك ببيتك وبنتك ما اشاء الله تبارك الله الله يزيدك من فضله ودعواتي لك بالفرج والرضا والسعادة مو بس في حياتك مع زوجك لا في دنياك وآخرتك ياااارب وكافة أبناء وبنات المسلمين |
اقتباس:
والله ماعندي غير ابوي الله يحفظه اقدر اشتكي له اخواني الاولاد صغار وواحد كبير مره وحده رحت شكيت له قالي اصبري وربك بيفرجها ولا سوى لي شي ؟ الله يفرجها من عنده قول امين وجزاك ربي كل خير |
رواء الايمان : الله كريم ياعسل يفرجها علي وعلى كل المسلمين و الله يسعدك يارب واشكرك من كل قلبي على نصحك لي الله يجزاكي كل خير ويوفقك يارب
العقد الفريد : المشكلة الادهى والامر انه اخته هاذي اللي ماذيتني متزوجة ومني عارفة ليه ماعندها شغلة الا انا ؟؟؟؟ بس مااقول الا حسبي الله عليها والله يجزاكي بالخير حبيبتي والله يوفقك ويسهل لك امرك ويسعدك |
غيرااااااانه منك أكيد
شيليها من حساباتك دامها متزوجة..... الأم عليكي بيها والله كثر ما تتقربين لها كثر ما تفقعين مرارة هالأخت وتكسبين ود زوجك |
| الساعة الآن 05:10 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©