|
استشارة ّ ~
كل عام وانتم بخير .. بعد ما ادمنت قراءة المنتدى واقتنعت بكل مافيه من استشارات واستفدت من بعضها قررت للتو فقط التسجيل لأشارك بمشكلتي وآخذ رأيكم بكل تفاصيلها * قبل ما آبدأ بنّبه على شغله وهي انّو كثير بنات زي حالتي لما نفضفض ونشكي لأحد يقولنا احمدوا ربّكم انو هذي مشكلتكم! حقيقةً , احنا ما نحتاج احد يفكرنا بالحمد والرضا على حالنا بقدر ما نحتاج لإقتراحات أو على الأقل تجارب تواسينا .. طرحت مشكلتي بمنتديين نسائيين وتعجبت وتعبت من الأسلوب عشان كده قررت اجرب منتدى مختلط على الأقل ممكن استفيد من اراء البقية في حال لوشابهت اوصاف زوجي أحد . * فالبداية .. زوجي طيّب ومشكلتي مهي معاه مشكلتي مع شخصيته المشكلة هي اني اشعر في بعض المواقف أن عقلي أكبر من سنّي بالتالي أكبر منه أعاني من لا مبالاته وسوء تدبيره للمشاكل والمواقف الي تمر علينا يعتمد علي بكل شي اختياراتنا سفراتنا خرجاتنا حتى ردود فعله لازم تكون بمشورتي أكيد الآن أحد يفكر يقول شي حلو يكون زوجك خاتم بيدك بس والله هذا الشي متعبني في حياتي بحيث انّي مقدر اشتكيله مشاكلي اخاف عليه يتأثر اكثر مني مشاكلي سرت اتحملها لوحدي وما افضفض مره حصل موقف بيني وبين زوجة صاحبة تخيلوا انو كره صاحبه ! مرات كثير احس اني نفسي اشتكي لأحد أقوى منّي بس للأسف .. أنا طول الوقت آخذه دور الأم وغصب عني مو برضا مني افكر بكل شي .. المصروف تدبير الأمور إدراة البيت وكل كل شي هذا كل ما عندي واحب اسمع نصائحكم أو على الأقل تجاربكم فكرة ~ اتمنى يكون فيه منتديات رجالية تعّلم الرجال طريقة الحياة السليمة زي بالظبط منتديات النساء الخاصة ~ بحفظ الرحمن |
جدا نحتاج منتديات للرجال حتي يعرفون معني القوامه ويعرفون معنا الحياه الزوجيه والأسريه
أختي مشكلتك تعاني منها كثير من النساء وانتي زوجك رزقه الله بزوجه تعرف تدبر أموره لكن غيره لا والدليل الأزواج في المنتدى أشوف مشاكلهم بسيطه وتصل لمرحله الطلاق أو الزواج بالثانيه والعجيب ماعرف يصلح أموره مع واحده كيف الثانيه >> أستغرب هذا الحل لكن لو يملك قليل من الحكمه لحلت المشكله لكن في المقابل نساء عندهم مشاكل لو يحملها رجل أنكسر ظهره من قوه الحمل وهن صابرات وتريد أن تحل المشكله وترجع للبيت إستقراره وبعضهم سنوات والله لين قرأت أقول مااأصبر بنات حواء أعانهن الله غاليتي المشكله القوامه فهمت غلط واصبحنا في مجتمع نعاني فيه من كثرت أشباه الرجال أتمني لو أن هناك منتدى لمعالجه المشاكل النفسيه التي يعاني منها بعض الرجال أختي أعانك الله وصبرك |
ملامح قمر .. يعطيكِ العافية قلتي نفس الكلام الي بخاطري الشباب حالهم تغير والله كنت اخاف اقول مشكلتي الين لاحظت كثير بنات زيّ بالظبط تعرفنا وسوينا مجموعه وحاولنا نوصلّهم بطريق غير واضح وكان انسب شي بالنسبة لنا المنتديات الرجالية الي تناقش مشاكلهم الخاصة بس للأسف .. مشكورة لدعوتك ربي يحفظك |
اختي مشكلة زوجك ليست شك في الرجولة كما ايدتي الاخت السابقة
بل هو طبع ترسخ فيه تصرفاته نتاج تربية اهله له فانظري الى. ما مضى من عمره اعتقد تحتاجين الى قدره لتغيري ان استطعتي الا اذا شاء ما شاء لا اقول قولي لاضعف رغبتك في العيش معه لكن الواقع ليس كالكلام في القصص الواقع يقول ان من شب على شي شاب عليه صعب تغيري شخص الا اذا هو اراد ابداي بامور صغيرة عوديه عليها حتى تصبح من روتينه ثم ابداي بالتوسع مع ان الامر صعب جدا |
ماهي طريق تعامل زوجك مع مجتمعه ؟
هل هو اجتماعي .. هل لديه صدقات كثيره .. الا تحدث بينكم مشادات احيانا ؟ |
لا اريد ان اخوفك ... لكن مشكلتى مشابه لك بعض الشي في الماضي
والان هو تزوج لانه يريد ان يكون رجل وكلمته هي الاصل ... بعدما اعتمد على في كل شي في حياته اراد ان يجرب كيف يعيش كرجل !!!!!!!!!!!!!! |
اتوقع ان المشكله تكمن في قلة ثقته بنفسه ..
ويرى ان تصرفاتك اقرب للصواب فأعجب بفكرك فأعتمد عليك .. ويشاورك في كل شارده ووارده بالتالي شعرتي انه يستند اليك بدلا من ان تستندي انتي اليه .. اذا عليك ان تزرعي ثقته بنفسه بالتدريج .. اولا تحدثي بشكل عام عن القناعات .. وعن الحياه الزوجيه بشكل وعام وان كان بشكل غير مباشر كالحديث عن مشكلة ما قرئتيها وان الاصل هكذا وهكذا .. ثانيا .. اجعليه يختار مثلا مكان تتعشون فيه .. ( قبل فتره انا اخترت مكان العشاء والليله انت ) .. ولو اختار امدحي اختياره .. وهكذا ونوعي في مثل هذه الامور . خذي رائه في امور هي بالنسبة لك ِ امور بسيطه .. الهدف منها ان يتأخذ القرار من نفسه ويشعر انه يحسن التصرف او يحسن التفكير بالتالي اعطاء رائي صائب .. ارى ان زوجك به خير كثير .. اصبري ياخيه واعي ربك .. ان كنت ِ تري رائي قريب للصواب فاخبريني حتى اتوسع اكثر في ذلك .. تمناتي لك ِ بالتوفيق .. |
أختي الفاضله - حياكِ الله ..
- هل كان هذا الطبع مع زوجكِ في بداية ارتباطكما . أم أنه بدأ في التغير بمرور الزمن ؟..! - هل كنتِ في البداية وقبل أن تصلي لرأيكِ بزوجكِ حالياً ، تستهمجين رأيه في أي أمر من الأمور أو تنتقصين منه ، أو تنتقديه بشده حين يصارحكِ برأيه عن أي شيئ أي شيئ..!! ( تذكري جيدا)..! _ هل هو متردد في افعاله كثيرا..؟؟!! |
الله يصلح حالك اختي
|
لا تستعجلين رح يجي يوم وينتفض الأسد الذي بداخله |
اقتباس:
معاناتي مع الآثار اللي اترتبت على هذي التربية .. فاعتقد إني مااخطيت لمّا ايّدت ملامح قمر أمّا بالنسبة للأقتراح ياليت يكون في امثلة عشان افهم كيف ابدأ بالأمور صغيرة اعوّده عليها ؟ |
اقتباس:
التائه قلبه .. زوجي انسان اجتماعي للغاية ويحب الناس ويشعر بسعاده كبيرة لما يخدم أحد صداقاته لا تحصى وهو انسان جداً وفي .. والمشادات كثير تحصل بيننا هو انسان رائع ما افكر اخسره ابداً , بس اتمنى الاقي طريقة اتعامل فيها معاه بالتالي تتحسن ظروفنا اكثر إذا لقيت في بعض هذه الصفات جواب لأسئلتك أتمنى اشوف تعليقك لأعرف سبب سؤالك |
سبحان الله انت زوجك وانا زوجتي تاركه لي كل شي اكثر كلمة اسمعها منها بكيفك
حتى في لبسها صرت انا أختاره بس الحمدلله اهم شي اختي لاتصارحية بالشي هذا اتوقع بيجرحه الرجال كل شي ولاتحسسية بالنقص حاولي التدريج مثل ماتكلموا اللي قبلي الله يحفضهم ويحفظكم ويفرج همك وهم كل زوجه اكتب لك وانا في الحرم يارب استجب دعائي وفرج هما وارزقها ماترجوا وفوق ماترجوا وكل اعضاء المنتدى وكل بنات وشباب المسلمين امين يارب |
اقتباس:
لا أخفيك هذه هي مشكلة أمي بالضبط .. وانا اخاف تتكرر المأساة وعشان كده ادّور حلول من الآن والآن بعد مافهمتي الحياة وعرفتي سبب زواجه الثانية وايقنتي ان مساعدتك له واعتماده عليكِ عمرها ما كانت حل سليم ايش تشوفي _من باب خبرتك_ افضل طريقة للتعامل معاه لو رجع فيكِ الزمن ؟ الله يصبرك ويأجرك |
اقتباس:
لا تظلمونه الله ينور دربك .. اكيد استفدت من آرائك .. والله السطور هذه وصفت حاله تماماً |
اقتباس:
ابداً والله هذا طبعه من البداية حتى انه من بداية خطبتنا اعتمد علي بتأثيث البيت بالكامل لأصغر قطعه الكاسات وبجهل وعفوية تلك المرحلة ما ادركت الي يدور حولي وانه الحياة صعبة بالطريقة هذه وبالنسبة للتردد احيانا نعم والنصف الباقي تهور بدون تفكير في عواقب الأمور |
اقتباس:
|
اقتباس:
|
اقتباس:
بالنسبة للرجل ما اعتقد انها مشكلة بهذا الحجم لأنه بطبيعته مسؤول عن كل شي وان تجاوز ذلك الحد قليلاً , يبقى هو الرجل اللهم آجعله دعاءً مستجابا .. الله يجزاك خير |
لا يملأ فم بني أدم إلا التراب
ويتوب الله علا من تاب |
اقتباس:
ولا اجد تفسير لبروده وردة فعله تجاه المسؤوليات سوى الجهل بها او الكسل لكن انت تقولين ايضا انه خدوم ، فكيف يخدم الناس ولا يخدم بيته ويتحمل مسؤوليته . بصراحه مشكلتك غير واضحه والمواقف التي عرضتيها لاتوضح لب المشكلة بالنسبة لي . |
اقتباس:
لكن أريد توضيحاً للذنب الذي اذنبته ويستحق التوبة لأكون على بصيرة نوّركم الله |
اقتباس:
يمكن ماقدرت أوضح نواحي الضعف فيه تجاه مسؤولياته مساعدته للناس تكون مادّية لكن تقصيره العائلي يكون معنوي اكثر بمعنى انو ما يصدر قرار ابداً ابداً بالتالي اصغر القرارات تكون عليّا وبحكم اني امرأة ولا خبرة كافية لي بالأمور احيانا نكون بمواقف محرجة وبعدها يبدأ يعاتبني انتي السبب انا اخاف ان الوضع يتطور عشان كده فكرت اشوف بعض التجارب ولما رديت على الأخت للصبر حدود ما قلتلها انتي نفس مشكلتي لا قلت انتي نفس امي لأنو حسيت انو اعتماد زوجها عليها ماديا ومعنويا يعني تكون الزوجة فالبيت رجال وحرمة على قولهم انا قلت بموضوعي انا كأني "الأم" فالبيت ما قلت الرجال لأنو اعتماده علي معنوي بكل شي مادري اذا قدرت اوضح أكثر .. وشاكرة طيب ردك للمرة الثانية |
آآآآآآآآآآآآآه ياارتواء نفس مشكلتي بالضبط كانك تتكلمين عن زجي ...:24::24:
احس ودي ابكي لما اتكلم ع حالتي ... زوجي مثلك مستحيل افكر اخسره لكنه لا يستطيع تدبير اموووووووره ابدا ابدا ... اتكلم عن المشاريع اللي خسرها او عن الاشياء التافهة اللي يضيع وقته عليها ...تصدقين اي مشروع يسويه مايعرف يبدا من فين ويسوي اشياء اعتذر اذا قلت انها غبية مثل يروح يطبع كروت قبل مايبدا المشروع .. يطبع اكياس وخرابيط وبكميات كبييييييرة جدا وبالنهاية المشروع فشل قبل مايبدا :29::29::29: تصدقين انا اعلمه اقول له سوي كذا ويطلع كلامي صح .. مايعرف يدبر اموره بالمعني الصحيح ابدا .. يحب دائما ترك الامور على حالها حتى لو ماتنحل كل شوي يجيب عذر .. كسول لكن يحب مرررررررررة يخدم الغير يحب المساعدة بشكل كبير لكن انه يغير من حاله للافضل مستحيل كيف تجي هذي ماادري ؟؟ وش اقووووول وش اخلي كنت ناوية اطرح موضوع ويوم شفت كوضوعك حسيتك تتكلمين عن زوجي .. احس اني اقوى منه في امور كثيرة مثلا يصدم بسيارته حادث بسيط جدا يتعكر مزاجه ولا يطلع من البيت يوم كامل ... بعكسي تماما انا فيني روح قتالية مررررررة :17::17::17: لما احط الشي في بالي افكر كيف اسويه واهلك نفسي بالتفكير وادعي ربي واستشير كثيرر يعني بالعربي اقتل نفسي حتى يصير هالشي :30::30::30: والحمد لله تخطيطي لحياتي افضل منه .. انا اصغر منه ب 15 سنة وعندي دخل يارب لك الحمد والشكر كما يليق بجلال وجهك ... اما هو عايش على راتبه بالعربي فالها يجي اخر الشهر مطفر مايعرف كيف يستثمر امواله ابدا .. تخيلي حتى في السفر احجز التذاكر والفنادق بالفيزا واضبط السفر واجمع معلومات عن المدن والسكن واعبي البيانات ولو فيه روحة للسفارة علشان الفيزا احجز المواعيد وادفع بالفيزا هو يقول لي علميني بس متى الموعد واروح معاك :29::29: المشكلة مااقدر اعتمد عليه ابدا يعني حتى لو بيبحث على النت مايعرف يبحث على رغم جاوسه على النت اكثر من 9 ساعات في اليوم بس كله على امور تافهه صحف وايميل والعاب ساعات احسه مراهق :15::15: اااااااه بس في قلبي لوعه منه مااحس بالامان لمستقبل ابنائي افكر فيهم ليل نهار .. الله بس يفرجها يارب ادعوا لي |
قلب الماما .. ربي ينوّر عليكِ فهمتيني تماماً اقتبست من كلام " لا تظلمونه " هذي السطور اقرأيها اقتباس:
|
عدم ثقته بنفسه + يخاف اللوم + كسول واعتمادي = عملية اسقاط عليك لأي خطأ
الحل : ارفضي في بعض المواقف اتخاذ أي قرار اتركييه عليه في حال إنه اتخذ قرار صح شجعيه وامدحييه والعكس لو كان قرار خطأ لا تدققي فيه كثير تجاهليه خلييه يحس إنه وصل لقدراتك وثقتك بنفسك لانه هو يشوفك متفوقة عليه ويخاف يفشل قدامك لأنه حساس عملية الاسقاط اللي عنده هذي دليييل انه يحسك شي كبير شوفييه يحط الخطأ عليك ومبسوووط انه طلع منها لانه ريّح نفسه وترك كل شي على راسك وعموماً لا تنزعجي كثير لانه وبلا مبالغة اغلب رجال شعبنا الكريم ( السعودية الجميلة ) كذا مافيه شي جديد إلا مارحم ربي |
اقتباس:
والله استفدت من الموضوع هذا شي كثير يكفي انكم ساعدتوني افهم اسبابه من ضمن الاستراتيجيات الجديدة بحاول اترك بعض الأمور عليه زي تسديد الرسوم والشغلات الي عالانترنت خاصة انها كثيرة هاليومين بحكم اننا برّا بخلي بعض القرارات عليه وما راح الومه لو طلعت خطأ بالاضافة لبقية النقاط المذكورة بالموضوع |
زوجك رائع كما ذكرتِ وعليه يستحق المحاوله ثم المحاوله
والصبر على ذلك .. من المهم التدرج في ذلك .. اولا لابد ان تحاولي ان تزرعي ثقته في نفسه مثلا مشاورته في اختيار مكان للغداء .. واثني عليه باحسن اختياره . حتى ولو لم يعجبك .. شاوريه مثلا ببعض كماليات ملابسك - لزيارة صديقه او قريبه - ( اجمل باللبس هذه الساعه ولا هاذي ) .. واثني عليه وامدحيه .. ( ماشاء الله عليك ذوق الله يخليك لي يارب ) باعتدال طبعا .. وهكذا اختاري امور بسيطه وشاوريه واشجعيه وامدحيه .. بقولك شئ مهم مثلا قلتي له وش رايك نتغدا برا ..قالك اوكي فقلت له اختارالمطعم ؟ او باي مطعم ياقلبي نتغدى فيه ؟ بيقولك بكفيك ؟ براحتك ؟ مااعرف ..؟ ممكن كاول مره تمشينها لكن المره الثانيه اصري هو يختار وقيسي عليها بقية الامور .. بعض الزوجات صح زوجها اتكالي او مايثق بنفسه بس هي كمان راضيه وتساعده بمجاراتها له وان كان بشكل غير مقصود .. انتقلي بعدها لامور اكبر .. طبعا انا اعطي امثله فقط .. انت ِ ادرى وين اعتماده عليك وبأي امور .. من المهم ان تزرعي قناعاتك وتوصلينها له بطرق مباشره وغير مباشره .. يعني تذكرين مثلا مشكله قراتيها او موقف لصديقه لك .. وكان رائك كذا وكذا لأن كذا وكذا .( يعني تذكرين رايك وتحليلك والاسباب اللي خلتك تقولي كذا ) .. ( مثلا المفروض مايسوي كذا بوالدته لانها امه ولها فضل الخ الاصل مايعاقب ابنه بهالصوره لان راح تاثر على ولده مستقبلا .. الخ فلانه تقوم بدفع اغلب مصاريف البيت الاصل زوجها لانه من واجبه يوفر لهم حياه كريمه وواجبه ينفق عليهم .. الخ . بعدها تذكرين له موقف او مشكله او قصه قراتيها وتناقشنه عنها .. مثل كيف تحل ..؟( كانك تبي تاخذين رائه بالموضوع).. يعني ناخذين وتعطين معه وتحاولين تخلينه يفكر ويستنج حلول للمشكله .. واثني على حلوله .. من المهم ان ماتلومينه لو غلط .. هوّني عليه .( مو اسلوب الطالب والاستاذ المتسلط ) .. وان احسن المره الثانيه قولي له هالمره افضل من المره اللي راحت عشان كيت وكيت .. والانسان مو عيب يغلط المهم يستفيد من اخطاءه ... حاولي تقسمين الامور بينك وبينه انت عليك كذا وكذا وانا كذا وكذا .. اجلسوا مع بعض وفكروا باحلامكم المستقبليه .. خليه يحس انه صاحب قرار وانك تفتخرين فيه .. اشعريه بمكانته عندك وعند الناس .. اي قرار تتخذينه اذكري الاسباب . اشعريه بحبك له والتلامس الجسدي مهم ( اقصد كالاحتضان والجلوس بجواره.. الخ ..) ادعي له واصبري .. والانسان كل مايكبر تزيد خبرته وادارة اموره بشكل افضل . الله يسعدكم ويوفقكم .. |
اقتباس:
اختلف معك .. صحيح هناك من يتكل على زوجته بشكل كبير .. لكن لانستطيع ان نقول انهم الاغلبيه ..!؟ |
لا تظلمونه ~ شكراً بقدر استفادتي من كلامك وفي طريقي للمحاولات ان شاء الله شاكرة طيب ردك ثانيةً |
| الساعة الآن 11:30 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©