|
اختلافاتى مع زوجى
السلام عليكم ورحمه الله وبركاته
انطلاقا من حبى لهذا المنتدى واصحابه ومالمست فى البعض من رجاحه العقل والحكمه احب ان اطرح مشاكلى احيانا لاخذ الاراء ولكن اتمنى ممن يرد على ان يلتزم الامانه وان لايكون من ردة فقط القصد التشويش والله من وراء القصد انا متملكه من اشهر واعانى من زوجى من بعض الامور ساطرحها بين ايديكم فانا قليله خبرة وساحاول ان اختصر اولا اتمنى ان تعرفو انى ليس لدى خبرة بالحياة الزوجيه ولا التعامل مع الرجل فانا احاول تثقيف نفسى بالقراءة اول معاناة لى مع زوج وسبق طرحتها تغيرة بالبدايه كان شديد اللهفه والمكالمات والكلام ثم بدء بالتناقص ووصلنا لمرحله عادى جدا يسال عن الاحوال فكانى مع رجل اخر وهذا مايخنقنى احيانا افتقادى للجو الاول فبعد ان كان يبحث عنى ويهتم ولو ارسل او اتصل مباشرة يرد واشعر انى مهمه الامر تقريبا شبه انتهى واصبحت انا من ابحث عنه وارسل كثير واحيانا يرد واحيانا لا واهلى وصديقاتى يقولون اثقلى اثقلى وبالحقيقه لا اجيد هذا الطبع بتاتا... ثانيا سمعت من صديقاتى كثرة الهدايا ووو وانا لم اجد ابد هذا الشى منه وحاولت ان المح له اتمنى هديه تشعرنى باهتمامه وتقديرة صدقونى ان لاريد شىء ثمين ولكن اتمنى ان يفرحنى او يفاجئنى بشى وبت اخاف انه بخيل... ثالثا تحصل بينا اختلافات وخلافات بالاراء وبالنهايه يمشى رايه وانا اتنازل وحتى لو اخطا قليل مايعتذر ولايحب النقاش والزعل وحتى لو زعلت مايفكر يرضينى بحجه انه انا ازعل على اشياء تافهه وسخيفه من وجهه نظرة وهذا الشى يضايقنى اتمنى التفاهم والاحترام المتبادل واقلق لو حصل بينا شى وهو لايهتم ولايكترث واتساءل هل هو طبيعى وقوع اختلافات او مشادات فى فترة الملكه اولا ؟؟ رابعا حصل بيننا موقف اشعر بانى اخطات فى تقدير للموقف وبالغت فى انفعالى ومتضايقه من نفسى كان سيحضر لدى بالمنزل وبالغت بالاستعداد ووو ولم يحضر وانتظرت ولم يرد واتصل عليه وارسل ولامجيب ثم اخبرنى انه لن يحضر لانه بالمستشفى فانفعلت وغضبت وارسلت له كلام لن احادثك وسازعل وانت لاتقدر تعبت بالاديستعداد وجلست ابكى وارسلت كثير ومارد بعدين ارسل رسائل اخطا على فيها وتلفظ وانى ماقدر وبالنهايه علمت انه وقع عندهم حادث فشعرت بالندم وهو لايرد لان نفسيته تعبانه واحاول ان اطمن برسائل واتصالات ومرة يرد وعشرة لا واتمنى افتح نقاش معه اعتذر فيه واخبرة بان انفعالى لانى تعبت بالاستعداد وهو ماخبرنى انه لن يحضر وكان قبلها كم موعد واجل وانا لى كم يوم نفسيتى جدا متعبه لا اعرف كيف احلى الاشكال ... مشكلتى معاة يحب يفرض رايه دفش معاى كانه يتعامل مع صديقه ولايراعى خاطرى وهذا كله واحنا بملكه وكنت اسمع من صديقاتى شى رهيب عن الملكه والتدليع فهل الرجال يختلفون ام ماذا؟؟ ارجوووووكم تفاعلو معى خصوصا النساء والرجال الى لهم خبرة وراى سديد امثال رجل الرجال والبليغ وغيرهم الكثير ابى راى متعقل والى ماعندة او مايقدر يدعيلى دعوة صادقه ان الله يفرجلى لانى والله خايفه جدا من الزواج والفشل برضو اتمنى تنصحونى نصايح عامه خصوصا الرجال كيف اتعامل مع الرجل وكيف اكسبه انا ماحتكيت بحياتى برجال واجد صعوبه فى فهمه انا حساسه مرهفه رومانسيه عاطفيه اتاثر بسرعه احب الرعايه والاهتمام وهو العكس تماما يرى كل الامور توافه واننى سخيفه ويجرحنى احيانا ولا يراضينى او يجبر بخاطرى انا خايفه اتعب معه ارءاكم ودعواتكم جميعا الله يفرجها لكم وجعل من تكرم ورد على ان الله يوسع له فى رزقه ويرزقه من حيث لايحتسب |
ايضا نسيت اكتب امر يضايقنى بداخلى اهتمامه الزائد باهله واخواته لدرجه ينشغل معاهم بالايام ولا يحادثنى ولو حصل معاهم شى او احد احتاج شى معاهم انا لا اريد مشاكل او انه يكرههم لا اعوذبالله لكنى اخاف بعدين يكون اهتمامه بهم اكبر ويطنشنى وايضا فيه البرود بانجاز الامور وعصبى بنفس الوقت وانا عصبيه المشكله انفعل وهو مايهدينى ينفعل زيادة وانا اتمنى لو انفعلت يهدينى والعكس ننفعل سوا خطا
اماااااااااااااانه ردو على بنصايح ومشورة ودعاء والله تعبت من كثر مافكر وخايفه جداااا واشياء كثير بس هذاى الاساسيات والحمدالله من قبل ومن بعد والحمدالله على كل حال ... |
اقتباس:
هذا اللي عندي .. ان شاء الله اكون افدتك و يااارب يسعدك و يوفقك بحياتك و يجعل بينكم مودة و رحمة لا تنسي اهم شي الدعاء عند كل صلاة بانه ربي يوفق بينكم |
أحترميه ممكن هو ماتقبل فيك شي صارحيه بكل شي حاولي تكونين أقرب لي نفسه
وعلي حالتك لو تكون الملكه أطول وقت حتي تعرفين له ولو طبعكم مو متوافق أفضل الإنسحاب من الحين أفضل لك وله الله يوفقك ويسخره لك |
ماشاء الله يا نوره
درر الله يحفظك كلامك كللللله تمام إه ياروحي انا سوي الله قالت لك عليه أبلة نوره والله يوفقك ويسعدك مع زوجك ويبعد عنكم شياطين الانس والجن |
نورة جزاك الله خير وجعله بميزان حسناتك وماقصرتى وكلامك عين العقل بس والله تعبت يختى ارسله واتصل مايرد على حتى تو ارسلت لو كنت انا غلطانه انا اسفه وحقك على انا مشكلتى انى طيبه مرة طيبتى تطغا على اى شى حتى لو غيرى غلط على اسامح وادوس على نفسى نفسى اكون حازمه وقويه الكل حولى يهزءنى انتى احسن منه ليش ناطله حالك عليه ترسلين وتدورين مدرى بس اتعامل بشخصيتى وطبيعتى وطيبتى والله يستر بس مرررررررررة متضايقه من تطنيشه لى
|
ملامح قمر شكرا اختى جزاك الله خيروالله يكتب الخيرة يارب
|
اختى جزاك الله خير يارب وباذن الله بحاول اعمل بنصايح اختى نورة والله يوفق يارب
|
مشكلتك هذه عزيزتي انتي هيا من عقلك الباطني وسأوضحها لك
في بداية الملكة الكثير من الازواج يكون مندفع بالاهتمام وهذا امر طبيعي لانه متلهف .... والمرآه تشعر انها ملكة لان قد يكون اول شعور في حياتها ... ولكن حقيقة يا اختي الكريمة كل شي في هذه الدنيا لايدوم بنفس العطاء فهناك مراحل تمر بفتور او روتين ...الخ والسبب ضغوط الحياه فتلاقي الشاب ديون وغيرها وهموم ... ووالله انها تأثر على طريقة تعامله في كل شي وللأسف تترجم حالة انها قلة اهتمام وفي هاذي الحاله لا الوم البنت لأن البنت ستكون بالمقابل شغوفه على انها تعودت على اهتمامه ولكن ثقي ثقة تامة ان الحب الذي تضنيه بهاذي الطريقة حب نزوه عاطفية وليس الحب السامي واعني بالنزوه العاطفية هو الاحتياج العاطفي فنرى جميع الطرفين مندفعين ببداية الزواج من حيث الاهتمام والغيره والكلام والهدايا ... والخطأ الاكبر انها تكون هي معيار للحب وهذا خطأ فمعاير الحب هي التضحية الوفاء الرقة في التعامل واحترام الرجل في السر والعلن واحترام الرجل لزوجته في السر والعلن ولا احد يقلل من شأن الاخر ... نأتي إلى نقطة الاهل .. فهي نقطة ازلية بين النساء ونصيحة اخ يا اختي لاتتأثري بأفكارك التي تراودك في الباطن فكثير من النساء ازواجهم بغضوهم بسبب التفكير العقيم والغيره التي ليست بمحلها وهم الاهل وان كان منهم قصور في الاهل بالنسبة للرجل امر ثابت وخط احمر فعينيه عليهم وجميع الافكار التي تراودك في حديث النفس او ترجمة المواقف ماهي إلا ردود عاطفية لاتعطيها بال حتى وان كان اهله غير جيدين فانتي تتعاملي معهم برقه من باب الحب الحقيقي وهو احترام زوجك من احترامهم والرجل كذلك فنصيحة ابتعدي عن مقارنة الاهتمامات ونصيحة مهمة اشغلي تفكيرك في المستقبل وكيف تقدمي له بدون فهناك مفاهيم خاطئة جدا يتداولها النساء وفي الاخير المرآه من تحفر نهايتها بأسلوب النكد وكآبه مع النفس ثم امراض وعقد والسبب الاهتمام في صغائر هذه الامور ...صدقيني الرجل يريد امرىه ان تحدثت تتحدث من ذهب وتكون متزنه عاطفيا وعقلانيا تدير الامور بقيادة وتحلل المواقف وفق نظرتها التي تلائم شخصية زوجها علما ان لكل رجل رومانسيته ولكل رجل ايضا عقليه فلايعني اهداء بعض الازواج فترة الملكة لزوجاتهن امر كمال لهم .. وانهم يمثلوا الحب الصادق اعتقد انك الان حاولي ان تبدأي بداية لم يبدأ بها كل زميلاتك بداية عقلانية الا وهي ... كيف نقرب الافكار كيف تستلطفون بعضكما كيف تكملون بعضكما امور كثير اقرآي عنها وعن شخصية الرجل ولاتتأثري بكلام مجالس الحريم وعن تحليلاتهم فكثير منها تعبر ردود فعل عاطفية ... لكن فكري كثيرا الان ببناء قاعدة بينك وبين زوجك بكتكم وبدون وساوس ابتعدي عن اي فكره سلبيه ولاتقارني اي افكار تريها بالتلفاز او تسمعيها على حياتك وان لم يكن هذا الامر لايوجد في زوجك فهوا معيار نقص عاطفي او عقلي ... هذا المفهوم خاطئ جدا وهو سر الضياع اصنعوا المعاير والحب معا فقط بالذي ترونه فانتم بمرحلة بناء ولاحقين على السعادة فالزواج اراه تحدي في البدايه فيفترض منا ان نتحد معا حتى يزيد تلاحمنا ولانلتفت ان نتظر ان نكون كمال في بدايتنا فحتما ستكون كالجرعه في بدايتها وجحيم بعدها وفتور وملل من بعض ... تحياتي |
خلاص ياقلبي
قلت لك ارسلي اخر رسالة اما نصية او ورقية المهم تكوني ذاكرة له انها اخر رسالة وخلاااص وقفي .. اتركي له مساحة .. يمكن متضايق من اي شي وحابب يكون لحاله .. انسيه لفترة و ان شاء الله لحاله يرجع بعد ما يهدا بس لما يرجع لا تفتحي المواضيع الي فاتت ابدا و لا رجعي تتاسفي و تبرري خلاص انسسسي تمام ربي يسعدك معاه و يكبر حبك بقلبه |
اخوى جزاك الله خير على كل كلمه والله كلام عين المنطق والعقل بس الواحد يتاثر عاطفيا ونفكر واحيانا تشويش من الاهل والى حولك واظف الى الان وانا وهو مرحله صراع ماحسنى مستقرة والله انى متضايقه مرة اتمنى اوصل للتفاهم معه قبل الزواج انا ارسل واتصل وهو مايتجاوب كثير فارسلت امس لو كنت غلطت فانا اسفه واعتذر وسكرت جوالى عشان ماضعف وارجع ارسل واتصل بمسك نفسى حاسه بالاهانه انا الى اهتم وادور واسئل الله يعين بس ويصلح الحال والحمدالله
|
اختى نورة ,, ,اشكرك لتشريفى مرة ثانيه بموضوعى ومثلك بردك وعقليتك وخبرتك ماستغنى عنها وانا حديثه عهد اختى انا ارسلت رساله امس انى اسفه وكذا ولارد وضايقت وسكرت جوالى مابى اضعف وارجع ارسل واتصل يومين ثلاثه بحاول عشان ارتاح واريحه منى بس داخليا مو مرتاحه نفسى اناقشه واشرح الموقف وافهمه واتفاهم معه واصفى الى بنفسى ماحب التراكم ذا الله يعين بس
|
ووين الباقين فوق المايتين مشاهدة وكم رد بس ياليت ماتحرمونى من نصايحكم ومشورتكم الله يجعله بميزان حسناتكم
|
لآحظت فيك صفه .. اللي هي انك ( إندفآعيه بزيآده )
صدقيني حبيبتي الرجآل مآتمشي معاهم الاندفآعيه .. المفروض يوم انه تأخر عليك .. تتصلين عليه مره فقط .. حتى لو قلقتي عليه .. وصحيح انه هو شي يزعل بس لازم تفكرين لان هو مآ تأخر الا اكيد بيكون عنده عذر .. وهو بالاصل اكيد بعدين راح يتصل عليك ويفهمك عن سبب التأخير .. ونصيحه لاتتنآزلين عن حقوقك مهمآ كآنت .. لان لوتنآزلتي مره عن حق لك .. راح تتنآزلين عن بآقي حقوقك غير كذا في النقاشات خليك بآرده وهآديه ومتفهمه للموضوع وتكلمي بكلام منطقي .. لان لو انفلعتي بتكونين غلطانه .. و يكبر النقاش ويتحول مشكله ..لان على كلامك كلكم شرارات ..غير كذا اذا زعل ولا زعلتي .. لاترسلين رسائل او تتصلين كذا تزيدين النار حطب .. طنشي فتره بعدين اكيد راح ترجع المياه لمجآريهآ كل شي يجي بالهداوه زوجك من النوع اللي يحب الزوجه الذكيه .. اللي هي انك تصيرين له اخت وزوجه وصديقه بنفس الوقت .. ولا تخلينه شغلك الشاغل زي ماهو يهتم بأمور .. خلي لك بحيآتك امور واهتمي فيهآ .. لان صدقيني بتتعبين لو تقعدين تدققين وتعاتبين على كل كبيره وصغيره .. وخليك غآمضه مو كل شي تقولين له .. ولاتنسين الكلام الحلو ترى له تأثير كبير والله يوفقك يارب |
فدراليه___كلامك عجيب مرة فعلا وصفتى صفه اكرهها فينى انفعاليه وابى كل شى بسرعه مدرى كيف اروض نفسى مثلا عصبت بناقش بموضوع معين ابى تفسير حارة جدا للاسف وفعلا كنك توصفين حالتى وحالته والله الله يجزاك خير ويسعدك قريت ردك اكثر من ثلاث مرات مرة منطبق على حالتى وهذا الى مخوفنى خايفه بعد الزواج اتصادم او ماتفق معه الحين له ماتصل ومطنشته مادورته ابى اثقل مليت من دور انى انا الى الاحق وادور وجزاك الله خير ولاتحرمينى من نصايحك
|
الفدراليه الى محبطنى انه عرف شخصيتى واضحه مررة عرف كل شى عنى تتوقعين لو اتغير يتحسن الوضع؟؟؟ قاعدة اقول ليه اتعب حالى هو عرفنى ؟؟وتتوقعين اختى ليه كان بالبدايه مندفع لى والله مرة تغير الحين صار عادى وبارد ومافى كلام حلو صرت اشك وربى انه ماعاد يحبنى تخيلى اول يعبرنى وووو الحين مررررة عادى حتى لو مارسل او ماتصل غير تماما وكم مرة اواجهه وماعندة اجابه
|
اقتباس:
على فكره الرجال طبعه ملول حتى لو يحبك ويموت فيك .. بس ايام تمر عليه يمل من كثر المكالمات والرسايل بس مو معناته انه مايهتم او مايحبك لا .. لان هذآ شي طبيعي في الرجآل .. انتي دورك الحين بشطارتك خليه يرجع مثل اول .. الحين لو ماقال لك كلام حلو .. او اذا حتى مااتصل عليك .. لا تعاتبينه ولاتقولين وينك ولا تقولين ليه مطنشني .. هو اصلا بيقولك معليش مااتصلت لاني انشغلت .. انتي هنآ قولي خذ راحتك حبيبي عادي خليك طبيعيه ولا كأن شي صآر وسولفي طبيعي بعدين تظآهري بإنك مشغوله .. قولي عن اذنك امي تنآديني او اي شي .. وسكري .. صدقيني راح يستغرب .. لان الحين هو ضآمنك وحاطك بجيبه ويدري انك مآرآح تقدرين تتخلين عنه .. وبيني ان لك صديقآت ولك قريبآت تسولفين معهم تروحين لهم .. حسسيه انك تقدرين تعيشين بدونه .. بس مو تقولين له اقدر اعيش من دونك لا غلط .. خليهآ بطريقه غير مباشره .. ولا تعطينه وش سويتي وش ماسويتي اليوم ولا وين رحتي ووين جيتي ومن كلمتي لا تخلين نفسك كتآب مفتووح .. خليك لغز وهو يسعى لحله واذا اذا اتصل مو تردين بسرعه .. اجلسي ساعه كذا بعدين ارجعي اتصلي .. خليك ثقيله شوي = ) وأي شي حبيبتي انآ حآضره .. بس حبيت اعرف كم عمرك .. .؟ |
هلا فدراليه الله يجزاك خير اختى انا تقريبا جالسه احاول اعدل من نفسى ولعل وعسا يفيد واليوم حصل موقف نرفزنى بس طبعا غيرت ردة فعلى تجاه الموقف بس حاز بنفسى الى سووها وهو ماجاب خبر الله يعين بديت اخاف واشيل هم من حياتى معه تفكيرة كله متشبع انا الرجل وانتى المراءة وكلمتى الى تمشى وانا حر وانا بكيفى ودايم يحاول يخوفنى منه وانتى ماتخوفنى او ماتهمينى ووووو احسه مشحووون على مع انى قسمن بالله شخصيه سلسه ومرنه ومالى بهالكلام كله حسبى الله ونعم الوكيل لو كان ماخذ وحدة قويه وراسه كله امشى ومدرى ايش صح انا احب الحوار التفاهم الاحترام بس هو عندة عنجهيه مرة الله يصحه بس تعبنى ,,,,انا عمرى 29
|
الحمدالله على كل حال الحمدالله من قبل وبعد الحمدالله _
انا فى ضيق من تصرفاته ولكن الحمدالله وطلبت الرد والتجاوب من البعض ولكن .. جزا الله خير الجزاء من رد على موضوعى وتفاعل معه واسال الله ان يفرج كربته ويسعدويسخر له وان يكتب له بكل حرف حسنه... يارب اصلح حالى وحالى الجميع ولا تكلنى الى نفسى والى احد |
وعليكم السلام ورحمة الله وبركآته
عزيزتي .. انصحكِ ان تفهمي نفسية زوجكِ وحآولي التعرّف عليه من جديد اقرأي عن نفسية الرجآل وكيفية تفاعلهم .. فهم مختلفون جدا عنا نحنُ النسآء اقرأي للاستاذه ناعمه الهآشمي رائِعه جدا ماشاءالله .. اسأل الله ان يسخره لكِ ويسعد قلبكِ به |
همومكم ,,,جزاك الله خير وجعله بميزان حسناتك وامين الله يسمع منك اختى انا احاول افهمه وارى الامور من زوايته واجى على نفسى بس الله يعين يتعب حيل ويرزقنا الصبر
|
| الساعة الآن 01:36 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©