|
أبي أتقدم للخطبه لكن المشكله وجهي
بمناسبة عيد الفطر المبارك
كل عام وانتم بألف خير وعيدكم سعيد أعاده الله علينا وعليكم باليمن والمسرات موضوعي أو مشكلتي هي أني أريد التقدم للخطبه ولكن المشكله تكمن في وجهي وجهي دماااار (الحمدلله على الخلق الحسن) عندي ترهلات تحت العيون ومسامات واسعه في الخدود وتجاعيد في الجبين وخشمي كبير نوعاً ما وبشرتي سمراء تميل للبياض حينما تراني من بعيد يكون شكلي عادي لكن اذا قربت مني يبين كل شي ويكون شكلي شين الخوف في اني اتقدم للخطبه ويتم الزواج وهي لم تراني جيداً فتحدث الكارثه بعد الزواج يمكن تكرهني وتشمئز وش رايكم اصرف نظر؟ |
يااخي انت رجل ولايعيبك شئ
اذهب الى مكان يسوي تنظيف بشرة وروح لدكتور جلدية وراح يعطيك كريمات ومعقمات وثانيا اطلب نظرة شرعية وخليها تشوفك واذا وافقت خلاص سبحان الله ربي ينزل القبول |
يا أخي الكريم افعل الذي تستطيعه مما يجملك بالشيء المعقول
واترك الباقي فالمهم القبول والارتياح النفسي ولا يهم الشكل كثيرا فيه ناس وسيمين لكن ما ترتاح لهم , وفيه ناس عاديين واقل لكن لهم قبول وكذاك فيه نساء جميلات لكن ماصخات , يعني غير مقبولات , وفيه عاديات لكن مملوحات |
بروح لعياده ان شاء الله
لكن السؤال يعني يكون فيه مشكله بعد الزواج اذا كانت بشرتي كذا ؟ |
اخي الكريم الجمال والشكل تقدير من الله وله اهمية بالنسبة للرجل والمراه
وهو اقل اهمية بالنسبة للرجل ,,, اؤكد عليك ان تطلب النظرة الشرعية حتى تراها وتراك لانه لو حصل ان تفاجات بك بعد الزواج فسوف يكون الاثر النفسي عليها قوي وربما تكرهك وتكون بينكما حواجز ولن ينفعك قولك ان المعامله الحسنة والخلق الطيب يسد مسد حسن الشكل ,,, اما لو راتك فانها ستكون بالخيار ولن تشعر بالغبن لو وافقت عليك لانها تنازلت عن هذه الجزئية مقابل ماتراه فيك من امور اخرى جيده ,,,, فيه كم موضوع طرحوها مخطوبات يسالون عمن هو في مثلك حالك ,,, طالعها وستجد الفائدة من النظرة الشرعيه ,,, وفقك الله ,,,,, يبدو لي انك تحاول ان تعقد عليها وتقول بعدها لن يكون بيدها خيار ,,, انتبه من هذا ,,, |
بالنظره الشرعيه كل شي يبان
وقول لها طالعيني زين ههههههه عادي ترا موفق |
ممكن الشكل مهم للخطبه ويعطي إحاء جيد
واعرف بنات رفضو عشان شكل الخاطب لكن أنت مشكلتك عاديه شوي عنايه وليزر وينتهي الموضوع وحتي الليزر أصبح غير مكلف يعني الليزر للمسامات الترهلات تحت العيون شكلك تشرب ماي وتنام لازم لك كريمات تجميل أنا أستعمل تحت عيوني أورنج ديلي منتج رائع وممكن تستعمل لفتره منظفات الوجه وبشرتك كذا من التغذيه أولا وممكن تدخن أو تسهر كثير عشان كذا أنصح أهتم بغذائك والتغذيه = الصحه = الجمال الصحه إلي أهم شي وأي إنسان مايقدر يستغني عن صحته وأهي أكبر نعمه صدقني أنت ماعندك مشكله وإهتمامك في نفسك وصحتك عشان نفسك قبل الخطبه وتتمتع بالثقه في نفسك وترتاح نفسيا عشان كذا رح للعيادات أهتم بنفسك والإهتمام بالنفس جدا شي ممتع الله يوفقك لما يحب يرضا |
تكفون لحد يقول امثال ماتو اللي قالوها
انت رجل ولايعبك شيء ! ليه مايعب الرجل شيء ,الحمد لله والشكر بس نأمل ان تكونون عادلين وواقعين وصريحين مو كل مرأة تتقبل تجلس مع رجل ملامحة تسبب لها الإشمئزاز ,زي ما الرجل مايقبل مرأة ماتقبل ملامحها *بالنسبة لمشكلتك يا أخوي انا ماشفت وجهك عشان احكم ولا اقدر اقول انت حلو والا انت شين ولاهي بتقبلك والا لاء لكن انك ماتخطب عشان وجهك تحسه مو حلو هاذي جديده ! لأن سبحان الله الأرواح جنود مجنده يعني يمكن ترتاح لشخصك اكثر من راحتها لوجهك و تقدم ماتدري وش ذوق البنت يمكن تكون ملك جمال بنظرها,قد يكون الشيء اللي شاغل بالك مايشكل اهتمام كبير باالنسبة لها :) ولها اهتمامات اخرى غير الشكل :25: ومننسى نهيبك يا اخونا العزيز انك تروح لأخصائي جلدية وتضبط وضعك ان الله جميل يحب الجمال :14: |
الله يوفقك
بالنسبه لوجهك تقدر تروح لأقرب مركز للجلديه الحمدلله أمرك سهل وأكيد فيه كريمات تخفف من المشاكل عندك وفيه بنات والله ما يهمهم الشكل يهمها العقل وبس توكل على الله وأحرص على ذات الدين |
أخوي اخطب ولاتسوي شيء بنفسك وشوف ويش يصير ..
الله يوفقك ويرزقك على قد نيتك |
بالعكس انا عندي احساس انو شكلك ماشاءلله ممتاز بس انتا عاد مبالغ فيها حبتين ..
صدقني والله لو البنت بنت حلال وطيبه ومتفاهمه رااح ينزل عليها ارتياح من ناحيتك ليها وارتياح من ناحيتها ليك .. سبحان الله ولآ تطالع في النااس يلي احلى منك ومدري شوو .. لآ ناظر للناس يلي اقل منك عشان تحمد ربك على حسن الخلقه =) والله يتمم لك على خير ياارب .. |
عادى يابن الحلال توكل واخطب واستخر قبل وخلك وواثق من نفسك وتكلم معها بالشوفه البنت تحب الجرىء المقدام كامل الرجوله صدقنى مهما بلغت من الجمال البنت تبى رجل بمعنى الكلمه ولو انك بشع وخلق ربى حسن وطيوب وحنون ورومانسى بتطلع ملك جمال بعيونها ولو انك ملك جمال بس شايف حالك ورجولتك ناقصه بتكرهك عموما لو ملكت عليها تقدر تزورها وتجلس معها وهالشى بيقرب المسافات وبيخليها تشوفك كويس بس لاتحاول تبين انك مو حلو لا واهتم بنظافتك وريحتك وهندامك وصلح الى تقدر عليه وممكن يتعالج وارض بالباقى موفق
|
اقتباس:
من جد اش الي الرجال مايعيبه شي ليه المراة مو انسانه وتحب الجمال عيب اذا طلبت الوسامه في شريك حياتها ولاحلال على الرجال حرام على الحرمه صاحب المشكلة : اخوي لاتفهمني غلط انا ما اقصدك ولاشي بس اتنرفز من هالامثال البايخه يمكن انت تبالغ وتهول الموضوع عشان قررت تخطب ومتررد وانت كل الي فيك امور بسيطة حبوب او مبقع كلها تتعالج روح اخصائي جلديه ولا تنسى النظافه قبل كل شي ومن حق زوجتك تشوفك مهتم بنفسك وتتزين لها زي هي ماتتزين لك واعجبني فيك حرصك واهتمامك بمظهرك واخذه في عين الاعتبار وصدقني لما تتزوج زوجتك راح تفرح باهشي والله يوفقك ويكتبلك الي فيه الخير |
شكراً لكم
صرفت النظر عن الموضوع أجلته إلى بعد سنه او سنتين |
يااخي لاتهون ولاشي محد قصد الاهانة او التخويف حسيت انه بسبب كلامي هونت لاتفهمني خطىء بس القصد انو اهتمام الرجل بنفسه ونظافته امر جميل ومطلوب واما واحد يقعد معفن وخايس ويقول الرجال مايعيبه شي هذا غلط هذا الي حبيت اوضحه لان كثير يستخدمون هالامثل في امور خطىء
انت مكبر السالفه ما فيك الا العافيه لا توسوس وجهي مو حلو ومدري ايش تزوج وتوكل على الله خير البر عاجله والله يرزقك الذريه الصالحه |
أخى الحبيب::
أولا مشاكل البشرة أصبحت اليوم ومع التقدم الطبى والعلمى مشاكل لها حل بإستخدام المستحضرات الطبية الخاصة بالبشرة والتى يوصفها لك أى طبيب جلدية... وهنالك علاج آخر مثل سنفرة الوجه .. والعلاج بالميزوثيرابى ... والليزر...إلخ يعنى لن تغلب وإن شاء الله ستجد مشاكل البشرة قد قلت عندك بنسبة كبيرة جداا.. بالنسبة لشكل الوجه نفسه.. فى الحقيقة .. الشكل مهم طبعا للرجل والبنت ... لكن المرأة العاقلة فى الغالب يهمها الرجل ذات الأخلاق ... ويجب أن ترى فى نظرة عينيك الثقة ... فالمرأة لاتحب الرجل المهزوز.... بل أنا شخصيا رأيت فى حياتى الكثير من الرجال العاديين جدااا فى الشكل .. ومع ذلك تزوجوا من ملكات جمال ... يعنى لاتعطى للأمر أكبر من حجمه... وأزيد لك من الشعر بيت ... كنت أعتقد أن شكلى الجيد والحمدلله سيساعدنى فى رحلة البحث عن عروس..... ثم من خبرتى اكتشفت ان البنات يتقدم على الشكل عندهم أشياء كثيرة جدا أولها المستوى المادى .. الشبكة والمهر مكان الفرح .. حجم الشقة مكانها ... وبعد كل ذلك شخصية العريس واخلاقه وشكله... تخيل ... يارجل لايهمك والله لوكنت جميل اللسان حلو المعشر واثق بنفسك مقتدر ماديا ... لن يقف فى طريقك أى شيىء وستتزوج جميلة جميلات مدينتك ... لا وبتتشرط كمان.... تحياتى,, أخوكمm.s |
لا لا يا أخواني
انا ما تأثرت من كلامكم لكني تراجعت في قرار الزواج وصرفت النظر حالياً إلى بعد سنتين او أكثر والصراحه ما فيه سبب للتأجيل لكن ما ادري حسيت ان الموضوع مو وقته الآن أخوي الغالي m.s قل آمين الله يرزقك في الدنيا رزق ماله حدود ويرزقك في الآخره جنات النعيم مشكورين وماقصرتو |
شوف اخوي الرجال ماينعاب بشكلة
وفي بعض الاخوات علقوا على هذه النقطة لكن انا اعيدها واكررها الرجال ما ينعاب بشكلة وموضوع ان البنت تبغى رجل وسيم ومدري ايش , هذه النقطة تختلف من الرجل للمرأه المفروض ما تتم المقارنة اهم شي انو يكون الرجال نظيف ويهتم بمظهره الخارجي ومو شرط يكون وسيم وفي فرق بين الانسان الوسخ القبيح وبين الانسان الي شكله مو حلو لكنه يهتم بمظهره الخارجي هذا انت ربي خلقك كذا زين شين هذه خلقت ربي وانت مو بيدك وبتلقى الف وحده بتتزوجك وبتحبك مثل ما انت كذا وانا اعرف ناس كثييير لو تشوف وجيههم الله يستر ولا يهتمون حتى بنظافتهم ورغم ذلك متزوجين وفرحانين واعرف برضو شباب كثير اشكالهم بشعه وتلقاه مشبك مع بنات جميلات جدا ً , الله يهدينا ويهديهم لذلك لا تركز على هذه النقطة الرجال بشهامته وبكرمه وبأخلاقه وبحسن معاملته لزوجته اما البنت الي ترفض رجال عشان شكله يا اما تكون لسه مراهقة او تكون بنت غير ناضجة متربية على الدلع صحيح من حق البنت تتزوج شاب ذو شكل جميل لكن ان تجعل هذا الشي شرط اساسي للزواج هذا هو الغلط البنت بكلمتين حلوين تدوب في حبك حتى لو كنت ابشع خلق الله وهذا هو الواقع نصيحة لك لا تروح عند طبيب ولا تسوي لك كريمات , انت مو بنت عشان تحط هذه الامور وبعدين هذه لها مضاعفات كثيرة , الا اذا كنت تعاني من مشكلة جلدية او مرض معين ممكن او ممكن بعض الكريمات مثلا ً لازالة الحبوب او كريم تجميل الشعر او من هذه الامور التجميلية العادية اما كذا تروح عند طبيب عشان تصير حلو هذه ترى عيب عند الرجاجيل ربنا يوفقك ان شاء الله |
كل عآم وانت بخير
الاخوان والاخوات ماقصّروا وصدقني اهم شي صفاتك وعشرتك واسلوبك ورجولتك مااقلل من اهمية الشكل لكن الحمدلله العلاج لمثل مشاكلك اصبح متوفر جدآ اسأل الله ان يوفقكِ ويزينك بزينة الايمآن وان يجعل اجمل الرجال في عيني من ستكون زوجتك |
| الساعة الآن 05:36 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©