منتدى عالم الأسرة والمجتمع

منتدى عالم الأسرة والمجتمع (http://www.66n.com/forums/index.php)
-   العلاقات الأسرية والإجتماعية (http://www.66n.com/forums/forumdisplay.php?f=91)
-   -   ولدي وزوجي سببو لي أزمه نفسيه (http://www.66n.com/forums/showthread.php?t=227989)

وحدااانيه 09-09-2011 05:05 PM

ولدي وزوجي سببو لي أزمه نفسيه
 
السلام عليكم ورحمة الله وبركااته

احس اني مصابه بإكتئاب حااد والظغط عندي مليوون من القهر

اولا بحكي لكم عن ولدي

عمره سنه يحب الازعاااج والحوسه والتخريب بشكل يفوووق الوصف
صرت اذا احد اخذه مني ولا جلس عند اهلي ارتااح

يكره الالعاب ولايحب يلعب مع احد يعشق الاسلاك والكهرباء
يحب يخرب كل شي قدامه وطول الوقت يشتغل حتي الاكل مااياكل الا وهو مااشي
عمره مارضى يااكل وهو جالس واللبس اجلس البسه ربع ساااعه
البسه الحفاظ وهو واقف والبنطلون لازم احد يمسك يدينه بقوه وعقب اطارد لين مايلبس البلوزه
جنني دمر نفسيتي كل الاطفال يكرهونه اذا جلس مع البنات يسحب اطواقهم وحلقانهم وشعرهم
وكل شي يعتبره له لوحده يعني لو اعطيه بسكوت واحد ولاحلاو والصحن ملياان يجلس يصيح لحد ماياخذ كل اللي في الصحن

اذا اعطيته حاجه ياكلها موز ولا اي شي ياكل شي بسيط ويجلس يعجنه بيده ولا بالارض ولا بالجدار دمر البيت عندي

اي طرف سلك يشوفه بااي مكان يموووووت من الصياح عشان يشلعه من مكاانه يحب الجوالات ويحرجني عند الحريم اذا رحت مكاان وشااف احد يكلم بالجواال ولا احد حاط جواله يبكي عشاان يااخذه

مشكلته مو انه يبكي وبس لا ينصرع وينتفض ويصير ازرق لو ماااخذ اللي يبيه يشاارف ع الموووت

طبعه ممل مؤذي لي ولكل اللي حولي لما اطلع زياره احس الناس يزهقوون منه

ثاانياا بتكلم عن نفسي
انا قبل الزواج اعشق الاطفال كنت مربيه لهم عيال اخواني وخواتي والعائله كلها كلهم كنت اعرف لهم فيه منهم العنيد والزعول والمشاكس والهادي بس ماافيه احد شفته مثل ولدي كاانو يقلون لي لو تزوجتي وجاالك اطفال يااحظهم بالحناان

بعد الزواج وبعد ماجبت ولدي كنت احضنه وابوسه واموت فيه وكااان هاادي وبس صار عمره 7شهور بدى يتحرك ويخرب صرت ماعاد اطيق نفسي على طوول اصااارخ ووصلت معاي اني اضربه تصرفاااته مستفزه كانه واحد عمره 10 سنين كل شي يبيه وكل شي يدمره جربت معاه كل الطرق
دلعته شريت العاب مراجيح صرت العب معه صرت اطنشه مااكلمه اذا غلط ومانفع جربت اخليه يسوي اللي يبيه واسكت وماظبط جربت حتى الضرب ولانفع

انا تدمرت دايم معصبه ومن اول ماايقوم تقفل معاي لدرجه اجلس ابكي حامل ومرهقه وهد حيلي احس دمي نشف منه صرت انطوائيه ولا احب احضر حفلات ولا ازور احد واذا مظطره انزله عند اهلي
زوجه ابوه تقول اربطيه وخليه لين ماايزهق وبيعقل انا مايطاوعني قلبي اربطه

عقدني احس اني ام فاشله وكل الناس يقولون لازم تربينه ولدك شقي حطموني ولا يطيقون شوفته ويحسسوني اني انا مدلعته واني اخليه براحته وانه عاجبني وضعه وانا ميته قهر

اذا حطيت غداي اخلي زوجي ياكل وانا اروح اجلس معه ولا خلص زوجي يمسكه واروح اتغدى

كل شي يشوفه معاي يبيه ببسي كيك ساندوش اذا اكلت وطفشني ارمي اكلي واجلس جوعااانه
اول مااينام اروح اخلص اشغالي ويادوب الحق

نووومه غثيث لو ينام ربع ساعه وسمع صوت خفيف يقوم وهو شبعان ومروق


كنت هااديه صوتي ماينسمع صرت عصبيه دايم اتأفأف وانافخ علي اي احد صرت اضربه واصاارخ بوجهه بقوووه لحد مايجلس يغمض من الخوف
راحمته بس مو عارفه كيف اتصرف وهو صغير لايفهم ترغيب ولاترهيب

ثالثا زوجي

عقدتي معاه هالولد راافض اني اوديه مستشفى واكشف علي اعصاابه يقول ماعنده الا فرط حركه
ويخلي الولد لو كان مريض لين يصير الولد ميت من المرض ويسمح لي اوديه
اليوم حرارته 38
وزياده قال اعطيه فيفادول اعطيته ونزلت الحراره شي بسيط وماارضع ولا اكل من الصباح الساعه7لحد الحين 5 اعطيته رضعه وشربه وبس فك الرضاعه استفرغه كله (وانتم بكرامه)
وجاالس يتغصص يوم قلت لابوه قال عادي عنده التهاب خليه يطرحه عشان يركد ولاجاء بالليل اعطيه مضاد اروح للصيدلي ويصرف له اي مضاد ومافيه الا العافيه الولد تعباان وطاايح
وانا ماادري اعاند واطلع مع السواق واوديه المستشفى وهو يقول ماتودينه مو شغلك هذا ولدي وانا افهم اكثر منك

مشكله زوجي لايمكن يقتنع بالمستشفي مره خلاني لين صارت حرارتي40 وهو يعطيني اشياء شعبيه لين تشنجت عليه وجلست يومين منومه قال الدكتور بغى ينفجر الدماغ عندها ولايتوب ودايم ولدي يخليه لين تتأزم حالته ولا يوديه انا اللي لاشفته مرض مره وديته


الحين مره تعبت وولدي له ساعتين نايم ووجهه احمر وحرارته ترتفع اوديه ولا اشوف وش اخرتها مع ابوه

وكيف اقنع ابوه ان الدكتور حااجه مهمه


تكفون ردوو علي باسرع وقت مره متضاايقه

Love Of Life 09-09-2011 06:02 PM

اقتباس:

المشاركة الأصلية كتبت بواسطة وحدااانيه (المشاركة 2682669)
الحين مره تعبت وولدي له ساعتين نايم ووجهه احمر وحرارته ترتفع اوديه ولا اشوف وش اخرتها مع ابوه

وكيف اقنع ابوه ان الدكتور حااجه مهمه

حبيبتي كل اللي قلتيه كوم و إنه ابنك الحين المريض بوصفك هذا كوم ثاني
لا تستني ولا دقيقه، اتصلي على زوجك و خلي نبرة صوتك حازمه

# أبنك مريض و طايح بالفراش و حرارته عاليه و من الصباح ما أكل شي. يا تجي توديه المستشفى ولا أنا بنفسي أروح اوديه الحين
و لا راح استنى دقيقه واحده، أنا أم و ما أقدر أشوف ابني بالشكل هذا أبداً #

الله يشفيه إن شاء الله و طمنينا عليه بالأول
و بعدين نشوف حل لمشاغبته و هدي نفسك الحين :)

ثنيـــــان 09-09-2011 06:24 PM


مرحباً أختي .. عندي كلام كثير .. بس نأجله .. إلى شفاء الصغير الله يحفظه ..
الآن ضعي كمااادات ضروري تنزل حرارته بإذن الله ..
بعدين لازم تقنعين أبوه يوديه المستشفى ..

( الكلام الكثير إلى أن يشفى بحول الله ) .

احساس عمري 09-09-2011 06:31 PM

وحدانيية غاليتي
ارتفاع درجة الحرارة عند الطفل دون السيطرة عليها او تخفيفها او معالجتها لة عدة اضرار ومضاعفات كبيرة وخاصة بعمر طفلك
الله لايقدر ممكن يوثر علي الاذن والسمع او صرع لانها حصلت لصديقة اختي طفلها سخن كثير واثر فية

حاولي تحممية كل شوي بحمام دافي وبجو غرفة معتدل والكمادات لاتكون مرة باردة او مثلجة
والافضل من كل هذا تودية مستشفي
الله يعينك ويشفية ويقومة لك بالسلامة
اما شقاوتة فكل الاطفل كذا الله يسعدهم ويعينك علي تربيتة

:15:

توني صغير 09-09-2011 08:47 PM

الله يكون بعونك يا اختي

مادام الأب كذا

الله لايلومك

وحدااانيه 09-09-2011 08:55 PM

يابناات تكفوون وش اسوي

ولدي عطيته فيفادول المغرب بعد الصلاه وقبل شوي حرارته 38 وجلست اكمده وصارت 37 وثمان شرطات
ورافض يشرب رضعته وقام العصر لعب شوي والحين ناايم وصدره له صوووت

وابوه المتخلف دقيت عليه وجاء واقوله شووفه كيف طاايح ي
يقوول مو شغلك قلت يااوده يابروح اوديه قال اذا فيك خير اطلعي شبر واحد بري البيت
انا الرجال وافهم اكثر منك انتي مطفووقه قال بروح الصيدليه الصيدلي دكتور ويفهم وبخليه يصرف له علاج وعطيه ولاعاد ترفعين السماعه علي بروح لامي ولاخلصت جبت علاج ولدك وخلي عنك ضعافه النفس

بذمتكم انا غلطاانه الولد حلقه ملتهب ويستفرغ ولارضع ويكح ويقول ماتفهمين انتي!!
حسبي الله ونعم الوكيل

والله من طلع وانا ابكي وخشمي ينزف دم من الزعل احسه عظامي تناافض

والله كل همه الفلوس يخاف اوديه ويصرفون له ادويه وتكلف عليه
الله يحرمه نعمة المال كانه عايش عشانه وبيموت عشاانه
اتمنى يجي اليوم اللي يدور ريال ولايحصله زي ماينكد علي ويخلينا لين نموت من التعب وعقب يفكر يطلع فلوسه

والله لو انها اول مره كان امشيها ولو ولدي تعبه خفيف ممكن اسكت بس اليوم هو عند زوجته وبيروح يكبر المخده وانا اللي بجلس علي اعصابي طول الليل اخاف انام ويتشنج الولد

وش الحل اطلع مع سواق وماعلي منه ولا اعطيه العلاج اللذ بجيبه

الجانب الآخر 09-09-2011 09:16 PM

اذا كان وضع الفتى يزداد سوءً فاذهبي به الى المشفى
ولا تهتمي لكلام زوجك ، ( اعتقد ان انفجار صغير منك كافي لأسكاته ، في حال اخذ الأمر بأنفة وكبرياء كبير )



همسة لو كنت مكانك :
لوضعت هذا الفتى في قفص!

تعبت ! 09-09-2011 09:27 PM

وانتي جالسه تطالعين لما الولد يموت

اتصلي على اقرب اخ لك او حتى اخ زوجك

اذهبي به بسرعه إلى أقرب مستوصف او مشفى

روح الطير 09-09-2011 09:46 PM

اختي وحدانية

ولدك محتاج لمغذي جلوكوز ماينفع مجرد خافض للحرارة
و الله يعينك من جدددد

هدي أعصابك انت حامل و اتصلي على امه او تصرفي
لا تتركوا الطفل كذا

Love Of Life 09-09-2011 10:50 PM

اول عشان للحراره اعطيه تحاميل السخونه (أتبعي التعليمات على العلبه)
حمميه لدقايق بسيطه بمويه شبه بارده عشان يخفض الحراره
لبسيه ملابس خفيفه و خليه ينام في حضنك عشان لو حرارته ارتفعت تحسي فيه

ازا قاعد يرجّع فلا تعطيه حليب، لان الحليب يهيج البطن
كثري مويه و عصيرات و حاولي تعطيه فواكه او حتى بس خبز يابس

اختي لا تهتمي لكلام زوجك ابداً، انتي ام و ادري بخطورة الحاله
اتصلي على اخوك او احد من اهلك يجي يروح معك لو الوضع صعب
، اللي قاعد يسويه زوجك حرام بالطفل هذا، و انتي المفروض ما تتفرجي كدا

والله ما ابغى احرضك على زوجك، بس الحين الوضع محتاج حزم منك و ابنك محتاج مساعده
زوجك لو شخص عاقل راح يفهم تصرفك و يعذرك، والا فعلا محتاج احد يتدخل و يوقفه عند حده


الله يشفيه ان شاء الله و الله كسر خاطري هالمسكين
*

احساس عمري 09-09-2011 11:14 PM

اتصلي علي اخوكي .. ابوكي .. اخو زوجك عيالة اي حددددددد..
وقولي لة ياياخذك مستشفي او كبري الوضع واطلبي الاسعاف او دكتور يجي للبيت بتلاقي بعضهم يطلع بمبلغ معين ..
حرااااااام الطفل الحرارة لاتزيد عنة ..
الله يحميه للك ويشفية

وحدااانيه 10-09-2011 01:55 AM

ابشركم راااح وبعد ساعه كذا اتصل علي قال تبين طبيب اطفال ولا اي طبيب
قلت اللي يجي لو سباك قاال خلاص خليك جاهزه بمرك وجاء واخذني قال طلعت بروح لامي
وبغيت امووت من جنبي وخفت يجيني شي وانا تارك ولدي مريض تصدقون خفت من شكله وجهه اسود وتعبان سبحان الله ربي منتقم جبار طلع من عندي وولدي متخدر بحضني وهو يضحك علي يقول انتي بزر وماعندك صبر ومامداه طلع الا وتعب
المهم ليته يتعض ويبطل سذااجة

رحت المستشفى وكانت حرارته 39 واعطاه الدكتور تحاميل وقال عنده احتقان بالحلق واعطاه مضاد وفيفادول ومسحوق للجفاف

رجعت البيت ووكلته كاان جوعاان وغصبني اعطيه مضاده علي طول واعطيته واستفرغ كل شي
بغيت اموت من القهر سبحته وجلست اكمده وعقب اعطيته شراب الحراره ونام شوي وقام وجلس يلعب ويضحك وماارس مشاااكسته

والحين ناايم بس ماراح اعرف انام اخاف يجيه شي وانا نااايمه بجلس معاه والله يستر

تصدقون اخاف ربي يعاقبني بتعبه من كثر مااشكي من حركته


نرجع لمحور حديثنا كيف اتعامل معه

الله يسعدكم على وقفتكم معي يااطيب اخوان وخوات بالدنيا

احساس عمري 10-09-2011 02:29 AM

الحمد الله علي سلامة ولدك ..
اهتمي الان بالسوايل والعصيرات ولاتزيدي الاكل عشان مايستفرغ كل شوي لانة توة بيبي وبتتعب معدتة من الترجيع
اما سؤالك فسامحيني ماعندي خبرة ههههههه
بس ربي ييسر اموررك ويفرج عليك من سابع سموات بخير وعافية .

الجانب الآخر 10-09-2011 07:59 AM

الحل معه ان تضعيه في قفص !
لا ارى حلاً غيره :d

ملاحظة : ولدك ماشاء الله تبارك الله نشيط ، يلزمك تحصينه من الأعين
فالقوة شئ يحسد عليه الإنسان او حتى الحيوان!

يكفي فقط ان تقرئي عليه ( المعوذتين ) مع كل صباح ومساء او قبل ان تدخلي به عند اهلك او اهل زوجك او اي احد مع المسح وقول : أُعِيذُكَ بِكَلِماتِ اللَّهِ التَّامَّةِ، مِنْ كُلِّ شَيْطانٍ وَهامَّةِ، وَمِنْ كُلّ عَيْنٍ لامَّةٍ.

ثنيـــــان 10-09-2011 09:50 PM

حياكِ أختي الكريمه .. وحدانيه ..

الحمد لله على سلامة الصغير ..

أختي الفاضله .. لا أعلم ماأقول بعد حديثكِ بالأمس ..
هذا الصغير ماذا يحتاج؟
إلى رعايه وعنايه وحفظ ومتابعه ..
هل يعقل أختي أن يكون عمره سنه واحده فقط ( 12 شهر على الوجود) :
- يُضرب
- صُراخ في وجهه
- معامله قاسية لأبعد الحدود
نعم كنتي تحبي الأطفال قبل الزواج لكن لربما كانو يأتونكِ في فترات متباعده أو قريبه ، يأتيكِ الطفل وهو يحب التغيير عن أمه ويجد منك معامله كلها حنيّه وطيبه لأنها أوقات وتنتهي ويذهب ويدعكي !! أما الآن فـ24 ساعه وجهكِ بوجه . هذا هو التحدي الآن ؟ فما أنتِ فاعله ؟؟!!..
لن أطيل فيما سبق لكن .. حقيقة معاملتكِ له تزيد الأمر سوءاً ..
خذيه بعطف وحنان وإشفاق لايأتي هذا الحنان فقط حين المرض بل على طول ..
ياأختي عمره سنه "والله لسا طازه صغير " يحتاج منكِ لين الجانب .. والصبر
الصبر .. الصبر .. الصبر .. الصبر .. أنتِ أمه ، أمه ووالدته إن لم تصبري عليه وعلى أذاه فمن سيصبر ؟

أختي نقلتي فكرة سيئة للآخرين بطباع صغيركِ .. صحيح أعلم أن هذا الأمر ملاحظ .. ولكن أصبحتِ تعانين ولربما تخافين من نظرات الآخرين لكِ سلوكه المشين ..
لا أخفيكِ أنه كان لدي طفل بمثل صفات هذا الصغير الله يحفظه ، كان فرط الحركه ولديه نشاط زائد ولكن للأسف كانت معاملتنا له قاسيه نوعاً ما ، فأثرت هذا على نفسيته وأصبح بعد أن كَبُرْ مهتز الثقه ، وضعيف الشخصية .
فلا ولا تقسي أكثر فأكثر ..يكفيه ما جاءه من عذاب وألم ...>>>>
- عامليه بلطف
- العبي معه
- ترفقي به
- اقراي القرآن وهو يسمع
- حاولي قدر الإمكان أن تتوخي الحذر في الأشياء التي قد تؤدي إلى ضرر كبير به مثل الكهرباء وخلافه.
- لاتنهريه بشده وفجأة .
- اقرأي عليه أوراد الصباح والمساء ، وأدعيه النوم.
- اخرجو به للنزُه والألعاب
- لو كسر كاساً .. لاتنفعلي ولا تصرخي .. ( تحملي ) ..
- ضميه لصدركِ وضاحكيه وقبليه كثيرا.
- من ناحية اللبس بالإمكان تدريبه على أن يقوم هو بنفسه على ذلك !! ولكن يحتاج لصبر وصبر ثم صبر.

( كنت هااديه صوتي ماينسمع صرت عصبيه دايم اتأفأف وانافخ علي اي احد صرت اضربه واصاارخ بوجهه بقوووه لحد مايجلس يغمض من الخوف )
شاهدتِ أختي :
- هاديه .. قبل الأطفال .
- عصبيه .. تحملي الأطفال.
- تتأففين وتنافخين .. وتريدين هذا الصغير يتعلم من نفسه !! الله يهديكِ .
- تضربيه وتصارخين في وجهه .. يعاند ويتعقد ويصبح شديد الخوف ويحلم بأحلام مزعجه ولا يأتي هذا إلا بنتيجه عكسية .

أختي : ماعليكِ من كلام الناس مهما قالوا وقالوا .. أنتِ لافاشله ولا يحزنون .. لكن هذا الصغير يحتاج إلى رعايه وعنايه .. لايكن همّكِ أن لايفسد ويخرب حتى الناس يقولوا ويقولوا بل ليكن همّكِ طفلكِ ..
إذاً القضية الطفل وليس الناس ..

اجلبي له الألعاب المناسبة والمحببه له .. ولو أفسدها لايهم . المهم أن يفرغ هذه الطاقه بألعاب .

حقيقة وقبل أن أختم . والده لابد أن يشاركَكِ تربيته والاهتمام به ،،
أعتذر للإطاله .
أسأل الله أن يصلحه ويرزقكِ برّه .. كلها سنوات ويكبر ويعدي هذه المرحله بس تحتاج منّا لصبر
التربية تحتاج منّا لصبر . كان الله في عونكِ .


اقرأي في النت عن النشاط الزائد لدى الأطفال .

وحدااانيه 10-09-2011 11:41 PM

الجاانب الاخر شكل ماافيه الا حلك
ومن ناحيه فرط حركته كل الناس تتعجب منه بس ماظني احد يحسدني علي ازعاجه

ثنيان الله يرضى عليك انت مو حااس بوضعه
ولاتظن اني كنت حنونه ع الاطفال لانهم ماعاشو معي بنت اختي جلست عندنا 6شهور وانا المسؤوله عنها بشكل كاامل
وعيال اخواني كانو يجلسون عندنا وينامون بس ماكانو كذا

جربت اكون هااديه بس ماايطيع وغصب اهتم بالناس وكلامهم لاني اعيش معاهم
وازورهم وولدي يخرب وهو توه صغير كيف لو يكبر ايش يسوي

يعني افقد اعصابي غصب عند الناس يفكك علبه المناديل وينبسط اذا نثرها
ويسحب الطاولات ويجلس يزعج

عجزت اعرف اسلوب له

طيب ايش الالعاب اللي ممكن يفرغ طاقته فيها

تعبت ! 11-09-2011 12:45 AM

جربتوا تعزمون على الولد ؟

ودوه شيخ خلوه يعزم عليه

وحدااانيه 11-09-2011 01:34 AM

كيف يعزم عليه؟؟

اذا قرايه وديته مرتين لشيخ بحريملاء وكاان اذا قرى عليه هاادي جداا
وعقب مانرجع للبيت يرجع لطبعه

أعماق 11-09-2011 01:56 AM

اليوم كنت بالمكتبه اختي بتشتري اغراض للمدرسه
وانا اتفرج على الكتب الا القى كتاب عنوانه (( تربية طفل متمرد )) :d
تذكرتك على طوول ودعيت لك ..

انتي وديه عند طبيب عشان يشوف هي حركته فرط حركه ولا مجرد نشاط عادي
لاي طفل شقي .. اذا كان فرط حركه فله علاج معين ..
واذا مجرد شقاوه وقتها نعطيك حلول مخففه لها ..

تدرين عاد امي تسولف لي عن اخوي زماان .
اذا راحت عزيمة .. يستلم عيال الناس عضضض :23:
تقولي يفشلني ويحرجني وصرت مااحضر لين كبر شويه .
والحين ماشاء الله اخوي متزوج وعنده طفلين ..
واذا اشتكى من ولده قالت له امه ذووق اللي كنت اذووقه . :22:.

feeling 11-09-2011 09:25 AM

يا أختي عندنا وعندك خير

عندي ولد عمره 3 سنوات مطلع عيون أمه الله يصلحه

وحدااانيه 11-09-2011 01:58 PM

لاتظلمونه
بروح ادور هالكتاب ابووه رافض فكره المستشفي لانه كان عنده ولد وتوفي الله يرحمه
يقول ان ولدي طالع عليه وان ولده اللي ماات كان كذا وقالهم الدكتور عنده شحنات كهربائيه وفرط حركه


الله يحفظ لك ولدك اخوي بس انا لو انه كبير كان ممكن احرمه من شي يحبه او اعاقبه بيفهم علي
بس مشكلته صغير مره ولايعرف يتكلم ودوبه ماشي من شهر

الله يعين عليه

ثنيـــــان 11-09-2011 02:39 PM


أعتذر إن كان كلامي لم يكن في محله.. ربما الأمر فوق ما أتصور..!

دعواتي له بالشفاء ودعواتي لكِ بالصبر في هذا الإبتلاء ..!
اصبري واحتسبي الأجر من الله .

feeling 13-09-2011 10:35 AM

الله يعينك يا أختي

من كلامك واضح أن فيه شبه كبير بين أبنك وأبني رغم أختلاف السن

الغريب أن ولدي عنده نقص عجيب في النوم تخيلي يوميآ ينام الساعة 11 مساء ويصحي الساعه 3 - 4 الفجر ويفتح التلفزيون أبو الشباب ويحط رجل علي رجل ويتفرج علي أفلام كرتون :25:
واذا سكرنا عنه التلفزيون ما خلانا ننام

يعني معدل نومه 5 - 6 ساعات !؟

وحدااانيه 13-09-2011 06:25 PM

هذا اللي انا خايفه منه انه يكبر ويكبر طبعه معه
المصيبه ان المجتمع اللي انا فيه كل اطفالهم هاادين
يعني شيطنه بس بدون خراب او تدمير
وولدي اصغرهم واعبطهم

والله ان نومه عذاب نفسي لي يقوم عشرين مره وهو ناايم
ومااينام الا لين يبكي لكن عمره مانام بذوق لازم يزعل وعقب ينام

ارحمه يضيق خلقي عليه كلا يطفش منه الشغالات والبزران واهلي واهل زوجي

ودي القى وسيله يفرغ طاقته فيها بس مااعرفت
يحب يلعب يعني لو العب معه يوم كامل ماايشبع يبي احد يلحقه ويلاعبه
ماايحب يرتاااح ولايجلس

الله يصلحه ويهدي باله

هشام ابن العاص 13-09-2011 09:44 PM

هاتي له العاب تهد حيله..

العاب فيها رفع وشد وجذب ليـــــــــــــــــــــــــــــــــــــــــــــــم ن يهجد

سيدة الموقف 13-09-2011 10:26 PM

::

عزيزتِي حرارة الطفل حين تتجاوز 38 درجة يجب أن تذهبي به للطبيب بدون تأخير

لأن الحرارة المرتفعة تأثر على الدماغ وقد تفقد الطفل حاسة السمع وكم رأيت من
حالات لأطفال بعمر 6سنوات والـ 7 سنوات فاقدين لحاسة السمع والسبب أهمال
إرتفاع الحرارة والتأخر بالعلاج

لا أقول هذا لأزيد همك أو لأخيفك على صغيرك حماه الله

لكن لأخذ العبرة والعظة سواء أنتِ أو أي والد ووالدة يعتقدون مايعتقده
زوجك

:::::

بالنسبة لحركته المفرطة
*يجب عرضه على طبيب يصف لكِ نقط خاصة بفرط الحركة

*

وعسى أن يهدي الله صغيرك وحاولي أن تقرائي عليه كثيراً وتحصنيه
وتتحدثي معه بصوت خافت وتنشدي له أناشيد وتترنمي له ليكتسب منك طبع
الهدوء

::


::

صفاء 15-09-2011 07:19 AM

اختي الكريمه

واضح جدا جدا ان نقص الوعي والادراك بمسؤولية التربية للطفل في سلوكك وسلوك زوجك فاسمعيني يا اختي

هناك فروق فردية بين الاطفال كما تعلمين وفرط النشاط ينصح بتشخيصه بعد 3 سنوات لان كثرة الحركه من سن 1الى3 من طبيعتهم وايضا من طبيعتهم شد وسحب وسكب الاشياء بقصد الاستكشاف وليس الازعاج لكن ضعيه تحت ملاحظتك الدقيقه فلو كان هناك مجموعة اعراض اشكلتك فاستشيري مختص ولو بالهاتف

ثانيا تقول الحكمه( من زرع حصد)
فمن المستحيل ان يكون ابنك مؤذ وضارب مالم يتعلم ذلك من امه و ابيه فارجوا ان تراجعي طريقة تعاملك معه واول خطوه هو ان تتحلي انت بالنفس المنفتحه المطمئنه فلتفهمي نقاط القوة والضعف عندك للتتعايشي وتقبلي نفسك وايضا تثقيفك لنفسك بمفردات التربية لانها حقا مسؤولية اعانك الله عليها

ثم علاقتك بزوجك من المهم ان يكون اتفاق على مباديء صحيحه متعاونه في التربيه حاولي ولا تستسلمي لنقاط ضعف زوجك لاني ارجوا منك ان تقدري وضع الثقافه عندنا في التربية فالعالم العربي يعاني من هذا العيب ولنستفيد من غيرنا ممن طور اساليب التربيه وطريقة تفهمها

اخيرا عليك بالدعاء وهو ميسر الاسباب والصبر لانك مجاهده وسيكتب الله لك الاجر وعن تجربة فابني مثل ابنك لكن فضل الله علي ان الهمني بسماع اشرطه تربوية استفدت منها كثيرا فاحيانا يهدف الطفل للازعاج للفت الانظار واستجداء الحب والاهتمام

تحياتي

وحدااانيه 15-09-2011 03:20 PM

الله يجزاااكم الف خير

انا اسااسا ماسألت عن التربيه الا لاني ضاايعه في هذا الجاانب
مااني عارفه اتعامل معه قريت كثير وسمعت كثير وطبقت اكثر

اللي يقول خليه بكيفه واللي يقول هاوشيه واللي طقيه بيده واللي اربطي رجله
كلا يحكي لي تجربته

وانا تعذبت نفسي اربيه تربيه صاالحه نفسي يكون مؤدب وخلوق عندي هااجس وخوف من بكره
لاني بتحمل تربيته لوحدي ابوي عمره فوق الخمسين ومشغول بعمله وتجارته
يعني تربيه الاطفال بتكون كلها علي وماابي احد يقول بزر وماعرفت تربي

وماابي اطفالي يكونون اقل من احد نفسي يكون ذكي ولماح وهاادي وخلوق
ابيه يعكس صوره ايجابيه عني ويكون سند وفخر لي

شاايله هم من كل قلبي

مشكلتي حنووووونه جدااا ودمي حاار يعني ازعل منه واهاوش وارجع اضمه
ولدي عنده طااقه هاالاياام صار يجيب لي جزمته(وانتم بكرامه)ويشد يدي للباب عشان نطلع بالحوش
ويجلس يراقب الانوار والقطاوه ويضحك اذا سمع صوت السيارات يحط راسه علي باب الشارع وانواع الانسجاام
واذا شاف اخوانه من ابوه يلعبون كوره يصيح يبي يجلس معاهم وهم زهقانين منه لانه مزعج يبي يااخذ كورتهم ويحوس عليهم

الناااس مااتقدر ولاترحم امس رحت بيت عمه وتركته مع الشغاله وانا نفسي اخذه معاي بس يحرجني
يسحب البيالات والفناجيل وماايخلي شي

مشكلته طمااع مهما يملى يده مايشبع ويموت بالحوسه يحب كل شي بالغرفه طايح بالارض
وانا نظااميه لدرجه توتر اللي يقعد معاي

استغرب من وين اكتسب صفاته ابوه هادي وانا زي كذا
بس لما كنت حاامل كنت سااكنه بشقه بلحاالي وكان بيتي ع الشارع وكله محلات وعمال ويعرفون ان زوجي متزوج غيري ومايجي الا نادرا وكنت اموووووت من الخوف طوول الوقت ابكي ومرتبكه واي صوت يفجعني ودايم متوتره انام وانا خايفه اصحى اتلفت ماادري اذا هذا الشي اثر عليه او لا

صفاء 16-09-2011 07:38 AM

انا اسااسا ماسألت عن التربيه الا لاني ضاايعه في هذا الجاانب
مااني عارفه اتعامل معه قريت كثير وسمعت كثير وطبقت اكثر
سامحيني حبيبتي تطبيقك يحتاج تدقيق اكثر

اللي يقول خليه بكيفه واللي يقول هاوشيه واللي طقيه بيده واللي اربطي رجله
كلا يحكي لي تجربته

وانا تعذبت نفسي اربيه تربيه صاالحه نفسي يكون مؤدب وخلوق عندي هااجس وخوف من بكره
لاني بتحمل تربيته لوحدي ابوي عمره فوق الخمسين ومشغول بعمله وتجارته
يعني تربيه الاطفال بتكون كلها علي وماابي احد يقول بزر وماعرفت تربي

ان شالله يكون مؤدب وخلوق اذا كسبتي قلبه واكتسابه يعني تفهمه وعدم تعنيفه طويلا ومكافئته ايجابيا لكل سلوك صالح يعمله

وماابي اطفالي يكونون اقل من احد نفسي يكون ذكي ولماح وهاادي وخلوق
ابيه يعكس صوره ايجابيه عني ويكون سند وفخر لي

يعكس صورة عنك ام عن نفسه ؟؟ (من زرع حصد)

شاايله هم من كل قلبي

مشكلتي حنووووونه جدااا ودمي حاار يعني ازعل منه واهاوش وارجع اضمه

الم تقرائي ان هذا اسلوب ليس صحيح حيث يساعد على تنشات طفل متردد عنده لبس بين العقاب والثواب فارجوك كوني حازمه الخطأ خطأ ولاصلاح الخطأ علمية كيف يعتذر ومتى لكن ابنك صغير جدا ومبدئيا اغلب اخطئه مقبوله لكن توجيهك له لابد ان يكون لفظيا فقط بطريقه حازمه وليس عصبيه
ولدي عنده طااقه هاالاياام صار يجيب لي جزمته(وانتم بكرامه)ويشد يدي للباب عشان نطلع بالحوش
ويجلس يراقب الانوار والقطاوه ويضحك اذا سمع صوت السيارات يحط راسه علي باب الشارع وانواع الانسجاام
واذا شاف اخوانه من ابوه يلعبون كوره يصيح يبي يجلس معاهم وهم زهقانين منه لانه مزعج يبي يااخذ كورتهم ويحوس عليهم

طبيعي جدا في الاطفال والمفترض ان يتعلم اخوته كيف يعاملونه وكذلك مراعاته والا فادخلية للمنزل واعملي له اغراءات مسلية بالعابه

الناااس مااتقدر ولاترحم امس رحت بيت عمه وتركته مع الشغاله وانا نفسي اخذه معاي بس يحرجني
يسحب البيالات والفناجيل وماايخلي شي

مشكلته طمااع مهما يملى يده مايشبع ويموت بالحوسه يحب كل شي بالغرفه طايح بالارض
وانا نظااميه لدرجه توتر اللي يقعد معاي

عزيزتي انت ذات شخصية قلقه ومتوتره خففي قلقك من اجل توازنك واعتقد انك تحتاجين نصيحة مختص نفسي وطفلك المسكين طبيعي يكون طماع فهو طفل ويسحب ويركل كل ذلك طبيعي ابنك له 12 شهر تقريا على وجه الارض هل تريدينه رجلا كامل من هذا السن ؟؟ مشوارك التربوي طويل

استغرب من وين اكتسب صفاته ابوه هادي وانا زي كذا
بس لما كنت حاامل كنت سااكنه بشقه بلحاالي وكان بيتي ع الشارع وكله محلات وعمال ويعرفون ان زوجي متزوج غيري ومايجي الا نادرا وكنت اموووووت من الخوف طوول الوقت ابكي ومرتبكه واي صوت يفجعني ودايم متوتره انام وانا خايفه اصحى اتلفت ماادري اذا هذا الشي اثر عليه او لا


عزيزتي ربما تكون تربيتك فيها شيء من التوتر والقلق فنشات نفسيتك بذلك فوااااضح انك تعاني من وعكه نفسيه ان شالله بسيطه وتحتاجي تشخيص دقيق فاذهبي لعياده نفسية فهو ليس عيبا بل هو من وعيك باهمية سلامتك وربما وجدتي موقع للاستشرات النفسية فابحثي واوقف لوم ابنك واتهامه فهو بريء


وفقك الله

وحدااانيه 16-09-2011 10:53 PM

الله يجزاااك الف خير وشاااكره اهتماااامك ونصيحتك القيمه

صحيح اني مظطربه نفسياا وجدا واعترف بالشي هذاا
انااا خاايفه من بكره بشكل كبير جداا وافكر بولدي طول الوقت
ودايم احطه تحت المجهر صرت جدا عصبيه وقلقه من شدة تركيزي عليه


لااحد يلومني لسه صغيره واول طفل وحامل ومرهقه
وزوجي رامي الحمل كله علي واذا شافه يغلط يحط اللوم علي

اخاف تطلع تربيتي فاشله اخاف يطلعون عيالي طماعين او قليلين ادب

انا حريصه كل الحرص اني اربيهم علي العلم والدين والاخلاق
نفسي ازرع فيهم قبم ومبادئ ابي احس اني ملخسزت بزواجي من شخص كبير

عذاب الورد 17-09-2011 03:56 AM

ولدك مو بعيد من ولدي
أحمدي ربك وأشكريه شوفيني أنا كتبت موضوع عن ولدي في ركن الطفل
ولدي مايصدق يشوف باب الشارع مفتوح يحط رجوله وينحاش قسم بالله
أن احنا مالقيناه إلا بالحاره الثانيه وازيد للك بعد وقاطع الشارع العام
والمشكله يوم شفناه من بعيد ويقوم ويركض أكثر وميت من ضحك وهذا وهو عمره سنتين بس
وأحيان لكنا نتمشى والله مانلقاه إلا تحت االسياره
بس أنا الحمدالله صار عندي طووووووووووووولة بال وصرت أنتبه له أكثر
وأراقبه بين فتره وفتره واجيب له كراسه وأقلام ألوان حاولي ماتجيبن له العاب بشكل يومي
خليها بين فتره وفتره علشان يجد متعه في اللعب لأنه لاصارت بشكل يومي راح يمل ويدور شئ ثاني يخربه
حاولي تمدحيه تقولين له كلمات مثل أنت شجاع أنت رجال أنت بطل أنت قوي ترا سبحان الله
توصل المعلومه له وهو حتى طفل ودائم وبشكل يومي أستودعيه الله وعند النوم شغلي القران خليه وقت النوم يتعود على الصوت مو حلو تعودينه ينام بهدوء خليه يتعود على النوم بإزعاج والله يهديك لاتضربينه ابدا ولا ترفعي صوتك عليه مو حلووو ابدا ذا الاسلوب تحملي واصبري الله يعينك يارب ويفرج كربتك

وحدااانيه 17-09-2011 11:09 AM

الله يخلي لك ولدك ويحفظه من كل شر

لو يسوي ولدي مثل ولدك امشي مجنونه انا مااتحمل كذاا يااربي الصبر بس

انا ابي اطور من نفسي ابي مواقع عن التربيه او كتب كويسه للي عمرهم سنه وفوق بس حااجه تكون منطقيه مو كلام وبس

وابي العاب تخص هالعمر لاني كل ماجبت له شي مايعجبه
اخاف اني مو عارفه اجيب صح

الماضي الدفين 17-09-2011 12:03 PM

أختي الكريمة

أنتِ كم عمرك ؟

الشي الثاني :

علاقتك بزوجك غريبة نوعا ما , هي أشبه بالكره منها بالحب ؟

كثير ما تدعيين عليه

لا تملكين الصبر

لا تشعرينه أنه يتعامل مع زوجة واعية وانما مع طفلة من أي شيء تثور

أظن

أن مافي طفلك هو بسبب مافيك من فرط عصبية وانفعال

الله يعينك

وحدااانيه 17-09-2011 09:07 PM

هلا بك اختي عمري 25 وفعلا عصبيه بس غصبااا علي
حياااتي صعبه كنت في بيت اهلي ادرس وادخل دورات واقابل صاحباتي كثير
ودايم اجتمع مع بنات خالتي ودايم مبسوطه ومروقه واي احد يطلع لعزومه يترك اطفاله عندي
لاني جدا حريصه واحب الاطفال بشكل مجنون

تزوجت وانقلبت حياااتي زوجي بعداوه مع اخواته اخوانه له اخو واحد وفيه مشاكل بينهم

ماابقي الا زوجته الاولى وهي كثير تنرفزني وتضايقني

خوالي ماعاد اروح لهم كثير بسبب زوجي طلعات مافيه
زوجي يوم عندي ويوم لحرمته

ويومي كله ماايجي جلستي معه اكثر من 6 ساعات واقضيها مستمعه لانه يجي طفشان وتعباان
وكله هموم

يعني طوول وقتي مع ولدي تلفزيون مااعاد احبه ونت ادخل هالمنتدي اقري واطلع
يعني مركزه بس علي ولدي ماافيه حااجه تشغلني

صرت عصبيه مره انا انسانه احب اقري وكنت اكتب خواطر وكنت اطلع كثير مطاعم اسواق
منتزهات كنت اشارك بالدورات وبدور الايتام والمستشفيات

وكنت شااطره بدراستي واعشق العمل والدراسه

والحين زهقت والله اجلس يوم كاامل فااضيه طفش طفش

زوجي احبه بس انا انفعاليه مااعرف اظبط نفسي من التراكمات اللي بداخلي

ولدي صار ضحيه لظروفي مركزه عليه وعلي حركاته حتي نومه اراقبه لانام

اتوترت من قلب

ثنيـــــان 18-09-2011 12:22 AM


أختي وحدانيه . حياكِ الله ..
أسأل الله أن يعينكِ على تربية ابنكِ ..
فقط أحببت أن اقول إياكِ أن تقارني بين حياتكِ السابقة والحالية ، لأن هذا مدعاة للكسل والتأفف والحنق
والغضب على الحاضر ، خاصة أني لاحظت أنكِ تتغنين على الماضي ..
فهذه المقارنة بين الحياتين هي مؤلمه ومدعاة لليأس من الحاضر .
مهما كانت الحياة صعبة سنعيشها ، شئنا هذا أم أبينا ، فقط علينا القناعه بحالنا ومحاولة عيش الحاضر
بتفاؤل وأمل .

ملامح قمر ..] 18-09-2011 01:40 AM

الله يعوضك في عيالك وييسر أمورك
ويخليهم لك

pink-dream 19-09-2011 04:49 AM

اختي وحدانيه الله يخليك ويخلي لك ولدك وزوجك وان شاء الله يصير زي ماتبغين وتتمني
بس عااادي ياقلبي كل الصغار كذا وبالذات الاولاد الله يحفظهم اشقياء بالمره
والله تصرفات ولدك كثثييير يسونها اولادنا وعادي متعودين يمكن انتم مشان كلهم هادين شايفين ذا شيطان
صح تقهر قدام الناس وتحرج بس انتي طنشي خليك باارده بالمره وانتبهي تخاصميه ولاترفعي صوتك عليه قدام الناااس بالمره قويه عليه راح يحس ويفهم ومايصير عنده شخصيه
والله اعرف وحده من جماعتنا عندها ولدين اشقياء ماشاء الله الله يحفظهم ويخربوا ويسوا كل شيء بس هيه ماشاء الله عليها باااارده بالحييييل تخليهم ولاتكلمهم قدام الناس الناس يتكلموا عيب لاتسوا كذا وهيه مطنشه ماكأن أولادها يسون شيء(واكيد جواتها تغلي بس مشان عيالها مايضعفوا ) وياكثر مانشوفها ماشاء الله عليها مجمعه عيالها في زاويه او غرفه بس مو قدام الناس وتقرأ عليهم والله بعدين يهدأون كثييير
واللحين ماشاء الله العيال كبروا في السن المدرسه وماشاء الله عقلوا كثير والله محد مصدق الله يحفظهم
صدقيني ولدك يبغاله صبر عادي طنشي كلام الناس اهم شيء ولدك لايضعف بس انتي لاتعصبي خليك بارده اهم شيء صحتك ولدك باقي صغير الله يهديه

صفاء 19-09-2011 09:19 AM

اقتباس:

كنت شااطره بدراستي واعشق العمل والدراسه

والحين زهقت والله اجلس يوم كاامل فااضيه طفش طفش

زوجي احبه بس انا انفعاليه مااعرف اظبط نفسي من التراكمات اللي بداخلي

ولدي صار ضحيه لظروفي مركزه عليه وعلي حركاته حتي نومه اراقبه لانام

اتوترت من قلب
معليش لو طفشتك بمشاركاتي بس اتحمليني

عزيزتي نحن لا نستطيع الاستغناء عن الماضي بل نحتاجه لتحليل نتائجه التي نراها في واقع الحاضر يعني الا انت ادركت تقريبا سر عصبيتك مثلا وذلك بسبب الضغوط النفسية الهائله التي لم تقاوميها وسمحتي لها بالتعشيش داخلك فظهرت بشكل غصبيه وربما قولون وانتفاخات واحلام فتدارك نفسك النفس اما ان تتطور للاحسن او تهبط للاسفل فهي ككرة الثلج كلما تدحرجت كبرت


اعانك الله

وحدااانيه 19-09-2011 08:10 PM

الله يجزاااكم خير

معااالم والله اني صرت ابكي بلا سبب واضحك بلا سبب

فراااغ قااتل حيااه باارده ممله مميته ماافيها اي نكهه اقعد يوم كامل بدون مااكل
اكلي خفيف لاصرت بلحاالي وقلت له مليون مره وظفني ابي يصير لي عالم
انا مره اجتماعيه واحب الناس بس بعد زواجي كرهت كل شي

صديقاتي ماعاد اكلمهم اكره احد يقولي طلعت ولاجيت
السواق عند الباب بس وين اروح جربت اطلع سوق وشي زي كذا بس بلحاالي ملل

زوجي مو فاااضي لي وانا علي اتحمل وانا ماعاد فيني نفسي ولدي يتكلم بسرعه
ابي اسولف معه ابيه يدرس عشان انشغل فيه

الله يعين الفراغ يموت الواحد ويخليه كئيب وحزين

صفاء 24-09-2011 01:14 PM

اقتباس:

المشاركة الأصلية كتبت بواسطة وحدااانيه (المشاركة 2689242)
الله يجزاااكم خير

معااالم والله اني صرت ابكي بلا سبب واضحك بلا سبب

عزيزتي الحياة لا تاخذ طريقه واحده كنت بوضع معين اجتماعية وتحبي الناس الان اصبحت ام ولك طفل فتحديات الحياة تحتاج لصبر وقوة لا تكوني هشه تسمحين لجارتك ان تغضبك وتسمحي لطفلك ان يوترك كوني قوية واجمعي شتات نفسك اولا حتى تستطيعي المواجهه ويقال القلب الضيق هو الفارغ من حب الله والايمان

فراااغ قااتل حيااه باارده ممله مميته ماافيها اي نكهه اقعد يوم كامل بدون مااكل
اكلي خفيف لاصرت بلحاالي وقلت له مليون مره وظفني ابي يصير لي عالم
انا مره اجتماعيه واحب الناس بس بعد زواجي كرهت كل شي

صديقاتي ماعاد اكلمهم اكره احد يقولي طلعت ولاجيت
السواق عند الباب بس وين اروح جربت اطلع سوق وشي زي كذا بس بلحاالي ملل

هذه يا اختي كلها اعراض تدل على عدم الراحه وانا انصحك خذي ابنك للمسجد وصلي فرض من الفروض ثم اقرائي القران واجعلي المسجد مكان اخر للتغيير وكرر ذلك ارجوك افعلي ذلك

زوجي مو فاااضي لي وانا علي اتحمل وانا ماعاد فيني نفسي ولدي يتكلم بسرعه
ابي اسولف معه ابيه يدرس عشان انشغل فيه
المفترض ان يكون هناك حوار زوجي جاد وواضح مع زوجك لكن ان كنتي ترغبين الاستمرار في حياتك تعايشي مع وضع زوجك وغيري ما تستطيعين تغييره لماذا

هدوئك النفسي هو من يصنع ولدك الذي تنتظرين سوالفك معه وابدئي باشغال نفسك ولا تستني الظروف هي تغيرك


الله يعين الفراغ يموت الواحد ويخليه كئيب وحزين

الوقت نعمه من الله والفراغ ياكل من يقف في طريقه فاهربي واركضي بوقتك انت انت انت انت من تحزني وليس للفراغ ذنب

اتمنى لك التوفيق (ان الله لا يغير ما بقوم حتى يغيروا ما بانفسهم)


الساعة الآن 09:58 AM.

Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©