|
من يواسيني تعبت أبكي!!!!!!!!!
أتمنى الرد من الشباب ورجل الرجال
والجمييييييع بنات ومتزوجات المهم ادخلو ما اعرف كيف ابدا واعذروني على الاسلوب العامي بس اكتب من القهر والدموع ماراح اطول عليكم راح ابدا في الموضوع اخوي متزوج من فتره قصيره طبعا زوجته قريبه لنا وحبوبه أخلاق طبعا اخوي يشتغل بعيدعن الرياض وهي تروح لاهلها طبعا فتره جلوسها عند اهلها ماتتصل على امي وامي قبل كم يوم تقول ليش فلانه ماتتصل وش سوينا تخيلو بيت اهلها قريب من عندنا لو تجي تمشي بس ما جات تسلم على امي لها اكثرمن اسبوع انا لما سمعت امي البارح ارسلت لاخوي واسالكم بالله انا غلطانه او لا قلت له ليش زوجتك لها اسبوع واكثر ماكلمت امي وش صاير لها اكثر من اسبوع حس بامي لايرتفع عليها السكر وقلت لها ليش اخوانها يتحكمون فيها وبعدين قلت له ليش قبل اسبوعين جات تسلم على امس ومعها زوجة اخوها اهلها يقولون لاتروحين لهم الا معك حرمه تفكيرهم غبي يقولون لاتروحين لخوالك الا زوجك موجود قلت ل اخوي وش التخلف وين شخصيتك المهم رد علي وقال وشوفو قلة الأدب قال ليش تتدخلين في حياتي وهي ماسوت شي غلط المهم انا بكيت ورديت عليه قلت انا ماقلت تتصل علي تتصل على امي حس بمشاعر امي لايرتفع عليها السكر وتخيلو قبل يومين طالعه مع اخوها وجاي اخوها لبيتنا ياخذ من اخوي غرض وهي بالسياره مانزلت تسلم على امي شوفو التخلف اخوانها مسيطرين عليها واخوي انفعل لما قلت وين شخصيتك لكن قهرني برده تناسى كل شي سويته معه ولما صارت له مشكله مع الوالد قبل الزواج كلمني قال تتدخلي يرضى ابوي علي قبل زواجي شوفو لكن اصنع معروف وجزاك عشره كفوف وانا من الانفعال رديت عليه وقلت انسى أني أختك وأمسح رقمي وقلت له أنا ماقلت زوجتك ماهي محترمه هي حبوبه وأخلاق لكن ليش اذا كلمتها الوالده وقالت لها آل فلان بيجون يسلمون عليك تعتذر والا يجي معها حرمه يخافون وبعدين انا اقول تكلم الوالده كبر عقلك يامريض هم كذا عائلة خالي متشددين لابعد حد وش رآيكم ادري بتقولن غلطانه بس أسألكم ب الله كل واحد وكل بنت يقول رده الصريح والمشكله اخوي هذا الاسبوع بيجي عندنا وزوجته ما ادري اسلم عليه والا اتركه يحس بقيمتي المشكله اني اكبر منه ب7 سنوات وماتزوجت |
حبيبتي لا تزعلي نفسك بالعكس أنا أشوفك مش غلطانه، انت نصحتيه عشان ينصح
زوجته انها تكلم امك أو تمر عليكم، خلاص انتِ عملت اللي عليكِ ولما ييجي عندكم عاتبيه بينك وبينه، يظل انه اخوكي وانت خليكي الكبيرة والكبير مش كبير بالعمر، كبير بأخلاقه وتصرفاته.. ولا تنسي حبيبتي قول الله عز وجل (ادفع بالتي هي أحسن فإذا الذي بينك وبينه عداوة كأنه ولي حميم) حبيبتي ما في أكثر من الخلافات اللي تحصل بين الاخوة، يعني مصارين البطن بتتعارك، لكن لازم نعديها وبعدين حبيبتي اذا أخوكي هذا دايما طبعه يرد عليكي بطريقة مش حلوة فمعك حق لازم توريه شوية العين الحمرا عشان يضبط نفسه معاكي، يعني خليكي حاسمه في التعامل معه خاصة انه أصغر منك ب 7 سنين لكن اذا هي مواقف عابره فمعلش -التمس لأخيك سبعين عذرا- يمكن كان في شيء معصبه أو يمكن حتى متضايق من زوجته بسبب هذه المواقف فلما انت فتحتيها معاه جيتي عالجرح واتعصب عالعموم هدي اعصابك ولا تحملي الموقف أكبر من حجمه ياما بيحصل بين الاخوة وبعضهم وخصوصا بسبب زوجاتهم ويا عمري حسيت انك متأثرة بكونه أصغر منك بسبع سنين ومتزوج وانت بعدك ما تزوجتي.. عالعموم هذا كله نصيب واصبري عسى حظك يكون احسن من حظه.. والله كل تأخيره وفيها خيرة.. الله يرزقك يارب الزوج الصالح والرزق الطيب الحلال ويعطيكي كل ما تتمني.. |
بصراحه انتي الغلطانه ..
غلطتي في اسلوبك .. كان ممكن تحلي الموضوع بطريقه افضل بدل تدخلك المباشر .. وكمان اللي تتكلم والدتك مش انتي .. وفيه الف طريقه وطريقه لحل الاشكال البسيط .. وتقدر والدتك هي اللي تسالها او تسال ولدها بشكل ودي .. وعمر الاخت ماتمنن على اخوها بشئ .. اذا جا سلمي عليهم .. الله يهدي الجميع .. |
اقتباس:
والله العظيم ماتمننت عليه بالعكس لو يطلب عيوني عطيته وإلى الآن لو تحصل مشاكل مع زوجته يتصل علي وامي ما اتصلت عليه لان اخوي الله يهديه عصبي وامي قالت اخاف اتصل عليه يجرحني ويرفع علي السكر انتي اخته الكبيره ارسلي له رساله قلت إن شاء الله لكن دايم اللي معها حق يكون غلطان |
اقتباس:
وهذه المره الثانيه يغلط لكن أسامحه أقول عصبي والله يسامحه ودايم التمس له الاعذار وش اسوي يبقى اخوي والله يهديه |
حياتي ابشرك الي عندك عندنا انا بعد تفتري عليا زوجته واخوي مصدقها وانا ولا اعطيهم وجه اما امي اه يا امي ياريت العمات مثلها
بعض حريم الاخوان تعامل اهل الزوج تقولي اعداء مو اهل زوج اختاروها لولدهم وستروها بصراحه انا لما كنت مزوجه وربي حتى كلمة عمتي ما اقولها كنت اناديها يا امي من احترامي لها انتي تبين النصح عشانك مقهوره على امك بس اذا اخوكي قال كذا خلاص غسلي يديك ونصيحه طنشي كل وحده تسوي باصلها والله يسعدك وسخر لك وسالفة المفروض الام تكلم ولدها انا اشوف امي ما تبي تكبر الموضوع ولا تبي تسوي مشاكل رغم انها تحس ان حرمة الولد مو مقدرتها حتى لو لمحة له ما تغير شئ بس تقول خلاص كل وحده تربية اهلها وليه اسوي مشاكل بينهم تخطب الوحده تقول ملاك تتزوج تقلب على العمه وبناتها |
أختي ماعليش أنتي غلطانه
ماعليك منه حياته الخاصه وزوجته ماتحترم أمك شي راجع لها أهم شي لاتكبرين السالفه في راس أمك وتضيقينها وتخربين بيت أخوك وبعدين بصراحه صعبه تجي وأخوك مو في البيت وإضافه لكذا البنت توها متزوجه مو من فتره طويله ممكن تستحي وماتعودت علي زيارات والله أشوفكم مكبرين السالفه وحطينها في راسكم وانتي قلتي حبوبه وأخلاق يعني خلاص أنا لو مرة أخوي ماعلي منها تحترم لنفسها ماتحترم أحد شي راجع لها بس أنا ماراح أتدخل فيه ولا أقول لاخوي شي كيفها |
ظل أنثى
الله يهديهم يارب وأكيد غسلت يدي منه بالماء والصابون والكلوركس ماتوقعته يرد برد قاسي وقسم بالله ماهمني لكن أمي المسكينه هي الضحيه الله يهديه |
اقتباس:
مشكوره على الرد والله ماكبرتها في رأس أمي بالعكس هي كان بتكلم أخوي بس خافت يرتفع السكر قالت أخف الضررين ارسلي له رساله وإلا وربي ماعلي منه وبالعكس هي كانت قبل تزورنا قبل الزواج لأن بيتهم قريب وتسهر معنا طبعا إذا أخوي بالدوام لكن بعد الزواج تغيرت وعادي لو تتغير بس والله لما أشوف أمي تبكي أبكي معها ولاتخافين أختي ماراح أخرب بيت اخوي بالعكس اتمنى له كل خير وهو الغالي بين أخواني وطلبني أخطب له زوجته عشان كذا استغربت انه جرحني الله يسعده ويكتب له كل خير |
كذا أغلبهم الرجال
أنا صار لي سنة أو أكثر ما أرسل لأخوي رسائل والمكالمات من قبل كم سنة والحين لاحظت إنه صاير يتصل علي بدل مايتصل على أخواني مثلا يقول افتحوا الباب أو يسألني إذا وصلنا من السفر رغم إنه له سنين ماكلمني التواصل كان من جهتي فقط وبالرسائل فقط !!!! لكن أنصحك تصارحي أخوك أولا وتقولي له اللي بقلبك لا يكبر الموضوع مثلنا ! والله يهديهم |
حبيبتي انتي سوي يلي عليكي وانصحيه بطريقه حلوووة ..
واصلاً السلآم لله مو لأمك ولا ليكي .. يعني كلمة ماعندك شخصيه صرااحه من حقه يزعل ويعصب انتي حطي نفسك مكانه .. لكن ماعليكي يللي سار سار .. وحااولي ماتخلي الموضوع دآآ يأثر عليكي بشكل كبير .. والمياه بترجع لمجاريها ان شاءلله =) |
بصرااحه ياقلبي انتي اللي غلطاانه لان هاالاياام ماعاد فيه ميانه بين الاخوان
واي نصيحه تعتبر تدخل وبعدين هي توها عروسه يمكن فيه اشياء تغيرت فيها اعطوها عذرها وبرري لها عند الوالده واذا صاارت مره قاااسيه مع امك هي اللي تناقش ولدها لاجاء انتي اطلعي منها عشان ماتخسرين اخوك انا زوجة اخوي جت من برى السعوديه واخوي هناك يدرس وهي بنت خالتي واحنا اللي بغينا نموت عشان ياخذها وبعد الزواج صارت بينا حواجز هي مره عسل بس صارت رسميه معنا جت وجلست 3شهور هنا زارت امي مرتين بس حتي اول ماجت جلست اسبوعين مامرت ولادقت وامي تبكي تبي تشوف ولدها ولافكرنا نتدخل وندق لاخوي بالعكس خليناها براحتها الواحد من بعيد لبعيد ومايسلم كيف لو تدخل الله يهديكم لبعض وسلمي عليه لاتكبرين الامور |
أختي اسمحي لي أنتِ غلطانة بما إن زوجته قريبتك كان الأفضل إنك تكلمينها هي بأسلوب حلو وقولي لها الوالدة حرمة كبيرة وتحب إنك تمرين تسلمين عليها ، هي عادتك بمكانة بنتها عديها بمكانة أمك وإذا أمك تحسست من موضوع إن زوجة أخوك ما تمرها هونيها عليها لا يكون موقفك سلبي ، هو شرط إجباري إن زوجة أخوك تزور الوالدة كل أسبوع ؟!! وأخوكِ وإن كان رده قاسي عليكِ ، لكنه الصح وإذا زارتكم زوجة أخوكِ ومعها قريبة لها وين المشكلة ؟؟ ممكن تستحي تجلس لوحدها !! خصوصا إنك تقولي إن الزواج من فترة قصيرة ممكن إلى الآن ما تعودت عليكم ، أو تخجل منكم لا تكبري الموضوع وسلمي على أخوكِ وزوجته واخزي الشيطان :) |
لا لا اسمحييلي انتي الغلطانه
[قلت له ليش زوجتك لها اسبوع واكثر ماكلمت امي هذا الشي راجعلها صحيح غلطانه بس مو تكلمين اخووك وتسأليينه ليش ماتسلم على امي السلام بينها وبين ربها وبعديين العتب على امها مفروض تفول رحي سلمي على خالتك من زمان ماشفتيها يمكن تعبانه شي وحتى اخووك مفروض يفهمها بس مو انتي الي تقوليله امك وقلت لها ليش اخوانها يتحكمون فيها اسمحيلي بس مو من حقك تساليين هذا السؤال:( وبعدين قلت له ليش قبل اسبوعين جات تسلم على امس ومعها زوجة اخوها اهلها يقولون لاتروحين لهم الا معك حرمه (تفكيرهم غبي ) وش دراك ان اهلها الي قالوا لها يمكن هي ماتحب بعديين مااشوف فيها شي لوراحت ومعها حرمه يمكن باقي ماخذت عليكم مو تقوليين مالها فتره متزوجه اكييد تستحي انا لو مكانها اخذ امي وخواتي وهلي كلهم عادي مااشوف فيها شي:d يقولون لاتروحين لخوالك الا زوجك موجود انتي لو مكانها اكييد ماراح تروحيين الى اذا زوجك موجود شي طبيعي قلت ل اخوي (وش التخلف) اسلوبك غريب وين شخصيتك وهذاا لسؤاال ماينرفز:( رد علي وقال وشوفو قلة الأدب قال ليش تتدخلين في حياتي وهي ماسوت شي غلط انتي الي جبرتيه لانك ققلتي من احترامك له يوم قلتي وين شخصيتك(كما تدين تدان) وتخيلو قبل يومين طالعه مع اخوها وجاي اخوها لبيتنا ياخذ من اخوي غرض وهي بالسياره مانزلت تسلم على امي في هذي معك حق غلطانه وانا من الانفعال رديت عليه وقلت انسى أني أختك وأمسح رقمي اوف اوف كل هذا ترى السالفه ماتسوى تكبرونها بينك انتي واخوك وبعدين انا اقول تكلم الوالده كبر عقلك يامريض اسلوبك مع اخووك اكبر غلط بعدين تقولين ليش يقلل ادبه معك هذا اخووك مهما كان مو واحد من الشارع تقولين له مرييض ومدري ايش انا لو اتكلم مع اخوي بنفس اسلوبك بيزعل علي سنه جيبيه باليين بأسلوب التفاهم احسك:19: وتساليين اسلم عليه والا لا سلمي علييه وخلييك طبيعيه عادي ونصيحتي لك لاعاد تتدخليين بحياة احد حتى لو كان اخووك لانه بيحسب انك ضده وماتحبينه فخلي علاقتك بأخووك كويسه وهي اذا تبي تسلم والى بالطقاق:29: |
معليش يااختي انتي غلطانة
لان اسلوبك غلط في غلط هذا اخوك وانتي ماعليك منها تسلم ولا لا والاعضاء ماقصروا |
زهرة الرمان
شكرا لك على الرد صح غلطت بس دموع امي هي اجبرتني ارسل والله يهديهم |
اقتباس:
غلطت وانتهى الموضوع!!!!!!!!!!! حتى هو يدري عن وضع امي الصحي ما يسمح بالزعل ويتعمد يزعلها وماتوقعت انه يرد رد قاسي لانه يدري اني اتعب من السكر لكن الله يسعده |
وحدانيه MOSHAH اشكركم على الرد والله يهدينا جميعا واكيد راح اسلم عليه اذا جاء وحلفت اني ماراح اتتدخل في امورهم مره ثانيه ظنيته بسمع النصيحه وبلانسبه لتتدخل اخوانها في حياتها هي قالت مره لنا لما عزمناها قالت بشوف اخواني اذا يسمحون ماقالت بشوف زوجي شي غريب!!!!!!!!!!!!! |
أم عمر
أم عبودي اشكركم على الرد ويا أم عبودي المشكله أنه يستشيرني في كل صغيره وكبيره وماتوقعت أنه رده بيكون قاسي وهذه المره الثانيه يغلط وعادي امشي الامور واكيد راح اسلم عليه وش لنا بالزعل الدنيا حياة وموت |
هو الحين موالمشكله انتي غلطتي والا لا المشكله كيف تتصرفي. من وجهه نظري لاتكبرين الموضوع وتراء غالبا زوجات الاخوان اذا تكلمتي فيهم يكون الموضوع حساس يعني احيان حتى يكون قصدك حلوو بس يفسر انو انتي حابه تتدخلين والا غيرانه .. واشياء اخرى كثيره بس اذا تبين نصيحتي لا تجيبين سيرتها عند اخوكي . وامك تقدر تسال اخوكي والا حتى تعاتبه لا تدخلين نفسك ابدا في مشاكل غيرك. ومشي الموضوع وحتى لو حاول يدخلك بينه وبين زوجته لا تتدخلين ابدا خليه يحل مشاكله بنفسه هذي وجهه نظري الله يوفقك ويرزقك الزوج الصالح قولي امين
|
اسمحي لي يا اختي
انتي الغلطانه اول شي اسبوع واحد موب كثير ابداً يا اختي عادي انا مرة اخوي تجلس عن امي شهرين مو اسبوع ومن المفترض انك ما تدخلتي في الموضوع وسويتي مشكله من لاشيء الله يصلحك وبعدين ليه انتي رافعه ضغطك ماعليك من احد يسوون اللي يسوونه وحطي مكانك في مكان مرة اخوك وعيدي التفكير مره ثانيه الله يستر عليك |
| الساعة الآن 01:29 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©