|
زوجتي مهملة في واجباتها الزوجية والأسرية(مستجدات#253-395)
السلام عليكم اخوتي
بصراحه اعجبني الموقع وحبيت اني اطلع مشكلتي العويصة الي مالها حل اتوقع لاني عرضتها على اكثر من شخص واحاول اطلع نفسي الغلطان بس ماني قادر الكل يقول ابسط حقوقك الي تسويها نبداء بالقصة والي هي خلتني اعاف الحريم كلهن انا شاب مثل اي شاب فكر انه يتزوج ولما جيت افكر حاولت اني اختار انسانة قريبة من امي لاني بسكن في نفس البيت في شقة مستقله وتفادياً للمشاكل لكثر مااسمعه بين الزوجه وام رجلها. المهم دورت ودورت ودورت واخترت بنت بنت خالتي وقالو ياسلام طبعاً امي وافقت على طول لان امي بكل صراحه انسانه عنصرية بمعنى الكلمة ماتقارن في عنصريتها الا هلتر لان عندها اعتقاد ان الي يقربون لها هم افضل البشرية والي يقربون لابوي هم حثالة مجتمع انا اتكلم بصراحه عشان تفهون المشكلة صح وطبعي ماحب المجاملة و التملق بالكلام. احد الاسباب الي خلاني اخذ بنت بنت خالتي هو ان امي عنصرية ولو اخذ وحدة من اهل ابوي بتصير حرب في البيت لان امي الله يهديها مشوهه صورة اهل ابوي عندنا تقول عنهم كلام ماينقال للدرجة انها صارت تكرهني لما اقول لها عيب تكلمي على اهل ابوي قدامنا وتزرعين فينا كرههم، مالكم بالطويلة اخترنا بنت الاجواد هاذي الي حطوها ميساء مغربي قدامي للدرجة اني صرت احط صور ميساء مغربي خلفيات لجوالي ذيك الساعة وكل ماجيت انام ابوس الجوال وانام، رحنا وخطبنا وتملكنا ومشت الحياة وكانت وقتها تدرس اخر سنة ثانويه وكل مناسبة اجي ادلدل يدي جايب لها هدية مالت علي والله ويوم نجحت رحت وشريت ساعة الماس الله لايخسر ( لو اني داري كان جايب تقليد ):d خططت على الزواج ورحت وحجزت القاعة بخمسين الف وراح الوالد وجاب قنوات فضائية للتصوير الزواج وحجزت في افخم الفنادق ثلاث ليالي وخليتهم يسون لي جناح عرسان وناموسيه على السرير وكيك وشموع وخربطه اكتشفت بعدها اني دلخ وان المره ماتنعطى وجه :cool:ودخلت عليها ومن اول مادخلت وانا صاكها نومه ونايم بدون ماعطيها اي تعليمات وش احب وش ماحب مثل مايسون الرجال:29: اعرسنا والحمد الله وحجزت شهر العسل على النمسا وسويسرا والمانيا واخذتها من بيتها ماتعدت بيتها واول مره تركب طيارة معي وعلى اوربا على طول وتمشينا واستانست ومشكلتي اني اعطي المره وجه واجامل واسكت طبعاً بداية الزواج كنت اشوف المره ماتصحى الا لما اصحى وشنطتي اي فندق نسكنه انا ارتبها وهي الاخت ماتسوي شي سكت وقلت يارجال شهر عسل خلها تنبسط ماعمرها شافت شي وصغيرة سن توها 18 وخلها تدلع وراحت وشرت هدايا لكل اهلها عاد اهلها ماشاء الله كتيبة كاملة تقضيت لهم كلهم كني معرس عليهم كلهم:D رجعنا للرياض وقعدنا اسبوع ووديتها لا اهلها عشان توريهم الصور والهدايا الي جايبتها من بلاد برى على ماقالو المصريين:22: اول مشكلة صارت وهي عند اهلها طبعاً رجعت البيت وصكيتها نومه ولا صحيت الا 10 بالليل ويوم صحيت واحصل مليون الف مكاملة !!! قلت اكيد فيه شي ولا هي ماتت !! يوم دقيت قالت بكل نفخه وينك خير ليه ماترد !؟ وانا مستغرق في النوم قلت خير وشفيه نايم تبين شي قالت ليه ماترد البنات يضحكون علي يقولون هههههههههههه مادق عليك سحب عليك ....؟؟ قلت وانا وش دخلني فيهم نايم تبين تصدقي ولا بكيفك واصك السماعة واكمل نومي. بعدها ولاني طيب قلب رحت واخذتها وقلت يالله بنمشي جدة بنروح نتمشى واخذ خواتي معي وواديها جدها والعبها في الملاهي واشتري لها وادلعها علماً ياجماعة ولله اني كل سفرة ماعمري سكنتها في سكن اقل من 5 نجوم فنادق جدة كلها تعرفها وجربتها يمكن. رجعنا ياجماعة الخير وبديت الاحظ ملاحظات عليها البنت تنام ماتصحى الا المغرب وكل ماجيت من الدوام اجي القى امي الله يهديها مطلعه لها الاكل وترسل لها الشغالة تنظف لها ويسون لها كل شي وحاطينها اميرة. انا ضاق صدري من الموضوع هذا وقلت لا اشوفك نايمه ولا حياة لمن تنادي مير كني اكلم جدار كل ماجي احصل الاخت نايمة قعدت لها فترة تصحى لما اجي من الدوام وبعدها رجعت على طريقتها. المهم بعد فترة عرفت انها حامل وانا متفق معها مابي عيال الحين خاصة اني بديت الاحظ عليها انها ماهي راعية بيت. قدر الله وحملت ولما دريت قلت لازم تنزلينه خاصة انه في الشهور الاولى وحاولت وهي حاولت بس مالله كتب وكملت الحمل وحملت الاخت وصرت اخذها معي وهي حامل لان كان عندي دورة في جدة واسكنها في الهيلتون ابي ادلعها وابي اهلها يدرون اني ماني مقصر معها وسبحان الله مشاكل في مشاكل انسانه بمعنى ياناس ماتصلي مادري وش ديانتها هندوسيه ولا بوذيه ولا وش مذهبها ورغم هذا ساكت واذا قلت لها يابنت صلي قالت انا اصلي مو لازم تشوفني اذا جيت اصلي ووش دخلك ؟؟!!! سكتنا وقلنا صبر جميل والله المستعان مشت الايام طبعاً كان عندها حب التطفل وانا انسان اكره التطفل من اياً كان اشيائي ماحب احد يتعرض لها ولا يضيعها ولا يلمسها للدرجة اني شاري لها مثل ماشري لنفسي عشان ماتعرض اغراضي حتى مقص الاظافر لها مقص ولي مقص لان هذا طبعي اغراضي ماحب احد يضيعها لي ولا ياخذها. البنت سلمكم الله احس اني دلعتها بزيادة كل مره نتهاوش وبعدها اسفرها وانسى كل شي لي سنتين الان وكل سنة تمر لابد انها تسافر اقل شي 3 مرات وهذا غلط فيني وهي لازالت تنافخ وتصايح وتنام، اخر مره من شهر 5 الى نهاية الصيف وهي من ديرة في ديرة معي بس برضو كان فيها هواش ورفعة ضغط. طبعاً ماهو مدحاً لنفسي ياجماعة بس ولله اني ماقصرت في شي ولادتها اخليها تولد في افخم المستشفيات وتعالج في افخم المستشفيات ولا اوديها حكومي واقول لها ترى انا اوديك ابي مقابل ابي معاملة حسنة وتقدير للي اسويه كله ترى انتي مانتي مثل خواتك شوفي وش سويت لك وهم وش سوو لهم رجالهم وللاسف تقول ليتك مثلهم بس اقول الحمد الله اني مختلف عنهم انتي خواتك اقصى ماوصلو له جدة وانتي مابقى مكان مارحتي له بس قدري الوضع هذا ازين لك . مالكم بالطويلة البنت هاذي عوبا عوبا عوبا وكم مره تهاوشت انا وياها تخيلو ياجماعة سلة فواكة قعدت شهر ورب الكعبة شهر لين عفنت على الطاوله ماشالتها ويوم تهاوشت معها تقول البيت نظيف وهي اكبر نصابة انا اشوف الوصاخه في كل مكان ولا فيه ترتيب ولا تنظيف ولما ارتفع صوتي وجو اهلي تخيلو وش صار امي يوم قلت شوفي راحت امي وترميها في الزبالة ماتبي ابوي يشوف عيوبها واطلعها من الزبالة واقول خلي ابوي يشوف ليه تغطين عليها انا تعبت منها ماتفهم. جربت كل الطرق معها بس تتوب يومين وترجع بعدها مثل ماكانت ولو تسئلها العذر جاهز على طول وليتها تتأسف بالعكس تعاند وهي احسن الناس في نظر نفسها، استخدمت جميع الوسائل معها الهجر الضرب طبعاً غير المبرح اقصى شي عندي كف عساها تفهم والكف ترى ماجا من فراغ لكل فعل ردة فعل ولانها تسبني تخيلو !!! حتى اهلها علمتهم بس للاسف تجي وتقعد تصيح عند امها ولا نها دلوعه الماما يحسون الغلط علي واموت قهر... المشكلة الاخيرة طبعاً هي تبي تدرس في الجامعة وانا قايل خدامة انسي اجيب لك والحين عندنا ولد وش سوت الاخت راحت لامي واتفقت معها ان امي تعتني بالولد وقت ماهي تروح للجامعة وامي وافقت لها وقلت لها اوكي خلها تدرس يمكن تخالط مجتمع صاحي يعلمها كيف الحياة الزوجية ورحت وجبت سواق عشان يوديها، طبعاً لها اسبوع كامل ماتصحى الاخت الا 12 بالليل وانا انام 11 بالليل بصراحه ضاق صدري يلعن ام الحياة عايش مع صديقي انا مو زوجه وليتها واقفه على كذا لا اهتمام في الجسم ولا اهتمام في البيت ولا في الولد اقصى ماتسوي اذا صحت من النوم غيرت للولد وشربت حمضيات وكاكو كنها عربجية !! الولد كان تعبان ولما صحت الاخت سئلتها قلت عطيتيه علاجة قالت ايه قلت شلون ايه وانتي نايمة من امس حتى صلاة ربي ماتصلينها قالت انا سائلة الدكتور يقول مره تكفي قلت مو انا الي جايب العلاج مره ماتكفي لازم ثلاث مرات المهم حاولت تكذب في الاخير قالت خلاص ياخي بعطيه . قلت سوي لي اكل قالت مافيه طماط مافيه بصل قلت اكيد مافيه ورى ماقلتي لي قالت شلون اقولك قلت اكيد اسبوع نايمة عندك العذر الولد يسهرك زي كل مره وتاخذينها حجة جاية للبيت مبتعثة من عند اهلك اكل ونوم وخدمة وبس.............. طبعاً ياجماعة ولله ان الاكل والمعلبات في مره من المرات يوم فتحت الدرج انها منتهي تاريخها بس اشتري على الفاضي وفي الزبالة ختى خواتي صارو يحرصون على عيالهم لاياخذون شي من عندي ياخفون يكون منتهي تاريخه وليتها تحس ماتحس واذا سئلتها وين الاغراض تقول عيال اختك ياخذون ومادري ايش تتحجج بأي شي وفي الاخير اكتشف انه منتهي تاريخها جوالات اخر اجهزه لاب توب اخر نوع بس مايفيد الدلع عموماً كل هذا امشية واسكت ابي الحياة تمشي طالت المشكلة وارتفع صوتي وهي كالعادة يرتفع صوتها والاعذار جاهزة وهذا الي يرفع ضغطي وتتكلم علي وعلى اهلي حتى ماتستحي ولا في وجهها حيا وكل مره اهددها بس للاسف ماينفع حتى العرس قلت ولله ماطلقك الا لما ابرد كبدي فيك بعد كل الي سويته لك تجازيني بكذا انتي ماتسوين عندي شي ومثلك مثل الجدار، والجامعة مافيه انسي.. قالت اذا مافيه جامعة ودني لااهلي قلت يعني مامجلسك الا الجامعة قالت ايه وانت خيسيس ونذل وملعون وكلب وحيوان!!!!!!!!!!!! وش تبي بعد !!!! بروح للجامعة وادشر مع البنات وبقلب ولد عندك شي ؟؟ تبي تقول لا اهلي قول ماعلي منك واهلي ستر وغطاء علي !!! وانت اصلا عارفة انك بتقول كل شي لهم مانت مخلي شي قلت ولله لا اقول بس بعد كلامك هذا انسي اني اطلقك كذا تروحين بارده مبرده لا مافيه ابد قالت عشان ولدك خذ فضلتك مابيه يومين وانسى.......... يلعن شكلها هاذي وين عايشها خويها انا تتكلم معي كذا !! قلت لا ماهو عشان الولد بس ابي ابرد كبدي فيك لين اعرس عليك بعدها اخذ ولدي وتنقلعين لا اهلك انتي عوبا عوبا عوبا ماتربيتي وش رايكم ياجماعة في هالحكي ترى ولله احس اني صابر عليها صبر ايوب ولله لو انه غيري كان قطع العقال على ظهرها ياجماعة البنت هاذي تحس نفسها مستقلة بحياتها تخيلو لما يجي عرس انا اعطي وهي تعطي ماكان الحساب واحد اخرها خالها معطيه في عرسة 2000 ريال واكتشف انها بايعة ذهب ومعطيته انهبلت قلت ترى الذهب لك ماني محتاجة احفظيه وماله داعي تفرقي بينا. ياجماعة ابي حل مع هالانسانة لاتصلي ، وعنيدة وترفع الصوت وتنافخ ولا تسمع الكلام وتحس نفسها احسن الناس وانا انسان جاي من عالم اخر تشوفني مريض نفسي بالله من المريض النفسي ياناس ولله اني سئلت اكثر من شخص ابي احاول اطلع نفسي الغلطان عشان ماتسرع في قرار اندم عليه وللاسف كلهم يقولون هاذي عوبا ومتمرده. تكفوووووووووووووووووووووووووووووووووون ابي تفيدوني |
صراحة الله يعينك
وهذاكم انتم تتزوجون بنات تحت 21 وبكرة تجون تبكون عموما زوجتك هذي عطيتها وجه وبزيادة وعودتها على طيبتك احيان يجي الطرف الثاني مستغل الطيبة خلك حازم معها والله يفرج همك |
اقتباس:
بس بجد الله يعينك شوف يااخوي انا اقولك وين البلاء دام انها ماتصلي فشيل يدك يعني ماتعرف حق ربها بتعرف حق زوجها وولدها يكفي انها تقولك خذ الولد ويومين وانسى انا الا الاطفااااااااااااااااال اكرة الي تتضيق او تزعل الاطفال فكيف لو ام تقول مابغي ولدي ماعتبرها انسانة ولا ام ولا تحس ولا فيها دم الله يعيييييييييييييييييييينك وبس وبيني وبينك امك الله يصلحها الظاهر معطيتها وجة بزيادة اجل تفطي علي وساختها عشان من اهلها ؟؟؟؟؟؟؟؟؟؟؟؟ |
ماقول غير اه ياقهر بس ولله اني منقهر وصرت حازم اكثر من مره بس مادري هل الطلاق هو احسن حل لها لانها ماتنفع بشي ابد الهواش اكثر شي بينا
البنت ماخذه مقلب في نفسها تبي تدلع وبس وكل مره تقول ياخي اهتم قلت شلون اهتم في وحدة اصلا انا اخر الاهتمامات في حياتها ابي حل جذري |
اقتباس:
بصرآحـه الغلط الأكبر عليك لأنك دلعتهـا كثيييير لكن خلك شديد معهآ فتره أطول لحد ماتتغير وتفقد دلعك لهآ أو أبعد عنهـا فتره أتركهـا ببيت أهلهآ وإن شآءالله تحس بـ قيمتك ... لا تفكر بـ قرآر الطلاق أبدآ حآول معهآ وهي لسى صغيره ومدلعه يعني يبي لك صبر خصوصآ بينكم طفل .. الله يصلحهآ ويهديهآ يآرب |
:: حياتكم أنتم الاثنين كانت مبنية على شوفة النفس هي شايفة نفسها وأنت شايف نفسك :: |
لاحول ولا قوة الا بالله
اخوي يكفي انها ماتصلي شلون تبيها تقوم بواجبك وتهتم وياربي وين قلبها لما تقول يومين وانسى اعوذ بالله هذي مو ام الوحده منا تتعب لما يتعب ولدها شلون ترميه كذا ؟ الله يعينك والله .. والعمر ترا مو فرق كثير بنات اصغر منها وماشاء الله عليهم قايمين بازواجهم وعيالهم وحريم سنعاااات بجد لكن زوجتك اهلها مدلعينها وامك الله يهديها خربتها اكثر وانت كمان دلعتها زياده الله يعينك |
اقتباس:
قلت لكم ماعندها احساس مادري من اي كوكب جاية شلون تقول لولدها خذ فضلتك !!!!:( والمشكلة هي شايفة نفسها افضل البنات وكاملة مكملة وتخيلو عشان منعتها من الدراسة قالت بنام يومين وياويلك لو تكلمني :d بالله وش اسوي في هاذي ! انسانه عندها ان الحياة الزوجية كلها رومانسية في رومانسية تبي كل ماشفتها اضمها واطبطب على خدها والمشكلة الاعظم عارفة ان اهلي كلهم يستحون من اهلها ولايبون شي يزعلهم واستغلت النقطة هاذي بلييييييييييييدة احســــــــــــــــاس ودي اعرس عليها عشان اقهرها مابي اطلقها وتروح تفلها كذا |
اقتباس:
! لا ياأخوي مـو كذآ تحلهآ لا تنسى أنه بينكم طفـل وش ذنبه يتشتت والمشكله لهآ حلول لأن زوجتك لسى صغيره بس تكبر صدقني بتعقل .. محتاجه لـ صدمه بحياتها تصحيها كل مشكله ولها حل مافيه شي مستحيل بهـ الدنيآ أنت جرب كل الحـلـول وأذا مـانفع معهآ .. لك حق القرآر النهآئي - أتركهـا عند أهلهآ مده أطول خلهآ تحس وأذآ مـاحسـت ( طلقهآ طلقه وحده ) يمكن صدمه الطلاق تخليهآ تحس - هددها بالزوآج من أخرى وأذا تحبك رآح تغير من نفسهآ وتهتم فيك - أنقل إلى بيت أخر ( مؤقتآ ) بعيدآ عن وآلدتك .. لأن كما لاحظت أن وآلدتك مدلعتهآ وهو اللي خربهآ عسى الله يسخرهآ لك |
لا حول ولاقوة الابالله
اخوي الله يهديك اعرف انك منقهر واصعب شي انه لماتحسن تقابل بالاساءة شعور مؤلم جدا بس لازم تمسك اعصابك وتهدى عشان تعرف تحل الوضع الحين انت عندك ولد وابعد عن السب مهما كان لايجوز احترم على الاقل ان لك ولد منها لي عوده ان شاء الله لموضوعك اعانك الله |
لآ حول ولآ قوة الا بالله ..
أستعمل معاها الحوار البسيط الهاادئ لأني لاحظت عليك بس تصرررخ .. الله يصلح احوالكم =) |
زوجتك جاهله يبيلها وقت عشان تفوق وتفهم معنى الحياه الزوجيه وتتحمل مسؤلياتها..بس انت منت مجبر تتحمل وتصبر عليها وتنتظرها تفوق من غفلتها وجهلها لانك رجل ولك رغبات واحتياجات مالقيتها عند زوجتك..
وايضا انت لازم تفهما وتكرر عليها انتقاداتك وضروري توضح لها انه الوضع هذا مو عاجبك وتهددها ياتتعدل ياتتزوج الثانيه وفهمها انت وش تبي منها ووضحلها النظام الي انت تبيه في البيت .. لازم تجلس معها جلسة مصارحه وتتحاور معها في هالموضوع وتحطون النقط على الحروف وتوضح لها انك صبرت الى مافيه الكفايه ولاينتهي النقاش الا وانتوا متفقين.. وغير كدا زوجتك طبيعتها كدا كسوله مو لانك عطيتها ودلعتها والدليل انها من يوم ماجاتك من بيت اهلها وفي شهر العسل لاحظت عليها النوم والاهمال وسكت كان المفروض توضح لها انتقادك وملاحظاتك عشان تفوق وهي على بالها انه كذا صح لانك مانبهتها على اخطأها ..و بالعكس كثير زوجات ازواجهم يدلعونهم ومع ذلك الزوجه تحترمه وتقدره وتقوم بكامل واجبتها تجاهه..معناه مو كل زوجه يدلعها زوجها ويعطيها كل شي تتمرد عليه..بالعكس.فيه زوجات يستحقون انك تعطيها كل شي..وفيه زوجات غير مؤهلات لتحمل المسؤليات سواء دللتها او لم تدللها .. الحل انك تكلم امها وتقلها على كل شي ..يمكن تنصحها بشي يفيدها وتربيها لك من جديد.. والطلاق ابد لاتفكر فيه ..حرام بينكم طفل.. |
شوف اخوي متورط ::
إنت إنسان متناقض :: مره تقول هي ما ترتب اغراضي وشنطتي ومره تقول ما احب احد يلمس اغراضي مثل مقص الاظافر.. زوجتك احملت :: تقول لها نزليه !! وهل هذا كلام رجل مسلم محب !! كتبت بعض ما رأيته بيضايق زوجتك ويبعد عنكم التوافق الزوجي وانتم في امس الحاجه للتقارب وخلق جسر من التواصل المرضي في الثلاث السنوات الاولى من زواجكم .. اخي المتورط :: خل عنك الإنتقام والفكر الهدام لك ولها... وزوجتك ماراح ينصلح حالها إلا بالقرب إلى الله .. والصلاة عمود الدين.. |
لا تغضب مني: أنت السبب فيما حصل لك..يداك أوكتا، وفوك نفخ. لي عودة لموضوعك إن شاء الله |
اقتباس:
ياليت ترجعي لمحور حديثي اقصد في الاغراض الاستخدام وليس عدم اللمس بحد ذاته . القصد ان لها نفس ماعندي بالضبط ولا يمنع من انها تقوم بترتيبة بالنسبة للحمل كان قرار مني لاني اشوف انها ماهي كفؤ حياة زوجية وكان يجوز شرعاً على حسب فتاوى العلماء لما اقل شي من رأسي |
اقتباس:
|
اقتباس:
|
اقتباس:
سوينا الحوار الهادئ والحوار المزعج بس مافيه فايدة للدرجة اني في احد الحوارات كنت اسجل كل نقطة تقولها عشان اعقب عليها وكان مايعجبها اني اسجل !! |
اقتباس:
ويمكن يكون احد الاسباب بس ايش الحل في نظرك ؟ |
اقتباس:
وهددنا الزواج وتقول تزوج انت والجدار واحد بس اهم شي اذا تزوجت ودني اهلي وانا الف واحد يتمناني |
اقتباس:
والله لما اتنرفز اكيد لكل فعل ردة فعل وهي تطلعني من طوري لما اتلفظ عليها انا اكلمك الحين وانا جاي من الدوام الساعة 5 العصر والاخت في سابع نومه وش الحل معها هاذي |
اقتباس:
هون على نفسك.. عندنا وعندك خير.. اقتباس:
انا شدني الموضوع لاني اعاني كثيراً مما ذكرته انت.. ولكن الفرق اني حاولت اعدل واصبر لمدة عشر سنوات.. ولكن لا حياة لمن تنادي... انصحك ان تأخذ برد الاخ البليغ عليك لانه عقلاني ومحايد قبل ان يضع رده.. فهو من خيرة الناس هنا..وبشهادة كل من يرتاد منتدانا هذا>> وابشرك ان موضوعك رح يحقق اعلى موضوع في المشاهدات والرد لان البيوت تغلي وليس من منصف بيننا..واتمنى الا تأخذ صاحب الصلاحية شدة الوهج ويقفل الموضوع او يحوره.. للتذكير فقط http://www.66n.com/forums/showthread...84#post2674184 بالنسبة لي >>واكرر بالنسبة لي>> لو رجع الزمان بي 7-8 سنوات للخلف .. سوف اتركها في بيت اهلها الين يتحول البحر الى طحينه>> وساعتها أفكر أرجعها أو لا.. بس طلاق لأ. وفقك الله |
اقتباس:
|
اقتباس:
بس للاسف لا استطيع الدخول على رابط الاخ البليغ لعدم وجود صلاحية لدي لكن شوقتوني من هو البليغ لعل الحل عنده ؟ |
اقتباس:
يسعدني مرورك اخوي وردك العطر الله يكون في العون الحين اكتشفت ان امي جاية عندها واستغربت انها ماراحت الجامعة وانا متأكد انها قالت لها رغم ان والدي سبق وان حذر والدتي بعدم التدخل في حياتنا لعنصريتها لان قال لها عشان تقرب لك تخربي حياة الولد عشان ترضين اهلك وتغطين عيوبها !!! وكالعادة اعرف وش قالت امي اكيد راحت تدعي علينا وكلنا انا واهلي ابوي ماندلع البنت وسبت بما فيه الكفاية لان امي الله يصلحها عندها ان اهل ابوي وبما فيهم انا حثالة مجتمع وهم افضل الخلق صبراً جميل والله المستعان |
اعوذ بالله منها
والله اني انقهرت و لو اني محلك كان مسحت بها الارض ماشاء الله على صبرك وهذي وحدة استغفر الله ماتصلي وش تبي في وحدة ماتصلي و اخلاقها زي اللي برجلها الله يعينك ويوفقك بالزوجة اللي تسعدك |
مع كامل احترامي لك .. مسلسل الشكوى من الزوجات والله ياخوي يمكن انت سابع واحد ونفس الشكوى
(ماتعرف تطبخ ولاتنظف قلة سناعة وطولة لسان) بسبب واحد وهو الدلال والتربية على عدم احترام الزوج وعدم المسؤولية والله العظيم مافي غيره ..اخوي والله لو تسوي ماسويته زي هذي الاشكال والله مافي امل تنصلح لان امها وامك واهلها كلهم يرقعون لها مستحيل تحس بالغلط الله يعينك ويفتح بصيرتك وبس.المرة الماضية لما قلنا الجواب قالوا تصطادين بالموية العكرة وووو الله المستعان ويارب يسخر لكم زوجاتكم ويهديهن لكم .. |
اخواني ازيدكم من الشعر بيت واعطيكم تطورات الموقف حتى الساعة الان 6:50 مساءً
جاني تهديد شديد اللهجة منها:d ,,,,,,,,,,,,,,,,,,,,,,,,,,,,,,,,,,,, اختر يالجامعة ياتوديني اهلي،،، طبعاً ردي بكل برود مافيه اهلك ولا فيه جامعة.. الاخت بالله قالت شوف توديني غصب عليك ولا والله لا اخذ السواق واروح الجامعة غصب عليك طبعاً صحت من النوم ولا صلت كالعادة وانا ساكت ولا قلت شي يعني جامعة ولا ودني اهلي ما أخفيكم ياجماعة الخير قلت لأبوي على الي صاير وقال ياولدي هاذي عوبا واهلها مازوجها الا عوبا خل لولدك لين يكبر وعطها اشكل هي قلت لكم الاخت مبتعثة من عند اهلها للدراسة والتمشية حسبي الله ونعم الوكيل فيها |
اقتباس:
واللـه مدري وش أقولك الله يعينك عليهـا ! بعدهـا عن الله له دور كبير وعليك أن تبدأ الحل فيه أولآ طلقتهآ مرتان بآقي طلقه أخيره لا تستعجل بقرآر يهدم بيتك حط في بآلك ( صغيرك ) والله يهدي الماما |
اخوي
زوجتك لا زالت تمر بمرحلة انتقالية ... لا زالت مراهقة راح تدخل مرحلة التوازن والاستقرار اذا خلصت 22 او 23 بمعنى بهالعمر راح تكون تصرفاتها اقل تهور .. معروف الانسان كل ما تقدم بالعمر قل تهوره وجموحه .. لكن ! هل انت مستعد تصبر عليها سنتين او 3 ؟؟ وتشوف بعدها كيف تصير ؟؟ وسؤال ثاني : جربت تبعد عنها معنويا ؟ جربت انك توفر طلباتها لكن معنويا ما تكون معها ؟؟ |
الله يعينك ويهديه ان شاء الله
|
ياخي اهجرها ياخي وطول المدة يمكن تعقل - والا اقولك ............ والله مدري ايش اقولك انا عندي نفس مشكلتك بس على العموم اول شي الهجر ثاني شي انصحها وكثر خرجات برا البيت واذا جيت خارج اكشخ وخلها تلاحظ واطلع حاول تبين لها انك ماعاد تبيها تتغير او ان الموضوع مايهمك نهائيا وخلك رسمي المهم خلها تلاحظ ان فيك شي غريب وشوف تصرفاتها معاك يمكن تتغير وتفيد ............ الله يعين على الضلع الاعوج والا في زوجات يجيبون الهم . رضينا بالهم والهم مارضى بينا.... انته ماقصرت ولايغرك اي احد يقول انك مقصر بس لا تضربها ولا تخاصمها اسفهها واهجرها لعلها تتغير حتى اذا طلعت تتمشى معاها سوي نفسك تطلعها بس كذا وبين لها ان فيك شي بس لاتقولها انها خطه يمكن يظبط الوضع .
|
اقتباس:
|
والله ياجماعه انها جماااااااااااااااااااد ماتحس كل شى سويته هجر تطنيشً صبرت وتعبت نفسيتي وماذابحني غير الولد متعلق فيه بقووووووووووه والله يستر من اليله *
|
اخوي أرى السبب الرئيسي في عدم الأنسجام والتوافق بينكم في زوجتك وفيك:
1-الصلاة عامود الدين فكيف ترجي صلاح بيتك ولم يصلح دينها؟؟؟؟عليك بنصحها لتقرب لله ووعضها بأدب وحب ليس بأمر,مثل احضار الكتب عن عقوبة تارك الصلاه وحكمها مع هدية بسيطة ليسا الماس لو علبة شوكولا,افتح محاضره في النت عن الصلاة وقلها بحب خلينا نشوفها سوى واصلح من نفسك في دينك أنت ايضا لكي يصلح بيتك. 2-صغر سنها ايضا وعدم تربية اهلها لها ساهم في المشكله فعليك تربيتها أنت من جديد وكونها صغيره فهي لينه يسهل تشكيلها لكن بفهم ورويه وحب واحتواء وليس بعنجهيه. 3-عليك عدم اقحام امك أو اهلك بأي مشكله بينكما فعليك حلها بنفسك لأنك أنت عندما اخبرت أمك بعيوب زوجتك ماالهدف من ذلك؟؟؟؟؟هل هو انتقام لأبيك من أمك؟؟؟يجب أن تعي جيدا أن هناك من أهل أمك يحملون أخلاقا راقيه وكذلك أبيك,فأنت عندما اظهرت لأمك سوء تصرفات زوجتك أنت تسيء لزوجتك وليس لأهل أمك؟؟؟وأيضا تملأ قلب زوجتك عليك حقدا وكرها فهذه حياة وليست حربا. 3-أسلوبك فيه نوعا من المنه ياأخي احذر أن تمن على زوجتك،مثل أنا سويت لك وأنا عطيتك حاول أن تتلافا ذلك. 4-قلل من تدليلك لها ولكن اكسب زوجتك بالمعامله الحسنه التي لاتهدم قوامتك ولا تكون شديدا عنيدا كن بين بين. أسأل الله أن يصلح حالكما ويهديكما لما يحب ويرضى. |
فعلا زوجتك غريبة عجيبة
ما اقول غير الله يكون في عوووووونك ويفرج همك عاجلا غير اجل ولا تنسى ان اللي قاطع حبل الصلة بينه وبين رب العالمين اكيد ما فيه خير |
الله يصلح زوجتك
انا اشوف في بنات في اعمار اقل من اعمار زوجتك وماشاء الله عليهم قامين بحياتهم الزوجيه على اكمل وجه المشكله مو في السن في الاهل الام لما البنت تبلغ تبدء معها يله اطبخي رتبي بكره في بيت زوجك هذا هو السبب الدلال مطلوب في الحياه الزوجه بس مقابل هذا الشئ تحمل مسئوليه من قبل الزوجه انت تطلب من زوجتك تقوم بواجبتها كزوجه هيا ما قامة بواجبتها امام الله الصلاة بصراحه هاذي نهاية الزواج من غير سؤال ام العريس اهم شئ تا خذ بنت اختى ولا بنت اخوي ولا يشفون هل هيا قادره على فتح بيت وتحمل مسئوليه الرجل يدفع الثمن غالي وقال ايه مراهقه صغيره امهاتنا تزوجوا صغار ما سوى مثل هذا الجيل طلقتها مرتين ما بيقي الا وحده ولما تقولها لا مافي ورحه لبيت اهلك مافي جامعه تبي تتنقم والحياه الزوجيه بعديه عن كذا وين الموده ورحمه لازم تجلس معاها جلسه صادقه ولا بيت ابوها اولى فيها حتى تعقل الحياه الزوجيه مو عناد ولا اخذ ثار الله يصلح حالكم يارب |
اقتباس:
بالنسبة للصلاة نصحنا ونصحوها اخواتي لأنهن وضح لهن تركها للصلاة بدون سبب حتى بنات خالتي الي يزرونا في البيت شافوها ماتصلي واستغربو منها لدرجة اني قلت لها يابنت الناس صلي ولا بودك مكتب الجاليات يعلمونك الاسلام استحي على وجهك مالك دين انتي ؟ بالنسبة للاهل امي كانت تدخل مجرد ماتسمع صوتي اتهاوش معها او انها تسئلها وطبعاً كالعادة اطلع ان الغلطان لو اطلب ابسط حقوقي حتى تنظيف بيتي بالنسبة لصغر السن مادري وش الحل فيه البنت هاذي ولله مايقواها احد وبعدين صرت اخاف تنحرف طريق خاطئ لانها ماتفكر في احد ابد ولا عليها من احد ماتحشم لاكبير ولا صغير والبيت الي هي فيه بالنسبة لاسلوب المنة هي الي اقحمت الشي هذا من بداية حياتنا تخيل تقول لي شف زوج اختي وزوج اختي ورب الكعبة ماسوو الي سويته انا لها فمن الطبيعي اظهر الاشياء الي سويتها لها واذكرها ياخي تخيل تقول في الصيف بعد كل سفرة لازم توديني اهلي اجلس عندهم شهر هذا نظام عندنا !!! ولما سئلت اخوها قال لاتجي الا هي معزومه ولو يجي عزيمة صار ثورة في البيت عندي وانتفاضه لين تروح |
ياليت الي يقرى موضوعي يطلع على كامل ردودي في الموضوع لان فيه بعض النقاط اسردها في الردود
ياعالم صارت تحاربني نفسياً تقول اصلا اهلك مايحبونك !! قلت يعني يحبونك انتي وانا ولدهم من الشارع !! آآآآآآآآآه ياقهري ولله لو ادري ان العرس كذا لا اعطيهم مهر واقول بنتكم عندكم بس فكوني ونفسي عفت الحريم والله اني خايف اعرس مره ثانيه صار اكبر همي اني اربي هالولد واجيب له مربية وبلا حريم بلا وجع راس |
*أخي الكريم: لم تستطع نفسي المرور هكذا إلا أن أشارك في موضوعك، وأسأل الله أن يجعل على يديّ حلاً ينفعك. *أعجبتني فيك روح المرح، وخفة الظل..ولم يعجبني فيك بعض الكلمات مثل اللعن؛ لذا احفظ لسانك عن هذه الكلمات، واستبدلها بـ (أستغفر الله) أو (أعوذ بالله من الشيطان الرجيم)..ثم تذكر هذه الحديث القدسي المهم جداً في العقيدة حيث قال الرسول الله صلى الله عليه وسلم: (قال الله عز وجل: يؤذيني ابن آدم يسب الدهر، وأنا الدهر بيدي الأمر، أقلب الليل والنهار)، والدهر يعني: هو الوقت والزمان الذي يشمل السنين والشهور والأيام والساعات..وعليه فيجب أن تستحي من الله سبحانه وتعالى من هذه الألفاظ الصادة منك. *لا يحق لأمك –عفا الله عنها- التطرّق إلى أهل والدك بسوء، أو تنفير الأبناء منهم، وهذا خطأ كبير يقع فيه بعض النساء، وهو من الظلم، وقصر النظر في الحياة. *اختيار الزوجة هو قرار شخصي للرجل الخاطب، وإنما يستأنس المرء برأي أهله، ويسمع ويفكر ويقرر، فهو من سيعيش معها، وليست أمه. *لا تشبّه بناتنا بميساء مغربي وغيرها؛ فإنهن أشرف وأطهر وأعفّ في العموم..وأقسم بالله لو رأيت العديد من الممثلات على صورهنّ الحقيقية -في الواقع- بلا رتوش ومساحيق لاستغربت، وقلت: الحمد لله الذي أحسن خلقنا. *من أخطاء بداية الزواج الاستغراق العاطفي الضخم في مجال المشاعر، والاعتقاد من ناحية الرجل أن المرأة ملاكٌ يتحرك على وجه الأرض مخلوق من العالم النوراني، ويجب تدليلها في كل شيء، وهذا خطأ. *الدلال المبالغ فيه خطأ؛ لأنك تجعل الطرف الآخر –خصوصاً المرأة- تعتاد هذه الطريقة الحياتيّة، وترفض مع الأيام النزول عن هذا المستوى فتتعبك مستقبلاً. *لكني أخبرك أنه يوجد بين النساء من تعطيها تعطيك وتكرمك أكثر، ومنهن العكس..وفي مثل حالتك ينبغي عليك استخدام أسلوب الحرمان النفسي والعاطفي والمادي معها. *زوجتك من الممكن أنها خرجت من بيئة كانت مدللة بها جداً، أو بيئة لم توجهها قبل زواجها، وبعد الزواج أرخت أذنها للبنات ونصائحهن؛ كي لا يضحكن عليها. *من أخطائك يا سيدي أنك لا تستمر في العقوبة والحرمان، وإنما تقطع العقوبة في بدايتها ثم تقدّم الثواب السريع مثل سفرة جدة..هل تعرف ماذا يعني هذا؟ يعني أنك كشفت نفسك لزوجتك تماماً كما تنكشف السماء، وعرفت أنك مهما غضبت وقلت فسوف تنسى وتكافئها بمال أو هدية أو سفر؛ لذا تصبح الزوجة في هذه الحالة غير مبالية بغضب الزوج أبداً؛ لأنها عرفت حقيقته. *مساندة أمك –بحسن النية طبعاً- جعل زوجتك تتمادى كثيراً لإيقانها التام أن هناك من يرهّم ويخفي أخطاءها، ويحمل عنها مسؤوليتها، وسيقف في صفها ضدك. ::: دعنا نبدأ معاً على بركة الله: أريدك أن تفهم هذه الآية القرآنية (وَاللاَّتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ). سنجعل هذه الآية مرجعية لنا في الانطلاق لعالم الحلول لكني أريد منك حزماً وعزماً وشخصية فاقرأ وطبّق مستعيناً بالله: 1) يجب أنتِ أولاً أن تغيّر من نفسك، وشخصيتك، وطباعك، وتحافظ على صلاتك، وبيتك، وغيّر من أسلوبك في الحياة الزوجية؛ لأن زوجتك تريد حزماً يا رجل. 2) اجلس مع نفسك بهدوء، واجمع حسنات وسيئات زوجتك، واعرف ماذا تريد منها بالضبط، ودوّن طلباتك على ورقة بحيث تشمل الصلاة، ونظافة البيت، والاهتمام بالطفل، والاحترام والتقدير في التعامل، وحسن العشرة بالمعروف. 3) ثم تجلس معها جلسة هادئة في غرفة النوم، ثم تسألها ما يلي: هل أنا قصّرت في حقك؟ هل أنا أخطأت عليك؟ لماذا تفعلين معي مثل هذا؟ هل تعتقدين أن هذه حياة طيبة؟ هل أنتِ تكرهينني مثلاً؟...ثم اسألها ما يفتح الله عليك في ذلك الوقت..وخلال إجاباتها قيّم ما تقول لك. 4) بعد الأسئلة تقول لها: أنا أريد منك كذا وكذا..فإن قبلت فالحمد لله، وأكمل القراءة للفقرات القادمة، وإن لم تقبل فأنت بالخيار معها في هذه الحالة. 5) تحدث مع أمك –حفظها الله- بهدوء وأدب، وتقول لها: يا أمي! أشكرك على أكلك، وأشكر لك تعبك، لكن هذه الطريقة ستفسد المرأة عليّ؛ لأني أريدها أن تطبخ، وتهتم بالبيت، وأنتم بهذا التصرف تجعلونها تتمادى كثيراً؛ لهذا أرجوك لا ترسلي لنا من طعامكم شيء. 6) إن كرّر أهلك الإرسال مرة أخرى فاقبل الأولى؛ كي لا تجرح أمك، وفي المرة الثانية خذ الأكل من الشغالة، واعزله في البيت، ولا تسمح بالأكل منه، وفي المرة الثالثة أنزله لنفسك بأهلك، واعتذر بأدب أو بأية طريقة ممكنة تراها. 7) أخرج أهلك من حياتك الزوجية، وأدر حياتك بنفسك. 8) إن قالت لك أي شيء عن أهلك، أو مثلاً قالت: أهلك لا يحبونك..قل لها بهدوء: الأمر لا يعنيك، والرسول صلى الله عليه وسلم يقول (من حسن إسلام المرء تركه ما لا يعنيه). 9) بالنسبة لتأخرها في النوم فينبغي عليك الاتصال عليها من دوامك كي تستيقظ، وحاول أن تنغّص عليها نومها بإغلاق المكيف، أو تشغيل الإضاءة، أو جعل باب الغرفة مفتوحاً، أو إيقاظها كل 10 دقائق حتى تقوم مع قبلة، وفي كلا الحالات لا تهتم ولا تبالي إن غضبت. 10) بالنسبة للصلاة فيجب عليك الآن أن تنطلق وتجلب الكتب والنشرات الدعوية في موضوع الصلاة..ثم ينبغي عليك إن كنت نائماً أن تضبط المنبه على وقت الصلاة، وتوقظها معك، ولا تدعها حتى تتأكد أنها دخلت دورة المياه –أعزّك الله- للوضوء، ثم انطلق أنت للصلاة..أما في حالة اليقظة فعليك حين تسمع الأذان أن تقول لها: جهّزي نفسك للصلاة، واذهب أنت للصلاة، وإن رجعت اسألها: هل صليتِ؟ فإن قالت لك بمثل ردها المعروف لك دائماً فقل لها: هذا دين، وربما يأتي الموتُ في أية لحظة، فانطلقي للصلاة، وانتظر حتى تصلي أمامك للتأكد. -تذكر هذه الآية (يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ). -تذكر أنك مسؤول عن رعيتك، وسوف يسألك الله عنها وعن ذريتك فافعل جميع الأسباب، وابذل جهدك. 11) بالنسبة للأكل حاول أن ترسل لها رسالة من عملك مفادها (حبيبتي..أنا أشتهي الأكل من يدي؛ لذا أريد الأكل جاهزاً الساعة كذا وكذا)..كرر هذه الطريقة فإن نجحت فالحمد لله. -أما إن عاندت ولم تستجب فاذهب وكل طعامك في المطعم، وامنع أهلك من إرسال الطعام، مع ملاحظة توفير المطعم والمشرب في البيت حتى لا تقع في الذنب، ومن أجل ابنك. -إن لم ينفع فاجلب أغراض المطبخ، وقل لها: اليوم أريد من أكلك، ولا تدعها وإن اعتذرت، وقف وانظر. -ثم بعد زمن قم بتوجيه الدعوة لأهلها كي يتناولوا طعام العشاء لديك مثلاً، واجعلها أمام الأمر الواقع. -كرر الدعوات لهم من فترة لأخرى كي تشغلها وتحرجها. -لا تأتِ بخادمة أبداً؛ لأن الأمر لا يستحق في هذا الوقت. 10) أحذّرك تحذيراً شديد اللهجة أن تمدّ يدك عليها، أو أن تضرب الوجه فهذا منهي عنه شرعاً، واكتفي بقرصة على الكتف أو اليد، أو ضربة بالسواك. 11) احذر أن تسكت عليها إن تلفظت عليك بسب أو شتم. -إن تلفظت عليك في المرة الأولى، فقل لها بهدوء: هل هذه أخلاق المسلمة؟ أما تستحين على وجهك؟..عيب عليك يا امرأة، فأنت بنتٌ من بيت خير وصلاح. -إن كررت فاذهب وقف أمامها، وركز عينك على عينها، ثم اقرص شفتيها باصبعيك الإبهام والسبابة، وحذرها من التطاول على رجولتك. 12) تابع ولدك، والاهتمام به، واسألها دائماً عنه، وعن طعامه، ولبسه، ونظافته، وراقب هذا. 13) راقب بيتك، وراقب المواد الغذائية فيه، وقلل من الكميات الكبيرة من الأطعمة والمعلبات؛ كي لا تفسد. 14) بالنسبة للنظافة فقل لها: تلك الغرفة تحتاج إلى كنس، أو نظافة، أو قل: لماذا البيت غير نظيف؟ -إن لم ينفع فقم بأمرها، واجعلها تنظف أمامك. -استخدم أسلوب التقزّز مثلاً قل: ما هذه القذارات؟ ما هذا العفن؟ ما هذه الرائحة؟ 15) توقّف عن التهديد بالزواج أو الطلاق خلال هذه الفترة..لكن اخرج من البيت بعد صلاة العشاء، وأنت في لباس نظيف، ورائحة عطر نفاذة 3 مرات في الأسبوع. 16) الغي السفريات والهدايا من قاموسك تماماً. 17) إن هددتك بشيء، أو خيرتك بين شيئين..قل لها: لا تستخدمي مع هذا الأسلوب. 18) احذر أن تتكلم عن أهلها بسوء. 19) لا تقارنها بأحد. 20) أيضاً لو رأيت عناداً بالرغم من نصحك فلا بد لك أن تهجرها بالكلام+وأن تهجرها في المضجع، ولا تقربها أبداً، وإن لبست لك أحلى اللباس، وتعطرت بأزكى الروائح. 21) بشكل عام إن رأيت منها تطوراً للأفضل فقم بالتشجيع، وإن لم ترَ أي شيء فاستمر على أسلوبك، ونصحك. 22) اجلب كتباً في الحقوق الزوجية، والحياة الزوجية للبيت، واقرأ من فترة لأخرى أمامها. 23) سجلها في الدورات التي تتكلم عن العلاقات الزوجية. 24) أكثر من هذا الدعاء (ربنا هب لنا من أزواجنا وذرياتنا قرة أعين). ::: طبق هذه الخطوات أعلاه معها لمدة شهر، ثم انظر للنتائج، وقيّم الموضوع. -إن رأيت تغيراً فالحمد لله. -إن لم ينفع هذا الأسلوب فاتجه –على بركة الله- إلى والدها ووالدتها، وأخبرهما بحقيقة ابنتهما كاملة..ثم راقب سلوكها لمدة أسبوعين هل تغير بعد هذا أم لا . -إن لم ينفع فاتجه للبحث عن زوجة أخرى، ولا تضيع وقتك. ::: وأستغفر الله لي ولكم. أخوك في الله/ حاتم بن أحمد-الرياض |
| الساعة الآن 06:52 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©