|
رفض الاهل يزوجوه
السلام عليكم
هذي مشكلة لصديق لي يبي يتمرد عالعائلة والمشكلة بذكرها لكم باختصار .. خليني اذكرلكم مواصفاته عشان تحكمو الادمي عزيز علي ومحترم واخلاق ومحافظ على نفسه وعقليته ماشالله ناضجة وعنده صبر وحلول لجميع الامور الا هالمشكلة يقول لما تكون مقيد بشي بحكم العادات والتقاليد مالها حل الا انك تتمرد على هالعادات والتقاليد والفكر السطحي الي ببعض البيوت والمشكلة: الرجال متوظف براتب 3000 بشركة ينتظر الترسيم فيها ويصير حكومي لان ابوه شغال فيها حكومي بالادارة وابوه يقوله اصبر جايكم الترسيم ويبي يتزوج يبي يستر نفسه ,, والله وانا اشهدله انه ساتر نفسه لابعد حد وصحيح متهاون ولديه معصيات مثلي ومثل باقي الشباب الله يهدينا يعني ماهو متدين ذاك التدين , يدخن يسمع اغاني واشياء ماتخلو من اي بيت من معاصي الله يهدينا بس اهله مو راضيين يزوجوه بحكم اخوه الي اكبر منه بسنتين ماتزوج يقولو بعد مايتزوج اخوك نزوجك او انتو الاثنين بليلة وحدة واخوه مو داخله مزاجه زواج بها الفترة للمعلومية عمره 24 واخوه 26 يعني سنه مناسب جدا للزواج بس المشكلة بابوه خاصة مايبي يزوجه قبل اخوه واخوه كلم ابوه قاله زوجه انا مابتزوج الحين بس مو راضي..؟ وللمعلومية ابوه متعلم وفاهم ويلبيله اي طلب وهو الولد المدلل لابوه الي هو صديقي بس الا بها الموضوع الزواج رافض وبشدة الاب لازم اخوه الاكبر يتزوج قبله..؟ والادمي والله ياجماعة الخير امام عيني يجيه واحد من الشباب يقوله تعال معي الشقة عندي ثنتين انت خلك مع وحدة ونفلها سوا والادمي يرفض مو من قوة ايمانه لا يقولي ياخي وش استفيد اجري ورا شهوتي مرة والمرة تجر مرة ومرة واخرتها ارتبط ببنت الحلال الشريفة وانا ماستاهلها وربك يرزق كل واحد على نيته واخاف ربك يبتليني بعرضي بزوجتي او باهلي وخلني متحمل وربك ييسرها هذي بعض النماذج الي تحصل قدامي ودخل موقع زواج يبي يتزوج مسيار او يتزوج من عائلة بدون مايدرو اهله كل هذا والسبب ابوه مايزوجه قبل اخوه الكبير وش الحل ياجماعة الخير من ناحية ابوه مستحيل يتزوج قبل اخوه قد دخل الموضوع مع عمانه وكلمو ابوه ومارضي والادمي يبي يستر نفسه والله ماشالله عليه انه رجل تتمناه الف بنت مملوح واخلاق وشخصية وحبوب ودمه خفيف وعسل على عسل وربي ومتفهم وعارف اللي له والي عليه ودايم يوم نتمشى احنا الشباب ونلعب بالوت وضحك بصوت عالي يقلنا بالله خفضو صوتكم او خلونا نغير المكان نقوله ليش يقول جنبنا عائلة رجل ومرته مستانسين وتلقون زوجها الحين متضايق مننا ولايعكر مزاجه على حرمته . وابوه ماشالله اخذلهم شقتين بدل سكن من وظيفته ويخصمو على ابوه بدل السكن والشقق فاضية وحجزها لهم من سنة تخيلو يعني ماينقص الرجال الا المهر وتاثيث الشقة انتم وش رايكم تشوفوه مناسب تشوفوه طلب شي غلط من ناحية الصبر ابدا مستحيل مافيه صبر يبي وحدة تشاركة تانسه مو رغبته بس جنس لا ابدا ابدا حتى انا بنفسي والله ماعرفت وش اقوله ولا ادري ايش المطلوب من هالموضوع ممكن بسبب الحاحه علي اني اطرح الموضوع وهو معي 24 ساعة ويدخل يقراه ويبي احد يطمنه ويفضفض تشوفون فكرته مناسبة يزوج نفسه بنفسه ويحط اهله بالامر الواقع |
والله معو حق شو اهالعادات القاتله
ولكن اقول لك هو ياخذ اجازه ويدخل الغرفه ويقفل على نفسو ويكتب ورقه ويعلقها : اني نزرت للرحمن صوما اني لا اكلم اليوم انسيا ويدخل ويقفل على نفسو ويبدا يسبح ويستغفر ويصلي ويتعبد رب العالمين ثلاث ايااااااااااااااااام وان شاء الله كلو ينحل والله هذا الشي الوحيد اللي اغار فيه من الرجال هو انه يستطيع ان يدخل الغرفه ويقفل على نفسه و يتعبد ربو ويدعوه بتضرع ثم هو مش غلطااااااااااااان واطلب منه ان يصمد ولا يقع في الحرااام الله يكثر من امثالو |
هههههههههه
نفس وضعي تماما ادعولنا يا جماعه بالفرج |
خاله قرين هو فعلا ماعليها خلاف الاستغفار والتسبيح بس كمان الواحد ياخذ بالاسباب
هو يدعي ربه بكل سجدة يسجدها على كلامه وماله الا الصبر الله يفرجها عليه بيض الله وجهك على النصايح الي تقدميها وبميزان حسناتك يارب short والله مشكلة قبل فترة قالو غلا المهر والحين الاهل يمنعون الواحد يستر نفسه والرجل دامه طلب الحلال فمعناتها خلاص استرو عليه والمغريات ياكثرها الله يرزقكم يارب ويزوجنا اجمعين |
طيب ايش راي امه بالموضوع ؟ و ليه مايطلب منها تساعده ؟
ماعنده اخت ممكن تلين راس ابوه ؟؟؟ اخوي مثلك كان يبي يتزوج و امي كانت رافضة تماماً و انا اللي اقنعتها و خليتها تتقبل الفكرة |
اقتباس:
امه واخواته مأيدينه وواقفين معه بس الاب شخصيته قوية ومانعهم يفتحو معاه الموضوع ويقول مافي زواج قبل الكبير اكثر شي يحزني ويكسر خاطري يوم يسولف لي ويقول بالسهر اجلس مع امي واخواتي ونختار العروسة ومواصفاتها ويجلس بالساعات يفضفض لامه وهي تشاركه وتقوله فلانة سنعة ومن هالكلام ويوم اقوله ليش تتعب نفسك وتجلس طول اليوم مشغول بالك وبكذا بتتعب زيادة لاتفتح الموضوع اشغل نفسك معنا واطلع وفلها معنا,, يرد علي ويقول اي فلة ياشيخ مانروح مكان الا شايف التبرج ونفسيتي تنقلب زفت ابغا انسانة اشاركها حياتي عشان اوازن نفسيتي مابين عاطفة وحنان الي احتاجه ومابين طلعاتي معكم وكذا ويقول الموضوع افتحه باليوم الف مرة مع اهله ابغا افضفض احس براحة عالاقل لما يحكوني عالعروسة المستقبلية واقعد افكر قبل النوم ساعة كاملة فين نسافر وفين نطلع وكذا يرسم بباله مخططات واحلام والله حالته تحزن بالذات لما يقول, شي بيدك والمادة متوسطة وتقدر تفتح بيت بس مرفوض من الزواج بحكم العادة والتقاليد |
طيب خلّي يكلم أخوه ويقنعه بالزواج ..!! |
اخوه رافض الزواج هالفترة عليه التزامات اقساط السيارة وغيرها
وعاد هذا زواج مو مجاملة ويقنع باخوه عشانه تحس الموضوع مقفل من جميع الجهات مدري ليش |
للاسف هاذي عقليات بعض اولياء الامور والعادات وتقاليد ذبحتنا وذمرت بيوت كثير سواء رجال ولا نساء لا يتزوج مسيار ولا شئ يكلم امام مسجد ولا اهل الخير الموثوق لهم بصلاح من شيوخ ويكلمون ابوه واذا هو مصر على موقفه اجل يخطب وخليه قدام الامر الواقع للاسف كثير شباب تنجرف تحت الزنا والسبب حكم العادات وتقاليد الي متى اعرف قصه اب مثل هذا الاب ولما شاف الابن ان ابوه مره مقفل راسه اخذ امه واعمامه وخطب ولحين بيتزوج وفي الاخر الاب وافق الله يسر له امره
|
ظل انثى
بالظبط هذا الي اقوله انه شي مو بيدك دام ابوك وبعض كبار السن تفكيرهم محجر وراسهم يابس مالك غير تدعي ربك والله يفرجها وقال مالي غير هالحل بدون اهلي اخطب لنفسي بس متردد من العائلة الي بيتقدملهم وين ابوك وصعبة يوافقو او يفكرو يسئلو عنه قبل لايتاكدو |
إذا الشاب ما يقدر يأخذ اللي يبيه ، أجل البنت كيف ؟!! يجلس مع أبوه ويكلمه بهدوء عينه بعين والده .. يا والدي العزيز أنا مُحتاج للزواج ليس ذنبي أن أخي الأكبر لا يريد الزواج ، يا والدي الفتن في هذا الزمن تُحيط بنا وأريد أن أعف نفسي عن الحرام .. يعطي والده بعد هذا الكلام مجال ليفكر .. بعدها إذا استمر رفض الوالد ممكن يدخل أحد من أعمامه بالموضوع وإن أصر وعاند يقوله اعذرني يا والدي أنا إنما أردت رضاك وانت تُجبرني على عكسه وأنا بروح بأخطب لنفسي وتمنيتك تكون معي ترشدني وتفرح لي لكني باخذ معي عمي فلان ،، وياخذ معه أحد أعمامه ويخطب لنفسه :) مُوفق ~ |
اقتباس:
بسم الله ماشالله رد يام عمر والله بالصميم الله يكثر من عقليتك ويهنيك بحياتك |
الله يرزقه ويفتح له أبواب رزقه
|
اقتباس:
ولكي بالمثل ان شاء الله المشكلة مو بالراتب في من تقبل به بها الراتب وفي من ترفض هذي موضوعها هين البلا بابوه الله يطول بعمره ويحنن قلبه |
ويسألو ليه الشباب تتجه للمسيار والزواج العرفي
من هيك عقليات متحجره الله يهدي والده ويصلحه ويكتب له الخير انا لي مده موضوع شاغل بالي وعقد شويه واحداهن نصحتني بان اقول : حسبي الله ونعمى الوكيل وفعلا اصبحت ارددها 500 الى الف مره بالنهار وسبحان الله العظيم تيسر الامر من حيث لا احتسب لذلك قلت لك اخي الفاضل يغلق باب غرفته عليه ويضع ورقه هيك يعرفو انو زعلان اولا وببركة الدعا والتسابيح يتحقق المراد ان شاء الله لان هناك سؤال يراودني انو من الذين يرضون بعريس لابنتهم يتقدم ويكون لوحده من غير والده او احد من اهله يريد الزواج يخاف انو ينجرف للحرام لا سمح الله هل يقع ذلك تحت بند : هو من باب لا طاعة لمخلوق بمعصية الخالق |
موضوع غريب ممكن فيه حلقات مفقوده
الاب مو راضي يزوج الابن لاجل ان اخوه الكبير ماتزوج مع ان الاخ الاكبر يقول لا اريد الزواج الان ,,,,, اذن سبب رفض الاب هو لكي لايتحدث الناس ان فلان زوج ابنه الصغير قبل الكبير لنركز على هذه الجزئية ففيها مفتاح المشكله فمادام ان الرجل يخشى كلام الناس فلن يقنعه الا هؤلاء الناس الذين يخشى كلامهم ,,, يجيب شخص ابوه يقدره مثل ان يكون كبير العائله او اي شخص ابوه يقدره ويخليه يكلم ابوه ,,, اذا مانفع يحاول يعرف هل هناك سبب غير كلام الناس لكي ينطلق منه ,,, ثم بعد ذلك يروح لمدينه ثانيه او لناس بعيدين او لشخص قريب من العائلة يعرف سبب رفض الاب ويخطب من عنده ويقول لابوه ابشرك ان فلان عطاني وابوه سيفرح ولو زعل كلها يومين اعرف احد الزملاء سوا زي كذا وانا خطبت دون علم الوالد وفرح لما خبرته ,,, نتمنى نعرف مؤهل والده وعمره وهل سيشارك في المهر والتكاليف ام ان صاحبك يستطيع تدبيرها فيه جزئية وهي هل والد صاحبك يرى فيه النضوج ام انه يشعر انه صغير على الزواج في النهاية هناك حل جميل شيباننا يحبون القوة في عرض الطلب والصراحه يعني يقول لابوه تبغاني ازني واللا اطلع بنات واشوه سمعتك اذا مانفع يجيب من البنات اللي يقول خويك ويحطها بالشقة ويجيب ابوه ويقول شف هذي جبتها العب معها يعجبك الوضع >> طبعا هذاحل فيه مغامره قويه وفيه مبالغه يعني فيه الف حل وحل مسالة الدعاء قبل كل شيء ويااخي الكريم صاحبك يقول انه مدخن معاصي واغاني وبلاوي ويبي ربه يستجيب يااخي قدم شيء لربك حتى يعطيك الله ,,, الله عز وجل لن يبخل عليك انت من يبخل على نفسه ,,, اعرف شاب كان متدين لكنه نص ونص يعني بالشهر تمسك معه يسمع اغاني مره واحيانا يشوف قنوات رقص اذا غلبته نفسه ويمر عليه بالاسبوع مرتين مايقوم للفجر ويقول كنت ادعوا ربي ان يرزقني زوجة صالحه وسبحان الله لابوارق في الافق انه الزوجه ستاتي كل شوي تجي عقبه ,,, في النهاية يقول كرهت نفسي وكرهت المعاصي وبدا يبكي كثير ويدعوا ويصلي بالليل يقول والله ثلاث ايام واخطب ويرزقني الله بنت ماكنت اتوقعها وتتيسر اموري ,,, فانصح صاحبك ان يترك رفقته السيئه مش فقط لاجل الزواج وانما لكي يوفق في دنياه واخراه ,,, |
:* الأخ الأكبر عليه أقساط تمنعه من الزواج كما فهمت إذن رافض لسبب مقنع الزواج = مساعدة الأب المادية للابن عند زواجه والأب رافض تزويج الصغير قبل الكبير لأنه يرى أن الكبير أولى بالمساعدة فهو الذي عمره مناسب جداً للزواج في حين أن الذي عمره 24 سنة لساته صغير وكذلك إلى الآن ما ترسم في وظيفته يعني مستعجل على رزقه:d :* ينتظر سنه أو سنتين فمازال صغير ومن الأفضل أن يتزوج الشاب وهو مستعد مادياً بوظيفة ثابته وبأجر يكفل له حياة كريمة :* ومافيها شيء لو أنتظر السنتين إلي فيها يسدد أخوه ديونه ويزوجوه ويخلصوا منه وبعدها يبدأون بالصغير :* وفرصة له لتجميع قرشين لزواجه وتكوين نفسه على أيش مستعجل بس..؟!! :* |
ياأخي وفقك الله
واسأل الله لصاحبك الهداية والسداد عندي طريقة بإذن الله مجدية وهي # الاستغفار قال تعالى (((فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِين َ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا)) يعني عظيم الاستغفار في جلب الرزق # قول وبكثرة رب إني لما أنزلت إلي من خير فقير). قالها موسى عليه السلام ورزق بوظيفه عند شعيب + زوجة سبحان الله # يترك المعاصي بقدر الأمكان وهذا لنا جميعا ويدعو الله ان يجنبه اياها من الدخان والاغاني # يتوسل لله بالعمل الصالح مثلا يقول يارب اريد العفة فأعفني يارب انت عالم اني دعيت للحرام وتركته ابتغاء وجهك الكريم فلاتبعد عني الحلال فأن أحوج اليه # يتحدثت مع والدته تكلم والده وان يخبرها هل يعجبكم أن أحضرها لكم واقول شوفوا زوجتي أو ان الجأ للحرام لاقدر الله سوف تتحملون ذنب # يدعي الله انه يجعل والده له هينا ويستجيب له فالقلوب بين يدي الله # يبتعد عن أصحاب السوء نافخي الكير إذا لعب بلوت نسامح وبعض المعاصي لكن أحضار فتاة هؤلاء بعيدين كل البعد عن الله لو أزاغه الشيطان ونام معها ومات ماذا كان مصيره وهل ينفعوه إذا تردى لنار جهنم لاسمح الله مقتبس( فاحذر ـ رحمك الله ـ مصاحبة أمثال هؤلاء الغافلين، فإن صحبتهم تجرك إلى أفعالهم وتكسبك أخلاقهم، وقد قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: الرَّجُلُ عَلَى دِينِ خَلِيلِهِ فَلْينظُرْ أَحَدُكُمْ مَنْ يُخَالِلُ. رواه أحمد وأبو داود والترمذي وحسنه، وصححه النووي. قال المناوي في فيض القدير: خَلِيلِهِ أي صاحبه أي فليتأمل أحدكم بعين بصيرته إلى امرئ يريد صداقته فمن رضي دينه وخلقه صادقه وإلا تجنبه. اهـ. واعلم أن الابتعاد عن أصحاب السوء نجاة في الدنيا والآخرة، قال تعالى: الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ {الزخرف:67}. قال ابن كثير في تفسير الآية أي: كل صداقة وصحابة لغير الله فإنها تنقلب يوم القيامة عداوة إلا ما كان لله عزوجل، فإنه دائم بدوامه. اهـ. واعلم أن وجودك معهم على حال المعصية حرام حتى ولو لم تشاركهم فيها، لأن بقاءك معهم على هذه الحال كالرضا بأفعالهم والإقرار لها، وأهل المعاصي لا يجوز إقرارهم على أفعالهم، بل لا بد من إنكارها عليهم, فإن نصحتهم وذكرتهم ولم يستجيبوا لك فانصرف أنت عنهم ولا تجالسهم في مجالسهم هذه. قال القرطبي ـ رحمه الله ـ في تفسيره: فكل من جلس في مجلس معصية ولم ينكر عليهم يكون معهم في الوزر سواء، وينبغي أن ينكرعليهم إذا تكلموا بالمعصية وعملوا بها، فإن لم يقدرعلى النكيرعليهم فينبغي أن يقوم عنهم. انتهى. واعلم أنك بفعلك هذا لا تكون متشددا ولا متنطعا، بل تكون سالكا الطريق الوسط، لأن الوسطية المحمودة هي ما وافق الحق والشرع، وكل ما خالف الشرع فهو ضلال. واعلم أن تحديد الوسطية لا يرجع فيه إلى ما تستحسنه العقول والأذواق ولا إلى ما ترتضيه الأعراف والعادات وإنما يرجع فيه إلى نصوص الشرع وكلام أهل العلم الثقات الذين تلقتهم الأمة بالقبول، وراجع كلامنا في بيان وسطية الدين في الفتاوى التالية أرقامها: 25075, 69083 ، 26673. وننبهك في النهاية على أن لعب الكرة الأصل فيه الجواز بشروط معينة وهي: 1- ألا تشغل صاحبها عن فرض أو واجب. 2- ألا يصحبها فعل محرم من كشف عورة أو تلفظ بما لا يجوز من السب والشتم. 3- ألا تتحول إلى ملهاة ينقطع لها الشخص ويضيع فيها أوقات دهره. وراجع المزيد من هذه الضوابط في الفتوى رقم: 453. والله أعلم). واخيرا وفقك الله كان لابد أن ارد عليك لأني لا انسى بأن جعلتني اصيب بحالة هستيرية من الضحك يوم الأربعاء وصرت بس امشي واضحك يالطيف يارب |
اقتباس:
والوالد مؤهله جامعي ودارس برا ماشالله وجدا عقليته متفهمة ومتفتحة الا بها الجزئية مادري ليه وعمره 50 ,, وماشالله الشاب عقليته ناضجة بشهادة الكل والله حتى ان عماته سمعو بمشكلته ويعرضون عليه بناته ولو وافق هم يقنعون الوالد على كلامهم , لاكن هو مايبي من العائلة ابدا وانا اخوك هالمعاصي والله الحين ماتخلو من اي بيت صغير وكبير الاغاني ومشاهدة المسلسلات وربي يهدينا اجمعين بس لما تقيس حياته كشاب مع الي حوله او بالمجتمع تقول الله يثبته من صلاة وادب واحترام وبره لوالديه وهو ماشالله مجمع من سنة وفلوسه نصها بالجمعيات ويقدر يقدم المهر لاكن تاثيث الشقة اكيد يبيلها شوية مساعدة من اهله والكلام الي يقوله لوالده جدا صعب ممكن انه حل مناسب لاكن صعب صعب تقول لوالدك هالكلام وفكرة يكلم شخص كبير بالعائلة مناسبة والله والله يهديه ويهدينا اجمعين وبيض الله وجهك اخوي عالرد الي يثلج الصدر والله |
اقتباس:
ومن ناحية المادة حالتهم فوق الميسورة ماشالله الله يزيدهم والدليل الاب اخذ شقتين بدل سكن لهم الاثنين ومافرقت معاه يخصمو بدل سكن عالفاضي وشي ثاني الاب بيشغل الولد عن فكرة الزواج وقله افتحلك مشروع بالمبلغ الي عندك وانا اكمل لك الباقي وانت اترزق الله فيه بدل ماتحطها بزواج حطها بمشروع<< كلام الاب هنا صحيح مية بالمية , وازيد على هذا الاب اخذ الشاب لمكتب سفريات وقله هذا احنا عالمكتب وابيك تروح تدرس برا على حسابي كم شهر عشان تنظم للبعثة لامريكا والاب ماقصر جالس يفتح لولده ابواب وابواب ورجعو من المكتب واخذ الولد امه وقلها بالحرف الواحد ابوي يسوي كل هذا عشان يبدلني ويصرفني عن الزواج بس بقولكم شي واحد انا مستعد ادرس برا واجيبلكم احس شهادة بس لاتزعلون مني لاجيت ومعاي وحدة متزوجها , قال اعرف نفسي هنا وبالقوة صابر ومابالك لارحت برا وانا بصراحة احسد هالشاب بعرض ابوه الاثنين كله عشان يشغله عن الزواج, بس لله في خلقه شوون يبي يعف نفسه وتسئلي ليه مستعجل وجاتله عرضين من احلى العروض لكل شاب ورافضها من باب يعف نفسه..؟ وبعدين هالشركة الي هو فيها مضمونه ودخل بواسطة ابوه والاب مسؤل بمنصب بوظيفة حكومية وهالشركة متعاقدة مع الوظيفة الحكومية الي فيها الاب يعني مسئلة وقت ويترسم باذن الله سيدة الموقف .. بوركتي عالرد والتفهم للامور وانا من المعجبين بردودك جزاك الله خير |
تدري ؟
اخوي الكبير عشان يقنع امي انها تزوجه ،، قال لها انه زميله بالعمل بيخطبه لاخته و امي ماتحب زميله هذا و لا عيلته،، فامي وقتها استعجلت انها تخطب له قبل لا صاحبه يكلمه ،، فانت حاول توصل لابوك انه فلان بيتقرب منك و يمكن بيخطبك لبنته و انك مستعد تتزوجها ،، و وقتها ابوك بيتشجع ان شاء الله و يقتنع |
اقتباس:
هو مو بس تحدث مع والدته الا قبل فترة هج من البيت سافر بداخل المملكة وجلس يومين لوحدة واهله اتصالات وخاصتن ابوه وقال تعال كل الامور باذن الله تنحل ورجع وهو متأمل وماطله ابوه وبعدين صارت ظروف لاخته دخلت المستشفى تنومت اسبوع وانشغلو عن فكرة الزواج فترة والحين رجع للموضوع منجديد دوم الضحكة اختي :) والله يعفو عنا الله لايعيده من يوم :d |
اقتباس:
بس والله فكرة بس الام موافقة من زمان بس يعرضها للاب ولعل وعسا مع ان عماته والله عينهم عليه يبونه لبناته بس المشكلة بفكر الاب زواج الصغير قبل الكبير مستحيل معليش اخت روح الطير سوال خارج الموضوع .. وين القا موضوع لك وعن اخر المستجدات بولادتك حبيت اتطمن ايش صار عليك والله يسهلها لك وييسرلك الولادة |
| الساعة الآن 04:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©