|
ماهي أفضل طرقه لتقديم المهر؟
السلام عليكم
اسعد الله ايامكم واوقاتكم بالخيرات والبركات اخواني حبيت اسالكم في تقديم المهر لاني قريب ان شاء لله حقدم مهر واسال الله التوفيق والسداد واسال الله ان يسهل امور الزواج لكل العزاب هناك اناس يقدمونه في شنطه وهذه قديمه وهناك اناس يقدمونه في صحون فانا حاب استشيركم اش افضل طريقه يمكن نقدم فيها المهر وياريت لو في صور ان تفيدوني بها وكيف اضع الفلوس هل اضعها في نفس الصحن او ماذا يعني حتى لو عندكم اسماء محلات في جده حتى تفيدوني اكثر فاكون لكم من الشاكرين ودمتم بخير |
اول مره اسمع انه فيه طريقه خاصه لتقديم المهر
وربي انا في الظرف حق الرسايل الوالد اعطاه ابو البنت وخلصنا |
السلام عليكم
يابو الشباب انت اسمك هتلر زماني وانا اسمي هوم سيك اكيد بيكون في فرق وفي طريقه مختلفه لتقديم المهر عموما انا حبيت امزح معاك وشاكر مرورك لكن ياخي الكريم من وجهه نظري انا كل لحطه نعيشها في حياتنا هي اهم لحطه فيجب ان ندقق في تفاصيلها بقدر مانقدر يجب ان لناخذ الامور بشده مفرطه ولا بسهاله مفرطه كذالك فيجب ان تعيش اللحظه ومن اجل ذالك حبيت ان اخذ راي الشباب والاخوات في هذا المنتدى ومن باب اذا عمل احدكم عملا فليتقنه وشكرا للجميع |
اتوقع أنك تكتب شيك باسم البنت وتعطيه أبوها ولا أحد من أهلها ويسلمه لها، وصلى الله وبارك، ماعندي أي فكرة عن تقديم المهر، بس أنا بقدمه بهالشكل إلا إذا فيه أعراف أو عادات تمنع هالشي
|
ياشباب ليش محسيسني ان المهر هو عباره عن مبلغ من المال يسلم من قبل العريس الى العروس
وكان العروس ماهي منتظره الا الفلوس ياشباب المهر من وجهه نظري هو عباره او بدايه لحياه جديده بما فيها من معاني ومتبقى من ذكريات وهو كذالك عباره عن امتنان وتقدير للعروس للموافقه على الاقتران بالعريس وشكرا للجميع على المرور |
اولاً : الف مبروك الخطوبه وعقبال الزفه
ثانياً: اخي الكريم لكل منطقة في السعوديه عاداتها في التقديم المهر .. حنا في منطقة الاحساء في القديم يتم تقديم المهر الفلوس مع قطع من الاقشمه الراقيه ملفوفه فيه .. اما الآن يتم تقديم المهر على حسب ذوق الزوج واهله وطريقتهم وتقيمهم لزوجه وعلى حسب مادية الزوج مثلاً اخوي يوم جينا نقدم المهر لزوجته راحنا السوق وشارينا صندوق كبير مزخرف بالاقشمه الفاخره والخرز والخيوط وحركات عليه وراقي حيل ولونه ذهبي وبذاك القيمه وضعنا في الاقشمه الراقيه والعطور بأنواعها والطقم الذهب والدبل و سجادة الصلاه وجلباب وبخور وبعض الهدايا والفلوس طبعا تم ترتيبها بطريقه خاصه مش بشكل عشوائي مثل تنسيق المحل للهدايا .. طبعا البعض يروح المحل وينسيقها حنا في البيت و معها ايضا سلة شكولاته وغير الكيكه كل هذا ذهبنا به لزوجته وقت تقديم المهر.. اما صديقتي كان تقديم المهر مسوين الفلوس اشكال ومعها في نفس الشي الطقم الذهب والدبل وعليهم حركات والورد ومرتبطين بالكيكه ايضا مثل المجسم .. يعني على حسب الذوق .. |
حطهم في ظرف بنك
او محلات العود عبد الصمد او العربيه يبيعون صندوق فيه دهن عود وعود وعطور ومكان تحط فيه الفلوس سعره حول ال800 طبعا بتقدم المهر للأب |
أولا الف الف الف مبروووووووك الله ييسر لك كل خير الحين بحط لك صور بتستانس عليهم :22: برب |
,,,, في واااااااايد طرق حلوة وجذابة في نفس الوقت تكون بسيطة مرت اخوي مثلاً انا سويت لها هالحركة تقريبا طبعاً الصورة هاي من النت لأن ما عندي صور اللي صورتهم http://up.3ros.net/get-10-2011-9lgeeuht.jpg تقريباً هالطريقة طبعاً أنا كنت حاطة فيه ورود بعد كان شكله روعة وفي المندوس الصغار اذا حبيت تستخدمهم مثل هذيل http://up.3ros.net/get-10-2011-5q3rm6sw.JPG بعد حلو يعني كل مبلغ يلفونه بشريطة حلوة وينحط في المندوس بس قبله طبعا لازم تحشي المندوس بأشياء عشان يبين المبلغ وبعد ممكن أظرف مثل ما قالوا اللي قبلي بس كل ظرف تحطة روحة وفيه نوط واحد وعقب تقرزة في سلة مع ورود طبيعية طبعاً هذا كله يحتاج واحد يحب يتفنن اذا ما عندك حد تروح محلات الورد والهدايا ويسوون لك اياه :) بالبركة ان شاء الله |
اقتباس:
صراحه أعجبني كلامك وأقنعتني بالفكره جبت لك بعض الصور يارب تعجبك والله يتمم على خير :14::14: http://www.gulfson.com/vb/img/up/76/...cba31a2197.jpg حلوه الفكره بس الورد يكون ورد حقيقي والفلوس تصير مرتبه بدون طوي بأشكال تصير مصفوفه بس زي الي تحت الورد يعني معقولة التطبيق http://up.top4top.net/uploads/2011/0...6af7e23291.jpg http://up.top4top.net/uploads/2011/0...d7cb8a4151.jpg http://ylaa.com/ylaaforum/uploaded/44877_1308584383.jpg حلوه الصوره حقت القفص الي وضعتها بشرى |
الصراحه اسعدتني مشاركتكم جميعا
واشكر من ارفقوا لنا الصور التي تجسد الفكره فلهم مني كل الشكر والتقدير واسال الله العظيم ان يعطي الجميع اكثر مما يريدون ومما يطلبون وياريت من عنده فكره ان يضعها عل الموضوع ان يكون مرجع للجميع وادعوا اخواني الشباب ان يهتموا بمثل هذه المواضيع وبخاصه تقديم المهر لان هذه من اللحظات التي لاتنسى بالنسبه للزوجين فلماذا لانسعى ان تكون لحظات مميزه بكل مافيها وكل ماتحتويه وبنات حواء ياريت لو تزينوا الموضوع بارائكم بطرق تقديم المهر وهل لها اهميه او لا حتى يتنبه ابناء ادم لمثل هذه من نقطه وشكرا |
اقتباس:
|
اقتباس:
True 100% |
طيب وش رايكم فكرة الشيك ويكتب بأسم البنت ويعطى أبوها وقت كاتبة عقد الزواج ؟
|
اود ان اشكر الاخت بشرى ولازلنا نطمع في المزيد
من الافكار منها ومن باقي بنات حواء وبالنسبه لفكره الشيك جميله وروعه لكن في مثل حاله تقديم المهر اتبع منهج الصيت ولا الغنى يعني لو المهر مائه ريال جيبها ريالات من فئه ابو ريال وجديده حيكون لها وقع اكثر من مائه ريال ورقه واحده ولا اش رايك وعموما اللهم ارزق الجميع مبتغاهم كما تحب وترضى وبالتوفيق وهمسه هناك لحظات قد لاتتكرر فاجعلها ذكرى لاتنسى |
اقتباس:
ولكن من يسمع؟ |
الله يوفقك واحنا عندنا في نجد الاغلب يأخذ رقم حساب العروسة
ويوضع لها ويعطى ولي امرها الوصل هذا اريح وافضل لوصول المهر في يدها |
اقول كثر خير انك تبي تستر بنتهم
عطهم كاش بظرف وخل عنك هالخربطه اذا تبي تبدع ابدع بتعاملك معها واحترمها وقدرها واحترم اهلها والنتيجه راح تكون بعيونها |
اقتباس:
مهر اخوي كان بنفس هالطريقة بصندوق وحولة خشب عود اصلي وممقفل ومغلفينة بورد طبيعي بنفس لو الشريطات .. الله يتمم لك عالخير يارب.. |
بصراحه اول مره اشوف هيك حركات وافكر اسويها ان شاء الله
|
ماشاء الله
الله يتمم عليك ويهنيك انا قدمولي مهري رابطينه بمغاط فوسط صندوق الشبكه خخخخ حتى الشبكة اي كلام مع ان الولد وحيد اهله يعني المفروض يطيرون بزوجه ولدهم الوحيد وهم ماعليهم قصور لا مادياً ولا من ناحية الاناقة يعني يعرفون السنع وهو شبعان تبارك الله وراتبه كويس والله اني من هذاك اليوم كرهته , واكتشفت انه بخيل وفعلا صدق ظني بعد المكالمات تأكدت من حرصه ع الفلوس واللي زادني غبنة اني زوجت ثلاث من اخواني وكل واحد كانت شبكته تحفة فنيه سويناها عند محلات الهدايا , شيء يبيض الوجه ويفرح العروس نصحيتي لك لاتقصر بهالشيء ابد والله انك بتفرح البنت وبتخش قلبها وبتفتخر فيك وتحبك وتحس انك مقدرها وبتلقى هالشيء في تعاملها معك ولهفتها عليك ولا تسمع لكلام الحريصين على القرش ويدعون ان هالاشياء مظاهر وهم ماردهم الابخلهم (((( السعادة ركيزتها في البدايات )))) حط هالحكمة ببالك الله يسعدك ويوفقك |
صرااحه ..
والله صح كلامك في كل حرف قولتو لنا .. علبة المهر حقت ماما تخييييلو لحدت دحين موجووده وشكلهاا يجنن ماشاءلله .. دي بعض الاشكال جمعتهاا لك .. ان شاءلله قدرت افيدك =) http://www.mlfnt.com/lives6/13195090561.jpg http://www.mlfnt.com/lives6/13195090562.jpg http://www.mlfnt.com/lives6/13195092491.gif http://www.mlfnt.com/lives6/13195098591.jpg ودمت بووود=) |
اقتباس:
أخوي المبلغ اللي بتشري به صندوق الهدية والخرابيط خله عندك يفيدك .. وممكن تجيب هدية بسيطة لها وقت المهر .. وعلى قولة المثل المصري خلي قرشك الأبيض ليومك الأسود .. والرجال بمخابرهم وأنا أخوك مو بمظاهرهم .. لذلك الخلاصة / إذا هذه من عوايدكم .. الله يعينك’’ وإذا ماهي من عوايدكم بدل هياط وأنا أخوك .. |
اقتباس:
|
اقتباس:
كثر الله خيره لأن ستر عليها !! ليش هي طايحة في الشارع بيروح البش مهندس بيستر عليها مثلا مصدومة من نك نيمك ومن الرمسة اللي كاتبها تخيل اتكون اعلى منه في كل شي سواءً تعليم او وظيفة او حتى رصيدها في البنك الشاب اللي لازم يشكر ربه لأنها وافقت و سترت عليه:25: شرايك في الجملة مب قوية ! ياليت تنتبهون حق اللي تكتبونه |
بالصراحه انا مهري جايبه لي في قرطاسه زرقا حقت بقالات لافها بمغاط
مع انه مانسى يدبر مرسيدس يكشخ فيه علينا كاني طاره المهر منه طراره وربي انك ذوق الله يوفقك اخوي وتفنن بكل تفاصيل حياتك عساك على القوه قال ايش تحمد ربها انك سترت عليها الحمد لله على كل حال كل شخص فينا يبجث عن الابداع بادق التفاصيل كيف لو كان بداية حياة كامله مع نصفك الاخر ياخي رح محلات الهدايا وشف حركات الشباب لصاحباتهم وكيف يدورو رضاهم بللي هي به هذي زوجته ليه مايدللها ويرسم على شفاتها البسمه خلينها ندور الفن والذوق والابداع بكل شي لاحقين على الروتين |
الحقيقة زوجي كتب لي شيك بمبلغ المهر وسلمه لوالدي رحمه الله.
حلوة الحركات التي اقترحتها البنات تبارك الرحمن .. ولكنني شخصياً لم أكن سأدقق في الأمر .. يعني الحمدلله زوجي كان كريماً ولم يقصر معي في باقي تفاصيل الزواج .. ومن نفسه ولله الحمد دون أن أطلب أو أتشرط .. فمب معقول أحبكها في حكاية تقديم المهر ;) اقتباس:
وحقيقةً لا أعتقد أن أي امرأة ستضع في عيونها رجل متفضل عليها بزواجه منها. |
اقتباس:
|
دكتور المنتدى ورطت نفسك
من جد كيف تقول هلالكلام البنات يحبون هالحركات خلهم ينبسطون |
الصراحه احب اشكر الجميع فردا فردا ردا ردا كلمه كلمه
عموما اولا الى اخواني الشباب واللي يقولوا مالوا داعي التكاليف والمظاهر وسيبك من المهايط وغيره اقول لهم اذا كنت تدري فتلك مصيبه وان كنت لاتدري فالمصيبه اعظم لااريد ان ازيد او اعيد لكن هناك قاعده عامه تقول بان اللقاء الاول باي شخص يرسم 70% من انطباعك عنه حتى دائما مايركز الشباب في المقابله الشخصيه على الظهور بافضل مظهر ولاادري لماذا هذا الاهمال في العلاقات الزوجيه وحقيقا بعد مارايت الصور والافكار المطروحه يعني احسست بصعوبه الموقف لاادري لماذا وارجوا من الجميع الدعاء لي بالتوفيق والسداد وبالنسبه لدكتور المنتدى صاحب المشاركه الاكثر اثاره ياخي البنات عزيزات ومايذلهن الاذليل وحسن ظني بك انك لم تقصد الاساءه وانا اشكرك بعمق على مشاركته لانها جاءت على جرح طالما تجاهلنه واهملنه ياخوان الاخت في البيت هي الام الثانيه وهي الحاضن وهي من تشعر بالوالد وتهتم به واللي يطعن في ذوق البنت فهو يطعن في نفسه اولا لانه لولا ذوق البنت لما اخترتك واخيرا اقول اللي بيتكلم في الاسراف وغيره انا اضع يدي في يده لكن من استبصر حوله عرف اين مكمن الاسراف يعني طريقه قدمه فيها هديه لمن تحب في النهايه الهديه باقيه لكم سواء قدمه المهر في صحن او صندوق او غيره فهو لازال معك لكن الاسراف والتبذير هو مايحصل في قاعات الافراح من قصم لظهور الشباب ومااكثر الاكل الذي يرمى وبكم تكلفه الفرقه الفنيه (ومااحوجنا انت تكون بدايتنا بما يرضى واسال الله ان يعصمني من مثل هذه الفتن ) الموضوع يطول لكن ماذكر اعلاه فيه الكفايه |
الله ينور بصيرتك ويكثر من أمثالك اخي الكريم ويفتحها عليك بخيري الدنيا والآخرة ويرزقك من حيث لا تحتسب،، فمثلك نوادر لا قلة فقط ،، ادخال الفرحة على الزوجة ماجور عليه اذا احتسبت اجره وكان من قلبك ومن حسن طيبك وأخلاقك وليس اذا كان منة منك عليها،،. سال الله العليم رب العرش العظيم ان يجعل منكما قرة عين الاخر ويوفقك معها دنيا وآخرة والسلام خير ختام
|
اقتباس:
أقول لا يكثر بس لو حسب تنظيرك ما طلبوا المهر ! عموما لف الفلوس بمطاط نبيله و حطها في ظرف و قدمها لوالد العروس وقت الملكة و انتهينا حبيت أكون صريح معك |
اقتباس:
:d من زماااااااااااااااااااااااااااااااااااااااااااااااا ن ماسمعت هالكلمة :d |
اقتباس:
كلام رائع الله يوفقكم ويسعدكم ويتمم لكم علي خير |
اقول يابو مطاط نبيله
مطاط النبيله كنت استخدامه ايام صيد الحمام ومثلك خابر وكان بودي شفتك ايامها عشان امط النبيله في راسك لتطير الافكار اللي عندك هههههههههههههههه ياخوي اسمك نهار التجديد فاي نهار تقصد واي تجديد تبحث عنه وفي هذا المقام اطالب اداره المنتدى للتحقق من مطابقه المعرف للمواصفات التي يحملها هههههههههههه عموما اشكر الجميع على المشاركه واحب ان الفت نظر الشباب الى نقطه لو كان هناك عريس سيتقدم الى اختك او بنتك ووضع لك الخيار في الطريقه التي ستقدم فيها المهر ووضعك لك اختيارات هل ستختار ان تقدمه في كيس مربوط بمطاط ام ماذا؟؟؟ وسؤال اخر هل تحب ان تعاملك المراه بما تحب انت ام بما تحب هي؟ فانت كذالك عاملها بما تحب هي وافعل مايسعدها بقدر استطاعتك بغض النظر ان يعجبك انت ام لا واسال الله ان لااكون من الذين يتحدثون ولا يفعلون وبالتوفيق للجميع |
استغفرالله العظيم ..
آسفه اخووي اذا شاركت بالموضوع اكتر من مره .. بس مني عارفه ليش اكتر الاعضاء بيشوفو هالشي حاجه فاضيه ومالها داعي وانها مجرد مهر يربطها في ظرف وخلاس لا بالعكس .. الصندووق او الشي يللي بتتفنن فيه بيجلس مـــدى الحياااااة وحتكوون ذكرة رااائعه لآ تنسى أبداً ورااح يعبر العريس فيها عن مدى حبه بالعروووسه لانه تفنن في هذي الامورة والبنووته معرووفه تحب الشخلعه والحاجات يللي فيها تفنن تنبسط فيهااا مووووووت .. فليش مانحسن الاختيار .. وقبل ما نحسن اختياراتنا الخارجيه يللي بنقدمها للطرف الاخر .. نحسن اختيار العبارات اللائقه .. قبل مانخرجها وتجررح يللي حولينا : ) . أخي الفاضل : كتر الله من امثالك واسعدك الله انت ومحبوبتك اينما كنتم ويسر الله جميع امووركم =) |
الله يوفقك و يسعدك و ياها .. حلوة الافكار
بس صراحة زي مهرة .. ماقد طلعت ببالي و لا دققت ولا اصلا موجودة عندنا هذه الحكاية .. بعد العقد يعطي الشاب الفلوس لعمه اما بظرف او بحسابه بالبنك والبنت تقعد تدعي انه المبلغ يوصل لها كامل :) مو نص :) عن نفسي بعد العقد .. اجا زوجي و سلم علي و اعطاني الفلوس بيدي و انتهينا ... ورحت عطيت نصها لامي :) و الباقي طلعنا و اكلنا فيه انا وخواتي :) :) بامانة بعد ما شفت الصور..قلت في نفسي ويييه مافيني حيل اقعد افك كل مبلغ و اجمعه كله هذه بروحها شغلة طويلة :) >>>>كسلللل :) المهم اخي اذا حابب تعطيها المهر بشكل جميل الله يوفقك و براحتك التعب و الخسارة عليك مو على حد ثاني .. مادري ليه البقية زعلانين :) |
السلام عليكم الله يوفقك ياخوي ويسعدك ربي
انا عن نفسي رحت اشتريت طقم ذهب وعطر من مكياجي تهبل اعطاره وصندوق لونه وشكله مره نايس وكتبت رساله بخط يدي للعروسه ورحت محل الهدايه رتب الاغراض جوت الصنوق بين الورد وقدمته لاكن حاجه تبيض الوجه والله يتمم لك على خير |
اقتباس:
حتى أنا يا نورة حسيتها عبالة :d لا وأزيدج عن حركة تشكيل الأوراق النقدية على هيئة ورد .. صح الحركة حلوة بس قلت في نفسي: مب حلو كرفس النيطان :) لذلك الأفضل ـ والأريح :d ـ أن يكون المبلغ مجموعاً في رزمة واحدة ويتفنن في كيفية التقديم. |
أنا اشوف استخدم حل وسط
يرضي رومانسيتك و لا يكلف و يكون بدعة اجتماعية جديدة ما أنزل الله بها من سلطان قدم المهر في صندوق مرتب أبو 100 ريال خشبي ,عطره بالعود و ضع المهر بقماشة جميلة المتر منها بخمسة ريال سيكون شكل جديد غير مكلف بدل رمي نعمة الله هكذا و لفها على شكل ورود و قراطيس , أشوفها توصل رسالةعكسية للمرأة وفقك الله |
| الساعة الآن 02:09 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©