|
إبنتي الصغيرة تدق على السائق في وقت متأخر ويبدو أنه قد فهم خطأ
..آآآخ يالقهر....
كنت أشتكي من زوجي... الحين من سواقي!! صدع رأسي من التفكير وماني عارفة كيف أتصرف.. زوجي مسافر...من أسبوعين تقريباً.. عندي سواق من جنسية عربية في العشرينات... مؤدب ومحترم وخلوق جداً...عندنا الحين فوق السنة... الحاصل جوالي آيفون وتعرفون جوالات اللمس..! وأنا غبية محملة العاب أتسلى فيها وعندي بنت سنتين تموت في شي أسمه تقنية تطاقني ع الجوال وعاللاب وتصيح لو ماعطيتها الجوال بالذات وأنا أعصب منها وأطفش بس تغلبني كثير ولو خبيته مادري كيف تلقاه! المهم الله يصلحها صادف مرتين أو ثلاث تدق على السواق مرة 12 بالليل ومره حدود 2 وتدق بنفس الوقت على آخر رقم صادف لأمي واختي أخذه منها وأهاوشها وأرفعه لأنه يكون يشحن وتوصله... خذت الأمر طبيعي بنفس الوقت صرت حذرة خفت أزعج الناس.. والبارح بحكم ليلة عرفة جمعت عيالي بالملحق أتسحر وياهم على حدود 12 كان السواق موب فيه ماخذ السيارة ويتعشى عند ناس قريبين من جنسه كعادته جاء لمن خلصنا وغرفته ملاصقة وأنا فاتحة شبابيك الملحق ومستمتعه بالجو الحلو وشكلنا أزعجناه دق على غير العادة وقال عندكم عزومة! كان مؤدب ومستحي وكنت رسمية وجادة وفهمت إننا مزعجينه وردي صارم لاأعتذرت ولا شي لأني أستغربتها منه ولأني أول مرة أجلس يعني مو كل يوم أقول فاض فيه الكيل!..ولأن العيال بعضهم دخل يعني هدأ الجو شوي... شلت عمري وعيالي وتركت المكان له... الحاصل لقيت رسالة من السواق الصباح كلام غير مفهوم الإملاء صفر بس فهمت لو ماتبيني رحت! ورجع هنئني برسالة ثانية! أنا على طول جاء ببالي الرسالة أكيد جاية بالغلط! رحت أشاور ولدي تنح معيمافهمنا شي دقيت عليه قلت يافلان أنت مرسل الرسالة لي أنا! قال ايه! قلت وش صاير تراني مافهمتها! الرجال ماأسمع إلا أنفاسه وزي صوت اللي لسى صاحي! يعني أرسلها ورجع نام! شكيت إنه يحلم أو شارب شي! عصبت وقلت يافلان أنت مرسل هالرسالة ومافهمتها وش فيه! قال مافيه شي قلت وشو له رسالة أجل! ساكت! بعدين قال أنتي زعلانة مني! جاء ببالي يمكن وافق إتصال بنتي بوقت كنت أحشه فيه:25: أوقات كذا أنا أعلق وأذب الله يتوب علي بس كنت مشيكة عقب رسالته ومتأكدة ولا إتصال رد عليه! قلت وش صاير عشان هالكلام! اصلاً ماجاء بيني وبينك شي ولا طلعت معك اليوم وآخر مرة مافيه شي وش فيك! كنت صارمة في كلامي مو تقولون عطيتيه وجه بس كان لازم أفهم وش هالميانة يراسلني قلت شكلك يامحلم أو مو عارف تكلمني كلم ابو فلان قال أتصلتي أول امبارح..وخربط كلامه غير مفهوم وغير جريئ وفيه ايه يا أم فلان؟! قلت يعني وشو؟؟ ماجاء ببالي غير سامع حشي خخخخخخخخخ بس كنت أفكر بذيك اللحظة إنه ماسمع شي وجاء ببالي لايكون يحسبني أتحرش فيه! طارت عيوني قلت يافلان إذا تحسبني متصلة فتراك غلطان هذي بنتي داقة منه وعلى كم آخر رقم أنت لك سنة وزيادة تعرفني أروح معاك واجي معاك قد شفت مني شي ماأكر وش قلت بالضبط بس بالمعنى هذا وقفلت منه من كلامه معليش قال أنا مخنوق ومادري وشو!! أنا ياناس معه محترمه ومحتشمه في حدود يعني مو لمرحلة الإلتزام ولا عمري سولفت معه واخذت وعطيت وياكثر ماأروح مشاوير مايسمع مني غير السلام حتى أوقات يشوفني معي خاتم التسبيح أو أقرأ قرآن ولاني اشغل ردح وأغاني معه أقول يمكن شيطان لعبه محتمة معه وأعامله بطيب لكن بدون ميانة الحين لقيت إتصال منه بعد العصر ومارديت عليه يمكن يستأذن لأنه بيفطر عند قرايبه ماني عارفة كيف أتصرف معه زوجي ماقلت له شي لأنه مو هنا وماودي أقول شي وهو بعيد مادري لو السواق يحسبني أتحرش فيه أو سامع شي وأنا متأكدة هالشي لا بس حاطتها بالحسبة أو كان يحلم! عندي موعد اليوم جلسة ليزر وشكلي بكنسلها بسببه ماأبي احتك فيه كرهته:( وكمان أبي أخلص أموري من السوق تعرفون خلاص العيد جاء بس ناوية أكنسل كل شي حتى قلت لولدي بادي يسوق بس مفهي يعني ماعطيناه وجه يسوق قلت أبي المكتبة بنفس الحارة ضروري أبي أطلع قدامه ابيه يحس باللي سواه ويعرف مقامه ويحط حد لتفكيره بس بنفس الوقت خايفة من تفكيره لو كان شايفني أنا الخطأ!! ماني عارفة كيف أتصرف.....أسكت كأن شي ماصار لو أتصل ثانية أو أرسل أرد عليه! أقوله شي المشكلة مايتكلم عشان افهم مادري خجل والا دباشة! يرمي كلمة والسلام! وأنا أشرق واغرب فيها! |
جوابك موجود في سطورك ..
قلتي ان بنتك دقت عليه 3 مرات .. وقلتي انه بالعشرينات .. ممكن يكون طيش منه وكانت الرنات كاضوء اخضر له .. هذا احتمال .. وممكن يكون ضايق وتلخبط وتصرف تصرفات غير صحيحه .. حطي كذا تفسير واحتمال عشان ماتظلمي الادمي بالذات انه مؤدب ومحترم ولا قدر حتى يبرر بشكل واضح تصرفاته .. ولا تكبرين السالفه هالمره تجاوزي عنه وتكلمي معه بالسياره بهدوء وحزم .. بعدها ان كرر هالتصرفات خلي احد يتصرف معه بس يكون حكيم مو يروح يتضارب معه :d |
أحس نكك يحكي خخخخخخخخخخ
يالغالية والله أنا ماعندي نية أسوي منها مشكلة بس هو مو موضح السالفة وشو مافهمت منه شي خلاني متوترة وافكر كثير بقصده يعني ذب الكلمة ومشى ماعمري شفت آدمي لمن أكلمه يتنح مايطلع منه حرف! قفلت وأنا تلف بي الشكوك بمقصده! ولاني شفت تفكيرة نازل من زحليقة خخخخخخ قلت اشاور احد وعلي ستر الله عشان أعرف كيف أتصرف مو يفهم سكوتي خوف أو شي من هالقبيل اللي يظن فيني سوء يصير يدقق في رد فعلي وهو الله يهديه شكله مايدري وينه فيه! وأنا والله أنحطيت بمشكلة ماني فاهمتها ولاني عارفة أحتويها أو أفهمها حتى! |
عذرا عزيزتي بس ماتحسي إنك سويتي سالفة على لاشيء وكبرتيها
أنا بدالك لما أركب السيارة أعتذر منه وأقول بنتي كانت تلعب بتليفوني واتصلت عليك سامحني ياأخوي أزعجناك وبالنسبة للتهنئة لاتردي عليها ولا كأنك شفتيها وانتي بنفسك قلتي إنه مؤدب وخلوق وماشفتوا منه شي إنسي الموضوع وإن بدر منه تصرف ثاني كلمي زوجك يتفاهم معاه |
أختي ممكن لما شاف اتصالك في هذا الوقت المتاخر وبحكم أن زوجك مسافر اخذته وساوس الشيطان بعيد وفكر فكر في
غير محله والدليل رسالة التهنئه وإلا وش هالميانه اللي خلاه يرسل رسالة تهنئه وبعدين هو مايفهي هو محتار كيف يبداء معاك وينتظر اللين من طرفك والله اعلم أقول توقع وليس جزم وبعدين السائق بأمكانكم ابداله بسائق كبير بالسن يعني بحدود 40 أو 45 لحكم لعائله صغار السن الله يصلح أحوالهم آمين ............شااااب |
روح المساء
لا والله ماكبرتها حطي نفسك مكاني! يتصل فيك وكلامه مبهم وتبيني أمشي امشي! لغز اسلوبه وكلامه مو واضح وصار يتصل ويرسل ويعبر بأريحيه! بالعكس أنا ماسويت شي لحد الآن ساكتة وماصدر مني أي شي بس جيت أشاوركم لأني في موقف مو عارفة أتصرف بعدين لو البنتأزعجته السالفة ماتستاهل هو صح كل يوم بس مرة وحده مو إنه يتكرر الغتصال لحد الإزعاج! |
اقتباس:
ماكان واضح بكلامه ولا أعرف القصد للآن شككني فيه بصراحة وبنفس الوقت أستبعد هالشي بس زي ماقلت هو اللي جابها لنفسه! أما سالفة السواق هو جاي عن طريق معرفة خذناها كذا أكثر ثقة من شخص مانعرف شي عنه ولا شفت عليه شي أبداً بس السالفة اللي صارت صدمتني منه! للآن مالها تفسير عندي! مفكرة أطلع بعد شوي مليت قعدت البيت لو حكى برد عليه بجدية تامة الظاهر إذا أكرمت اللئيم تمردا! بعض الناس ماتفهم معنى إنك تحترمة وتعامله بذوق عشان الرحمة يفهمون شي ثاني! |
حياكِ الله أختي...
مثل ما قال أخي شاب .. جاءه الإتصال في وقت متأخر من الليل .. والوزج غير موجود .. وبحضور الشيطان ربما لعب في راسه عدة أفكار .. خاصه أنكِ لم تخبريه مباشره من الغد مثلا بأن الإتصال كان بالخطأ .. ربما هو رأى أن هذا الإتصال إشارات لأمرٍ ما . في رأسه ربما .. لكن الأصلح أن تكوني طبيعيه مثل الأول وإن رأيتي منه أمور أخرى حينها لابد من إبلاغ أبو العيال وهو يتصرف . بالتوفيق . |
لو كنت مكانك اسرحه واسرح ابوه ...
ما عندي في هالامور يمه ارحميني .. فاهم غلط فاهم صح ,, هذا الناقص .. رسايل وتواصل ... لا ابوه لا بو شكله ,, |
آه ياقلبي...
مجروحة وربي طلعت معه اليوم.. ماصار أي كلام زي العادة... نزلت لمركز تجاري زي ( سنتر بوينت) لمن قربت أخلص حصلت السواق نازل يشتري له من هالسوق بحكم انه رخيص.. وكان يكلم جوال وشكله معصب وصوته واضح كان يناقش اللي معه.. أرتعت ويا بنتي قلت وش جابه! وهو شكله ماأنتبه لنا.. سكتنا ورحنا للكاشير وحاسبنا...وهو لسى داخل! هو متعود أطول بس أنا خذت شغلي سريع سريع دقيت عليه قلت وينك!..قال شوي بحاسب واجي! قلت طيب..وجلست عند البوابة اتفرج ع العالم! وأنا مقهورة وش اللي أنتظر مو سيارتنا على حسابه رايح جاي حبكت يعني ينزل معنا! طلع ودق علي وركبنا..انتظره يعتذر ع التأخير..! مافيه أي إعتذار أنقهرت وسكت ورحت لمجمع ثاني وخليته ينتظر بالعادة أقول روح وإذا خلصت أدق عليك بس قلت زيه زي السواقين . كلمته لمن طلعت اشوف وين السيارة واضح أسلوب الصوت جاف معي أنا رجعت للبيت مقهورة مادري وش برأس هالآدمي ووش تفكيره ووش المشكلة أصلاً جت غلطتي عاد دقيت على ابو العيال أبيه يسمعني يحتويني أبيه يكون بالجو معي ليش أكتم بقلبي وهو مادرى عني! ولأني حسيت السواق وراه بلا قلت لازم أحط زوجي بالصورة علماً أن السواق وسبق وتهاوش ويا زوجي وكان طفشان وبيمشي بدون سبب يعني حاول يخلق مشكلة تافهه واهله توسطوا وتعذروا ورجع زي الحلاوة بعد ماجاه تهزيئ محترم ولسى قريب طلب زيادة راتب وزدناه! عاد هالمره جاء الدور علي حكيت لزوجي اللي صار وعصب وليش الحين تعلميني وقفل قال بكلمه! كلمه ورجع وهزئني زوجي يقول انه يقول لمن ترجع أعلمك! وهاوشني جوالك انتبهي له ياغبيه والله أفصله وانتبهي لبيتك وعيالك والا مصعت رقبتك السواق ماتحرش الا شايف دشرة والا أحد ملاحقكم والا تكلمين صديقاتك بالجوال معه وياحبيبتي وياقلبي والله لاأسفره وأطردك وكل ماقلت كلمة أقول منو قال تحرش انا مكلمتك أبيه يحس وراي رجال لو له مقصد والآدمي ماسوى شي ولا قل أدبه هي رسالة مبهمة ويهاوش يقول هو مكلمني المغرب يسلم وانا أشكره وأثني عليه لو معلمتني ماعطيته وجه كان متصل يس نبضي وأنا الزوج آخر من يعلم آآآه ياقلبي مايبي أتكلم وثار علي وعصب وكل مابينت ترا مافيه شي ماصار شي بس أنا حبيت أفضفض له يعني مافيه شي يستاهل ولع وسكتني والا بقفل الخط! ويرجع يكلمني ويهززئني كأني مسوية شي والموضوع مو لهدرجة يعني صح تصرف السواق مبهم ويحسسك فيه شي وماعطانا علم بس أنا وش ذنبي: ( الحين أتحرى يطب علينا فجأة يكفشنا بالجرم المشهود: ( أنا عارفة زوجي كذا يحط من الحبة قبة ويعصب ويسب ويذم بس مو معقول أتهرب أحكي معه من كل شي لازم يكون بالصورة لازم يسمعني ومهما عصب كل شي له حدود والله بكره لاسماح الله لو يتحرش السواق أو اي أحد بشي صريح بسكت لأني عارفة أنا اللي بتلحقني ملامه حسبي الله ونعم الوكيل |
شكلي ظلمنه وهو ظلم نفسه
أعتقد بعد تفكير وتمحيص قصد هالآدمي انو لمن دق علي بالليل وقال عندكم عزومة! كان الوقت متأخر وكنت مستغربة غتصاله وخفت ولمن رديت وشفت يتدلع كان اسلوبي جاف وصارم ماتعودة ولمن قال اصوات وازعاج قلت طيب يالله مع السلامة بأسلوب وحده زعلت منه الآدمي حساس ونام بحسرته خخخخخخخ وصبح بدري وكتب رسالة كلها طلاسم بس لمن فككتها عرفت الله اعلم ان قصده ليش تنافخين وليش كل هذا ولو تبيني امشي امشي! ولمن كلمته وقال انتي زعلانة مني؟ مافهمت قصده الظاهر يقصد اسلوبي! ولمن قال اتصلتي امبارح حسبته يقصد بنتي وهو قصده لمن شفت اتصاله ورجعت اكلمه انو اسلوبك مو شي هالغبي لو متكلم ومعبر مثل الناس محد زعل وفكر غلط كلامه طلاسم وساكت ولا عبر خلاني اشك بروحي ولمن كلمه زوجي وش رده قال لمن تجي اقولك! يعني كبرها بقوووة يعني لو سكت اصلاً وماقعد يزعل ويتدلع كان ابرك له او لمن كلمته أنا أو زوجي وضح القصد مو يسكت ويعلقنا من رجولنا خخخخخخخ قسم بالله لو انتوا مكاني ولعتوا الآدمي يستعبط ومسوي فيها وجت على راسه الحين زوجي شك فيه حتى لمن قلت انه نزل للمركز يتقضى زوجي على طول قال نزل يشوفك! الله لايلومه حط نفسه بموقف غبي ماعرف عقوبة دلاخته واسلوب تعامله مع الناس وش يقعد يرسل علشان بس كنت جادة ورسمية وماقلت آسفين! ماتدلعت ادلعه!! هذا والله اعلم ان ماطلع بشي جديد الحين ابونا اللي برطم ووراني النون ومايعلمون وش يهجده ياشيب عيني بس |
اقتباس:
لا ليش تسكتي عشان عصب خلاص تسكتي مررره لا صدقيني لو ماحكيتي لزوجك راح يقول هذي راضيه ويتمادى بأكبر من ذالك وقد يحصل مالا يحمد عقباها ولاكن خلي زوجك يعصب يوم ويكون لها ردة فعل ويعرف السائق حدوده العمر كله وتكوني مرتاحه مادام هو عندكم ولو خليتيه صدقيني ماراح ترتاحي في مشاويرك وتنقلب عليك هم بدل قضاء حوائجك ولاكن قدر لله وماشاء فعل ورب ضارت نافعه .....شااااب |
اتفق مع رد روح المساء
كبرتوا الموضوع مرررررة و اخاف السواق ينظلم بالحكاية هذه |
روح الطير
أجزم إن اللي مايحس بالوضع ويحط نفسه فيه ماراح يفهم! المسألة ومافيها سواق حب يتدلع ويمكن مزاجه مو رايق وللأسف لمن عاتب ماوضح على أيش عتبه فصارت المشكلة! لمن يجي يقول كلام مبهم ويرفض يتكلم لأي سبب قد يكون خجل مو يحطك قدام الف علامات إستفهام!! ولمن تحذري انو يكون له قصد مو طيب بتأخين الأمر ببساطة! وتجي بعدين على رأسك! فوق هذا بعض المشاكل تختلف حسب وضع الشخص لمن يكون عندي مثل هالمشكلة مع زوج غير مبالي وماعندي أطفال الوضع عادي ومو مهم لمن أنحط بنفس المشكلة مع زوجي عصبي غير قابل للنقاش يوصله خبر بعدين ويحطك أساس المشكلة ماراح تجي تقولي كبرتيها غير كذا أنا حذرة على نفسي وعلى أطفالي لأني لو أتهاون في أمور بسيطة الضرر بيشمل أسرتي شي ثاني لمن عندك زوج يجي يقول ( أمصع رقبتك وياه) ودايم تفكيره تجاهك سيئ ماراح تقولي اللي قلتيه حقيقة اللي يرد لازم يكون إنسان واعي له نظره شامله غير متهاونة ,.. وسلامتك! |
اقتباس:
أسكت عن زوجي لأنه الله يهديه رجال مايحتوي المشكلة يتعامل بعصبية حادة ويحمل الأمور أكبر مما تحتمل كنت لمن تجي مغازلات على جوالي أجي بكل عفوية أمد جوالي أقول كلمهم أو رد عليهم أحتمي به ويجي يقول محد غازلك إلا معطيتهم وجه! ولمن يكون زعلان يجي يقول عن الإتصالات على جوالي ويذكرني فيها كأني مسويه جرم ولمن أقول أي موقف يصير لي يحطني المتسببه مثل ماقلت عن سواقي قال ماسوآ شي إلا شايف - دشره-! كأني قايلة السواق حاط عينه علي وحاول يحتك فيني أو قال كلام حلو فـ طبيعي بعد اليوم لو ايش ماصار من السواق أو غيره إن شاءالله لو ********..ماراح أقوله لأنه بيتهمني ويحملني فوق طاقتي.. وبخصوص السواق أنا وضحت السالفة بأخر رد لي هو صح فهمته خطأ وهو اللي تسبب بالشي هذا بس كمان هو زعل وتدلع وحط نفسه يمون علي فجاه مني ومن زوجي الشي اللي يأدبه هذا إذا فرضنا إني فهمت قصده لأن كلمته زوجي لمن ترجع أقولك كأنه في مصيبة صايرة! من جد على قد ماأتوقعها مشكلة تافهه هو كبرها مادري لو هالسواق عنده نية يسوي مشكلة على رأسي! |
أختي مليت عارف ومقدر وضعك الله يعينك ويحميك من شر شياطين الأنس والجن وعجبا لرجال بدل مايوقف مع زوجته
ويحميها ويكون سند لها مثل ماقيلأ بغيته عون وصار فرعون الله يهديه وإذا كان كذا طبعه فمالك إلا أخوانك أهم شيء لاتسكتي لأنه لوسكتي راح تجر عليك مشاكل وعندها صدقيني راح يستغل ضعفك السائق أو غيره ........شااااب |
اختي مليت
مو لإنه طبع زوجك مثل ماقلتي، فإنت دحين جبتي مشكلة لنفسك مع زوجك.. و بتلاقيه دحين جالس مع نفسه و يفكر بمليون فكرة .. و السواق اذا قاله اي شي، فزوجك بيكون ضدك .. و لو طبع زوجك مختلف، كنت قلت لك احكيله كل شي و فهميه و زي كذا و على عكس لو تجاهلتي الموضوع من البداية و فرضا وصل له اي خبر، فتغابي عليه .. |
شاب الله يرضى عنك ويرضيك
صعب أدخل فيها أحد من أخواني أنا كنت قادرة أحلها بنفسي واوقه عند حده بس كان جد سالفته مبهمة مافهمتها غير كذا أنا أفتقد زوجي مو باله علي مو معطيني إهتمامه مو حاس إني بغيابه تعبت أعصابي من شدة المسؤولية كنت أليه يحتويني كنت أبي شعور مفتقدته وعز الله إنه مثل اللي كب علي سطل موية بلا حب بلا وجع قلب تووووووووووبه وبس هذيك اللحظة اللي عصب حسيت بألم مو من المشكلة إلا من البعد الروحي اللي عايشته! بكل حال الرجال حاول يتصل فيني وماكنت أرد بالأخير أرسل رسالة يعتذر وإنه ماكان يقصد وطلعت مشوار ولمن رجعت كرر إعتذاره لأني مارديت عليه وقلت ببساطة ماعليه : ( مادرى مو مسألة آسف مسألة أبو شنبات اللي جاي بعد كم يوم : ( الف الف شكر خيووو... |
اقتباس:
ماأعتقد بيقول شي مو فيني وأنا يستحيل يطلع فيني عيب واحد في أخلاقي صح زوجي شخصيته واضحه وكذا يكبرها ومهبل فيني بعصبيته وتضخيم الأمور بس أنا مثل البيبي أبي يحتويني وبس مو شغلي مستحيل إني ماأبين حاجتي هذا سندي غصب عن خشته مالت عليه ولو مو متحملني يستاهل مايجيه |
أختي مليت أعرف أني طولتها معك بس أعذريني هههههههه والله من محبه في الله أسئل الله أن يسخر لك زوجك ....شااااب
|
بتعرفي يا عسل انا عارفة قديش الموضوع حساس بس صدقيني الي ما عمل شي غلط ما يهمه يعني انتي عارفة حالك ما عملتي شي غلط وانه هاي بنتك الصغيرة عشان هيك حتى لو زوجك مو متفهم احكيله الحقيقة بالاول والاخير ربنا عارف انك محترمة ومو تبعت هاي القصص تخبري زوجك فيها احسن ما يوصله خبر من هون او من هناك.......وصدقيني ممكن يزعلك مثلا ازا هو مو متفهم وهيك ما بعرف انا بس المهم بتكوني خلصتي ضميرك وريحتي حالك لانك ما خبيتي.......بعرف هاي المواضيع كتير حساسة بالذات للصبية المتزوجة لكن ازا انا مكانك بخبر زوجي وازا بوثق فيا راح يصدقني وازا ما صدق يصطفل المهم بكون طلع الحكي مني انا اما ازا تخبى لانه الموضوع حساس راح مخه يجيب ويودي وانتي عارفة مجتمعنا العربي كيف بفكر اكيد خبت لانها عملت وسوت والخ......انا برأيي احكي الحقيقة افضل عشان ما تتهمي بشي ما عملتيه ونصيحة الك خدي بالك من الجوال حطوله كلمة سر عشان ما تلعب فيه بنتك شوفي غلطة صغيرة وعدم انتباه خلتك مضايقة ومش عارفة شو تعملي .......حطيه بمكان ما توصله ......وما يهمك ما عملتي شي غلط بكفيكي انه ربنا عارف
|
| الساعة الآن 09:57 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©