|
من جد حطمؤؤؤؤك ياقلبي الى(رجل الرجال~ الجانب الاخر)
بسم الله الرحمن الرحيم
وكل سنه وانتو طيبين النك نيم تبعي يدل على الوضع اللي عايشته حالة صدمه من الكل تحطيم يأس ملل كل شي ممكن يخطر على البال صعب تبني اشياء وتفرح فيها وهي على الواقع مالها وجود تفكير ناس حولك الاطفال ما يفكرون فيه استهتار درجه اولى ما فيه مراعاه لشعور الغير نفاق ووحده تجلس معي وعلاقتنا قويه وبيوم وليله تقول ما خاب ظني فيك انه ما يهمك احد وتبيعين يعني اش المطلوب الحق ورى اللي ما يبيني يعني؟؟؟؟ دايم افكر بغيري (أهلي) وهم التوب عندي وعمامي وخوالي اعتبرهم مثل امي وابوي من كثر ما احبهم بس اللي يضحك كان على بالي انهم يبادلوني نفس الشي طلعو بوادي وانا بوادي بتقولون كيف اكتشفتي من المعروف اذا البنت تقدم لها خاطب يسالون عنه وما يوافقون الا وهم خلاص اللي عندي الحق ينقال ما قصروا سالو بس مييين ام الولد داريه شي يضحك بس البلى مو هنا تم كل شي وملكت طبعا من زود الثقه في رايي اهلي على طول قلت سو اللي تبون اول يوم ملكت يعني ملكت العصر والليل رحت بنام صحيت اهلي كلهم عندي ويناظروني اش فيه طلع جاني حاله مثل الصرع مع انها اول مره تصير لي مشيت وخطيب الغفله مالت عليه كل يوم مشاكل ما فيه شهر عدا بدون مشاكل فيه غباء فادح هذا الكائن منافق كذاب يسولف معي كل سوالفه فلانه طويله فلانه قصيره وما عنده غيرها الموهم بالمختصر ماله داعي صوتي تغير نحفت انعزلت ما اقدر اواجهه احد الا هو احس اذا مسحت فيه استانس للمعلوميه كل المشاكل هو يبدا فيها قلت له ما عاد ابيك ثلاث مرات واهلي يسكووني ويهدون الوضع اخرها بداية شهر مرسل واحد من اخوانه يكلم اخوي الكبير وقاله كلام ما ينقال وسببق وذكرت فيهم دلاخه لا توصف فانكشفوا دقيت عليه وقلت له حل اذلف معد ابيك واهلي ايدوني وقتها اللحين رجعت زي ما كنت بمجرد قلت له خلاص واللحين انتظر حضرته يطلق وهو يبيها بمحاكم كل ذا عادي ما اثر فيني اللي قهرني اهلي اخواني يقولون نعرفهم يقصدون عايلة الولد بخلاء واخلاقهم زفت وامي تقول نفس الكلام وعمامي طيب بدررري وينكم من اول عمي الفاضل يقول لو سالتوني قلت لكم اللحين انا فيني لعانه ابي اغلط واسب واجرح ولا عاد ابي اقدر احد اصلن اخواني ما قدرت اكرهم صراحه لاني احبهم اكثر من نفسي بس عمامي ودي اتهور فيهم وزوجات اخواني ابي ابدى بالغلط دايم الناس تبدى وانا لا بجرب وش يحسون فيه في نظري صاروا الناس كلهم كذاااااابين ومنافقين وما ينفع الواحد الا نفسه هذا جزء واحد من حياتي السامجه وما خفي كان اعظم غير الطفوله اللي زي الزفت وغير الاشياء الثانيه |
اي استفسار انا جاهزه
وسؤؤؤري اذا بتعبكم معي |
الى المشرفات
ارجو اضافت البليغ الى رجل الرجال والجانب الاخر في العنوان |
لا اله الا انت سبحانك اني كنت من الظالمين
|
سبحان الله وبحمده سبحان الله العظيم
|
ابنتي حطموك يا قلبي:
كل عام وانتم بخير ما ذكرتيه أعلاه يسمى تفكير بصوت مسموع وتسمونه فضفضه. ولنضع منهج للعلاج نحدد كيف تفضفضين هنا ونبدأ من الطفولة فأذكري كل ما حصل لك فيها من مواقف أثرت على نفسيتك ثم نحللها ونتبع بإذن الله. |
اول شي كنت انا الدلوعه عند ابوي ويشوفني غير اخواني كلهم
وكمان اخواني كانوا مهتمين فيني كثير لاني وقتها تاخرت وما جيت الا بعد ثمان سنوات مع ان عندي اخت اصغر مني بس الاهتمام كان لي ولدرجة ان ابوي ما يرد لي طلب واخواني لما كانوا يبون شي يرسلوني اقوله عشان يجيبه دخلت المدرسه وكانت معي بنت جيرانا وهي من قبيلتنا وابوها يقرب لنا وعلاقتنا قويه درسنا سوا وكنت اشطر منها السنه الاولى عدت وكرموني الاولى على المدرسه واستانس ابوي طلعت سنه ثاني ومن هنا بدت المشاكل البنت اللي كانت معي سبحااان الله براءة الطفوله بجهه وهي بجهه غبت مره واتصلت عليها وطلبت ترسل دفترها على اساس انقل الدرس ورفضت على اساس بتمليني وخلصت طبعا الماده ما كانت عندي اليوم الثاني بس حركات الدفرنه مشيت الوضع لحد اليؤم اللي علينا الماده ووقت تصحيح الدفاتر وديت دفتري وهاك يا تهزيء طلعت البنت مليتني غلط واخذتي لي كم ضربه واللي قهرني ان الاستاذه سالتني من وين نقلتي الدرس قلت من فلانه وجحدتني ما اعطتيتها الموهم اني حقدت وهالبنت جننتني مشااااكل كل شوي اذا احتجت دفتر او كتاب من عندها ابد لو ايش ما تعطيني مع انها تطلني كثير واعطيها ما اقول لا بنفس السنه ابوي جته جلطه تسببت له في شلل نصفي وما يقدر يتكلم ولا يمشي هالموضوع بالذات اثر علي بشكل مو طبيعي لدرجة الى اللحين اي شي يصير لي احس لو ابوي بصحه ما خلى احد يسوي فيني كذا ما انكر اني بعض الاوقات استلعن بس لما احد يبدا علي بس انا من نفسي لا نفس كملت باقي الطفوله على هالحال مشاكل مع هالبنت قدام اهلنا والمدرسات والبنات انا واصلين السما من كثر ما صداقتنا قويه ووالله كنت احبها واعزها بس هي مدري وش تحس به واللي يجيب البلا صدق انها تتبلاني بشكل مو طبيعي قدام المدرسات انا العله وانا اللي داعسه على البنت وانا وانا خخخخخ لدرجة وحده من المدرسات الله لا يسامحها لا دنيا ولا اخره عشان البنت اللي يقال لها صديقتي صارت حاطه دوبها ودوبي لدرجة تضيع دفتري وتقعد تهزئني الا اطلع الدفتر الله لو اقابلها اليوم لا امسح بها اوكي لو تكرهني بسبب اقول لكن كذا ما اطيق هالحركه وعشان البلوه الثانيه تخرجت من الابتدائي اللي هي اخيس ايام حياتي لاني وقتها طفله والرايح والجاي يتفلسف ويهزء فيني بسبب وبدون سبب واللي كان يقهرني والى الان مااا فيه احد يدافع عني لا امي ولا اخواني كنت ابحر وحدي اكلها واسكت لاني حتى لو علمت احد محد بيعطيني وجه اما ايام المتوووسط يالله ما ازينها طلعت لحياه ثانيه وياويل احد يغلط علي العن حيه وميته لا مدرسات ولا طالبات وما خليت شي وابشرك لعنت شكلها اللي كانت باطه كبدي ايام الابتدائي جت تسب اخوي قدامي والله سويت فلم عاد كله ولا اخواني تسبني انا ولا هم بس للاسف ما شفت مقابل منهم لا بالقول ولا بالفعل وتضاربت معها طلعت حرت ست سنوات بيوم وبالقوه فكو بينا وامها قويت وجه دقت بعدين على بيتنا قالت ليه سويتي بفلانه كذا قلت اقول اطلعي منها مابغلط عليك وانتي زي امي وما كملت وناستي ثالث متوسط امي جتها جلطه بالقلب تحطمت من كل ناحيه وانا من النوع اللي طز بنفسي مهما يصير ما شلت همها بس امي وابوي واخواني لاااااا يووووه ممله صدق ذاك الايام ما ودي حتى اتذكررها وفي اشياء ثانيه بس ما احب اتكلم فيها لاني لو كتبتها او نطقت فيها ببكي |
قهررررررر
احس اني بديت احن وارجع زي اووول ما ابي ارجع للبراءه الزايده وحسن الظن بالغير اللي كنت فيه غباااااااااااااااااء وربي غبااء |
ابنتي الكريمة :
لابد من إخراج كل ما في قلب وبالتفصيل والبكاء والالم المصاحب يشبه ألم الضرس عند الخلع فهو لمرة واحده. ثم نحلل كامل النص ونتابع بإذن الله. |
مشكلتي الاولى والاخيره
[أبــــــوووي] تدري ليش لانه هو الوحيد اللي فاهمني لان شخصياتنا تقريبا وحده هو اللي كان يشجعني يدعمني يرضي كبريائي هو اللي علمني اني ما اتنازل عن شي لي ما احد يفرض رايه علي ولا اخلي حقي عند احد هو اللي كنت احتمي فيه هو اللي يوقف معي بكل شي حتى باتفهه الاشياء صح انه كان قاسي على الكل ويضرب اوقات بس يجي عندي ويتغير يصارخ ويهاوش وانا لا يضحك على اي شي اسويه كان ولا زال احلى شي بحياتي رغم عناده وعصبيته شجعني على اي شي احلم فيه وبالذات الدراسه مع اني مو اصغر وحده صوته عالي ويعاند بشكل مو طبيعي ويمد يده واوقات يجرح بس يبكي بسررررعه خساااااره لحد ثاني ابتدائي ومرض وصار لا يمشي ولا يتكلم واعتمدت على نفسي وما صار احد يدعمني زيه يعني فقدت شي كبييييييير المشكله لما بدت تظهر عليه اعراض الجلطه انتبهت عليه انه مو طبيعي واخر شي اخواني هم اللي لبسوه الثوب وودوه على المستشفى وبعدها بفتره وبواسطه رحت اشوفه لاني صغيره كان غييييير نحف وبين عليه التعب وما يتكلم ولا يمشي انصدمت اقوى صدمه بحياتي كل شي بالنسبه لي طاح وصرت اي شي يصير لي او اي موقف يصير لي باي مكان اقول بخاطري لو كان متعافي ما خلاهم واتذكر قبل ثلاث سنوات بالضبط كان عطله ويوم خميس صحيته علشان يتغدى جلس واستغربت عليه انو مو زي كل يوم فيه شي ويقول لي بالاشاره اني افتح الستاره وفتحتها مع ان مولعه النور وقعد شوي ورجع يطلبني افتح الستاره قلت له انها مفتوحه ويحط يده على جبهته ويرجع اخر شي طلبني احط له الغدا وحطيته قدامه اللي صدمني انه يحط الملعقه جنب الصحن حسيت انه مو قاعد يشوف شي بس انه ماسك نفسه عشاني ورحت ناديت امي وجت امي تساله وش فيه واشر لها انه مو قاعد يشوف شي بكيت وكرهت نفسي وقتها ما اقدر اوصف الوضع كيف كان ولا اوصف حالتي جا اخوي وطلع من البيت وهو يمسك يدي وياشر انو لا ابكي مرت يومين وهو بالمستشفى وطلع اللي صار بسبب جلطه ثاني والحمد الله رجع له نظره اوقات ايأس من كل شي واكره نفسي واتذكر الاشياء اللي مرت علي وما اقدر اصارح احد لاني لو تكلمت بابكي وانا ما احب ابكي قدام ايا كان حتى لو امي الشخص الوحيد اللي ممكن ابكي قدامه واقوله كل شي بخاطري هو ابوي وللاسف ما اقدر لاني ما ابي اشغله فيني ويشيل همي كفايه اللي فيه الكل يشوفه قاسي وعنيد وما يهمه الا نفسه بس انا اشوفه غير ما ادري انا الصح ولا هم اعرف وش اللي يضايقه وش اللي يحزنه ووش اللي يضحكه واللي يعجبه من الكلام والاشياء اللي يميل لها اعرف اشياء اخواني اللي اكبر مني وعاشوا معه بصحته اكثر مني ما يعرفونها مو لتقرب ولا لملازمه باحسااااس واختبر احساسي ويطلع صح سبحان الله اهتماماتنا وحده الله يعافيه ويخليه لي ولا يحرمني منه لحد هنا واستووووب لاني بجد تعبت نفسياا |
ابنتي الكريمة وصلنا خير
متابع واصلي الكتابة وستكونين بحال أفضل بإذن الله. بالانتظار. |
[أمـي]
زي ما تقول فاقد الشي لا يعطيه مع اني ما اعترف بهالعباره ابدا لان في نظري ممكن فاقد الشي يعطيه بشكل افضل من اللي عنده يعني هي لا احد حن عليها ولا شي ولا تبين احساسها تجاهنا عارفه انها تحبنا وتمووت فينا بس ما تبين لا حزنها ولا حبها ولا فرحها تفرح لكن مو بالشكل اللي يحتاجه الموقف واخذت هالصفه منها ولها محاسنها اوقات وعيوبها باوقات ثانيه تقريبا نفس الوضع شفت العجب حتى ذاكره اليوم والشهر ومستحيل انسى امي كان جهت القلب ويدها اليسرى تعورها لدرجة صايره طول الوقت على السرير وبالقوه تقوم راحت كل المستشفيات والمستوصفات وكلهم ما اعطو تشخيص ينقال عنه اللي يقول الرئه واللي يقول التهاب ومن هالكلام حتى وقتها كنت ثالث متوسط وكان يوم الثلاثاء ندوة امهات انا عارفه امي ما راح تقدر تحضر وبالاغلب ما كانت تحضر لي لاختي اللي اصغر مني لانها اذا حضرت لي يقعدون لها سوت وسوت وطلعت وتكلمت فتطفش منهم وما تحضر بعكس اختي مؤدبه وهاديه وفي حالها اكدت علي وحده من صديقاتي اني احضر لان امها تبي تشوفني وقلت لها طيب ووقتها اختي الكبيره هي اللي تصحينا للمدرسه قمت ولاول مره بحياتي الساعه سبع ونص ومعصبه ليه ما صحتني لاني وعدت البنت قالت امي بالمستشفى وش فيها ووش صار قالت ارتفع السكر وهو ما ارتفع ولا شي وكل ما اروح مكان احصلهم يتكلمون بصوت واطي واذا دخلت سكتو احاول احد يتكلم مافيه المشكله قبلها بكم يوم كنت افكر واقول يووه شكل القلب هو اللي يعورها ورحت اخذت لي عجينة السرميك وشكلتها على شكل قلب وكتبت حرفي ورحت وريت اختي قلت بعطيها امي اذا طلعت وسحبوا فينا لحد العصر وقت الزياره ورحنا لها وهي بالعنايه المركزه واجهزه قال اخوي شفتوها قلت ايه قال معها جلطه بالقلب وان شاء الله الموضوع بسيط والوضع عادي انا رحت بعالم ثااااني جتني دوخه على سطله اخرها بكيت قعدت تقريبا حول الشهر بالمستشفى ما بين جده ومدينتنا وبهالفتره كان كل العايله موجوده اخواني وزوجاتهم واخواتي والبيت مليان حصلت اشياء وربي اني انصدمت باخواني ومع ذالك شلتها بقلبي وسكت والكل يحسب اني نسيت وانا لحد الان ببالي اشياء مدري وش موقعها من الاعراب زوجته تقوله شي جا قلبها علينا مره اخوي الصغير توه اولى ابتدائي ما يدري وين ربي حاطه ويهزئون فيه على شي ما ينقال ومن اللي مخترع الموضوع زوجت اخوي ومره انضربوا على روسهم وجابوا سالفه فيني وقبلها باختي الصغيره بس مشت عليها وعلى اخوي مع اني قطيت معهم وتخاصمنا وكالعاده زوجت اخوي نطت لي بسالفه واخربتها مع اخواني وزوجاتهم وما خليت كلمه حق اللي سووه واللي بيسوونه مستقبلا ومن بعدها صارت علاقتي بزوجاتهم رسميه وكل اللي بينا سلام وكيف الحال ولا اي شي ثاني ولنا اللحين تقريبا خمس سنوات من حركاتهم لما كانت امي بالمستشفى لحد اللحين وعلاقتي فيهم ما تغيرت ولا ابيها تتغير ومالي خلق اناظر فيهم حتى ويجون اخواني يسالوني وش السبب وليه ما تعطينهم وجه وقلت لهم ان تعاملي مع الناس محد له شغل فيه وشي يخصني وتصرفاتي معهم بسبب قصصهم اللي يالفونها ومع كل اللي صار بذاك الوقت ما تنبهت ومشيت بثقه عمياء باخواني واولى ثانوي على طول ما اخذت نفس كل شوي شي طالع لي تنومت اختي الصغيره بالمستشفى وبحكم مافي احد يرافق معها فصرت انا واختي اللي بعدي يوم انا ويوم هي واختي اللي الصغيره حالتها زي الزفت ويوم باالتنويم وعشره بالعنايه واخر مره تنومت معها كانت تعباااانه حيل وحتى عيونها كانها مغطاه ببلاستك من داخل وراحت على العنايه وبعدها بيومين توفت الله يرحمها ذيك الاوقات اخيس ايام مرت علي لاني خوافه من هالمواقف ولا احب اشوف احد مريض ومن قوة الخوف صارت نبضات القلب عندي سريعه وتعبت طول اليوم قلبي يدق بسرعه كاني قاعده اركض وما خفت لحد ما رحت المستشفى واعطوني حبوب ودخلت بدايره ثانيه صرت اخاف من الموت وجاني احساس اني راح اموت بشهر 8 وعاد شوف خوف قلق عصيبه عزله حزن خخخخ وحالتي تحزن اللحين اتذكر اضحك لدرجة اني كرهت كل شي ولا ابي اصلي ولا اقرا قران ولا ابي اسمع احد ينصح حتى وجا وعدا الموعد ولا صار شي وبعدها طيرت هالتفكير من راسي ومشت السنتين الباقيه بالثانوي عادي غير الا وقات اللي كانت تتعب فيها امي وتتنوم هي اللي اتعب فيها كثير وخلصت الثانوي ودخلت بموال ساااااااامج اللي هو الزواج وليتني ما اقدمت على هالخطوه من ايام المتوسط انخطبت كثير وما كان همي ولا افكر كل اللي براسي لعب واطلع عن الاوامر وبس واخر شي قدر الله ووافقت مع اني كنت رافضه بالاول واهلي اقنعوني ووافقت وملكت وتم كل شي قلت يالله نشوف كان عندي فضوول ابي اعرف وش كانت تقول اختي لخطيبها لانهم يكلمون من عشره بالليل لصبح واستغرب وش عندهم ذولا حشى والله لو يجمعون سوالف الحاره كلها والاخبار والمسلسلات خلصو وكلمت اول مره وثاني وثالث غباء مافي شي كلام يتكرر ومليت ومع ذالك جاملت من ثاني اسبوع تقريبا بدا يستهبل ويطلع مشاكل من تحت الارض وما امدح نفسي اذا بدا ما ارحمه وكل يوم مشاكل وكل مشكله هو اللي يطلعها اي شي اقوله ليه ووش قصدك ويغلط ويبيني اراضيه وانا مو من طبعي اعتذر لو ايش فاطنشه لحد ما يرضى من نفسه لاني ما غلط وقلت بس ما ابيه من ثاني شهر هبل فيني جاب لي المرض قلت لامي خلاص ما احب اطولها خلاص وهدوني والوضع لازم صبر ومدري ايش ورحت سالت اختي اللحين مالت عليكم طلع الموضوع هواش بس قالت لا واستغربت حركات الاخ الفاضل وصبرت صبرت لحد ما وصلت معي الف وقلت له حل عني اقلب وجهك اذلف ما اطيقك بداية شهر12 ذا لانه مره وقح لدرجة مرسل اخوه يدق على اخوي ويتكلم كلام ماله داعي ومللني وياخذ جوالي ويحفظ برقم صديقتي قدامي يعني قلة ادب وتصرفت حتى الاهبل ما يسويها كرهت ام الزواج وحتى طاريه من الغباء اللي شفته انا ضد الشراكه باي شي وغلط لما قبلت احد يشاركني حياتي والموضوع تعدى الشراكه الا لقافه من الدرجه الاولى قلت له ما ابيك ولا عاد همني ولا عمره فرق معي كنت احسب اني احبه وطلع كل مافي الموضوع مجرد تعود لا اكثر اساسا ما ترك مجال اني احبه او حتى احاول كرهني فيه مشكله ورى مشكله واللي وقفت عاجزه عن فهمه امي اخواني عمامي كانوا عارفين انه بخيل واخلاقه زفت وعايلته بكبرها ما يقدرون البنت ومتى قالوا لي بعد ما قلت ما ابيه طيب اللحين وش ابي برايكم ؟؟؟ اتصور معه واول وصلوه السما من المدح كل اللي افكر فيه تصرفهم ذا بكيت مو عشانه عشانهم عمري ما فكرت بنفسي ولا بكيت عشانها دايم ابكي عليهم حتى لما ادعي ادعي لهم وبعدين نفسي خطيبي تكلم عليهم قلت له اذلف هم زوجاتهم تكلمو وساعدوهم مستعده اعطي بكل مافيني بس ابي شكرا على الاقل حتى صديقاتي اي وحده فيهم عندها مشكله اول من تلجاء له انا ووالله ما اتركها للاخر وانا اذا قلت عندي كذا تصبير ومعد اشوفهم مستحيل احد يعترف في شي انا سويته لدرجة احط كحل بطريقه معينه يقولون مو حلوه واليوم الثاني مسوينها من قدامي يحاولون يحطموني ومن وراي يقولون شخصيتها قويه طيب والهدف تقول تعبان نفسيا ما يهتمون لان بنظرهم دلع مو تعب لازم شي عضوي ولا ما يعد تعب المشكله اولادهم بنفس الطريق تخيل تجي تحضن بنت صغيره كذا ما قصدك شي تتعلق فيك نص ساعه وتروح شوي وترجع مايحنون نفسي اتكلم باعلى صوتي اعطوهم حنان خلاااص عليتونا تعبتونا حرام وربي احزن عليهم نفس الاسلوب ما بيتغيرون والسبب مضحك فاقد الشي لا يعطيه هذا انا حالي حالكم واقدر اعطي اكره كلمت ولد وبنت ما تطلعين هنا انتي بنت لا تسوين انتي بنت مو من حقك بنت لا تغلطين مردك لهم انتي بنت وووووو مليت من هالاسطوانه وش يعني بنت ما تقدر تسوي شي عشانها بنت حتى امي اذا قلنا شي واقعي سووه اخواني تزعل وهم يسبونا سب وعادي احنا لا نسب حتى زوجاتهم وهم يغلطون يعني لنا الحق وهم يمسحون بازواج اخواتي وعادي احس اني بنطق بنت بنت اوف ما احب احد يربطني وياااااالبى ابوي مايقول انتي بنت ولافي شي مستحيل عنده اخواني الله يصلحهم يصعبون كل شي ما عمري قلت شي وقالوا سهل وخلاص لازم مليون الف عله لا للغلط اللي ما يغلط ويجرب كيف يتعلم ويحس ان هالشي غلط هذا كل شي عندي وببالي ممكن اللي يقرا يقول عادي والموضوع تافه لكن اللي يعيشه صعب وحتى اوقات مافي مخرج لان صعب اغير اللي حولي حتى لو تغيرت انا |
اهلين نواره منوره الحته
اي صح لا انسى العله خطيبي يماطل ما طلق مشكله الا مصيبه اللي ما عنده كرامه وما يرد نفسي اقابله لشي واحد بس امنيه اعطيه كف وخلاص |
اوقات كثييييير اتمنى موقف قوي
عشان اصرخ باعلى صوت وتكلم بكل اللي صار وكل اللي يقهرني وبالذات هالفتره عندي طاقه مالها حد ابي اطلعها ما ادري كيف اوصل احساسي ابي اسب واشتم ما ادري ليه وبالذات زوجات اخواني باي طريقه ابي دقه وانا اكمل واوقات ابيها على اخواني لكن اذا وصلت لحدي اقول حرام اخوي وما يستاهل ولو انا ما خلو شي واحاول ما اجرح بالكلام يااااااالله عجزززت اعبر عن الحاله اللي انا فيه بالمختصر ابي اصفق احد واسبه واشتمه ويكون يستاهل تجنبا لتانيب الضمير طاااقة حقد مكبوته من زمان ولو لمسه بتنفجر |
ابنتي الكريمة فجريها برسائل في قسم النقاهة التابع للعيادة الخاصة بي (رسائل لمن تكره ولا تخلين شي انفجري بكل طاقتك هناك. ونتابع.
|
امممممم
كتبت كتبت بعدين وقفت لاني حسيت اني جبانه اسب هنا وقدامهم افضل الصمت لكن بانتظر واكيد بيجي يوم وبموقف مناسب الغالين بعاتبهم مع اني ما اتوقع اقدر وكله بسبب دموعي واما الباقين فما عندي ادنى مشكله معهم وعادي بلعكس باخذ راااحتي فيهم وبكذا ارتاح قدام نفسي قبل كل شي اما كذا ما ينفع ولا راح اقتنع لاني بعتبر نفسي جبااااااانهـ وعشان لا اصير كذا افضل انطم لين يجي وقت حلو بالاضافه احس اني غلط لما فضفضت من الاساس صح ارتحت شويات لكن في شي غلط مو عارفه وشو !!!!!!! |
مع بداية السنه الجديده
بجمع كل شي حلو وباخليه من صفاتي لكن بمنظوري الخاص مثلا باكون طيبه لكن ما احد يستغلني ويلعب علي وبغير عنادي وبدل ما اعاند اللي حولي ونفسي بعاند لحد ما اوصل لطموحي واللي ابي باترك السب اذا انقهرت من احد لانها تدل على اني جبانه وضعف شخصيتي وقلة حيله وان ما نطقت بها بوجه ما اذمه بظهره مافيه كسل وتسويف لانها تضيع العمر وانا محلي ما باغير شي انا مقتنعه به مهما كانت الظرووف لاني جربت وغيرتها وطلعت انا الصح وندمت على تغييرها كنت اقول لا للاعتذار مهما كان وحصل واعتذرت وللاسف الشديد اكتشفت ما فيه احد يسوى اعتذر له عشان كذا ما بعتذر من احد حتى لو غلط لان الناس يغلطون باي شي وما يعتذرون وكنت متمسكه بان السر ما يخرج من شخص واحد مهما كان وحصل وغيرت وقلت سر لشخص قريب وما حفظه وجربت مره ثانيه لغيره وبعد ما حفظ واللحين برجع ولا راح اتنازل وسابقا اقول لا للشراكه باتفه شي لانها تجيب المشاكل ووجع الراس وكمان تركت قناعتي العزيزه ووافقت اشرك احد بحياتي وتنازلت عن اشياء متمسكه بها بكل مافيني وكماان رجعت وما باتركها وكنت اقول بعامل الناس زي ما يعاملوني وغييييرتها وعاملت زي ما احب يعاملوني وكمان ما استفدت وما بين وبرجع كما كنت وفيه اشياء عكس كنت اشوفها صح ومقتنعه فيها وطلعت غلط قبل اهلي واقاربي صادقين واعتز بهم وهم كل شي اللحين لا اذا بصدق بصدق نفسي واذا باعتز باعتز بنفسي الصداقه كل شي بعد الاهل واحترام ومراعاه اللحين ما عاد ابي اراعي الا اللي يراعيني والباقي بحريقه وش علي هذا تفكيرهم وانا بعاملهم بنفس الشي امشي الاغلاط على اساس كل واحد وتفكيره وشخصيته ومستوى قدرته على التعبير وارقع لهم وحاليا لا والله لو انه اهبل ما امشيها له بغلط وباصحح لنفسي وانسى وباتذكر ان شاء الله لحد ما اوصل للي يرضيني ويريحني ويمسك اللي حولي حدودهم حتى لو اسوي عكس اللي تعودت عليه وبس هذا نظامي الجديد لهالسنه واللي استفدته من اغلاطي بالسنه اللي طافت وتجربتي وكل سنه وانت طيب |
احترت باللي سويته صح ولا غلط
اعتذرت وسامحتها سامحتها بعد شهر من محاولاتها بالبدايه حسيت اني انتصرت لانها هي اللي رجعت تعتذر كنت ناويه ما اسامح ولا ترجع صداقتنا مسحت رقمها وبدون فايده ظلت ترسل وطلعت لي بالواتس اب وارسلت وما رديت ولا همني قالت لي كلمه وحده ورديت قالت لي بندري ليه ما تردين لهالدرجه كارهتني!! حزنت وتذكرت لعبنا وحركاتنا وافكارنا وكل شي ورديت عليها بس ما قدرت اخذ واعطي معها لاني حسيت ان بيني وبينها حاجز غلط ولا ما غلط قلبي يقول لا اللي سويتيه صح وكرامتي تقول غلط مابي اسامح بسرعه احس اني هبلا وينضحك علي بكلمه واكلت من هالحركه مواقف بالهبل كل شوي اسامح ويطلع اللي سامحته ما يستاهل اوف من قلبي بلشه دايم يتحشر باوقات غلط |
والدي رجل الرجال
اناااااااااا خااايفه ومرتبكه وممغوصه وكل شي عندي موعد مع الشيخ يوم السبت علشان الخلع واهلي فوق هذا جننوني كل واحد يقول قولي كذا وقولي كذا وانا ما ابي احد يعلمني وش اقول لان الاسباب اللي اعطوني اياها غبيه ومالها داعي وانا براسي كلام ثاااني واذا قلت بقول الكلام ذا قالوا لا وفكرت اقولهم طيب بقول اللي قلتوه واذا وصلت بقول اللي ابي لكن المشكله اني اخاف ابلم عند الشيخ وما اعرف اتكلم لانهم فجعووووووووني منه او اذا حاول يصلح بينا ادربي راسي واقول خلاااص طيب وش اسوووووووي اربع وعشرين ساعه افكر بيوم السبت خلاص مخي ضرب |
ابنتي الكريمة :
أولاً بعد إخباري بالمستجدات لا تدربين راسك ولا شي الشيخ عبارة عن رجل مسلم هاديء صامت يستمع إليك وواجبه أن ينصفك وتحتاجين فقط للهدوء والتدرب على الحديث أمام المرآة ورتبي أفكارك وكوني هادئة وليس المهم الوقوف أمام الشيخ بل المهم النتائج وسيمهلك الشيخ حتى تسمعي وإذا لم تسمعي قولي يا شيخ ما سمعت ما فهمت وسيسألك هل توافقين على هذا هنا (طلعي اللي بقلبك ). أسأل الله لك الخيرة من أمرك ولا تهتمين برأي أحد يلقى النصيحة وينام وهو لا يدرك أبعاد نصيحته أصنعي قرارك بنفسك بما يحفظك غلا إذا كان من ينصحك مدرك وواعي لنتائج ما يقول . |
لا الحمد الله عدت على خير
وطلع الشيخ مو موجود واعطوني موعد بعد الاختبارات وبحاول اكون هاديه واني اتبع كلام احد المؤمن لا يلدغ من جحر مرتين كفاااايه المره اللي طافت دعوووواتك اطلع من الحاله اللي انا فيها واهلي يسوون اللي اقوله وما يعاندون |
| الساعة الآن 02:55 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©