|
تعالو شوفوا وش سوت الخطابه
السلام عليكم ورحمة الله
بدخل بالموضوع على طول انا بنوته عمري 28 سنه واوضاعي كلها حلوه من ناحية الوظيفه والدوام وكمان اهلي اوضاعهم الماديه ماعليها وشكلي الحمدلله مقبول انخطب كثير بس مافيه توفيق ونصيب الرفض دائما يكون مننا، بس حسيت اني وصلت لمرحله لازم اتزوج (( محد بيفهمني الا اللي وصلت لنفس عمري وماتزوجت)) ارسلت مسج لخطابه اني كذا وكذا قالت ارسلي مواصفاتك،، ارسلت لها وبعد دقيقتين ارسلت لي مسج فيه مواصفات شخص وكلمتني بالجوال تقول لي عنه،،، وقلت لها لا تدري امي انه عن طريقي وانا مكلمتك قالت اوكيه ،،بقول من اهل الخير دلونا وجداااااااا عجبني،،، قلت اكيد ربي بيعوضني،، بعدين اتصلت ام الرجال على امي وبعدها ب3 ايام جت شافتني وماتتصورون قد ايش جلست تمدح وطولت مره عندنا وجلست تسال وايش شروطكم وانشا الله بيجي يشوف بنتك ماكانت مضطره تطول لان سيارتها عند الباب بس جلست فوق ساعتين ( اعطتنا ايحا انها موافقه وتبينا) كللمتني الخطابه وقالت شرط انك تدفعين لي الف قبل و4 الاف بعدين وهم يمدحووونك مره وعاجبتهم،،،،،، قلت ابشري وحولت لها المبلغ على طول طولوووو ماردو علينا رجعت كلمت الخطابه قالت مشغولين جلست اسبوعين كل ماادق عليها تجيب عذر مره مشغولين بالحج ومره ابوهم تعبان لهم شهر الان ارسلت لها مسج امس قلت : كنسلي الناس ماابيهم ،،، لو يبونا كان ردو على طول او احترمونا يا ايه يا لا بس يكلمون وانتي كان هدفك بس فلوس وانا مستحيل اسحب عليك بعطيك حقك ماله داعي تقولين انهم قالو لك انهم بيجون قالت اوكيه بكنسلهم،،،، وبسسسسسس ووووووش رايكم بالله؟؟؟؟؟؟؟ من امس وانا ابكي مقهوره لانها عشمتني يمكن قالوا لها مانبيهم بس هي ماوصلت الكلام ،، تبي فلوسها الله اعلم |
طيب خلي امك تكلم ام الرجال ع قولتك
|
هذه المرأه عميله عندها
ترسلها على اساس انها جايه تخطب لابنها وتمدح في العروس ومن ثم طلبت ثاني يوم الالف ولم تطلب اكثر حتى لا تنكشف الاعيبها واكيد عاملتها في غيرك كتير ومن ثم ليه البكا وانتي عندك رب العباد سبحانه وتعالى |
حبيبتي اللي صار صار والحمدلله على كل حال
مايندرا هل هو اتفاق او فعلاً الناس هونو عموماً الواحد يتعلم من اخطأة وربي هو الرازق بيرزقك بدون خطابة تذكري ان رزقك محد بياخذة غيرك وبيجيك لبيتك الله يرزقك الرجل الصالح اللي يعوضك ويسعدك * |
حسبنا الله ونعم الوكيل
|
اقتباس:
شكرا،، بحاول اقول لها استحي من امي مره خاصه بهالموضوع |
اقتباس:
شكرا عزيزتي مااعتقدددد في احد ممكن يسوي هالاشيا عشان الف |
يبدوو انها تكذب ...
يعني عملية نصب .. الله يعوض عليك ..!ولا تعطيها باقي المبلغ يكفي الألف ...! |
اتفق مع الاخت جرين
احتمال تكون الخطابة متفقة مع وحدة على انها ام الشاب عشان يسحبوا فلوسك ؟ |
اقتباس:
الخطابه سبب وانا بدور خطابه ثانيه بس بدفع لها بعد ما يتم الموضوع شكرا لدعواتك |
اقتباس:
|
اقتباس:
شكرا لك عزيزتي بنت مكه |
أختي أنتي حاطه أملك في خطابه
خليها عنك وياكثر الحقيرين إلي يستغلون ظروف خلق الله وحاجتهم الله يرزقك بالزوج الصالح عاجلا غير اجل الله يوفقك أختي أتركي عنك الخطابات ووكلي أمرك لربك وهو كفيل برزق خلقه |
:* وحدة من زميلاتنا تزوج خالها عن طريق خطابة واثناء حديثي معها لأني كنت سابقاً ما أثق في حكاية الخطابات وأحذر البنات في المنتدى منهم فالموضوع أثار فضولي وحبيت أشوف الجانب المشرق فيه فقالت لي :أن خالها كلم الخطابة وإلي نصحه فيها زميل له بعمله متزوج من خلالها من بنت ناس محترمين وكانت تتفق معهم ما تأخذ ولاريال حتى يتم الموضوع وتبغين الصراحة زميلتي تمدح في العروس وللعلم خالها مطلق وتزوج الآن ومرتاح جداً ويدعي للخطابة وحتى على كلامهم أعطاها فوق حقها مكافأة لها على أمانتها معهم :* بس أنتِ أسألي زين ولا تروحي لأي وحدة دوري وحدة فعلاً مشهود لها وثقة وسبق وجمعت رأسين بالحلال وماغشتهم ببعض أو كذبت عليهم وهذي إلي أنتِ كلمتيها واضح أنها نصابة وشكلهم عصابة متفقين مع بعض مثل ماقالوا لكَ الأخوات ثاني مرة لاتتفاهمو مع الحريم خلي الرجال يجي مع أمه وتتم النظرة الشرعية وكل أموركم بالسليم وأسأل الله أن ييسر لك ولكل فتاة متأخرة الزوج الصالح إلي يخاف الله فيكم :* |
حبيتي الخطابات نصابات وانا اكبر منك ومافكرت فيهم ادعي ربك يغنيك عنهم النصيب عندة وبس وعلي فرض تزوجتي الرجال مابتسلمين من الاهانات والمعاير انك دورتيه
|
جلست اتصل عليها وارسلت لها مسجات
قلت لها ياليت تردين تفهميني وش الموضوع لانك قبل تاخذين الفلوس كنتي تردين علينا رجعت اتصلت علي قالت انا منومه مع بنتي بالمستشفى وام الرجال تقول عندهم ظرف،، يومين ويتصلون علينا وقالت عطيني رقم حسابك احول لك فلوسك واذا هالناس مابغوك فيه غيره الف اجيبه لك يارب سامحني ،، الله يغفر لها ويسامحها انا متسرعه مره بنتظر هالاسبوعين ،، اشوف وش بيحصل |
اقتباس:
ليه يختي مافكرتي فيهم؟؟؟؟؟ مو حرام ان الوحده تكلم الخطابه،، عادي... انتي يا بتتزوجين عن طريق خطابه والا حرمه بتشوفك فالزواج وتقول هذي تنفع لولدي،،، كله واحد والتوفيق من الله ،،، واذا خايفه يعايرك،،، اتفقي معها ان كانها هي اللي شافتك بزواج الخطابات صايرين يسيرون ع الزواجات انا قاريه محاضره لشيخ ،،يقول الزواج من الرزق اللي الواحد يسعى له،،،، انا عيال عمي وعيال خالتي يتمنون وحده فينا بس مستحيل اهلي يزوجون اقارب،،، وما اروح زواجات انتظر عريس يجيني بالصدفه؟؟؟؟؟؟ |
اختي قولي خلاص انا اريد فلوووسي وإذا ماوافقت قولي والله راح ادعي عليك واشتكي لرب العباد لو مااعطتيني اول قولي لها بالذووق إذا مب راضية هدديها بأنك راح تدعين عليها اوتصرفها على صحتها
ولاتتعاملي معها والله اعلم لا يكون الخطابة هي ام الولد بس الله لايهنييها بالفلوس لو كانت عميلتها او هي وتكذب ارسلي رسالة قووولي خلاص اريد فلوسي وانتي جزاك الله خير ويشفي بنتك صارت لي امور وكلمي خطابة اخرى ثقة ابدا ابدا لاتدفعي مقدم لأي نصابة اقصد خطابة يندر الأمينات فكري بالعقل وحدة طااااايرة مرة وبعدين تختفي هذا كمين والله اعلم اذا لا وين رقم ام الولد حسبي الله عليهم هذا اللي ناقصنا |
اقتباس:
أيه حبيبتي فيه ؟!! الف منك وألف من عشرين غيرك ماتستاهل :(! حسبي الله ونعم الوكيل فيهم أن كانون يستغلون ظروف الناس لحسابهم على العموم بعد مكالمتك لها أنتظري وتأكدي من أمانة هالخطابه الله يرزقك بالزوج الصالح اللي يسعدك وكل اللي على بالي ياااارب ياكريم |
اقتباس:
مدري ليه صدقتها وبنتظر لين تتصل يمكن عندهم ظرف بصراحه العريس عاجبني مره،، الله يرزقني يارب ويكتب لي الخير وكل البنوتات |
مب هامتك الف انا اضيع الووف الله يسامحني لكن مو وحدة تنصب علي وعلى غيري
لكن لاتنسين انتي تكونين ساعدتيها على ظلم كثير من البنات من غير قصد لابد ترتدع لو تخاف من دعوة عشان ماتظلم احد شوفي موضوع الفردوس غايتي عن الخطابات شوفي وش قالت الفردوس غايتي عشان تعرفين نصب الخطابات الله يهدي المسلمين لا لازم تتوقف عند حدها لو ماتوقفت ساعدناها على الظلم وكل مرة تقول وش يسون ماحد قال شيء |
http://www.66n.com/forums/showthread.php?t=229736
انا اقول ليه صدقتيها : الانسان الصادق واللذي لايعرف غش يتوقع الكل مثله لكن للاسف نقع مثل هؤلاء لذلك انتي قولي وراح تظهر حقيقتها وافتكري المؤمن القوي احب من الضعيف لله واطلبي من الله ان يرزقك رشدك نحن اللي على نياتنا نعاني لكن بإذن الله ينصرنا ربي |
حبابه
ليش بس العجله ناس كثير يجون يشوفون و يجلسون بالشهور .. ثم يرجعون و تتم الأمور . يعني لو أنتظرتي ما تخسرين شيء .. ماتدرين عن ظروف الناس هذا من باب إحسان النية بالخطابه .. وإن شاء الله نحتفل فيك عن قرررريب : ) |
ممممم حقيقة ..؟! آنا ضد فكرة " الخطآبة " هذا من نآحية .. من نآحية ثآنية .. 28 عآم .. بالنسبة لي مآ وصلتي لـ مرحلة العنوسة و اليأس .. توكلي على الله .. وأستغفري بنيّة الزوج الصآلح .. وعسى ربي يرزقج و يفرح قلبج يآرب .. |
الخطابات ماأعرف عنهم شي ,,,, لكن هناك مكاتب رسميه جمعيات خيريه لمساعدة الشباب على الزواج فيها قسم خاصه للتوفيق بين الزوجين من رجل او امراءه ,,, موجوده في جميع المناطق ولهم قسم نساء تعمل فيه نساء والبنت تقريبا مايحتاج تذهب تتصل فقط تسجل معلوماتها في قسم النساء لهم تلفون خاص ومن اشهرها جمعية ابن باز لمساعدة الشباب على الزواج ولهم موقع في النت ,,, وقوقل بيطلع لك كل شي مجرد مايسجل الشخص في قوقل الجمعيات الخيريه لمساعدة الشباب على الزواج بيحصل ارقامها ومواقعها في جميع المناطق ولو ان المنتدى يسمح باسجل كل الجمعيات بس قوقل ان شاء الله يكفي
أتمنى لك ولي ولجميع الشباب والفتيات التوفيق والستر والعفاف ,,,,, |
اقتباس:
ايه ممكن الف منك والف من غيرك والف على الف تصير مئات الالوف لاتنسين ان المبلغ اذا صار قليل نسبياً يصبح اقرب للمصداقية , واسهل بالدفع يعني هي الربحانة والدليل , انتي صدقتي , والى الان تعتقدين بصدقها شيء اخر ما استغربتي ملابسات الخطبة سرعة الحصول على العريس جودة مواصفاته , اعجاب امه السريع بك . مدحها لكم ؟؟؟؟؟ |
علي فكره انا استخرت مرتين لما جو الناس شافوني
كنت استخير ووانام،،، والله اني اشوف احلام تخوف يا كلب على شكل ذيب يهجم علي كل مره احلم حلم يخوف وكنت مابي اربط الاحلام بالزواج،،،، عشان بس اتزوج بس سبحان الله خيره اليوم ارسلت لي مسج فيها مواصفات عريس ثاني،،،، ليه ترسل مسج وماردت علي عن الناس الاوليين؟؟؟؟؟؟ بس عمره 39 ارسلت لها مسج،، ((ماابيه كبير،،، بالنسبه للناس الاولين وش كان سبب رفضهم لنا))؟؟ وماردت الي الان بصراحه،،، بعد هذاك اللي خطبني عن طريقها،، معد صار يعجبني احد |
اقتباس:
بس انا مليت وابي اتزوج وحسيت الالف مو شي بمقابل اني بتزوج |
من خلال كلامك أستشعر إنها لعبة متفقة فيما بينهم
وعشان ترقع اللي صار واتصالك لها دورت لك عريس ثاني؟؟؟ ليه وين العريس الأول ولاطار وإذا مايبيك على أي اساس لاشفتيه ولاشافك نصيحة مني طالبي بالفلوس ولاتصدقيها هي استعطفتك بكلامها إنها بالمستشفى مع بنتها بشكل عام ومن كثر أسمع عن الخطابات ماأثق فيهم لإنه همهم مصلحتهم وبس وقللللللللللة اللي همها توفق راسين بالحلال |
اقتباس:
المهم اني ابي استمر معها،،،لين اعرف وش حكايتها،، |
بس فيه حال اكتشتفتي لعبتها استرجعي فلوسك لإنه غيرها أحق فيها
|
اقتباس:
تتوقعين لو اكتشفت لعبتها،،، بترجع فلوسي؟؟؟؟؟؟؟ هي تكلم من اسم مبهم ومن شريحه مبهمه تعرف بيتنا وارقام جوالاتنا واهلنا،،،، التطنيش هو الاسلم |
اذا الرجال عاجبك وانت بايعتها بايعتها وفي نفس الوقت تبين تتأكدين من صدق الخطابه
خذي رقم ام الولد واتصلي عليها على انك ( أمك او خالتك تسئل عن الموضوع ) هذا اذا عطتك رقمها ؟؟؟؟؟؟؟؟؟ طبعا هي ماراح تفرق اذا كان المتصل البنت نفسها او امها ؟؟؟؟ انا كنت اسويها كثير اتصل على الخطابات واخطب لنفسي واخواتي واقول لهم اني ام البنات وأرد على ام الخاطب اذا اتصلت واخذ من راسها واحيان اكلم ام الرجال بنفس الطريقه واخذ من روسهم ؟؟؟ وفيه طريقه ثانيه اسئلي عن المستشفى الي منومه فيها البنت من باب انك بتزورينها وتأكدي من صدقها بس قبل كذا قولي لها توك منومه مع بنتك اذا قالت نعم قولي وش اسم المستشفى واذا سبقتي بزياره قالت طلعنا ؟؟؟؟ والله اعلم عن خفايا النفوس |
اقتباس:
حسيت انك انسانه ايجابيه جدا ومندفعه جدا الخطابه رجعت كلمتني قالت الناس مازالوا يبونكم...... طيب ليه طولوا ماردوووو وش هالاستهتار؟؟؟؟؟؟ وبعدين انا استخرت وحلمت احلام مزعجعه ولما فسرتها طلعت ان العريس اخلاقه سيئه( الله اعلم) وجابت لي ناس ثانين قالت لو ماتبين تنتظرينهم يارب تغنيني بحلالك عن حرامك بس مااعجبني احد :24: |
يااختي اللي جتكم لا ام عريس ولا شي هذي ممثلة جايه تمثل عليكم
بس فيه خطابه ثقة وطيبة اسمها ام ماجد في منتدى فراشة حواء انصحك تعاملين معها |
ههه
ذكرتيني قبل فترة قرأت مداخلة للأخ ليش كذا .. عن موقع العفاف .. قلت وش رأيك يابنت نسجل :d أذكر إني سجلت صباح يوم الجمعة :22: بعد ما تم تفعيلي .. مباشرة أنهالت الطلبات .. لا أخفيك حسيت بأني "خروف":d قلت لا بوكم لا بو العرس .. وما أذن العشاء إلا وأنا حاذفة عضويتي :d بعدها أقنعت نفسي بأنني سأظل عازبة .. لدرجة سألت وحدة قلت لو أتوفى وأنا عازبة أتزوج بالجنة حوري وإلا من رجل الأرض .. قالت تأخذين رجل عازب من أهل الأرض .. قلت بنفسي والله ما أخذهم ... زعله عليهم وينهم يوم كنا بالدنيا :d بعيدا عن التنكيت / أختي الفاضلة صحيح أن هناك تجارب ناجحة .. سواء في الزواج من خلال الإنترنت أو الخطابة لكنها نادرة جدا .. لذلك المجازفة في مثل هذه المواضيع خطرة وتحتاج حكمة في التعامل معها. |
حسبي نعم الوكيل على كل خطابه همها الفلوس
وبعدها تترك البنت تتعذب يا أختي اللي فات مات المفروض سألتي عن الخطابه لأن فيه خطابات هدفهم الفلوس صدقيني وربي هدفهم الفلوس خطابه قالت لي بجيب لك شاب ب4000 قلت جيبيه وأعطيك الفلوس طبعا ماعندها علم غاليتي لك ولي ولكل بنت متأخره في الزواج الخطابه ماعندها شي الرزق عند الله سبحانه يرزق من يشاء بغير حساب |
انا ما اامن للخطابه لانها ممكن تكوووون استغلاليه وتبي تاخذ فلوس بس
الله يرزقك حبيبتي ويوفقك بابن الحلال عاجلا غيييير اجل ياااارب |
يآحليلك.. ويآلبى آنتي.. آلحرمه نصبت عليكِ وخذت فلوسك .. وصلى الله وبآركِ حبيبتي من غير مآتسآلينآ الشغله وآضحه وضوح آلشمس.. (( نصب وآحتيآآال علني)) آلله يعوضكِ ويرزقك بزوج يجي لحد عندك.. ويعوضك عن فلوسك الي خذتهآ لحرمة بدون وجه .. آنآ الي اعرفه انا الخطآبآت يآخذوآ الفلوس بعد { عقد القرآن} بس هذي وآضح آنهآ نصآبه.. الله يسآمحهآ ويهديهآ عن الطريق الي هي مآشيه فيه بس آتمنى منك شي وآحد آنك تسسآمحيهآ لآن (( من يعفو وَ يصفح يحبه الله)) < الله يرزقنآ محبة الله سبحآنه وتعالى: ودي لكِ ولشخصــك ِ :: // تحيآآآإإتي.. |
اقتباس:
الله يسامحها ويرزقني ويرزق كل البنات |
| الساعة الآن 12:01 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©