|
خطيبتي تسكر الخط بوجهي بدون سلام ولا كلام ..ماذا افعل ؟؟
السلام عليكم
شباب افيدوني ماذا افعل انا الان مملك ولي تقريبا 5 شهور وانا كل يوم اتكلم مع زوجتي بالتلفون ومسجات وسمن على عسل المهم اليوم كنت اتكلم معها وكانت بتروح السوق وشوي تقولي ابوي طلع وتسكر بوجهي بدون سلام ولا كلام :( وارسلت لها رساله بي انه عيب تسوي كذا ... البنت على نياتها والله وحبوبه ماشالله عليها ..ونا احبها وربي ارسلت لي انا اسفه ما كنت اقصد ,,, الى الخ... رديت عليها حصل خير ... ما زعلت ومن ها الكلام ... بس وربي حزت بنفسي وارسلت تتاسف واتصلت بس انا ما رديت ... بس قويه تسكر الخط وربي اول مره تصير لي يمكن وما اتوقعت انها يصيير منها ... افيدوني ويش اسوي يا اهل الخبره ~~؟؟؟ اقلل مكالمات ,,, او معد ادق عليها ,, رغم اني ما ازورها الي بالشهر مره يمكن بس المكالمات شوي كثير بي انتضاركم |
طيب ايش سبب التقفيل ؟
هل احد دخل عليها فجأه ؟ ولا طفيت بطاريه جوالها ،ث؟ ولا كيذاا من غير سبب مسستحيل اسمحلي لكن قلة ذوق منها اذا نن غير سبب |
لا كذا اتوقع بس كانت مستعجله والبنت على نياتها
وبعدين اعتذرت وقلت لها حصل خير ما زعلت ونا والله حزت بنفسي وقدمت اعتذار شديد والله واتصلت ما رديت وش افعل في ها الموقف |
يأخي لاتكووون حساااس حيييل والبنت عند اهلهاا واكيد تأخرت عليهم
بسبب انشغالهااا معك بمكالمة وضع نفسك مكانهااا لو انك قفلت عليهاا بسبب استعجالك واعتذرت لهاا واتصلت وماردت عليك وش بتقووول اكيد بتقوول ماصدقت بالزلة عليك ولازم انهااا تقدرك اكيد انت نفس الشي وع العموووم ماهلكنااا الا الحسااسية الزايدة لاني حتى انااا والله اعاني منهاا بس احاول اهدي منهاا واضع نفسي مكانه واتغااضى حتى لا اعقد الأموور وللعلم بعض النااس تخطيء وهي ماتقصد مثل خطيبي يقوول شي او يتصرف بشي وهو اماا يقصد شي ثاني او سوء تعبير منه وموووفقين وعيشووا حيااتكم بدوون ثقل زاايد او تطنيش وخير الامور اوسطهاا |
أخطأت عليك واعتذرت بشده
إقبل عذرها أخي الفاضل , ولا تحرم نفسك منها , ولا تحرمها منك . |
اكيد خافت من الوالد
يا اخي هي اعتذرت وانت لازم تتجنب تصعيد ا المشاكل وإختار الوقت المناسب وناقشها باللي حصل |
لاا يااخي لا تصير تدقق بكل شي
البنت شافت ابوها و ارتبكت و قفلت مو بقصد ترى الاب له هيبة تسبقه :) و اخص موقف للمملكات اذا شافها ابوها تتكلم .. احررررراااااااااج :) البنت اعتذرت بشدة. خلاص لا تسويها مشكلة ربي يوفقكم و يحميكم لبعض |
أخي الكريم، البنت لم تقصد ماعملته، وهي أعتذرت منك، انتهى الأمر، لاتفتح باب للشيطان، أسأل الله لكما التوفيق .
|
الحين وغلطها عفوي ومعتذرة عنه ! وتبي تقلل مكالمات
وتقطع فيها اجل لو كان غلطها ردة فعل ولا مااعتذرت وش بتسوي !!!! |
من الربكة قفلت بدون شعور عادي يااخي خذ الامور ببساطه ولاتهتهم بشئ عفوي حصل منها الله يهديك
|
نحن نعصي الله في اليووم مرات ومرات ومرات
وبالسنة والسنتين وبل منهم من يبقى غارقاً بالمعاصي سنوات طوال ويعفوا الله عنه حين يطلب العفو والتوبة ونحن ! ألا نعفو ونصفح! اخي ماادارك ممكن خطيبتك كانت في ظرف مؤلم ولا تريدك ان تسمع ماحولها فاغلقته دون قصد ماحدا بيعرف اخي اسرار البيوت التمس لاخيك عذرا فان لم تجده فاوجده انت اخي اياك ان تسيئ الظن بها ...التمس الاعذار للآخريين افرض انا مثلا بالبيت وصديقتى اتصلت علي وصار لاقدر الله بالبيت مشكلة كبيرة وصوت عالى وكده امور مابدي حدا يسمعها او انه شي فجاة ضايقني فاضرررت لاغلاق الهاتف اقبل عذرها ..انت حر قلل او اكثر من المكالمات لكن لاتدع في قلبك تجاهها شي يا أخي .... ولا تفكر وتظن الظنون بها حفظكم الله وجمع بينكم على خير يارب |
رحمتها الضعيفة !!!!!!!!!!!!!
الله لا يطيحني في واحد مثلك ... يا أستاذ ... تلاقيها تعاملت معاك مثل صاحباتها .. ورفعت سقف الميانة ... وأعتذرت .. خلاص .. اصفح عنها وعيشوا حياتكم ... |
- ي اخوي لا تدقق ! أسمع مني بعض البنات بفتره الملكه ولبدايه الزواج مو مستوعبه قدسيه الرجل لديها فتصير شغلات مثل كذا هذا هو الموضوع لا تكبره فيكبر وتبدآ مشاكلك . واعتذرت بعد والله ي فيه رجال ونساء تدور العذر وما تلاقيه احمد ربك والله يونس قلوبكم . |
اقتباس:
بالتوفيق |
عااادي. والله. احمد ربك ع الاقل خطيبتك يعني بنت
انا اعرف وحده زوجها يستحي من اهله لدرجة انه اذا جا احد من اهله قفل بوجهها خخخخخخخ مسكينه راضيه ومتحمله اتحمل هذي بنت تستحي. واحمد ربك فيها حيااء الله. يسعدكم يااارب . |
فكرتني بنفسي، كان زوجي بفترة الملكة.. يدق علي مرات
و اعطيه مشغول ( و هذه الحركة تعودوها مني اخواني و زميلاتي ) اعطيهم مشغول، يعني مابغي اخسرهم او اني بمحاضرة او مشغولة و اني شفت اتصالكم خلاص و بأتصل بعد شوي بس زوجي كان يزعل و انا مادري و يحسبني اقفل الخط بوجهه و انا على نياتي، و لحد مابيوم صارحني و اتاريه زعلان من الحركة و قلتله و الله ماقصد، و شرحت له الحكاية و قام قالي.. لا لا تعطيني مشغول حتى لو مشغولة ردي علي .. و ابشرك ياخوي :D هو دحين صار يعمل الحركة هذه معاي، يعني يعطيني مشغول و اعرف انه شاف اتصالي و بيتصل دحين و نفس الشي اللي صار لكم، صارت معنا.. كنت اقفل الخط بدون قصد بس مادري انها تزعله و كنت متعودتها مع زميلاتي و ماعرف انه فيه فرق بين زميلتي و زوجي ^^ بس كلمني زوجي و تعلمت من وقتها ^^ و خطيبتك نفس الشي، ماتقصد التقليل من شأنك |
الاعضاء ما قصروا
يا اخي اعتذرت واتصلت تبي تعتذر يعني معترفة بخطأها ما في داعي تكبر القصة ما في أحلى من التسماح فهو يسمو بالنفس عاليا موفق |
اقتباس:
بس بدل التسماح حط التسامح |
انا احس اني مثلك
اكثر شي اكره في الحياه انو احد يسكر بوجهي انا صارت عندي بالعكس كنت اكلم زوجي فموضوع وتضايق وقال باي بسرعه وسكر عصبت بقوه وسكتت لين التقينا ووقتها كلمته بهدوء وقلتله انو هالحركة ما احبها لانها تقلل من احترامه لي واهم حاجة فالزواج الاحترام المتبادل الحمدلله من بعد ما فهمته انو ما احب هالحركة صار حتى لو انقطع الاتصال بسبب الشبكة يرجع ع طووول يتصل ويقول ترا الشبكة اللي سكرت مو انا d: اهم شي فحكايتك انو فهمت خطيبتك ان هالحركه ما تحبها وان شاء الله ما بتعيدها خصوصا انك متاكد انها صارت بشك عفوي واعتذرت بعدها الله يسعدكم يارب |
الله يسعد قلوبكم جميعا
والله يا شباب ,,, اني يوم شفت ردودكم على طول اتصلت ونا بنفسي اعتذرت والحمد لله على كل حال ,,, مشكورين جميعا والله يسعدكم ويهنيكم ^_^ |
| الساعة الآن 03:44 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©