|
وظيفة زوجة اخي
السلام عليكم
اخي اتصل فيني امس بحكم اني اخوه الكبير يسأل عن واجبات الزوجة الموظفة ؟؟ هي توظفت حديثا راتبها لا باس فيه وفوق المتوسط 9500 ريال انا قلت له عطني وقت وبارد عليك بصراحة خفت اعطيه راي يكون سبب للشقاق بينه وبين زوجته انتم ياموظفات ومتزوجات ماهي الامور التي تساعدون بها الزوج ؟ راتب الخادمة مثلا؟؟؟ ملابس الاطفال ؟؟؟ ووو اعطوني رايكم وانيرو بصيرتي وبصيرة اخي الغالي والله الموفق |
طبعاً يا أخي الكريم جميع الواجبات التي يقوم فيها هو الزوج من ناحية مصاريفها و مصاريف البيت لا يحق أن يأخذ من راتبها شي لكن من ناحية راتب الخادمة فهي تقوم فيه مثلاٌ وإذا كان حالة الزوج المادية صعبة لا أظن أن يكون هناك مشكلة في أن يساعدو بعض في مصاريف الحياة لكن حاول أن تنبه آخاك بأن راتبها لها ولا ينظر فيه نهائياً تعتبر هذه وجهة نظر وإن شاء الله الأخوان و الأخوات ما يقصرو بردودهم والله يوفقهم بحياتهم يارب ,,,,,,,
|
السلام عليكم ورحمة الله تعالى وبركاته
أخي الفاضل لايأخذ منها شيئاً نهائياً بل يعطيها النفقة فوق راتبها ، ويقوم بشؤون بيتهِ كاملتاً ، ولايتدخل في شؤونها المالية إلا بالسؤال فقط ، فإن كانت الزوجة من طيب خاطر تريد أن تساعده فلا بأس في ذلك ، وإن لم تريد ذلك فأعلم أن هذا حقها . كل التقدير . |
اذا تبغى تساعده مصاريفها وملابسها ولوازمها وراتب الشغاله عليها
والباقي عليه من لوازم البيت والعيال والاجار وغيره |
مش احنا اللي نحدد
زوجته الي تحدد و هذا كلام الشرع والافضل ما يكلمها و لا يفتح الموضوع و يشوفها لحالها كيف بتتصرف اذا شالت معاه مصاريف اولادها و نفسها و الشغالة مثلا ... فا يعطيها الف عافية و اذا ما ساهمت فلا يعتب عليها طالما و انها لم تقصر في واجباتها ناحيته و ناحية اطفالها |
الافضل مايفتح معها موضوع بس لاطلبت شي مايقدر عليه هنا الله يقويها تفتح جيبها مثل استقدام شغاله وراتبها او اي شي خارج عن امكانياته بس بجد لاياخذ شي بدون رضاها صارت الموظفه هاليومين تضحي ببيتها بس ماتضحي بوظيفتها وانشالله ينحل موضوعه بدون مشاكل
|
وعليكم السلام ورحمة الله وبركاته
لو هي حبت من نفسها تساعد زوجها لتخفف عنه بارك الله فيها وإن ماحبت هالشي راجع لها إذا فيه خادمة خاصة لها تعينها في المنزل بسبب عملها ( يفضل) أن تدفع راتبها ومصاريفها + جوالها الخاص وكمالياتها |
واجبات الزوجه الموظفه هي نفسها واجبات الزوجه ربة البيت ما له دخل بالراتب
وواجبه على زوجته سواء موظفه والا غير موظفه نفسه لان الراتب لها واذا بغت من طيب خاطر تساعد زوجها فهي تشكر عليه لانه مومن واجباتها كلام الشرع .... وتبي الصدق الرجال اللي يحط عينه على راتب زوجته اول شي بيفقد شي من احترامها ولو كانت ما توضح وبعدين ما يجوز له يطالبها براتبها ولا جزء منه وكأنه حق له ولا حتى يهددها باسلوب غير مباشر يعني ما يستغلها عاطفيا عشان تعطيه اتقو الله يا الرجال في نسائكم اوصى رسول الله بالنساء خيرا ونرى الوصيه انعكست |
أنصح أخوك ألا يأخذ فلسا واحدا من عندها
لأنه مع أول مشكلة بينهم أو خلاف ستبدأ أنا شريت هذه و هذه و أنا و أنا ..... تتمنن عليك اعلم أن لها حق في مماله وليس له حق في مالها |
ساعات أحس الموظفه البعض يشوفها البقره الحلوب
من جد وش واجباتها أقول لك تدفع الأجار وتشارك في مصاريف البنت من الألف للياء أجل تطلع من الصبح لين الظهر شي عجيب ولاتدفع ؟؟!!!!!! يالله بعض الموظفات الله يعينهم على حريمهم قصدي أزواجهم تصرف عليه بس علي كذا وين القوامه فيه يعني مثلا أنا أنفق علي نفسي سواق يجيبني وأنا أدفع لعيالي تقوم بدورين رجال وحرمه بتاعو كلو بصراحه شي |
88888 >>> روقي هع
الله يبارك لها فيه .. ولا يجعله نقمه عليهم ^ـــ^ ومثل ما ذكروا الأخوة والأخوات ماله حق يطالبها تصرف ع البيت أو الأطفال أو حتى نفسهااا ساعات بجد أحس الموظفات تعيسات .. إلا ما رحم الله بالتوفيق |
اقتباس:
سمها مساهمة .. مساعدة .. عون ..... أو حتى صدقة. السؤال الأهم .. كيف هو أخوك معها؟! إن كان لها نِعْمَ الزوج ولا ترى منه إلا كل خير ومعروف فأتصور أنها ستبادر من نفسها دون الحاجة لأن يسألها أو يطالبها بشيء. أما أن يبادر هو في هذا الموضوع .. فلا أجد ذلك لائقاً .. ولا أتصور أن أية زوجة تحترم زوجاً يطلب منها مشاركته في الإنفاق. |
شف ياطويل العمر ماعليك من عضوات المنتدى اعرفهن انواع المثاليه
وغير كذا غالبا ضد الرجل حبيب قلبي المعادله التاليه هي التي من المفترض حصولها الاصل بقاء الزوجه في المنزل لرعاية زوجها واولادها مادام الزوج سمح لها بالعمل فهناك احتمالان الاول ان يسمح لها من طيب خاطر وهذا قليل والثانيه ان يسمح لها بشرط فكما انها قصرت في واجباتها لابد لها من ان تجبر هذا التقصير بان تساعد الزوج في امور المنزل وعادة يكون ذلك بالامور غير الاساسيه مثل الخادمه والسائق وفاتورة جوالها وملابس الزواجات وهداياها التي تقدمها في الاعراس والمواليد وهكذا اضافة الى هدية تقدمها له بعد سنوات من الوظيفة وتختلف بحسب حاله وحاله مثلا سياره واللا سفره واللا مبلغ تعطيه اياه انا يبدو لي ان المجال صحي الله يعينه اذا كان صحي افضل له يمنعها لانه بياكل تبن ويقول لها بقائك فيه اسهل طريق للضره -الزوجه الثانيه - دعواتي بالتوفيق لك وان يفكني الله من العضوات الموقرات |
اقتباس:
|
اقتباس:
أضحك الله سنك يا أخي كما أضحكتني. ;) |
رجال اخر زمن يبون الحريم يصرفون عليهم
الرجال الي تصرف عليه حرمه مو قد شواربه أجل هاذي المراجل >> ياحيف |
الحين انا موظفة ومملكة
توني مابعد اعرست يعني بعل المستقبل بكرى بيجيني ويقولي وين دراهمك خخخخخخخخ هذا اللي ماخطر على بالي الله يستر لايطلع ردي ويسويلي تقسيم زي تقسيم ليش كذا اجل اجيب له سيارة سيارة تدعسه ههههه مابقى الا هي , داخل العرس بمجهودة الاخ عشان اجيبله سيارة اذا حلق الشنب واللحية ولبس تنوره زي الحريم جبتله اللي يبي اقول ياعضوات ياحلوات اخاف رجلي صدز بكرى يقولي هالهرج علموني وش ارد عليه من الحين ـــ< تبي تستعد |
اقتباس:
خير إنتي حرمه البيت والنفقه واجبه عليك > الحمدالله مايعرفون. الشرع. بس أهم شيء. حق من حقوقه إذا ماصرفتي عليه يتزوج من جد استخفاف بالدين وبالشرع متي كانت النفقه. مثاليه !! |
أحس الرجال اللي يفكر براتب حرمته مو رجال أبداً..
أول شي قله يبارك لها بالوظيفة..وياليته شاورك كيف يحتفل في هالمناسبة..بدل ما يفكر كيف يستقطع من الراتب.. والموظفة لا تتحمل سوى راتب الخادمة واستقدامها وكل ما تجاوز حد استطاعة زوجها من ملابس والتزامات أخرى غير واجب على الزوج أداءها مثل (لو لبسها في مناسبة بألفين يدفع ألف وهي ألف)أو ( هداياها الخاصة في الزواجات والمواليد فقط). عموماً خذها قاعدة ما تعطي الحرمة رجالها إلا في حالتين فقط: الأولى: إنه يكون رجال فعلاً مو ذكر..يعني يخاف الله فيها دايماً وكريم معها..ويحبها ويقدرها..فالشي الطبيعي إنه إذا مر..وإنتبه إذا مر بضائقة مادية ساهمت معه..وهم قلة من الرجال. الحالة الثانية: إنه يكون ذكر بشوارب فقط وخالي من معاني الرجولة..فتعطيه راتبها غصباً عنها أو لتساير حياتها وحفاظاً على أبنائها..وهذه الحالة كثر وأظن المنتدى يعج بأمثالهم. |
اقتباس:
اتوقع صاحب المشكلة سأل العضوات الموقرات ولم يسأل الرجال وبعدين حلك يدل على قلة الرجولة..وما اتوقع الفهمان يرضاها عنفسه يهدد مرته وياخذ راتبها وهي مش راضية بهالطريقة حيسقط من عين زوجته لذلك ارد فأقول المرأة تحب تساعد زوجها في حالة طلعت من خاطرها اما لما هو يهدد ويقول اتركي الشغل لو ما دفعتي كذا وكذا وكذا فصدقني حتعاند اكثر واكثر وهذي عن تجربة وحتكره زوجها وتضل متذكرة هالشيء طول عمرها خلي اخوك يتركها عراحتها..صدقني من نفسها حتقول انا اتبرع ادفع للبيت مثلاً او لمدارس العيال وحسب مزاجها بس المهم ما يجبرها لانه اكره شيء عالمرأة :( |
الزوج هو الي يصرف على البيت ومن واجباته ينفق على زوجته وأولاده .. وإذا ربنا أنعم على الزوجة بمال أو وظيفة تدر لها المال .. فهي حرة التصرف بمالها ولا يحق له أبداً المطالبة بشيء.. أما إذا ساعدت الزوجة عن طيب خاطر .. فجزاها الله خير شوفو المسألة بمنظور الدين والشرع .. |
واجبها انها تكرف بعد ما ترجع من العمل
لتعوض غيابها عن البيت ,,فهي بذلك أخذت ساعات راحة من عملها المنزلي تعوضه بعدة طرق -ما تنام -تضاعف كرفها بالمنزل , يعني تغسل الملابس مرتين و تلمع مرتين و تقوم بأكثر من عمل في آن واحد -تشتري لبعلها سيارة و ميدالية للمفاتيح فيها طبعة قلب مخروم بسهم -يتقاسموا ,,الايجار عليه و الماجلة عليها أو العكس و مستلزماتها عليها طبعا و ملابس الأطفال -تاخذ قرض من البنك لبناء منزل لزوجها لأنه تلطف و رضي بالعمل و تنازل عن وقت دوامها المنزلي و طبعا البيت باسمه هدية و تعويض -راتب الخدامة و السواق و الزوج عليها .. بس إذا ما سوت كل هذا بطيب نفس , خليها تبلع العافية و تجلس ببيتها و إلا تبشر بضرة حريم آخر زمن |
على فكرة
بعض الرجال يفتقر الى الثقافة في الحقوق الزوجية ومع كذا يجيك تفلسف بالردود بشكل يضحك اذا ماكنتم تعرفون ترى شرعاً حق الرجال من المرة شيئين لاثالث لهما (الفراش) (انجاب الابناء ) اما تنظيف وكنس ومدري ايش هذي تكرم وتفضل من المرأة وحسن تبعل وغير مجبرة عليها , وقلة من العلماء اللي قالوا انه واجب عليها لعلمكم بعض العلماء قالوا بأن للزوجة ان تأخذ اجر ارضاع ابنائها من زوجها مستوعبين ياحلوين ؟؟؟ ارضاااااع ابنائها ؟؟؟؟ ياليت مانخلط الدين بالتراث ونتثقف شوي اقلها بدل محنا مسنترين بالمنتدى نكتب ردود على غير علم نلف شوي بقوقل , نفهملنا كلمتين بعدين نكتب ونتفلسف |
اقتباس:
|
اقتباس:
هذا الي باقي ... فيما يخص زوجك .. جربتي تلمحين للموضوع هذا وانتم بالملكة الان ؟ اقلها تعرفين كيف وجهة نظره بناء عليها تحددين ردة فعلك هالامور يبي لها حكمة وتعامل ذكي عشان مايصير بالخواطر شي عاد اذا لزم مررة مررة ماعليه احس خطيبك اجودي ماهو متكلف ممكن يرضى بعراوي مستعمل لاتزعلين :d |
اخ حب مفقود
واجبات الزوجة كربة بيت وكام تظل كماهي الاهم ان توفق بين عملها وبين واجباتها كزوجة وام مو ضروري تعوض غيابها ماديا .. اتمنى ان يكون كلامي مقنع لك |
متابع للردود
مستجدات لم اذكرها : اخي عليه ديون وهو لم يقصر معها ابدا عندما كانت غير موظفة وعمر زواجهما 12 سنة ولديهم 5 اطفال . |
اقتباس:
** من أهم حقوق الزوج علي زوجته.. 1- أن تحفظ عرضه في غيابه. 2- السمع والطاعة ما لم يكن في معصية الله؛ لحديث أَبِي هُرَيْرَةَ عَنْ النَّبِيِّ - صلى الله عليه وسلم – قَالَ: ((لَوْ كُنْتُ آمِرًا أَحَدًا أَنْ يَسْجُدَ لِأَحَدٍ لَأَمَرْتُ الْمَرْأَةَ أَنْ تَسْجُدَ لِزَوْجِهَا))([1]). 3- عدم الخروج من البيت إلا بأذنه لحديث عَبْدِ اللَّهِ بْنِ عُمَرَ عَنْ أَبِيهِ قَالَ: قَالَ رَسُولُ اللَّهِ - صلى الله عليه وسلم -: ((لَا تَمْنَعُوا النِّسَاءَ حُظُوظَهُنَّ مِنْ الْمَسَاجِدِ إِذَا اسْتَأْذَنُوكُمْ فَقَالَ بِلَالٌ وَاللَّهِ لَنَمْنَعُهُنَّ فَقَالَ لَهُ عَبْدُ اللَّهِ أَقُولُ قَالَ رَسُولُ اللَّهِ - صلى الله عليه وسلم - وَتَقُولُ أَنْتَ لَنَمْنَعُهُنَّ))[رواه مسلم]. وتخرج للضرورة. 4- طاعة الزوج أولي من أداء النوافل فلا يصح صيامها أو صلاتها النوافل إلا بأذنه؛ لحديث أَبِي هُرَيْرَةَ عَنْ النَّبِيِّ - صلى الله عليه وسلم -: ((لا تَصُومُ الْمَرْأَةُ وَبَعْلُهَا شَاهِدٌ إِلَّا بِإِذْنِهِ))[متفق عليه]. 5- إجابة دعوه الزوج إلى الفراش اللهم إلا لمرض أو حيض؛ لحديث أَبِي هُرَيْرَةَ عَنْ النَّبِيِّ - صلى الله عليه وسلم – قَالَ: ((إِذَا دَعَا الرَّجُلُ امْرَأَتَهُ إِلَى فِرَاشِهِ فَأَبَتْ فَلَمْ تَأْتِهِ فَبَاتَ غَضْبَانَ عَلَيْهَا لَعَنَتْهَا الْمَلَائِكَةُ حَتَّى تُصْبِحَ))([2]). 6- أن تتزين له وتعمل على سعادته، فترك التزين يؤدي لزهد الزوج فيها. 7- أن تصبر معه في السراء والضراء ولا تكثر عليه بطلبات لا طاقة له بها. هذه للاستزادة فقط .. وعلى فكرة يا اختي .. ترا بعد الهدايا في الملكة وفي الزواج مهي مجبر عليها الرجل الشبكة غير مجبر عليها اقامة الزواج في قاعة افراح كبيرة غير مجبر عليها العلاج غير مجبر عليه السائق غير مجبر عليه الجوال والتليفون والانترنت غير مجبر عليه الملابس الباهضة غير مجبر عليها اذا كانت ملابسه عادية .. لكن الحياة ما تمشي كذا الله يهديك .. |
اقتباس:
ويشوف وش تسوي هي من حالها لعل اصلها الطيب هو الي يخليها تبادر تساعده وتخفف عنه الديون .. واذا ما صار هالشي فلا باس ان يلمح لها باسلوب ودي ولطيف .. وباذن الله يكون تفاعلها طيب |
يعني الرجال مسكين
هو الي يجيب المهر هو الي يجيب البيت هو الي يجيب العفش هو الي يصرف على البيت هو الي يصرف على زوجته هو الي يدفع فاتورة الكهرب هو الي يدفه فاتورة المويه هو الي يسدد فواتير هو الي يوديهم ويجيبهم كل شي عليه طيب الزوجه وش عليها اذا كانت جايبه شغاله على حساب زوجها ؟ الحمل والولاده بس يعني يعني البنت الموظفه الي ماتساعد زوجها اذا كانت موظفه فهذي اعتبرها قليلة أصل وقليلة خاتمه يعني وش هل الانانيه كل شي على زوجك وانتي متسدحه لا لك ولا عليك الحياه مشاركه والمشكله لو ساعدت زوجها مثل ماقالو الاخوان بأول تتش بسيط بتبدى تمن عليك اعطيتك وو ووو ووو وو ومو بعيد تشهر فيك عند الناس انها عطتك ريال لا ياخذ منها شي منة الله ولا منة خلقه |
تساعد في حاله واحده فقط لو كان زوجها حالته الماديه ضعيفه او صعبه او عليه ديون ومحتاج مساعده
اما اذا كان حالته لابأس بها كل شي يكون عليه سواء خدامه او غيره والمفروض مايطلب منها شي الا اذا هي بادرت من نفسها مع احترامي لك ليه اخوك يسألك ؟؟ النوع هذا غالبا تكون شخصيتهم مهزوزه اللي بكل امور حياته الزوجيه يسأل اهله |
اقتباس:
نفس هذا الرد :22: |
ياشين البخل!!
أكره شي انك تعيش مع انسان يبخل عليك!!! وخل عنك انت وياه وش مهيب ملزومه لو ما جاب لها هدايا بداية الزواج كان طلعت فيه الف عيب بس هي لا لا ما يحتاج تجيب شيء هي غير ملزومه ودور لك اعذار للطبايع الشينه أشين طبع في الإنسان!!!!!!!!! الله يعين كل امرأة ابتلت بزوج بخيل ويعين كل رجل ابتلاه الله بامرأة بخيلة.. والله يعين كل بخيل على نفسه!!! همسة: كل ما قريت ردود العضوات ازداد حبي لزوجتي الكريمة الله يخليها لي :) |
يارجال قلها تخلي فلوسها لها منة الله ولا منة خلقه
|
اقتباس:
ولكن الا تعلمين ان لكل زمان ظروفه في الماضي اللي تطلق قبل تنتهي العده والرجال يخططون عليها ماتنتهي الا وثلاثه واللا اربعه ماتوا على باب بيتهم بسبب تقاتلهم عليها :25: اما الان تقطع بصل طيب دامك ترضين بالشرع اليوم ياخذها وبكرا يجيب ضرتها !!!!!!!!! فيه نظريه اقتصاديه اسمها نظرية العرض والطلب اذا زاد العرض وقل الطلب ينقص السعر وربما يصيب السلع الكساد الان البنات كثر التراب فمعناه ان الدلال راااااااح خلها تتمسك بزوجها احسن لها لو تدفع اللي وراها واللي قدامها المشكله العضوات بهالمنتدى زوجها اخذ صرافتها وكل يوم معطيها علقه وتجينا هنا تقول لا تعطينه شي ولو يمد يده اكسريها ؟؟؟؟؟ يعني بالله الرجال وش يعنيه ياخذ موظفه وهو ماهو مستفيد من راتبها ؟؟؟ اكيد يفكر انه يستفيد من قريب او بعيد فيه اشياء اذا سوتها الموظفه اقول وقتها زوجها ماله حق بريال واحد تسوي له فطور الصباح وتجهز العيال للمدارس تكون وظيفتها قريبة من البيت لو حب يرجع للبيت يبي شيء يحتاج تجهيز تستاذن وتطلع تخلص غرضه ولو كان من الناس اللي مايروق جوه الا الصباح ويبيها للفراش ماتقول لا مايمديني اغتسل واستشور واحط مكياج ولما يجي البيت يلقى غداء من يديها وتستقبله بكوب عصير وتكون اخذه دش ومتعطره ونفسيتها توووووووب وتسوي له بعدها برادي نعناع ينعنش والعصر تضبط له القهوة والشاي والحلى وتتقهوى معاه وبعدها تنظف البيت والمغرب تدرس العيال وبعد العشاء تضبط له ذيك الصينيه اللي تسيل اللعاب وبعدها تسهر معاه مو تقعد تحضر ولو اخذ اجازه تسهر معاه وتطنش دوامها في ذاك الوقت ماياخذ من راتبها شي :14: |
النفقة على الزوج موظفة ام ربة بيت شرعا
ولكن اذا حبت تساعد من باب المعروف يكون على رغبتها وليس الزمي |
اكثر الخلافات االزوجيه بسبب المال
وهذا الموضوع مثل غيره سيقفل من غير حل وستضارب الآراء ولن تصلو لحل اول ما ذكر في النكاح لمالها عينكم على المال وكم سيستفيد الرجل من زوجته رفقا بالقوارير ليش كذا فضلت بطاقتي الصراف مع زوجي 20 سنه يتصرف على كيفو ولا يعطيني منها شيئ ووقت استعدتها منه من سنه ماذا يفعل يحول حسابه لحساب ثاني حتى لا استطيع ان اسحب منه الاسبوع الماضي معه في المشفى ونسيت بطاقتي طلبت منه مال لآكل رفض ووقت طلبت بطاقته رفض ايضا مع اني وعدته ان اعيد له المبلغ كل وحده بطاقتها بجيبها وهو الرجل وهو القوام وهو من يجب ان يصرف او يعنس مثل باقي الفتايات معلش ردي قااااااااااااااااااااااسي ولكن من واقع الحياة الرسول صلى الله عليه وسلم امرنا ان :من ترضون خلقه ودينه فزوجوه واعتقد الرجل ذو الاخلاق الرفيعه لن ينظر لبطاقة صراف زوجته |
غريبة يا ليش كذا تقول عن رد التائه عيب
و ردك يعني ,,عداه العيب!! اقتباس:
أنا و انا ربة بيت مو كل يوم أسويه ,, ما ادري تنصحني ادفع لزوجي او ابيع ذهبي او كيف اعوض ,, البنات ملئ التراب هل هذا يعني انه كلما زاد العرض ((رخص قيمة الزوجة))!!! أحيانا احس ردودك تناسب توقيعك و أحيانا لا لماذا لما يجي موضوع الفلوس تدافع بدون أن تحدد ((((بطيب خاطرها)))) عن ((((الغصب)))) هل من الرجولة ان يغصب الزوج زوجته على الدفع ,, |
سبب بعض الموظفات أنها ماتساعد زوجها
أول شي خيانه الزوج أعرف كثير موظفات ساعدو أزواجهم في بناء عماره أو كذا والنتيجه يجيب لها العروس عند بيتها أو أنانيه الرجال يعني الرجال مايبين في وجهه في المعروف لو تطبخين له يديك مايشوف وأعرف مدرسه ساعدت زوجها في البيت ومعه عسله وأهي المدرسه والله قمه في الأخلاق قبل فتره صار لها خلاف معه وطلاقها بعدين رجعها ويقول لها بتزوج عليك تقول لا مستحيل يعني هالشي أخر ماتوقعت والنتيجه تزوج وأهي ضعيفه حتي عيال ماتجيب عشانه مهما كان الرجال أناني وهمه نفسه ويحب إلي تاخذ حقها بصرااحه أنا ماارغب في الوظيفه وأحب جلست البيت لكن الحياه وماطلبها ومغرياتها تخلي الوحده تبي تتوظف معروف الرجال مو علي كيفك يدفع لك وانا إنسانه مااأحب يجلس في نفسي شي ومن النوع المبذر وأحب أكرم نفسي علي قولتهم راس غير راسي مااعاش أتوظف عشاني مو عشان زوجي ماعلي منه هو ملزوم فيني وأنا تكرم مني أتوظف وماا اطلب منه وحتي لو تزوج علي غير الموظفه أكبر في نفسها أهي جالسه له في البيت ولا عندها دخل ووين تروح يعني مو مستقله ماديا عنه أما الموظفه لا بالطقاق خلاص يذلف مع زوجته وش علي منه أهو إلي باعني وأعيش لنفسي وعيالي والفلوس وعندي وأهي أهم شي |
من استعراضي للردود بعد يومين سيكون ردي بشيء من الحكمة والواقعية لاخي .
|
| الساعة الآن 03:40 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©