|
مالحل مع زوجي الذي يخبر أهله بكل مايحدث بيننا؟
السلام عليكم ورحمة الله وبركاتة اول شيء ترى بتكلم عامي لان تسبدي تفوح = تشتعل معدتي = حرقان بالمعدة ( لغير الناطقين) ومالي خلق انمق الفاظي المهم بغض النظر عن عيوب خطيبي الكثيرة اللي المجال لايسمح لذكرها لكني اكتشفت ان الاخ وكالة انباء كيف؟ اي شيء اقوله له يرررركض يقوله لأهله:27: في البداية كنت شاكة لانه الوحيد بين خواته (شقيقهم الوحيد) وعندهم اخوان غير اشقاء تواصلهم معهم مو ذاك الزود المهم كنت شاكة, بس قلت لا اكيد انه مستوعب اني زوجته وبلا...بلا.... بس الاخ خيب ظنوني كل ماسولفت معه بشيء صار بينا اكتشفت انه قايله لاهله؟ والطامة اليوم اسولف معه بشيء واطلب منه يسويه قال اوك بدق على اختي يمكن تقدر تدبره بسعر ارخص بغض النظر عن كلمته الخالية من الذوق , بس انا ماهبل فيني الا يوم قال ادق على اختي ؟:29: ياناس شيء خااااص طبعا كنت محتقنة وعطيته ياها صريحه قلتله لاتدق على اختك ولاتقول لاحد اللي بيني وبينك قام يضحك ويرقع , وقال خلاص مانيب قايل , بس بقول لأمي ـــ<< لاياشيخ ؟ ليتك ساكت بس اشق هدومي انا ولا اشق هدومي شكل اهله قاطين معه ؟ يحسبون انهم معرسين علي هم وولدهم ؟؟ :17: ياخوفي باكر كل ماصار شيء بيني وبينه لقيت اهله يسولفون فيه المطلوب الان وش الحل مع الرجال اللي من هالنوعية وشلون اخليه يتعلم مايتكلم فينا او في خصوصياتنا ؟ لابخير ولا بشر ابيه يتعلم يرد بهالعبارات اذا انسأل اسالة شخصية حنا تمام , بخير , مادري , ايه , لأ , امورنا طيبة اوما يقعد يقول سواليفنا وعلومنا تقل حرمة قاعدة بجلسة ضحوية ؟؟ وش السالفة ؟؟ انا طبعا اقدر بطريقتي اشفر اكبر قدر من معلوماتي وسوالفي عشان ماينقلها لاهله لكن ذي مب حياة ؟؟ مب عيشة اني اصير معه تقل غريبة ؟ الشيء الثاني انا اشوف هالخصلة عيب كبير بالمرأة فما بالك بالرجل ؟ ومابيه يطيح من عيني الصراحة خصوصا اني جاية من بيئة تقدر الخصوصية ؟ لي شهرين ونص اكلمه عمر احد من اهلي ماقالي وش بينكم او وشتقولون او اي شيء مع اننا قريبين من بعض جداً كل اللي يقولونه , مبسوطة معه ؟ مرتاحة؟ وبس وه بس مازالت تسبدي تفوح :29: |
وعليك السلام ورحمة الله وبركاته
خطيبك كان بيعلم أخته بس بس إنتِ علمتي المنتدى كله :d شوفي ياأختي بإعتبار أن خطيبك ماله إلا أمه وخواته فهو يعتبرهم مصدر الأمان والفضفضة بالنسبة له وأنهم ثقة في أنه يخبرهم بكل شئ لأنه ربما هذه عادتهم أمه ربته على إنه يقول لها كل شئ وياخذ رأيها . بس الآن هو بيتزوجك إن شاء الله فلا بد أن يتغير وعشان يتغير لابد من توجيه وعشان يتوجه لابد من قناعة بأن الذي يسويه غلط وهنا دورك الآن .. علميه ووجيه واقنعيه بأنك لا ترضين أن أي أحد يعرف عن حياتك شئ بشكل خاص وعن حياتكما بشكل عام . أعانك الله |
وييييه ذكرتيني بااياامي التعيسه ومشاكلي على هالشي والله انه كااااان حتى الاشياء الخااصه يقول لأمه<< يااااكرهي له
|
اقتباس:
ايه علمت المنتدى وياليتهم يردون بعد :d بس يقرون ويوسعون صدورهم ويمشون :29: بالنسبة لردك هنا المشكلة وشلون اعلمه بما انك رجل علمني وشلون اعلمه مايعلم اهله بعلومنا ـــ<< كيف :22: قد لمحتله قبل وما من تغيير يوم لمحتله سوا انه يقدر الخصوصية و خصوصياتنا لايدري فيها احد :( لاويقولي انتبهي لاتعلمين اهلك عن خصوصياتنا :d شكله يحب التنكيت صح :d |
حلوة القفشة هذه
( خصوصياتنا لايدري فيها احد ) أمسكي عليها وردديها على مسامعه كثير ولا تنسين في لحظة مناسبة إذا حصل وعرفتي أنه علم أهله بشئ من خصوصياتك أزعلي .. :19: وخذي موقف صارم :29: وبلغيه أن هذه الصفة الوحيدة التي لا تحبينها فيه أعانك الله |
عزيزتي .. مستقبل غامض صراحة أسلوبك عجبني .. فرفوشة ودمك خفيف وخليتني أضحك وابتسم الله يسعدك.. جربي معاه بأسلوبك هذا توصليله المعلومة.. أو ممكن تقوليله موقف عن صديقتك وخطيبها ( طبعا من تأليفك) هههههههه وانها اتضايقت من أسلوب زوجها .. قوليله تخيييييّل صديقتي مسكينة زوجها يقول لأهله..إلخ لا أنا الحمدلله أهلي مايتدخلو في شي ولا يسألوني.. أحلى شي الخصوصية بين الأزواج بكرة تصير مشكلة بسيطة .. والزوجين ينسوها والأهل ماينسوها..( عملتلك سيناريو وحوار).. يعني حاولي من خلال مكالماتك اليومية .. تقنعيه .. وأعطيه ايحاء انه هو فعلاً مايتكلم لأحد.. أتمنى أكون ساعدتك ولو بقدر بسيط .. |
غلاتي مستقبل غامض
إن شاء الله يكون مستقبل باهر وجميل باذن الله تعالى اتصور ما تقدرين تاثرين بخطيبك الا اذا كسبتيه لازم تاثيرك عليه يكون اقوى عشان يكون كلامك مقنع له لو انك تشبعينه اهتمام وثقة واحترام من خلال المواقف بيصير اطوع لك - ومنها تقدرين تقنعينه بشكل غير مباشر وودي انك لا تحبين اخبارك اهلك بمايخص حياتكم لانها خاصة بكم وملك لكم - ومنها يفهم مقصدك ويتقبل فكرتك بعض الامور لا نستطيع الحصول عليها بشكل مباشر فمن الحكمة ان نحاول بشكل غير مباشر |
_ هلآ ـآأختتي بصرـآأحة الله يعينك .. بس تعرفين يبيلك تذكرينه كل بعد سالفه قلتيهـآأ انو لازم تكون بينكم ولا تطلع بس مو مبـآأشره ( يعني مثلآ تقولي السـآألفةةة .. وكدا وكدا .. اختميهـآأ بمثلآ حبيبي انا مااحب افضفض الا لك مع انه هالشي ماقلته لأختي المقربه مني لاني مااحب احد يسمعه مني الا انت ) = طبعـآأ ع حسب الموضوع اتمنى اني افدتك , والله يوفقك حبيبتي |
[B][align=center]
وعليكم السلام ورحمة الله وبركاته.. ياحليلك.. حبيبتي ششوفي بعطيك ايآهآ على بلآطه .. ومتأكده من كلآمي مليون بالمية .. وضآمنه رأيي بكرة لآتزوجتي .. آبشري بالسعدَ آخبآركِ كلهآ عندهم .. خصوصيآتك.. آهتمآمك.. لبسك.. طبخك .. < سينآريو حيآتك كله عندهم .. < وشكل زوجك من النوع الي ينقلَ الخبر لحظة وقوعه > هههههههههه سوري حبيبتي آمزح المهم.. هو بمإ آنه كل ششيء يقوله لهم .. أكيد بيكون مرخيَ إذنه لهم < يعني بيعبون رآسه عليكِ يعني آذآ صآآرت مششكله أكيد بيعلمهم .. بيقولوآ آفعل فيهآ كذآ وسو كذآ وهو اكيد بيسمعَ لهم وآنتي تعرفين الحريم شآطرين بـ زن الكلام.. < استغفر الله البعض مش آلكل .. والمصيبه آلادهي آذ كآنوآ اهله غيورين مثلآ لو جآب لكِ شي يمكن آمه او آخته تغير وكذآ ., ولاتستبعدي يمكن تقوله لاتجيب لهآ لآتشتري لهآ لآتسوي لهآ > وهوَ آلاخ بيسمع لهآ بلآ شك .. بس آذ آهله طيبين .. لآتخآفي ولآتششيلي هم .. لآن بعض آهآلي الزوج الي ولدهم من النوعيه كذآ لو يقولوآ له طلقهآ على طول بيطلقهآ .. بس زي مآقلتَ لكِ أذ كآنوآ طيبين وفيهم خير .. طمني بآلكِ وعآد أنتي ادرى بأسلوب زوجكَ .. حآولي معه آنه مآيعلم خصوصيآآتكم فهميه آن هالشيء يضآيقكَ .. حتى لو يقول هذولآ اهلي .. طبعاَ آول مره مستحيل يقتنع .. بس حآولي آكثر من مره لين يقتنع.. ويبطل هالعآده < وربي يوفقك ِ ويسعدكِ ودي لك ولـشخصك :: .,~ْ |
اتوقع والله اعلم ان شخصية زوجك من النوع اللي تقدرين توجهين وتقولين له سوي كذا ولا تسوي كذا وهو ماغير يردد سمعاً وطاعة، وهذي صفة يحبنها بعض الحريم ويكرهها البعض، واتوقع انتي تكرهينها ، بس الشي الجيد انك تقدرين تربينه وتعلمين وش اللي يجب ان يكون وش اللي مايجب لأنه اكيد يبي يسمع لك . . على فكرة شخصيتك انتي تحتاج إلى حدٍ ما مثل شخصية زوجك، لأنه لو كانت شخصيته قوية جداً راح يكون هناك صدام بينكم، بس انتي حاولي تعدلين شخصيته إلى أن تكون قوية إلى حدٍ معقول.. شكله طيب وعلى نياته، لازم تجلسين معه وتقولين له ياحبيبي اللي بيني وبينك مايطلع لمين مايكون . . الله يصلحه لك ويهديه . . |
[QUOTEبغض النظر عن عيوب خطيبي الكثيرة ][/QUOTE]
لاحول ولاقوة الا بالله قريت موضوعك اكثر من مره وانا مريت بنفس حالتك بس مع خطيبتي سابقا كل حوار يدور بينا ع طول ينتقل لامها واخواتها واحيانا اسئلها وماتجاوب الا اليوم الثاني لا وتجاوب كنها تنقل من ورقه او كنها تسمع ومهي حافظه واجهتها وطلبتها ان اللي بيني وبينك ارجو مايتعدانا خاصه الهواش والاستفسارات اللي كنت بستفسرها منها كأنها بدت تتغير نوعا ما وبيني وبينك ما الومها كونها بنت وغشيمه وماتدرك بعض الامور وانا رجل غريب عنها وماكانت بينا ذيك العلاقه القويه فأتوقع كان ينقص العلاقه الحب والامان والتضحيه والشفافيه هو كان في حب من طرفي لكن حيل الله اقوى المقصود ياستي ان زوجك لسا علاقته معك مهيب ذيك الزود اعطيه امان وحب ونسيه حب وامان اخواته وبعدها ان شاء الله بيتسنع |
اقتباس:
كلنا عيوب وأخطاء وأتوقع بنت مثلك ماراح ترضى بشخص كله عيوب .. (( دائما ألاحظ في هالمنتدى خلاص دام ماأحد يعرفني لي الحق أنتقص من شخصية زوجي , خطيبي ....الخ خلو ضميركم يحكمكم .. :) ..)) ثانيا : كلمي خطيبك بالتصريح والتلميح ..مرة ..مرتين... وبيفهم ..هو مايسوي هالشي إلا بحسن نية ..إنتي بأسلوبك فهميه بإنك تتضايقين ..يا عزيزتي والله لو يعرف هالشي يضايقك ماسواه ..:) تمنياتي لك بالسعآآدة .... |
اقتباس:
الله يجبر بخاطرك , اي والله فرفوشة وش زيني :23: على شوية قشارة عشان ما امدح نفسي بالنسبة لإقتراحك , تراي مألفة مجلد اسمه ( صديقاتي وازواجهم ) وعلى اجزاء بعد من كبره , مابقى الا أطبعه في دور النشر جربت هالطريقة , كثير واستهلكتها لما قلت بس , ولا نتيجة انا مشكلتي مع زوجي انه شخصيته راعي سواليف بقوة + الرجل الوحيد في بيتهم + متعود يقول لأهله كل شيء عن حياته من قبل مايتزوجني اصلاً والنتيجة كوكتيل صعب التعديل ما ادري احس التلميح ماينفع مع هالتركيبة الجهنمية ماينفع الا تصريح ووضع النقاط على الحروف شكلي بدخل في مواجهة قوية قريباً والله يستر |
اقتباس:
كلامك صحيح , مشكلتي حادة واخذ موقف , واضحة وينقصني الدهاء الانثوي طبيعة شخصيتي اقدم واعطي بشكل لامحدود , عاطفياً وجسدياً وغيره , في حال كنت مرتاحة مع الشخص ومافيه منغصات او ع الاقل المنغصات ليست مصيرية اما اذا وجدت صفة سلبية ودائمة او مستمرة اشعر كأنها تضغط علي, احس بإنزعاج شديد و انفر + ما اقدم أو اعطي + ادخل في مواجهة مع الطرف الثاني وما ارتاح او ارجع لطبيعتي لحد مايتغير الوضع ويصير زي ما ابي طبعا كون شخصيتي بهالتركيبة فهي تتيح لي الموجود اصلاً , ولا تمكني من الحصول على غير الموجود بمعنى مثل هالصفة او غيرها تخليني انفر وما اشبعه اهتمام وثقة واحترام على قولتك , بالعكس ممكن اقصر بشكل كثير في هالنواحي , وممكن على النقيض اعامله بالعكس , لاشعورياً مني , كتعبير عن عدم رضاي بينما لو كنت مرتاحة اقدم واعطي حب واهتمام بشكل لامحدود, بشكل لايمكن تتخيلينه عموماً انا احاول اسيطر على نفسي من بداية خطبتي , لاني اخترت ان استمر بالخطوبة والله يعين |
اقتباس:
تسلمين ايه تكفون علموني الدهاء حقكم ذا تراي ما اعرف الا:29: دعابة :d |
اقتباس:
انا وجهي صار كذا :( يوم قريت ردك وش السيناريو المستقبلي الحزين اللي كتبتيه لي :( اهم شيء نقل الخبر لحظة وقوعه :29: حرام عليك كني ناقصة :( والله ما ادري يابنت الحلال , كل اللي قاعدة تقولينه يتناسب مع شخصية خطيبي وبقوة لكن ظنوا بالله ظن الخير وانا راجية ربي ان يعطيني على قدر نيتي ومايخيب ظني , والله يستر ـــ<< ضاق الصدر :( |
اقتباس:
[/QUOTE] والله عطيته حب وحبحبت فيه لما طلع الحب مع خشمه الرجال فيه طبع , والطبع يغلب التطبع اجل اقوله شيء اشاورة فيه يقولي اصبري اسال امي واردلك بكرى زين اني مسكت لساني وقتها |
اقتباس:
ليتك تعدل مشاركتك الأولى عشان ارد عليك ادري انك كتبتها بحسن نية , بس عدلها الله يعطيك العافية |
اقتباس:
بالنسبة للنقطة الاولى مع انها جانبية ومالها علاقة بمشكلتي , بس برد عليك شوفي ياعمري اولاً انا دخلت المنتدى محتقنة وكتبت موضوعي وانا تحت ضغط نفسي , لذلك اللي تقرينه من الفاظ غير مستغرب ثانياً بعيداً عن المثالية الزايدة وتنميق الالفاظ والنفاق اللي بغير محله , انتي اذا صرتي زعلانة من شخص ما وواصلة معك وكلمتي امك او اختك او صاحبتك اياً يكن طبيعي بتتكلمين عنه باسلوب معين ممكن يكون اسواء من اسلوبي بكثير- ولاتقوليلي لأ لأنك ماراح تكونين صادقة وقتها- وانا اتصرف بهالسجية وبهالطبيعة وهالصدق مناسبني تماماً واشوف العكس يصنف تحت الهياط بالنسبة لكلامك الاخير الله يعطيك العافية , لكن للعلم هو يعرف ان هالشيء يضايقني ويسويه :( |
الان سؤالي
اذا كانت المعطيات زي ماقتلكم هل الصراحة والوضوح والنقاش الجاد بيجيبون نتيجة ايجابية ولا بيصنفون تحت اطار فرض الشخصية + تحاول تبعدني عن اهلي بمعنى زوجي الشقيق الوحيد لاخواته واللي كل ماطق عود عود ركض يقولهم واللي مايخبي شيء عن امه ومايسوي شيء الا بشورها هل تشوفون اني اذا قلتله بشكل مباشر يافلان لاتقول لاهلك اللي بيني وبينك , ولاتعلم احد , ورايك خذه من راسك لانك رجال كبير وماسك منصب يعني مايحتاج كل ماقتلك شيء تقولي اسأل أمي , وانا احب الرجل قوي الشخصية واحترم الرجل اللي ياخذ قراراته بنفسه وبلا...بلا.. هل تشوفون هالشيء بيجيب نتيجة ايجابية ؟ او ان الوضوح بهالشكل مايناسب الرجل السعودي وممكن ينفره مني او يكرهه فيني او انه يأخذه على اني قاعدة افرض شخصيتي عليه او املي عليه افعاله ارجوكم حللوا شخصية زوجي خصوصا الرجال وعطوني ارائكم ولامانع من الاسئلة ط بصراحة البربسة انا ماتتناسب مع شخصيتي ابد ما اعرف استمر مع شخص وهو يبربس , احس بضيق شديد , الى متى بقعد المح وافوت واطنش لازم يكون فيه وضوح بهالنقطة بس اخاف اعميها لاحكيت |
اقتباس:
|
الحل عندي
خذي منه سالفه حلوه وبعد مايخلص من حكاياته قوليله أووووه بروح أعلم أمي عن سالفتك ذي أكيد بتفيدنا؟؟ شوفي وش يطلع منه وبعدين عطيه على راسه وقوليله مو هذا نفس الشي اللي انت تسويه خلاص خلينا كلنا في الهوا سوا وخليه يجرب نفس الشعور إن أخباره متناقله |
:* |
| الساعة الآن 12:28 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©