|
ماهي نظرتك للرجل الذي يكثر من الهدايا لزوجته ؟
السلام عليكم ورحمه الله وبركاته
صباح------مساء الخير يارب كيف حال اخواني واخواتي ان شاء الله تمام وربي يسعد كل من قام على هاذا البيت الاسري اخواني واخواتي موضوعي بسيط لاكن ماني عارف هل تصرفي صحيح او غير ذلك انا ملكت من 4 اشهر تقريبا ولله الحمد ومبسوطين مع بعض لاكن موضوعي الهدايا انا انسان احب اهدي من زمان اهدي لاخواني لاصحابي لوالديه فما بالكم في زوجتي اهديته امكن خمس مرات في خلال ثلاث اشهر وكل هديه اروع واجمل واغلى من الثانيه فما اعرف هل طريقتي صح او لا هيا اهدتني مرتين بس اخاف كثر الهدايا مو حلو فابغا من الشباب اراهم وابغا من الاخوات تقولنا هل تحبين كثر الهدايا وكيف نضرتك للرجل الذي يكثر من الهدايا واخير ماعرف ايش رايكم هل هاذي تسما مخفه اما ماذا:17: |
لا ماتسمى مخفة
لكـن خير الأمور الوسط .. لاأفراط ولا تفريط ماأعرف صراحة أنا جربت قريبة لي تعزني وتغليني وكل شوي جايبة لي هدية الله يسعدها .. أول كنت أفرح لكن بالأخير مليت وألمح لها مايحتاج هدايا طبعاً لأن أنا لازم أرد الهدية وعاد أفكر وش أجيب هدية ومتى أشتري الهدية وقلق ,, وأقول الله يهديها الحب فالقلوب موب لازم كل شوي هدايا |
أولاً بارك الله لكما وبارك عليكما وجمع بينكما في خير ثانياً في مثل يقول ( أنا غنية وأحب الهدية ) ولو تحس الهدايا تقربكم لبعض فشئ حلو اللي تسويه الرسول صلى الله عليه وسلم يقول ( تهادوا تحابوا ) لو حبيت تغير شوي الروتين وقف هداياك فترة بسيطة وأكيد بتحس بكذا لأنها تعودت بس عوضها بالكلام الطيب وبعدين فاجئها بهدية تستاهل مدة الانتظار ويصير لها فرحة وبالضبط أقرب لك المقصود أضرب لك مثال : تخيل فرحة الطفل لو تجيه هدية على غفلة يعني التغيير مهم حتى ما تتعود يمكن تمر بظروف وما تقدر تهديها عاد وقتها وش يرضيها لو زعلت بعيد الشر وأنت معودها بالهدايا ( مجرد رأي ) أذكر عبارة ( تعبت أدور لكِ ساعة غالية أهديكِ إياها لكن ما لقيت أغلى من الساعة اللي عرفتكِ فيها ) الله يديم عليكم السعادة ويكتب لكم الخير والصالح |
يا أخي الفاضل الهديه حلوة وفيها مودة والفه بين اي شخصييين ,’~
لكن برضو لا تخلي الهديه زي الحلاوة تجيبها لها كل ما تزورهم ,’~ يعني حلوو في 3 اسابيع هديه وحده وماتكوون باهظة الثمن =) والله يتمم لكم على خير ,’~ |
وعليكم السلام ورحمة الله وبركاته ~ الله يديم السعادة والهنا عليكم أتوقع خمس هدايا "مكلفة" في أربع أشهر كثير شوي راح تصير الهدية مع الوقت فرض واجب عليك ومع كثرتها راح تفتقد الهدية لطعمها ورونقها .. و "الشيء إذا زاد عن حده .. انقلب ضده" مش معناة كلامي ما تهدي لزوجتك .. لا لكن اهدي لها بتعقل .. مش شرط كل مرة هدية مكلفة مرة هدية عليها القيمة ، وكذا مرة بسكوتة أو شكولاتة أو وردة .. يعني شيء رمزي ، وإنك افتكرتها بشيء ... وانتبه بعد الزواج تهمل الهدية :) لأن كثير من البنات يشتكوا إن الزوج وقت الملكة يهدي بسخـاء وبعد الزواج ....... بح :) :: الله يوفقكم ي رب ~ |
لا تعودها على كثرة الهدايا اول شي فيها احراج عليها
لانه لازم ترد لو مره ولا مرتين وكونها بنت فيه كلفه عليها واحراج تطلب مبلغ من المال عشان تهديك ولبكره كمان لو عودتها على كثرة الهدايا وخفيت ممكن سبب في المشاكل وبعدين لما تكون الهديه مره او مرتين اقوى في الاثر في القلب وتكون محفوره في الذاكره ونرجعلها وقت مانبا ونحتفظ بيها العمر كله |
معناها انك ذوق وراعي واجب
بس لا تبحبحها خلي شوي للايام الجايه خوفي بكره تنشب لك جيب لي وجيب لي خلك حمش شوي والهدايا تكون في المناسبات فقط يلا سدد اللي عليك ... صكني بكم دعوه عسى ربك يستجيب |
وعليكم السلام ورحمة الله وبركاته
سوف أضع رأيي طمعاً في دعائك ، الهديه من الأشياء التي توثق العلاقات بين الأشخاص وصدق رسولنا الكريم حينما قال : { تهادوا تحابوا }رواه البخاري ، والبيهقي لكن أين تكمن لذة الهديه ، إذا كانت على فترات متباعده وخصوصاً في المناسبات في الأعياد ومناسبة مرور سنه على الزواج مثلاً أو كما يقولون (رضاوه) بمعنى حينما يراضي الزوج زوجته بهديه معتبره تعبر عن الإعتذار ، ولامانع من الإهداء بلا مناسبه تعبيراً عن الحب ، لكن لايكون لها سعاده أو لذه إذا كانت الهدايا كثيره وعلى فترات قصيره ، بارك الله لكما وبارك عليكما وجمع بينكما بخير وفقك الله اخي الكريم |
أسلوب جميل وإن شاء لله زوجتك فرحانة فيها يااارب وربي يسعد ويهني كل قلبيـن ياحي ياقيوم
أنا من رأيي المتواضع إنك تخلي الهدايا في المناسبات أو بين فترة وفترة وزي ماقالت أم عمر تكون رمزية أحياناً وغالية أحياناً يعني كذا لكن عندي فضول ماذا أهديتها خلال هذه ال4 أشهر حتى يستفيد المقبلين بأفكار عن الهدايا اللي يقدمونها لزوجاتهم وأعتذر إن كان السؤال خاص وإن أحببت ألا ترد عليه فالأمر إليك .. وأسأل الله لكما التوفيق و لا تنساني من دعوة جميلة منك في ظهر الغيب كما وعدتنا أختك |
بالعكسسس مين قآل كثر الهدآيا مو حلو
خطيبي زي كذآ كل زيارة يجيب هدية معآه (زياراته نادره بحكم عمله ) مآتصدق وش كثر أفررررح فيهــآ واجلس ادعي له من قلبي لأنه مهتم فيني ومآنساني وحبه يكبر و يكبر بعدين إنت زياراتك لهآ قليلة في ثلاث شهور خمس مرات تقريبا تزورها كل شهر مرة ( احسن من اللي راز عمره كل اسبوع) صعبة شوي بعد هالفترة تدخل ويدك فآضيه و بعدين خطيبتك شكلها تستآهل مو لكم اربع شهور ومبسوطين ..بعضهم من اول شهر زعل ومضاربات ولآتلومها وأنا اختك عشان مآهدتك إلا مرتين صدقني لو عندهآ راتب كانت كل شوي تهديك الغالي لآتقطع هاذي العآدة الجميلة والله يوفقكم بحياتكم |
اولا يعلم الله اني كل رد قريته دعيت لصاحب الرد من قلبي
وثاني شي نسيت اذكر لكم ان خطيبتي في ضروف عائليه صعبه شوي ضروف غير ماديه وانا قلت ابغا اغير حياته الى الاحسن وابغاه تنسى بعض من الماضي بما انه صغيره في عمرها فاعتقد ان الهدايا اكثر تاثير لها لاكن خلاص من كلام الاخوان والاخوات راح اعطيه هديه نجاح من الفصل الاول وبعد كيذا امكن بعده بشهر ونص ملاحضه ----- زيارتي نااادره جدا فمن الصعب اروح ويدي فاضيه :22: دمتم بحفض الله واسف على الكلام الغير مرتب |
مافي أحلى من الهدايا تدخل الفرحة والسرور على قلب متلقيها
لكن خليك وسط لاإفراط ولاتفريط عشان يكون لها معنى وشوق |
اخي خير الامور اوسطها . لا تكتر من الهدايا حتى لا تمل البنت ومن تم تفقد طعم الهدايا
ولا تقلل حتى لا تفكر البنت انك نسيتها لانها اعتادت على هداياك وربما تفكر بان حبها قد فتر في قلبك, وحاول ان تعوضها بالكلام الحلو والمدح. اخي طلب صغير , ادعو لي بالزوج الصالح عاجلا غير اجل. |
الله شي حلو
يارب يرزقني رجل يغرقني هدايا واغرقة انا نظرتي لرجل اللي يهدي انه كريييييييم وذوق وطيب دايم يتذكر اللي حولة بالعكس مافيها شي استمر على طبعك اهم شي انت مبسوط مو ضاغط على نفسك واتمنى ماتكون اندفاع بفترة الخطوبة خلها عادة تستمر لاخر العمر الله يوفقك ويسعدك |
ماشاء الله عليك الله يحفظك يارب
حلو تهديها بس حاول ماتلتزم بالهدايا الغالية مرة جيب غالية ومرة اكتفي بوردة ولا شوكلاتة ولا اي شئ رمزي وحلو بس لاتهملها وتتغير عليها فجأة وماتجيب هدايا لانها حتخاف انك اتغيرت عليها او ماصرت تحبها الله يجمع مابينكم على خير يارب |
من رأيي استمر على ما أنت عليه
لأن ما سبق قرأت أن زوجة زعلت من زوجها أو أن المشاكل زادت بسبب كثر الهدايا. لكن حاول تكون متوازن .. بحيث حتى في المستقبل تستمر على ما أنت عليه دون إن يقع عليك إرهاق مادي. والله أعلم |
روعه حلوه الهديا تقرب بس ماخليت للاعياد هديا ماتصير مفاجاه وحلو منك الهديا
|
مساء الخير ..
أخوي .. مبارك .. والله يتمم لكم على خير ... بالنسبة للهدايا ... والله مافيه أحلى منها .. وبالأخص اذا جت من الخطيب ... لكن .. لا تبالغ بقيمتها .. إلا اذا تقدر تستمر بعد الزواج ... ولا خلك وسط ... من الآن .. طبعا البنت مو مثل الشاب ما تقدر تهدي في كل وقت ... هي مازالت طالبة يعني ما عندها دخل مثلك .. ويالله المهر يغطي التجهيز .. فلا تنتظر منها مقابل ... الله يوفقكم ... و يرزقكم الذرية الصالحة ... |
ابد خذ راحتك
اذا الجيب راهي تبارك الله لاتوقف حنا الحريم نظامنا هل من مزيد هههههه بتكبر بعينها وبتنبسط لكن نوع في الهدايا عشان تحس بكل قيمة هدية عن الثانية يعني مناسبة بسيطة هدية بسيطة مناسبة كبيرة هدية كبيرة وهكذا والله يبارك لكم ماشاء الله تبارك الله |
خفف من الهدايا..الله يوفقكم ويسعدكم
|
حقيقة ليس لدي خلفية كثيرة عن الموضوع، ولكني سأرد طمعاً في الدعوة : )
سأبدي لك رأيي في الهدية، أولاً الهدية من أرق الأفكار، وهي عربون للمحبة، لكني سأقول لك رأي من زاوية أخرى، الأمر يعتمد على عقلية وشخصية البنت ومدى فهمها لكثرة العطاء، بعض البنات تظن ذلك ( طفاقة ) وبعضهن يعتقدن أن ذلك ( غاية في الرومانسية والأحساس )، وعلى كل الأمر يعتمد على ردود فعل خطيبتك، هل تشعر بمدى فرحها بالهدية؟ هل هي تحدثك عما فعلت بها أو تذكرها؟ بالنسبة لأهدائها لك هديتين هذا معدل جيد خلال أربع شهور، أيضاً أحب أذكرك أنه قد تكون خطيبتك تحب هداياك لكن ربما هي من النوع الذي لايعبر أو لايصفح، على كلٍ الطبيعة البشرية معقدة والناس مختلفون في ردود أفعالهم، وربما سلوكاً ما تعتقده سلبياً لكن صاحبه قصد شيئاً إيجابياً أو كان ذلك فعلاً لا إيرادياً، ويا أخي مادام أنكم تحبون بعض وتشعرون بسعادة فهذه هي غاية الزواج والحياة، أما الهدايا ليست هي الأصل فلا تأخذ تفكيرك. أذكرك بالدعاء لي، وخصوصاً فيما هو في توقيعي، وشكراً. |
عادي بأي وقت اهديه هدية لاهو عيب ولا حرام بالعكس هالشي يقربكم من بعض
وبالتوفيق |
نظرتي للرجل الي يكثر بهالدايا
رجـــــــــــــــــــــــل فهمــــــــــــــــــــــــــــــــان عنده ذوق لكن اذا عالطالعه والنازله هدايا الامر بصير عادي ولا في عنصر الفرح والمفاجاة خلي شغل الهدايا بالمناسبه الي تستحق و خلي للهديه عنوان وسبب مو هديه والسلام |
عزيزي بالنسبه للهدايا
انا بعطيك نصيحه حلوة وبتعجبك لاني جربتها مع اختي الله يسعدها وكان لها وقع واثر كبير عليها في قلبها (انخرطت وانبسطت كثير ) حاااااااااول واظنها ماتنفع الا مستقبلا لمن تتزوج وتكون معك حااااااااااااااول تهديها هديه وتكون على غفله يعني الهديه اللي بتهديها ياها تكووووووووون هي نفسها فيه واحرص انه الهديه تكون حاجه انت ماقد اهديتها ياها قبل كذا يعني انت اطرح فكره انك تبغا تهدي احد اخواتك وخذ رايها ومشورتها طبعا راح تعطيك رايها بس في نفس الوقت يحز في نفسها وتزعل حبتين وبتغار و راح تعرف من خلال كلامها انه نفسها فيه ومن ثم فاجئها في مناسبه ووقت مناسب صدقني لها وقع واثر جدا رائع اكثر من الهديه نفسها لاتنساني من دعواتك الحلوة فانا مازلت في طور البحث عن عروسه المتسقبل والى الان مافي شي :d |
السلام عليكم حقيقه كفيتم ووفيتم
بارك الله فيكم ويارب يرزقكم كل الي تتمنوه ان شاء الله شاكر لكم حسن تعاونكم ودمتم بخير |
رأيي فيه انه رجال عال العال
ولا أحلى من كذا |
المثل يقول احب الهدية ولو كنت غنية
|
نظرتي له انه انسان كريم وذوق
واقدره واحترمه واعطيه حبي واخلاصي لان شخص يقدرني ويفكر بهديتي كيف تكون شخص يحبني فواجب علي احبه واقدره واصونه ،،، اما عن ردها المرأه غير الرجل يمكن ظروفها ماتساعدها عشان تهديك واعتقد يكفي اخلاصها وحبها لك. |
| الساعة الآن 04:03 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©