|
كيف نفرق بين المتسول والمحتاج فعلاً
السلام عليكم ورحمة الله وبركاته في موضوع لفت انتباهي أمس حيث كنت بالسوق مع أطفالي المهم كنت في محل ودخل علينا رجل متوسط في العمر لم أنتبه له كان يتكلم كلام غير مفهوم لبعد المسافة بيني وبينه المهم اللي انتبهت له إنه قال يا أخوات تعرض بيتنا لحريق الله يحفظكم وتكلم عن أخوانه وكأنه تكلم عن أحوالهم المهم التفت عليه وشفت على وجهه آثار حرق وملامحه سايحة من الحرارة الله يشفيه المراد إنه يبغى صدقة أنا ترددت أعطيه وإلا ما أعطيه وأنا بفضل الله قلبي يرحم هالأشخاص لو طلبوا مني ولا أحب أردهم أتذكر الآية { وأما السائل فلا تنهر } وأعطيهم حتى لو كانوا كاذبين بس نيتي ما أرد السائل لأن بعضهم الله يصلحهم اتخذوها حرفة وصار ما يستحي يكذب وأشوف أطفال يتسولون وحرام هذا الطفل المفروض يكون بالمدرسة حسبي الله على من استغل حاجتهم قام الموظف اللي بالمحل يزجره ويقول له بما معناه إن الجمعيات المسؤولة ما قصرت معكم اطلع بره المحل خلونا نترزق في المحل والله حسيت كأني أنا اللي زاجرني هالموظف من أسلوبه وطلع وما أعطيته أنا اللي أثر فيني طريقة الموظف في طرد المتسول لنفترض جدلاً أنه كاذب والحروق مفتعلة وأنا أستبعد لأن شكله متعرض لها بقوة هل من اللائق التحدث معه بجفاف وطرده وهو رجل بهذه الطريقة أرجو من الجميع مناقشة هذا الموضوع وكيف نفرق بين المتسول والمحتاج فعلاً لأننا مع علمنا بأننا قد نشجع المتسول الذي يتخذها حرفة على الاعتماد في كسب الرزق على القلوب الرحيمة الذين لا يردون السائلين وقد يكونون ثروة لأن البعض كما يقال مثل العصابات تستغل الأطفال إلا أن البعض لا يزال يتصدق عليهم وغيرهم أحوج لهذه الصدقة لأن المحتاجين فعلاً يحسبهم الجاهل أغنياء من التعفف تعرفهم بسيماهم لا يسألون الناس إلحافاً لكن ربما الحاجة اضطرتهم للسؤال بشكل علني الله يغنيهم من فضله لكن فعلاً تأثرت بالمشهد وتمنيت أن يخرجه بطريقة ألطف بانتظار ردودكم وتجاربكم |
الرسول صلى الله عليه وسلم عندما اتااااه سائل
ووجهه ونصحه بالعمل ليكف عن السؤال ،،، ......ليكن الرسول صلي الله عليه وسلم قدوتنا ونوجه كل سائل للعمل مهما كاااااان بسيط وليس معنى هذا نهر السآئل وزجره بل نعطيه ماقسمه الله لنا وتوجيهه للعمل هناااك طريقه رائعه اذا اعطيت سائل قل له اغناااااك الله عنها بمال عرق جبينك ..... رايت امرآه تعمل ماذا ؟؟؟؟ تعمل في غسل السيارات كي تطعم آطفالها وتحفظ نفسها من السؤال ... .... آسال الله لكل سائل ان يغنيه ولكل فقير زيااااادة في الرزق والنعم ،،،، نبرات شعري سطرت شااااكره ومقدره طرحك لهذه القضيه المهمه جدا ... لاحرمتي الاجر اختي الفاضله.... |
موضووع جداً رائع وفعلاً يحتاج للمناقشة ,’~
بالنسبة لي الفرق بين المتسول والمحتاج ... المحتاج : اللذي ينقصه الكثيييير من لقمة العيش ولا يستطيع ان يلبي أغلب احتياجاته .. ويمكن للمحتاج التسول واحتمال آخر ان يكون لديه عزة نفس ولا يشكوو لأحد واهل الخير تساعده من غير ما هما يطلبو من أحد المساعده . المتسول : الذي يطلب من الناس وسؤال الناس . من رأيي ان نتعامل معهم بطيبة شديده وان لآ نجرح أحد منهن ونصحهم بطريقه لطيفه كما قالت الاخت عيوني تحكيني والحمدلله والشكر لله ,, حتى ساعات مايكوون عندي فلوس او شي لكن اتمنى في قلبي كل الخير للمحتاج او المتسول لأن الله اكييد بيعطيني على قد نيتي .. وحتى لو كانو كاذبين فكل شخص على نيته أكيييد .. ولكن بالنسبه لي لمن نكون في اشاره مثلاً وكان هناك الكثير من المتسولين صراحة ما اعطي أحد لان اذا اعطيت احد فيهم الكل بيتجمع وماراح يفكوووك واكييد بتحز في نفسهم ليش اعطيت فلان وانا لآ !! ولكن دحين محتااره فالبعض يقولي (( اذا اعطيتيهم راح تشجعيهم على هذا الشيئ فلا تعطيهم )) . لكن صراحه قلبي ماايقدر يطاوعهم او يطاوع كلامهم .. عشان كدآآ راح اتابع موضوعك يا ختي الغاليه واستفيد من ارااء الجميع =) دمتي في رعايه الله وحفظه ,’~ |
والله صعب تفرقين لان بعضهم يمثل تمثيل على مستوى وما تقدرين تكتشفين
بس من خلال اللي شفته المتسول هو اللي ينشب بحلقك وما يتركك الا بطلوع الروح اما اللي محتاج صدق يطلبك مره وحده اعطيتيه كان بها اذا قلتي لا يروح >>اوم الاكتشاف بس اتوقع لانه بيكون عنده عزة نفس صوح!!! وقد حصلت علينا مره واحنا مسافرين ووحده جت تطلب واعطتها امي واخذتها وفتحت البوك مليااااان فلووس انا بغيت انجلط وش تبي زياده وفيه ناس يحزنووووون صدق ويقطعون القلب والله اوقات اتمنى اني كبيره وموظفه والله نص راتبي لاي عائله اعرف انها محتاجه يعطيك العافيه |
وعليكم السلام ورحمة الله وبركاته
بالنسبه لي اذا شفته صغير في العمر ما اعطيه ، اذا شفته كبير السن او كبيرة السن او طفل او طفله اعطيه والله اعلم بما في القلوب ولكن انت على نيتك واجعلها لله اما هو اذا كان كاذب فالله عز وجل من يحاسبه |
أشكر جميع من مر على موضوعي وأدلى بدلوه وشارك برأيه أنا أرى أيضاً أن عمال النظافة هم من المحتاجين لأن أغلبهم ترك بلده واشتغل بهذه المهنة التي لا يقبلها أحد وما أجبره على ذلك سوى الحاجة وربما بعضهم لديه شهادة ويا ليت الراتب يسد حاجتهم هذا إذا استلموه في وقته !!! وينتظره على أحر من الجمر ليرسل لأهله لأن عملتنا عندهم تساوي ملايين وبعضهم أراهم الصباح أثناء توجهي للدوام يكنسون في عز البرد ولا شي يسترهم من زمهرير الشتاء سوى بدلة النظافة البرتقالية ولو لبس شيئاً فوجوده مثل عدمه مثل هؤلاء ممكن أن نتصدق عليهم بلبس الشتاء وقبعة وشرابات وما إلى ذلك يعني نتخيل أننا هم لأن الدنيا عمرها ما صفت لأحد والدنيا دوارة والمثل يقول ( لو دامت لغيرك ما وصلت لك ) فعلاً نسأل الله أن لا يجعل حاجتنا وحاجتهم عند أحدٍ من خلقه وربما دعوة منهم ترتفع إلى السماء يدفع الله بها عنا البلاء وتنفتح بها أبواب الرزق لأننا نرزق بضعفائنا وصلتني رسالة مؤثرة عبارة عن صورة عامل نظافة يلتقط الأوساخ من الشارع وتحتها تعليق وهو امتناعك عن إلقاء قمامة واحدة في الشارع يعني توفيرك انحناءة لظهر عامل النظافة في صيفنا الحارق الراحمون يرحمهم الله ليتنا نفكر دائماً بهذه الطريقة |
صعب التفريق بينهم صراحه ً
وهمه وضميرهم سواء كانو حقا محتاجين او ممثلين للحاجه ((كل ٌ على شاكلته )) لكن ما نقدمه لهم .. هو كله بميزان حسناتنا ان شاء الله .. ((انما الاعمال بالنيات )) المهم النيه بهالموضوع .. |
الصراحة المتسول صعب تعرفينه أذاكان محتاج بحق اولا
لذالك انا من النوع الي اعطيه مبلغ بسيط منها عدم زجره ومنها تفريحته أما المحتاج الحقيقي فتعرفينه عن طريق بيته معيشته ابناءه عمله وعمال النظافة فئة محتاجة تعمل دون تسول وراتبها ضئيل فهم يستحقون منا نظرة حانية شكرا للموضوع الأنساني بارك الله فيك |
موضوع راااائع ،، ومهم
في هالايام الاخيره صرت اطلب رقم التليفون و عنوان للبيت وذلك للتأكد من احقية السائله للصدقه او الزكاة .. اما السائلين من الرجال فلا اتناقش معهم .. والحمدلله طريقه ناجحه ،، غالباً ،، ويتبين لك الصادقه منهم او الشديدة الحاجه وهناك ممن الى الان متواصله معهم ،، الله يلطف بهم وكفاهم بما يشاء* |
ألاحظ أمر
أن الرجل المتسول يتسول غالباً من النساء في المراكز التجارية لأنه يعلم تماماً أن قلوبهن رقيقة والنساء المتسولات كذلك منهن شريحة كبيرة لا يتواجدن إلا في الأماكن المتواجد بها الرجال كمحطات الوقود أو عند بوابات المطاعم الخاصة بالرجال أو عند إشارات المرور.. لأنهن على علم تام بأن كثير من الرجال يصعب عليه أن يرى امرأة محتاجه أو بمعنى شعبي أكثر ( مكسورة جناح ) ولا يقدم المساعدة ولو بالقليل. وأنا عن نفسي حتى لا أشعر بالألم أخصص مبلغ من دخلي وكذلك من مصروف أطفالي ودائماً نضعه في حسابات الجمعيات الخيرية أو هيئات الإغاثة أو أذهب بنفسي من فترة لأخرى لإحدى الجمعيات الخيرية وبها قسم نسوي وأضع ما الله به عليم. وهناك أجد من النساء المحتاجات في حال صعب أن أصفه .. يا إلهي الحاجة والفاقة صعبة جداً خصوصاً على النساء والأطفال فرحماك ربي وفعلاً اختلط علينا الأمر ولم نعد نعرف المحتاج من المحتال جزاك الله خيراً أختي نبرات وعمال النظافة فعلاً يستحقون ما يقدم لهم من صدقات فمرتباتهم ضعيفة جداً وكذلك نضيف للقائمة عاملات النظافة في الجامعات على سبيل المثال فهن يعانين معاناة لا يستهان بها |
جزاك الله خير
|
اقتباس:
أشكر مروركِ على موضوعي ولكِ بالمثل |
اقتباس:
مشكورة على مروركِ بموضوعي فعلاً إنما الأعمال بالنيات وعلى نياتكم ترزقون فالواحد لازم يستحضر مخافة الله وأنه مطلع على سريرته ولكن للأسف بعض الناس يخاف من الناس ولا يخاف من رب الناس |
اقتباس:
رب درهم سبق ألف درهم ولو أعطيناه الشئ البسيط نكون على الأقل أرضينا أنفسنا بعدم رد السائل منكسراً ولنا الأجر باحتساب هذه النية والعمالة فعلاً تحتاج لفتة حانية أذكر سمعت عن وحدة تجهز ساندويتشات بسيطة وعصير وتحطها بكيس وتعلقها على باب البيت والعامل لما يأخذ القمامة أعز الله الجميع يأخذه ويأكله وتعود على ذلك وما أعظم أجرها خصوصاً أن أغلبهم ينظفون الفجر فعلى الأقل يفطرون به |
اقتباس:
+1 بصراحه مشكله والله ما تعرق مين المحتاج للصدقة ومين الي محتاج ؟ والمسأله صارت أحترافيه مره كنت عند صراف وقفت جنبي سياره من أحد دول الخليج ومعه زوجته وأطفاله وقام يشكو ظروفه ويبغي يسافر بس ما معه حق البنزين ؟ واعطيته رجعت بعد كم يوم لنفس الصرافه ولقيته ؟؟ ونفس موال القصه وقلت له الله يعطيك |
اقتباس:
|
اقتباس:
هذه سادس مرة أكتب هذا الرد من أمس أحاول ولما أرسله ينقطع الإتصال بالشبكة:29::29::29: وأخيراً تم الإرسال:14: يا ليت تفيديني كيف تقدمين لهم الصدقة لأني أخذت رقم وحدة تشتغل مع أبوها شغلة بسيطة وكسرت خاطري وطلبت منه رقمها بس مو عارفة أقدم لها شئ لأن بعضهم فيهم عزة نفس وأخاف أجرحها أنا ببالي أعطي أبوها شئ عن البرد لأنه يشتغل في الهواء دايماً أشوفه الصباح ما عليه إلا ثوب وفانيلة خفيفة وبكم قصير أحزن كل ما أشوفه وفي المقابل ناس تلعب النعمة وتفسق الله لا يخسف بنا اللبس الواحد ما يكررونه وعذرهم وش لون نلبسه شافوه آل فلان في المناسبة الفلانية ومصيره الدواليب اللي غصت من الخير ويا ليت يتصدقون فيه الله يهديهم إلى جادة الصواب |
اقتباس:
كلامكِ عين العقل وأنا أيضاً عودت أطفالي على الصدقة من يوم هم صغار ونأخذهم معنا السوق ونشتري حاجات للفقراء مثل مؤونة بيت أو مقاضي رمضان وأخليهم هم يختارون والحمد لله زرعت فيهم هالشئ بفضل الله |
تذكرت موقف حصل لي منذ سنوات رأيت وحدة حالها ضعيف وتشتغل في مكان عملي وكانت تشكي من ضعف حالهم وظروف أهلها وأنها ما كملت دراستها وجالسة عند جدها يعني ظروفها غامضة شوي بس تقول أبوها متزوج كذا وحدة ومقصر عليهم بس يصرف على أحد زوجاته أكثر والله نسيت من كثر كلامها المهم أعطيتها المقسوم وربي يتقبل وقامت تدعي بعد كم يوم اتصلت علي كذا مرة وترسل عن طريقة خدمة ( اتصل بي ) أكثر من مرة المهم رديت عليها وقامت تشكي وأنها محتاجة وأنها منحرجة تطلب مني بس لأني أعطيتها مرة صار عندها جرأة تكلمني أنا حاسة إنها محتاجة لأن شكلها يدل على كذا ما لكم بالطويلة :29: قالت أبغى مبلغ كذا وكان مبلغ كبير:24: أنا حسيت السالفة فيها استغلال طيبتي فسألتها والله المبلغ اللي طلبتيه كبير بس ممكن أسأل ليش تبغينه ؟ قالت عندنا زواج وأبغى أطلع فستاني من الخياط وناقصني هذا المبلغ أنا قلت لها والله أحاول أشوف لكِ ( أنا ما أبغى أكسر خاطرها بردي ) بس ما أعطيتها أنا اللي لفت نظري إنه عندها جوالين واحد شحن وواحد فاتورة أنا ما عرفت الرقم وأنا ما أرد على أرقام غريبة دائماً بس ما أذكر كيف عرفتها أو يمكنها اتصلت من رقمها اللي أعرفه ولما قالت أنا اللي أدق قلت لها ما عرفت الرقم قالت هذا رقمي الثاني ولابسة خاتم ذهب فخم وتقول هذا هدية من صديقتي أنا أتمنى تكون صادقة بس الشكل العام ما يوحي بكذا ولو كانت فعلاً محتاجة ليش تخيط فستان بهذا المبلغ رغم إنه في جاهز 100 أو 200 يعني الواحد يمد رجوله قد لحافه أنا ما أتمنن عليها بس والله شكيت في وضعها هل هي محتاجة وإلا لا ؟ منطقة سكنها فقراء وأنا شفتها بس والله احترت وبالأخير مسحت رقمها وبعد كذا ما اتصلت علي الله يهدي بعض الناس ما يدري إنه ممكن ربي يبلاه بالفقر فعلاً |
اقتباس:
أخواتي وأخواني لنتناقش في هذا الموضوع من جانب آخر وهو كيفية مساعدة المتعفف خصوصاً لو كان من الأقارب لأنه أحياناً نجد بعض الناس أغنياء وفي الجانب الآخر له أخ أو أخت تعاني الفاقة والحاجة ربما لا يتبين ذلك عليهم أو أن الأخ لا يهتم بوضع أهله ولا يقف معهم في الأزمات وأغلب المحتاجين هذه الأيام ليس من نقص رواتب أو مدخولات بل من كثرة الديون التي أثقلت كاهله وجعلته في مصاف المحتاج ومن حرصه على عدم توضيح حاله يجامل على حساب نفسه وقد يستدين حتى يخرج بالصورة في المناسبات خصوصاً لو كان لديه أطفال لأن الأطفال لا يقدرون الوضع ويريدون ملاهي ومطاعم وغيره نريد حلولاً للفقراء من الأقارب فالدال على الخير كفاعله لعل من يطلع على موضوعنا يستفيد ولنا أجر بمشيئة الله |
هلا نبرات ،، الله يسعدك ويقدرنا واياك على فعل الخير..
شوفي ،، لما قلت اخذ عنوانها ورقم تليفونها ،، لإن ،، المحتاج فعلاً ستعطيك على طول .. ويمكن ان اكلم لجنه مكونه من عدة اشخاص ،، يروحوا ويطلوا عليهم للتأكد منهم و ماهي حاجتهم بالضبط ،، وعادة إذا تأكدت اتواعد معها في اي مكان ،، الاستغلال ؛؛؛؛ اما إذا احسست انرهناك من يستغلك ،، فخذيهاا قاعده ،، لا تعطيه المال مباشرةً ،، قولي سأدفع بالنيابه عنك ،، وين الخياط مثلاً او فاتوره ،، سدديها بنفسك ،،، واما إذا كان من الاقارب او من الجيران ومن لك علاقه وتخافين احراجهم ،، فانصحك تضعي كل ما تودين التصدق به في كيس ووضعه قدام باب البيت او رميه من على سور ،، بدون محد يحس ،،، وهلم جرااا،،، * |
جزاك الله خير
|
اقتباس:
مشكورررررررررررررررررة على التوضيح وراح أجربها وبمشيئة الله لك أجر فالدال على الخير كفاعله |
اقتباس:
الله يجعل لكِ نصيب من دعائكِ الطيب |
صحيح هذه الايام المتسؤلين كثيرين منهم النصابين ومنهم المحتاجين بجد ونحن لانقدر نميز بينهم ولكن نعطيهم بحسن نيه وكلا حسابه عند ربه
|
اقتباس:
شكراً لمرورك على موضوعي أذكر قبل سنوات كنت في مكة مع خالي وتلحقنا وحدة نشبت فينا وكان بيدنا ماء زمزم المهم ما بقى دعاء ما قالته تقول يارب يحفظ لك زوجتك ( تقصدني ) وربي يعطيكم 6 أولاد و4 بنات ويارب ويارب المهم طولت والتموا حولنا من شاكلتها بس أعتقد ما أعطيناها وبنفس الوقت نشبت وحدة بجدتي تبغاها تشتري شعير للحمام مع إنه معنا المهم لما كبينا واجتمعوا الحمام قامت تجمعه من الأرض قدامنا وأكيد بتبيعه الله أعلم بصدقهم بس ألا حظ الفترة الأخيرة خفوا بالحرم |
السلام عليكم ورحمة الله وبركاته أخواني وأخواتي أيام العيد أعجبتني فكرة بس ما تيسرت لي راح أعرضها عليكم ولو فيها تعديلات نفيد ونستفيد كنت أبحث عن يتامى بس ما تيسر لي نفس اللي ببالي كنت أبغى أيتام ما عندهم دخل ثابت يعني ما لهم أعمام أو أخوال يصرفون عليهم يعني اللي دخلهم من الضمان الاجتماعي مثلاً أو على أهل الخير فكرت أتكفل بملابس العيد من كل النواحي خصوصاً للأطفال وش تسوى فرحتهم لو لبسوا جديد بهذا اليوم والله في ناس ما يفرحون بالعيد لأنه يذكرهم بعجزهم الله يغنيهم من فضله أنا حددت الأعمار من عمر سنة إلى 10 تقريباً ( أشتريهم بالجملة )وتجي المقاسات متنوعة للشئ الواحد وقلت مثلاً الولد ( ثوب + شماغ وملحقاته + ملابس داخلية + حذاء أكرمكم الله + وووو ) والبنت ( فستان + بدلة حلوة + توك شعر + شنطة العيد فيها عيدية + حذاء أكرمكم الله + ووو ) وش رأيكم بالتقسيم ؟ أنا ميزانيتي لهذه الأمور 1000 ريال تقريباً وممكن أخليها بشكل شهري أو حسب المناسبات أنا سبق اشتريت بنفس الميزانية مقاضي بيت من مجاميعه وقسمتها على 3 بيوت أنا أعرف اللي أعطيتهم بس كان من باب الهدية وأني كنت أقضي لبيتي وحسبتهم معي بس سويتها مرة واحدة وخاطري أكررها بس خايفة على مشاعرهم لأني أشوفهم كثير يا ليت تساعدوني بتحقيق أمنيتي ولكم الأجر العظيم |
اقتباس:
يا أخواني ويا أخواتي يا ليت تفيدوني حول اللي ذكرته فوق وأكون لكم شاكرة |
السلام عليكم ورحمة الله وبركاته أمس بعد العشاء رحت السوق وأنتظر المحلات تفتح بعد الصلاة كان في شايب كبير والله ينرحم على كبر سنه يمكن في الثمانين أو أكثر ويالله يسمع لابس ثوب شتوي وعلى قده باسط بسطته يترزق الله مسكين وش هي بضاعته كلها مكسرات موزعها بأكياس بلاستك وكم لعبة وشرابات أنا قبل فترة مريت جنبه ورحمت سنه كان الوقت قبل الظهر قلت له بكم المكسرات قال الكيس بريال وأخذت منه بعشرين لما ركبت السيارة قالت أختي يا ليت شريتِ كل بضاعته ما دامها قليلة ويرجع بيته بالمقسوم طبعاً تندمت إني ما اشتريت أكثر المهم سولفت لبنتي الكبيرة عنه وتأثرت هي قلبها ما يتحمل قالت ليه يا ماما ما اشتريتِ كل أغراضه بعد فترة رحت نفس السوق وما لقيته وقبل يومين أخذت أطفالي نتسوق عشان خطبة أختي ومرينا وما شفناه وأمس رحت وشفته وقلت بأشتري كل اللي عنده بس بدون ما يحس بأني أحرجته وأنا قريبتي مريضة وقبل كم يوم أعطتني مبلغ صدقة أعطيها أي محتاج وزعت جزء وبقى 50 ريال وقلت فرصة بأعطيها هذا الشايب بس بطريقة غير مباشرة خفت ما يقبلها في بعض الناس فيهم عزة نفس قمت قلت له بكم المكسرات قال الكيس بريال قلت له أبغى 50 كيسة قال خذي يا بنتي الكيس وعبي اللي تبين حتى ما فيه حيل يحطهم طلع الموجود عنده 44 كيس قلت له خلصتهم عليك وطلعت 100 ريال وقلت له كم باقي حسابي وقام يحسب أنا بسرعة حسبت بحاسبة الجوال طلع الباقي حسيت إنه فرح إن بضاعته تصرفت قلت له بكم الشرابات قال 10 ريال قلت أعطيني بـ 30 ريال بعدين قلت خلاص بأكمل حساب المية بكم السيف ( لعبة ) قال بـ 5 ريال أخذت 4 سيوف قلت باقي 6 ريال أعطني أي شئ بـ 6 ريال أعطاني سيارة قام يدعي لي ساعتها فرحت ولما بعدت عنه جلس على كرسيه وقام يصلي العشاء وكلمت قريبتي قلت خلاص باقي الصدقة طلعتها للشايب وقلت لها السالفة أول ما وصلت قلت لبنتي وفرحت لأني ما أخذتها معي ومرت قريبتي وأخذت الأغراض توزعهم بكرة على أي عامل نظافة مع ماء أو عصير بس أهلي قالوا لما حاسبتِ كان قلتِ ما أبغى البضاعة ترزق بها وخذ الفلوس بس حست هذه الطريقة تحرجه لأنه ما بسط بسطته إلا بيترزق من وراها ما ينتظر صدقة من أحد هل طريقتي مجدية وإلا كان المفروض بس أعطيه الفلوس وأترك له بضاعته يترزق بها ؟؟؟؟؟؟؟ |
| الساعة الآن 02:07 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©