|
اكتشفت ان زوجي كان يكلم وحده من قبل فترة خطوبتنا
السلام عليكم
انا عندي مشكله و اتمنى احد ينصحني انا تزوجت من سنتين تقريبا زواج تقليدي بعد الزواج باسبوعين سافرت لندن مع زوجي للدراسه بعد ما وصلت هناك بفتره اكتشفت ان زوجي كان يكلم وحده من قبل فترة خطوبتنا لي بعد زواجي باسبوعين المهم .. بعد ما اكتشفت السالفه واجهته فيها و قلتله اني راح اعديها على انها ماضي بس بشرط ان يحط في باله اني ما راح اغفر له اي خيانه بعدين خصوصاً اذا رد علاقته مع اللي كان يكلمها طبعاً مع مرور الشهور كنت كل فتره اكتشف لي عيب فيه ( هالعيوب تتلخص في حبه للبنات ) يعني ما كان يكلم بس يحب يطالعهم و كل هالاشياء اللي عرفته عنه قامت تخليني افقد الثقه فيه شوي شوي يعني قمت ما أأمن اخليه بروحه و مع هذا كنت اسامحه و اعطيه مجال انه يتعدل من بعد ما يعتذر لي طبعاً و عمري ما فضحته و شكيت حق اي حد سوالفه الحين و عقب هالسنتين رجعت مره ثانيه اللي كان يكلمها و ضافته بالايميل ان في البدايه ما كنت ادري بس حسيت قلبي نغزني و قلت الا اتأكد و اشوف شالسالفه دخلت ايميله و لا اشوفها دازتله ايميلات و فيها صورها و المشكله انه شايفهم و خاشهم و قريت محادثاته معاها و كان نص الكلام غزل @@ انا حددددي مصدومه واجهته و قمت ابجي و قلتله تردني ديرتي ما اقدر اعيش مع خاين و من هالحجي اهو على كلامه انه ندمان و قام يعتذر لي درجه شوي و يبوس ايدي عشان اسامحه و مو راضي يخليني ارجع و بصراحه انا حدددي مصدومه كلش ما توقعتها منه الحين السالفه صار لها 3 ايام و انا حرقة قلبي جنه السالفه توها اليوم صايره مووو قادره اسامحه و انسى حسيت اني فقدت الثقه فيه تماااماً و صرت كل ما طالعته اشوف صورتها و سوالفه معاها وصلت بتفكيري لي اني اتطلق :( ( وللعلم انا ما عندي عيال و اهو وايد زين و يدور رضاي بس هذي عيوبه ) مادري شسوي عفيه ابي حل و اسفه اني طولت عليكم بالكلام بس حبيت تعرفون القصه كامله عشان تنصحوني |
اما انه غلطان فهو غلطان.. الزواج التزام بين الطرفين
ولكن هل تعتقدين انه يحب هذيك البنت..؟؟ لو كان يحبها اصلاً ما راح وتزوجك انتي.. هو يعتبرها تسلية.. مع ان هذا الشيء خطأ فادح وتلاقينها بنت اللذين متشبثه فيه وتدوره وماتخليه بحاله زوجك الان مكسب لها.. متزوج وعاقل وما يسوي فضايح وبلاوي الشباب انتي يا اختي مصدومة من زوجك ومعك حق .. بس خليك ذكية.. وفكري معاي بمنطق شوي لو تركتيه تريه بينجرف اكثر .. وما اسهل الانجراف في مسالك الشياطين ولو واجهتيه بعنف رح تتأثر علاقتكم.. ولا تستبعدي انه اذا ضاق منك راح وفضفض لها يعني كأنك انتي تدفعينه بيدك من مجالك الى مدارك تلك الساقطة انتي اجلسي معه وتكلمي بصراحة.. اذا قلبه وروحه لك ويحبك لازم يترك الدرب المايل اللي هو فيه مع البنات.. واذا هو بيستمر على هذا المنوال كل واحد يروح بطريقه وياخذ راحته على سبيل التهديد مو عاد تصدقين وتطلبين الطلاق..!! واعتقد ان زوجك كريم ومتسامح فلا تتركيه للساقطات..!! وتري رجوعه نحوك سهل الان.. بس ركزي معه شوية منطق مع عواطف جميلة منك بتزين الامور ولا تفكري بالطلاق ابددددددد |
1) كيف علاقتك العاطفية والزوجية معه؟
2) هل أنتِ تحترمينه وتقدرينه؟ 3) هل أنتِ تهتمين به؟ 4) هل هو رجل يصلي؟ 5) هل هو رجل يعاملك بشكل جيد؟ 6) هل هو رجل يرغب في الزواج بأخرى؟ |
"مشكلتي زوجتي"
اهو من يوم ما اكتشفت خيانته الاخيره و اهو متندم و لليوم و هو يحاول يرضيني و المشكله اني سئلته شهالاندفاع القوي اللي ياك تجاهها جنك ما صدقت ترجع لك دامك تقول انك ما تحبها .. يقول مادري !!! انا الحين قلتله في مجال اعطيك فرصه بشرط ان اول خطوه اني ارد ثقتي فيك انك تغير ايميلك .. وافق و غيره بس مشكلتي الحين شلون ارد الثقه فيه مثل قبل يعني بعد ما شفت ردة فعله من بعد ما ضافته حسيت ان ممكن يطيح بنفس السالفه بسهوووله معاها او مع غيرها ما حسيت ان في شي ممكن يرد عن انه يخووني "البليغ" 1) ممتازه 2) اي 3) اي 4) اي 5) اي 6) مادري .. بس ملاحظته انه يحب البنات بس اهو ينكر هالشي علاقتي وااايد حلوه و مو ناقصها ولااا شي و هذا الشي اللي خلاني انصدم لاني مو مقصره و اهو دايم يمدحني و حتي لما اسئله انا مقصره بشي يقولي لا مرات احس صج يحبني يعني حتي اصراره الحين انه يراضيني حسسني انه يحبني بس ماني عارفه ليش سوا جذي |
1) احتوي زوجك.. وصارعي الكون كله من أجل المحافظة عليه وعلى بيتك. 2) زيدي من جرعات اهتمامك وحنانك. 3) ذكريه بالله، وبالخوف منه، ومراقبته.. وقولي له قوله تعالى "يعلم خائنة الأعين وما تخفي الصدور". 4) قولي له: لو اكتشفت أن ابنتك تفعل هذا.. هل ترضى لها ذلك؟ 5) قولي دوماً "ربنا هب لنا من أزواجنا وذرياتنا قرة أعين". |
السلام عليكم ورحمة الله تعالى وبركاته
ما أبشع الخيانة وما أمر طعمها ، وما أحقر من أقترفها ، الآن كلهم سيقولون لكِ إصبري ولاتطلقي وحاولي معالجتة ومصارحتة ، ويغدقون لكِ من المثاليات إلى أن تشبعي ، ولو حصل العكس منكِ حتماً ستجدين نفسك مطلقة ، ويقلبون عليكِ الدنيا رأساً على عقب. سيدتي أنصحك والله كأخ لكِ ، قولي هل ترضى بأن أقوم أنا بهذا ؟ ألم تعلم بأنه من طرق أبواب الناس طرقوا بابه ؟ هل ترضى هذا لزوجتك او لأختك وأمك ؟ سيجيبُكِ بالنفي طبعاً ( لأن هذه أخلائقهم ) فقولي له إذاً أعمل لأجل هذا ، ومن يدين يدان ، وصدقني هذا الشي يجعلني أحتقر حتى نفسي وأحتقرك أيضاً ، وأنا الآن فقدت الثقة فيك ، مما سيجعل حياتنا مليئة بالمشاكل مستقبلاً إن لم تحسن من وضعك ونفسك وتجعلني أعيد الثقة فيك ، وخاصمية ولاتكلمية ونامي في غرفة أخرى . ما أحقر الخيانة والخائنين . |
اقتباس:
اختي الفاضلة.. بالنسبة لزوجك حين تكلمينه عن اندفاعه نحوها وهو يقول ما ادري ثقي تماماً النوعية هذي من البنات ماتصدق تلاقي واحد بمواصفات زوجك ورح تتشبث فيه باقصى ماتستطيع... فصارعي الكون للمحافظة عليه كما قال قديرنا البليغ.. لمحة: اكتشف في كثير من المواقف انه ليس اشد على المرأة الا المرأة نفسها |
سبحان الله
ساخرج عن موضوعك قليلا تجد بعض الرجال الله انعم عليهم بالزوجة الحلال الحسناء وتجده الا يصر ويبى الحرام وتجد الاخر يتمنى بس ظل امراة لكى يعف نفسه ومو محصل حكمتك يارب اوصيه بمكر الله ورمبا النعم تنقلب الى بلاء وانصحى الفتاة التى تكلمه بتاخويفها وانت اكثرى من الاستغفارح |
اولا عزيزتي الرجال مايكلم بنت الا شايف نقص منك انتي حاولي تملين هالنقص
يمكن انتي مقصره بشي وانتي مو منتبه ثانيا اكثري ادعيه بكل وقت والله يصخره لك يارب |
انا اتوقع تمسكها فيه مصلحه و فهمته هالكلام
لان لما شفت صورها شكل بيتهم جداً عادي و اهي عمرها قريب للثلاثين ( يعني كلها سنه و يطلق عليها عانس ) بعدين هي عربيه ( ما راح احدد الجنسيه ) و اتوقع طمعت في زوجي لانه كلامه حلو و لان صارت للخليجيين سمعه انهم أغنيه و يسبحون بالفلوس :/ انا لما كنت اقرا محادثاتهم قبل كانت كذا مره تطلب منه يشتريلها و يدزه ديرتها و انا كل مره اذا شفت منه خيانه صغيره او كبيره مثل هذي كنت اذكره في ربه و اخلي ضميره يأنبه و دايما اقول حط نفسك مكاني .. تخيل انا اللي مسويه فيك جذي ( انه يطالع البنات و يمدحهم جدامي من غير قصد لان احس اللي بقلبه على لسانه او انه يخوني مثل الحين ) لما اقوله جذي يخزني و يسكت !! ادري جوابه ان لا ما يرضا بس ما يعترف في البدايه و اخي او اختي اللي قال اني مقصره .. اول شي مافي احد كامل .. الكمال لله و انا كإنسانه ، الله وحده يشهد اني موو مقصره عليه في و لا شي كثر ما اقدر يعني معروف ان المرأه تييها فترات مالها خلق حتى حق روحها .. انا حتي بهالفتره احاول ما ابين له و اظل اهتم فيه و اسفه ع الكلام اذا في جرأه .. بس حتى وقت الجنس ابد ما ارفضله حتي لو كنت مابي و انا الحمدلله شكلي حلو و دوم اكون كاشخه و شكلي مرتب في البيت و مهتمه في البيت و نظافته و في الطباخ و حتى مرات اقوله اذا شفت مني تقصير قولي لان شي طبيعي ان مرات اشياء ما تمر على بالنا و اهو يقول اني مو مقصره .. حتي جم مره اسمعه يسولف مع امه و يمدحني لها :/ يعني احس كلش ماله عذر انه يخون بصراحه للحين مو قادره انساله اياها بس الشي الوحيد اللي خلاني اصبر و ما استعيل بقراري انه اهو انسان وايد زين و شاريني بس هم للحين محتاره اخاف اظل معاه و اظل طول عمري في شك لان الثقه انعدمت لاني حسيته استغفر الله مثل ما يقولون "خفيف" بسرعه يلين جدام البنات .. مع انه واايد علاقته بربه قويه بس مادري شفيه صاير جذي |
السلام عليكم ورحمة الله تعالى وبركاته
مع وافر الإحترام والتقدير لأخواتنا العوانس ، وعسى ربي أن ييوفقهن ويعوضهن بأسياد الرجال ، إن لم يكن في الدنيا ففي الآخرة . أما بالنسبة لزوجك والله العظيم شعور جداً مميت ، " ويحر القلب " ، أنا بس أتخيل هالشي " ما أطيق نفسي " ، قولي له أن يخاف الله فلا يجوز لك يازوجي أن تصلي وتطيع ربك من جانب ، وفي الجانب الآخر تعصية وتتخذ من الخيانة باب لإرضاء عدو الله الشيطان . الله سبحانه وتعالى كذلك لايحب الخائنين ، وقال جل في علاة ( إن الله لا يحب من كان خوانا أثيما ) . لاتتهاوني مع هذه المشكلة ، وأصنعي المستحيل لحلها ، والله إن لم تحليها سوف تجدينه بارد في كل شي من ناحيتك ولايحس بكِ ، ولا أدري ما بال الرجال يبحثون عن الحرام ، وحلال الله بين أيديهم ، ولا أدري أيضاً ما الذي يوجد في الساقطات ولايوجد في العفيفات ، شيء محير ، وفي نفس الوقت حقير . أسمحي لي فأنا تفاعلت مع المشكلة كل التقدير . |
اختي انتي حاولي تكونين عشيقة له مو بس زوجة
صحيح هو غلطان من راسة الى رجوله ولكن هو حديث العهد بمعاكسات البنات ومااتوقع انه يترك هالعادة بسهولة انتي حاولي تتغزلين فيه تكونين الركن الحاني له عشان مايفكرر يعاكس هالساقطات واستغفري كثيررر فأنه عجب العجاب |
لا والله انا ما قصدت بكلامي اهانه للعوانس
بالعكس الله يرزقهم الرجال اللي يتمنونهم يا رب بس كنت اقصد انها ما تبيه حباً فيه .. بس لمصلحتها انا الحين قلت ما ابيه يتعود ان كل ما اعتذر انا رضيت و ردت المياه لمجاريها لان جذي راح يتعود ان اوكي خلني اخونها و لي درت اعتذر و بترضا و هم من جهة الدين هم قلتله شلون تحسب نفسك من المتدينين و انت هذي سوالفك و قلتله حرام انت حجيت راحت كل اثامك .. ليش قاعد تردها على ناس ما تسوى و اختي الصابره لا اهو ما يعاكس البنات بس يستمتع برؤيتهم يعني مثلاً كله يقولي يحب القعده ببلاد الغرب عشان الخضره و الماء و الوجه الحسن !!!!! اقوله اوكي ادري انك تموت فيهم بس على الاقل احترمني .. ثمن الكلام اللي قاعد تقوله لي يقولي لا انا قصدتج ما اقصدهم :/ .. بس ادري انه يجذب لان وايد سوالفه تدل انه يحبهم او يفضلهم و انا صايره صديقته اكثر من اني زوجته بس لا اواجهه او اتحلطم على سوالفه يبدي يعصب و يقولي انتي بتصرفاتج قاعده تكرهيني بالزواج !! يعني تخيلو على كل شي سويته .. ضحيت بدراستي في ديرتي و هديت اهلي و ييت معاه عشان دراسته و قاعده اهتم فيه من كل النواحي و دايما الابتسامه على ويهي ، كل هذا ينساه اذا بس حاسبته على سوالفه ! بالله عليكم شسوي يعني لما واجهته بخيانته يقول انتي اللي غلطانه ليش تفتشين من وراي !!! كان المفروض تسكتين و تنطريني لما اتوب و اوخر عنها ، شوفي شوصلتينا له !! بس لما رديت عليه و قمت ابجي قام يعتذر يعني شوفو وجهة نظره .. راح امووت منه |
حاولي تتقربين منه وتتفاهمين معاه
صدقيني لما الرجل يغازل ويكلم بنات اكيد يدور الكلام الحلو والرومانسي يعني حاولي تتقربين منه اكثر وبالتوفيق |
شرايكم بدل نقول عوانس نقول متأخرة عن الزواج او متأخرات
حفاظا على مشاعر أخواتنا الفاضلات بالنسبة لمشكلتك طالما أنك مو مقصرة حاولي ان تعززي الجانب الإيماني فيه أقصد يزيد مخافة من الله والعقاب خلال حديثكم مثلا او وانتوا طالعين نزهة ولاشي وممكن إيميلات كل فترة او مقطع يوتيوب لشيوخ أفاضل ممكن إنه يسمع لهم ويقتنع بحكيهم موفقة |
ياقلبي انتي والله مرا انقرت عليك...هو صح شيئ يعوووووووووووور بس خليك قويه...
أول حاجه هذي طبيعة زوجك ميال شويه للإناث بغض النظر عن الحب...يعني مو لازم انه كلمها انه حابها لا لا بس عشان طبيعته...في شيئ كمان مهم ماكان لو داعي تسويه الي هو التفتيش ورا زوجك لو كنتي متأكده ملييون في الميه ان وراه شيئ لا تفتشي في شيئ ما طاح في يدك لأنك راح تفتحي ع نفسسك ابواب ما تتقفل ... زوجك واااااااثق تماما انك تحبينه ومستحيل تتركينه عشان كدا تسهل عليه كل مره يخون وفي باله هالي عندي كلمتين ترضيها عشان كدا اتخذي موقف صاااارم...الي يظهر لي كمان انك ذايبه في شخصيته مرا اوكي تسوي واجباتك كلها كامله بس مو تضغطي ع نفسك انتي برضو لكي حياه تبين تعيشينها خلي لك شخصيه وحياه مسستقله مو حياتك دايره حوله ... اقري للدكتوره ناعمه الهاشمي لها كثير قصص في النت شبه بوضعك واعطتهم حلول مرا حلوة... قبل كلل هالاشياء خلي الله رقم 1 في حياتك ...انتي تطيعي زوجك عشان الله ..ماتخوني عشان الله ..ما تفتشي وراه عشان الله ...ماتقصري في حقوقه عشان الله ..فلو حصل اييي شيئ ماراح تتأثري التأثر الكبير لانك تتعاملي مع الملك سبحانه وكل شيئ عنده مايضيع ... وبالدعاء راح يسير زوجك مايلفته في الاناث غير حلاله .. بس ثقي بالله.. وكان الله في عونك... |
والله اني قريبه منه و متفاهمين تماماً
و هم بعد وايد انصحه من ناحية الدين سمايل .. حطي نفسج مكاني يعني معقوله اكون شاكه الى متأكده ان زوجي يخوني و ما افتش عشان اتأكد و احل المصيبه قبل ما تكبر !!! الابواب راح تنفتح اكثر لو كنت ساكته عنه انتو لو قارين المحادثه اللي بينهم جان ما لمتوني والله انصدمت .. صج حمدت ربي اني لحقت عليه حالياً بعد ما اعتذر لي مليوون مره و حلف ما يعيدها قلتله اني راح اقعد لي بعد شهر لان في عطله بعد شهر و الحين صعب ارجع عشان ظروف خاصه و راح اشوف نفسي اذا اقدر اعيش معاه بهالفتره و لا لا بعد اللي سواه انا الحين قاعده معاه و اكلمه بس اني ارد على قد السؤال و شايله ايدي من البيت ( لا طبخ و لا تنظيف ) مادري اذا اللي سويته صح و لا لا ؟! |
الله يعينك يا أختي ,’~
من رأيي انك تخليه يحلف على القرآآن انه معد يخونك او حتى يفكر في غيرك ,’~ وطبقي ماقاله لكِ الاخ البليغ بارك الله فيه .~ دمتي بأماان =) |
اقتباس:
لآ ياحلوة لآزم من دحين تقومي تنظفي وتطبخي وكل شي صدقيني هو بنفسه راح يندم انو كلم غيرك,’~ لآ تهملي واجباتك الاسريه يااااقلبي أنتبهي |
الله يعينج و يهدي زوجج
|
السلام عليكم
ما بدي اجرحك بكلامي ، لكن الصراحة راحة لونها مرة وسامحيني اختي انتي بنظري تدلعين يعني مو لدرجة لا تنظفي ولا تطبخي ، وانك تجلسي معاه شهر بعدها تقرري اذا تكملي معاه او لا وخصوصا انه رجل كويس ... انا ابي اسالك : انتي شفتي مشاكل غيرك ؟ هناك نساء يتمنون فقط امنية ان يكون زوجهم مثل زوجك لا تخسريه ولا تصغري عقلك وخلي الدلع هذا لزوجك حاولي كوني جدية شوي واقول بالنسبة لمشكلتك الرجل مخطا بدون ادنى شك ، لكن النساء لديهم سحر خاص وطالما انه يحبك لازم تسحريه بانوثتك عشان ينسى الدنيا كلها مثال من مليون مثال : بس يرجع من الشغل بالليل طفي الانوار وولعي شموع وخلي الجو رومنسي حطي عطر وبخور وتزيني له وسوي عشا وحسسيه انك ما تستغني عنه خله يحس بانه ما يقدر يفارقك لحظة واحدة والافكار كثيرة جدا المهم مثل ما قلت لك ، كوني جدية واللي يشوف مصيبة غيره تهون عليه مصيبته بعد الطلاق مثلا شو ؟ تقعدي في البيت وبعدين ؟ سامحيني على الاطالة شغلة اخيرة لو بالامكان تحذفي كلمة العوانس اللي بين قوسين من الرد الاخير بالصفحة الاولى لانه فيه اساءة مش مقصودة .. والله يهنيكم |
من رايي تتواصلين مع البنت اذا تقدرين وتمسحين فيها الارض وتهددينها مجرد تهديد انك بتنشرين صورهااا
|
ما اعتقد ابدا انه ينظر لغيرها من النساء لان زوجته مقصرة فانسبة كبيرة جدا من الرجال عينه زايغه حتى لو كانت زوجته ملكة جمال واحسن طباخة وقمة الرومنسية وممتازة من ناحية الفراش
ولكن اظن ان هذا مرض في القلب من كثر ما كان يكلم وينظر ويفتتن بالنساء في فترة المراهقة وقبل الزواج ولم يغض نظره بل تركها للشيطان حتى اصبح مثل الادمان الذي يحاول ان يتركه لكن لايستطيع انا ليس لدي شك ابدااا في حبه لك ورغبته في اسعادك واحساسه بتانيب الضمير عندما تذكرينه لال اؤايد فكرة التحدث مع الفتاة التي يكلمها فذلك سيجعلها تزيد في اغوائها لزوجك لانها جعلتك تحسين بانها تهدد مكانتك عند ه وانه ليس لديك ثقة فيه وانك يئست من استجابة زوجك لتركها والان تقنعينها بتركه وان كان يستجيب لك ويعتذر لك في هذه الايام فانه مع مرور الوقت وتكرار نفس الخطاء منه ونفس العقاب منك سيعتاد على الامر ولن يكون لكلماتك ذلك التاثير انصحك بالتسجيل في موقع الدكتورة ناعمة الهاشمي والتواصل معها فهي متخصصة في مثل هذة الاستشارات وتعطي حلولا ممتازة جدا |
انا خليته يحلف ع القرآن انه ما يعيدها
و خليته يغير ايميله و غيرت باسوورد الايميل القديم و هم فكرت اكلم الحقيره ، بس ما فكرت اهددها بصورها (بس من غير تطبيق يعني) و اللي قالولي ان غلط اني ما اهتم في البيت.. انا ما سويت جذي من باب الدلع و قعدتي معاه شهر مجبوره مو بمزاجي لظروف خاصه ، بس انا قلت خليني بهالفتره اشوف نفسي اذا اقدر اتعايش معاه و لا لا لان مثل ا قلتي ، شنو بعد الطلاق ؟! مع احترامي للكل .. بس في النهايه لو بتزوج غيره ما راح يطلع وايد احسن منه مافي احد خالي من العيوب و انا شلت ايدي من البيت و منه بي عشان ابيه يحس بقيمتي و عشان يعرف ان اللي سواه صج كرهني فيه و انا مالي شغل بمشاكل الناس .. علي من مشكلتي و انا في رايي ان غلط لما زوجي يغلط انا اللي اروح ألطف و اغير الجو عشان نرجع طبيعيين اهو الغلطان اهو اللي يعتذر انا ابداً مو مجبوره اني اريحه بعد اللي سواه .. ابيه صج يندم سوسو اي انا هذا اللي احاتيه خايفه لا يكون أدمن هالسوالف عشان جذي خليته يحلف مشكووورييين واااايد صج ارتحت لما فضفضت لكم و سمعت نصايحكم |
بالنسبة للي يقول انه شايف نقص منك اسمعي يا الغاليه لا تهتز ثقتك بنفسك هذي علاقة قديمه وحن لها ويمكن هي اللي تلزق فيه الحل يحذف الايميل ولا عاد يفتحه
اما ثقتك فيه كيف تستردينها الزمن هو اللي بينسيك جزء منها لان الخيانه صعب نسيانها ومستحيل ترجع الثقه كما كانت خاصة اذا كان مظهر الوجه البريء الملتزم الله يعينك ويفرج همك ويشرح صدرك حاسه فيك ومجربه الخيانه |
اختي امرأه من عالم
كلامج حسسني انج صج فهمتي قصتي صج اهي اللي تتلزق فيه و اهو طول هالفتره ما حاول يرجع لها بس اللي صدمني انها ما حاولت فيه وايد و لا تقولين اغوته بكلامها و صورها اهو بمجرد انها ضافته و عرف منو اهي استقبلها بحراره و هذا الشي اللي ذبحني و قاعده اقول مثل ما خاني هالمره بدون اغواء منها مو بعيده يخونني بعدين و مع اني خليته يحلف انه ما يعيدها، بس هم للحين مو قادره انسى و ارد الثقه فيه و مثل ما قلتي .. شكله بريء و ملتزم و لا يبين عليه انه غلط هذا الشي اللي مصعب علي اني ارجع الثقه لان كلش ما يبين عليه و آآآمين يااا رب الله يفرج علي و عليج و على الجميع |
اقولج شي ، انا حدي منقهر
شوفيلج حل ، وإن ماضبطية من الحين ، وشافج متساهلة معاة ، ترى بيصير هالشي طبع فيه وأبو طبيع مايجوز عن طبعة ، خليج ذكية ، وشدي علية عشان يعرف أنج إنسانة ولج مشاعر وإن ماتعدل وتسنع الله الغني عنه ، لأن محد عندة الإستعداد يعيش مع شخص مو ملكة . نعنبوا بليس والشيطان الحيوانات ماتحب الخيانة ، وعندها وفاء بروح أنام لاعت جبدي ههههههه أسمحيلي يختي والله أني تفاعلت معاج . إحترامي . |
ههههه والله ضحكتني و انا عايفه الدنيا
اي انا حالياً شاده عليه و بعطيه مجال يتوب و قلت والله ان عادها مره ثانيه راح امشي بكل هدووء و بدون نقاش ماله داعي معاه والله كريم مشكووورين على تفاعلكم و تعاطفكم معاي |
| الساعة الآن 02:18 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©