|
معاناتي مع زوجتي ..
الســلآم عليـــكم ورحمة الله وبركــــآآته أولا يســـعدني إني أكـــون أخ جديد لـــكم بهذا الصـــرح الشامخ لنلجـــآء لــه بعد الله في طرح وحل مشاكلنا وهمومنا وموضوعي طرحته لأني بكل صرآحه ما أعرف شيء اسمه اني افضفض لأحد واجلس معاه وكذآ تعودنا حتى اقرب الناس مايمكن نقول لهم مو لشيء بس احس انهم بيخذلوني ..نرجع للموضوع ((زوجــتي))...!! أقولكم القصه وأنتو أحكمو بعيدآ عن العاطفه ...أنا شاب زي أي شاب يتمنى الزواج وبيت وأسره وحياه حلوه وأهــــــم شـــيء الراحه النفسيه قبل كــل شيء والأهم بعد من ذا كـــــــــــلللللله يجمعنا (( الحــــــــــــــــــــــب )) وربي ياجماعة الخير إني تزوجت وكل فكري أنسى اللي راح من حياتي وأفكر بأسرتي وأوفر لهم الأشياء اللي أنا فاقدها من اللي حولي قلت لنفسي يافلان هذا شيء كبير بيصير بحياتك وانت بنفسك لك الأثر الأكبر فيه يعني أبعطيهم إهتمام وثقه بالنفس وأكون معهم حولهم نتشارك كل اللحظات ونكون قريبين من بعض تزوجت وسبب إختياري لها لأنها قريبه من الأهل ومرتاحين لها سبب رئيسي غير كذا اسلم من المشاكل اللي اسمعها الاهل و الزوجه لاحظو فكرت فيها وبالأولاد ومستقبلهم مع اهلي بعدين مايكون بينهم مشاكل ونكون تمام ...ولأكون منصف لي ولها وربي الشاهد على كلامي أنا إنسان عاطفي وأهتم للغير أعشق الرومنسيه أحب الجو الأسري جدآآآآآآ ..وشخصيتي ودوده بشهادة من حولي تمنيتها ع الاقل حولي او متقاربين على الاقل ((لــــــكـــن)) يشهد علي ربي من يوم ما خذيتها وأنا من تعاسة إلى تعاسه ليه طيب ....؟ لا حب لا موده لا كلام زين لا ((((((((إهــــــــــــتــــمآآآآآآآم )))))))) وهو سبب اللي انا فيه كوني متأمل كثير بهالزواج ...لكن اللي حصل وش لنا سنتين متزوجين ولا لحظة قالت مثلا مثلا ((شخبارك حبيبي )) أقسم بالله ماعمري سمعتها منها حياتها مدري وش اقولكم لا مــــــــبآآآآآآآآلآآآآآهـ ...نجي للنفسيه الضحك تستكثره على نفسها نجي للكلام الحلو وربي ما اسمعه نجي للطبخ أقسم بالله إنى على وجبه معينه طوال سنتين تخيلو ولا إضـــــــــــآآآآآفه يعني تكـــــــــــــــــــــــررررررررررررررهـ المطبخ نجي للحب أقسم برب الكعبه مافي قلبي لها ذرة حب بالعكس لا قالت بجلس عند اهلي اقول ايه ايه مو مشكله واتنمى تطووَل عندهم تباعدنا وتباعدنا وتباعدنا لدرجة اني نسيت اني متزوج وربي ...بالاسم بس قلت انا السبب ولازم اعالج المشكله شلون ...؟؟؟ أنا :تــعالي يافلانه انا مقصر بشيء أي شييييء هي: قالت لا ليه وش صاير !!!! أنا:وش اللي وش صاير عاجبتك هالحياه ولا ناسيه انك زوجه وام لولد هي:كل الناس كذا وان شاء الله نتعدل وابشر ومن هالكلام وربي ياناس يمكن جلست معها اكثر من 10 مرات وكلها تنتهي بدون نتيجه وبنفس الكلام قلت يمكن ما تبيني وسألتها وقلت ورب المصحف عادي بس نعرف المشكله ونشوف بعدين نحلها اذا قدرنا وفرت لها كل شيء كـــــــــــــــــــــــللللللللللل شيء تبيه وبعدها خلاااااااااص تعبت وبديت افكر بالطلاق قلت لها هالشهر وبشوف المهم سافرت لدورة عمل وكنت راجع ولا لقيتها بالبيت كانت عند اهلها تخيلو المهم سكت وجاء نهاية الاسبوع الثاني وجات اول ما دخلت وجلست باليت جات قالت ترا جايه على شان خاطر امك ....!!!!! هنــــــــــــــــــــآآآآآآآآآآآ وقفت وأيقنت لا يمكن لها الزواج ينجح لااااااااااااايمكن انا ياناس فاقد كل شيء كــــــــــــــــــــــــــــل شي نفسيتي كلن قام يشوف الهم بوجهي انهرت ما صرت اقابل احد ابد قلييييييييل تأثرت قمت ألوم نفسي وربي المشكله ما من احد غير ربي اشكي له لا يمكن اقول لأحد لأني خايف وبنفس الوقت تربيت كذا..ويــــــــــــــــآآآآآآآآآآآشــــــــــــــي ـــــنهآآآآ دموع الرجـــــــــــــــــــآآآآآل يا شينها من بعد الطموحات والتخطيط انصدم بواقع هد كياني بعثرني صرت اخالف الناس حتى بالنوم ....!!!! قلت أذلفي لبيت أهلك قالت أصلن انا رايحه دقيت على اخوها جاء وخذاها كبر الموضوع ودرو اهلي واهي أقسم لكم بالله ماعاد صار بوجهها حياء تخيلو تقول لأهلها وبكل وقاحه واللي طلع معها ان اسلوبي مهوب حلو مادرت وش تقول ..وقبل لأقول لأهلي رحت لأبوها وقلت جبها وانا بتكلم واذا طلع بكلامي كذب او غلط لك الحق تسوي اللي تبيه ..قلت اللي عندي وبكل صراحه واهي تجيب خزعبلات لأن موقفها ضعيف والكل واقف معي قلت فمان الله .. وقلت لها قبل لا أطلع ولأبوها (( اذا فكرت ترجع ترا فلانه الأوله مـــآ أبييييييييييها )) وأحلف لكم بالله مــــــــــــآآآآآآتت فيني ذيك المشاعر ماااااااتت ولدي بين يدي احبه صح لكن تذكرت مراحل مريت فيها أنا قبل وصار عادي الشعور عـــآآآدي يمكن لأني تأملت واجد وفكرت كثير بأشياء ما تصير الا بمسلسلات متبوع نصها ...بس كنت اللي ابيه اللي ابيه بس اني اصير غير بعيونها وألحين أفكر بالطلاق وأهلي يقولون لا وقلت حتى لو رجعت ...لوو رجعـــــــــــــت إهي ببالها اني بصير مثل أول طبعا لا هي تلفظت بأمور كبييييييييييييييييره وألفاظ ماتصلح ومشأأأأأأأأكل وأمورنا طلعت وش بعد أبي فيها ..لو جات بس تمسك بيتها وولدها وبس وأنا لا يمكن أظلمها لكن فلان الأول انتهى لكن الأكيد ان وجودها معي ظلم لي ...!!!! ولا شيء يجمعنا ولا شــــــــــــــــــــــــــــيء ....!! أبسط الأمور مثلا أكره أني أقولها سوي كذا وكذا ..لا أحبها مثلا من نفسها تحضر الشيء وبلمستها لجل تبرز شخصيتها ويكون لها كياناها ..الواحد منا لو جاء من الدوام أكيد تعب وقرف يبي يجي ويلقى بيته مريح وفيه حيويه وتكون زوجته هنا لها الدور الكبير متحضره وامورها تعرفونها لكن أقسم بالله العلي العظيم انها تقوم وقت ما افتح الباب وتمر علي حتى وجهها ما غسلته وتكب الغداء وترجع تنام .....!!!!! هذي حياه أحيانا أنا اقول أهي لذا الدرجه غبيه ماتدري يعني إهي إذا استمرت على هالوضع اكيد الطلاق فيها فيها ...يعني عاجزه لا توفرين لزوجك اللي يبيه هــذا زووووووجك سترك وغطاك عاجزه توفرين له ابسط الأشياء عاجزه ما تقولين له حتى أحبك ....!!!!! أقسم بالله إنه غللللللللللللللللللللللللللللللللطــــــه غلطه تكفوووووووووووووووووووووووون شوفو لي حــــــــــــــــــــــــــــــــل ((( الطلاق ولا أتزوج عليها ولا وش قولو لي مع العلم انها عند اهلها لها شهر ونص )) |
السلام عليكم ورحمة الله وبركاته
تعوذ من ابليس ياخوي قوم توضى وصلي لك ركعتين واجلس بمكان هادي وإذا طلعت الكورنيش او البحر يكون أحسنا إجلس وفكر على رواقة إنت وش تبي بالضبط هل تفضل تعيش معها بعد شرووووط طبعا تنفذها \ او تفضل الطلاق وطفلك يعيش بعيد عن أبوه ؟ هي شكلها مستهترة وماخذة الدنيا مشي حالك أنا أشوف لازم تكون معها حازم جداااا بس قبل كل هذا خليها عند أهلها فترة عشان تحس باللي سوته بعدين تروح عندهم وتطلب وجود ابوها (نصيحة خلي الأم بعيدة غالبا الأمهات في صف بناتهم حتى لو هم مخطئين ) وتتكلموا وتقول كل شي عندك وإيش طلباتك اقصد الواجبات الي مفرووووض تسويها ولاتخلي شي إلا وقوله ولازم تكون معاكم عشان تشوف وش تدافع عن نفسها وقبل لاتطلع قول انا بتركها فترة إذا تبي ترجع لازم تنفذ اللي قلته ولاالمركبة ماتمشي وإذا ماتبي مالي إلا إني أتزوج وحدة تعرف وش واجباتها وتلبي طلبات زوجها وتسعده ؟ واطلع وحتى لو سمعت منها كلمة كذا ولاكذا عطها طناش ولاتلتفت وخليك جاد بكلامك وبس شوف وش يردون عليك بعد فترة والباقي على زوجتك إذا مشت صحيح كان بها وإذا لأ مالك إلا الزواج |
اول شيئ لاتستعجل بل الطلاق اجلس معها وكلمها يابنت الحلال انا ابى كذا وكذا يمكن ماتعرف وش واجباتها بعدين انت كمان بادر بل الكلام والحلو واذا سوت لك شيئ زين امدحها ترى الوحده اذا مدحها زوجها تحب تسوى كل مره الاحسن المهم لاتستعجل بل الطلاق عشان الولد والله يصلح بينكم
|
أخي الفاضل ..
بالبدايه اذكر الله .. .. بالنسبه لزوجتك .. شئ طيب منك حسن خلقك من البدايه مع زوجتك رغم أهمالها لك .. ومع ذلك أجتهدت في نصحها والحـوار معها في أسلوب جميل .. .. هذا النوع من النساء تحتاج الى وقت من التوجيـه وسيأتي يوم وترى ثمـرة توجيهك .. ولك أن تعرض عليها بحاجتك لزواج من اخرى لتسد مافي نفسك فلعل ذاك يكون حـافزا لها من الأهتمـام .. .. سؤالي لك .. هل أتصلت بوالدتها ووضحت لها مجرى حيـاة أبنتها معك ؟؟ هل هي صغيـره في العمر ..؟؟ .. |
اقتباس:
وكأن الخطاء مني ونست ابنتها بكلمة (( لا تظلمها )) 27 سنه عمرها |
أخي الكريم: *كم آلمتني مشكلتك وقصتك.. وكم أعلم عن قهر الرجال ودموعهم.. وكم أعلم عن طموحاتهم وآمالهم... الخ. *أجبني بصراحة متناهية لو سمحت: 1) هل تعتقد أنها تحبك؟ 2) هل أمها أو إحدى أخواتها أو إحدى خالاتها تحرضها عليك؟ 3) هل أمها إنسانة نظيفة في بيتها؟ 4) هل زوجتك عنيدة أو غير مبالية؟ 5) هل أنتَ قدّمت الحب لها؟ 6) هل أنتَ حازم مع أخطائها؟ 7) هل زوجتك تنقل أسرار بيتك لأهلها؟ 8) كيف دين زوجتك؟ 9) كيف دين أم زوجتك؟ 10) كيف شخصية أبي زوجتك؟ 11) منذ متى تزوجتها؟ 12) منذ متى وزوجتك في بيت أهلها؟ 13) هل اتصلت عليك أو أرسلت لك رسالة؟ 14) كم عمرك أنت؟ 15) هل أنت رجل صبور؟ 16) كيف هي أوضاعك المادية؟ ::: سأنتظر إجاباتك.. وسأكمل معك إن شاء الله إن أردت ذلك. |
اقتباس:
بس ثقافتها في الحياة الزوجيـه تبدوا لي ضئيلـــه جدا .. وللأسـف أهلها موقفهم سلبــــي .... أبدا معها بفكرة الزواج عليها كـ فكـره .. وأنظر الى ماذا سيتحـول حالها ؟؟ .. هل من الممكـن تكتب لنا محاسن لها ..؟؟؟ لايوجد أنسان بسيئات دون محاسن .. |
أولا أهلا بك أخي ونتشرف بوجودك بيننا [SI[/SIZE]أخي لو جاوبت على أسئلة أخينا البليغ لتتضح الصورة أكثر ....ونساعدك أكثر على العموم أخي لك الأجر على هذة المعاملة والأخلاق مع زوجتك ..وهذا من طبعك وليس تكلفا منك نقدر مشاعرك وطموحاتك...ولكن للأسف بعض لا يقدر هذا الشيء مثل زوجتك سبحان الله بعض الحريم كذا ترى إذا كان الزوج طيب معاها وخلوق وما مقصر بشي ...لا تقدر هذا وكأن الأمر لا يعنيها وهذا باين في زوجتك ...المهم.الحل أبحث عن السبب أولا ...ومن خلال حديثك انت ما تعرف ما هو السبب ..؟ ولقد ذكرت إنك أخذتها على شأن أهلك لتتجنب المشاكل بينها وبين أهلك ..!!! سؤالي هنا هل هذا هو سبب زواجك منها بصدق ..؟ او هذا من الأسباب وأعتقد إنها جميلة لهذا تزوجتها..؟ هل هي ما تحبك..؟ ولماذا علاقتها مع أمك حلوة وتقدر أمك..؟ بعد ردك سيتضح الأمر .. أنا أعتقد إن البنت إن أهل البنت مؤثرين عليها أكثر منك وخاصة أمها ( وللأسف هي سبب المشكلة) ثانيا أو إن البنت ماتحبك لذا ما تهتم فيك رغم إنك ما قصرت معاها........!! أخي لنا عودة معاك |
السلام عليكم
والله واضح من كلاااامك إنكــ مقهووور لاحول ولاقوة الا بالله شوف وأنا إخوك ترى انا مثلك رجال وإسمع العلم أنا ما أبي أعمم على البنات كلهن بس نقول ألاغلب مثل كذى في البدايه وبعدها تتعدل أنا أعلمك قسم بالله العظيم زوجتي كانت مثل زوجتك بضبط ويمكن في أشياء أنت ماذكرتها موجوده في زوجتي تخيل في بداية زواجي كنت أقول لها يااام فلان أنا أبي كذى وكذى وكنت أقول لها يااازوجتي نا ماااأبي اروح طررريق الحررام أنا رجال أخاف الله تقول إسمع أنا كذى تبيني ولا بكيفك تزوج ماعلي منك وكانت تسوي أشياء علشان أكرها وكانت تسوي مشاكل علشان أطلقها مااأكنت تبيني المهم ولعنة الساعه الي تزوجت فيها وبعدها قال لي إبوي شوف يااافلان روح عند اهلها واعلمهم المهم علمتهم ولا صار شي لان اقولك أنا رجال أحبها ولا قدرت أكتم الحب وقسم بالله ماعمرها قالت لي ياااحبيبي ولا يابو فلان أبد الا بعد ماااشفت المعامله بلمثل قسم بالله سويت مثل مااهي تسوي حتى في طريقة كلااامها وحيان وأنا أسولف معها تستهبل علي وتسوي نفسها غبيه ماااتفهم شي وعندك في الطبخ جلست معها تقريبا سنه كااامل على طبخه وحده والله اقول لها ياااابنت الناس غيري سوي تقول لي ماأعرف قلت طيب أنا أعلمك قالت لالا ماالي نفس على الطبخ قلت مااافي مشكله الاغراض الي دايم أشتريها للمطبخ فوق 800 ريال شهريا ماافي صرت أطلع وأتعشى من برى وإذا طلبت مني عشى أقول ولا مااالي نفس أروح وأي شي تطلبه مني أقول لها مالي نفس نجي للملاابس والله العظيم ملابسها لبس الخدامات حتى صارت ماااتروح الى أي مناسبه علشان لبسها ليش لان ماااعمرها لبسة قدامي لبس زين في السابق وكانت تختار أرد الانواع عندها وتلبس وإذا راحت عند اهلها تلبس احلى شي وتتزين المهم عاملتها بلمثل الين والحمدلله تعدلت معي وصااارت تحترم وعرفت طريقها الصحيح وتعرف الشي الي ترفضه لي تعرف أنه رايح يرفض لها طلبها لو إن شاء الله زيارة ابوها في المستشفى عرفت كيف روح وجيب حرمتك وعلمها السنع ترى أكثر البيوت الخليجيه كذى والله ماأكذب عليك عسى ربي أ يسخرها لك |
اخي الجنتل.. لا تبتأس فهناك من هو ابأس منك ..!!
روووق.. فكر شوي التفت حولك واتزن ثم عاود التفكير احساسي بك قد يكون نفس احساسك بنفسك.. فصدمة انهيار الامل تتحول لصرخة الم مدمرة تهز الجبال.. يبدو انك كنت تبني صرحاً من خيال فهوى في لحظات.. هذه النوعية البلهاء من الزوجات هناك من يؤزها ازززززاً هي لم ولن تجد الاستقرار في داخلها .. وتتصرف بغباء وبتصرفات شبه متضاربة ودون سابق انذار.. مؤدلجة..!! لا تشيل هم ... فمجتمعنا ينوء بمثل هذه الاشكال.. انت الان لا تحتك او تقابل احد او تتقوقع في التفكير فيها اهدأ كم يوم وتماسك.. فموقفك هو الاقوى والافضل.. حاول تستخدم اسلوب الحرب النفسية .. بث اشاعة انك بتتزوج..!! وانت اعلم بالموصلات واشباه الموصلات ممن حولها وحولك كي تصلها المعلومة شبه اكيده.. تصرف بكل هدوء .. واهتم بنفسك وحاول غسل ماتبقى من المها داخلك حينما تحس هي بانها ستفقدك.. في لحظات وضع رأسها على المخدة .. ستدور بها الدوائر حينها لن تجد من يؤزها حولها وتبدأ تحسبها صح.. العيار اللي مايصيب يدوشششش وانت ادوش الين تستوي زوجتك وبتلاقيها جايتك بس اعرف كيف تدوش يابطل بشكل مؤثر وقوي شهادتي فيما اورده اخي البليغ مجروحة وهو الضليع في مثل امورك..فخلك معه للاخير وستجد امورك انحلت وما نحن الا تكملة لما بدأه اخونا البليغ* |
اقتباس:
|
اقتباس:
|
:* لأول مرة أقرأ مشكلة وأشوف الألم والقهر ظاهر مع الحروف :* زوجتك هذه الظاهر طبيعتها وطينتها كذا وفيه رجال ونساء كثير مثلها كان الله في عونك لا أملك لك إلا الدعاء بس أنت ماقصرت وبيض الله وجهك وصبرك عليها ومحاولاتك كانت كثيرة :* أترك المجال لغيري لأني أرى أنها هذه طبيعة فيها يعني لكم بس سنتين متزوجين وكل هالسلبية والبرود والإهمال أعتقد هي ماتتعمد هي كذا طبعهااااا لأن أي وحدة فيها أحساس ماراح يرجع الرجال من شغله ويلقاها بها الوضعية سنتين يعني توهاااا عروس ..!!؟؟ وين الإهتمام والشياكة والتلهف على أستقبال الزوج..؟!! إن شاء الله الأخوان يعطونك حلول لكن أنا أرى أن شخصيتك ماتناسب شخصيتها نهائي وطبيعتكم مختلفة :* |
سبحان الله
كأنك تتكلم عني لكن اختلف عنك في بعض الامور مما اعاني منه !! |
[QUOTE=سيدة الموقف;2759628][COLOR="SeaGreen"][CENTER][FONT="Simplified Arbaic"][SIZE="4"]
:* لأول مرة أقرأ مشكلة وأشوف الألم والقهر ظاهر مع الحروف ((لا تــــلومـــــــــــــــــــــيـــــــــــــني يــآ أخـــــتي فا ولله ما كتبت هالموضوع الا من القهر)) :* لأن أي وحدة فيها أحساس ماراح يرجع الرجال من شغله ويلقاها بها الوضعية سنتين يعني توهاااا عروس ..!!؟؟ وين الإهتمام والشياكة والتلهف على أستقبال الزوج..؟!! (( تونا فالحمد أجـــل كيف العمر الباقي معها )) |
اقتباس:
تدري وش مشكلتي أنا إني بإمكاني أسوي مثل مايسوون هالناس مع حريمهم يعني أجبرها وامنعها و و و و... بس ارجع واقول لنفسي لا ياخي انت ماتبحث عن امورهم وكيف تعاملهم مع حريمهم وما تبي هالحياه وبأمكاني فرض شخصيتي وكل تلك الأمور بس ((( وش الفااااااااايدهـ )))..!! مــــــــآآآآآ آبحـــث عنه أنا مخخخخختـــــللف جدا أهم شيء الألفه والمحبه لأنه وربي لو ثنين يحبون بعض وبينهم الاحترام والاهتمام والتقدير لا كان ورب الكعبه ماينام الواحد منهم والثاني زعلان ياعمممممممي قسسسم بالله ان العرس ما يصللللللللللللللح وبس... آآآه يالعزوبيه :( |
مدري وش صار بهالحريم مادري يعني البلا بعقولهن والا نقص تربيه اسريه وزوجيه انا بهالحاله الوم الاهل لان اغلب اللي اشوفهم كذا قسم اني استحي حيا لو زوجي يجي ومايلقى غداه جاهز استحي اقوله لا قسم اني رحمتك ياخوي الجنتل يعني كله يهون الا الصلاة هي الاساس استغفر الله ماتحمل الرجل مايصلي فمابالك بالحرمه نصيحه اذا مابينكم عيال تسريح باحسان الشكوى لله انا وانا حرمه خجلت من تصرفاته
|
أخي الكريم: .•مادفعني دفعاً شديداً للدخول لموضوعك والمشاركة فيه هو إحساسي بصدق حديثك من خلال ثنايا حروفك، وقوة كمية القهر في كلماتك. •إن الحياة ابتلاء، وفيها من أمثال زوجتك الكثير، واعلم أن مثلك من الرجال كثير معذبون في بيوتهم لكنهم لا يظهرون هذا للملأ.. فتسلّى بمثل هذا فلست الوحيد. •وهذا الابتلاء لعلك تنظر له من زاوية الأجر، والتمحيص، والرفعة، ومراجعة الذات، والتقرب إلى الله سبحانه فهذا هو وقتك. •دين زوجتك ضعيف.. فأين أنت من نصحها عن الصلاة؟! •من الطبيعي أن يراوغ والدها في الحديث، ويبرّر لابنته؛ فغالب البيوت هكذا في الوقوف مع بناتهم وإن كانوا هنّ المخطآت فافهم هذا. •وإني أناشدك بضرورة حسم الأمر، ووضع النقاط على الحروف من الآن كي لا يضيع عمرك هدراً في إصلاح الآخرين.. وعليه فإني أقترح عليك ما يلي: 1) التقرب إلى الله بأداء الفرائض، والنوافل، وكثرة الصدقات، ودعاء آخر الليل، ودعاء السجود. 2) إجبار نفسك جبراً بتقضية وقتك بالمفيد النافع.. مثلا: اقرأ، سافر مع أصدقائك، صل رحمك. 3) اصبر.. اصبر.. اصبر. 4) اقرأ القرآن الكريم واستمع إليه كثيراً.. والزم الأوراد الشرعية. 5) ابدأ بجمع مالك وادخاره تحسّباً للظروف. 6) راجع أخطاءك وحساباتك بكل صدق وأمانة. 7) اترك زوجتك في بيت أهلها 4 أشهر بدون اتصال أو إرسال أو تواصل مع أهلها. 8) تطلب من أهلك –خصوصاً النساء- كتم الأمر، وعدم مناقشته مع أي أحد مع ضرورة كتمان آرائك وتوجهاتك. 9) بعد انقضاء 4 أشهر.. تأخذ والدك ورجلاً آخراً حكيماً عاقلاً كتوماً ذكياً محاوراً جيداً من قراباتك، وتذهبون جميعها لبيت والدها.. تناقشونهم.. تضعون النقاط على الحروف، وتطرح شروطك كاملة. 10) إن كتب الله لزوجتك العودة فدعها ترجع بيتها.. بعد يومين من رجوعها تعيد شروطك عليها كاملة، وتطلب منها التنفيذ بحزم خصوصاً جانب الصلاة، وتحاول أن تُصلح الأمور، وتشدّ وترخي، وتحرم وتمنع وتعطي وهكذا.. بمعنى أن تكون هذه فرصة لإصلاح الأمور، واجعل المدة من 2-4 أشهر.. إن لم ترَ تغيراً فأنصحك بالزواج من امرأة أخرى. 11) إن لم يكتب الله لها العودة من خلال مجلسكم هذا فابدأ البحث عن زوجة أخرى ::: ملاحظة: خذ أيضاً بقول الأخ الكريم/ مشكلتي زوجتي؛ لأن لديه ملاحظات دقيقة، وتصور كبير لمثل هذه الأمور. ::: -إن كنت تعلم أن زوجتك وأهلك لا ينفع معهم الصبر والتجاهل فاذهب إليهم أنت ووالدك ورجلان حكيمان غداً أو بعد غد.. وضع النقاط على الحروف. -أخبرني بجديدك دوماً. -هذا ما أراه لك، والله أعلم. -أخوك في الله/ حاتم بن أحمد-الرياض |
اقتباس:
طيب يااخوي ليش ماتكون حازم معها وتجبرها تنام بدري وتصحى من النوم قبل جيتك البيت وانصحها قلها انا مااحب اشوفك كذا حتى وجهك ماتغسلينه يمكن تستحي على وجهها ومنك .. المفروض اي عائله تبي تخطب لولدها يخلون شرط الشكل والجمال والهدوء اخر شي و يحطون في عين الاعتبار النشاط والسنع وهذا الشي يبان على البنت خصوصا اذا كانت من نفس العائله..البنت الي تحب المطبخ تلقاها من يوم هي عند اهلها وهي تحب المطبخ وتطبخ جميع الاصناف..وراح تم طول عمرها كذا.. بس يااخوي لش تفكر في الطلاق دام المشكله بس في الاهتمام واللامبالاه..صحيح في حالات مالها حل غير الطلاق..مثل لما تكون هي ماتبيك وتكرهك ومغصوبه عليك وغير كذا عدم ماتحترمك وتتلفظ عليك.. انت مشكلتك متوقفه فقط على عدم الاهتمام وكسل زوجتك وبرودها...ويامكثرهم لي مثلها برووووود غير طبيعي وكسل خلاص هي طبعها كذا ماتقدر تغيره لاهي قادره تغيره ولاانت تقدر تفرض عليها شي هو مو من طبعها..مثل الرومانسيه والكلام الحلووالاهتمام في نفسها ..وغير كذا الطبخ اذا كانت تكره المطبخ فانسى انسى انها تنوعلك في الاصناف..حتى لو حاولت هي ماراح تقدر لانها اساسا مو من هوايتها الطبخ.. الشي الوحيد الي راح يغيرها ويغير طبعها ويقلبها 180 درجه هو زواجك عليها...وتكون انت الكسبان زوجتين يتنافسون عليك وكل وحده تبي تكون احسن من الثانيه هذا اذا طلعت الزوجه الثانيه محترمه ومثل ماتبي بس وش يضمنك ان الثانيه ماتكون اسوأ من الاولى بس مو مشكله دام ان الاولى بتتعدل وتصير 100% الحرمه الكسوله البارده لاجات عليها حرمه ثانيه تصير نار مولعه والكسل يتحول الى نشاط مثل النحله <<<<انا ضد الزواج الثاني وشعاري ..لا للزوجه الثانيه:29: << بس في بعض الحالات اشجع له << الطلاق شيله من راسك مشكلتك ماتستدعي الطلاق خصوصا انه بينكم ولد.... الحل الوحيد الي ممكن تنحل مشكلتك هو التهديد بالزواج الثاني او الزواج فعلا بشرط تكون مقتدر ماديا....وبشرط العدل بينهم اذا تبي حياتك تمشي من احسن مايكون ومع زوجتين لازم تكون عادل بينهم وماتبين لكل وحده منهم انها احسن من الثانيه عشان لاتشب الغيره في قلوبهم وتصير مشاكل يشيبك راسك منها واهم شي الحزم ثم االحزم انت الرجال وانت الي تحدد مواعيد النوم ومواعيد الخروج .. |
سؤال هل زوجتك مرت بتجربة زواج سابقة ؟
|
اقتباس:
روح الله يسعدك دنيا وآخرهـ ..لكن..!!! سبق وراح لهم الوالد وقالهم نفس كلامي وكان والدها للأسف يفتقد للحكمه يقول ((كلهم مخطين )) ولله ثم ولله لو أدري اني اجرحها بكلام او او او ما كان جيته من الأساس..بس يالغالي اسم انها طلعت وماقدرت ولا التفتت ولا حتى بينت الندم ولا حتى سألت ...!!!! تبي الصراحه وبس ...اللي يحب....اللي يحب ...اللي يحب ما يسوي برفيقه هالسوايا |
كانك تتكلم عن زوجة اخي لكنة كتووووم واحس بمعاناته نصحت زوجتة كثيرا لكن دون فائدة
لهم ست سنوات والله حاليا احس انة مايحمل لها اي مشاعر حب احزن على حالتة لكن بينهم طفلين الله يهديها ويهدي زوجتك يارب |
اولا كان الله بعونك
ثانيا تأكد بأنه يوجد من هو أسوأ حالا من حالك ثالثا لا تدخل اهلك و لا اهلها بالموضوع نهائيا و اكبر غلط يروح لهم والدك لأنه في تدخل اهلك في موضوع مثل موضوعك لن يكون مجدي او ذا نفع ولكي تتضح لك الصوره التي اريد ان أوصلها لك بأن تدخل اهلك او اهلها في الموضوع ان لم يكن له تأثير سلبي لن يكون له تأثير ايجابي و سأضرب لك مثلا قد يوضح لك الفكرة و منها تصل الى حل المثل هو ( رجل مريض و يعاني من زكام وكحه مع الم في منطقة البطن و لم يذهب للمستشفى لأخذ علاج وبعد إلحاح من هم حوله بضرورة مراجعة الدكتور لأخذ علاج مناسب لحالته ليشفى من ما يعاني قرر الذهاب الى افضل طبيب بالمنطقة و بدرجة بروفيسور و لكن تخصصه جراحة العظام بالمناظير !!!! ) فهذا البروفيسور رغم علو شهادته و تخصصه الدقيق إلا انه لن يصرف العلاج المناسب لهذا المريض و كان من الافضل لو انه ذهب الى طبيب مقيم عام اواخصائي و حينها سيكون العلاج افضل رغم الفارق الكبير بينهم بالدرجة العلمية تدخل والدك في حالتكم غير مجدي لأنه لا توجد بينكم مشكلة و خلاف يستدعي تدخل اطراف خارجية او من يملكوا الحكمة لتقريب وجهات النظر او البحث عن المصالحة او طلب التنازل من كلا الطرفين للوصول إلى التراضي ، فسبب مابينكم هو اختلاف طبائع اختلاف تعامل ، و خيبة امل بعد اكتشاف ضياع الآمال فأنت تبحث عن حب فهل تريد مثلا من والدك ان يطلب منها ان تحبك ؟ انت تبحث عن حنان مفتقد فكيف سيطلب منها والدك هذا الطلب ؟! ثم وان حصل وان تحدث معها في هذه الاشياء من الطبيعي ان تخجل هي وتبدأ برمي الاتهامات عليك بأنك انت تنشد الحنان وانت منبع القسوة .... وفي هذه الحال سيكون والدك في حيرة من أمره ... وقد يكون والدها مؤيدا لها و مدافعا عنها برد اتهامك لك .... وحينها ستتجه الأنظار اتجاهكك و يقول والدك ووالدها بأنك انت الرجل وانت المسيطر وانت المسير لأمور بيتك و زوجتك و حينها ستنقلب الامور ضدك و تتأزم الامور .... انا اطلت في هذه النقطة لكي ابين لك عدم جدوى تدخل الاهل في مثل هذه الامور ... وخذ مثلا لو قلت انها غير نظيفة في منزلها و لا تعرف الترتيب و لا تهتم بنظافتها الشخصية ماذا تتوقع ان تكون الردود سيقولون لك كل البيوت كذا وأعذرها عندها ولدها اخذ وقتها .... لكن رأيي لك كالتالي ... اولا ... حب نفسك و اهتم بلبسك و بنظافتك و بين لها هذا الشي انك تحب تهتم بنفسك مو لأجل احد انما من اجل نفسك اولا و من اجل نظرة الناس و انطباعهم عنك ثانيا . طنشها يعني طقطق بجوالك تابع تلفزيون وقد ما تقدر خلك مبتسم .... بتنحرق منك و تولع لأجل تعرف ليش تتبوسم و بتسألك و خل جوابك ان الابتسامه افضل من التكشيره اللي تسبب تجاعيد للوجه و تضيع نظارته وانا انسان احب الضحك والفرفشه حتى لو مالقيت من يبادلني الضحكه ... بس متأكد ماراح يطول تبسمي لحالي بالنهاية لازم فيه احد يشاركني ( اذا سألت وش تقصد مو تسكت قل يعني انشاء الله بتكوني انتي بس لا تطولي لأني ما احب الانتظار كثير ) اذا شفت ملاحظة سلبية قولها اذا شفت غلط لا تسكت انتقد وكثر الانتقاد بس حفاظا على صحتك خل الكلام من لسانك مو من قلبك اذا شفت البيت حوسه قل احتمال تجي امي و خواتي بتلاقيها طيران تنظف و بعد ما تخلص تنظيف قل شكلي بخلي العزيمة بعدين والا بطلت حاس اني مكسل بخليها وقت ثاني وكرر و اذا شفت انك قلت و لا نظفت اسحب نفسك و اعزميني امك و خواتك و لا تقول لها واذا جو بيشوفون و بتكون محرجه و بعد ما يروحون بتقول لك ليش ما بلغتني قل بلغتك و لا اهتميتي و مفروض بيتك يكون نظيف لي مو لغيري بس كثر الانتقادات على اللي ما يعجبك و قل مو مفروض يكون كذا و أخيرا برضه الطلاق مو حل اذا اعيتك الحلول و مقتدر ماديا تزوج و احسن الاختيار وبقي لدي اسأله ماهو مستوى زوجتك الدراسي هل هي موظفه هل اجبرت على الزواج بك ما هي الامور السلبية التي تنتقدك بها هل هي اجتماعية هل لها اخوات يكبرنها هل إخوانها الذكور اصغر منها اي ليس هناك من يكبرها ام يوجد من يكبرها من الذكور هل تعاني من امراض عضوية ( فقر دم او لديها مشكلة في الأعصاب ) هل جربت ان تتبادل الكلام معها بدلا من ان تبحث عن الكلام لانه قد تكون أتت على الصامت وتريد منها تتكلم و تكون انت مستمع فقط عموما أطلت ولكن ارجع و اكرر لا للطلاق لا لإدخال الاهل سلامي لمن في بالي .... |
الأخ الكريم/ الجنتل
*آمل سرعة الردود على الأعضاء والعضوات من جانبك كي يستمر الموضوع والتفاعل معه. *كان من الأولى أن يجيب والدك على والدها بقول: إن كانا مخطئين فدعنا نعرف سبب الخطأ، ونقوم بحله الآن بينهما. *لكن قدر الله وما شاء فعل. *أقترح عليك ما يلي: 1) فعل ما اقترحناه عليك سابقاً. أو 2) الانتظار لمدة أسبوعين ثم إرسال رسالة لجوالها نصها "هل لديك رغبة في عودة المياه إلى مجاريها أم لا؟". أو 3) تبدأ التفكير بالبحث عن زوجة أخرى. *فكر عميقاً قبل كل خطوة.. واستخر كثيراً. *وأخبرني بجديدك. |
7) اترك زوجتك في بيت أهلها 4 أشهر بدون اتصال أو إرسال أو تواصل مع أهلها.
8) تطلب من أهلك –خصوصاً النساء- كتم الأمر، وعدم مناقشته مع أي أحد مع ضرورة كتمان آرائك وتوجهاتك. 9) بعد انقضاء 4 أشهر.. تأخذ والدك ورجلاً آخراً حكيماً عاقلاً كتوماً ذكياً محاوراً جيداً من قراباتك، وتذهبون جميعها لبيت والدها.. تناقشونهم.. تضعون النقاط على الحروف، وتطرح شروطك كاملة. يا اخي كثير على شاكله زوجتك للاسف زوجت اخي الله يغفر لها عندها 3 خادمات 2 سايق ويمر اسبوع على غرفه عيالها ما تنظفت شفت شلون هذي مصيبه تعال شوف ريحت بيتها مع العلم اخي مدلع عياله ومدخلهم مدارس خاصه وفوق هذا تذم فيه جدامنا لو نبي المشاكل رحنا وقلنا لاخوي بس كيفهم حبيت اذكرك هذا بس علشان اتعرف انك احسن من غيرك بش شوف وانا اختك اكثر شي يحر الزوجه ويحرق قلبها الحقران والتطنيش خاصه جدام اهلها انك امطنشها تراها مو سهله عليها اسحب عليها وفوق هذا عيش حياتك بالطول والعرض ولا تهتم فيها خل يوصل لها خبر انك عايش ومرتاح من غيرها باذن الله راح تشوف النتيجه من صالحك من غير ما طلاق ولازوجه ثانيه عطها فرصه لعل هذي الفرصه خيره لك ولها اسال الله ان يصلح حالك وحالها ،،، |
ياخي جنتل بصراحه انا حاس فيك كثثثثثثثثثثثثثثثير لان زوجي نفس طبع زوجتك لااهتمام لاحب مايشوفني شي بصراح طابت النفس منه والله لو يقولي كل انواع الحب معد اتقبل منه شي للني حسيت اهنت نفسي لانسان لايستاهل هو كريم ماديا فقط امكن انتم يالرجال تقدرون تعيشون حياتكم وتتزوجون بس حنا يالحريم مانقدر على شان الاولاد نصبر وننسى الحب بس بيكون داخل ذكرياتي
|
ويــــــــــــــــآآآآآآآآآآآشــــــــــــــيـــــ نهآآآآ دموع الرجـــــــــــــــــــآآآآآل يا شينها من بعد الطموحات والتخطيط انصدم بواقع هد كياني بعثرني صرت اخالف الناس حتى بالنوم ....!!!! تصدق سجلت في هالمنتدى علشااان اقولك بكيت من كل قلب على هالسطر اللي اقتبسته .. جد قصتك آلمتني حزنتني وقطعت قلبي وانكسسسسسسسسسر خاااطري عليك ياخووي ... بكيت على زوجتك وعلى النععمة اللي هيااا فيهااا بالله هذه أي إنسانه وأي قلب ...........!!! وسنتين لآحول ولآقوة إلا بالله .. أخوي المرأة إذا حبت حب حقيقي حقيقي حقيقي ((لآحظ قلت حقيقي يعني لا مؤقت ولا اعجاب)) وربي تبيع الدنيااا كلهااا علشاان عيون زوجهاا وتفديه كل عمرهااا وحياتهاااا وتضحححححححححي وتسعده بكل كل كل مافيهآآآآآآآآآآآ ,,,, .. بكيت لآنه فعلا الناس حظووووظ وبكيت لآني مثلك ومثل أي إنسان قبل مايرتبط يفكر بحياة وحب وطاعة وإحترام وإستقرار وهـــــــــــــدوء وعيشه مافي أروع مثلهااا وصار العكسسس هذا خوفي وهذا اللي بكآني وللأسف تصير هالأحــلآم سرآآآآآب ....... وبكيت لآنه الحب هالأيآآآآآآآآآآم صآآر مصلحه وكلام فااضي .. . .... اناا جداً جداً مصدومه وفي قلبي كلآم كثير لكن الأعضااء ان شاء الله ماقصروا وساعدوك ... دعااائي لك من كل قلب ومن أخت لآخوهااا وفي هالسسآعة المستجابه ربي يزيدك صبــــــــــــــــــــــــــــــــــــــــــــــــ ــــــــــــــــــــــــــــــر ويرفع قدرك ويحنن قلب زوجتك وتتعدل وتجعلهااا قرة عين لك . وتجعل حياتكم فررح و هنآآء وسعااادة ورضى واستقرار ورااحة بآآآآل .. صدقني أجرك وجزاك عند ربي وربك عظيم . الله المستعآآن نسأل الله الجنــــــــــــــــــــــــــــــــــــــــــــــ ــــــــــــــــــــــه ... |
أسعد آلله مســـــــــــآآآئكم جميعا ... وأستمحيكم عذرآ قبل كل شيء على تأخيري ولذلك لظروف العمل فالظروف تزاحمت من كل صوب ..ولله يعين إنشاء لكن يالغالين هذآ آنا أرجع ومن جديد أشرح وش صار معي إلى اللحظه هذي .... سويت مثل ما قلتو خليتها ما يقارب 4 شهور وطبعا قاطعت أهلها تماما آلمهم دآئما أنا وأمي في جدال والحوار معها ينتهي بالعصبيه ولأنها كغيرها من النساء تحكمها العاطفه ....!! تدرون وش صآآآآآر ((طلعت أنا الغلطان))...!! ما تتخيلون كيف الموضوع لف وصار الذنب ذنبي ..كيف ... وليه ...!؟ أنا سويت اللي علي وزود على كذا قمت بأدوارها ...قالو أهلها أنت ((( ما شجعتها ))) بالله عليكم أحكمو وأقسم بالله إني بعد هالكلام إني تحححححححططططمت وأصد لجل محد يشوفني بهالحاله خصوصا ان الظروف صعععبه وبدل ما أحد يكون جنبي ويوقف معي لو حتى مجامل تفاجئت بأن الكل وقت ما صديت تخلو عني وهذا آنا من الدوام لبيتي وعايش مع نفسي وقبلها وصيت أمي لها قالت بفكر و2 مره قالت بفكر و3 مره تو ما طاب جرحها اللي مدري وشو قالت امي انك متكلم عليها قلت اخر يوم جات فيها قالت كلام كبير وانا نتيجة الكبت اللي انا مريت فيه واللي هي سببه صدر مني كلام يوازي كلامها وبس واليوم أرسلت رسال اختصارها انها تفكر صح هالمرره تفكر صح واذا بترجع وبتحترم رغباتنا وحياتنا ومشاعرنا فأنا مستعد واذا انتي مستعده بيتي مفتوح لكن اذا على عشان احد او ولد او نجرب او او او .... لا ماله داعي على الأقل نوقف قبل مانكره بعض زود على ما انى فيه والحين لكي 4 شهور طيب انا بالنسبه لي بعطيكي مساحه تفكرين فيها الى نهاية هالشهر وهالشهر القرار قرارك انتي وبعد هالشهر القرار قرااااااااري وبس وانتو شرايكم تكفوووووون ماعاد دريت وش اسوي خصوصا ان الكل تخلى عني ...# |
اقتباس:
حرب مو زواج انتم تفكرون ان الطلاق شربت موية الله يهديكم |
اقتباس:
كان يفترض ان تأخذ وصية اخونا البليغ بحذافيرها وتنقطع لمدة 4 اشهر انقطاع كلي .. مو تروح توصي امك تكلمها.. انت اثرت فيها كبريائها الان ونفشته وكلامك انك بلحالك وما معك احد انت تحس فيه بس... وانت من تعاني وليس غيرك فلا عليك من غيرك مادام قلبك المدمى بجراحه يعاني.. يقول الشافعي رضي الله عنه: (ماحك جلدك مثل ظفرك فتول انت جميع امرك) عموما رسالتك في محلها..وبعد الشهر القرار هو قرارك.. هناك شرذمة قليلات من الزوجات لا يعلمن قيمة ان تكون زوجة ولها بيت وزوج تحبه ويحبها فلا تبتأس يا عزيزي فمن هو عاطفي مثلك يتعب كثير بالذات مع هذه النوعيه من الزوجات والله انك انت الكسبان من عدم وجودها بهذا الشكل المقرف في حياتك ولكن ماذنب الولد..!! ثق تماما اان حياتك رح تتغير للافضل مع انسانه غيرها.. ولكن احسن الاختيار و استخر الله عز و جل بعد الشهر اعقلها وتوكل... ولا يردك احد.. تزوج وعيش حياتك وهي خلها تخيس هناك ومصيرها بتصحى وتلاقي كل اللي كانوا يطبلون لها في سباتهم ينعمون وفقك الله |
يوووووووه والله حاله تبكي
زوجتك غبية درجة اولى غيرها من البنات تتمنى ان تنستر بزوج كيف لو طلع عاطفي بعد وان حب حب من قلب اقولك نصيحه والله اني ماعمري فضلت الانفصال ونصحت فيه الا لأخوي ولك انت بعد اذا استمريت معها صدقني بتحكم على نفسك بالاعدام عارف ليه اقوك كذا لانك عاطفي تحكمك العاطفة قبل العقل فانتبه لنفسك ولملم مابقي من حياة لقلبك فصدقني هناك من تنتظرك وتدعو الله بك ليل نهار وسيجمعك الله بها عاجلاً غير اجل لانها ستكون نتيجة لصبرك وهذه المحسوبة عليك زوجة صدقني بلاك الله بها لزيادة اجرك ورفعة لك وتمحيص من ربي لاجل تصبر فتظفر وانت توك في العشرينات الف من تتمناك استخير الله واقدم لكن انتبه احسن الاختيار فقلبك لاتستحقه اي فتاة * |
الله يفرج همك
فيه مثل يقول مايأدب المره الا المره مثلها دور لك على مره ثانيه وصدقني اذا هي تبيك بتعدل من نفسها وتصرفاتها اما اذا ماتبيك كل شي يبين وتقولك عيني عينك طلقني وبالتوفيق |
اقتباس:
عذرا سيدتي ..لكن ولأنه لم يعد هنالك شيء لأخسره فلدي إعتراف إستغرق الكثير من الشجاعه بالنسبة لي كَ رجل لأن يفصح عنه ..وكأنما هنالك لعنه أو أنه بكل بسآطـه هو الحب يا سآآآآآآآآآآدهـ فلدي ..لدي حب قديم حين خسرته ولم يكن بالود أن يزول أو يتلآشــى لكن لم يكن بأيدينا شيء تلآشت آمآلي بكل بسآطه آنتهيت ..بكييييت .. تألمت ..كنُآ نتشآآآبه كثيــرآ لكن ..سبق القدر.. أعلن إنشقاقنا لأجل آلعادات القبيحه ..!! ولأختصر كـلآمي وبكل صــرآآحه ..أقسم باآلله وكأنما ليس لي قلب آلآن ..متحجر بدآخلي كصخره ..!! حــــــآآآولت ولكن من مر بالحب ومرارته هو فقط من يعرف ذلك الشعور ..ولكن أتصرف مع ذلك أتصرف بود ولكن ((آلحب)).......... آختفى يا سيدتي |
تـدرون جزء منٌي ..ومع محاولآتي بأنها ترجع .. مــآودي إنها ترجـع ولأكون صَريح معكم ومع نفسي ..مرت بي جميع حــآلآت هذآ آلزوآج من شوق .. ود ..عتب ..إنتظآآآر وها أنا بأخر منعطفات هذآ آلزوآج .....{{ آلــفـــرآآآآق فَـــ عل وعسى بأن تتسآرع نبضــآآت قلبي بحب جديد ..يتجدد ذلك آلشعـور بأرجــآئي أجدني مع من يهتم لأمري ..أقضي معه كل تفاصيلي لمدى آلحيــآهـ.. تـظل آمنــيـة ،، |
وستتحقق صدقني بحسن ظنك بالله ودعااائك الداائم له واملك الكبير به ستتحقق لانه بكل بساطه عند الله لاتموت الامنيات ولاحتى الدعوات فكن مع الله ولاتبالي وسيأتي الفرج سااعتها ستذكر كلامي هذا وستتذكر عصفورة انا احاكيك من منطلق تجربتي الشخصية
وفقك الله بمن تستحق قلبك وتستحق قلبها |
لاتستعجل في زواج الثاني فكر في والدك امكن اذا تزوجة تطلب طلاق ماتقعد معك ثانيه وتظلم والدك لاتقوال ان امك تربي والدك.
والدك محتاج يعيش بين امه في بيته اعرف والد تربي في بيت جدته والله ان اهل ابوه يعيرونه علي انو تربيه عندهم يقوال في وجهه ماحد لمك بشارع الانحن امك وابوك اتزوجوه وتركوك عندنا واذا قال شيء يقولوا له اسكت حمد ربك اننا ربناك عندنا اكيد تعرف قصص زوجة الاب زواج الام ماهما كانو طيبين ما حيكونو زي الاب والام اذا رجعت اشاءالله زوجتك لا تفكر تجيب طفل ثاني الا بعد كم سنه يكون تعدلة واذا ماتعدلت اصبر حتي يكبر والد |
اقتباس:
آلمــشكــله وآلعائق واللي مصبرني ....(( ولــدي ))..!! لكن أنا أرجع وأقول ...(( تحت مسمى آلحب ينجبر كل شيء..كـل شيء)) وآلله يكتب اللي فيه الخير .. |
قرات الموضوع كله مع الردود ..
نصائح البليغ درر .. واتفق كل الاتفاق مع مشكلتي زوجتي.. وكل نصحي لك .. بعد ما استنفذت كل الوسائل معها مااعتقد راح يكون في إصلاح .. او حتى تقضي عمرك في تانيب ضمير .. ولا حتى تعقل فيها وتقضيها مشاكل .. اختصـــــــــــــــر .. اختصـــــــــــــــر.. وسارع بالزواج من اخرى.. عش حياتك ولاتجعل طفلك عائق .. واذا كان طفلك عاز عليك وخايف الوضع ياثر عليه لما يكبر من تبعات الطلاق . فاحب انبهك انه وضعكم ودخولكم كل فترة بمشاكل ومناوشات لتبيه او تصحيح راح يكون ضرره اكبر.. ونشوءه في بيت كله تبلد وخالي من مشاعر الحنان بين الاب والام راح ياثر على طبيعه ابنك وشخصيته .. استخر الله .. وامضي في البحث عن زوجه اخرى بنات الحلال كثار ... والي محتاجه ستر اعقل وتوكل .. |
مسكينه زوجتك حزنتني ماعرفت قيمتك وغرورها وتطبيل اهلها لها بيدمره زوج اختي سييء وياما صار منه وجات لاهلي تعلقت سنتين ورجعت له والحين عرفت ان اختي السيئه وانا كنا نظرها مانفعناها بس بعد ايش بعد ماامتلى راسها بالحقد عليه قهرتني اليوم تقول ماقد سمع منها كلمه حلوه من شهوور ماقد شافها غير ططفشانه ومتنكده قلت يحق له يجيب اصحابه اجل يقابل وجهك لاريق حلو ولا ذوق ولا دعوه تتخيلون اني اقلها قولي لزوجك الله لايحرمنا منك وتكابر تقول مقدر المشاكل سوت بيننا حواجز استغفر الله الله يهديها عرفت اننا دمرناها يوم كنا نوقف معاها ونقلها ربي بعوضك احسن منه تطلقي اتركيه طلعت هي اللي مطفشه الرجال ومكرهته عيشته والسبب انها حقود مشاكل لها سنيييين مانسيتها وطول الوقت وهي كارهته الله يهديها
زوجتك اذا ربي سخر لها احد يفوقها ويصحيها من غفلتها رح تتعدل اما على اسلوب اهلها فتاكد انها رح تندم مو الحين لا لاصار تعاني الام الطلاق والوحده |
في الحقيقة كنت أرغب في الرد على موضوعك لكن عندما رأيت قلة تواجدك فضّلت الصمت والمتابعة.. وأرجو أن تكون متواجداً كي نتواصل في الأخذ والعطاء بالحديث بسرعة إن كنت ترغب في هذا؛ من اجل أن نمسك موضوعك خطوة خطوة كي نصل لحل مناسب بإذن الله. |
| الساعة الآن 06:56 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©