|
سآعدوني مملكة واريد الطلاق (تم الطلاق بالرد 49).!
السسلآم عليكم ورحمة الله وبركآتة ,, آحب استفسر عن شروط الخلع اذا احد عنده خلفية عن الموضوع ,, انا مملكة من 3 شهور عمري 20 وزوجي 29 ,, وصلنآ لطريق مسدود معه انسان عصبي غير متفهم آخلاقه ماهي تمام,, اندفآعي لآ يرآعي مشاعري .! وكلام كثير يطول الحديث فيه يتعب قلبي وعقلي من تذكره طبعا لي 20 يوم اسستخرت الله كثثثير واستشرت الاهل واستشرنآ ناس كثير وكلهم قالولي الانفصال انسب حل لكم ,, الحمدلله على كل حال وقدر الله مشاء فعل ,, طبعا الحين انا خلاص ماعاد ابيه وهو مازال متمسك فيني بس قال مو مشكلة اذا ماتبغاني بطلقها وفعلا راح المحكمة بيطلق ولما راح عند الشيخ قاله دامها هي اللي ماتبغاك هذآ يعتبر خلع ؟! وخلها تحضر الجلسه الجايه ونشوف كيف ,, اللي ابي اعرفه الحين اللي عنده خلفية في الموضوع ,, يعني الشيخ ممكن يحكم بالموضوع من اول جلسة ويفكني منه ومن شره ؟! والمهر كيف بيكون هل اعطيه كامل المهر او نصفه .! مع العلم انه لسسآ مادخل علي يعني لسآ في بيت اهلي والشبكه والهدآيآ اللي جابه من خوآتم وسآعآت وه الاشيآء ,, انا ماتفرق معاي ما ابغا شي منه بس انا صرفت من المهر مبلغ في حجز القاعه مع العلم ان الزواج اتفق عليه الاهل نص بالنص بس يوم الحجز ماجاب معه فلوس فالوآلد دفع حجز القاعه من المهر ,, هل ارده له او كيف ,, واللي عنده خلفية بعد عن الاسئله اللي ممكن يوجهآ الشيخ لي يوم الجلسه .؟! تكفون ردو علي سريعآ ,, ولكم دعوة في ضهر الغيب ,, |
أعتقد هو من حقه يطلب المهر كامل بس في أزواج ياخذوه كامل وفي لاء وبعد لو طلب منكم كل الهدايا الي جابها لازم ترجعوها مع أن الرجل الشهم يرفض ان الهدايا ترجع له
الله يعوضك بخير منه وأزين ماسويتي من بداية الطريق |
سؤال عن رجل طلق قبل الدخول بزوجته وبعد الخلوة بها، فهل له أن يسترد المهر؟ إذا طلقها قبل الدخول بها وبعد الخلوة الخلوة التامة التي قد أغلق عليهم الباب، بحيث لا يراهم أحد، فإنه يلزمه المهركله لها، هذا في حكم المسيس قد قضى الخلفاء الراشدون بأن الزوج إذا أغلق الباب, وخلى بالمرأة فحكمه حكم المسيس يجب لها المهر كله، أما إذا كان لا، خلوته ليس فيها يعني إغلاق باب أو جاء أحد دخل عليهم وجلس معه في المجلس أو في غيره في محل عام، بإمكان كل أحد أن يدخل عليهم هذا ما يسمى خلوة ما يلزمه إلا نصف المهر، لها النصف وله النصف، لقوله جل وعلا: وَإِن طَلَّقْتُمُوهُنَّ مِن قَبْلِ أَن تَمَسُّوهُنَّ وَقَدْ فَرَضْتُمْ لَهُنَّ فَرِيضَةً فَنِصْفُ مَا فَرَضْتُمْ(237) سورة البقرة، فإذا كان لم يطأها ولم يخل بها خلوة كاملة فإنه يأخذ النصف ويعطيها النصف أما إذا كان خلا بها خلوة كاملة أو وطأها فإنه المهر لها كلّه وليس له شيء. أنا عُقد قراني على شخص ولي ثلاث سنوات وأنا في ذمته وأريد الطلاق منه وهو رافض، فما حكم المحكمة والشريعة في الطلاق قبل الدخول والاختلاء؟ وجزاكم الله كل خير. الإجابــة الحمد لله والصلاة والسلام على رسول الله وعلى آله وصحبه، أما بعـد: فإنه من المعلوم شرعاً أن الرجل إذا عقد على المرأة عقدا صحيحاً مكتمل الشروط صارت هذه المرأة المعقود عليها زوجته، فيجوز له منها ما يجوز للرجل من زوجته من إباحة الخلوة والاستمتاع، وعلى هذا فندعو هذه الأخت السائلة إلى عدم التسرع في طلب الطلاق، وإن كان بينها وبين زوجها خلاف أن تحاول حله بالطرق المشروعة بما في ذلك توسيط أهل العقل والحكمة من أقاربهما وإن كان السبب عدم القدرة على توفير الصداق وتوابعه فالأحسن أن تعطيه مهلة حتى ييسر الله تعالى له ذلك. واعلمي أن طلب المرأة للطلاق من غير سبب، منهي عنه شرعاً لقول النبي صلى الله عليه وسلم: أيما امرأة سألت زوجها طلاقا من غير بأس فحرام عليها رائحة الجنة. رواه أصحاب السنن. أما إن كان لديك سبب فلا مانع من طلب الطلاق ولو بمخالعته بما تتفقان عليه من مال، هذا وننبه إلى أنه إذا حصل الطلاق قبل الدخول أو الخلوة كما تقولين فإنه لا تلزمك عدة لقول الحق سبحانه: يَا أَيُّهَا الَّذِينَ آمَنُوا إِذَا نَكَحْتُمُ الْمُؤْمِنَاتِ ثُمَّ طَلَّقْتُمُوهُنَّ مِن قَبْلِ أَن تَمَسُّوهُنَّ فَمَا لَكُمْ عَلَيْهِنَّ مِنْ عِدَّةٍ تَعْتَدُّونَهَا*{الأحزاب:49}، ولك نصف الصداق المسمى لقول الله تعالى: وَإِن طَلَّقْتُمُوهُنَّ مِن قَبْلِ أَن تَمَسُّوهُنَّ وَقَدْ فَرَضْتُمْ لَهُنَّ فَرِيضَةً فَنِصْفُ مَا فَرَضْتُمْ إَلاَّ أَن يَعْفُونَ أَوْ يَعْفُوَ الَّذِي بِيَدِهِ عُقْدَةُ النِّكَاحِ* {البقرة:237}، وللمزيد من الفائدة تراجع الفتوى رقم: 1955. والله أعلم. مركز الفتوى اتمنى تستفيدي من هذه الفتاوي .. |
اه ياقلبي
حالي من حالك الله لا يعيدها ملكه لي ثلاث شهور اتمشى بالمحكمه وحتى ما دخلت عند الشيخ الله ييسر لك ويفكك منه بسرعه استغربت من رد الاخت شقرديه اخوي سأل محامي قال كل شي يرجع له ويعني قد جلسنا لوحدنا والباب مقفل بس مو بالمفتاح بس محد دخل علينا وفوق هذا طالب اكثر من المهر عشان يطلق وقالو بنعطيك وما طلق ننتظر ونشوف الشيخ وش يقول وش ورانا |
اقتباس:
وقلنآ بنشوف كيف ابوي قال بيسآل ششيخ في ه الكلآم قبل نروح المحكمة مع انه قريت ان الشبكه تعتبر من الهدية يعني ماله حق يآخذهآ ,, ووحدة اعرفهآ قالت لي انها خلعت زوجها الشيخ حدد 3 جلسات وطلب من زوجهآ الحضور وزوجها ما حضر خلعهآ منه وقالها بس رديله المهر وباقي الاشياء خليها لك ,, والله يفكني منه عآجلآ غير اجل نفسسي عآفتة وتعبآنة مرررره ,, الله يكتب اللي فيه الخير يَ رب ,, |
اقتباس:
|
اللي اعرفه انه المهر بس ترجعيه له ..
بعدين هو اتفق معاكم انه يدفع نص قيمة القاعة و مادفعها، و انتوا دفعتوا .. فلاتنسي تقولي الشي هذا للشيخ .. |
اقتباس:
وش نقول بس ,, الحمممدلله على كل حال ,, انا مارفضض قال مو مشكلة بيطلق بس مهري وذهبي تردونة لي ,, وقلنآ بنشوف حكم الششيخ وش يقول ,, والجلسه الاسبوع الجاي يَ رب من مره وحدددده افتك وآخلص من كل شي ,, |
اقتباس:
المهم ابوي يوم قرر يروح يحجز القاعه كلمه قبل بـ آسبوع اننآ بنروح نحجز القاعه للزواج وهو عارف ان فيهآ دفع | عربون | طبعا مو المبلغ كآمل ‘ وع اساس ابوي يدفع الف وهو يدفع الف بس الاخ راح ومآ جاب فلوس فالوآلد الله يطول بعمره دفع الـ 2000كلهآ من المهر ,, |
بسالكم اذا احد عنده خلفية يعني ,,
قسسم الاستشارات الخآصصه اللي هنآ ,, ينفع اطرح فيه اي مشكلة او هو لغرض ثاني ,, |
لا اعلم موفقه يارب |
الله يفرج لك ويفرج لي يارب وكلنا نفس السبب
|
بعض الرجال للأسف اذا تملك على البنت يفكر خلاص ملكها وكأن البنت سلعة يتصرف فيها باللي يبي وماينسى ان البنت مشاعر مش فرد عضلات بس صدقيني هذا مش نصيبك والله يعوضك باللي اخير منه ..
|
وضضضحى ,,
جزآك الله خير وجعله في موآزين حسنآتك ,, بسسسمة آمممل ,, اللهم امين ,, ومثل ماقلتي الرجال همهم هم نفسهم بس الله يعوضضضنآ خير عن مافاتنآ ,, |
عوضكِ الله خيرا غاليتي .. وقرار محمود طالما اتخذتيه من الآن .. ليس بإمكاني إفادتكِ .. ولكن كل ما أملكه الدعاء لك .. وفقك ربي وأرضاكِ وسهل أمركِ |
اللهم آمين آمين آمين ,,
جزآك الله خير ,, |
إذا هو ماعندهـ مانع يطلق حلوها بشكل ودي بلا خلع
ردي له المهر والشبكــة ولاتروحين للمحكمة..الله يعوضج ويعوضه خير |
انا كنت ابيهآ كذه لآنه هو خلآص اقتنع انه يطلق ومهره بنرده له
بس لمآ رآح وكلم الشيخ قاله انا ابيها وهي ما تبيني .! وه الكلام صحيح بس كنا نبيهآ بشكل ودي بس هو الله يسسآمحه ,! الله يكتب اللي فيه الخييير ,, |
يآآآرب تفرج هممممك وتيسر أمورك ...
|
السلام عليكم ورحمة الله وبركاته
من ناحية المهر لابد ان تعيديه كاملا والسبب انك انت من طلب الطلاق بالنسبة للهدايا يفترض ان تعيديها خصوصا الثمين منها كالذهب ونحوه القاضي فقط بيسالك هل بينكم خلوه او دخول يظهر لي ان بينكم خلوه بدون دخول ويسالك هل تردين له المهر مقابل الطلاق وهذا افضل لك حتى يعرف الناس انك من طلب الطلاق الله يوفقك لما فيه الخير ,,, |
طالما أنك أنت اللي طالبه الطلاق, وزوجك طلب المهر والذهب, في الحاله تُلزمين بإعادتها لزوجك ويكون خلع بعوض وليس طلاق, وإذا كنت تبين الأمور تتم بسرعه جيبي معك الذهب والمهر من أول جلسه, وبالنسبة للعربون ان تنازل الزوج الحمدلله واذا رفض الشكوى لله.
الله يسهل أمرك ويكتب لك الخير. |
الله يكون بعونك يا(ذكرى حلم) انتِ تماما زي مشكلتي بالضبط والله يفرج لنا
|
اقتباس:
الله يكتب لك الخير ,, اقتباس:
والله مهره و هدآيآه وذهبه كله موجود في كيس محضتره ابغا الموضوع يخلص بـ آقرب وقت نفسيتي تعبآنة جدآ ,, والله يكتب اللي فيه الخير يَ رب ,, جزىك الله خير ,, |
اقتباس:
كل شي محضرته والوآلد الله يطول بعمره نآوي يشيل معه كل اغراضه اللي جابها حتى العربيه ومحتويآتهآ وبعد ما نخلص في نفس اليوم بنعطيه اياهآ ,, جزآك الله خير آخوي ,, |
اقتباس:
اللذي لم يلد ولم يولد ولم يكن له كفو احد فرج همي وهم آختي بسمة الم و ارحم ضعفنآ و فرج همنآ واجبر كسرنآ وآمن خوفنآ و أمطرنآ برزق من عندك لا حد له ، و فرج لا مد له ، و خير لا عد له ,, الهي اسر خوآطرنآ وعوضنآ خير عمآ فآتنآ ,, اللهم آمين آمين آمين ,, |
الله يجزاك خير ياذكرى على الدعوه الحلوه واكثري من الاستغفار ومن دعاء الهم والكرب والله بيفرج عليك ... وبشرينا لما يخلص موضوعك بجد انا شايله همك
|
جزآك الله خير ,,
وان شاء الله هذآ الاسبوع رآح ينتهي الموضوع ,, ادعي ان الله يجبر كسسسري ويخفف عني الهم اللي انآ فيه ,, الحمممممدلله على كل حآل ,, |
بلغينا وش يصير معك ياذكرى
وبالنسبة لحكاية الخلوة سمعت شيء من هالقبيل انك اذا اختليت فيها حتى ولو ماصار شيء , المهم كنتم لحالكم في غرفة يصير تدفعلها نصف المهر |
لا يا مستقبل غامض هذا اذا كان هو اللي طالب الطلاق يعطيها نصف المهر بس اذا هي اللي خالعته له المهر كامل وكل شيء جابه لها اذا هو طلبهم ..
والله يجبر كسر قلوبنا على ماسوووه فينا كنت ادور على احد افضفض له من زود الهم اللي فيني طلع كثير هنا فيهم نفسنا واكثر، والله يفرج لنا هالاسبوع لما فيه خير لنا انا وانتِ يارب ياكريم |
اقتباس:
اهم شي ادعولي الله يفرج عمي ,, واللي سمعت فيه في حال كان هو بيطلق , لكن اذا خلع كل شي يرجع له ,, |
اقتباس:
واعتبريني مثل اختك يَ قلبي , , فضفضي زي ماتحبي ,, |
غاليتي ... طمنينا عليك .. وعلى آخر أخباارك ربي يفرجها عليك . ويسهل عليك وين ما رحتي |
طمنينا وش صار معك
؟؟؟؟ |
سبحان الله
انا من رابع يوم لملكتي وانا طالبة الطلاق لاسباب خارجه عن ارادتي وارادته الله يعوضني خيرا منه ويعوضه خيرا مني الان كملت اسبوعين مملكة ولم يتم الطلاق بعد |
اقتباس:
غاليتي ... عســــــــــــــــــــــــــــاه خير يا رب .. ربي يكتب لكم السعاااادة .. وربي يعوضكم عن كل دمعة دمعتوها .. وكل آه طلعت من قلوبكم المهمومة..: |
اقتباس:
اللهم آمين اللهم آمين الله يجزاك خير دعواتك أسعدت قلبي ، الله لايحرمك الاجر |
الله يسهل امورك ياميسم لما فيه خير لك ... انا مثلك انتظر .. والله يفرج لنا لما فيه خير .. انا طول موضوعي كثيييييييييييير بس الحمد الله على كل حال
|
بسمة أمل
اللهم آمين الله يفرجها علينا جميعا توكلي على الله والله اني استغنيت عن الناس اجمعين حتى أهلي والآن انا في حمى الله ، لن يضرني شيئا إلا بإذنه اسأل الله ان يجعل لنا فرجا قريبا وصبرا جميلا ومخرجا واسعا ويخلف علينا كما خلف على أم سلمة بحبينا محمد صلى الله عليه وسلم |
وعليكم السسلام ورحمة الله وبركآته ,,
آسسسآل الله العظيم في هذه الساعه المبآركه ,, ان يفرج همي وهمي بسمة وميسم ,, ويرحم ضعفنآ ويجبر كسرنآ ويرزقنآ من حيث لآ نحتسسسب ويعوضنآ خير عمآ فآتنآ ويبدل حزننآ وهمنآ بسسعآده ترسم تفآصيلهآ على محيآنآ ,, ويسعد قلب والدينآ يَ رب ,, اللهم آمين آمين آمين ,, الله يسعد كل من تذكرني ودعالي ان شاء الله جزآكم الله خير ,, ابشركم رحنآ المحكمة طبعا اول جلسة كانت اصلاح دخلنا عند شيخ وسمع اقوالي واقواله وواجهنآ مع بعضنآ وطبعا الشيخ كان يحاول بكل الطرق الاصصلاح وكان راح يخليه يكتب تعهدآت وما الى ذالك ,, لكن انآ كنت رافضه كل الرفضض بعدين حولنآ لحكم ( شيخ اخر ) اتصل عليه وعلي اليوم الثاني وسمع اقوالنآ بتفصصيل اكثر ,, وقالي يَ بنتي تبين نصيحتي هذآ لآ يصلح زوجآ لك آبدآ هذآ مريض يحتاج له تعليم من جديد ,, قلت في قرآرة نفسي الحممممدلله هذآ فرج من ربك ,, وحسسبي الله ونعم الوكيييييييييييييييييييييييييل فيه وحسسبي الله ونعم الوكيييييييييييييييييييييييييل فيه وحسسبي الله ونعم الوكيييييييييييييييييييييييييل فيه وحسسبي الله ونعم الوكيييييييييييييييييييييييييل فيه من قلب محروق ,, عمومآ الاسبوع القادم الجلسه الاخيره اسآل الله ان يسسهل الامر و يبعده عن طريقي ,, تكفون ادعوآ لوالدي ان يطيل الله في عمرهمآ ويسعدهمآ ,, |
الحمد الله لك يارب والله يشهد اني فرحت لك وكأني انا اللي صار لي والله يسهل امرك ويفرجها عليك يارب الاسبوع الجاي...والله يطول في عمر والدينك ويفرحون فيك يارب بزوج صالح تقي نقي يخاف الله فيك ... وانتِ جالسه تتكلمين كأنك تتكلمين عني نفس الشيء الرجل مش كفؤ ..حسبي الله ونعم الوكيل
|
| الساعة الآن 04:58 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©