|
ضيقة الصابرين وهم الحالمين
السلام عليكم ورحمه الله وبركااته
كيف حالكم جميعاا عساكم بصحه وسلامه حابه استشيركم وابي راي بذمه وضمير ومن اشخاص حكيمين عسى ربي يحقق امانيكم انا زوجه ثانيه مسالمه لحد الغباء نص مشاكلي الضعف والتنازل عن حقوقي عندي مشكله وابي حل عاجل وجذري لها عندي ولدين واحد عمره سنه ونص والثاني عمره 38 يوم الله يحفظهم كل الي حولي حاسديني حسد عجيب وهمهم الوحيد طلاقي ودمار بيتي وكل فاهم ان سبب حملي من زوجي ماادي بحت يعني عشان اثبت وجودي ويكون لي نصيب اكبر بالورث والدليل اني حملت بسرعه علي ولدي الاول طبعا تعبت مرره فتره الاربعين ولدت بيوم توزيع حافز وكان لي نصيب فييه وكل كان يقول ولدت بيوم حافز وفلوس وولد ومستشفي خاص وجناح خاص والله من الحظ طلعت من المستشفي لا حيه ولاميته صابني الم في ركبتي جلست اسبوعين اعرج كاني مشلوله ولافيه سبب للعرجه اخذت ادويه ولانفع جبت شيخ يقري وخفيت قعدت يومين وطلع لي ورم فوق ضرسي قالو هذا ورم مشكوك انه خبيث وتبهذلت بالمستشفيات والحمدلله طلع حميد وسويت جراحه وشالوه يعني عشت بعذاب وتعب ربي العالم فيه كنت كاني في غيبوبه المهم انا ممنوعه من حبوب منع الحمل لان عندي حصوات بالمراره ولازم اسوي العمليه بعد شهر اذا ظل الحصى راكد ولاتعبت مره وعايشه علي ابر مهدأه للالن هالفتره لان صحتي ماتسمح للعمليه طلبت زوجي اركب لولب ورفض طبعا ليش ماادري سبب رفضه ايش يقول نتخذ طرق ثانيه وانا ماني واثقه ولا ابي احمل لاني تعبانه مرره وعيالي صغار وابي اتفرغ لهم الزبده ماجت فرصه كويسه اني اطلبه واقنعه عاد كنت مقرره اجلس عند اهلي فتره اسبوعين علي الاربعين ولاجهزت نفسي للرجعه لبيتي اول سبب اني تعبانه ثاني سبب ابي اركب لولب والدكتوره قالت يوم 45 اركبه ثالث سبب بولدي الاول تركني عند اهلي خمس ايام بعد الاربعين بدون سبب وجاء اخذني الساعه وحده بالليل وماجت الساعه ثمان الصباح الا وهو طالع يودي ابوه موعد وطبعا بعدها كان يوم زوجته وبعدها رجعني لاهلي اسبوع طلع انتداب يعني قهرني وجرح كرامتي وخلاني مسخره قدام الكل لانه كان يبي يرضي اهله علي حسابي بعدها بشهر وداني مكه واعتذر مني انه خرب علي ذيك الليله وانه غصب يراعي مشاعر اهله طبعا ماسامحته وحلفت اردها له قلت هالاربعين بطنشه انا واعلمه وش حسيت فيه يوم اني مشتاقه له وبعيده عنه واعد الايام لرجعتي ويطنشني يوم جاء امس جاء عندي قال انا بقولك على راي قلت ايش قال ابيك تنقلين من بيتك لشقه ولدي بشكل مؤقت ونعطي بيتك لابوي وزوجه ابوي طبعا نزل علي الخبر مثل الصاعقه قلت هذي هديه نفاسي انهرت يعني تعبانه ومقهوره ويجي يقولي تنازلي عن بيتك قلت ليش طيب قال عشان زوجه ابوي مو مرتاحه واذا ريحتها يرتاح ابوي قلت مو شغلي وراحتي انا قال عادي انتي تنازلي عشان مصلحتنا المهم تهاوشت معه وقمت ارفع صوتي وهو خاف اهلي يسمعون قال خلاص انا اسف وسامحيني ولا هو قصدي قال خلاص ترجعين لبيتك الاربعاء اجي اخذك قلت ماتجهزت ولا يمديني قال ان مارجعتي هاليومين لاعاد تتوقعين اجي ادورك لانك بس تبين ثبتين انك انتي الي طنشتيني وانا مااحب هالاسلوب لك مني ارجعك الاربعاء واذا رفضتي لاتتوقعين بجي ادورك طبعا ملاحظه عن ابوه وزوجته هم حاليا ساكنين مع زوجته الاولي وكلهم طفشانين من بعض ابوه عنده بيت يطرد فيه الخيل وهو طلع ابوه من بيته وسكنه معاه بحجه انه يبي يهتم فيه اكثر ويكون قريب منه ورافض يرجع ابوه لبيته ويبي ياجر بيت ابوه ويستفيدون منه بدال مايتقفل وعشان ماتزعل زوجه ابوه بيعطيها بيتي لانه دور كبير وفخم وعشان يرضي زوجته ويفكها من زوجه ابوه بنفس الوقت ويبي يسكني بشقه لولده توه طالع منها لانها صغيره وماهي شرحه وهالشقه موجوده فوق بيت حرمته وانا بموت من القهر طبعا هو يوم شافني جاده واني زعلت قال خلاص تراه مجرد اقتراح اذا مو عاجبم خلاص وانا خايفه اعاند ولا ارجع يوم الاربعاء ويسكن احد في بيتي واظطر ارضخ واتنازل عشان عيالي ولا ني عارفه اتصرف امي تقول اطلعي اليوم وجهزي نفسك واذا جاء يوم الاربعاء اعزميه بمطعم وتعشي معاه واحجزي فندق ليله واقنعيه بموضوع اللولب واقنعيه ان البيت لك وبعيالك وانك ماترتاحين الا في بيتك وبالكلمه الحلوه يلين راسه وانا خايفه احجز فندق ويفشلني ومايرضي ننام فيه وانا ودي اغير جو نفسيتي دمار ولو رجعت للبيت ماراح اخذ راحتي لانه بيجلس بالليل معاي واذا قام من النوم بيجون عياله ويمكن يطلبونه يطلع معاهم للبر لانهم كل خميس يطلعون ويروح معاهم ويطنشني ودي نطلع من البيت ونرجع المغرب يوم الخميس يكون فيه مجال نتفاهم وماينشغل مع احد غيري زوجي طيب وحبوب واعرف انه يحبني بس هم يظغطون عليه وهو يفرغ فيني لانه يدري اني اراعي هااطره تكفون ابي رايكم وتأيدون اني احجز ليله بفندق واللي يأيدني يدلني علي فندق بالرياض هادي وراقي وابي رايكم كيف اقنعه باللولب وموضوع البيت؟ سامحوني طولت عليكم |
السلام عليكم ورحمة الله وبركاته
لا تتنازلي عن بيتك أبداً إذهبي معه لبيتك يوم الأربعاء ولكن أطلبي منه سماح 3-4 أيام حتى تنتهي من ترتيب أمورك واطفالك وخلال هذه الفترة كوني لطبفة وسلسة بحيث تكونين أنت من طلبت التأجيل من دون خلق مشكلة. هكذا تحققين أمرين: لا تكسرين كلامه عن الموعد المحدد تكسبين بعض الوقت لترتيب أمورك دون الضغط عليه او على نفسك بالتوفيق ان شاء الله |
اذا نويتي تحجزي بفندق كلميه تليفون وأعطيه خبر حتى يكونحاسب حسابه بالوقت ومرتب أموره على كذا ... لو حجزتي وهو معطي مواعيد لفلان وعلان ما راح يقدر يتراجع وبتتنكسي وهو كمان يتضايق ... احجزي بعد ترتيب مسبق معاه أفضل
|
اذا نويتي تحجزي بفندق كلميه تليفون وأعطيه خبر حتى يكونحاسب حسابه بالوقت ومرتب أموره على كذا ... لو حجزتي وهو معطي مواعيد لفلان وعلان ما راح يقدر يتراجع وبتتنكسي وهو كمان يتضايق ... احجزي بعد ترتيب مسبق معاه أفضل
انا صراحه مع هذا الرأى وبخصوص اللولب انا زوجى كان رافض اللولب واى مانع حمل عندى طفلين فرقهم سنه ونص واخيرا اقنعته بس بل السياسه يعنى فى جو حلو اكلمه والحمدلله فى النهايه وافق زى مايقول المثل الزن على الاذن امرمن السحر ولازم تجهزين فى الموعد علشان مايفتكرك تعاندينه واسمعى كلام امك وحصنى نفسك اختى ترى الناس ماترحم |
بالنسبه للولب....نصيحه لاتركبينه تراه مو مضمون واغلب الي ركبوه حملوا...هذا غير الالتهابات الي راح يسببها لك طول ماانتي مركبته ..وغير قرحة الرحم الي راح يسببها لك.واذا تعرفين وحده مركبته وماشيه عليه تمام...يمكن هي ناسبها لكن الاغلبيه حملوا عليه...ودام عيالك صغار وورا بعض ابعدي عن اللولب الافضل تستخدمين شي مضمون...مثل الحبوب..
|
الله يجزاكم خير جميعا
من ناحيه اللولب هو الحل الوحيد اللي ينفع معاي لان عندي المراره وممنوعه عن الحبوب وعندي التهاب في الكبد لو اجلس طول عمري اتعالج منه كل ادويته تتعارض مع حبوب منع الحمل وممنوع نهائي اخذها فيه الابر وكلا مخوفني منها اللي تعرف وسائل ثانيه تقولي انا بركب اللولب حتي لو ماوافق بس خايفه يكشفني وتصير مشاكل من ناحيه بيتي ماعاد جاب طاري اشوفه متحمس لرجعتي واليوم راح ارجع بس ماراح اسمح له يقرب مني بدون اللولب ولو وافق عليه راح احجز الاسبوع الجاي فندق واتقرب منه اكثر واخليه يندم ع الساعه اللي فكر يهدم بيتنا فيها ملاحظه: نص مشاكل الحريم من الحريم يعني زوجي ماجاء هالحل في راسه وانه يسلم بيتي لزوجه ابوه الا من تخطيط بين زوجته وزوجه ابوه قسم بالله اني ماتوقعتها منهم يكلموني ويضحكون معاي وهن متفقين علي زوجه ابوه كانت تكلمني كل يوم ولما قلت لها انه بيرجعني هاليومين قالت لاترجعين انتي نحفانه وهلكانه ارتاحي شهر زياده عند اهلك قلت ماهو موافق وصوتها تغير ولاعاد اتصلت علي من يومها يالله مصدومه منهم وربي من غير منه وجعلها دفعة بلى عني يوم نزل لي حافز شريت لزوجته وزوجه ابوه هديه وانا توني والده قبل لايفكرون يهدون لي امي ماشريت لها وجبت لهم بس هذا جزى الطيبه والتقدير والاحترام ناس تفهم الادب والذوق ضعف وقله حيله حسبي الله ونعم الوكيل على من يحاول يدمر حياتي وكفى بالله وكيلا الله ينصرنا على من ظلمنا ويسهل امورنا اجمعين اللهم امين |
حاولي تقنعينه باللولب وفهميه انه وضعك مايسمح لك الخطين حبوب واذا تويتي تركيين روحي قبل ماتخلصين الاربعين اذا خلصتي الاربعين وماركبتي يصير لازم تنتظرين الين الدوره تجيك تركبين اخر يوم فيها وروحي لأفضل دكتوره تركب لك لان اللولب مؤ اي دكتوره تضبطه ولازم كل بعد دوره تروحين تشيكين عليه عند الدكتوره وتطمنين لان احيانا يتحرك من الحركة وممكن يصير حمل ،،،،،،
|
بالنسبة للفندق أنا أشوف ماله داعي لانه رجال كبير وعقله مو مثل الشباب ،،،،وما راح يعجبه هالحركه خصوصا انه هو دائماً مشغول بأعماله الافضل انك تخلين فلوسك لك وماتصرفينها عليه وانتي عارفهه انه اذا طلبتيه فلوس بالغصب يطلعها ويعطيك فليش تروحين تضيعين الفلوس عليه
|
اقتباس:
|
يالله مكسورره ميته قهر بكيت لحد مانتفخت عيوني وورمت
ياشينها لاصرتي تحبين احد ومشتاقه وتلقينه بارد ويحاول يرضي غيرك علي حسابك رجعت امس لبيتي جاء واخذني وتركت عيالي عند اهلي قلت عشان نطلع نتعشي سو وننبسط واهتم فيه لاني لو اخذت عيالي بيشغلوني عنه ومستحيه اني اهتم فيهم واطنشه طلعت يوم ركبت السياره قال وين العيال قلت تركتهم عند امي مابي احد ياخذني منك ولايشغلني عنك قال قسم بالله لو ادري انهم مو طالعين معك كان ماجيتك حسيت جاني كف كاني مجنونه اطالع فيه قلت خلاص عادي انزل واجلس معهم قال لا امزح معاك قلت تري مابي ارجع للبيت ابي نروح ممشي ودي اشم هو وامشي معاك وطول ماأنا معاه يدقون بنات مره المفتاح ضايع ومره نبي كذا ومره وينكم تاخرتم قلت خير وش فيهم تري لك شهر وانت عندهم قال لا بس يقولون متي تجون عشان نتعشي سو قلت خير ابي اتعشي معاك بلحالي قال والله انا واعدهن نتعشي ونسهر عندهم وننام في بيتنا قلت كويس ماوعدتهم ننام عندهم بعد قلت والله ماتعشي معاهم وعصب وانواع الهواش انتي قليله ادب وانتي مو كفو اللي يحبك حرمتي وعيالي يبون يحتفلون فيك ماتستاهلين الخير وانا سااكته مصدومه منه وقف عند المطعم قال وش تبين قلت مابي من هالمطعم اطلب لهم ونزله عندهم واحنا نتعشي بلحالنا قال يصير خير طلب العشي وحط لنا صحن بلحالنا ودخلنا البيت وراح وصل عشاهم وجلس يمكن نص ساعه ورجع قال حطي العشاء ورفضت اتعشي قال براحتك تعشي ويوم خلص ناداني وش فيك رافعه خشمك وانا ماني قادره اتكلم من كثر مابكيت ماعاد فيه صوت قلت الله يكسر بخاطرك قال لاتدعين علي ماغلطت عليك سوينا لك حفله ولاقبلتي جبت لك اكل ونمتي جوعانه وش تبين احب رجولك ويجلس يهااوش وينام صحيت الصباح صلحت فطوره افطر وراح يصلي رجع قال بطلع اودي اهلي للبر بمشيهم شوفي مكان تروحين له ولا اعزمي احد ولا نامي واذا بغيتي شي خلي السواق يجيب لك اكل يالله جووع وقهر وضيقه صدر المصيبه انه هو اللي زعلان هالحين وينتظرني اراضيه حسبي الله بس جرحني جرح مانساه طول عمري استقبلني بكل برود وارضاهم وخلاني اسهر طول ليلي ودموعي علي خدي تكفون وش الحل معاه تعبت مررررره |
حبيبتي بكون معك واقعيه انتي بنت في العشرين توك الصغيره
وزوجك رجال كبير انتي في عمر بناته لاتتوقعين يتقبل هالحركات لكل عمر أحكامه أكبري لزوجك أعرف كلامي قاسي لكن الحقيقه وش تبين مثلا يوديك البحر ويتمشى وسوالف وضحك راعي سنه وعنده عيال وزواجه منك هدفه العيال الله يسخر لك |
حاولي تتقبلين واقعك إنتي رضيتي فيه من اول تحملي قرارك ولا راح تكسبينه بهالتصرفات
ولا تحسسينه انتي قبلتي فيه عشانه فلوسه وصدقيني لما يشوفك ناضجه راح تاخذين كل شي تبينه |
يالله ياملامح والله تعبانه ماني عارفه اصيطر علي مشاعري ودموعي
من اليوم وهو يدق علي ليش ماطلعتي روحي اتمشي يعني علي اساس ماقصر معي لاتجلسين بلحالك تطفشين يعني ماطلبت شي غالي والله مابي فلوسه ابي احساس ابي احس انه يعزني ورب البيت كنت ابي ارتب له حفله ماحلم فيها بس صدمني وكسر خاطري وبعدين ليش اراعي عمره وتفكيره ليش مايراعي هو عمري ويعطيني حقي ماطلبت منه يسفرني هو كله يوم واحد ومن بعد غياب بغيته بس يعبر عن شوقه مو يمسح فيني الارض ويخليني زعلانه وجوعانه وتعبانه وينام مبسوط ويطلع ويمشيهم الي الحين مارجع وبيرجع وبينام عندهم بذمتكم اي عدل هذاا اي دين يقبل اللي انا فيه ويصلي ويصوم طيب ليش مايخاف ربه في ظلمه لي تراكني بين اربع جدران ويقول شوفي السواق عندك اطلعي واتمشي كاني بنت شوارع الله يكسر بخاطره الله ياخذ حقي لي والله ماسامحه علي دموعي وجرحي |
شوفي الإنسان له سن معين تكون الأفكار فيها ثابته
يعني تقريبا بعد 35 صعب جدا تغيريين أفكار شخص وأنتي كم الفرق بينك وبينه 30 سنه لاحظي مو فرق سهل خلاص هذا أبو عيالك إدعي ربي يسخره لك ولاتنسين هو عليه ضغط زوجته عياله انتي كم لك متزوجه تتوقعين تغيرينه عليهم في هالسنوات حبيبتي أقولها لك بالفم المليان لاتخلينه محور حياتك عيشي لنفسك وعيالك ولاتقولين يصغر نفسه إنتي منتي مطالبه تغيرين أفكاره صدقيني محد راح يتعب الا إنتي عزي نفسك عنه يعزك وصدقيني أكيد لك محبه في قلبه والا كان مااتصل بس هم هذا جيلهم هو تقريبا في جيل أبوي جيل مايعرف يظهر مشاعره وتعود على الكتمان أنا متعاطفه معك وحاسه فيك كل وحده تبي زوجها لها ويراعيها لكن الدنيا ماتعطي كل شي نبيه وسبحان الله حتى البنات الي ياخذون في سنهم شوفي مشاكل الكل عنده مشاكل عشان كذا لاتخلين الهم ياكلك وحبي نفسك الله يشرح صدرك وييسر أمرك |
تكفوون ساعدوني ووجهوني وعلموني اذا انا غلطانه عشان اتغير
ابي رايكم بكل صراحه حتي لو قاسي بتحمل عشان اتغير اخر ماحصل.... دق علي الساعه 10 صلحتي عشاء قلت لسه بصلح قال خلاص بجي اتعشى معاك صلحت العشاء ولما جت الساعه 11 وصل ويضحك ويستهبل وطنشته تعشينا ولا اشوف الرجال يلبس بجامته طبعا انصعقت كيف بينام عندنا المهم فرشت لي ع الارض انا وعيالي ونمت لما جاء قبل الصلاه لقاني صاحيه قال تعالي بقولك شي انتي مطوله بزعلك اللي بدون سبب قلت لا مو بدون سبب انت كسرت بخاطري قال وخاطر عيالي االي كسرتيه وعيالي اللي رتبو لك حفله وانتي طنشتيهم اللي مسووين لك كيكه وحاطين عليها صوره عيالك وفارشين الارض ورد وحاطين نوافير وشموع ولابسين بلايز عليها صور عيالك ومتكلفين وش موقفهم يوم طنشتيهم لو انك تقدريني كان رحتي لهم وتعشيتي ويوم ثاني نطلع انا وياك بس مو تجرحينهم كذاا عموما خلاص انا سامحتك بس هم ماظني يسامحونك يالله قهرني زوود مااحب احد يزعل مني انقهرت ان عياله سوو كذاا وان ردي عليهم بايخ عاد بنته حاطه صوره الكيكه وكاتبه جنبها صدمتينا ياخساره حسيت بالذنب ولاعاد اعرف اتصرف لامعاه ولامع اهله احس اني اتحمل فوق طاقتي يقول ماتوقعتك جامعيه وراقيه ومثقفه وحساسه تفكيرك كذا لازم ليله الاربعين نصير سوو وكل الناس تدري عنا حسسني اني ولا شي والله انا ماكان كذا تفكيري بس انقهرت انهم كانو يبون يطردوني من بيتي وانهم عازميني عشانه وعشان يكسبون رضاه يعني مو لي واساسا ماكلفو نفسهم وعزموني بلغوه انه يجيبني من اهلي وعلي طول عندهم يعني لو مشاعرهم صادقه لي ليش ماعزموني شخصيا ومن باب الادب كان خلوه ثاني يوم لي مو اطلع من عند اهلي واروح اسهر معاهم متضايقه مرره ولده الصغير مايطالع فيني احسه مصدوووم مني وانا احبه بجد الحين مستغربه ليش جاء ونام عندنا وهو طلعني غلطانه وقال خلاص انا سامحتك واهله كرهوني ابي حل كيف اتصرف ؟ اختي تقول اذا جاء نهايه الاسبوع احجزي له بفندق وعطيه خبر وجيبي له هديه ودلعيه وقولي انك رفضتي عزيمه عياله لانك كنتي حاجزه بفندق وانك انصدمتي من اسلوبه وتقول مشي الوضع معاه لاتخسرينه ضحي انتي لانه لايمكن يرضى علي اللي سويتيه بعياله وتقول اذا جاء بعد اسبوع ولا عزموك ولا اتصل احد منهم جيبي هدايا لعياله وارسليها مع ولدك وشوفي رده فعلهم ان رجعو كويس وان طنشو بكيفهم انا هالحين مشووشه ومتوتره واحس اني غلطانه ومو غلطانه تكفون وجهوني صح |
وحدانية
إحنا لو تكلمنا .. دائماً تضعي أعذار لنفسك و تبريرات عشان كذا اكتفي بالسكوت دائماً الصراحة، في بداية الموقف اللي حصل بينكم .. انت مانت غلطانة، و لا هو غلطان .. لكن انت تفكري و تتصرفي بعمرك و هو نفس الشي .. و لاتقولي هو المفروض يتنازل وووووو الخ لانك تزوجتيه و انت تعرفي انه كبيييير و انه اب و جد كمان مثل مافهمت ! و متزوج و مسؤول عن عيلته ووو الخ فالمفترض انك قبلتي فيه و انت عارفة ظروفه و لازم تكيفي نفسك مع ظروفه .. يعني تخيلي أولاده و زوجته عازمينكم و فرحانيين فيكم و هو يقول لهم، معليييش أنا و حرمتي رايحين للفندق نحتفل مع بعض ؟ و الله انه بينزل من نظرهم و لا عاد يحترموه .. و يصير مسخرة علي لسان الكل . . قدري ظروفه .. . . و بعدين جالسة تدوري عن النكد لييييييش ؟ جاب لك العشا و تركهم كلهم و انت طنشتيه ؟ تبغيه يعمل ايش ؟ يترجاك و يبكي عشان يرضيكي ؟ تري انت تتعاملي مع ( جد لاحفاد و اب لعيال متزوجين و واحد متزوج من سنوااااات و شبعان من المشاكل الزوجية و النكد .. انت مو متزوجة واحد شاب بنفس عمرك .. فخليكي شجاعة و ارضي بالواقع ) لاتجلسي تحاسبي الرجال علي نتيجة قرارك بقبولك الزواج به .. |
و عشان ترضي الجميع ..
فاحس انه حركة الفندق مالها داعي مثل ماقالت ليه الغرور ؟ جيبي ولدك و جيبي هدايا للكل و اعتذري لهم بانك كنت يومها تعبانة و عندك مشاكل ببيت اهلك و ماحبيتي تجي عندهم و نفسيتك مقفلة و تنكدي عليهم فرحتهم .. و يفهموك وقتها غلط .. و زوجك بعدين ممكن تعيشي معاه اجواء رومنسية .. الايام جاية |
8
كلام جميل .. بقولك شئ ولازعلين من كلمتي المعرفات هنا بعضها من تشوفها تحس بشئ مرتبط فيه مثلا البليغ الححكمه .. حبر راقي .. عالم الشعر والنثر .. وحدانيه .. البكا والصياح .. يابنتي خففي قوي شخصيتك بطلي بكاء وصياح وان ماجا شئ على ماتحبين بكيتي وزعلتي تراك بتشيبين بسرعه .. وقبل مااشوف ردك الاخير .. نفس كلام زوجك لك جا في بالي .. مش معقوله بيكنسل كل اللي سووه وبيروح معك .. مة قلة حب لا فكري مكن تصير حزازيات وزعل انتي كونك تحسين بالظلم هذا يخليك تصرين اخذ حقك او اللي تبينه بدون مايكون عندك بعد نظر للمواقف وفعلا ايش المشكله لو لبيتي له واجلتي يومكم مع بعض ..! وتقولين خلاني زعلانه وجوعانه .. وحدانيه خليكي حقانيه انتي اللي رفضتي تتعشين وانتي اللي زعلتي .. ومع هذا جاك ثاني يوم بعشا وتعشى معاك وجلس يناقشك وسامحك .. اجلسي مع نفسك شوفي عيوب شخصيتك فكري بطريقة حلك لبعض المواقف .. لاتنفري زوجك من بيتك اكسبيه ياغلاهم ... واسمعي مني .. انتي اذا دخلتي المنتدى لا تكتفين بكتابة مشكلتك وتطلعي .. اقرا حلول الاخ البليغ وحول الاخ رجل الرجال .. وربي راح تغذي عقلك .. اتمنى جد اشوفك مرتاحه .. |
:* وحدانية أولاً حمدلله على سلامتك ومبروك المولود شوفي ياعيوني لاتزعلين مني أنتِ بصراحة صايرة تدورين المشاكل والنكد دوارة وأشوف زوجك ماقصر معاكِ حتى لو له هفوات وهو يبغاله شوية مسايس لا أكثر وأنتِ الله يهديك تحبين العناد ومافي شيء بالدنيا بيجي على كيفنا لازم شوية تنازلت وشوية ذكاء أنثوي :* ومدام مشكلة البيت أنحلت وكان معك كل الحق فيها فماله داعي العناد إلي جاء بعدها * خلينا نحل موقفك مع أولاده وعزومتهم أشتري كيكة حلوة وكبيرة وأكتبي عليها ((أحبكم وأشتقت لكم)) أو أي عبارة تناسب الموقف وخذي هدايا لكل واحد منهم أو سلة شوكلت فخمه :* زوجك تقدرين تملكين قلبه بسهولة لأنه ماشاء الله باين أنه يحبك ويغليك وحكاية الفندق ماتنفع نهائي له *أستعيضي عنها بشيء ثاني ممكن تسوين ليلة حلوة وترقصين له أو تجهزين البانيو وتملينه زيوت عطرية وشموع حواليه وتأخذينه هناك وتجلسون جلسة وديه:d http://t3.gstatic.com/images?q=tbn:A...DZl6ibjkaycp8Q :* وكثير أشياء ممكن تونسه وتونسك وتشيل عنكم غيمة هالزعل والله ييسر أموركم :* |
اتفق مع سيدة الموقف وروح الطير.. عطوك حلول رائعه..
لكن لي رأي مختلف شوي.. زوجك المفروض نبهك بمعنى لو انه يوم راح لهم ارسل لك مسج وقالك تعوذي من الشيطان وتراهم مسوين لك كيكة عليها صور عيالك وفارشين الارض ورود ونوافير وو الخ يمكن تغيرين رايك وتضغطين على نفسك وتروحين.. يعني هو مافهمك الوضع كيف ولا قد ايش كانو متحمسين ومستعدين.. يعني عشان ما يأنبك ضميرك مرة انا اشوف انه هو يشاركك الذنب.. ممكن لما تشوفينهم وتشرحين لهم ظروفك زي ما اقترحو عليك الاخوات تظيفين انك مادريتي انها عزيمة او حفلة وزوجك قالك تعالي نتعشى معهم وقلتي انك تعبانه.. بالذات انهم ما عزموك شخصيا اشوف انه ما يحق لهم ينصدمون لهالدرجة.. لازم يتفهمون موقفك.. انا عشان كذا ما احب المفاجات لان احيانا الشخص يطنش او مايجي لانه مايدري عن اهميه المناسبه.. |
وبالنسبه للي يقولون انه كبير بالعمر ولازم تقدر هالشي! انا ماشوفها قالت وديني ماكدونالدز ولا هرفي!! ما طلبت الا شي معقول "ممشى" يعني مقدور عليه وحتى مافيها صرف!! اجل لو طالبه مطعم خمس نجوم وش بيسوي؟؟ وليه زوجته الاولى وعياله يمشيهم بالبر ويغيرلهم جو وهي لا؟؟ كاني فهمت من كلامها انه يطلعهم كل خميس طيب على الاقل يعدل ويطلعها هي وعيالها لحالهم يمشيهم..
انا اشوف ان زوجك مقصر بحقك واشوف انك تكلمينه بهدوء وتطلبين منه يعدل بينكم بموضوع الترفيه والطلعات وذكريه بحكم اللي ما يعدل بين زوجاته يوم القيامه.. |
| الساعة الآن 08:20 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©