|
تعبت من تشدد زوجي وتصرفاته
السلام عليكم
ببدا بذكر مشكلتي مباشره .. وهي التشدد الزائد من قبل زوجي في امر خروجي من االمنزل ..وكل سنه اشد تعقيد من اللي قبله السوق ماطلع له الا بطلعة الروووح , وبعد تعقيدات منه يطلعني ومن غير نفس ...وعلى فكرة ماطلب السوق الا للحاجة الضروريه فقط مع العلم ان السوق قريب من بيت اهلي وبامكاني اخرج مع احدى اخواتي , لكن رافض الروحه والجيه له تكون بسياره ... طيب قلنا مو مشكله اخواني ينزلوني السوق ويرجعوني .. برضوه يرفض .. اليوم وعدني بعد ,معاناة وبعد ووعود منه , طلعت نص ساعة وكرهت عمري , حتى انه قال بنتك انتي تمسكينها ماعلي منك , مارحمني وقال هذي حامل بالتاسع انا امسك يد البنت واريحها بالسيارة حصلت مشاداة بيننا قال / عسى تمر سياره تصدمك وتموتين جرحتني كلمته حيييييل وكل ماتذكرها تنهمردموعي .. نفسي اطلع لاي مكان من غير مايذلني .. الاسبوع اللي فات رفض زيارتي لصديقتي في بيتها او في احدى المنتزهات ... ولا فكر مرة يعزمني برا .. طول وقته روحات وجيات مع زملائه ... امس طلب مني اسلفه مبلغ علشان يعزم اصدقائه بمكان برا .. والله حزت بخاطري بقوه , وانا زوجته ما فكر مره يعزمني لمكان.. لو اطلب منه انزل السوبر ماركت اختار اللي نفسي فيه , لو بطلب من اروح محلات الاثاث واختار اللي ابغى لازم يرفض ... مع العلم ان كل شئ من حسابي هو ما يدفع ولا ريال ... حتى لو بروح مع اخواني يرفض .. انسان يعشق كلمة (لا )على حساب نفسيتي صبرت كم مرة , بس اليوم وصلت حدي منه ,وعند اهلي , لاابغى اكلمه ولاابغى اشوفه |
يابعد قلبي الله يقرج همك ويحنن قلبه عليك ماحبيت اقرا واطلع وما ادعيلك
|
يوه يعني لا هو اللي يحب يرفه عنك و مانع أهلك برضو من الخروج معك
:: هل عندك أطفال؟ هل انتي موظفة؟ :: و لماذا تعطيه المال إذا كان بهكذا جلافة معك لااااا يستحق .. أيضا حسسيه انك متمللة يعني مثلي شوي بالكآبة و خليك دايم سرحانة و لما يسألك قولي لا ما في شيء يمكن يحس ,,,و يتلحلح |
اقتباس:
يممه هو صاحي ذا الله لايبلينا بس ماسألتيه إيش سبب رفضه الدائم للطلعة ؟ تناقشتي معاه قالك شي بالنسبة لي أحس لازم يطلعون الأزواج او العائلة ولو مرررة في الأسبوع تتغير النفسية وينعكس هالشي على التعامل في المنزل او الأداء بشكل عام ومن جميع النواحي والله حرام لاطلعة ولاشي وغير كذا النكد إنتي إنسانة من لحم ودم ولك مشاعر ومن حقك تطلعين تشمين الهوا لازم تكلميه وتوضحين له هالشي وتتفقين معاه مثلا اليوم الفلاني من هالشهر فضي نفسك نروح السوق وحطي لك قائمة بأهم الطلبات من ملابس أدوات منزلية كماليات والسوبرماركت وإعرفي إيش هيا الأماكن اللي بتروحي لها عشان لايتملل من كثر اللف وإذا عنده سبب بالنسبة للأسواق مثلا قالك شباب او زحمة ومن هالكلام أطلعوا فترة الصباح او الظهيرة مررة فاضي وتاخذون راحتكم وعلى رواق برضو ماأشوف فيها شي لو رحتي مع اهلك تخففين عليه المشوار والتعب نسيت شي بالنسبة لسالفة الفلوس ليه تعطيه ؟ إيش السبب هو يشتغل ولاكيف او فلوسه تخلص بسرعة ؟؟ أقولك شي لاتعطيه إذا الطلعة حارمك منها وينكد عليك وهو بكل بساطة يجي يطلب منك مافي حيا مو شايف نفسه مقصر معاك من هالناحية الله يعينك ويفرج همك |
1) أكثري عليه من الكلام الجميل.
2) أشعريه بالتزامك بأوامره ورغباته. 3) خذي منه ما تريدين بالتغنج وخلافه. 4) ادعي الله كثيراً بأن يليّنه ويليّن قلبه. 5) لا تجعليه يدعو عليك. 6) اختاري أوقاتاً مناسبة لطلب هذه الأمور منه.. إن رفض وكرر الرفض فقولي: من تريده أن يقوم بواجبات زوجتك وأبنائك؟ |
اقتباس:
يعني اذا دعى الزوج على زوجته فكيف يجب ان يكون التصرف؟ لانه فعلا كثير من الرجال ينفسون غضبهم بالدعاء على زوجاتهم وهذا شيء يحز بالنفس كثيراً ولا يمكن نسيان مثل هذه الاهانة ابدا :( |
هونيها يااختي ..
طيب انتي لما تناقشينه ايش ردات فعله ..؟ جربتي مثلا تصارحينه بعدة اساليب ..؟ - ممكن جلسه - ممكن برساله .. الخ او تطلب طلبك بكذا اسلوب ..؟ الله يسخره لك ويهدي سركم .. |
:* مدري وش أقولك بس دعوته عليك خوفتني وش ملته هالإنسان..؟! زوجته وأم بنته وتحمل طفلة في أحشائها بدل مايدعي لها بالسلامة يدعي عليها بالموت..؟!! وياليتك مقصرة فاتحه الكيس وتكبين في فمه :* |
صرخه حب
مشكوره علي دعواتك ، جزيتي خيرا الممسداني / ايوه موظفه وعندي طفله قد اعطيه المال لانه لايبقي في رصيده شي من المال ، فاضطر اعطيه وبالنسبة اظهار التملل والسامه ماعتقد تجدي معه ، لم يرحمني مع دموعي واسماها دموع التماسيح بل وبخني وقال : ماتستحين تبكين وانتي بهالعمر ام وعندك طفله ، وش خليتي للاطفال يظن اني جدار بلا احساس بلا مشاعر روح المسا/ دايم اتناقش معه ، بس النقاش عقيم يقول انا كذا تبغيني ولا روحي لاهلك وبالنسبة لكلمته جات بعد استفزازه لي باني ساخرج من غير مايدري ، طبعا ماراح اسويها بس قلتها مقهوره منه بالنسبة للفلوس هو عنده وظيفه راتبها زهيد يروح علي الاقساط التي تخصم منه ، لكنه من ناحية التدبير المالي زيرو البليغ / جميع النقاط التي ذكرتها اطبقها ماعدا الاولي فانا مقلة فيها لا تظلمونه/ النقاش معه عقيم بكل الطرق ، ما ينفذ الشي الا اذا خلاص نفسي عافت وكرهت الطلعه |
الله يعينك صراحة
يمكن يحن قلبه لما يصير عندك عيال كثر بيحنون عليه ,, لكن لا تعطيه مالا للترفيه عن نفسه!!! هل تتوقعين منه ردة فعل عنيفة لو رفضتي كأن يضربك لا سمح الله؟ |
ماقول غير الله يعينك يارب ويصبرك ويهدية لك
|
سيدة الموقف /
كلامك ارسلته له سابقا بان هذا الكلام لا يقال لمسلم فما بالك بزوجتك رد علي انتي استفزتيني المسداني / لا ان شا الله ما تاصل اخلاقه لمدة اليد .. علي فكرة هو طلبها مني سلف طبعا عارفه انه ماراح يسددها ، بس المبلغ مو كبير علشان كذا مشيتها له |
:* أحفظي قرشك هالصنف (مستبيع) يعني المرأة عنده بدالها مرة :* |
ماشاء الله عليك اختي هذا انت ترحميه و هو ما رحمك
لا حول و لاقوة إلا بالله نفسي أحبس رجل مثل هالنوع أسبوع بس بالبيت و نشوف وش يحس به عموما حاولي تدخلي رغبتك بالترفيه عن نفسك في أحاديثكم الودية بشكل خفي أكيد عندكم لحظات صفاء ,تحدثي عن مكان ما في منطقتك منتزه أو حديقة مو مجمع بعدين تكشف الخطة يعني كأنك تذكرين حدث ما في احدى الحدائق (اقرأي أخبار منطقتك) و ابدأي بالأستفهام عن شكل هذه الحديقة مثلا يظهر فيه أنك مو عايشة بهالبلد و يظهر فيها انك فعلا من مدة مو طالعة لعل و عسى يفهم عزيزتي بعض الكيد في الكلام و التغنج قد يفيدك بتحريك مشاعر زوجك حاولي ان تعزفي عليها و تكسبي يبدو لي أنك بسني زواجك الأولى و ركزي أختي أيضا على الجانب العاطفي و العلاقة بينكما و تفنني بذلك يعني مش حابة أقول بس بعض الأشخاص بهم طبع القسوة و عدم التفهم و الحوار الصريح لن ينفع معهم بل قد يزيدهم قسوة فلا بد من استخدام طرق أخرى ايضا اهديه بمناسبة العيد أو اي مناسبة قريبة أو حتى بدون مناسبة هدية توصي بها أحدى زميلاتك في العمل مع كلمات رقيقة و تنهد أنه كان ودك تشتري أحلى بس ما (قدرت أروح السوق) لا تقولي أنت ما تخليييني لاااااا و بعدين ابتسمي عاد هذه افكاري وإذا ما نفع مافي حل إلا الصبر الحل العصري لكل النساء |
حبيبتي الزمي الاستغفار واقري سورة البقرة
وادعي ربي يسخر لك زوجك الله يعينك عليه والله ويصبرك ويلهمك الرشاد ويقويك يارب .. قلبي معاك والله اقري في علم بوصلة الشخصية وافهمي شخصية زوجك كل زوج وله مفتاح انا انسة ولكن مرة حضرت دورة تدريبية وقال المدرب انه قدم استشارة لامراة عرضت عليه مشكلتها مع زوجها وانه يرفض نهائيا انها تخرج حتى زواج اخوانها ماكان يرضى لها فسالها المدرب حين يرفض ماذا تكون ردة فعلك؟ فاجابت بانها ترادده او تقارن بينه وبين غيره من الازواج او تزعل وتغضب فعرض عليها المستشار اقتراح وقال لها بان تجرب مرة ان تستعد للخروج وتلبس عباءتها وتقول له بعد ذلك انها ستخرج فاستغربت الزوجة وقالت هل تريده ان يطلقني ؟؟؟؟؟؟؟؟؟ فاجابها المدرب انتي جربي ولن تتطلقي باذن الله واكمل عليها اقتراحه انه مؤكدا سيرفض خروجها حينها تنزع عباءتها وتقول له من الكلام الطيب ( سم وآمر ياقلبي ,, طلباتك اوامر ,, ابشر ولايهمك ,, حاضر , .. الخ ) وتجلس معاه وتقهويه وتشربه وتقوم على خدمته وجربت المراة هذه الطريقة مع زوجها ثم قالت للمستشار بعد ذلك ان زوجها تغير وشكرته وكان تفسير المدرب لهذه الحالة ان هذا الزوج لديه حاجة لممارسة السلطة فهو في العمل مرؤوس وفي زملائه تابع وبين اشقائه ووالديه عضو في العائلة والمكان الوحيد الذي يمارس فيه القيادة والسلطة هي اسرته والكأس لديه في حاجته للسلطة فارغ وعلى زوجته ان تشبع هذا الاحتياج وكل شخص في هذه الحياة لديه احتياج معين فارغ وبناء على هذه الحاجة تصدر منه سلوكيات قد تكون غير مرغوبة لان الحاجة لم تُشبع لديه الله يجمع مابينكم على خير ويسخر زوجك لك يارب ويحنن قلبه عليك ويهديه |
الله يسخر لك زوجك
واكثري من الدعاء الله يقومك بالسلامه |
اميرة مكه /
شكرا علي دعواتك سيدة الموقف / مشكلتي ارحمه مع ظروفه ، ولو ارفض مايطاوعني قلبي وهذه النقطة بالذات اتمني اغيرها، ان رفضت اتراجع وتعود حليمه لعادتها القديمه نيوتلا/ كلامك روعه وفعلا بعض المرات اقرر من غير مشاوره اجيبها بصيغة ترا بروح مع اخوي فلان بعض الاحيان يوافق علي حسب المكان، لكن لو بقوله تسمح لي اروح مع فلان غالبا ردة فعله لا وزي ماقلتي مايلقي الا زوجته يفرض سيطرته عليها لانه اخر العنقود ولا له كلمه لا علي اخوانه ولا علي خواته ، حتي لو بيستقوي علي خواته مايقدر عليهن مالقي الا زوجته فارض سيطرته عليها واحسه يستمتع وهو يستقوي ، وفرحان ان احكام الدين معه يقول ماتقدرين تطلعين الا باذني ولو طلعتي تكونين ملعونه ... يقولها وهو مستانس المسداني / لي اربع سنوات متزوجه ، بس السنه الاولي ماكان كذا ابدا كل سنه اشد تشديد من الاولي مره لا تدخلي المسن مره لا تحطي فيس بوك ولا تطالعي تويتر وطريقتك سويتها والله ، المح لي بالرغبه من غير ماطلب لعل وعسي لكن للاسف مافي نتيجه |
*كنتُ أقصد أنك تتجنبي قدر الإمكان أي فعل قد يدفعه للدعاء عليك. *سأحاول الحديث عن ذاك الموضوع إن شاء الله. *نعم! أكثري عليه من الكلام الجميل، وانفخيه نفخاً، وأشعريه برجولته وسلطته وقراراته، وأنه سيد البيت والقوّام عليه.. وخذي منه ما تريدين بالتغنّج والدلال والضحك والأنوثة وهو لا يشعر. *مثل نوعية زوجك لا ينفع معه النقاش الكثير.. فقلّلي من هذا. *مثل زوجك ستغيره الأيام إن شاء الله. *عندما تطلبين منه أي شيء حاولي أن تبرمجي مخك وتدفعي نفسك دفعاً للتفاؤل أنه سيقول "نعم".. فإن قال "لا" فقولي "تامرني أمر.. أو أبشر.. أو أنا تحت أمرك". *رددي دوماً "ربنا هب لنا من أزواجنا وذرياتنا قرة أعين". ::: ملاحظة: ربما زوجك يشعر أنك بعيدة عنه.. فعليه أطالبك مرة أخرى بالكلام الجميل. |
اقتباس:
:* أنا زوجة ولا أدخل كل هذه الأمور وإذا زوجك يمنعك منها فمعه كامل الحق خوفاً عليكِ وأنتِ أمتثلي لأمره في هكذا أمور ويجب أن تفرقي بين الحرمان الحقيقي والحرمان في الكماليات والتوافه مسنجر/ فيس بوك /تويتر / هذه توافه :* عزيزتي لاتطالبي زوجك بحرية غير مشروطة فأنتِ في ذمته ومسؤول عنك ومن واجبه المحافظة عليكِ وصونك وهذه أعدها إيجابية فيه وغيرة على محارمه بعد ردك الآخير هذا شعرت أن مشكلتك بسيطة وزوجك يخاف عليك ويضيق الخناق من وجهة نظرك لأنه يشعر أنه تعاندين وتطالبين بأمور ترينها عند غيرك من النساء غاليتي زوجك مبادئة مختلفة عن مبادىء زوج فلانه وفلانه مثلاً: زوجي لايرضى أن أنزل السوق بمفردي بل ينزل معي أو أحد أخواتي بصحبة أخي أو مع والدتي أزواج بعض صديقاتي ينزلونهن في السوق بمفردهن ثم يأتون ليأخذوهن بعد أن ينتهين مبدائين مختلفين فلا تلزمي الرجل بقناعات ومبادىء غيره كل رجل وزوجته لهم أسلوب حياه مختلفة أنصحك تطبقين كلامه وماتناقشيه وأعملي بنصيحة البليغ فزوجك يريد سمع وطاعة يرخيان قلبه لكِ والجدال لاينفع معه ولا العناد ولا فرض الرأي :* |
نعم ليس كل الازواج مثل بعضهم فازواج اخوات زوجي كلهم يخرجون ويقودوا السياره واحيانا يكون ازواجهم في البيت واحيانا مع الاطفال وهن خارج البيت ولكن عندي الامر علي النقيض ولكني اراه افضلهم لانه يخاف علي
بالنسبه لك الحل هوان تتحاكموا الي شيخ يثق فيه مادام يتحاكمم الدين فهو معه حق ان لا تنزلي بمفردك ولكن عليه ان يعوضك بطريقه اخري |
طيب عزيزتي بما انه زوجك من النوع اللي يحب يمارس السيطرة عطيه جوه يالغلا
ومارسي كيد النساء خليك رقيقة معاه وطيبة وحنونة وطيعيه وكثري من الكلام الحلووووووووووو ( سم , ابشر , الله يخليك لنا ولا يحرمنا منك ) امدحيه وتصيدي الايجابيات فيه كل مابدرت منه كلمة حلوة او تلميح محبب لك امدحيه لو جاب شئ للبيت حتى لو كان بسسسسسسسيط ادعيله وقوليله كثر الله خيرك لاترادديه ابداااااااا ولاتقارني بينه وبين غيره من الازواج ابدااااااااااااا وادعي الله واستغفري واقري سورة البقرة ودايما خليك مبتسمة وسعيدة بوجوده وربي يسخره لك |
لجميع اللذين علقوا شكرا علي التعليق وابدا الحلول
البليغ / صدقت فزوجي من النوع الذي لايحبذ النقاش الكثير ، يريد النقاش في وقت المشكله فقط ساطبق جميع الحلول بس مو قبل ماخذ اعتباري من موقفه، وابرد علي خاطري منه |
امثال زوجك ،،
ما ينفع معه الا جلسات مصارحه .. وعلى المكشوف .. انت زوجته نعم ولكن لك خصوصياتك واهتماماتك واحتياجاتك .. بتدخلين تويتر او بتروحين السوق او بتطلعين توسعين صدرك .. ضروري يفهم ذلك .. وضروري يستوعب ان يعطيك مساحه من الحريه .. ولا بتصرفاته بيقتل روحك وشخصيتك .. والا وصلتي مرحله الانفجار ،، وحينها يضيع كل شئ بلحظه . فقط ؛؛ حوار هادئ ؛؛ ومع التكرار بيستوعب حاجاتك مشكلة بعض الرجال ؛؛ يضيق على زوجته باسم الدين ولكنه يغفل ابسط حقوقها وهو الترفيه عن نفسها و استقلال شخصيتها . |
| الساعة الآن 09:10 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©