|
احس منصدمه وبنفس الوقت ثقتي بنفسي انهزت
السلام عليكم
اكتشفت بالصدفة ان زوجي يكلم بنات بالجوال والوتس اب* هو كشف نفسه ولا قبل ما اشك فيه ولا واحد بالميه وواثقه فيه جداً بس مرا متحمس ع الوتس اب وجالس يكتب وجلست جنبه وتوتر وقام من المكان وسكر جواله يعني هو فضح نفسه بعدها بكم يوم جيت بأخذ جواله لقيته حاط رقم سري قلتله من متى قال من يومين عشان الصغيرة ماتدق ع احد بالغلط لان بنتي دايم تلعب بجواله زادت شكوكي وقلت لازم اعرف رمز القفل وسألته وقال لا بمزح وضغط عليه ورافض هنا تأكدت* بديت اراقبه كل ما جاء يفتح الجوال وأخيرا لقطته الرقم وعرفته* وبعد مانام فتحت جواله وعلى طول ع الوتس اب وكانت الصدمه يكلم بنات متزوجات ومو متزوجات وأوقات عمله من الساعه7 الحد الساعه3 يجلس يكلم بنات* طبعا الأغلب علاقته فيهن موقويه بس وحده شكلها بنت17 سنه لانه قريت انها تدرس ثانوي هي اللي مره فاضيتله وترسله صورها وهو منهبل عليها طبعا ما شفت الصور لانه ماسحها لانه من خلال المحادثة عرفت انه مرسلتله اكثر من صوره من يوم شاف صورها وهو بس انتقاد الشكلي ليش شكلك كذا ليش طالعه حبه بوجهك ليش وليش وليش مع انه بشهادة الجميع جميله بس هو ما يعجبه العجب اهتم بنفسي افاجئه دايم بلوك جديد بس مايعلق يقول حلووو ويطلع ينام يقهرني أسلوبه* أناني ومايجلس بالبيت وخاين أنا فكرت كل البنات اللي عنده ابلغ عنهن الهيئه وهو معهم بعد عشان يتوب وهو مايدري أني عارفه حتى من الوقاحة مسجل اسماء البنات عنده بالجوال ساره وعهد ومدري مين أنا أخذت ارقامهن كلهن عهد متزوجه* وساره ماتزوجت* ووحده ثانيه حاطلها لقب ع ف ماتزوجت* لو واجهته راح نتهاوش وتكبر المشكله وتصير مشاكل ومالي خلق أضيق خلقي فوق ماهو ضايق* وش رأيكم اسوي اللي برأسي ولا اواجهه والله يشهد علي ما قصرت معه البيت نظيف ودايم مهتمه بنفسي وبناتي يهبلن بس مدري وش اللي خلاه يلعب بذيله أنا منطقه بين اربع طوف وهو حضرته *يغازل واللي يقهر كنت أدق عليه 8بعد العشاء ومشغول وأدق ومشغول ورد أخيرا وقلتله ابي أغراض ورفض وقال مشغول* يوم فتشت جواله بالليل وهو نايم كانت المكالمات ع ساره ساعه 54 دقيقه الساعه8 ثم أنا دقيت عليه 3 دقايق ثم كمل مع ساره43 دقيقه ورجع للبيت وكمل معه ع الوتس اب* يوم شفته جلست ابكي من قهري منه طلعت دموعي غصب* ابي اعرف ليش يسوي كذا يكرهني او مل مني وش السبب* |
الله يعيينك اختي
طييب واجهييه او كلمي احد من اقرابك او ابووك او اخووك انا ولد زيين صاارت مثل هاذي القصه مع خالتي و اهي متزوجه اكتشفت ان زوجها يكلم بناات بعدها سكتت يوم يومين و ما تحمله بعدها قلت لنا بعدها بي يومين واجهت زووجها قاالت كل شي لها و حتا حنا وقفنا معهاا بعدها الرجال رجع مضبووط لكن اختي هيئه ما هيئه احس انها مو كوويسه لن عندك بنات و الله يحفظهم لك..! اختي نصحتي لك وااجهييه اذا سكتي بتمووت من قهرر صدقني اتمنى لك تووفييق اختي |
ابغاك تعرفين ان المد اقوى مما تتخيلين
انا لا ابرر خيانته فهي اقذر من ان تستساغ ولكن مد التقنية مع انتشار ثقافة الخوية ولجوء الكثيرات للاسف للاصطياد بشكل مقزز فمنهن من هي فاقدة للحنان ومنهن من تبي خروف يصرف عليها ومنهن ومنهن ومنهن.. من خلال كلامك عن زوجك اعتقد انه باقي في بدايات الخطر ولم يتعمق.. وهذا سهل انه يرجع صدقيني سهل انتي الان خليك ذكيه وفكري بمنطق ولا تشعلينها عشان لا تهدينه على طبق من ذهب لوحدة ساقطة.. فمهما كان بينهم لا يمكن يقارن زوجك بين حليلته وبين بنت معفنه مثل ذي فلا تدفعينه يكرهك ويتجه بقلبه لاحداهن هدي الموضوع وابحثي عن جذبه الان واشغاله معاك فتشي عما يبقيه داخل حدودك.. زوجك واكيد تعرفين وش يبي انتي في امتحان صعب.. سيطري ع نفسك وخليك منطقية وحدثيه عن حبكم وخطبتكم وشهر العسل واحلى الذكريات خليه يحس انك شاريته .. تلاقينه تاركهم وجايك في هذه الفترة بالذات لا تتركينه.. تري قوى الشر تشتغل ماعليك منهن ركزي بزوجك .. تنازلي وارسلي رسايل تدووخه اهديه وتجملي املي عينه حاولي واعلمي انك محظوظة لانك اكتشفتي هالشي بدري وتأكدي ان نجاحك نسبته 95٪ بس جدي واجتهدي |
أخاف ماسيطر على نفسي وأعلمه أني عارفه وتصير مشاكل
مستحيل اسكت اكثر من كذا هو باين انه توه بادي به الاشياء لان من خلال محادثاته عرفت هاالشيء ما اقول الا حسبي الله ونعم الوكيل |
أكتشاف الخيـانه صعب ..
لكـن بنصحك بحـاجه وحـده .. وكلـي أمرك لربك وووووووبس .. تـذكري ..أن الله لايغيـر مابقوم حتى يغيـروا مابأنفسهـم .. ألتــزمي قيــام الليل ..في الثلث الأخير .. خصصي في غرفتك صندوق للصـدقه .. وكل يوم تصدقي لو .. بريال واحد .. ذكـر الله لايغيـب عن لسـانك لا ليلاً ولا نهـاراَ .. فتشـي في نفسـك وش قصرتي فيه مع ربـك ..وتوبي لله من أي تقصير .. .. . . كـانت لي صـديقه خانها زوجهـا وأتبعت نفس هذه الخطـوات .. وسبحــان من أرجع لهـا زوجهـا كالسابق وأفضل بكثير .. |
مع كلام عيوني تحكيني
زوجك مافي شئ راح يغيره غير انه يصحى من غفلته ويتوب بنفسه او يتوب بدعواتك حتى لو بلغتي الهيئه حيلقى غيرهم لازم هو اللي يتغير ولا تصارحيه ابدا ابدا هو للحين مقدرك وخايف على زعلك وعاملك الف حساب ويكلمهم برا البيت ولو صارحتيه راح تخسري هذا الشئ قلب زوجك بين اصبعين من اصابع الله يقلبهما كيف يشاء ونا صيته بيد الله لايفكر ولا يتصرف الا بقدره الله فالجئي لمن بيده الامر كله فهو ان اراد شيئا فا انما يقول له كن فيكون ادعي الله وانتي محسنه الظن بالله و وااااثقه ومتيقنه من الاجابه وانو زوجك راح يتغير ي يوم من الايام فمستحيل دعواتك تروح هباء ولا تياسي يقول النبى صلى الله عليه وسلم يستجاب لاحدكم ما لم يعجل . يقول دعوت فلم يستجاب لى . يكون الفرج فى قمة القرب من العبد . ويكون العبد قرب من اليأس فيزول الفرج . مع ان الفرج كان قريب منه . وقال رسول الله صلى الله عليه وسلم ان الله يضحك من قنوط عباده مع قرب تغير البلاء . فسأل احد الصحابه ايضحك الله . فقال صلى الله عليه وسلم نعم قال الصحابى . لن نعدم خيرا من رب يضحك . فلا تحزني ولا تستعجلي . لان الايأس والاستعجال . يمنع الاستجابه للدعاء . وقال رسول الله صلى الله عليه وسلم ما من رجل يدعو الله بدعوة ليس فيها اثم ولا قطيعة رحم الا اعطاه بها احدى ثلاث خصال . اما ان يعجل له دعوته او يدخر له بها من الخير مثلها او يصرف عنه من الشر مثلها قال الصحابه رضى الله عنهم اذن نكثر . قال الله اكثر . خليكي هاديه ومطمنة واهتمي بزوجك وبيتك وزينتك لانك بتدعي وانتي واثقة ان حال زوجك راح يتغير في يوم من الايام |
لازم عشان يتوب يعرف حجم الغلط و مدى تاثيره
قولي له يحط لك البرنامج حتى لو تعرفي بس عشان تلفتي نظرة وقولي بتسلى مثلك ...!! |
كلميه عن وحدة من معارفك قولي له اتدري ما سمعته اليوم
وحد من صديقات اختك او جيرانك كشفت زوجها انه هايم في مكالمات محرمة مع النساء ابلغت عنه وعنهن الهيئة وفضحته وتركت له البيت و خلعته تطلقت منه و اصبحت سيرته على كل لسان اتبهدل اخر بهدلة وقوليلو الرجال الخاين يستاهل اكثر من هذا ان كان زوجك انسان محافظ وملتزم سيفكر في كلامك ليلا نهارا |
خفف الله عنك والهمك الصواب في اتخاذ القرار
الجأي الي الله والي الدعاء واسألي الله ان يجملك في عينه اجعلي تلميحاتك كلها باسلوب غير مباشر احكي له قصص عن ان هناك فتيات يتعرفن علي شباب وهن متزوجات وان السبب كان خيانه ازواجهن لهم فقابلوا الخيانه بالخيانه وخذي رايه وقولي له انه كما تدين تدان اجعليه يخاف ويحس ان ما يفعله يمكن ان ينزلق اليه اهل بيته وقولي له انك تعذري هؤلاء الزوجات ثم تدريجيا امامه انشغلي ايضا بهذا الجهاز وبيني انك مبسوطه طبعا الخوف سيأكل قلبه فقد يدفعه هذا الي البعد عن ذلك خوفا علي ان تنجرفي مثله حاولي تكوني صبوره وقويه حتي تستطيعي ان تتقني الدور |
اقتباس:
وش اللي مستحيل اسكت تبغين تخربين بيتك بيدك هدي شوي وخططي فرصتك تأدبينه بس المواجهه ماتنفع لأنه بيحطها فراسك وبيقولك من سمح لك تفتشين ويصير بعدين يكلم ولا يحفلك فيه حل جربيه بس ماينفع تجربينه اليوم ولآ بكره سوي نفسك اول شيء انك مو مهتمه بجواله وإنك مو شاكه فيه والوضع طبيعي حتى يتطمن ..بعدها اشتغلي مثلا لما تكونوا جالسين مع بعض روحي عند التلفون وسوي نفسك تكلمين صديقتك وتفاعلي معها مررة قولي: اهليين كيفك وش اخبارك ....لآآ ماقلتي لي وش صار؟؟ اها اها وبعدين؟؟؟ واااااو ..؟ لا مسستحيل بالله عليك.معقولة في احد كذا ... متخلللللف ..احسسسسسن يسسستاهل هههههههههههههههههههههههـ ههههههههههههههههههههههههآآآي الحمدلله والشكر وربي اهل العقول في راحة >> تفاعلي مرة وخلي زوجك ينتبه لك وبعد مآتقفلي من المكالمه اضححكي واسرحي شوي وروحي اجلسي جنب زوجك ..أكيد مليون فالمية حيسألك شو فيه ^_* وإذا ما سأل قولي له عآآد هنا ألفي القصة مثلا: قولي صاحبتي حكتني عن اخو صديقتها تقول: الولد هاذا عنده اصحاب واتفقوا إنهم يسون مقلب فيه يبون يشوفون هو مخفه وينضحك عليه بسهولة ولا وش وضعة راحوا طلعوا ارقام جديدة واضافوه في برنآمج اسسمه اممممم الواتس اب وجلسوا يسسحبو فيه شهر على اساس انهم بنات هههههههههههههههههههههههـ ويرسلون له صور واهدآءات باصوات بنات وهو مصدق وداخل معاهم جو وبعدها تجمعوا في مجلس وقالو له يافلآآن كيف حال فلانة؟ والثاني يقوله: إلا كيف حال فلانة الثانية وقامموا يضحكون عليه كلهم وهو مصدوووووممم ويتريقون عليه ايووه تحبها هااه خخخخخخخخخخخ يآلخروووف ترى احنا اللي كنا نتكلم معك >> عاد انتي اضحكي وقولي الحمدلله والشكر بعضهم رجال تضحك عليه بنت في الإبتدائي هه وروحي من عنده خليه لحاله عشان يفكر و يخاف ولعآد تجيبين طاري عشان مآيشك هدي اعصابك وابدأي اشتغلي على خطه ثانية ..حتى يكره الواتس وكل البنات خذيها زي التحدي وانتي اللي حيفوز فيها ..موفقة (= |
والله زوجي خواف ويحسب لي الف حساب ودي اصارحه وأعلمه أني عارفه واني ان صدمت فيه وماتوقعت ان هاالشيء يطلع منه بدون مااهاوش وازاعق
احس المواجهه افضل شيء بدون انفعال وهواش عشان يعرف أني مفتحه عيوني مو خبله زي ماهو متوقع مدري احس كذا أفضل |
انتي اتبعي كلام الاخوان والاخوات جربي وشوفي النتايج
ماراح تخسري شي بصراحة افكار جهنمية ومادام زوجك خواف اكيد بيترك عنه هالاشياء لانه توه مبتدي وربي يسخر لك زوجك ويجعلك اجمل النساء في عينه يارب ويصرف عنه هالاشكال |
عندي لك خطه حلوووه من رايي تجيبين شريحه تكون بدون اسم وترسلين ع جوالك انتي رسايل كنها من بنت تبي تفضح زوجك عندك ارسلي لنفسك كم رساله تقولين فيها شوفي زوجك وش يسوي من وراك تراه مايحبك وهو يموووت فيني موووتي من الحره ورسايل تقهره زي كذا وبعدها روحي له وقولي وش هالرسايل اللي تجيني وسوي نفسك زعلانه،،خليه يحس ان رفيقاته غدرو فيه ويطيحون من عينه بهالطريقه ،،بنفس الوقت اكثري من الاستغفاااااار خلي لسانك دااايم يلهج فيه وادعي الله ان الله يصرفه عن بنات الحرام ولايفتنه بوحده من بنات ادم غيرك ،،وبعد كل صلاة قولي(استودعت الله ديني وامانتي واولادي ونفسي وقلبي وقلب زوجي وفرجه وجميع جوارحه عن ماحرم الله )
|
غاليتي .. أدعو الله العلي القدير .. أن يمدك بالقوة لتنهي هذا الموضوع ..
نصيحتي الوحيده .. أن لا تتركيه طويلاً .. فيستحلا الموضوع في نفسه .. ويصبح إدمان .. وأكثري الاستغفار .. دعواتي لك من كل قلبي فقد تعرضت له وحسمته .. بعد تشغيل حاستي السادسة .. كامرأة تحس بخفايا زوجها وما وراء العيون .. كانت مواجهة عاصفة .. لكنها كانت الحاسمة .. ربي يعينك .. ودعاء المؤمن لأخيه المؤمن مستجاب .. أدعو لك بالحكمة في معالجتك .. والهدوء .. اللهم أصلح فيما بيننا ولا تجعل بأسنا فيما بيننا وأجعل سأك على عدونا اللهم أصلح لي زوجي وأسلل سخيمة قلبه وأرزقني حبه وورضاه وصدق حديثه |
طيب ما هي المشكلة لو واجهته
هل زوجك شين و قوي عين و ما بينفع تواجهيه أنتي قلتي خواف و يمكن يخجل لي هي تحترق وتعدل من نفسها فوق المعدل الطبيعي لتسحبه و هو الأخ مكيييف و مريح هنا عشيقة تراسله و هنا زوجه تدللـه و هالحلول ,,,طيب أنتو كذا تخربوا الرجال اللي يقروا الموضوع:11: و يبرروا خياناتهم أن زوجاتهم ما جذبوهم فينتظروا زوجاتهم يبادورا في تعديلهم ,,,ما حصل , البديل موجود يارجال لا خربوا بعضكم إلا صاريحييييه ياسلااام:( ... واجهيه أن تطلبي منه ينزل لك برنامج الواتس أب و لو فرض ,,كملي معاه الكلام الي يجمد على الشارب الرجل عقلاني فاستخدمي حلول عقلانية يفهمها على بلاطة:25: |
انتي اذا صارحتيه صح راح ترتاحي
وهو راح يعمل حسابه وممكن يمتنع اسبوع او شهر ولانه مو مقتنع من نفسه راح يرجع ويكلم واكيد حيكون حريص جدا انه مايترك اي ادله تدينه واذا صدتيه وكشفتيه مرة تانيه ردة فعله راح تكون اخف من الاولى ومع الوقت يكون عادي عنده خليه يحس انك فاهمة شئ قللي كلامك معاه انشغلي بنفسك اذا هو جالس ويتفرج تلفزيون او في النت خليكي في غرفة تانية واشغلي نفسك باي شئ صدقيني بعد كم يوم حيفقدك ويجي يسالك ايش اللي مغيرك.. وايش فيكي متغيره ابتسمي وقولي مافي شئ زي ماقلت خليه يحس بدوون ما تتكلمي خليه يتحرج من نفسه احسن من انك تواجهيه انا متاكدة انك مهتمة بنفسك وزوجك ماعنده سبب عشان يخونك بس دايما الشيطان يزين الحرام ولو كانت اقبح امراة ويشوه الحلال وان كانت في غاية الحسن و الجمال لاتلومي نفسك ولاتخلي ثقتك تهتز مدام انك قايمة بواجباتك ومهتمه بنفسك وشكلك |
امر الخيانه ..
لا ينفع معه الا المصارحه وامرٌ بمعروف ونهي عن منكر .. لماذا الخوف ؟!! هذا اعظم جهاد يمكن ان يقوم به اي انسان .. واؤكد لك انك لن تصبري ولن يهدئ لك بال إلا بمصارحته .. و لتعلمي ان الله هو من كشفه لك و امر الله كله خير ولكن علينا اتباع ما امر خالقنا وابتغاء رضاه عنا .. والسكوت عن الحق اثم كبير ،، ناقشيه وكلميه وبكل هدوووء وصفاء جو .. ولا تركزي على حقك بقدر ما تبثي خوفك عليه من هذه المعصيه وان يتقي الله في نفسه واعراض المسلمين.. |
شكرًا لكم جميعا
بالأول لمحتله بعدين صارحته ماتحملت بداية السالفة انه قالي نبي نطلع نتمشى قلت ليه انبك ضميرك لأنك الأسبوعين اللي فاتت مطنشنا وما تجلس بالبيت وبس ع الوتس اب الله يستر منه الظاهر السهر وتطنيش للبيت بسببه ويجي يتوتر ويتلخبط وخاف أني اكون عارفه قالي وش تلمحين له قلت انت أدرى اللي على راسه بطحه يحسس قال عشان حطيت رمز قفل الجوالي قلت إيه وحرصك الزايد أني مامسك جوالك هذي وراها سالفه وماراح يهدالي بال الحد ما اعرف وش ورااااااك قال انتي موسوسة وطلع وبعد ساعه رجع وقال خلاص شلنا رمز القفل وهذا الجوال فتشيه على كيفك لقيته مخليهم نفس السماء بس حاط قبلها ابو هنا انفجرت قلتله ابو عهد وأبو ساره لو بدق عليهم بيطلعلي بنات تحسبني غبية بشك فيك من فراغ اصلا أنا حافظه ارقامهن عندي وداقه وسامعه صواتهم كلها صوت بنات وببلغ عنهم الهيئه وانت معهم هو من الصدمه يسمع بس ماقال ولا كلمه قال اصلا هذا واحد من اخوياي مكلمهم من جوالي لان جواله مفصول سبحان الله ما يستسلمون يستمرون بالكذب قلتله أنا قلت اللي عندي يا تحذفهم وتبطل مغازل ولا الهيئه وبفضحك عند امك وبقولها كل شيء هذا غير أهلي قال بحذفهم بس تآكدي انك ظلمتيني أنا اساسا ماعرفهم قلت ليتك اعترفت وتأسفت لا وتنكر بعد ما اقول الا حسبي الله عليك ونعم الوكيل وطلعت وتركته وهو من كلامي ما جاء للبيت الا الحين مدري وين غاط لو معترف وقالي انها غلطة وماراح تتكرر كان أهون علي من انه يكذب علي فوق خيانته |
ادعي ربك يرده لك ألحي بالدعاااااء ولا تيأسين علشان بيتك وبناتك
حسبي الله على كل بنت تكلم رجل وتشغله الله يشغلهم في أنفسهم |
توكلي على الله وبلغي الهيئه
شرط انه يتوب ومايتعودها وبيقدرك:d |
من زمان تركت الردود... لكن في هذه القصة... ومع هذا التفاعل، أجد نفسي مجبر أن أرد.
أولا لم يناقش أحد، لماذا هرب الزوج إلى هذه العلاقات المشبهوة؟ من كلامك، وتصريحك زوجك يخاف منك و يحسب لك ألف حساب... هل هذه حياة يتمناها رجل؟ أنا لا أبرر له الخيانة، لكن أفهم أن الرجل يتمنى زوجة صديقة حبيبة وليس إنسان يخاف منه. ممكن تقولين هو ضعيف شخصية، فأقول مهما كان ضعيف شخصية يجب أن يحس برجولته على الأقل في بيته ثانيا: بعض النصائح المذكورة، تسخف من الرجل و تتعامل معه كأنه طفل، وهذا يزيد من المشكلة. أشوف أن النصيحة المباشرة و من غير اسلوب التهديد (بالهيئة) أو غيره وإنما بالترغيب والتحبب و التبعل هو أنجح أسلوب. حفظ الله بيتكم طاهرا و سعيدا |
أنا مع كلام الأخ مشكلتي زوجتي
و شخصيًا أعرف ناس ملتزمين و بسبب التقنيات الحديثة الشات و الواتس آب انجرروا لطريق الغفلة و المعاصي حضرت دورة للأستاذ طارق الحبيب و كان يقول اللي تبى تخرب بيتها تقطع النت أو تكسر الفون .. كوني دبلوماسية و اكسبي زوجك و ألهيه عن الفون حاولي كل مرة تمري عليه و هو عالفون بدون ما تحققي معاه .. جبيله الأكلة اللي يحبها و هو عالفون ضيفيه عالواتس آب و شاركيه الحديث عن طريقه حتى و انتي بره البيت و عبريله عن اشتياقك و انتي بره زوجك من النوع اللي يبغاكي تعامليه كعشيقة مو زوجة .. الله يسخرلك زوجك يا رب |
شوفي ياقلبي انتي خذي اغراضك وروحي بيت اهلك بس قبل لاتروحين صوري بجوالك الحاجات اللي بجواله وروحي وخلي الرجال يتفاهمون معه وارقام هالبنات الغافلات عطيها للهيئه وهم بيرقبوانهم ومب لازم تروحين للهيئه ادخلي موقعهم في النت وقدمي بلاغ وربك كريم ويارب يهدي زوجك
|
مشكورين حلينا المشكله وكل شيء تمام
هو مازال منكر بس أنا قلتله انه وحده من اللي تكلمهم صديقتي تعرفها وموريتهم محادثتك بالوتس اب وصورتك بعد وقالت ان هذا تعرفه واسمه فلان الفلاني وصديقتي وصلتلي كل شيء هنا اعترف وتصافينا والحمد الله وخر رمز القفل ورجع زي قبل بس الله يستر يكلم البنت ويستفسر منها ويسألها ليش تسوي كذا وتنكر السالفة كلها ويدري أني اكذب عليه مابي اخبره أني فتشت الوتس اب وهو نايم لانه بيقلبها مواعظ وليش تجسسين علي ومن هاالكلام ويعلم الله أني ماتجسست الا بعد تصرفاته الغريبة وغيابه الدائم عن البيت |
اقتباس:
|
الحمد لله انها انحلت.
|
الله يهديه و يبعده عن بنات الحرام و يجملك بعيونه
ويهدي بنات المسلمين اجمعين |
| الساعة الآن 04:54 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©