|
الاعباء المالية تؤثر على تصرفات زوجي
مساء الورد على الكل شخباركم عساكم بخير الله يسلمكم انا انسانة تربيت على الترف والرفاهية في بيت كبير ومافي شي ينقصني والحمدلله وانسانة طموحة كثير دارسة فالجامعة تخصص تجارة واقتصاد وفي الجامعة تعرفت على شاب اوهمني انه الشاب المثالي وانه يحبني ويغار علي وكان خفيف دم وكلامه عسل ولكنه من عاىلة فقيرة غير انه خريج جامعي ولكن علم مكتبات (تخصص جدا ضعيف) تخرج قبلي بسنة ونص واشتغل في مدرسة وتقدملي والخطوبة عندنا مع ملكة فاخذ قرض كبير خذ فيه سيارة مستعملة ودفع حق المهر والشبكة .. بعد اسبوع بس من الملكة واحنا طالعين عزمني عالعشا وقال لي بعد ماتتخرجي وتتوظفي تاخذي معاي قرض كبير ونبني بيت مع شقق ومن فلوس الشقق نطلع سيارات جديدة ونسافر وادرس ماجستير والتخطيط الفاشل تبعه ( الراتب 600 : 200 اجار شقة, 200 للبنك عشان قرض العرس و 200 الاخيرات عشان قرض البيت)!!! ومن وين بتصرف؟ من قرض البيت!!!!!!!! هنا انصدمت كيف يطلب مثل هالطلب واحنا تونا الا مخطوبين لا ويقول توافقي او ننفصل طبعا رد فعل طبيي قلتله ننفصل جيت امشي عنه اثر علي عاطفيا ووافقت وانا ندمانة بس من حبي له ومن خوفي لخسارته بعد كم شهر خبرته برفضي واثر علي مرة ثانية وسكتت وصار يعاملني مثل الاميرات يفتح لي باب السيارة يدلعني ويضحك معاي كل يومين عزومات وسينما ووناسة ويعطيني 200 مصروف اخذ كل احتياجاتي المهم حددنا موعد العرس وانشغلت بالتجهيزات وخوفي اني اخسره قررت اتفاهم معاه على موضوع البيت بعد الزواج وصار العرس وعشت شهرين فالعسل وبعدهم فتحت الموضوع وعصب كثير وقال اجلي الموضوع بعد التخرج وكان باقي كم شهر بتخرج وطول الفترة الي ادرس فيهم يدلعني يطبخ ويغسل عني الصحون وحبوب ودمه خفيف وصار وقف عني النفقة ولكن ياخذلي اغراضي ومع ان مسكني بعيد وفملحق صغير مطبخ وغرفة ومجلس ولكن معاملته الزينة صبرتني على كل شي ولما خلصت اخر امتحان وتخرجت انقلب الرجال 180 درجة ومسكلي هالكلام انا فقير وانا مديون وايجار المحلق تاعبني مع ان بس (190) وصار ماياخذلي احتياجاتي ومايعاملني نفس الاول ويقول لي انتي بتتوظفي وبترتاحي وانا بضل فقير !! واذا اطلب منه شي بسيط ورخيص مثل محول كهربا يصرخ فيني انتي ماتفهمي وبعد ساعة شوفه مشتري شي بسعر 10 محولات وكله يقول لي تسلفت من فلان ومن علان ومن ومن عشان البي احتياجاتنا ومرة قال متسلف 30 ثاني يوم غلط وقال 40 (( واضح ان يكذب الله يسامحه)) وحتى لو صحيح الرجال مايخبر زوجته هالكلام ويحاول يريحها ومايحسسها بشي وصار مايرحمني فشغل البيت وحتى وانا اغسل الصحون يجي ويقول غسليهم زين ويمسكهم يغسلهم قدامي يحسسني اني وسخة مع اني افركهم فرك ويذلني يرمي اشياء بالارض وينتضرني اشيلها اذا ماشيلها يقول انتي انسانة فوضوية !!! وصار مايضحك وكله نكدي وكئيب ويشتكي مديون ومديون ومديون وحتى بليل احط راسي بنام هو بجلس فالسرير ومسوي عمره سرحان ومهموم قلب لي حياتي كئابة وضيق وصار مايطلعني ولايعزمني مكان يقول ماصفاله شي هالشهر بعد ماكنا نطلع كل نهاية اسبوع ويقول هي خطة جديدة لان مديون !! وصار جاااااف معاي اقوله وين الحب والرومنسية بعد ماكان يفتح لي الباب ويدلعني احين مافي ويقول مافي حب ورومنسية ولا خفة دم وانا مديون !!!!!!!!!!بالله عليكم شو دخل الحب بالديون .. الحب احساس والفلوس مالها علاقة فيه والله يشوفوني اهلي يفكروني مريضة بعد ماكنت مهتمه بنفسي وبشكلي قصيت شعري قصير وخليته اسود كله لان مايقدر يدفع لي حق ستشوار وحق صبغة واهملت بشرتي وحالي وملابسي قديمة عشانه وشوفوا كيف يعاملني وفوق هذا حاط قانون مافي اطفال لحد 5 او 10 سنوات لان مديون!! ويبيني اكل حبوب كل هالسنوات قولولي شو اسوي معاه الحين انا في بيت اهلي خبرته يخليني معاهم اسبوع لان النفسية تعبانة كثير ويوم كنت اكلمه يرجع يومين عسل وبعين يرجع يعذبني ساعدووووني |
الله يكون في عونك
بس انتبهي تشربي حبوب لانك لسا ماحملتي لانها ممكن تسببلك عقم دائم وبصراحة هو شكله تزوجك لانه طمعان فيك وفي فلوسك مو حب مثل ما اوهمك بس قال في نفسه مافي طريقة الا اني ابين اني العاشق الولهان عليها وتصدقني وانتي الله يهديك عطيتيه وجه ان شاء الله الاعضاءهنا يفيدونك انا بصراحة ما اعرف اعطي حلول للمشاكل احس عقلي يوقف الله يكون في عونك ويقدر لك اللي فيه الخير |
اقتباس:
اكبر دليل في مرة تهاوشنا وقلتله طلقني وانا ابكي قال لو تنطبق السما عالارض ماطلقك انتي ترجعي كل فلس دفعته فيك !!!! انصدمت .. ولما هدت الامور قل كنت معصب وماقصدت شي لكني ما اصدقه والله بس ابي وادعي ربي ليل نهار اني احصل حل لهالمصيبة والمصيبة الي اعظم منها اني احبه لاني ياثر علي ويمثل ان يحبني ويحضني ويتاسف استغفر الله بس |
طيب ماهي المشكلة لو ساعدتيه و كتبتو البيت باسميكم
و المشروع تقوما به أنتما الأثنان؟؟!! |
اقتباس:
ما المفروض يفكر يحسن من وضعه بالاول وليش معاملته تغيرت يوم رفضت !! وايد مشاكل لو تركز فالموضوع زين شكرا على المرور |
على نفسها جنت براااقش ...!!!
الرجال كان وااااااضح جدا جدا جدا معك قبل ما تورطين فيه لكن انتي اللي خدعتي نفسك باو هام الحب و الرومانسية و غيرها كان كل همك تتزوجي و تعيشي الرومانسية و ما تخسرية هدفك كان قصير المدى .. لدرجة اعمتك عن كل شي اهملتي الاهداف طويلة المدى و الأهم في الحياة ...! و الان جالسة تتندمي و تحسي انك مظلومة و مخدوعة اقول لك الحقي باقي عمرك افضل لك ...!! او حاولي تقربي الاهداف بينكم و توثقوا أموركم رسميا و بشهود .. |
الله يعيينك اختيي و ان شاءلله تلقين الحلل
ان شاءلله تنحل مشكلللتك |
بصراحه أعانك الله بجد. هو مؤ لانه ضعيف ماده لا وربي. هو همه الفلوس اكثر شيء وشكواه فوق راسك اغلب الاوقات. مبتعد عن الأخذ والعطى بالمشاعر متغافل شؤي عن واقعه. الأهم انتي اخطئتي يوم قالك من الاول بالخطبه عن تخطيطه وكلها وااااضح طممممع براتبك. الأهم الان. وش تخطيطك رحتي لااهلك طيب. الحل.... ماناقشتيه بخصوص تضايقك من أسلوبه وشكواه طوووووول الوقت وش قال. والآن وانتي ببيت اهلك مااستعجب من طلبك. ما قال شيء ليه السبب. وعندي سؤال ليه مؤ كلن منكم يا أخذ قرض وتبنون او تاخذون شقه تمليك وكلن وحقهم مكتوب بالمحكمه محد ليلعب ب 2. فهمتي. هذا افضل لكم. وبترتاحين وب يرتاح ومن ناحية مااضمن الراحة السعاده. فلا قدر الله. صار شيء حقك بيرجع فهمتي. وايضا يحاول البحث عن عمممل اخر حتى لو بشركه بعضها رواتبها ممتازه.
|
الله يعينك ويسهل لك يا رب
هو انتظرك لين تخرجتي لانه متامل انك راح توقفي معاه ماديا لكن وجد غير ذلك بصراحة باين من زوجك مايهمه الا الفلوس الله يصبر قلبك |
اسمحي لي أن أقول هذا نتيجة الحب والكلام الفاضي والغير شرعي الذي قبل الزواج، والمشكلة أنك أنتي وغيرك من مئات الآلاف ضحايا هذا الطريق وبعض البنات مايستوعبن ولا يعتبرن بما قبلهن، عموماً الله يعينك يا أختي لابد أن تكوني صارمة معه وتتحدثي بواقعية عن واجبته وواجباتك، لا أملك إلا الدعاء لعل من هو أفضل مني رأياً يدلك على الطريق الأنسب، وفقكِ الله وأعانكِ.
|
زوجك من اسوا انواع الازواج ..اللي مايعطي حب او بالاحرى يمثل حب الا بالفلوس الله يعينك على ما بلاك
بس عندي عتب عليك لي اتزوجتيه برغم عيوبه اكبر غلط عند البنات انهم يتهاونو في عيوب واخطاء ظاهرة في الخطيب ويعميهم الحب ويقولوا يتغير بعد الزواج الرسول عليه السلام كان واااضح لما قال( اذاجاءكم من ترضون دينه وخلقه فزوجوه) الله يهديكي اللي صار صار والحمد لله على كل حال بصراحة وحكون واضحة معاكي زوجك من الصعب جدا ان لم يكن مستحيلا ان يتغير الايجابيه الوحيدة اللي في زوجك انه اجل موضوع الحمل انا اكرة انصح بالطلاق بس في حالتك انصح فيها فانتي مازلتي في البر ولو حملتي راح يعلقك ويطلب مبالغ ماليه كبيييرة عشان يطلقك او يرجعلك الولد زوجك اناااني ومصلحجي لاخر درجة لاتترددي في الطلاق منه ابدا انتي لاينقصك شئ متعلمة ومن اسرة كريمه وتقدرين الحياة الزوجيه اسال الله ان يعوضك بمن يحبك لذاتك ويقدرك |
الله يعينك
بس للاسف انتي تهاونتي من البداية اي من ايام الخطوبة الرجل واضح حتى ولو حاول يمثل دور العاشق الولهان ماطلع عليه الدور همه الاول والاخير الفلوس وبس ولو دفعتي كل خسارته الحين راح يطلقك للاسف اسوا انواع الرجال الرجل المادي البحث وزوجك مادي للغاية وطمعنا في وظيفتك ومعاشك يعني حتى لو توظفتي وصرتي تاخذين مرتب راح تستمر المشاكل اي حب ورومانسية في مثل انجليزي يقول : اذا دخل الفقر من الباب خرج الحب من النافذة ربي يعينك و يسهل امورك |
الآن هل انتي موظفه ام لا؟
|
للي يسالوا عني انا مازلت باحثة عن العمل زوجي بعد ماكان يشجعني اشتغل ومايمانع اشتغل لحد بليل لما حس ان مابيستفيد من راتبي الحين يقول ابي ارجع من العمل اشوف زوجتي قدامي وضل كذا فترة وبعدين رجع يشجعني اشتغل عشان يفتك من اغراضي مع ان ملزوم يصرف علي بس من داخلة يحسدني وحاقد علي استغفر الله بس مايرحموا ولايخلوا رحمة اللـْْ???ـْْه تنزل
|
اختي انتم تهاوشتم وزعلتي انه طمعان بفلوسك
وانتي الى الآن ما توظفتي..!!! والله الي اشوفه من كتابتك - الرجال شاريك ويسوي كل الي يقدر عليه علشانك -كان صريح من البداية وما غشك ولا كذب عليك - للأسف انتي ما تبغين تتحملين معاه حتى الهم او انك تحاولين تدعمينه معنوياً الواحد ما يقدر البلاء قبل وقوعه ابحثي عن وظيفه وساعدي زوجك وشاركيه همومه واحلامه |
اقتباس:
للاسف تحليلك شكله صح امين يارب ويعين الجميع |
اقتباس:
|
كيف حاول يستغلك؟
اما معاملته فشيء نفسي الرجل لا يمكن يرتاح وهو مضغوط مادياً بعض الرجال يضغط على نفسه ويجامل زوجته مثل ما يجامل باقي الناس وبعض الرجال ما يقدر يضغط على نفسه قدام زوجته بعدين بايش ضيق عليك كل الي كتبتيه ما يبين انه لئيم معاك بالعكس وانتي احس انك شايله عليه بقلبك كثير فهمينا |
اقتباس:
|
ما في شيء راح
طبيعي ايام شهر العسل غير عن الباقي كل الناس في البداية تكون المعاملة دلع وحب وبعدين تبدأ مرحله ثانيه في الزواج الآن انتم في المرحله الثانيه من حياتكم مرحلة التأسيس تبينها تمر بحب حبي زوجك واهتمي فيه تبينها تمر بمشاكل ونكد وما تنتهي الا وكل واحد كاره الثاني استمري على ما انتي عليه انا ما اعرفك اختي لكن يظهر لي ان زوجك لا يلقى دعم منك ولا مسانده انتي تتعامليهن مع الاشياء بأنانية لا تفكرين الا في ما يعطيك وكيف يسعدك اعتقد ان زوجك يرى ان معاملته لكِ بحب لم تغير فيك وباحساسك تجاهه ابدا لذلك اظهر لك الوجه الآخر هل انتي تحبينه؟ اسألي نفسك بصراحه اذا كان الجواب لا فما له داعي تكملين نقاشك هنا إذا كان الجواب نعم غيري بنفسك قبل تطلبين منه يتغير |
اقتباس:
|
واضح ان زوجك ذكي جداً وتفكيره حبة حبة
نصيحتي خليك على موقفك , لاتخلينه يلوي ذراعك عشان يحقق اغراضة يكون معك واضح طبعا اذا استمريتي صامدة راح يمل ويكشف اوراقة وقتها راح تعرفين وش بقلبه ووش ناوي عليه ووقتها الخيار لك اهم شيء لاترضخين ,, اذا في بالة شيء يكون واضح ويحطه ع الطاولة وتتفاهمون اذا كان فعلاً يحبك وزواجكم قائم على اساس صادق ونبيل بالنسبة لمنع الحمل مؤيدة , لكن خليه هو اللي يقوم بما يمنع الحمل يعني انتي لاتمنعين الحمل على حساب صحتك , وهو ينبسط؟؟؟؟؟؟؟؟؟؟؟؟؟ وفية الف طريقة وطريقة يسويها الرجل وتمنع الحمل |
اقتباس:
لماذا لقيت اللوم على الحب أليس هناك ألآف وألآف من اللزيجات التقليديه يكون نهايتها الفشل؟؟ وكم من الازواج يعيشون فى مشاكل وكره البعض وكل واحد منهمـ يعيش فى عالمه بعيد عن الثانى وبداية زواجهم كانت تقليديا الحب ليس له دخل فى الفشل فلا تهاجمون صاحبة المشكله لانها أختارت زوجها بنفسها |
اقتباس:
|
اقتباس:
للاسف انا مجبورة اني اخذ منع حمل لاني ما اضمن يصير خطأ واحمل ووقتها مشكلتي تصير اكبر ادعولي الله يفك كربتي |
لاحظت ان التحليل ان زوجك فيه نية استغلال توافقين عليها مباشرة وتدعمينها بردك على العضو
واللي يخالفك الرأي تردين عليه انه مافهم السالفة زين بمعنى انتي طارحه الموضوع ومن البداية مقتنعه ان زوجك استغلالي وجالس يستغلك وهذا تفكيرك ونحترمه وقد يكون صواب وقد يكون مجتمع زوجك مختلف عن مجتمعك ورفاهيته فزوجك ممكن اخوه متزوج وزوجته ساعدته ببناء البيت وممكن اصدقاءه بالعمل الخ الخ الخ فهو يشوف انه حلم وشئ عادي وانتي بحكم مجتمعك ورفاهيتك والدك هو اللي وفر كل شئ بيت وسيارة لكل بالغ ومصروف خاص الخ الخ الخ الحل ساعديه اذا توظفتي ان شاء الله وسجلوا البيت بإسمك وأسمه بالمحكمة أنا اقول لك على شئ زوجتي عندها حساب بدون بطاقة وانا عندي حساب بدون بطاقة حساباتنا هذي لا هي تسحب ولا أنا اسحب منها كل واحد فلوسه مفصوله عن الثاني نجمع حق بيت تهاوشنا وكنا على وشك الانفصال هي فلوسها عندها وانا فلوسي عندي لا انا استغليتها ولا هي استغلتني حتى لو بنشتري بيت بيكون مناصفه وانا قلت لها اجمعي نبي بيت الى متى واحنا بأجار مع العلم انا اللي ادفع الأجار كامل مو مشاركة لأنه مسؤوليتي اأمن لهم مسكن اوصلي الى حل وسط يرضي جميع الاطراف ساعدي زوجك بحلمه وساعدي نفسك بحياتك وزواجك وتشاركوا بالبيت وكل ياخذ حقة |
انفذي بجلدك ...والله يعوضك بالاحسن
وبالنسبه للخلفه يعني هو يبيك تنجبين وعمرك في الاربعين ولا فوق ال35 سنه واساسا هذا مايصلح يكون اب انا اقول الرجال الي تفكيره منحط زي كدا المفروض مايتزوج نهائيا....يجلس عزابي افضل له دامه يحسب حساب الفلوس ليش يتزوج؟ واهم شي لازم تتاكدين انه ابو طبع مايغير طبعه.. وانتبهي لاتحملين وتتورطين كفايا اطفال ضحايا .. |
انا أميل الي رأي ذكريات لا تغيب
فهو كان واضح من البدايه ولو كان مخادع ما صرح لك بما يخطط له واراه عادي عندنا ان الزوجه تساعد زوجها مادامه غير قادر ماديا وكان الاولي بك من البدايه ان ساعدتيه في الحصول علي منزل ويكتب باسمك ولا تجعليه يأخذ هذا القرض فانا لم اري دورك كزوجه فانت لم توفري له وسمحت بالخروجات والنزه رغم ظروف زوجك وكان كل همك سعادتك وانبساطك فماذا فعلت من اجله تنازلتي عن جزء يسير من المهر من اجله يالها من تضحيه!!! السيده خديجه وقفت بجانب زوجها سيدنا رسول الله وساندته ماديا ومعنويا وهذا ليس عيب نصيحيتي لك قفي بجانب زوجك مادمت تستطيعين ومادام هو يستحق لأنك لو تخليتي عنه لا أظن انك ستجدي احد يعاملك كما كان يعاملك لانه عوض نقصه المادي بعطاء معنوي فياض وهذا قد لا تجديه فيمن يملك الماده انت نظرتك فيها شئ من الانانيه فانت تريدي ان تأخذي دون ان تعطي وهذا ماجعل زوجك ينقلب عليك قال رسول الله المرأه تنكح لجمالها ومالها ونسبها ودينها فاظفر بذات الدين تربت يداك فلم ينكر الرسول ان يطمح الرجل في الزواج بامراه ذات مال ولكن يتقي الله في مالها وهذا ماتقرريه فهل زوجك يريد المال لنفسه ام لكم حاولب ان تنظري من منظور اخر ولا تتعجلي الحكم علي الامور |
| الساعة الآن 07:58 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©