|
الحقوني يا اخواتي ..... طليقي حسبي الله عليه
اخواتي السلام عليكم أنا تطلقت قبل شهر من رجل كنت أحبه وأعشقه وكان كل دنيتي بعد وفاة والدي يرحمه الله ,, المهم يا أخواتي إني كنت شايلة هذا الزوج فوق رأسي وعايشة معاه في مدينة بعيدة عن أهلي ومتحملة اهاناته وظلمه وكذبه وخرجاته الكثيرة صحيح كنت أعاتبه أحياناً لقلة تواجده في المنزل إلا وقت النوم إلا أنني عمري مافكرت بالطلاق خاصة بعد ماتوفي والدي بعد زواجي بشهرين وصار هذا الزوج هو أبوية وأخوية وسندي وعزوتي لكن للأسف طلبت منه قبل شهر يشتري لي ذهب أحضر به ملكة أختي لأني ماكان عندي ذهب كافي خاصة إن المهر كان قليل المهم الرجال تغير وقال أنا ماعندي من فين أجيب لك رغم إنه الحمدلله مرتاح مادياً ودائماً يتبرع لمساجد وجمعيات لكن للأسف أنا زوجته مقصر معي ماديا ومعنويا المهم صار يوعدني بأشتري لك بس أصبري شوي وصبرت حول شهر تقريباً لكنه في الأخير وللأسف الشديد ساومني قال أوكي بأشتري لك ذهب بس تقعدين عند أهلك ثلاث أسابيع في البداية رفضت لكن بعدين وافقت ويوم اشترى لي الذهب يا اخواتي وكلها ثلاث بناجل ودبلة مالحقت اتهنى فيها لأنه أساساً ماشترى لي دبلة خطوبة وللأسف صارت دبلة الخطوبة دبلة طلاق حيث أنه بعد ماوداني لأهلي وقعد معاي في مدينتي ثلاث أيام أنا تكفلت فيها بإيجار الشقة المفروشة والأكل والشرب ظناً مني إني كذا بأكسبه وبيحطني في عيونه لكن للأسف قبل مايرجع لمدينته مهد لي إنه تحلم بأسد يهجم عليه وصار هذاك اليوم طوال الطريق يصيح من الصداع وأنا مسكينة على نياتي نزلت الصيدلية واشتريت له حبوب وهو مو معطيني وجه وكلماتكلمت معاه قال اسكتي ...المهم بعد مارجع مدينته صار مقاطعني لايدق ولايرسل ولماطلبت منه في رسالة يبعث لي فلوس عشان بأسافر مع أهلي لحضور ملكة أخوي قال أبشري ومرت يومين وماشفت شي وفي الأخير اتصل بي وقال أنا ما أقدر اتصل بك ولا أرسل لك أحس شي ماسكني عنك ورحت للشيخ وقال هناك عين قوية استهدفت علاقتكما أنت وزوجتك وبصراحة أنا استغربت كيف ماتحققت العين إلا بعد ماتركني عند أهلي طيب لو كان صدق ليه ماجاته العين قبل ما أسافر ومضى أسبوع على الحالة وأنا اتصل به وارسل له لاطمئن عليه بس مايرد وقاعدة أبكي وأقول لأهلي أدعوله مريض وأبحث في النت عن علاجات للعين لكن للأسف في صباح يوم جمعة وصلتني منه رسالة طويلة يتحدث فيها أنه قضى معي أجمل أيام عمره وإنه العين فرقتنا وفي الأخير كتب لي انتي طالق حسيت الدنيا اسودت في وجهي وصرخت بأعلى صوتي وجات أمي واخواتي ويرشوني بالموية ويقولون خلاص لاتبكي اللي باعك بيعيه ورغم إنها كانت طلقة أولى ورغم إني كنت أحبه إلا أني تنازلت عن كرامتي وقلت له في رسالة خلاص راحت العين رجعني احنا لازلا في الطلاق الرجعي فقال الله يكتب لي ولك الخير انصدمت انه بايعني ويمكن حتى قصة العين كذبة عشان يطلقني ومن هول صدمتي صرت أرسل له رسائل سب وشتم و...الخ ورفعت عليه قضية اثبات طلاق وقضية نفقة لكنه اليوم فاجأني انه رفع علي قضية سب وقذف واعتمد على رسايلي التي كانت ردة فعل طبيعيه لطلاق تعسفي وقع علي ظلماً وأنا لازال قلبي محروق على أبويه اللي مات من فترة قريبة ايش اسوي يا اخواتي وكيف اتصرف مع قضية السب والقذف اللي رفعها علي افيدوني والله اني اكتب ودموعي على عيني حسبي الله عليه .... طلقني قبل ما أكمل سنة على زواجي رغم انه مو شاب صغير فهو رجل كبير في منتصف الاربعينات لكن الله كريم |
والله ماعندي اجابه بس اتوقع انك معذوره ..
اي وحده بمكتنك كان سبت وشتمت ... الله يكتب اللي فيه الخير لكي يارب وكلام اهلك صح اللي باعك بيعيه ولا تفكري فيه ابداا.. |
هل له زوجه أولى ... عنده أولاد...£
أهل زوجك يعلمون بزواجك منه....££ |
نعم أنا كنت زوجته الثانية
وأهله الأغلبية يعلمون |
؟؟؟؟؟؟
معقولة مافي أحد يجبر بخاطري يالله الله كريم |
حسبنا الله ونعم الوكيل يا اختى لا تنقطعى عن هذا القول كراريه طوال الوقت {الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ لَكُمْ فَاخْشَوْهُمْ فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ}آل عمران173 {فَانقَلَبُواْ بِنِعْمَةٍ مِّنَ اللّهِ وَفَضْلٍ لَّمْ يَمْسَسْهُمْ سُوءٌ وَاتَّبَعُواْ رِضْوَانَ اللّهِ وَاللّهُ ذُو فَضْلٍ عَظِيمٍ }آل عمران174 مع الآسف رجل مزواج يأخذ البنت شهور ليتمتع بها ثم يرميها كم عمرك اختى ؟ هل سبق لك الزواج قبله ؟ كم مرة تزوج طليقك على زوجته الاولى ؟ اعانك الله اختى اما بالنسبة الى قضية السب اعتقد رسالة اعتذار كافية ان تصرف مكره عنك ذكريه انك فى النهاية كنت نعم الزوجة وانك الخاسر الاول والاخير فى هذه الزيجة واقصاها يا اختى تقومى بالتنازل عن النفقة مقابل ان يتنازل هو عن قضية السب وهذا غرضة من رفع قضية السب عليك لانه بخيل ولا يريد اعطاءك حقك |
سبحان الله عندي قناعة بأن الزواج من معدد هذة الايام هو زواج فااااشل بكل ما تعنية الكلمة وكل المشاكل التي اقرأها او تمر علي تكاد ترسخ هذا المفهوم بل تحوله الى معتقد ،، لا حول ولا قوة الا بالله ،، اعانك الله اختي على ما ابتلاك به وفرج همك ،، لا املك لك الا الدعاء
|
الله يعوضني واياك خيرحسبي الله ونعم الوكيل
تصرفات طليقك نفس تصرفات طليقي الله يخليك من اي مدينه طليقك |
أخوي أبو مريم ...جزاك الله خير
.. عمري 32 وعمره 45 وتزوجته وانا بكر لم يسبق لي الزواج خوفاً من العنوسة لأني تعديت الثلاثين وطليقي تزوج قبلي بإمرأة واحدة هي بنت عمه وهي الأولى ولكنها كانت في عصمته ولم يطلقها بل إنه كان يتراسل معها أمامي برسائل حب وشوق ويقعد عندها أكثر مما يقعد عندي ويوديها وعيالها للمولات لكن أنا يوديني أسواق شعبية ... حسبي الله عليه |
بنت الأحمري
أنا طليقي من الرياض وانتي طليقك من فين ؟؟ |
طليقي مو من الرياض حتى انا والله كان يتراسل هو وزوجاته عندي تزوجته بكر وهو معه زوجتان كل شي قسمه ونصيب والله
الحره فيني الى الحين مااقول الا الله ينصرني عليه وياخذحقي منه اخذعزيز مقتدروالله يكتب لي ولك الخير |
الله يعوض علي وعليك وينتقم لنا منهم يارب
... راح زمن الرجال اللي بمعنى الكلمة والأغلبية إلا مارحم ربي أشباه رجال مالهم أمان الواحد ياخذ بنت الناس عشان يلعب بها شوية أو يأدب زوجته وبعدين يرميها لكن جعلهم يشوفونها في بناتهم وربي لايوفقهم ولايهنيهم |
تصدقين والله من اول زواجي كان يقول لي المعددين يتزوجون البنات ويسحبون عليهن
|
لاحول ولاقوة إلا بالله
حسبي الله ونعم الوكيل الأخ مو قد التعدد ومفكر بنات الناس لعبة ؟؟ قال إيش تحلم بأسد !! وعين وش هو يستغبي ولاكيف فيه واحد عاقل وصاحي يقول هالكلام ؟؟ فعلا غريب وعجيب إذا حصل الطلاق فعلا فأقول إحمدي ربك مليون مرررة تهرب منك وماصدق تجي الكلمة منك عشان ينفد بجلده لاتتنازلين عن حقوقك بتاتا لإنه هالأشكال حرام يتنازل لهم |
يا اخواتي مهددني بيرفع علي قضية قذف وسب وشتم وبيجرجرني في المحاكم بسبب رسائل أرسلتها له بعد طلاقي من هول الصدمة ... ايش اسوي معاه
رافض التفاهم بالمررة ويبغاني أرجع له الذهب ( والله ذهب مايسوى كلها ثلاث بناجل ودبلة طلاق ) لا وشكله يبغاني أتنازل عن النفقة بعد رغم انه مقتدر جداً وثري وعنده أرصدة في البنوك |
حسبنا الله ونعم الوكيل
رددي: اللهم أجرني في مصيبتي واخلفني خيرا منها |
فكرت انو متزوجك مسيار ولماأنكشف عند زوجته واولاده طلقك
الله يعينك يأختي وصدقيني هذا اللي حصل خير لك مو شر يمكن لوكنت معاه كانت حياتك كلها( تعاسه x تعاسه )رددي (حسبي الله ونعم الوكيل واللهم أجرني في مصيبتي وأخلفلي خيراً منها) الله يعوضك خير ورزقك الله الزوج الصــــالح ..اللهم أمين أن شاء الله لن أنساك من دعواتي.....££ بالنسبه لقضية السب والقذف لوترسلين له وتعتذرين وتبينين له انو ظلمك وأنو ممكن اللي حصلك يحصل لبناته...وان الظلم ظلمات يوم القيامه ..££ . الله يهدي الجميع...££ |
يا أختي أعتذر منه ليه وهو أهانني قدام أهلي بالطلاق وأنا اللي ضحيت بالدنيا كلها عشانه
وبعدين أنا حاولت أحل الأمور معاه بالتفاهم لكن رافض ومصمم على القضية ومعاه زوجته بتشهد ضدي حسبي الله عليهم لكن فين بيروحوا من غضب الله ادعوا لي ربي يرد كيده في نحره وينصرني عليه |
الله يعينك ويربط على قلبك يارب ويعوضك باللي احسن منه ويربط على قلبي انا بعد على فراق عيالي يارب تحفظهم لي
|
حسبي الله ونعم الوووووووووووووووووكيل ...
أختي الدعاااااااااااااااااء ســـــــــــــــــــــــــــــــــــــــــــــــــ ـــــــــــــــــــــــــــــــــلآلآح ... ادعي ربك بيقين ... ويارب تفرجهااااا عليك وعلى الجممميع ... |
حسبنا الله ونعم الوكيل ؛اختي ماذكرتي لنا كيف دينه هل كان يصلي ويخاف الله مع اني ماظنتي من يخاف الله يسوي مثله ..
|
أسألي محامي عن الكلام الذي كتبتيه له ..
ففلو كان يحسب ضدك تراجعي , ولو كان مجرد تخويف من قبله توكلي على الله وطالبي بحقوقك .. هل لك مؤخر ؟ الله يفرج همك |
أختي أمجاد أمة هو والعياذ بالله متساهل في صلاته وفي أغلب الأوقات لو صلى صلاها متأخر رغم إننا سألنا عنه قبل الزواج وقالوا لنا عنه كل خير
... اأختي فاكهة الشتاء ...لا مالي مؤخر وبعدين هو ماسك علي إني وصفته في احدى الرسائل بالشاذ جنسياً وماذلك إلا من حرقتي لأنه طلقني بخدعة في الوقت اللي أنا متلهفة عليه وخايفة عليه وكنت أظن إنه سندي بعد أبويه اللي توفى لكنه أحرق قلبي وحطم حياتي حسبي الله عليه |
اقتباس:
يمكن كان متزوجك بنية طلاق ....... او من الناس اللي يرمسون ان الطلاق جائز ولهم حق فيه حتى لو تضررت البنيه منهم ..... |
صباح الخيرات والليرات
الله يعوضك اخير منه يااختي الدنيا ابتلاء لكن انا لي وجهة نظر بموضوعك ان اعجبتك ادعي لي وان لم تعجبك اتمنى ماتزعلي مني لانها تبقى مساعده مني لك بفكره وانت مش مجبره تتقبليها وتطبقيها شوفي ياقلبي ليش تجيبين لنفسك الكدر والهم والغم ليش تطاردين وراه بالمحاكم ليش ماتتنازلين له بالله فيه شي يسوى يمرمطك علشانه بالمحكمه نفقه ماعليك قدمي بالشوون ويجيك شهريا وربك يفرجها والطقم بالله الماس يعني تشوهين سمعتك بالمحاكم وتتعبين نفسبا وجسديا ولا فيه شي يسوى اختي والله حاسه فيك لاني اشد منك ومظلومه اكثر لكن ابيك تعرفين اللي باع العشره بسهوله يعني بتنتظرين نفقه منه وطقم ذهب انت مو ناقصه والله مو ناقصه اتركيه بحاله تنازلي له بطقمه الله لايرده وانفذي بجلدك وانسيييييييييييييييييييييييييييييييييييه لانك ماراح ترتاحي وانت مشاكل معاه بالمحاكم بتضلين تتذكرينه وتتذكري ظلمه حبيبتي هذا ابتلاء من الله لنا جميعا والله يعوضنا بس انت لاتفكرين بعاطفتك وبس فكري بعقلك لانه اصلا مافيه شي يسوى تدخلين المحاكم علشانه اتمنى ماتزعلي مني يبقى كلامي مجرد وجهة نظري |
الله يعوضك خير
وانا مع نبع القصيد تنــازلي وريحي راسك من هالامور الي رح تتعبك اكثر من انها تريحك |
السلام عليكم ورحمة الله
الله يعينك اختي اذا تحبي اكتبي نص رسائلك اليه التي يدعي انك سببتيه وشتمتيه فيها حتى نعرف هل تضرك او لا ,,,,,, |
اقتباس:
|
روح المساء
ايوة يا أختي أنا كنت بغير وعيي كنت في حالة صدمة شديدة ماتوقعت الرجال اللي حبيته يبيعني كذا بسهولة لذا وصفته بالمريض والشاذ من حرقتي ومن هول الصدمة لكن حسبي الله عليه أنا قلبي لازال محروف على أبوية المتوفي قريب وعلى طلاقي يقوم يحرقه كمان برفع قضية زي هذي عشان يجرجرني في المحاكم ... ربي لايوفقه |
اختي نبع القصيد
الرجل مايبغى يتنازل حتى لوتنازلت له عن النفقة والذهب وكاتب في الرسالة انه حقيه بيآخذه لو على القصاص ولو على موته حسبي الله عليه وعلى الرجال اللي مثله ماعندهم قلب ولا اخلاق ولا رجولة ولا تقدير للعشرة |
ملاحظة لأختي نبع القصيد
.. هو ما اشترى لي طقم ذهب زي ماكتبتي في رسالتك يا أختي كلها ثلاث بناجل ودبلة زواج مالحقت اتهنا فيها صارت دبلة طلاق حسبي الله عليه |
الله يكون بعونك
|
هؤلاء هم المعددين حسبي الله عليهم الامن رحم الله
بنات الناس لعبه اغلب الرجال ماينفع معهم الا المراءة القويه عشان يمشي معها صح واللي تتنازل وتتنازل وتضحي وتعشق هذي ولا شيء في نظرهم غلطتك اظهرتي له الحب والود وهو مايستاهل حطيه تحت جزمتك وانسيه وانسيه مايستاهل دمعه من عيونك انتبهي لايجيك سكر او ضغط عشان انسان حقير ماعنده قلب |
اقتباس:
على فكرة على حسب ماوصفتي قلتي له إنه شاذ وكذا .... يعتبر قذف ومن أبسط حقوقه يرفع عليك قضية عشان كذا أشوف لو تكلمين أبوك أوكبير عائلتكم يعتذر بالنيابة عنك او إنتي اعتذري بس بحضرة الأهل ليكونوا شهود حاولي تلملمين الموضوع وتقصرين الشر وتذكري تحديدا إيش شتمتيه عشان لايزيد وينقص من عنده ويكون التواصل بينه وبين أبوك موفقة |
اختي روح المساء
.. شكراً لتجاوبك الكريم لكن لو كنتي في مكاني وأتمنى ماتمري بهذا الموقف كان استشعرتي قمة الظلم لماتحبي شخص وتشتاقي له ويقابل الشوق بالطلاق فكانت ردة فعلي طبيعية بعد أن باعني ونسي العشرة وماقدر أمانة والدي يرحمه الله الذي ترك بنته أمانه عنده قبل أن يغادر الدنيا لذا يا أختي لاتلوميني الله يهديك فضربتين في الرأس توجع يعني الرجل مااستشعر إني لازلت حزينة على أبي يقوم كمان يطلقني لا ويستغل رسايل السب والشتم ويرفع علي قضية ... ياخسارة شبابي وعمري اللي قضيته معاه ربي ينصرني عليه وينتقم لي منه |
والله عارفة ياحبيبتي
بس عشان اكون صريحة اكثر لو جات بنت وقالت والله طليقي قذفني وقال كيت وكيت برضو رح أقولها من أبسط حقوقك ترفعين عليه قضية وتاخذين حقك قولي حسبي الله ونعم الوكيل ولاتدعين عليه أنا مش سالفة ألومك بس يفضل لو إنك ضبطتي اعصابك شوي موفقة عزيزتي وزي ماقلت حاولي تلملمي الموضوع لإنه لو رفع عليك قضية رح يمرمرك بالمحاكم وقصتها طويلة وإنتي مو ناقصة وياليت لاتتضايقي من كلامي بس ماأحب أكون منحازة لأحد وانا شايفة الغلط |
لو ترسلين أخوك يوضح له سبب ردة فعلك.
ويحاول يظهر أنك كنتي تمتدحينه وتثنين عليه طيلة السنوات الماضي. حاولي تلمي الموضوع .. وتدفني الشر. بعدها ضعي نقطة* وأقلبي الصفحة |
أختي الصابرة
الحياة مع المعدد ليست سيئة .. لكنها لا تصلح معي أي فتاة! كثير من الفتيات تقول تأخر سن زواجي .. لذلك سأرتبط بمعدد وتنسى نفسها.. هل هي من الفتيات اللاتي يستطعن العيش مع المعدد؟ هل لديك طولة بال؟* حقوقك في الغالب لن تحصلي عليها كلها بل قد يصل الأمر لنصفها.. هل ستتحملين ذلك؟ أهل الزوج يحتاجون سنوات ليتقبلوك .. تستطيعين تحمل ذلك؟ و و هناك من الفتيات من عندها القدرة والطاقة الكافية لتعايش مع هذا الوضع هذه نقول توكلي على الله وهناك من الفتيات من ليس لديها قدره نقول لها حتى ولو تأخر سن زواجك تريثي قليلا واصبري والله يرزقك من فضله |
اختي والله انا ماادري انتي الان تفضفضين واللا تستشيرين
من واقع خبرتي في دهاليز المحاكم اثبات الطلاق لست بحاجة اليه لانه راح يطلع صك من نفسه والنفقه ماتحمل انك ترفعين دعوى ارسلي له احد يقنعه بالتنازل مقابل تنازلك عن دعاواك ولو بقي على دعواه فماراح يمرمط\ ولا شيء ,,, ومشكلتك اختي ماكتبتي نص الرسائل حتى اقيم لك الوضع بشكل افضل ,,, الله يوفقك ,,, |
كلمي احد اخوتك يتفاهم معاه حتى لا تصل قضية قذفك له للمحكمة واتمنى يكون درس لكي حتى تحكمي عواطفك وانفعالاتك عند الصدمة والغضب
اما مألة الطلاق اسأل الله ان يعوضك خيرا منه .. |
| الساعة الآن 02:52 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©