|
ضروري ابي كمين مع رجال الهيئة
السلام عليكم ورحمة الله وبركاته
بدخل بصلب الموضوع على طول ساكن جنب بيتنا شاب الله يهديه يارب علاقاته كثيره مع البنات وكل يومين يجيب بنت مره من بنات المدارس ومره متزوجه ومره مطلقه وعلى هالحال ويجلسو عنده بالشقه والشاب هذا خويي او بمعنى اصح جاري بيتنا لاصق ببيته من اكثر من 20 سنه وبقد عمري ونعرف بعض عز المعرفه بس مالي احتكاك معاه يعني نطلع سوا او نتعشى سوا ولايشرفني اطلع مع هالاشكال المهم كل فتره وفتره اجلس تحت البيت وتوقف سيارة ليموزين وتخرج البنت وتطلع العماره الي جنبنا واعرف ان هالبنت طالعه عند فلان واطلع السطح واراقب الوضع واشوفه بعيني يستقبلها عند باب سطوح بيتهم ويدخلها الغرفه.. للمعلوميه هو عازب وعنده غرفه مثلنا فوق بالملحق وهي هذي الغرفه الي يجب فيها البنات ويعزم اصحابه واكثر من مره قلي تعال جايني كم بنت وتعال انبسط معانا ومن هالكلام وانا بيني وبينكم والله الشيطان يلعب براسي يوم تصيبني الغصه واقول ليش ماروح وانبسط واعيش جوي على قولهم,, بس والله مايرضيني اسوي بنفسي كذا مخافة من الله وانه وراي اهل ووراي زواج وكما تدين تدان, واتعوذ من ابليس وانصح الشاب وبطل هالحركات ومارواها الا الفضايح وهالكلام ويستهزء بنصايحي ومو راضي يتوب وله على هالطريق الحين يمكن سنتين وهذي السنه الي بدء يجيب فيه البنات لغرفته بالملحق المهم اليوم ((الاثنين)) شفت هالمنظر الصباح الساعه 7 ونص وانا تحت البيت بنتين يخرجو من سيارة ليموزين وطلعو العماره وكلعاده طلعت فوق السطح وشفت المنظر المألوف مستقبلهم وماسك يدهم ودخلهم الغرفه وعنده واحد من خويانه جلست متردد ايش اسوي ايش اسوي واتصلت عالهيئة وقلتلهم الموضوع كامل وقالو لو انت صادق تعالنا المركز ورحت لهم المركز واعطيتهم كل المعلومات وحلفتلهم بالله بعيني شايفهم وان هالشي بذمتي واخذو بيناتي الشخصيه ووصفتلهم البيت وقالو خلاص انت خلك عند البيت واحنا شوي وبنجيك وفعلا جلست اراقب الوضع واذا خرجو ابلغهم لانهم جاين بالطريق وجو الهيئة بسيارة مظله كامل بسيارة غير المالوفه يعني مو باين ووقفو عند بيتي وجلسنا نراقب وطلع معايا واحد منهم السطح ووريته الغرفه وجلس يراقب يبي يشوف بنت يشوف اي حاجه عشان يداهمو بس للاسف مافي شي باين ومرت ساعه ساعتين ساعتين ونص وصلت الساعه 1ونص وقالولي متأكد بنات مدارس قلتلهم هذا الي شفته وجو 7 ونص يعني واضحه شاردين من مدرسه وقالو طيب لو على كذا بيخرجو الحين يوصلوهم مدارسهم ,, بس للاسف ماخرجو ولاشي وقلتلهم وانا بالسياره معهم نراقب ادخلو داهمو الملحق الغرفه واذا ماشفتوهم متلبسين والله بذمتي وكمان خذوني للشاب وقولوله هذا الي بلغ عليك اذا ماشفتو بنات وانا متأكد وربي بس هم يبغونهم ينزلو ويكفشوهم,,,؟ والحين بيني وبينهم اتصالات وهم كل ساعتين يجو ياخذو فره عالبيت وزي كذا يعني يراقبون بين فتره وفتره وكيف الحل ياخوان..؟ والمسلم تصيبه الغيره على اخواته واخوانه مثل هالمواقف والله ماتحمل اتضايق واهاليهم بغفله والله الي يصير مايرضي اي مسلم ايش اسوي لو حصل بيوم ثاني هالموقف ومتأكد انهم بغرفته,,,. وسئلتهم ماعندكم تصريح تداهمون قالو لا الا اذا شفنا احنا رجل وبنت داخلين شقه لوحدهم او علاقه مشبوهه وشفناهم احنا اما من البلاغات مانقدر نداهم وانا والله نمت وانا متضايق وانسترو هالمره بعد وبكرة وبعده كل وحده بتجر صاحباتها عند خويها وفلانه تجر فلانه لين يطلع الجيل كله علاقات اعوذ بالله انا قلت اصورهم فيديو وهم بالسطح داخلين بالغرفه واوريها للهيئه..؟ ايش برأيك انت وهو افعله او اسويه حتى هالحثاله ينقرضو او عالاقل ماشوف هالمواقف قدامي ,, والله يهدي الجميع |
كثر الله من امثالك و بيض الله وجهك
صور فيديو وسوي اللي تقدر عليه و وافينا بالاخبار و ما عندنا إلا الدعاء لك بأن يجعلك الله شوكه في نحر الفساد |
أنتم محضوضون لوجود مثل هذه الهيئات أما نحن فالحكومة هي التي تدفع الناس إلى الفساد
|
والله تجيني غصة من هالمواضيع
و انقهر من هالبنات اللي ما عندهم رادع لاحول و لا قوة إلا بالله بصراحة ما عندي فكرة أو خطة ببالي لكن ربي سيكشفه عاجلا أم آجلا و أحيي فيك غيرتك على الدين و رد المنكر و داوم عن التمنع و الأنزلاق فشهوة ساعة بعدها ندم و انت فيك الف خير ماشاء الله بس الأنسان أحيان يضعف فاستمر بالدعوة للحفظ من الله عز و جل |
الله يقويك يارب .. ايوة خليك معاهم وخليه يصير محترم الساكت عن الحق شيطان اخرس
ولو سكت بيكون انت ساكت على مصيبه مو بس حق .. وخاف على اهلك واحد زي كده وكمان جنبكم لا تستبعد يخونك في اهلك الله يحفظهم لك ... بس عندي سؤال بعيد عن الموضوع .. كلمة """""كمين """"" اخذتها من الارض الطيبه ههههههه >>><<< دعابه |
اقتباس:
والي قاهرني وخلني اتحمل كل هالوقت ومعاهم اول باول ومراقب لهم ومساند ان كثر ماسمع هالقصص شعر يديني تتقشعر وتسئل الشخص كيف واهلها فين ومادري ايش الخ... ومابالك قدام عيني هالمواقف تتكرر والله مابسكت عنهم لين تكفشهم الهيئة يارب |
اقتباس:
ههههههههههه يب يب ,, ومايمنع شوية لغة عربية فصحى بعنوان الموضوع (( كمين)) بدل خطه:d |
اقتباس:
مسكت على هذي الكلمه صارت على لسانها هههه الله يقويك بصراحه عجبتني لما قلت للهيئه اهم شي تكون صادق وراقبهم لين ربي يكشفهم وش دراك لو سكتت بكره ربي يقولك شفت بنات الناس وماسترت عليهم .. واللي قاهرني جاركم يعني يجي يوم ويخون بيت اهلك لانه مافكر فيك وكمان قالك تعال .. الله يهديه ويحفظلك اخواتك اهم شي اهلك علمهم عشان بكره النهار يعرفون انه وسخ لو حاول يسوي شي |
لآ حول ولا قوة الا بالله .,~
بس غريبه كيف البنات ماخرجو بعد الساعه 1 ونص وهما لسع ماخرجو من الغرفه .,~ والله يا اخي الكريم انت نادر يللي مثلك ماشاءلله الله يثبتك ويكثر من امثالك .,~ واستمر على ما انت عليه والله يعينك ويووفقك يارب .,~ : ) |
طيب الهيئه ليش مايجون بدري قبل سبع الصبح عشان يميدهم يشوفون البنات يدخلون ..
و الله شي محزن بنات مدارس صغار وعندهم هالعلاقات الله يستر على جميع بنات المسلمين |
صور المنظر كامل واعرضه عليهم عشان يتلحلحون بدري ويمسكون هالفاجر حسبي الله عليه
............ |
اذا أنت في جده أقدر أساعدك بأذن الله
/ |
كلامك يوجع القلب لاحول ولاقوة الابالله
تابع مع الهئية الله يكشفه اللهم استرنا واهدنا وبيض الله وجهك على غيرتك |
اقتباس:
والله اتمنى كيف |
اقتباس:
انا راح أتواصل مع واحد أعرفه في الهيئه و أفهمه الموضوع وراح أعطيك رقمه تتواصل معاه وبأذن الله ربي يوفقنا |
بكره الصباح راح أتواصل مع الشيخ أن شاء الله
ياليت تكتب لي معلومات عن الحي واللي تجود فيه نفسك عشان أقدر أوضح له وراح أعطيك رقمه أن شاء الله الله يوفقك ويكثر من أمثالك * |
اقتباس:
وجالس اقولهم داهمو داهمو مارضيو ؟ ولو يحب اكتب بنفسي انا اتحمل المسوليه كامله لو مافي بنات وبحي النزهه الموقع عند مجمع العرب |
الله يقويك ويكثر من امثالك الغيورين على بنات المسلمين...
|
المؤمن القوي عند الله افضل من المؤمن الضعيف
الله يقويك على النهي عن المنكر .. بس اتوقع لو انا مكانك ولا احد من اخواني مكانك ما خليته يبلغ ولا يقرب للأشكال ذولي يخوي ادعيلهم ازين لك بدال ما تنفضح البنت وتسود عيشة اهلها هاذي فضيحة معاك انا ان الموقف صعب وهم ع القلب بس أخاف يبالها قوة .. وما أنصحك تصور ابددددد ربي يطرح فيك البركة |
اقتباس:
الله يستر عالجميع |
اقتباس:
وسترنا عالادمي مره مرتين عشر مرات ونصحنا فيه ومافي فايدة...؟ لو كل واحد سوا مثلك ماكان فيه رادع لها الاشكال,, والساكت عن الحق شيطان اخرس وهذي بذمتي لو سئلني ربي بيوم القيامه شفت المنكر ولاحاولت تغيره,, والله يستر علينا وعالجميع وخلها تنفضح عند اهلها ولاتستغفلهم وتفتن وتتعود على هالشي ومن شاب الى شاب وتجر وراها وحده ورا وحده,, لعل وعسى فضيحتها فيها خير لها وتلقى النصيحه من اهلها وتتوب |
الله يكون بعونك
وكثر الله من امثالك.. |
السلام عليكم ورحمة الله وبركاته
اخوي أنا كلمت الشيخ وفهمته ع الموضوع كله وقال لي أعطيك رقمه عشان تتواصل أنت وياه هذا طبعاً أنا أحد تلاميذه هو مدرس ومتعاون مع رجال الحسبه و أمام مسجد بحي الوزيريه الحين يالغلا أحط رقمه هنا لأن بصراحه البروفايل الخاص فيني مايفتح ولا أقدر أوصل له أنتظرك ع أحر من الجمر بالتوفيق / |
ربي يقويك كن ياخي لله كما يريد يكن لك فوق ماتريد اثبت انت الحق واوصيك بالمافظة على النوافل
|
اقتباس:
الله يسعدك ويوفقك دنيا واخره انا منتظر ردك على احر من جمر هات الرقم لاهنت |
جزاك الله خير يارب
وحفظت الرقم وبالوقت المناسب بتصل وافهمه عالموضوع كامل |
شد حيلك والله يوفقك ويثبتك
انا معاك اذا احتجت شي |
اقتباس:
الا ابسئلك بايش ممكن يساعدني...؟ انا على اتصال مع رجال الهيئة وراقبنا البيت بس محد طلع منهم,, يعني ايش ممكن يسوي..؟ لو بيكلم معارفه بالهيئة بايش يقدرو يفيدوني وانا للحين متعاون مع الهيئة بس يبون يشوفون الموقف الي شفته بعيونهم..؟ |
مشالله .. الله يقويك ويثبتك ع الطريق السوي
ويعوضك ببنت الحلال اللي تستر عليك "من ترك شيئاً لله عوضه الله خيراً منه " بس اخوي بما انك ماعندك مانع انه يكون عارف انه انت اللي ورا الموضوع *الكمين* .. ليش ماتمثل قدامه انك حابب تقضي وقت معاه وبهيك بتعرف الوقت المحدد وبتكون متفق مسبقا مع الهيئة !؟ مجرد اقتراح فقط ...... |
اقتباس:
انا والله ماعندي علم خلك معاه وان شاء الله راح ينفعك بأذن الله |
الصراحه ياخووي ماتقصر على ماتفعل بس شي مخوفني اذا درى انه انت الي مبلغ يمكن يسببلك مصيبه بعدين يعني يرميك او شي اخر الله يكفيك شره ياارب البعيد عن الله الشيطان معه مانستغرب حاول اننننه مايدري انه انت السبب فيه
|
اقتباس:
لا لا طبعا اكيد مابي احد يعرف انه انا ورا هالبلاغ ولو على كذا كان من اول مكفوش انا ماعندي مانع لو اجرب اي حل واي فكره اهم شي بسريه بس يتم الموضوع وشكرا عالاقتراح |
اقتباس:
واخوي عرف بالموضوع شافني يوم كنت مع رجال الهيئه بالسياره وقلتله عالموضوع كامل وقلي احسن ماسويت لان حتى انا بغيت اضعف بيوم والسبب (( اتصل هالشاب على اخوي بيوم عالساعه 4 الليل وقله ضروري محتاج سيارتك او توصل بنت عندي بالغرفه واخوي الله يهديه يقول خفت ايش صار وايش سوا من مصيبه في بنت الناس ومن هالكلام وقال خلها تنزل اوصلها طيب , ويوم نزلت وركبت مع اخوي يوصلها قالتله كلم فلان انه يرسلي مبلغ كل شهر لاني حامله منه وانا متزوجه وزوجي كبير بالسن وانا متاكده اني حملت من فلان وانصح فيه , يقول اخوي يوم سمعت هالسالفه يقول والله مادريت عن نفسي من صدمتها وصرت امشي وانا مدري وين اروح لين وصلتلها بيتها ورجعت لفلان وكلمته حرام الي تسويه ويرضيك مايرضيك وليه ومن هالكلام,, قاله الادمي انا مافكرت ولابوحده فيهم لو تموت او تمرض انا كل الي علي اخذ غرضي وتنقلع )) من بعدها اخوي مسح رقمه ويقول انخميت فيه وحسبته عنده شوية احساس ولاعاد يكلمه غير سلام وبس وزي هذي الاشكال والله حلال فيهم الفضيحه |
السلام عليكم ,,
والله شي يقهر ,لكن اسمح لي اتكلم بصراحه شوي,, انا ضد فكرة انك بلغت الهيئه ,لان الموضوع ممكن يطلع عن السيطرة ويصير خراب بيوت وتدمير مستقبل سواء للشاب او البنت , طبعا اذا كان الهدف هداية هذا الشاب فالافضل انك تبدا معاه شخصيا وممكن تكون هدايته على يدك واذا تحس انك ماراح تعرف تكلمه باسلوب مقنع فحاول تكلم شخص من اصحاب العقول النيرة والاسلوب المقنع وخليه يوصله باي طريقة . ومن ناحيه ثانيه , الشباب في مثل هذا السن معرضين للفتن اللي محاصرتهم من كل ناحيه فالمفروض انك ماتقاطعه وبالعكس تقرب منه وحاول تاثر عليه . يعني ماهي شقة دعاره والعياذبالله عشان تخلي الهيئه تداهمهم . واذا حبيت باعطيك فكره تبدا فيها , حاول تكلمه وتقوله انك لاحظت سيارة للهيئه عند بيتكم وان احتمال يكون عندهم خبر عنك , فبالطريقه هذي انت خوفته وعرفته انك تعرف عن موضوعه وممكن يكون بدايه بينكم تقدر تناقشه وتقوله كلمتين يمكن تخليه يتوب . ربي يوفقك للخير ويهديك ويسعدك والمسلمين جميع. |
جزاك الله خير وكثر من أمثالك
وأكتفي في تأيدك بحديث الرسول عليه الصلاة والسلام(من رأى منكم منكر فليغيره بيده,,فأن لم يستطع فبلسانه,,فأن لم يستطع فبقلبه وذلك أضعف الأيمان) وهذا أي منكر!منكر فيه هتك أعراض وانتهاك لمحارم الله...فضلا عن شناعة جريمة الزنا وعواقبها.. |
اقتباس:
هذي بس الي اشوفهم بالصدف وانا نازل وانا طالع واذا خايف على خراب بيوتهم وتدمير المستقبل, محد ضربه على يده بها الطريق , والبنات الي اهاليهم غافلين عنهم خلهم يدرون ويعرفو كيف يتصرفو مع بناتهم, وهنا يجي دور الهيئة تتعامل مع الموضوع بسريه مع اهل الشاب واهل البنت مافيه فضايح للعلن لمتى الواحد يسكت عالفتن ولمتى الواحد يقول نفسي نفسي ,, وياليته منكر بينه وبين ربه وساتر نفسه الا يفتخر بها الشي والصغير قبل الكبير يدري عنه وانت ماتخيلت المنظر لما تنزل البنت وتطلع للعماره وتتخيلها زوجتك او اختك او احد من اهلك حتى تحس بمعنى احساس الغيرة الي تصيب المسلم,, واهاليهم غافلين عنهم على بالهم رايحين محل او مدرسه او او او ,, وكلنا نغلط وننجرف بس اذا ماكان فيه خوف من رب العالمين , خله ياخذ جزائه هو واشكاله لعل وعسى فضيحتهم سبب في توبتهم |
اقتباس:
ثانيا , لا يجوز لك ان تراقبه في بيته من سطح بيتك لانه من التجسس والله اعلم . ثالثا , انت تزعم انه يفعل مايفعل ولاتستطيع الجزم , كما تقول انك تشوف البنات ينزلوا من سياره ويطلعوا عنده , فالرجل لم يجاهر بمعصيه . فكل القصه شكوك وليست يقين , وصدقني انا معاك ولست ضدك ولكن في مثل هذه الامور يجب تحكيم العقل وليس العواطف فالموضوع يمس الشرف والتشهير وهذا ليس بهين . حفظك الله والمسلمين جميع ,, |
اقتباس:
الشاب اقولك يناديني لفعل الفاحشه يقولي جايين عندي كم بنت واذا حاب تجي اهلا وسهلا وانا علاقتي معاه سطحية مجرد جار لنا ,, ويشهر بنفسه امامنا ويفصلنا بخلال تجمع الشباب ايش سوا وردة فعل البنت كيف كانت واغوا على يده كم شخص من الي متجمعين معنا وذهبو معه الى الشقه يفعلو الزنا والعياذ بالله وانا ايش دخلني اسئل نفسي هدفي الاصلاح ولا هدفي اعاقبهم...!! في من يحاسبنا ويقيمنا وهو الهدف الوحيد لكل مؤمن بس انا محاسب امام ربي بمنكر ولم ابلغ عنه ,, والهيئة جهة اختصاصية للامر بالمعروف والنهي عن المنكر ,, وهذا واجبي كمسلم اترك الامر لجهة الاختصاص ماجيت اشهر فيه امام الخلق انا جيت استشير هنا لان محد يعرفني ولا اعرفه وهالمواضيع مابي ابوحها للخلق استر الشاب واترك الامر لجهة الاختصاص وتمت المراقبة بوجود الهيئة لكي اثبت لهم انه هذا هو الشخص وهذي هم البنتين من خلال الاتصال , ان شاء الله وضحتلك المعلومه وعلى فكره ((من راقب الناس مات هما)) وانا ماراقب لغرض التجسس انا شفت منكر وعشان لاظلمه واسيئ الظن تاكدت بنفسي مره ومرتين وثلاث لحد اخر مره وبلغت الهيئة الشي هذا ماينسكت عنه وبالنسبة للنقطة الثالثه : يجون البنات لعنده لشرب الشاهي او القهوه مثلا ..!! وييوم يفتخر بافعاله امامنا ويعزم فلان وعلان بحكم انه انا محد قدي تعال ابسطك هذي ستر...!! وتحكيم العقل بردي للاخت لمار عندما ذكرت لها موقف من مواقف اخوي معه ان البنت تشتكي منه بانها حامله منه تحكيم للعواطف مثلا...!! وجزاك الله خير على ردك وهذي وجهة نظرك بمنكر يحصل امامك وهذا تعاملك للموضوع حرية شخصية وهذي وجهة نظري وفعلت بما اراه صواب والله يهدينا ويهدي الجميع ويستر علينا وعلى جميع المسلمين |
الله يكثر من آمثاالك ،، ويستر على بناات المسلمين ،، ويهديه ويهدي الجمييييع
|
اخي الكريم , التجسس اللي اقصده هو وقت ما كنت تراقبه من سطوح بيتكم وهو في بيته . اما التشهير ليس بذكر الموضوع هنا ولكن اقصد بتبليغ الهيئه . واما ما تزعم انه حصل فكلها مبنيه على كلام وقصص حتى ولو كانت منه شخصيا فبعض الشباب يتفاخر بقصص كلها كذب .
والواجب منك عندما كان يسرد لكم قصصه مع البنات ان تنكر عليه وقتها وامام الشباب وتنصحه واذا لم ينتصح منك هدده بتبليغ الهيئه او كلم احد من اهله واذا استمر واصر بلغ الهيئه . هذا اجتهادي وجزاك الله خيرا على اجتهادك . |
| الساعة الآن 05:46 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©