|
كيف استقبل اهل زوجي واتحمل كلام الناس
السلام عليكم ورحمه الله وبركااته
جايه استشيركم كالعاده وماخاب من استشار وبإذن الله الاقي منكم الناصح الامين انا لما جبت ولدي وطلعت من الاربعين صلحت لي زوجه زوجي حفله في نفس ليله الاربعين ولاحضرت ولااعتذرت منهم لانهم ماعزموني شخصيا كانو موصيين زوجي يبلغني وانا نفسيا كنت تعبانه وكان فيه مشاكل وكذا ولاحضرت طبعاا شالو علي وعدت السالفه يعني عيال زوجي وبناته احسهم مشو السالفه وعادي يضحكون وكذا اما زوجته صارت تتحداني وترمي علي كلمات بايخه وانا ولا كأني هنا مطنشه وكأني ماأحس سوت عزيمه قبل اسبوع ولاعزمتني طبعا اخذت موقف وزعلت بس مابينت لها بس بيني وبين زوجي قلت له اني ماتوقعتها منها مهما كان ماتحقرني كذا واقلها يكون بينا احترام ومن هالكلام الزبده هو واعدني من حملت اني اذا ولدت بيسفرني وبتمشى وانا كنت متاكده انه كذاب وانه مايقدر يوديني قبل لايوديهم جلس يصرفني واخر شي قال بوديهم لمكه والطايف اربع ايام تبين تروحين معنا حياك ماتبين انا مو ناسي حقك وبوديك بلحالك بعدين حسب الظروف انا قلت ماراح اروح معاهم لعده اسباب اولها اني مابي اروح مع احد وابي اخذ راحتي ثانيها اهلي مسافرين ولااقدر اخذ عيالي ولاعندي احد ثاني احطهم عنده عاد قابلتهم وسالتهم عن السفر قلت عشان يكون عندهم خبر اني اعرف مو انه مخبي علي ويقولون لا ماراح نروح ويصرفوني عشان خايفين اسافر معاهم وباخر لحظه قبل لايسافرون جت بنته وحطت بناتها عندي توأم قد ولدي وانا عندي اثنين صغار ومع البنات وماعندي شغاله وبيتي كبير وبناتها معاهم شغاله بس يادوب تلاحقهم طبعا انهد حيلي وتعبت وانقهرت انهم ماقالو لي من بدري عشان اتصرف وادور شغاله ولا ارسل ولدي مع اهلي انا عادي احب البنات وولدي يحبهم بس تعذبت وانا اعرف امهم مو مشكله وتستاهل التقدير واخت ولدي ومهما كان احنا اهل بس زوجة زوجي لسانها طويل وتتكلم وان زوجي سحب علي واخذها يمشيها وانهم خلوني خدامه للبزران يعني انقهرت يوم دريت انها تتصل على ناس كثير اعرفهم وتقول والله ماكنت ابي اسافر بس حلف علي انك لازم تروحين وكلام ماله داعي طبعا انا اعرف انها تبي تستفزني وانا صابره واحاول امسك اعصابي واحس اني اخرها بخربها وبنفجر زوجات العيال يتصلون علي ويتريقون علي ماتوقعناك كذا كيف تنزلين نفسك للمستوى ذا وين اللي تقولين بيسفرك هذا هو خلاك شغاله لبنته وبناتها صدق انك جبانه وانا مطنشه واقول اني انا اللي حلفت عليها تسافر وتخلي بناتها عندي عشان ربي يعطيني اجر عمرتهم ويبارك لي في حالي وعيالي صح هم انفرضو علي بس انا عادي عندي صح تعب بس والله احبهم وربي يشهد علي اني نايمه وكلهم حولي وعيني عليهم وشايله هم لايجيهم شي وهم معاي طبعا انا الاحظ اني صرت غيور بالفتره الاخيره وصارت ضرتي تقدر تستفزني مع العلم انها قبل تسوي اكثر من كذا ومايهمني بس يمكن لان كلا صار يوصله كلامها وينقلون لي وانا ماعدت اتحمل انا بشاوركم اذا جو من السفر هل استقبلهم بشكل مبالغ فيه يعني اروح بيتهم مع العلم انا ساكنين جنب بعض وبينا باب هل اروح في بيتهم واعطر وابخر واصلح كيكه واحط ورد وبالون ونوافير وحركات والبس البزران وانادي حريم العيال وابين لهم اني راضيه بسفرهم واقهرهم واثبت لزوجي اني اعتذرت منهم لما ماحضرت حفلتهم ولا ماله داعي اجلس في بيتي واخليهم هن يجون يسلمون علي وياخذون البنات واستقبل زوجي بلحالي واخلي اهتمامي فيه بس ومااعطيهم وجه ابي رايكم بكل صدق واذا استقبلهم بحفله عطوني افكاركم انتظركم باسرع وقت لانه باقي كم يوم ويجون دعواتكم ربي يهدي بالي ويفكني من شياطين الانس |
انتي إلك بزوجك[ وبس] إلبسي أحلى لبس عندك وزيني بيتك واتزيني ورتبي أولادك واطبخيله أحلى طبيخ وسلمي عليه بحراره خليه يحس أنه سفره عنك أكبر خساره وانه مايفكر يبعد مره ثانيه وخليكي في بيتك
|
زوجك وبس وضيافتهم اذا جو زاروووك ونصيحتي لك يا وحدانية ابتعدي عن هالاجواء تماما واقطعي علاقتك فيهم قد ما تقدرين لا تكلمين بناته ولا حريم العيال , اقطعيهم لفترة طويلة وخلي لقاءك معاهم بحدود ضيقة جدا صدقيني الطريق اللي تمشين فيه من منافسات اخرتها تعب نفسي فظيع ما راح تحسين بفداحة اللي سويتيه بنفسك وخليتهم يسوونه فيك الا بعد ما يطيح الفاس بالراس خذيها نصيحة من مجربة ابتعدي عن أجواء المنافسات بكل قوتك وبترتاحين , وخذي نفقتك وحقك من زوجك بالمعروووف الله يعينك |
من رايي وبالنهايه القرار لجاستقبليهم انتي والبنات
اذا كان وصولهم وقت عشا مثلا او غدا جهزي او اطلبي من برا استقبال حلو ومن هالكلام الزين اول شي راح تكسبين احترام زوجك وغلاك يزيد عنده بنات زوجك راح يحبونك عالاقل اللي تاركه بناتها عنذك تضمنين احد يكون في صفك وقت الحاجه تكسرين عين ضرتك وراح تحتر انه موضوعها موهامك سافرت والا قعدت!! وراح تمل من ملاحقتك بالكلام!! والله يعينك |
كلكم على عيني وراسي ومازلت افكر ومحتاره
بس خوفني كلامك يافاكهة الشتاء الطريق اللي تمشين فيه من منافسات اخرتها تعب نفسي فظيع ما راح تحسين بفداحة اللي سويتيه بنفسك وخليتهم يسوونه فيك الا بعد ما يطيح الفاس بالراس كيف ابتعد عنهم ماني عارفه وانا متاكده كل ماقربت كل ماتعبت اكثر بس هم ساكنين جنبي وابو زوجي رجل مريض وكبير وساكن عندهم وكل مغرب القهوه هناك والضيوف دايم هناك وولدي متعلق فيهم مره من يقوم من النوم وهو يبيهم وهم قبل يعاملونه كويس بس يوم كبر وصار يحوس وكذا صارو يهاوشون ويطقون قدامي ومن وراي وانا اتضايق بس مابي اتكلم عشان مااسوي مشاكل وجالسه اتحمل عشان خاطر عيالي مابيهم يعيشون في جو عداوات والمشكله ان زوجته بدت معها مرحله مراهقه متاخره وصارت تتحداني في كل شي ويشهد علي ربي اني كنت اتجنب اني اغار منها او استفزها بس يوم صارت تنافسني في كل شي وتتلفظ علي تعبت منها انا الحين مايهمني الا زوجي وعيالي وابي ابين للكل انه ماهمني سفرهم واني لو بغيت اروح كان رحت معاهم واني مو فارقه معاي ابي اللي يتكلمون يسكتون عشان كذا فكرت استقبلهم واهتم فيهم وخايفه اندم اذا سمعت عقب كلام انهم يضحكون علي واني جبانه ومن هالكلام تكفون بنات وجهوني مررره حيرانه |
هم مسافرين عادي
ماعتقد له داعي تستقبلينهم وتسوين حفله.. الزم ماعليك بيتك وعيالك وزوجك وتعاملينهم باحترام وتقدير وقت ماتشوفينهم وانصحك مادام يعاملونك باحترام عامليهم باحترام وزوجته مصيرها ترضخ وتندم لان تصرفاتها دليل قلة عقل وقلة حيا.. وانصحك تحتفظين بعلاقتك الطيبه باولاده وبناته بحدود المعقول والمحتمل لاتحملين نفسك مالاتطيق ابدا.. لانك بتصيرين تشرهين وتحطين بنفسك وسالفة الحفله اللي حطوها لك ولاحضرتيها خلاص انسيها ماضي وانتهى. خلك ببيتك معززه مكرمه وتجهزي لزوجك وبس غيره ماله حق عليك |
حبيبتي اذا وصلوا لالا قبل لايوصلون يعني بنفس اليوم اللي بيجون فيه سوي حفله ببيتهم واطبخي اكلات وسوي حلا ومشروبات عصائر وحطي نفافيخ وزينه واذا وصلوا رحبي فيهم واستقبليهم واللي ماتسلم عليك هيا خسرانه اهم شي زوجك يرضى عنك ويعرف انك بنت اجاويد واصول وربي يحميك |
أتفق مع غالبية الردود إنتي عليك بزوجك وعيالك وبس
وعلاقتك بزوجته وعياله رسمية وبحدود ومابينكم إلا الإحترام ورد السلام صدقيني إذا تميتي كذا تدققي وتتشكي على كل شغلة يسوونها رح تتعبين واجد ومحد خسران غيرك إنتي وصحتك ونفسيك وعلاقتك مع زوجك موفقة ياوحدانية |
بيكون لي رد عزيزتي وحدانية الله يفرج همك ويسر أمرك |
وليش تضغطين على أعصابك وصحتك ونفسيتك عشان لا يقولون أو يقولون؟!! إطلعي من هالمعمه وريحي راسك يا ألله العمر قصير وحنا نضيعه في يقولون ومايقولون !! |
ولا تحطينها ببالك قالو : ( الرد على قول السفيه مذله )
ما عليك بيها خليك ببيتك وزوجك وعيالك واعملي اللي طلبه الله ( والكاظمون الغيظ ) مننا واجرك عنده اكسبي حسنات بتعاملك الحلو وكسبيها سيئات بتعاملها البشع .... والناس لما تشوفها هي اللي تزن وانتي ولا على بالك راح يقولو شوفو شلون سافهتها ولا ينفع السحاب نبح الكلاب وان شاء الله يكون هذا التعبير بمحله الصحيح .... وما اعتقد انو في داعي لحفله وكذا بس اذا جو بوقت وجبه ظبطي شي علي زوقك واعملي الاصناف اللي يحبها زوجك ومعاها حلو وانتهى الموضوع .... بس طولي بالك وربي يهون عليك وعلينا |
لو انا منج أكشخ والبس بس حق زوجي واضبط له عشا اللي يحبه قلبه
اما الباجي فآخر ما افكر فيهم اهم شي سبحي عيال البنت ونظفيهم وعطريهم وبس و ريحي بالج |
فكرتهم مسافرين بلد بعيده ولهم شهور غايبين عنك
القصه ما تسوى تعملي حفله وزينه ومادري ايش وين راحو ؟ مكه والطايف يعني قريب منك ولهم اسبوع فقط غايبين او حولها اانا ارى انه مافي داعي تعملي حفله واستقبال الجماعه راحو الطايف كم يوم وجوو اما زوجك فمعاك حق ممكن ببيتك تعملي عشا بسيط او اللي انتي حابه تسويه.. ممكن حركه حلوه انك تقضيلهم يعني تعبيلهم ثلاجتهم فواكه وخضار ولبن وعصير وخبز لانه غالبا هم فضو ثلاجتهم قبل يسافرو فممكن تكون حركه حلوه ... غير كذا لا تبالغي .. |
أختي وحدانية اللي أبي أقوله لك قالته أختي شوك بشكل مختصر ومفيد ... اسمعيني الله يطول بعمرك ويرضى عليك ويفرج همك .. الحياة اللي أنت تعيشينها متعبة بكل معنى الكلمة ولازم بأقرب وقت تحطين لها حد لأجلك قبل لا يكون لأجل أسرتك .. أنت داخلة معمعة ومنافسة نسائية مهلكة ومالها حد ولا لها نهاية , ولكن نهايتها المحتمة على أي امرأة مهما كانت قوية هي التعب النفسي الشديد .. بضرب لك مثال علشان تتضح لك الصورة يا وحدانية : لو مثلا أنا موطفة ومعي زميلات ( ولاحظي زميلات مو ضرة وتوابعها من العايلة ! ) وكل يوم على موال , فلانة أحلى منك فلانة أحسن منك , شوفي فلانة ما شاء الله عليه , وطلعوا روحج بفلانة بالذمة ما راح تتسلل الغيرة والحقد لقلبج حتى لو انت قلبج صافي ؟؟ وهذا بالضبط اللي عملته فيك زوجته , أنت بالأصل ماغرتي ولا بتغارين منها , ولكنك ضغغطت عليك نفسيا لحد ما صرتي تغارين منها .. هم لعبوا بأعصابك ولا زالوا , وصاروا يخربون بيتك بس بايدك انت مو بايدهم ... السبب في اللي أنت فيه واضح هو المقارنات اللي حاطة نفسك فيها ... حريم العيال اللي فيها خير منهن ما راح تجي وتجيب لك كلام مثل السم , وبناته بالمثل وزوجته بالمثل ... نصيحتي لك يا وحدانية والحل اللي أشوفه لك : خلي زيارتك لهم مرة بالأسبوع مبدئيا , وولدك لا تمنعينه من عندهم دامه يحبهم , وعوضي عن غيابك بأنك مرة ترسلين حلى مرة قهوة ووو الخ , مرة اتصال سريع وقصير جدا بدون قيل وقال وما ان تحاول وحدة تفتح الباب اعتذري باي شغلة وسكري .. المكالمات اللي تعرفينها من وحدة نقالة حكي وراعية نميمة لا تردين عليها بالذات حريم العيال , وبناته المحترمات اهلا وسهلا و اللي تطول لسان الزم ما عليها ابوها وبس .. ولكن بنبهك لشي يا وحدانية وهذا الاسلوب انا استخدمه في حياتي , عمري ما قاطعت وحدة وسبيتها وقلت لها ابعدي عن حياتي ولا عاد تتصلين ووووو ألخ , أبدا لا تسوين كذا خلك دبلووووماسية لابعد حد وتعلمي فن الهروب من مواجهتهن , والحمدلله بهالاسلوب صار مالي خصومة مع أي شخص .. الانسان اللي يزعجني انسحب منه بهدوووء , واذا شفته سلمت عليه واكلمه عادي وبحدود ... هذه نصيحتي لك يا وحدانية صدقيني بتهلكين نفسك بمقارناتهم , اسمحي هم مخلينك لعبة يلعبون فيها وبأعصابها ويذبون عليك الكلام وهم دارين وش راح يسوي فيك .. بقي عليك زوجته طنشيها بالمثل واذا التقيتي بها سلمي عليها واحترميها واجلسي معاهم شوي وانسحبي بأدب .. أتمنى تفكرين بكلامي زين موفقة |
وحداانيةا لله كثرمن امثالك يارب
اتركيع عنك كلام اللي يحرضونك تعامليم معهم بطيبعتك حسب نيتك لا تسمعين كلام المحرضيين ماشاءا لله هي ماقصرت سوت لك حفلة وانتي غلطانة مارحتي ولا اعتذرتي اكيد انهم تعبوا في تجهيز الحفلة انتي قابليا لاحسان بالاحسان جهزي لهم حفلة بخري البيت وعطرية وسوي كيكة وحلويات وقهوة واستقبليا احسن استقبال كذا بتكبري في عين زوجك وفي عينهم كثييرو يمكن ربك يبدل غيرتها منك الي محبة ماتدرين اللهي يوفقك |
الله يجزاااكم خير ويوفقكم ويرحمكم اجمعين
والله لولا وقفتكم معاي كان ماني عارفه اصلح شي هن راح يجون اليوم واهل زوجي مسافرين ومعاهم اخت زوجي بنت في عمري ماتزوجت وهي مو من سكان الرياض بس جت قبل اسبوع ولاقمت بواجبها لانها جت وجلست يوم واليوم الثاني سافرت معاهم وانا عشان مااحط نفسي في موقف بايخ واندم واجلس الوم نفسي ارسلت مسج لاخت زوجي انها تبلغني متى موعد سفرها قالت رحلتي يوم الجمعه الصباح قلت خلاص عيالي عازمينك لانك عمتهم وراح يعشونك في بيتي قلت اذا وصلتي ارتاحي وبعدين حياك عندي عشان نقوم في واجبك واعذرينا ع التقصير قالت ماله داعي وكذا ولزمت عليها قلت هم راح يوصلو بإذن الله ع المغرب او العشاء واذا وصلو بيجون البنات يسلمون وياخذون بناتهم واذا جو راح ابلغهم اني عازمه عمتهم ولازم يحضرون وباخذ ربع ساعه كذا وبروح اسلم على زوجته واعزمها وارجع لبيتي انتظر ان حضرو حياهم وعلى راسي وان طنشو اكون في بيتي وحافظه كرامتي انا كنت بجد ناويه اجلس استقبلهم في بيتهم بس حسيت ان طيبتي مبالغ فيها وراح تجيب لي دمار نفسي مهما كانت هي ضرتي ولسانها دايم قذر وترمي علي بكلام زي السم وانا دايم اطنش بس هالفتره صرت اتعب منه لانه صار متداول بين اللي حولي انا متاكده انها راح تستفزني بسفرتها وانه طنشني وراح معاها ومن هالقبيل بس بحاول اتماسك لو ع الاقل قدامها المشكله ان اللي حولي يتناقلون كلامها بشكل مستفز وانا ماعندي ردود منطقيه و قدرو يخلوني اغار واتعب وانا وربي يشهد علي مو غيور ولا راعية هالحركات بس صرت اتعب واقارن نفسي فيها كثير لدرجه مميته وقاتله وخايفه على نفسي من العاقبه اخاف اغار حد الحقد وعقب اصير عدوانيه واعمل مشاكل وانا نفسي اعيش بسلام وهذي ابسط حقوقي تخيلو نموذج على كلامهم المستفز يقولون ولدتي وجبتي ولد وراح وجاب لها ايفون وهي حرمه كبيره ولاتحترمه وتعطيه وجه كثرك طلعتي من النفاس وراح ومشاها وخلاها تاخذ عمره وانها هي تقول انا قلت لكم من الاول انه متزوجها علي عشان تحمل وتولد ولاهي مالها دور اكبر من كذا بجد جرحني هالكلام صرت اكره النوم معاها صرت اسهر طول الليل لحد مااظمن نومته عشان ماينام معاي من تزوجته وهي تقولي كذا وفي وجهي ومن وراي كذا مرره تقولي لو زوجي تزوج وحده غيرك كان طنشنا وحلق في السماء يعني قصدها انها ماتغير علينا عشان مافيك شي مميز ليش تسوي فيني كذا ماانا ممكن بخبث وحقد اغيره عليهم بس انا افكر بالاخره وبعيالي وبعواقب الامور ولاتربيت على كذا والله تقول ترى زوجي خطب كثير ولو انه اخذ فلانه كان يمديها مطلقها لانها قويه ولاتتحمل الاهانه يعني زي انه انتي ضعيفه وماعندك كرامه تعبت كلامها زاد وسكوتي عليها تعبني انا اختي نصحتني نصيحه وناويه اطبقها قالت لو جت البوم في بيتك وغلطت عليك قولي لها لكل ذوق حشمتك كثير ياام فلان بس مو عشانك عشان عيالي وزوجي بس اكثر من كذا ماراح اسكت وانا بحترمك لانك في بيتي واتحملي نتيجه كلامك لاني ماعاد بمشي لك هالكلام وبجد خايفه انفجر في وجهها اذا استفزتني ويقولون مسكينه ماقدرت تتحمل انها سافرت مع زوجها وهي جلست شغاله لاطفالهم الله يعطيني قوه وايمان وعزيمه تكفيني لاخر يوم في عمري راح اطمنكم اليوم بالليل ع الاحداث دعوااتكم ياابناات |
وحدانية
ماانصحك بتطبيق كلام أختك اذا جت عندك قومي بواجبها وتشاغلي عنهم لا تضلين جالسة , كل شوي روحي المطبخ وانشغلي مع أولادك اللي عليك شي واحد فقط : اسحبي نفسك منهم شوي شوي وبترتاحين هم هدفهم واضح وحققوه اللي هو تدمير نفسيتك انسحبي بهدوء وراح ينقلب السحر على الساحر وما راح يلقون لك طريق يغيضونك فيه لانك بكل بساطة مشترية راحتك الله يفرج همك |
حبيبتي الله يكون بعونك
متابعة مواضيعك بصمت واسأل الله انه يبرد على قلبك ويهدي سرك ويسخرلك زوجك ادعي ربنا بآخر الليل انه يشغلهم بنفسهم ويصرف كيدهم عنك |
السلام عليكم اختي في الله، والله اعجبتني اخلاقك وصبرك، ما شاء اله عليك ولكن............ أكملي المعروف في نفسك وحافظي على طيب اخلاقك وصبرك لان اجرك على الله فلا تجعليه يذهب سدى بكلام النساء التافه عندي لك بيتين اعتبرهما من اجمل ما قال الشافعي رحمه الله تنفع في مثل هكذا مواقف: يخاطبني الســفيه بكل قبح _________ فأكره ان اكون له مجيـــبا يزداد قبحا فأزداد حلمـــا _________ كعود زااده الاحراق طيبـــا وعلى قول المتنبي الله يرحمه: اذا اتتك مذمتي من ناقــص _________ فهي الشهادة لي بأني كامــل والكمال لله وحده لكن اعتبريه على مستوى البشر شخص يكمل على شخص باخلاقه ودينه وحسن تعامله فتغني حبيبتي بتلك الابيات وانشديها على مسامع من ينقل لك القيل والقال وان شاء الله ستقطعين ألسنة الناقل والقائل موفقة حبيبتي وثبتك الله على حسن اخلاقك وصبرك |
الله يرفع قدركم ويرزقكم بكل ماتتمنون ويسخر ازواجكم واولادكم ويحفظكم من كل سوء
ويشفي مرضااكم يااكريم والمسلمين اجمعين ببلغكم ايش صار ووجهوني لاني بجد مرهقه حد الموت وصلو قبل المغرب لبست البنات ورتبتهم وجلست العبهم بالحوش ومعاي عيالي مادريت الا ولد زوجي داخل علينا ويسلم وكذا سلمت* وراحو البنات يركضون ع الباب اللي بينا ودخلو بنات زوجي في حوشي وسلمو علي* والسياره اشوفها بوجهي وزوجه رجالي مابعد نزلت استحيت اصد عجزت ارجع واطنشها حسيت اني بستحقر نفسي* مع العلم اني ندمت على احترامي لها المهم طلعت وسلمت وتحمدت لها بالسلامه اخذت عيالي ودخلت بيتي صلحت قهوه وشاي وارسلت السواق يجيب حلويات* ودقيت عليهم قلت ارتاحو واتحممو وبعد المغرب قهوتكم وعشاكم عندي عشان اخت زوجي قبل لاتسافر طبعا دقيت عليها ماردت واخت زوجي ارسلت يصير خير وزوجه ابو زوجي ردت علي وقالت بجيك بعد الصلاه وشوي الا يجي ولد زوجي قلت امك ماترد علي جوالها بلغها ان القهوه عندي قال خلاص الا وهي تدق علي والله رجولي متنفخه ولا اقدر اجيك جيبي قهوتك عندنا قلت اسفه القهوه لفلانه اذا بتجي الله يحيها وانتي معذوره ان ماجيتي وسكرت شوي الا وتجي زوجه ابو زوجي وطبعا استفزتني حد الجنون وانا مطنشه ولا كاني هنا طبعا كنت كاشخه ع الاخر ومسويه اني ولا على بالي احد شوي وتجي زوجه زوجي وين البنات ماجاك احد وتتريق طنشتها جلست تتقهوى وفتحت جوالها تفرجني على المطاعم اللي راحو لها وصور لها ولزوجي وهم ياكلون (حسبي الله عليها) ورب البيت العام سافرت مكه معاه خمس ايام اقسم بالله ولاجيت طاري للروحه حتى ماصورت خفت جوالي يطيح بيدهم ويتضايقون عياله راعيت مشاعرهم لحد ماهانت علي نفسي حسيت اني ابالغ بطيبتي احيان كثيره احس اني مريضه نفسيا ونفسي اروح لدكتور نفسي يعالجني يعطيني شي ينشط عندي الحقد والحسد والعداوه تعبت من طيبتي تعبت تعبت تعبت المهم بعد صلاه العشاء دخل زوجي وقال اسمعي عندي رياجيل تصلحين عشاء تخيلو الساعه 8 والحريم عندي ولافيه شغاله يعني اقوم اطبخ وانفخ وانا عندي ضيوف* يعني قمه قله الادب قلت ماراح اصلح انا مشغوله ولايمدي قال الا يمديك وطلع طبعا حقرته وجلست اتقهوى* عشر دقايق واعتذرت ومشت لبيتها والبنات ظلو عندي شوي والا تدق علي تعالي بسرعه فلان يدور عليك ويهاوش وهو بالمطبخ يقول خلها تجي تحط العشاء حق الرجال انا استغربت ومن غبائي ولاني تافهه رحت ويوم جيت الا وعندها حريم عازمتهم مادري جايين يسلمون عليها الزبده قالت وينك شوفيه بالمطبخ يهاوش دخلت الا وهو مو موجود والعشاء ع الطاوله وشووي الا وهو جاي قلت انت يوم تبيني ليش مادقيت ع جوال ان فلانه دقت علي تقول انك تهاوش وسكت ماقال شي ويجلس يضحك ويستهبل وش تبين عشاء ياعمري واذا هذا مو عاجبك بعطي السواق فلوس وكذا طبعا تنرفزت وسفهته غرفت العشاء ويوم خلصت قال حطي عشاء الحريم قلت اي حريم قال ضيوف فلانه قلت تقوم هي تحط عشاها ولا تحطه شغالتها ورجعت بيتي وبناتها عندي واخت زوجي وطبعا عادي عسل معاي وماحاولو يضايقوني ابداا احترموني بقوه الا وهم جايبين كيس فيه هديه لي قالو افتحيها بنشوف تعجبك ولا لا فتحتها الا واحصل ساعه تجنن من بنته ام البنات اعجبتني الساعه بسيطه بس ذوق* والا فيه سجاده وسبحه قالو هذي من امي قلت يعطيكم العافيه* جلسو شوي وراحو* بس دمرت زوجته نفسيتي بشكل عجيب وتخيلو والله لو اقولكم وصلت فيهم اللعانه لاي درجه ماتصدقون زوجه واحد من العيال ماتعبرني واذا عزمتها ماتجي بيتي دايم كذا وماترد ع اتصالاتي وحركاتها معاي بايخه اليوم ماعزمتها قلت ليش اعزمها وهي ماتجي تخيلو مادريت الا وهي داخله وتمدح في عمتها وهي دايم تقل ادبها عليها وتجلس تسالهم عن رحلتهم وعينها علي انا بعد كذا اقسمت بيني وبين نفسي اني اسافر معه لاي مكان وبصور وبسوي حركات حريم وبجي وبفرجها بشوف كيف لو تبادلنا الادوار بتتوجع ولا لا* بعلمها وش معنى اني كنت احترمهم وايش الفرق لما احتقرها بناات مررره تعبانه والله اكتب ودموعي فوق خدي نفسي اموت ونفسي اتطلق ونفسي اني ماتزوجت ضعت من جوو مكسوره يمكن مشاكلي مو قويه بس انا تعباانه يستفزوني وانا والله محترمه تدرون ايش مشكلتي اني متربيه ياليت اهلي علموني قله الادب وعلموني كيف مااحترم احد ياليتهم ربوني علئ الحقد والكيد كان عشت مرتاااحه ماعاد فيني روح تتحمل مغثه مالي نفس انام جنب زوجي والله نومت عيالي وطالعه جالسه بالحوشع اصيح نفسي افتح باب الشارع وانحاش مررررهقه مررره* ادعولي تكفون يارب صبرني* |
يا وحدانية يا حبيبتي عندي سؤال وأتمنى تجاوبيني بكل صدق : أنت ليه تجرين وراهم هالجري كله ؟ تلحقينهم وتدقين عليهم وتدورين الغثا بنفسك ليـــــه ؟ وتجينهم ويروحون لك ويدقون عليك وتعالي فلان يبيك , يالله حياة متعبة حاسة بصخب شديد بداخلي من مجرد قراءتي لمشاكلك كيف لو كنت أعيشها أنا يوم أقرا كلامك أحس فعلا ان القطو ما يحب الا خناقة مثل ما يقولون أنتظر جوابك علشان نحل المشكلة |
ماادري وش اقولك شخصيتي جدااا سيئه طيبه حد الغباء
تكفين لاتزيدين علي مررره نفسيتي دماار قهرتني حركته لما دقت علي ورحت احط العشاء هناك مادري كيف رحت احيان احسها حاطه لي سحر ربي ساخرني لها بشكل عجيب علئ كثر ماتسوي مااقدر اغلط عليها لدرجه اتعامل معها بطيب واذا رجعت بيتي وفكرت انصدم اني كيف سكت على قله ادبها وانا المشكله اني متعلمه وفاهمه ومثقفه وعندي ردود منطقيه والحق معاي بس ليش اسكت مااعرف طيب انتي تبين تعرفين ليش انا داخله معاهم كذا لانهم مفروضين علي اذا جيت اطلع مكان لازم احط عيالي عندهم عشان مااقدر اخذهم معاي لكل المشاوير وزوجي مايوافق اطلع فيهم اسواق وسهرات ومن هالكلام واتركهم عندهم عيالها وبناتها داخلين طالعين علي لازم اشوفهم كل يوم وعادي ماني متضايقه منهم ولدي يحبهم ومتعلق فيهم مرره من يقوم يبيهم وينادي زوجه ابوه ماما ومررررره يموت عليها يعني احس ان حياتي حوسه انا ماعاد ابي اشوفهم بس اضحي عشان عيالي كيف لو ابوهم جاه شي وانا هجرتهم من وين لهم احد يوقف معاهم اخاف اكسب عداوتهم ويعيشون عيالي اذا كبرو بدون اهل وعزوه ابي لهم اخوان يربونهم معاي زوجي مو صغير عمره فوق الخمسين لو كبر شوي بيطيح عن حيله وعيالي بيكبرون وبيدرسون من يوقف معاهم اذا انا زعلتهم وكرهوني بيكرهون عيالي يااربي مررره متضايقه حياتي متخربطه ينفع اطلب الطلاق واترك عيالي لهم واروح اعيش لنفسي وانسى كل شي اقدر اسوي كذا ولا لا ياشين شماته العدو وياشين اللي يحاول ينكد عليك عشان يرضي غروره حسبي الله عليهم على قد مافي صدري من ضيق انتظر منكم توجيه ونصيحه بس لاتزيدون علي الله يرحمكم ويعافيكم ارحموني يكفي الوضع اللي انا فيه |
أتوقع حياتك تحتاج ترتيب فقط وليس يوجد داعي لطلب الطلاق الله يفرج همك ويصلح حالك |
ليش ماتروحين عند اهلك تغيرين جوك
اشوي زوجة زوجك مسكينه اعذريها محتره اشلون زوجها جابك على راسها وهذا وااااضح جدا وحرمه كبيره تجاهليها وخلي علاقتك فيها سلام والسلام يعني لاتدخلين معاها في مهاترات هذا مايناسبك هي مستقويه وبين عيالها وبناتها اما انتي وحدانيه بينهم يعني ابعدي بخيرك وشرك اما زوجة الولد هاذي عطيها على قفاها وماعليج منها وعامليها بنفس اسلوبها ولاتسكتين لها مجملا قللي روحاتك لهم وتعذري باي شي اما الباقي انا اشوف علاقتج فيهم زينه استمري والله يخفف عنك ويزيل همومك |
لا طبعا
طلاق لا الموضوع ما يستحق الطلاق اللي أشوفه لك انك تقللين الروحات والجيات وأولادك خليهم عندهم هم بالنهاية اخوانهم .. وبناته مامنهن مشاكل معك فدخلتهم عليك عادية وما تضرك... بقي عليك حريم العيال وزوجته وهم اللي ابعدي عنهم وخلي احتكاكك فيهم ضعيف لابعد حد صدقيني مابي ازيد عليك بس أنتِ سبب في اللي أنتِ فيه فاتحة اذانك لكل كلمة والنهاية شوفي مشاعرك والتحطيم النفسي اللي تعيشينه زوجك حبوب ويحبك وشايفك فرفورة قدامه ومنبسط معاك ويحاول يضحكك بنفس الوقت اعذريه في انه يبديهم عليك في بعض الاشياء لانها رفيقته ولازم يراعيها في جوانب .. يعني انت لك الحب والفراش والعيال , وهي ما حيلتها الا المال والطلعات ولسانها طنشي وعيشي حياتك ومثل ما قال اخ مجموعة انسان حياتك ملخبطة وصاخبة وتحتاجين تنظمينها باقي أقولك لك انك متحسنة من اول بكثير وهذا شي الاحظه من فترة فاستمري ولا تخلين الكلام يهدم حياتك هو بالنهاية ترى كلام |
مو غلط ان يكون الإنسان طيب ،، وقلبه خالي من الحقد والغيره ..
الغلط ان نجعل انفسنا تدفع ثمن لتصرفات افراد مريضه انفسهم و ولا هم لهم الا هذه الدنيا .. تبغين ترتاااحين ؛؛ اجعلي كل عمل تفعلينه يرضي الله قبل نفسك و العلم اجمع .. واسمح لي ،، انتي من فتحت الباب لخلق الله يسمعونك كلام ماله امه داعي ووبغرض الإفساد فقط .. ولو خوفتيهم بالله و حثتيهم على تقواه .. لكفاك الله ،، و رزقك من حيث لا تحتسبين .. وينعكس على نفسيتك وحياتك ،، |
ابتعدي عن الكرة والحسد والحقد
ابتعدي عن المشاكل والتدقيق في كل صغيرة وكبيرة ابتعدي عن مساواتك بالاُخريات صفي النية واجعلي عملك. خالص لوجه الله ارضي. ربك. يُرضي الناس عليك بأخلاقك. تكسبين الناس غضي الطرف عن. الاُمور التافه الدنياء ما تستاهل. كلنا. مسافرين لايشغلك. الشيطان. عن ذكر الله اكثري من الاستغفار والصلاة على النبي والصدقة. وقيام الليل وابشري. بتغير الاحوال للاحسن* نسأل الله ان يشرح صدرك ويُيسر أمرك |
خليك بطل يعتم بالحفلات ولا شي استقل يليهم بذوق وابتسامة عريضة وزوجك لأضرارا لحاكم البسي وان بسيط معاه الشي الثاني المنافقات اتركيهم وسي أدامك. هطولا ليدمر مك ويدمرون نفسيتك. بالعكس. تصرفك مائل انك جبانة وخامة لعبت لهم. يدل علي انك إنسانية واعية وراقية وبنت رجال. الله يكثر من أمثالك. ويوفقك وين ما حتي
|
في مثل جميل يقول : لا أرى لا أسمع لا أتكلم نصيحة / خليك رسمية وزياراتك فقط للمناسبات الضرورية فقط ، اشغلي نفسك في ترتيب بيتك ، في اهتمامك بزوجك وأولادك ، ابتعدي قدر الإمكان عن اجواءهم وراح تسلمين . .. |
السلام عليكم ورحمة الله وبركاته
استدليت من كلامك انك عاقل رزينه وفاهمه ومثقفه بس ينقصك الثقه في نفسك مجرد لطش كلام هزك واعدم ثقتك في نفسك عزيي ثقتك في نفسك وتعشين مرتاحه مهما كان ومهما صار لاتتركينه يتغلغل في داخلك وتعشين صراع بينك وبين نفسك هذا هو الهزيمه هذا هوالانكسار (خليك كالجبل ما تهزه الريح) عززي ثقتك في الله ثم في نفسك ولا تجعلي لشياطين الانس والجن يؤثرو عليك من هاذي الوساوس اذا سمعتي شئ يكدر خاطرك استعيذي من الشيطان (وقولي حسبى الله ونعم الوكيل ولا حول ولا قوة الابالله) فهذا نصرك بأذن الله ؟؟؟؟اما الغيره فهي من طبع النساء فألاتمسي لها عذار لزوجة زوجك بوجهة نظرها انك اخذتي زوجها منها وانك اصغر منها وهذا ما يدير في خاطرها فانتي كبري عقلك كوني اعقل منها ولا تتهوري وتكوني مثلها الثقل زين واحمدي ربك ان عيالها طيبين معك وهي واضح انها طيبه بس اكسبيها بالصمت خليها تقول اللي تقول وتطلع حرتها بلسانها وانتي اذن عجين واذن طين وهذا يرجع عليها تستحقر نفسها (انبح ياكلب واسترح ياقلب) يضرب هذا المثل لسلطين السان؟؟؟؟؟ عيشي حياتك وانسيها تماما واكسبي عيالها اهم شئ ام هي ما لك شأن فيه غير الاحترام بس سلام عليك وعيكم السلام تبادلن الطيب اهدة عليك هديه اهدي عليها عزمتك اعزميها خلي معدنك ذهب مايئثرفيه الصدا اما الشر فصدي عنه ما يجلب الا الهم والغم والشتات والتفرقه والامراض (خوذيها نصيحه مني )خلي اذن عجين واذن طين والشيطان لا يلعب فيك |
رد : كيف استقبل اهل زوجي واتحمل كلام الناس
حبيبتي الله يكون في عونك
بس حتى لو سافرتي ما انصحك تتعاملين معها بنفس اسلوبها انك تصورين وتورينها انتي عارفه ان اسلوبها غلط وان اسلوبك هو الصح انك ماصورتي ولا جبتي طاري سفرتك طيب اوك اجل عامليها باخلاقك مو تعاملين الناس باخلاقهم خليك على اخلاقك وعززي ثقتك بنفسك وانت الي سويتيه الصح ولا تقلدينها في فعلها بالعكس هذا يدل على قلة عقلها او انها شافتك حبوبة معهم وحست انك ماراح تغارين المهم لاتسوين مثلها ،، وانت اركدي شوي ،، مو دققين في كل شي وتحطين منه مشكلة ،، مثل لما ناداك زوجك للمطبخ طيب ممكن انك قلتي له يشتري جاهز لان مايمديك وحتى هذي ماهي مشكلة بس انصحك تشغلين نفسك باشياء مفيدة مثلا قراءة دراسة تحفيظ تحتلطين بناس غيرهم مايكون هم شغلك الشاغل في هالحياة وبس ولا لك تفكير الا هم واحيي فيك حرصك على انك توثقين علاقة ابنائك باخوانهم وارحامهم وهذي اعجبتني فيك استمري عليها بس حتى لو كان ولدك يحبهم مررة مو لازم يتعود انه يروح لمهم يوميا وفيه شي مهمممم حريم العيال الي ينقلون الحكي انتبهي منهم لان الي تنقل لك حكي بتكون نفس الشي تنقل حكيك و اسرارك لهم فانتبهههههي واذا نقلت لك حكي فشليها بطريقة حلوة مثلا انك تدعين لهم ،، الله يوفقهم ،، الله يسعدهم وعطيها في وجهها انك ماتبغين احد يحكي في الناس من وراهم الله يوفقهم و يسعدهم وبسس عشان الي تنقل الحكي تستحي على دمها وتخاف الله وفي نفس الوقت انت ترتاحين نفسييييا حسيت كلامي مو مرتب بس اتمنى يكون مفيد الله يصلح احوالك |
رد : كيف استقبل اهل زوجي واتحمل كلام الناس
وانا من راي الاعضاء خلك في زوجك وهم لهم الطناش |
رد : كيف استقبل اهل زوجي واتحمل كلام الناس
الله يفرج همك وييسر امرك
لا يضحك عليك الشيطان ويكرهك في زوجك وش ذنبه زوجك ماتنامين معه تراك مسؤله امام الله بعدين واضح من كلامك انك انسانه عاقله مثقفه لكن ينقصك الثقه بنفس لاتشغلين نفسك فيهم اشغلي نفسك بالله اكثير الدعاء والاستغفار انتي الحين في امتحان من الله لاتتضجرين بلعكس احمدي الله وصبري ..قال تعالى وبشر الصابرين اصبري ومع الوقت راح تكسبين انتي وزوجه زوجك واضح 100 % انها غيرانه منك بقوووه ويقول المثل لايرمى الا الشجر المثمر هي غيرانه منك وحاقده وانتي الحين بسسب تفكيرك راح تخسرين نفسك وتميزك الي غارت منه زوجه رجلك انتي واصلي واصبري ولاتفتحين المجال لناس انها تنقل الكلام سووي نفسك ماهمك لان >>>الحقران يقطع المصران احقري الناس الحسوده الي تنقل الكلام نفسها تفرق بينكم وتضحك عليكم احقريهم ولاتسمحين لهم ينقلون الكلام اذا احد قعد يتكلم فيها قولي اذا ماعندك غير النميمه والسب اسفه غيرو السالفه محشومه ام فلان (زوجه زوجك ) ومارضى لها هالكلام ومهما كان هي خالت اولادي >>>راح ينقهرون ووراح يسكتون بكذا ترتاحين من نقل الكلام وتكبرين بعيونهم !!! انتي في نعمه من الله لكن مو حاسه فيها عندك زوج يحبك ويحترمك وحاط في بيت وسواق لاتحريمنه من حقوقه حتى ماتفقدينه وعندك اولاد نعمه من الله غيرك يتمنا ونعم كثيره لكن انتي حاطه حياتك قالو وماقلو ووسفرهم وانا لا >>>>الى متى تبي تقارنين ولا راح ينفعك المقارنه انتي افضل منهم لكن انتي موحاسه اهم ماعليك نفسك اشغلي نفسك بطاعه ثم اولادك وزوجك والحمدلله بعدين في وحده نفس قصتك او اكثر تقول ذابحتها الغيره وزوجه زوجها العن من زوجة زوجك لكن كل الحلول مانفعت معها الا حل واحد عجيببببببببببببببببببببببببببببببببببببببببببببببب ببببببببببببببببببب تقول اشغلت نفسي وتفكيري بلاستغفار وسبحان الله تقول صارت عندي زي الجدار ماتهمن ابد وراح الهم الي بقلبه وتسهلت اموررره بشكل عجيببببببببببببب وستانست بحياته بفضل الله ثم بفضل الاستغفار ويكفي قول الله تعالى قال تعالى ( واستغفروا ربكم ثم توبوا اليه يمتعكم متاعاً حسناً ) وقول رسولنا مرشدنا قال رَسُول اللَّهِ : (من لزم الاستغفار جعل اللَّه له من كل ضيق مخرجاً، ومن كل هم فرجاً، ورزقه من حيث لا يحتسب) بكل وقت استغفري وانتي جالسه وانتي بسياره وانتي تطبخين وعند النوم كل وقت وراح تنحل مشكلتك تاكدي !!!!! لاتنسيني بدعوه صادقه |
رد : كيف استقبل اهل زوجي واتحمل كلام الناس
88888
888888 انا مع راي اخوي سمو الذات |
اقتباس:
مشالله عليك خطة جهنمية أول شيئ تقهرين مرة زوجك الأولى بعد كذا تكسبين رضا زوجك وتعاطف بناته معك . |
| الساعة الآن 04:59 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©