|
فضفـــضه .. .. قسوة الوقت والاخوان ...
بسم الله الرحمن الرحيم .. من ضيج الوقت وقسوة الاخوان وتجمد مشاعرهم .. حبيت اطرح هالموضوع المتعلق فيني .. على امل ان تدعو لي بظهر الغيب ان يهديهم ... لي ويحفظهم لي ... قبل ثلاث سنوات .. كنا في جلسه في منزل عمي .. بحضور جمع من الناس .. فكنا نضحك ونسولف والامور طيبه .. وعندما كنا نتحدث قالت والدتي رحمها الله . شمسه حق الذياب .. من الحين بنحجزها ( شمسه بعمر ذياب) وردت والدتها بحضور الناس . بدون اعتبار لوالدتي... .. له له بنتي مانعطيها اي حد .. مابياخذها الا ولد الحسب والنسب .. وبعدين مخطوبه بنتي خلاص .. وكلنا على علم انها موب مخطوبه .. والدتي رحمها ردت وقالت .. الولد يشل اسم ابوه موب اسم امه .. وبعدين موب غريب عليها ولد عمها .. احسن من غيره .. سكتنا وطنشنا الموظووع ... ويوم رجعنا البيت .. خواتي قالن لامي مانباها لذياب ولا لبطي ومانبا اي حد من صوبهم وبعدين ذياب خلي يكمل دراسته ويتخرج ويكون نفسه ولكل حادث حديث.. انحجرت والدتي كثراُ لانها اجنبيه الاصل ... واعلم انها انجرحت بداخلها .. بس بالنهايه .. نحن ماأذيناهم ولاجرحناهم بالرد .. الآن .. بتاريخ 3 ا نص من 3/2012 تقريبن .. وصلي خبر من اختي انه ذياب وابوي يتشاوروون بخصوص انه يخطبون شمسه لذياب .. وذياب يبا شمسه وقال بنت عمي واعرفها احسن من غيرها .. واجهت ابويه وذيآب مع بعض .. بحضور وحده من خواتي .. الكلام هذا صحيح؟؟ قالي ذياب هي صحيح بخطبها وخطبتها من ابوها ومع ابويه ... انا انصدمت يعني انا اثاث في البيت اخر من تعرف ؟؟ قلت لابويه .. ابويه الكلام هذا صحيح ولاا تتغشمرون .. قالي صحيح وهذي حياتهم والله يوفجهم .. وقفت بويهم وقلت كلمتي اللي ماراح ارد عنها .. لو تنطبق السما الارض ماراح ارد عنها الا بعد موتي خل يلعبون لعبتهم القذره .. حرمه عمي وبنتها قلت والله ثم والله ودفنت امي الغاليه اذا تم الزواج قعده في البيت مابا اقعد بشرد بسافر بهج بسوي اي شي .. وبشل ايدي منكم ومن اسمكم لاانا بنتكم ولا انتم اهلي ... ومابيغلبني شي بسويها .. لانكم رضيتوها على امي قلت لذياب الحين ذياب تبا شمسه من عقب مااجرحوا امك .. تباها من عقب مااكسروا بخاطرها هاي الفلانه ام شمسه قالت لامك حشى على بنتي مانرضا لها الا عيال الحسب والنسب .. خل الحسب والنسب الحين يفيدهم واذا انا اختك ماارح تتزوج شمسه .. اختي قالت .. خلاص اللي راح راح وخليه اخوج يختار هو اللي بتزوج قلتها وامي؟؟ امي ماتت واندفنت وانجحرت منهم وذكرتهم باليوم وبحضور منوه وبوجود منو وين كنت انا يالسه وين كانت امي يالسه ومنو كان معانا وقتها ... قلت لذياب .. شمسه مابتاخذها وراسي يشم الهوى والا والله انكم مااجوفون ويهي بالبيت ... وبغسل ايدي منكم ابوي كان ساكت ...ماتكلم بولا كلمه ... اختيه متزوجه شو يهمها اصلن اخوي ذياب موب مقدر وضع امي وقتها وكيف كانت فرحانه وهي تقول شمسه لذياب وانجرحت من ام شمسه ... بس الحين تاكدت انه اخواني مايفكرون الا بنفسهم مايفكرون بامي ... ترى وحده من خواتي طليقه ولد عمي اخو شمسه .. بس اختي الحين متزوجه .. دقت بنت اختي .. اللي عمتها شمسه .. وقالت خالتيه الموضوع 123 .. واختي طليقه ولد عمي اخو شمسه قالت الله يوفجهم خلوه يختار بكيفه . شمسه تبا ذياب وماادري شو .. ماخلتيها تكمل قلتلها انتي ركزي بدراستج ومايخصج بكل الللي يصير .. قالت خالتيه لاتستوين عنيده وجي .. قلتله يعني ذياب يكلم شمسه صح؟؟ سكتت .. قلتلها بسيطه خليني اعرف اذا يكلم شمسه .. بالفعل ياجماعه اشك ان ذياب يكلم شمسه .. طلعاته من البيت واايد وقليل يدش البيت وتلفونه ولاب توبه كل باس ووورد ... جربت ادش بتاريخ ميلاد وغيره ماشي فايده .. اصلن ذياب موب مال بنات اخوي واعرفه ومازين الشمسه بعينه الا بنت اختي لانه ذياب يكلم بنت اختي على الماسن والبي بي اكيد هي زينتله شمسه بعينه ويوم سالت ذياب قالي .. ولو كنت ارمسها هذا شي من خصوصياتي .. قلته كله ولا شمسه تكون من خصوصياتك ااذ انتم تخليت عن امي انا راسي يشم الهوى ماارح اتخلى عنها وراح ارد بحق التجريح والاهانه حق ذاك اليوم .. بس انا ماقصرت يلست اقنعه انه صغير ولازم يشتغل ويتهنى بشبابه ولاحق على المسؤوليه .. وان شالله اقدر اثر فيه .. هو الحين ياخذ كورسات بلندن على حساب الجيش .. يعني .. يباله 3 سنين علبال مايتخرج .. قالي خلاص خلاص يصير خير .. انا موب رافضه شمسه .. انا رافضه امها .. كارهتنها من قلبي .. مااحبها والله لانها جايفه نفسها فوق الناس .. للعلم انه امها من قبيلتنا ... أنا احب اخواني وخواتي بس مااقدر انسى امي ومااقدر انسى اليوم اللي انجرحت فيه من ام شمسه ... وكلنا نفس المستوى الاجتماعي .. عمي تزوج على حرمه عمي مرتبن بعد موب مره وابوي ماتزوج على امي بالعكس عند ابوي خير اكثر فضل من الله وامي عمرها مااستكبرت وجافت نفسها كانت وايد متواضعه والله كل مرة تسيرلهم وتشل فوالتها وتقول صله رحم صله رحم وماكنوا يوصلون بيتنا واايد انا اعرف ذياب .. انا اخته ويحبني .. ومااراح تدخل شمسه ارضى باي حد الا شمسه .. تتحمل غلطه امها .. امي وايد انجرحت .. وانا للحين احس بهالجرح .. والمكان اللي التأم .. لايتعبثون فيه .. لانه مؤلم جداً .. مؤلم يوم يموت الواحد ومايحسبوله حساب .. مؤلم واايد .. دعواتكم لاخوي بالهدايه ودعواتكم لخواتي يصحى ضميرهن شوي ويقدرون امي .. البنات واايد وكل وحده تقول الزود عندي الا سميه ... ابويه حبيبي .. ماودي اكسر كلمته بس مااقدر اشجعهم على اهانه امي اكثر من جي .. انا للحين بنت امي وابوي وماارح اتخلى عنهم وعن وجودهم بحياتي .. ابوي قال استهدوا بالله ماصار الا الخير ..وانا فيني ضيج شوي كنت وبصيح وماسكه نفسي .. .. المهم موب شمسه ولابنت اختي بتفرقني عن اخوي ذياب .. |
يا اختي احسك مكبرة الموضوع وايد
طيب ليش ما تفكرين من باب ان شمسه وش دخلها بامهاااا ليش تاخذ ذنب امهاا وان امك الله يرحمها كان ودها شمسه لذياب فليش تعارضين رائ امك ليش ماتباركين وتسعين للزواج ذا لانه رغبه لامك ولا تخلين ام شمسه تمنع امنيه لامك ان ولدها لشمسه هذي نقطه والنقطه اثانيه اللي ما اعجبتني بالموضوع لت والله ثم والله ودفنت امي الغاليه اذا تم الزواج قعده في البيت مابا اقعد بشرد بسافر بهج بسوي اي شي .. وبشل ايدي منكم ومن اسمكم لاانا بنتكم ولا انتم اهلي ... ومابيغلبني شي بسويها .. لانكم رضيتوها على امي يختى كلام ماعجبني انتي بنت وهاديه قولي ما بكلمكم ما بجلس معاكم مما ببارك لزوجتك مما بحضر زاوجكم بس مو بهج وبتبرا ومدري شنو يعنى بس انتى لتحبي امك مو قلتي ان ابوك يحبها وحتى زواج ما تزوج عليها كان ابوك رفض راجي نفسك وهدي نفسيتك انتي متاثؤة لساتك بوفاة امك علشان كذا قلتي ذا الكلام والله يكتب اللي فيه الخير لكم ولجميع المسلمين |
اقتباس:
وجهة نظرج واحترمها .. بس لو هي امج وصار الموقف جدامج وجفتي اشكثر انجرحت من ام شمسه جان غيرتي ردج .. وانا موب ياهلة عشاان ازعل ومااكلمهم لا انا اكبر بكثير انا بزعل وبطلع من حياتهم .. لاني موب مجبورة استمر مادام اختاروا طريجهم على حساب امهم وشاكره لج عزيزتي واي فرحه اللي بتفرحها امي عقب الاحراج والاهانه جدام الحريم .. ليش الواحد ماعنده عزة نفس لا والله وانا بنت ابوي ماراح يتم الزواج .. انا قلت ادعيلي الله يسخرهم لي .. المهم ماقصرتي لمرورج .. |
المسامح كريم والحي أبقى من الميت.. وكل واحد بياخد نصيبه، لا تكوني حاجز لأخوك في طريق قد يكون فيه الصلاح والوفاق للطرفين.. فالزواج أصلا عمل طيب ويا بخت من وفق راسين في الحلال..
خليكي أختي وجه خير أخوك وباركي له زواجه واستغفري ربك. |
اختي روضه انا ما اكلمك على انك ياهل او كبيرة انا بس استغربت تصرفك اهج من البيت واتبرا منكم انتى روضه اللي اشوف ردودك على الاخوات ومحاوله حل مشاكلهم ماتوقعت منك هذا الكلام ولو اني مقنعه انك ما بتسويه
وكمان من باب انك امرأة ولست رجل وليس من باب انك ياهل او كبيرة عموما هذي نصيحتي لك والله يفتح على قلبك ويريك الراي السديد ويريح بالك يارب |
بداية دعواتي لأمج الله يرحمها ويغفر لها ويغمد روحها الجنة يا رب .. ,، شوفي أختيه .. أنا برمسج رمسة بين أخت وأختها .. إنتي طبعا تبين الخير والشي الزين لأخوج .. وكلنا نحب الخير لأخواني ونبالهم الزين .. بس لو كنت مكانج كنت وضحت لأخويه وجهة نظريه بكل هـــــــــــدوء واللي صار بين أمهي وأميه .. بس بحط بباليه إنه بنت عميه أصلا ما هي اللي جرحتنيه مجرد كلام قالته أمهي من سنين ويمكن أمهي بروحهي ناسية .. لا توقفين جدام فرحة أخوج .. بالعكس شاركيه فرحته .. وإذا البنت صدج أخلاق وما تتفوت بروحج خطبيها له .. ,، يختي الواحد بالدنيا أحسن له يخلي قلبه كبير ويسامح ويبتغي الثواب من الله ولا تراه بيتعب من صدج .. ,، |
اقتباس:
كنت متوقعه ردج هذا وباصمه عليه بالعشر .. بس ماعليه بعد برجع وبقول تراها موب امج لو هي امج والله لتحاربين الدنيا عشان تردين بحق ذالك اليوم ولو انه كان من باب الغشمره بقول ماعليه يهون بس كان الموضوع جدي وماقالتها الا بنفس شينه .. والله يسامحها عن عن نفسي مابا منهم شي والبنات ماخلن .. ماقصرتي على العموم |
اقتباس:
مايخالف عزيزتي للحين موب عايشه موقفي .. يمكن تهون عليج امج لو كنتي مكاني بس انا ماتهون عليا واذا الصافع ينسى المصفوع ماينسى والطراق اللي مايجتل يقوي .. على العموم انا مستعده اتركلهم البيت بكبره اذا فكر يتزوج شمسه .. وبعدين اذا يباها عليه بالعافيه بس ينسى اني اخته وخشمي مايواه خشمه .. لو شو ماصار .. وبعدين لو تركتلهم البيت ب رد اسكن في بيتنا القديم .. وبرجع لدوامي .. لانه وقتها مسؤوليتي كبنت تراعي البيت مكان امها انتهت ان شالله مايسويها ذياب ادري يحبني لاني اخته والاخت مابدالها اخت والزوجه تتعوض .. وبنت اختي كله من تحت راسها شكلها قامت تمدح شمسه جدام اخوي والا شو اللي يخليه متحمس هالكثر على العموم ادعي بس الله يهديه ويعقله ويرده لوعيه واشكرج غناتي لمروج ماقصرتي بحفظ الله |
اقتباس:
وانا مستعده اخطبله بس موب الحين وموب شمسه وانتم فاهميني غلط انا طرحت الموضوع عشان تدعون لي موب توقفون مع ذياب وشمسه .. اعتبروا امي امكم للحظه وفكروا فيها وبتحسون ساعتها .. الواحد يوم يجرح فرحتك ويكسر بخاطرك وبالنهايه يوم موته قاموا يفرحون .. انتم موب مقدرين شي مجرد ردود ولا واحد فيكم حاس بامي .. الميت عندكم خلاص يموت وينتهي كل شي وراه .. بس انا للحين موجوده .. وراح اسوي المستحيل عشان شمسه توخر عن درب اخويه .. مابخلي بنت عمي وامها يلعبون في حياتنا بكيفهم .. ماقصرت اخويه على مرورك واشكرك |
اسأل الله العظيم ان يغفر لوالدتك وان يربط على قلبك
ويلهمك الصبر والسلواان وان يجعلك ممن قال عنه الرسول ولد صالح يدعي له البنت اكثر وحده تحس بالام وماألومك الله يكون بعونك لكن فكري بالموضوع من ناحيه اخرى لو كانت امك رحمها الله حيه ترزق الان ستفرح لاخيك وتبارك له ولاتنسي انها كانت تريدها لاخيك وايضاً فكري بموقف والدك وكلامك فتح جروحه من جديد وتذكري من عفى واصلح فأجره على الله الله يكتب لكم اللي فيه الخير |
والله مشكله اذا اخوك يحب شمسه ولكن انتى صعبه تجبرين رايك علي اهلك ومن حقك ترفضين المضوع ولكن ابوك واخوك واختك تزرعين مشاكل وامك الله يرحمهااو يسكنهاا فسيح جناته لو القصد ام شمسه كان زين بس انا نظرتى المسامح كريم وامك ماتت واخوك يبي شمسه وبنت عمه وابوك موافق اتمنى انك ماتردينهم وام شمسه يجي يوم تردين كرامت امك ويجي فرصه لا تخفين واتمنى التوفيق للجميع وكلام ام شمسه حق امك كلام حرمه ناقصه ولا عندهاا ذوق
|
الله يهديج ولا رد عاجبنج عيل تبينهم يقولون لا توافقين على زواج أخوج واطلعي من البيت , اخوج من حقه ياخذ اللي اختارها هو مب أنتي حتى لو كانت المرحومه ( الله يرحمها ويرحم جميع موتى المسلمين ) ما تبيها المهم هو اختارها ويمكن تكون بنت حلال مب مثل أمها . |
حبيبتي انتي مكبرة الموضوع ..
تعالي شوفيه من ناحية ثانية .. امك كانت راغبة بهذه البنت لاخوك .. يعني كانت امنية لوالدتك و رب العالمين حقق هالامنية يعني المفروض تفرحي انه امك تحققت امنيتها بعد وفاتها .. ياستي اعتبريها و كانها وصية و تمت نجي لام شمسة .. ياقلبي اننتي .. اذا شمسة اخذت اخوك .. معناها هذه اكبر ضربة لها :) (لام شمسة يعني ) لانها ماكانت موافقة ونفشت ريشها و استعلت و بالنهاية كلام امك هو اللي مشى و فعلا اتزوجها و كلام ام شمسة كله طلع فاشووش :) قد تكون امها مش موافقة على الزواج و ابوها هو اللي موافق و ماشي في الموضوع بموقفك هذا وكانك تأيديها ضد اخوك و ابوك و شمسة و عيلتك و رغبة والدتك الله يرحمها .. اخيرا ياقلبي الحي اولى من الميت و ابوك اولى باحترامك الان .. موقفك هذا ضده ايش معناه ؟؟ وكانك تقولي له انت بلا رأي انت ما تعرف تتصرف ماعندك حكمة ,, ماتحب امي وكمان هددتيه تسيبي البيت .. امااااانة عليك ياقمر في حد تهدد ابوها ؟؟؟؟؟؟؟؟ استهدي بالله و افرحي لاخوك و لزواجه و افرحي لرغبة امك اللي تحققت و افرحي انه كلام زوجة عمك مامشى |
اقتباس:
واخوي مايحب شمسه بنت اختي زينته في عينه .. والا هو متى جافها اصلن او عرف اسمها موب زود العلاقه بينا وبينهم .. انتم تعطون حلول يمكن تكون مقنعه بس اشمعنى هالبنت هالكون كله خلصن البنات ؟؟؟ انا مااسعى لجلب المشاكل لاهلي .. استطيع ان اتركه ان يتزوجها وسأثث له القسم وغيره .. بس ماارح اكون مستانسه .. وهذا اخوي ابا افرح فيه .. مابقالي بهالدنيا غير ذياب وخليفه .. بطي وراح مع امي .. بيحسدوني على اخواني وبياخذون ذياب مني وبيخلونه يعصيني ويجرح امي .. .. انا مابا اتحكم بحد .. انا ماباهم بحياتنا وبس .. كلمه يبقى اثرها ولو تنمسحن عند ناس عند المقصود ماتنمسح .. |
هل أت أختهم الكبيرة ؟
و ماردة فعل ابوك عند رفضك ؟ كلمك بالموضوع , سكت عنك؟ |
اقتباس:
الله يرحمج يايمه .. اشكرج على الرد ماقصرتي في المحاوله .. ربي يحفظج يالغاليه .. امي انجرحت .. وثمن جرحها هو انه هالشي مايتم .. كنت اتمنى احد يقولي من حقج تردين حق امج .. بس موب بهالطريقه اللي طرحتيها اختي .. هالطريقه لا .. لانه هم ماخلوها تكمل فرحتها .. جرحوها .. تعرفين شو يعني امج تنجرح جدامج .. الله لايراويج بس وانا موب من حقي اهدد جدام ابوي .. بس انا كنت مضايجه وايد ووايد كلام بقلبي كنت بفجره بس ماقدرت .. |
وووووالله زعلت على موضوعك كتيييييييييير يمكن انا ما حسيت بالي حسيتي بيه بس انا كصبية حاسة فيكي من ناحية امك ومقدرة زعلك عليها ومعك حق انا بسامح اي حد غلط بحقي بس بحق اهلي مستحيل بس الي بحكي انه البنت ما دخلها يمكن تكون بتجرح زي امها ما هي البنت مين رباها مش امها؟؟؟؟؟؟؟؟؟؟؟ازا امها ما بتبينلها الصح والغلط من التصرفات كيف بدها تعمل الصح؟؟؟؟؟؟؟؟؟؟؟بالنهاية هي شابة واكيد حتغلط فاحتمال تكون زي امها كبير ويمكن لا ما تكون .....انا ما راح انصحك غير انك تستخيري وتدعي ربنا ازا مافي خير بهالموضوع يبعده عن اخوكي وازا في خير يهديكي عشان ينسعدوا .........من ناحية تانية ما تزعلي مني امك الله يحرمها كانت حابة هالبنت لابنها بالرغم من انه امها جرحتها ففكري شوي بالموضوع بعقلك مو بقلبك وعشان امك.......وبالاول والاخير استخيري الله يسرلكوا امركوا يارب بجد كتير زعلانة ومضايقة لما قرأت موضوعك بس حبيت ادعيلك الله يرحم امك يارب ويصبرك ويقويكي عالصح ياااااااااااااااااااااااااارب موفقة
|
اقتباس:
بليز اخويه .. اذا انت امك اماراتيه وقبليه راح تعرف شقايل الأمهات الامارتيات يجرحون الغريبه من الدار .. فاتمنى تقدر ولاتكون قاسي .. لاني بديت اجوف شي مايسر من الردود وحاسه اني استعجلت اني افضفض اهني .. بالرغم اني سرت ازور امي واخوي بس ماقدرت ازعجهم بهالكلام .. يلست اقرى القران وماتيسر ويلست اصيح بحرقه .. وبدون صوت علشان الملائكه ماتعذبهم . .. انا هالفتره احس نفسي ضعيفه ومحتاجه لكمله منكم تقويني .. موب الكل ضدي .. فكروا بامي شوي شوي بسسسسسسسسس شويه |
اقتباس:
ساعات تمر عليه ليالي محتاجه امي الحين .. اقعد ارددها مثل الياهله اللي مضيعه امها محتاجتنها واايد اباها تنصحني شو اسوي .. ابا اقولها اماايه شوري عليا لاني صج ضايعه .. الناس مستهينه بالموضوع ونست انج انجرحتي في يوم .. بس انا مانسيت والله مانسيت .. واليوم يبون السعاده على حساب جرحج .. هالشي حرام .. المفروض اكتب بالعنوان قسوة الزمن والناس |
ما راح اقول لك تقبلي الموضوع والخ... لاني شايفتك رافضه و معنده رغم ان هذا هو المنطق بس احيان كثير تكون تصرفاتنا ابعد ما تكون عنه ولان اضن لو انا مكانك نفس الشي ماراح ارضى ..
خلك رافضه بس ان صار موضوع اخوك لاتخرجين والا شي لانك بهالطريقه اشوف ان موقفك صار مب حلو! وش بيقولون عليك اولا خرجت من بيتها؟ وثانيا بينتي لهم ان ما لك كلمة عند اهلك ، ثالثاً حتضايقي ابوك ووقت ما تتقابلي مع مرت عمك قولي لها ما شاء الله كلام امي يمشي حتى وهي تحت التراب (:،، ياشيخه الكلام ينرد عليه بكلام ومثل ما قالت اخيتنا الي فوق امكن ماخذينها غصب عنها D: نهايةً الله يرحم امك واخوك ويسكنهم فسيح جناته وجميع اموات المسلمين.. ...' |
اقتباس:
بالله عليكي طولي بالك يا حبيبتي الله يعوضك خير لانك لسة بتفكري بامك واحساسها رغم انها متوفية الله يرحمها شوفي بجد انا كتيييييييييير متعاطفة معك وبكرر صلي استخارة وضلك ادعي ربنا يفوقك للي فيه خير ويسر امرك من غير ما تشترطي الي بدك اياه........رغم انك حاسة بامك وجرحها لكن مش هادا الشي الي حيبسطها دعائك الها حبك الها وتتصدقي عنها هاي راح توصلها وتصلي رحمها الي كانت توصلهم مش هي كانت تقلك رحمكوا وهيك يبقى لازم توصليهم رغم جرحها صدقي امك راح ترتاح ......مرة سمعت لشيخ اسمه معتز هيك شي هادا مصري وتأثرت بجد لكلامه حكى كيف نبر اهلينا حتى لما يتوفوا انك تدعيلهم وتتصدقي عنهم وتصلي رحمهم الي كانوا يصلوهم وهما احياء عشان هيك بقلهم حاولي تعملي هالشي وهي راح ترتاح وتنبسط صدقيني حاولي قد ما تقدري بعرف هالشي صعب لكن حاولي برضو عشان امك ......الله يرحمها يارب قلبي موجوع على احساسك بجد بس لازم تكوني اقوى عشان هي ما تزعل وتعملي الحجات الحلوة الي كانت متأملة منك تعمليها زي ما بقلك .......الله يرحمها يارب ويصبرك ويعينك ويقويكي دعوة من قلبي بجد الك الله يحميكي ويعينك عالصح يااااااااااااااااااارب |
اقتباس:
احسنتي اختي جمانه .. وربي يحفظلج غاليج الغاليه .. |
اعذروني اللي مارديت عليهم
راح ارد على مداخلتكم الطيبه لي بالموضوع . |
يا اخت روضه الله يسعدك مو قصدي يكون ارد كلمات قاسيه ولكن فيه مثل قديم يقول ( لا تاحسب الناس بغلطة جاهل) ام شمسه الذي سببت فتنه وكلامهاا ضايع والضايع الناس معليهاا منه والله يكتب الخير
|
اقتباس:
يــــــــــــوووه عيل ليش رديت دامج عارفة بردي :d...!! ,، أختيه إنتي طلبتي الشــــــــــــــــــور ونحن عطيناج إياه .. وأميه (الله يشافيها ويعافيها) كباقي الحريم عندها حساسيات مع حريم بالحارة .. بس أني لو لقيتهن هل بعطيهن الظهر وما بكلمهن بس لأنه أميه عندهي مشاكل معهن ...!! ولا بحارب بناتهن على جرم ما سوونه ..!! يختيه هذا رايي وأعرف آرائيه ما تعيييبك .. بس حبيت أرد ع كلامج والسموحــــة ... ســلام : ) |
اقتباس:
الله يهداج بس شوفي بكون صريح وياج أمي اماراتيه أباً عن جد :d وعندنا مستحيل الواحد ياخذ من برع يعني حتى لو أمارتيه ولو فكر فينا الواحد يتزوج من برع ولا احد يعترف بالزوجه الثانيه واذا جابت عيال لازم يكونون عند الاولى لانهم ما يعترفون بتربية الثانيه او الثانيه تعيش عند الاولى وما لها اي سلطه ولا تنطق بحرف غير انها تشوف اولادها تحت نظر الاولى :11: ادريبه غلط وبعد ظلم وبعض الشباب اللي تزوجوا بدوا يحاولون يغيرون هالشيء بس بصعوبه ويتعبون بداية حياتهم . وافتخري بامج لو شو ما كانت جنسيتها كافي انها أمج وعرفت تربيكم ودليل أخوج المرحوم كان طيار والبجيه فيهم خير . وزواج اخوج من بنت عمج صديقيني مب لازم البنت تكون مثل أمها ممكن تكون طيبه وتحبكم وتحبونها والدليل انها موافقه على أخوج. السموحه اذا غلط بشيء |
السلام عليكم
اختي الكريمة رحم الله امك واسكنها فسيح جناته تروي اختي في هذه المسألة ولو انا مكانك لأنفذ رغبة امي واكسر كلمة زوجة عمي ويوم ما تملكون وتعقدون قرانها اذكري ذاك الموقف وان كلمة امك هي اللي صارت وانه شمسه لذياب كما قالت المرحومة وانه ما خذها ولد الحسب والنسب كما رغبت زوجة عمك بل اخذها من هو احسن ذياب ابن ام ذياب رحمها الله القلب وما يهوى يا عزيزتي فلعل اخوك يحبها ويرغبها زوجة فلا تكوني انت اخته واعز الناس اليه من يقف في طريقه ويمنعه عن حب حياته لانه يوما ما سيتذكر هذا الموقف ولن يسامحك وكذلك لن ينسى لك وقفته معه في حال انت من خطبتيها له واسعدتيه بها ولولا امك كانت تحبها وترغب بها زوجة لابنها لما قالت تلك الكلمة امام الجموع، فكوني ملبية لرغبتها وكاسرة لكلمة زوجة عمك ومفرحة لقلب اخيك ولو تركت رغبة الانتقام لله سيعوضك باذنه تعالى ويشفي قلبك بالتوفيق اختي واصبري على هذا الموقف ثبتك الله واعانك |
الموت.
الموت حدث يهز الوجدان حتى لو كان الميت غريباً عنا لا نعرفه فكيف عندما يكون الميت قريب لنا وقد قيل كفى بالموت واعظا عزيزتي روضة حرّي بنا أن نتوقف عند الموت لنتفكر كم هي الدنيا حقيرة لا تساوي شيء فعلام الانتقام والحقد؟؟؟ نهايتنا الموت لنقف امام جبار السموات والأرض فيقتص لنا ممن ظلمنا هل تظنين أن أمك ستكون سعيدة عندما تقفين أمام زواج أخيك انتصارا لها؟؟ لا أظن ذلك فلن يفيدها هذا في قبرها دعيها تأخذ حقها حسنات يوم القيامة يقال ان احد السلف اغتابه شخص في مجلس فوصله ذلك فذهب إليه وهو يحمل بين يديه صحن ملئ بالرطب فقالوا له يغتابك فتهديه رطب !! قال نعم فقد أهداني أغلى منها لقد أهداني حسناته ولو كنت أملك ماهو أغلى من التمر لأهديته روضة ما ضر أمك لمز ام شمسه لها بل هي حسنات تتقاضها منها يوم القيامة او سيئات تطرحها عليها فلا تشغلي بالك وإلتفت لما هو أهم فالدنيا قصيرة وغدا يقال فلانة ماتت فاحرصي ألا تكوني ظالمة وتحاسبي شمسه بجريرة أمها واشغلي وقتك بما يسرك ان تلقيه يوم القيامة موفقة |
اقتباس:
بس ماعليه .. الله يسامحج واشكرج على ردج وانا ماطرحت الموضوع لاني ابا رآآي انا ابا دعوة اخت واخو لاختهم بظهر الغيب والحياه مستمره |
اقتباس:
مستحيل اماراتيه ترضى بهالنج وهالمنطق .. مستحيل والله .. وهذا ظلم بعينه .. لا هذا يسمونه تخلف .. الله يعين امك بس.. شو وداها هناك .. لو هي يالسه بالدار من غير نصيب ابركلها والله اتوقع امك الثانيه من جي .. مالها كلمه على عيالها.. وانا افتخر بامي منوه قالك ماافتخر بالعكس هالشي تاج على راسي .. وبعدين بخصوص شمسه اكيد بتوافق على اخوي وين يحصلها شاب شرات اخويه .. اكيد بتوافق وبتربع ورااه . اكيد بنت عمي بتربع ورى اخوي .. بتربع وتتمنى رضاه بعد .. بس خل تلعب بعيد عن ذياب .. بعيد هي وامها .. وبعدين ذياب اهتمام هالشي ذياب يحب يسافر يطلع مع ربعه وجي يروح يلعب بتل مرعب وتقحيص وسوالف البحر ودرجات المائيه وغيره متى فكر في بنت عمي او حتى جافها ذياب ماجفاها عشان يحبها كله من بنت اختي شكلها من كثر ماتحب عمتها شمسه قالت بزينه في عين خالي والله مااسامحها اذا كشفت انها ورى السالفه .. مستحيل اخوي عمره ماجاف شمسه عمره .. كيف .. يستوي جي ومتى.. وبعدين يحب مستحيل يحب متى جافها اصلن عشاان يحب توه اول سنه جامعه .. خلي يكمل وتالي يصير خير .. بس زواج مستحيل قبل لا يعتمد على نفسه بعد الزوجه لها متطلبات بالحياه موب اكل ومرعى في البيت والا ان شالله بيصرف عليها من 4000 اللي ينزلوله من الحكومه لانه يدرس بالجيش ... مستحيل لازم يركز بدراسته ومستقبله وعقب مايتفرغ من دورات والبعثات خل يفكر بالزواج ويصير خير عقبها بنجوف موضوعه مع شمسه .. خل يكون نفسه بس انه تدخل شمسه وامها والحين بعز دراسته وفوقها اهانه امي بكلمه ام شمسه .. هم بيخربون حياته جي وانا مابا اقعد متفرجه لاحق على الزواج لاحق .. ..واكبر اهانه لامي اذا تم هالشي اكبر اهانه بتخليه ذياب يخسر اخته واللي فيها فيها ... |
اقتباس:
ليش تسمينه انتقام .. ليش ماتقولين اني ابا اسكر الباب بينا وبينهم وبس .. مابا شي يربطنا فيهم ..اختي من تطلقت من ولدهم وتزوجت عايشه حياتها ومرتاحه .. خلاص مانبا شي منهم.. كل اللي اباه يخلون اخوي في حاله .. راح اوقف بويه الناس كلها ولا اسمح بهالشي يتم وانا ماطرحت الموضوع عشان اسمع هالردود لاني متاكده لو صارلكم الموقف راح تغيرون رايكم وتوافقوني الراي .. انا وحده م شهدت الموقف مع حرمه عمي وامي كنت معاهم ومع خواتي .. وجفت النظره بعين امي وجفت نظره انكسار من كلمه واحراج .. الكلمه لو انقالت بسبيل المزاح كانت مابتنرسم هالنظره بعيون امي .. بس مثل ماانحرجت امي بوسط معازيم ام شمسه.. خل ارد بحق ذاك .. بحق ذيج الساعه . بحق لحظه اللي عاشتها امي بينها وبين نفسها بدخلها وسط هالناس اذا تم الزواج معناته كان امي مفشلتهم .. لامنه عقب هذاك اليوم محد تكلم وقال ذياب لشمسه الا بعد وفاتهم .. بس يوم ماتت خلاص ماراح تفشلهم لانها مااتت وراحت من الدنيا يعني ماراح يطرونها حتى بينهم وبين نفسهم.. ماارح تكون بوسطهم وتذكرهم انها موب منهم وفيهم.. من جي بياخذون ولدها على حساب جرحها .. لو مخلينها تفرح بس . لو ماجرحتها والله كانت الدنيا بخير بس معاهم الدنيا عمرها مابتكون بخير اشكرج عزيزتي الغاليه على مرورج . |
اقتباس:
أستهزأ بج ..!! :eek: لا يختيييه وربي هذي لهجتيه .. بس ما أكتبها إلا للي يفهمهـــا .. ومثل ما شايفة المنتدى مليان لهجات وأحاول أكتب بلهجة وسط عشان الكل يفهم .. عموما الله يســـــــــــامح الجميــــــــــــــع .. ,، ربي وفــق أختي لمرضــــــــــااتك واكشف عنها كل هم وغم يعتلج بصدرهــا .. اللهم نسألك الهداية واشغلنا بذكرك وبالوجل منك وارزقنا قوة لطاعتك وللتمسك بأحب السبل لديك .. ,، |
اقتباس:
هم .. وانا ماابا تربطنا فيهم علاقه وشمسه الله يرزقها مابيقطع نصيبها لو ماتزوجت اخوي بس انت ادعي الله يهدي اخوي ذياب ويفكنا من شمسه وامها . |
اقتباس:
بدوي راقي .. احسنت بوصف المثل ... واشكرك على مرورك.. ماقصرت اخويه |
عزيزتي،،
تعلمين كم أودك وكم أحترمك وكم أحبك رغم تواجدي القليل في المنتدى حاولت أن لا أرد على موضوعك هذا حتى لا تتضايقي من كلامي ولم أتعود إلا أن أقول الحقيقة عزيزتي،، أنتي ما زلت في حالة نفسية يعلمها الله بسبب فقدك لأمك وأخيك أنصحك بأن تكتبي موضوع في قسم "ساعدني" للوالد المستشار "رجل الرجال" وستتغيري كثيراً وسترتاحي أكثر صدقيني ،،،،،،،،،،،،، نأتي للموضوع،، هل من المعقول أن يكون كل الأعضاء الكرام المشهود لهم بسدادة الرأي مخطئون؟؟؟؟؟ جميعهم مخطئون!!!!!!!!! فكري يا غاليتي أنت بعنادك هذا ستخسرين والدك وأخوك ماذا ستكون ردة فعلك إن تزوج والدك يوماً ما وهو حقه شرعاً وعرفاً؟؟؟؟؟؟؟؟؟؟؟ أعلم أنني أصدمك بهذه الجملة،، لكن الحياة فيها أخذ وعطاء أكبر انتصار لأمك رحمها الله أن يأخذ من اختارتها هي لو مكانك أرمي كلام لوالدتها ،،،،،،،،،، أرجو أن تتقبلي كلامي |
اقتباس:
أقول انتي مب عارفه شو تقولين اول شيء قلتي اقتباس:
اقتباس:
شو التناقض اللي عايشه فيه انتي ولا أحد عاجبج على العموم الله يستر عليج ونسيت أعلمج امي الاولى ومن الامارتيات اللي ما يحبون الغريبه أبد :22: |
اقتباس:
انا موب اكبر وحده رد ابوي ابويه يوم كان موجود معاي في الصاله وذياب موجود وخليفه موجود واحده من خواتي كانت موجوده وقتها قال الله يوفجهن وهاي بنت عمه .... وبعدين ابوي يبا شمسه لانه بنت اخوه لااكثر .. اختي قالت الله يوفجهم . يوم رديت عليهم وكنت مضايجه وفيني صيحه قلت اذا تم هالزواج ويهي مابجوفونه في البيت .. واللي فيها فيها اكثر من جي ماراح اسككت عنكم تهينون اماااه بقبرها وتنسون وجودها .. اللي ردت امايه وكسرت بخاطرها تخسي نتشرف فيها وفي بنتها .. وذياب عصب .. بس ماسك عمره ماتكلم عشان مايزيد النار حطب .. وقلت لذياب هاي امك اللي خطبتلك احرجوها عند الناس واليوم تبا بنتهم ومتى جفت شمسه عشان تقول اباها .. اختي قالت استغفر الله العظيم.. ابوي ماقال شي يلس ساكت ويطالع تحت .. خليفه كان ساكت ماقال شي .. وانا صعدت حجرتي فوق .. |
اقتباس:
هي تناقض اخي العزيز قلتلك اذا امك اماراتيه وانت قلت امك اماارتيه .. وبعدين قلتلك كيف اماراتيه وترضى بهالنج اللي طريته انت وانت ماقلت امك الاولى او الثانيه اكتفيت بكلامك انها اماراتيه وشرحت وضعكم شكله التناقض بردك الحين موب بردي .... لانك موب مركز وانت تقرى وماقصرت الله يحفظك ان شالله خالفتي السهاله |
اقتباس:
الغاليه نور فلسطين افرح يوم اجوف ردج بين ردود الاخوات والاخوان .. بس الغاليه انا فكرت بطرح المشكله لاخوي رجل الرجال وامس بالذات .. بس لاحظت انه مايشاركني بمواضيعي ويقول رايه بالرغم انه يكتب رده لاعضاء من غير لايطلبون مشورته فليش اطلب شوره لانه اذا كان رد بموضوع من مواضيعي ساعتها بقول انه يهمة مواضيعي بس دام مايهمه مايجوف شر ولو كان يبا يفيدني كان شاركني على الاقل بموضوع واحد من مواضيعي بس ماجفتله اي بصمه والله يحفظه معذوور لانشغاله .. وبخصوص ماطرحته عزيزتي فانا على يقين انه والدي لايرغب بالزواج .. ومستحيل ان يتزوج... وانا مااقول وجة نظر الاعضاء غلط انا اقووول هم ماشهدوا الموقف ولاصارلهم هالشي بس لو انه الموضوع يخصهم صدقيني بتكون لهم وجهة نظر ثانيه وعزيزتي انا هني كتبت فضفضه يعني ابا افضفض .. اقول اللي بخاطري وبس بالرغم من تمسكي برأي ... انا احترم وجه نظر الاعضاء لو دعوة طيبه بظهر الغيب من كل عضو .. انه الله يهدي ذياب اخوي لي ويخليه |
اقتباس:
ماقصرتي عزيزتي على النصيحه الطيبه والله يحفظج الغاليه .. وبالفعل موب حلوة مني اطلع واسكن في بيتنا الجديم .. بس موب مشكله ان شالله مايتم هالشي لاني مااقدر اطلع جي والا جي خليفه عندي بالدنيا .. ومااب اخلي الجمل بما حمل لشمسه بسلامتها .. وذياب الله يهديه ويكمل دراسته ويكون مستقبله ولاحق على هالموضوع |
| الساعة الآن 08:59 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©