|
المهر
السلام عليكم
حبيت اسأل المهر 30 ألف تكفي او لا ؟ وش المهر المناسب اذا كان الراتب 5000 تقريبا انا مابي اضيق ع الرجال بالمهر 30 الف تكفي او 25 الف |
عزيزتي
جوفي القانون شو مسموح فيه حسب علمي القانون يقول .. المقدم 20 الف والمؤخر 30 الف واحسبي غير الشبكه والفستان وتعديله العروس ومالخ .. لاادخلينها ب 20 الف .. جوفي ابوج لازم يمشي على القآنون شو يقول ..او اقل من اللي حددته الدوله لكم .. وبعدين ان شالله صندوق الزواج بيساعدكم بنزله مبلغ حلو 70 الف .. اذا كان عمرج فوق 20 وعمره فوق 20 وبعدين لاتكثرين في الزهبه اشتري من كل شي مجموعه بسيطه ولاتنسين بتوصلج هدايا وغيره فحرام الواحد يكثر واهم شي انج راضيه بالزوج هذي بروحها جم تسوى في الدنيا .. وكل ماكان شي بسيط كان فيهآآ بركه والله يجمعكم على خير |
المهر يختلف من دولة لدولة و من طبقة اجتماعية لطبقة اجتماعية اخرى...
قد تقول احداهن انه لن يكفيك شئيا... خااااااصة اذا كانت من دولة الإمارات... لأن المتعارف عندنا في الإمارات حسب ما حدده الشيخ زايد رحمه الله 50 ألف درهم متفرقة بين مقدم و مؤخر... بعض العوائل تقوم بتجهيز الفتاة من هذا المهر... يعني المهر يشمل الذهب و تجهيز الفتاة.... بين بعض العوائل الأخرى يكون المهر شاملا لتجهيز الفتاة و الذهب و القاعه و فستان الزفاف و الكوشة... يعني كل ما يتعلق بالزفاف يكون من ضمن المهر.. فيكون المبلغ طبعا أكبر من 50 ألف درهم أختي نصيحة لك... لا يعني انك ستتزوجين ان تشتري العديييييييييييييد من الثياب و الأحذية و الحقائب و العطور... فأنت لن تختفي... و زوجك ان شاء الله لن يحبسك في المنزل و يمنعك عن الخروج... قد يقول البعض عروس و يجب ان تشتري... و لكن فكري قليلا... المقاسات تختلف أحيانا... الموديلات و تتغير... لما إذا الإسراف؟ المبلغ الذي طلبتيه يكفيك ان شاء الله.... زوجة اخي (و انا من الإمارات) كان مهرها 45 ألف درهم يشمل تجهيزها و ذهبها و فستانها... أخي لم يدفع إلا لقاعة الزفاف و للكوشة فقط... و الحمدلله لم تشتكي من شيء... |
صح كلام الاخت اللي فوقي . بس 45 الف ماتكفي ابصراحه امآآنتن لو بنتكلم بالحق ..
شو بيسونلج 45 الف ومع فستان وكوشه ابصراحه مااتخيل اذا العرس يكلف 500/700 الف . ومهر العروس بروحه 120 الف .. طبعن وصيه زايد الله يرحمه 20 مقدم 30 مؤخر .. والله يوفج اليمميع .. بس لو تكلمنا عن فستان وكوشه وهالامور 45 الف باعتبار ماعرست ابصراحه لانه الاسعار غاليه هني موب شويه الغاليه 45 الف على شو بتوزيعنها .. شبكه ماتقل عن 20 الف اقل فستان 10الاف او 8 اقل شي وغير العبي والدق ولامخور والمغربيه والثياب وشنط ونعوول وكريمات وثياب الطلعه وبدل ....اللخ مستحيل 45 الف تكفي وخواتي عرسن والمهر 120 والحمدلله كفى بالضبط فمابالج ب 45 يعني يادوب تكفي حق لبستين لبستين من كل شي .. وانتي عروس والعروس تاخذ حقها مكمل وكامل |
حبيبتي روضة... فاهمه عليج... لهاالسبب انا قلت كل مجتمع يفرق عن الثاني... و بعدين معروف اسعار بوظبي عاليه.... الله يوفق كل من يتزوج ان شاء الله...
الإخت أظن من السعودية و ما عنده الأرقام الخيالية اللي عندنا في الإمارات... |
أنا اخوي قاعتين و العرس مع المهر حفلة الملجة و مع السفر كلللللللللللها 220 الف...
ترى القاعات اسعارها تختلف من مكان لثاني.... يعني يفرق المبلغ من منطقه لغيرها... |
الغاليه القاعه بستين بدون العشااء والكوشه .. غير الفرقه وزهبة العرووس ف ماادري كيف رتبوتها
وماله علاقه بالزهبه بس موب معقوله 45 كفتكم .. كل شي غالي هني كيف رتبتيها الذهب اقل شبكه 20 الف ياربيه تكلمي بشي مقنع وغير فستان ايجار موب اقل عن 8000 او 7000 وكيف بالنسبه للدق والمخور والعبي وباقي امورج وثيابج بكل انواعها وكريمات وعطوورات...؟؟؟؟؟؟ موب معقوله كفتج 45 وانتي عروس ماصفالج الا 15 اذا شليتي الشبكه ب 20 باعتابر ماعرستي .. على العموم بالتوفيج بس صج شبكه وفستان وزهبه و ب 45 الف .. مستحيل والله نرضى بهالبملغ شامل الامور اللي ذكرتيه . |
تراني قلت لج يختلف من مجتمع لمجتمع....
المهر 45 الف شمل زهبتها و الذهب و الفستان و المكياج... الباقي اخوي دفعه مقسم على حفلة ملجة في البيت مع بوفيه و قاعتين العرس (عرس رجال و حريم) (تشمل كوشة صبابات و دي جي) و سافروا... و ما شا الله تبارك الرحمن.. عرسوا... الكل استغرب من السعر لأن اللي حضر العرس تحراه كلف وايد... و اختي... تراه بعد العرس ما يقصر على حرمته... يعني إذا ما قدرت تاخذ شي للزهبه تقدر تاخذها و هي معرسه.... المغزى من كلامي.... ان الواحد ما يفكر في المهر... و المبلغ العود... لأن السوق ما بيطير يا خواتي... |
يا عزيزاتي السعودية والإمارات والهند ومصر زي بعض
يعني مثلا السعودية بها تضخم مالي منخفض والإمارات بها تضخم مالي مرتفع واليمن بها تضخم مالي مرتفع جدا ( للعلم التضخم مشكلة اقتصادية وليس ميزة) يعني مثلا راتب الشاب بالكويت 800 دينار وراتب الشاب في السعودية 8000 ريال وراتب الشاب في الإمارات 18000 درهم تساوي نفس الشيء يعني مثلا إيجار الشقة بالكويت يختلف عن السعودية ويختلف عن الإمارات بحيث بتساوى مع الدخل بالنسبة لموضوعك أختي أشوف الشباب يبكي ويصيح من المهر ويروح يشتري سيارة تساوي مهر ثلاث زوجات عشان كذا يجب أن تطلبي المهر المتعارف عليه حتى يحترمك لأن رجال أول لا يتكررون بمعنى لا تجد شابة اليوم رجل مثل والدها يقدر ويحترم إلا ما ندر |
صحيح كلامج السوق مايطير غناتي بس انتي تعرفين في مجتمعنا العروس ناس داخلين وناس طالعين وتعالي وفي المنظر عند زوجج
يبالج ستين لبسه في ستين يوم تظهرليله وغير ثياب الدق والمخور والريمبووالمغربيه هالامور وايد مكلفه وتعرفين الخياييط مايتهاونون باالسعار اسعارهم ضاربه على العموم الله يوفجكم ان شالله ويوفج الجميع بالنسبه لخواتي وعيال اختي .. عرستاهم كلفت 360/600 الف لكل واحد فيهم اختي شامل 400 الف تقريبن قولي 300 الف ومن اهلي 100الف فستان العرس على حساب اختي الكبيره دفعتهم هديه لها وامي المرحومه وابوي خذولها طقم الماس مايقارب 35 الف هديه زواجها وبطي المرحوم وذياب خذلوها طقم ب 10 والثانيه بعد كلفها 300 الف .. واهلي زادوها 100الف وعيال اختي كل واحد بما انهم العين كلف فوق 500 الف .. وبالنهايه تختلف من عايله لعايله والله يوفج اليميع |
أختي الكريمه
30 أو 25 تكفي بإذن الله ... وأسالي الله البركه لكن على حسب الأتفاق إذا كان الأتفاق ان هذا المبلغ يصرف على العروس فقط فيكفي أما إذا عليك ألتزامات أخرى في الزواج فلا يكفي موفقه و الف مبروك والفلوس مو كل شي |
مشكوره جيفارا ولكل شي حد
كلكم من الامارات :D ياحبي لهم محد فزع لي الا اهل الامارات انا ارحم الرجال في سالفه المهر مابي اكثر عليه طيب التجهيزات ايش راح تكون مثلا العطور كم عطر ولبس البيت ولبس الطلعات كيف اتصرف اذا كان المهر قليل |
اقتباس:
نيتشه افهم من كلامك اني ما ارحم الشباب ؟ بصراحه المتعارف عليه عندنا مرتفع جدا وانا ما بي احمل الرجال فوق طاقته ولا ابي عرس والفستان بيكون ايجار << مع نفسها محد سامع لها من اهلها اختي تقول ابدا مايككفي :| |
استخدمي شعرة معاوية
|
اقتباس:
ههههه الغاليه حاضرين للطيبين اوكي انتي خذي منه 20 الف بدون الشبكه .. طبعن انتم ماتلبسون دق ومخور ومغربيه وهالأمور صح؟؟ العطور ومكياج واكسسوار وكريمات جسم من بدي شوب وشنط ب 5000 الاف درهم او ريال .. وزعيهم ولاتكثرين شنطين من دبنهامز عطورين ولاتكثرين ترا بتوصلج هدايا بعدين الملابس النوم 2000 درهم او ريال وخذيهم من نعومي او لاسنزاا وقت الخصومات ينزل سعرهم .. العبي 3000 الاف ريال او درهم وحيطيلج عباتين للطلعه طبعن بتكون مسكرات وكاشخاات يعني تروحي معاه مطعم تطلعين تتمشين في المول معاه او كوفي لازم تحرصين تكون كاشخه ومسكره ومن هالامور وعبايه وحده عمليه ..وعبايه للمناسبااات بيصفالج 5000 درهم الروب يبالج 300 ريال من نعومي .ه سعره ثابت الروب .. خذيلج سكيني وقمصان 3 سكيني و6 قمصان بتلبسينهم تحت العباه المسكره يوم تتمشين معاه .. واللي عندج بكبتج جوفينه زين وديه الدوبي يغسله ويكويه وجمعيهم مع الزهبه ؟؟ عندج عبي مرتبه موب مستعلمه وايد او محد جافها عليج خذيها مع العبي يديده .. وخذيلج لبستين حلوات ناعمات ع اكسسوارات الشعر حق يوم حد بييكم وجي .. وغير اللبس اللي متعوديين تلبسيوونه في مجتمعكم لانه بمجتمعنا نلبس الدق والمخور والتلي والمغربيه والطبعه .ونظهر فيها عند العرب بس بالنسبه للعزايم وانتي عروس يبالج لبسه حلوة مثل فستان نااعم واايد هاي ضروريه لانه وقت العزومه بتحتاجينها يالعروس .فانتم بالنسبه لكم مااعرف شو لبسكم الرسمي وخذيه المهم الله يوفجكم لاتكثرين من اي شي لانه لانه هدايا بتوصلج ساعات واكسسوارات وعطورات وغيره وقولي لخواتج الهدايا اللي بيبولج اياها وحق اخوانج كتبي كل شي شو تبينه عشان ماتشترينه من المهر .. يعني حرام تاخذين شي اختج تشتريلج منه فانتي احرصي على هالشي ولله يوفجكم |
ماادري بس شكلي مالي دخل ارد لان احس الموضوع يخص البنات
لاكن انا اشوف في السعودية الطبقة المتوسطه يكفي 40 الف واذا زوجك عنده فلوس زايده اتوقع ماراح يصرفها على نفسه ويخليك يعني اللي توفرينه عليه راح تحصلينه بعدين والله يوفقك وحنا بعد الله يوفقنا |
حسب المجتمع بالنسبة عندنا في السعوديه مو بالضرورة نعمل كوشة فيه بعض القاعات مجهزة اروع تجهيز في المقابل الاحظ اغلبية الاخوات الاماراتيات يفصلون فستان الزواج و عندنا بدون شك فيه فئة تفضل التفصيل لكن هناك التأجير غير الملبوس يعني يوصل للمحل و تكوني اول وحدة تلبسه طبعا السعر اعلى من المستأجر الملبوس شغلة ثانيه عندنا بعض الأسر حفلة الملكة او ما تسمى بالشبكة تكون على اهل البنت بالتالي تخف التكاليف على الزوج طبعا جاوبت من وجهة نظري كسعوديه لكن بيختلف الوضع اذا كنتي من الامارات و مقدما الف مبروك و الله يتمم على خير |
والله ياقلبي على حسب انتي شو تحبي تشتري انا اخده 50 بدون شبكه والشبكه بتكون ب10 او 15
بنت خالتي اخدت مهر35 وشبكه ب20 ومهرها كفاها والحمدلله اهم شي تنزلي وقت التخفيضات موشرط تاخدي كل الملابس الداخليه من نعومي في اماكن عاديه عندها اشياء روعه لان حتملي وتغيري بعد الزواج عشان كدا لاتكتري من الغالي وكمان الملابس لاتكتري ما تتدري ممكن تحملي على طول وماتلبسيهم >> صار مع صحبتي ولاتهنت فيهم هههههه وربنا يوفقك ياقلبي |
حبيت أضيف حديث المصطفى الأكرم : " أقلكن مهــــــــــورا أكثركن بركـــة " أنتِ أدرى بالمستوى المادي لخطيبك .. وهل إنتي على استعداد تبدين حياتك بديــــــــــــــون؟؟ شوفي كيف عاداتكم بالزواج .. ليلة الزفاف والقاعة والعشا من مهرك أم من عندهم..؟؟ ترا من مجتمع لمجتمع يختلف بالبلد نفسه ... فكيف من بلد لبلد ؟!! ما ضروري اللي تشريه كله ماركـــة ..!! من اكسسورات وملابس وعبايات وحتى ملابس النـــــــــوم ما ضروري كلها من نعومي ..!! لأنه بعد الزواج راح تعرفي أكثر شو يحبه وشو يعجبه من الملابس ..!! الذهب ... طبيعي راح تحصلين هدايا وأطقم من الأهل ..!! القاعة أو الخيمة حسب عوايدكم .. ما ضروري كوشة وحركات مبالغ فيها .. ,، مهري ما تجاوز 50 والحمد لله تبقى منه .. وإن شاء الله ناوية من المبلغ المتبقي أروح به الحج (اللهم بلغني حج بيتك الحرام بهذا العام ) .. ,، ربي يسعدك الغالية ويتمم أموركم على خير إن شاء الله .. وإن احتجتي لأي مساعدة نحن بالخدمة ^.^ ,، |
عزيزتي لو كنتِ من السعوديه ,,
حتى احنا عندنا لكل منطقه عادات معينه في المنطقه الغربيه اللي انتمى لها المتوسط من 30 لـ 40 الف .. واذا حبو اهل العروسه يدفعو النص في الزواج بيكون من حساب الأب مو من المهر ,,, لكن مثل مااسمع في مناطق الجنوب توصل المهور قريب 100 ألف !!! وماادري عن أهل نجد ياليت احد يجي ويوضحلنا بالنسبه لعاداتهم لكن صدقيني 25 او 30 تكفيكِ بالراحه ان شاء الله اشتري شي معتدل واهم شي الذوق مو مهم قيمة الشي غالي او رخيص في تقسيمات كثير للمهر دوري وشوفي المناسب لكِ سويه لكن لاتكلفي على الزوج لسه وراه شقه وفرشها وتكاليف الزواج واذا حبيتو تروحو شهر عسل وانا أفضــل لاتشترطي المهر هو وذوقه اللي يجيبه خير وبركه وأتجهزي على قد الشي الا بيعطيكِ هو !! والله يوفقك ويسعدك وييسرلك زواجك يارب |
اقتباس:
تصحيح لمعلومتج اختي الكريمه انا اختي فستانها من زهير مراد موب ملبوس يديد نازل من لبنان ايجاره الليله 25 الف درهم وماجفت اي بنت تفصل فستان زواج في الامارات كلنا ايجار .. عند مصممين .. وكل بنات الاهل والجيران جي ايجار وموب تفصيل تفصيل فستان يكلف فوق 45 الف والايجار على حسب فستاان |
^
أهاا عيل جذيه عندكم بروح اشتري اراضي اتاجر فيهم ازين:d |
أختي من 30 إلى 35 ألف ريال كافية إن شاء الله
نصيحتي لك لاتُثقلي كاهل زوجك بالديون التي سوف ئؤثر على حياتك الزوجية , خلي نظرك بعيد وفكري بالمستقبل , أعرف أحد الأشخاص قبل 8 سنوات دفع مهر 75 ألف ريال وحصلت بينه وبين زوجته مشكله وقال لها أنا دافع فيك 75 ألف ريال يعني شاريك , المهم أنه رفض أن يطلقها إلا بعد إسترجاع المبلغ والذي تحمله والد الفتاه حيث باع أرض حتى يتحصل على المبلغ . |
على ححسب وضعك انتي في ناس مهرهم 30 وكفتهم لان ماتشتري اغراض كثيره جدا خوفا من تغير جسمها بالمستقبل فتخفف يعنى اقصد اشياء سياسيه هى الى بالمقدمات
انا مهري 50 الف وفصلت فستاني عند المصمم تركي جاد الله ب20 الف و كوشه ب10 الالف والباقي قضيت فيه وكفتني براحه بس انا وحده مبذره فتعتمد عليك انتي شخصيا وبالتوفيق ياقلبي |
ماقصروا الاعضااء ...
وحسب اللي يقدمه لك وقادر عليه والأحسن وتقدير لحالته المفرووض يكون بين 30 -50 ... ... حبيبتي نصيحه استغلي وقت التخفيضاااااااااااااااااات ,, ولاتكثري من العطور او اشتري العطور اللي احجامها صغيره لآن رآآح تملي من ريحتهم وممكن بعد ماتعجب زوجك وكمممان راح تجيك هدايااا بالهبل ... امااا المكياج اشتري الاساسيات من ماركات موثوقه ومعرووفه والباقي عايدي من اي محل .. ملآبس البيت نوووعي فيهم وشووفي ذووق زوجك وايش يعجبه وكثري منه .. ملابس الخارجات اشتري فساتين تركيه او لبنانيه اللي تجيك نااعمه وترى اسعااارهااا مره حلووووووه ,, واشتري تيورات فخمه وانيقه .. وعبايتين وطرحتين تكفي .. والشوزات اختاااري اللي ينااسب ذووقك .. وووووووووو نصيحه اذا جاااءك المهر اشتري ظرووف صغيره وقسمي حسب اللي يناسبك مثلا تآخذي ظرف واحد وتكتبي عليه للكوافير وتحطي مبلغ 2000 .. وظرف ثاني واكتبي عليه للفستان وووووو هكذا .. اكتبي في قوقل وشووفي طريقة الصباايا في تقسيمات المهر راح تعجبك حييل ... فالنهاايه أووصيك ياعسل تزيدي شووي من جرعة ثقاافتك في هالفتره وتقرأي كثير عن الحياااااة الزوجيه وافهمي زوووجك واكسبيه .. موفقه ياعروووسه :14::14::14::14::14::14: |
السلام عليكم
نحن جماعتنا(الحضارم) عندنا المهر 20000 ريال وقد يزيد بعض الاحيان والصراحه اهل العروس كمان يجهزوا البنت يمكن بمثل المبلغ هذا لانه وبكل صراحه يجب ان يكون تعاون من الطرفين وحديث النبي صلى الله عليه وسلم في مامعناه اكثرهن بركه ايسرهن مؤنه والصراحه يجب ان لانغالي في المهور حتى تحصل البركه ويحصل العفاف للطرفين والله يوفق الجميع لكل خير |
انا اشوف لآيزيد عن 30 ولآ ينقص عن 20 ,!
يعني الذهب جدآ غالي صاير اقل شي يآخذ منك 15 الف غير الشبكه هذه عندنا حنا ان اهل العروس لزوم يشترون ذهب غير الشبكه ,, فالمهور بختصار صايره ماتكفي يعني اذا راح نتشرط ونحسبهآ مضبوط رآح نقول 50 الف ,, لكن العدل مطلوب انا اخذت من خطيبي السابق عشرين الف واهلي بيزيدوآ ضعفهآ عشان التدبيش ,! الفلوس ما تكفي بس الستر مطلوب والله يعوضنآ خير ,, |
اقلكم مهرا اكثركم بركة رفقا بالرجال يابنات حوى
|
شكرا على تصحيح المعلومه بخصوص تأجير الفساتين
|
اقتباس:
كلمه قلتها واثرت فيني بجد |
اقتباس:
انا فكرت اخذ كل شي على ثنين الا البناطيل وتيشرتات وفساتين وملابس الطلعات ما اخذ كثير يعني 3 تكفي ولا ؟ غير اللي عندي من قبل مالبستها وعطور عندي ما استعملتها واكسسوارات الكماليات يعني عندي وابي يبقى من المهر _ اليوم اسولف مع اختي اقولها ماحب الذهب بقوله لا يجيب لي على طول جتني صواريخ وتكفيخ :S |
اقتباس:
لانه اصلا ماحدد مهر قال كم مهوركم بس انا لو علي قلت له 10 الآف واختي تقول بيستخسر فيك ( اختي متأثره بقصه البيبسي ) وانا فعلا مابي نبدى بديون اطمح لحياه بسييطه بعدين نكون نفسنا ولا ابي عرس بعد اكره العروس اروح اسوي انا عرس :( يبون هم يصلحون لعمرهم ويزفون نفسهم بعد اهم شي انا وهو مانبي ماتقصرين حبيبتي الله يرزقك ويبلغك الحج |
جزاكم الله خير جميعا
|
انا اشوف انو موضوعك دخل في دائره النقاش الا مفيد
طبعا من الاعضاء وليس منك عزيزتي ما اراح اقيم عليك و اقولك اهم شي تكونين مقتنعه بالرجل لكن بكل صدق و امانه اقولك انا انسانه كان مهري 30 الف وكنت متذمره من قلته + الناس ولسانهم الي مايخلص من القيل و القال والف الحمدالله جهزت و احس اني كثرت بعد ومشت اموري ولو تدرين المهر ما استخدمته الا ل الفستان و الحجوزات وكم شغله بسيطه بس ولو تجيني الان ندمانه على تذمري الف الحمدالله نعمه من ربي الله يوفقك |
اقتباس:
ههههه بسيطه يوم صواريخ بسيطه عيل.. عززيتي هالامور ابوج وامج يتفقون عليها وموب انتي يعني الاكيد امج وابووج بيهدونج طقم ذهب او الماس واختج بعد وعماتج وخالاتج كلهم بيهدونج ذهب .. بس هذا مايمنع انج تعارضين الشبكه الرييسيه لاتنسين بتلبسينها يوم الزفه والعرب كلهم بيجوفونها عليج او بتعرضينها بالمقصاار.. لا الغاليه هالموضوع مافيه احب مااحب هذا ذهب ذخر لج .. |
جيفارا
لو تكرمتي .. شو الريمبو و التلي و الطبعة ؟ مع الشكر سلفا . |
المهور تختلف حسب الطبقة الاجتماعيه والبيئه
بالتوفيق |
عندنا ياأهل نجد من 30 _ 50
والزواج على أهل العروس نصيحتي لك , ملابس النوم والبيجامات فيه أشياء حلللوة عند مبارك ستايل وعند الهرم , وبرضو لاسينزا ونعومي بس أسعارهم نااار . خوذي لك كم جلابية وتيورات فخمة . وملابس للبيت وملابس طلعات . العطور لاتكثريين . أنا أحب نكتار لعطور الجسم خصوصا الفراولة مممم والله يوفقك أهم شي لاتفكرين بنظرة الناس لك فكري برضا الله عنك وشوفي اللي ينفعك . |
اقتباس:
|
رد : المهر
شوفي اللي يناسبك ويكون على قد زوجك
لاتفكرين بالناس وكلامهم لان الناس في كلا الحالتين بيتكلمون >>>> من راقب الناس مات هما اهم شي تكوني مقتنعة وبجد لاتكثرين من الملابس وغيره لانك بتملين منه احنا عندنا المهر اللي يجيبه الرجال مافي احد يتشرط وجهاز العروس على ابوها وحتى ذهبها والعريس بس يعطيها طقم ودبلة وفستان او اثنين بس يعني كله على الاب ومهورنا مررة قليلة والحمد لله عايشين ومرتاحين اهم شي الستر والعفاف للبنت والولد والباقي يعتمد على عرف البلد تصدقين انا مهري 500 او 600 ريال سعودي واغلب الناس كذا وبعضهم يزيد وبعضهم ينقص على حسب قدرة الواحد الله يوفقك ويسعدك دنيا وآخرة يارب |
| الساعة الآن 05:49 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©