|
الدنيا بعدها بخير ...
بسم الله الرحمن الرحيم حبيت افاتحكم بموضوع حساس شوي واتمنى اراء وحلول تنفعني مستقبلن .. في قراري هذا .. راح اتركلكم ملاحظات مهمة تدخل في موضوعي الملاحظه امراه ارمله في نهايه الاربيعات من اماراتيه من اصل مصري .. ارمله لديها عاقين واعمارهم 20/22 تسكن في احد المنازل القريبه من منزل شقيقتي في مدينه العين .. الموضوع .. المراه هاي ربت عيالها ايتام وهم صغار في العمر وترملت وماتزوجت بالرغم انه اهلها في بلدهم ترجوها ترد وتعيش معززة مكرمه بحكم انها من الصعيد الاسر اللي فيهم غيره على بناتهم وحميه وناس متفانين بتعاملهم وتربينهم واخلاصهم .. اصرت انها تربي عيالها الايتاام وقالت باجر ذا كبروا ان شالله بينفعوني ... ترملت وزوجه زوجها وابناء زوجها اسكنوا في البيت الكبير وطردوها تسكن بملحق في بيتهم القديم الى ان يتم توزيع التركه .. ويوم تم توزيع التركه طلع لعيالها ورث فضلت ماتستخدمه لين مايكملون السن القانونيه وبفضل الله واخلاص نيتها طلع لها بيت ارامل من الحكومه ونصيبها من الورث اصرفت فيه على عيالها وطلباتهم وفوقه راتب زوجها يمشي نصه بحكم انه متوفي ونص الاخر يروح لابناءه وزوجته الاولى عيالها كملوا السن القانونيه وسلمتهم الورث طبعن سلمتهم بعد مااصروا العيال يحركون فلوس الورث وبنوا بيت كبير ماشالله اخوان اثنين شراكه في البيت امهم قالت لعيالها خلاص بسجل هالبيت الحكومه اللي باسمها باسم عيالها سجلتهم على اساس انهم بيورثونها بعد عمر وهي ماتبا شي من الدنيا غير انه اجوفهم مرتاحين واجروا بيتها مال الارامل اللي باسمها بعد ماحولته باسمهم على اساس يسكنون في بيتهم اليديد .. تخيلوا ياجماعه تزوجوا العيال بخوات في عرس جماعي اختي حتى احضرت العرس.. كثرت مشاكلهم لدرجه انه امهم قروورا يسكنونها بالملحق الخارجي .. الحرمه ماتكلمت عن مشاكل عيالها وشو سو فيها بس الظاهر اللي يجوفونه اهل الفريج ماعرفوا سبب انه امهم تسكن بمحلق بعد هالعمر السالفه كلها يعرفونها اهل الفريج اللي حولهم ومن ضمنهم بيت اختي واللي عرفتنا على الحرمه .. المسكينه والله لو اجوفون ويها سمح مصليه الخمس وخايفه ربها تقول لاختي يليت عيالي ظلوا صغار في حظني وحولي ولاكبروا تقولها بخاطر مكسووور .. انا يلست مع الحرمه في ملجه ولد اختي بس ماكنت انها صاحبه السالفه المعروفه ويوم عرفت انصدمت قلت معقوله .. قالت اختي لاتغرج الحرمه تحب تحضر حلقات ذكر وتروح الاعراس وكله تقعد مع حريم كبار بالسن تسولف وتضحك لانه في النهايه ترجع للمحلق بروحها ولااحد من عيالها يطل عليها ماكله شاربه محتاجه شي ماشي محد يفكر بامه هي اللي كله ادق عليهم وتسالهم وين انتم والمطبخ اذا ادخلت الخدامات يتامرن عليها خلي وماادري شو قالت الام ساكته ماتبا عيالها يودونها العجزة او يحجرون عليها او شي .. من جي تتجنبهم والبنات اللي متزوجين عيالها ايتاام ومتربيات عند عمهن وماصدق عمهن يزوجهن المفروض يكون قلبهم حنون موب متحجر المهم .. انا اقترحت على اختي تسكن عندي . بيتنا كبير وايد والحجر فاضيه والحرمه طيبه وانا قعدت معاها انسانه ذووق انا استأذنت من ابويه في البدايه رفض قال عيالها باجر بيطبون عليكم وببلونا بمشاكلهم فهمته العيال مايسالون عن امهم بس قلته حرمه فلان وكذا كذا كذا الموضوع .. ابويه وافق قالي اذا انتي مقتنعه شاوري خواتج وذياب وجوفوا اللي يناسبكم .. خواتي رحبوا بالفكره وذياب ضحك وقال مافي اي اشكال مرحبابها البيت بيتها .. ياجماعه انا متحمسه واايد للفكره انا قعدت مع الحرمه وربي كلامها كله ذووق وطيبببه وكله تقولي يابنتي وكله تقول لاختي او حق اي بنت يابنتي ياحبيتي الفاظها ذووق خليفه عاد سالفته سالفه. فرح خليفه تحمس وااااايد وقال يوم بتسيرين تكملينها شليني معاج .. حتى يلس يسولف معاي يقولي شو رايج ناثث حجره اختي باثاث يديد وجي ونفرشه ومن هالامور اول مرة اجوف خليفه يفكر صح ويناقشني ويشاركني بموضوع عائلي .. حتى اقترح خليفه انه نيبلها خدامه خاصه قلت مايحتاي عندنا خدامتين والبيت مافي شغل وانا راح اقعد معاها يعني احس شي حلو بيدخل بيتنا .. ان شالله يوم الخميس بسير مع اختي وخليفه وبنفاتحها بالموضوع اختي خبرتها بالموضوع والحرمه استحت وصااحت قالت الحين عيالي ماتحملوني شو ذنبهم البعاد يتحملوني اختي واخت زوجه اختي فهمومها انه الدنيا بخير وانها بترتاح في بوظبي وقالت اختي انتي روحي اذا ماارتحتي ردي بس انا اصريت اسير مع خواتي كلنا ومع خليفه وذياب فضل مايسير عشان مايحتك بعيالها واصلن عيالها ماتفرق معاهم امي مكلمتني اختي انه الحرمه فاتحت عيالها قالت بسير اقعد جم يوم في بوظبي في بيت اختي كل واحد يقولها مايخصني كيفج كانه يبا الفكه ( يوم الخميس بسير ان شالله ) جوفوا انا قررت اعطيها غرفه اختي اللي تحت عشان مااتعبها تركب الدري وبخبر الخدامات انه ي شي تقوله لازم ينفذوونه والله ياجماعه الحرمه طيبه ودخلت قلبي بسوي اي شي عشاان اسعدها خليفه اخوي بيساعدني طيبه ضحت عشان عيالها وعيالها مسكنينها بالملحق حرام عليهم اختي قالت الحرمه مالها حد يعني بترتاح وطمنتني.. يالله فديتكم كل واحد يقولي رايه كيف اتصرف عشااان ماتحس انها غريبه؟؟ .. شو رايكم اخواني وخواتي بالفكره ...؟؟ وشو اقتراحتكم عشاان مااحسسها انها غريبه ؟؟ وشو تنصحوني فيه انا افكر صح او غلط شوروا عليا .. الله يحفظكم |
رد : الدنيا بعدها بخير ...
بارك الله فيك وفي اسرتك وعائلتك واهل ديرتك برمتهم وهذا هو اصلكم واخلاقكم ياأهلنا بالامارات
اعزكم الله كما احببتوا ان تعزوها واكرمكم الله كما احببتوا ان تكرموها ماشاء الله تبارك الله بحق الدنيا لسى بخير الله يكثر من امثالكم يارب ويطول بعمر ابوك على طاعته ويخليكم له ويخليه لكم تبين ماتحسسينها انها غريبه عامليها على انها امك واختك هذه الخلاصه والله يوفقكم لهذا الخير |
رد : الدنيا بعدها بخير ...
اقتباس:
يزاج الله خير اختي العصفورة والله لو اجوفنيها بتسوين المستحيل عشاان اجوفين ابتسامتها طيبه واايد معقوله بعد هالعمر تخاف عيالها يفرونها بالعجزة وضحت بشبابها عشان تربيهم ورفضت ترجع لبلدها عشاان مايتبهدلون عيالها وانا اقول جي بعاملها شرات اختي الكبيره عشان ماحسسها غريبه لا بعاملها شرات خالتي مع انه ماعندي خالات بعالمها شرات عمتي المه مااحسسها انها غريبه وانا متشوق اروح مع خاوتي وانيبها طيبه ملاك بس ان شالله اقدر اسعدها وترتاح عندنا |
رد : الدنيا بعدها بخير ...
كتب الله لكم اجر هذا الحديث
حدثنا عبد الله بن مسلمة بن قعنب حدثنا مالك عن ثور بن زيد عن أبي الغيث عن أبي هريرة عن النبي صلى الله عليه وسلم قال الساعي على الأرملة والمسكين كالمجاهد في سبيل الله وأحسبه قال وكالقائم لا يفتر وكالصائم لا يفطر دعواتي لكم بالتوفيق |
رد : الدنيا بعدها بخير ...
انا افكر صح او غلط شوروا عليا .. الله يحفظكم
انتي الله يحفظك تفكيرك صح مليون بالمية جزاك الله كل الخير .. حرمة وحيدة قسى عليها الزمن وقسوا الله يجعلها بركة عليكم تدخل الفرح الى قلوبكم جميعا خاصة انت وخليفة بارك الله فيك وفي اهلك وجزاكم الله كل الصحة والعافية والراحة والطمانينة والله يا اختي اني احبك في الله وانا معك :22::22: |
رد : الدنيا بعدها بخير ...
اقتباس:
اشكرج عزيزتي ودعواتج لي بالتوفيق واذا عندج حلول او مقترحااات عشان اسعدها خبروني لاني اباها تحس بامان ومابا تحس انه غريبه وتستحي |
رد : الدنيا بعدها بخير ...
بالرغم من انني مافهمت سوى النزر القليل من الموضوع بسبب انك مطتوب بلهجة امارتية
فانها فكرة رائعة الله سبحانه هو الواحد القادر على احسانكم و جزائكم و ان يرد لكم الخير باحين منه و ما جزاء الاحسان عند الله سوى الاحسان و في كل كبد رطب صدقة |
رد : الدنيا بعدها بخير ...
شوفي رايي انكم تاثثولها الغرفة الى طبعا كما قلتي في الطابق الارضي حتى لا تتعب من الدرج باثاث جديد وما دامكم مرتاحين ماديا ماعليهش لو يكون الاثاث فخم قليلا هههههههه اظن فهمتيني والفرش فرش عرايس حتى تحس انه مرحب بها اجمل واحلى ترحيب وحتى يطيب خاطرها بعد ما اسكنوها عيالها المجمع الله لا يسامحهم
وقوليلها انت الامراة الناهية هنا .. ستفرح كثيرا ستحس ان الله عوض صبرها خيرا اكثر مما كانت تتمنى ولا تبخل عليكم عطفها وحنانها وتعيشون في سعادة مع بعض ان شاء الله |
رد : الدنيا بعدها بخير ...
اقتباس:
جوفي اختي هبه طبعن من ناحيه الفلوس مابااتكلم لانه عيب اطري الفلوس الفلوس الحمدلله موجوده واخر شي بنتكلم فيها .. بس الاثاث انا مابا اظلمها خالتي راح اسميها خالتي .. لانه حالياً بحسابي بس 20 الف وابوي مسافر وومااحب اسحب من رصيد ابوي ماتتعودت ابا اخذلها قطعه ذهب عقد مع خاتم وجي والا بترك اختي تاخذ هاي فكره اختي سجلتها . طبعن خواتي بيشاركني واختي بتعطيها لخالتي . بتكون هديه لها مني ومن خواتي وفي امور وايد باخذلها ومابا اسحب من رصيد ابويه لاني مااستأذنته بخصوص الفرش .. اثاث اختي ماشالله فوق 17 الف وايد حلو ولونه راكب على اليداار صارله ثلاث سنين من اثثته ماكمل سنه وتزوجت فالاثاث وايد حلو وفخم حرام اذا بغيره احط شي ارخص منه .. بس طبعن اختي استاذنتها وقلت حطي في بالج الحجره ماتبينها لابد قالت تفداها حجرتي وكل اللي فيها من جي الحجر وايده طبعن غرفه امي شو ي صعبه اخليها تسكن فيه ولاغرفه بطي بس غرفتي اذا تعجبها بعطيها .. مع انه غرفه اختي وايد موقعها مناسب عدالها مطبخ تحظيري اذا احتاجت شي في الليل .. بس ان شالله بشتريلها فرش فخم ومال عرايس ولايهمج والحين بسجل كل شي تكتبويه لي .. وباخذلها عطورات شرقيه بما انه الحريم يحبون شي شرقي .. بس ولايهمج ولاتزعلين مني بخصوص الاثاث لانه حرام لو اثثت اثث شي ارخص من الماثث والا يفداها والله وان شالله اذا ماعجبها اسير اغيرلها على ذوقها ان شالله وبخصوص انها الامره الناهيه هاي طبعن كانت في بالي واشكرج لانج شجعتيني عليها وباجر باكد على الخدامات |
رد : الدنيا بعدها بخير ...
اقتباس:
|
رد : الدنيا بعدها بخير ...
على بركة الله مادام الاثاث جديد سيفرحها حتما .. اعذريني اختي روضة لم اكن على علم بتلك المعطيات اني متحمسة وكانني انا من سيتكفل بها والله يعطيكي العافية
انا شخصيا دائما اتمنى اني انا و زوجي نكفل يتيما بالرغم من انو عندي 4 اطفال لكن الجو بالبيت كان متكهرب من سنوات وقف حاجز لما اتمناه ومن 20 يوم ماتت زوجة اخي الله يرحمها وعمرها32 سنة واخي هو ايضا مات من05 سنوات رحمه الله واسكنه فسيح جنانه و كان عمره 34سنة وتركا ابن عمره 05سنوات و 05شهور بالضبط لما مات اخي ابنه كان عمره 05 شهور بالضبط وكفالة الطفل الان تعود الى الجدة ام الام والله يا اختي اني حزينة على الطفل وقلبي يتقطع وافكر في كل دقيقة كيف اتكفل به انا اني صرت مثل المجنونة احلم بالطفل وحتى وانا مستيقظة احلم اني احضرته عندي واني اثثت له الغرفة واني اقول له شبيك لبيك ما تطلبه بين ايديك وووووووووووووووو الله يكون في العون اختي |
رد : الدنيا بعدها بخير ...
جيفار ... ماعندكم غرفة حقي هههههههههه انتي بنت طيب من بيت طيب لكن عندي لك ملاحظه مهمه ان شاء الله إذا وافقت ان تعيش معكم حطي ببالك انها ستكون خجوله وغريبه مهما حاولتم التقارب بينكم و بالإضافه انها ستكون دائما حزينه ومكتئبه لذكرى ماضيها وقسوة أبنائها تحتاج رعايه نفسيه ان شاء الله تكون باب خير وبركه لكم وتقبل الله هذا العمل منكم وجازاكم عليه في الدنيا قبل الأخرهـــ |
رد : الدنيا بعدها بخير ...
حبيبتي الفكره ما تحتاج نقاش وهي صح 200 بالميه بس فكرتي في اولاد هذي الخاله كيف راح تكون رده فعلهم اكيد راح ينفشون ريشهم ويعملو فيها ملائكه ....
فكرتي في الاثاثات والغرفه وغيره ونسيتي اولادها,,, مهما يبدر منهم من جفاء وعدم احترام لها بس كمان اكيد ما راح يرضو بهذا الشي ,,,,, فكرتي ايش راح تقولي لأولادها لما تروحي لهم ,,, انا اشوف انك تفكري في خطه وكلام مقنع لأولادها علشان يوافقو بس انا ما اعتقد انهم بيوافقون موفقه حبيتي وجزاك الله خيرا ( انما الاعمال بالنيات ولكل امرئ ما نوى) |
رد : الدنيا بعدها بخير ...
اقتباس:
ومافي عيال يرضون امهم تسكن برى البيت بعد ماضحت الا اذا هي موب هامتهم المهم هم الخسرانين لانهم يتمنو فراق امهم اصلن كل واحد لاهي مع زوجته والام مسكينه من الصبح لين الليل كله يالسه عند الجيران الحريم اللي بعمرها وتسير حلقات الذكر وتسير الاعرااس وتقعد معاهم وكلهم فاتحين بيوتهم لها لانه جارتهم وبعدين كيف تسكن بالملحق اذا هم هانت عليهم نفووسهم ترى انتي لو اجوفينها مابتهون عليج نفسج .. تكسر الخاطر كله تدعي بالخير وتحسينها متماسكه وماتتكلم عن عيالها جدام اختي بس اللي قالته عيالي ماتحملوني البعيد شو ذنبه يتحملني ؟؟ وكذا مرة قالت لاختي وخوات زوج اختي يوم تقعد عندهم والله الحرمه من غير زوجها او سند ماتسوى شي بالدنيا من جي انا فكرت لو تسكن عندنا واايد بترتاح لانه بيتنا هادي والله يقدرني ويكمل فرحتي وفرحة خليفه |
رد : الدنيا بعدها بخير ...
اقتباس:
بس انا يوم يلست معاها المسكينه يوم العشى تمت تغرفلي العيش وتحط كل شي عدالي تقولي كلي يما وتمسح عليااا .. ماعرفتها هي الحرمه اللي تعاني بس يوم قالتلي اختي عقب انصمت صدقيني للحين فيها امومه بس وايد ارتحتلها وماادري ليش مابا افقدها احس انها تشبه امي حبيتها نوف حبيتها .. واايد والله كنز مابا اخسرها ولا ابا خليفه يخسرها تشبه امي بحنانها |
رد : الدنيا بعدها بخير ...
بسم الله ما شاء الله جزاكم الله خير الجزاء تقبل الله منكم هذا العمل واعلمى يا اختى كما انها محتاجة لكم انتم ايضا فى حاجة ماسه لها لانك واخيك ستشعروا انها فى مثابة الام لكم وستعوضك حنان الام بعون الله لذا هى نعم الفكرة مرة اخرى بارك الله فيكم وجعله الله عز وجل فى موازين اعمالكم وجعله سبحانه عمل خالص لوجهه الكريم |
رد : الدنيا بعدها بخير ...
كلمة احبك جيفار كلمه صغيره امام ما في قلبي لك
بارك الله فيكي حافظي على قلبك الكبيررررر الدنيا بخيرررررررر بوجود امثالك |
رد : الدنيا بعدها بخير ...
اقتباس:
وبسكم مديح انا ابا امثله افكار تفرحها .. يعني فكرت بعد فتره بسير العمره معاها بتكون معاي ومع خليفه ان شالله وبجوف ذياب طبعن انا باركتله عشاان شمسه واستانس واايد ويلست امدح فيها بس طبعن خالتي لازم يعرفون انها بتكون الامرة والناهيه في البيت يعني هي موب امي وماراح تكون مكان امي هي بحسبه اخت امي مفارق .. انا حبيتها واايد حتى خليفه تحمس للفكره واايد واول مرة اجوووف الفرحه بعينه ويحاول يعبر بطريقه بريئه يقولي روضه بنحط اثاث يديد لاتنسين بنشتري فرش يديد لها .. بيبله سياده يديده وبناخذ العطورات هاي كلها افكار خليفه يقولي نخيطلها ثيب قلتلهالا حبيبي عندها هي محتاجه اهل موب فلوس قالي خلاص بنيبله خدامه قلت خدامات عندنا قالي بنعطيها سياره ذيااب الثانيه .. قلت الحرمه ماتسوق بس انا بخدمها اي مكان بترووح انا بوديها قالي زين خليفه طاير من الفرحه انا بسير باجر او ورى باجر بس لاسف خليفه مااقدر اغيبه من المدرسه واختي عطتني كلمتها قالت تعالي الخميس كلنا بنكون فاضينن والحرمه طول الوقت بتم اروحلها لين مانتاكد انها ماارح تغير رايها لانه احضرت عزى امي بس ماكنا نعرفها وقتها يت مع جماعتنا في العين وتحضر اعراسنا لانها نفس الفريج بس انا جريب تعرفت عليها.. ادعيلي امورنا اتم .. |
رد : الدنيا بعدها بخير ...
اقتباس:
انا ان شالله بحاول اسوي كل شي يردلها الراحه الانسان بهالعمر يبا اهل يضمونه ويحتوونه ويجبروون بخاطره آآآآآآآآآآآآه لو تعرفون اشكثر فرحانه ودموعي موب شايلتني .. ماادري احس جنه امي بتردلنا بس ادري هي موب امي ومابا اخدع نفسي بس واايد فرحاانه واايد . حتى اليوم كنت بغرفه امي واشم ثيابها .. وفرحاانه .. ماادري شو مدخلني غرفتها بس ماادري حسيت كانها راده لنااا .. من يديد .. |
رد : الدنيا بعدها بخير ...
اقتباس:
الله يرحم اخوج وزوجته ان شالله ويجعل مثواهم الجنه انا من راي تشلينه وتربينه مع عيالج مهما كان هذا ولد اخوج فديتج |
رد : الدنيا بعدها بخير ...
والله يا ريت يتحقق مرادي لكن القانون ليس في صالحي واهل امه رحمها الله متمسكين بالولد لانه تربى عندهم عقب موت اخي اخذها ابوها يعني من 05 سنين والطفل عايش عندهم
جدوا متمسك بيه خاصة انه لم ينجب سوى بنات يعني ليس له ولد ويعتبره هو ولده لكن ربنا رحيم يمكن يسهل الصعاب |
رد : الدنيا بعدها بخير ...
اقتباس:
ربي يوفقكم حبيبتي ...... ما شاء الله تبارك الله |
رد : الدنيا بعدها بخير ...
حبيبتي فرحت كثير
لفرحك وفرح خليفة يا رب يتممها عليكم انتوا محتاجينها كثير كثير الحين خصوصاً خليفة اللي يمكن يشوف فيها حنان هو محروم منه ربي لا يكسر خاطركم ولا يفشلكم :) |
رد : الدنيا بعدها بخير ...
ما شاء الله لا قوة الا بالله ؟؟؟ ربي يبارك لكم وفيكم ولا يحرمكم الأجر وجعل قدومها خير لها ولكم
الشيء الوحيد اللي خطر ببالي ممكن أنصحك فيه انه توقعي انها تطلب تزور وتظل على تواصل مع أولادها لانه بالرغم من الأسى والجفا اللي شافته منهم لكن راح تحن لشوفتهم ... فهذي هي طبيعة الأم وقلبها ما يقدر يقسى على أولادها مهما كاتوا قاسيين عليها وحتى لو كانت فاهمة وعارفه طبيعتهم ما راح تقدر تبعد عنهم بشكل نهائي فلا تتضايقي منها ومن موقفها أو تحسي أنه ضعف أو نكران للجميل . فرحت لفرح خليفة وأثلج صدري التغيير بموقفك من زواج ذياب . عسى عرسه يكون فاتحة الأفراح ببيتكم |
رد : الدنيا بعدها بخير ...
اقتباس:
بخصوص فرحتج لذياب وشمسه من قلبي موب فرحانه لهم واذا بياخذها يسكن معاها في البيت القديم مابا شمسه ومشاكلها هي وامها في البيت ناس مافي قلوبها الا الحقد الله يبعدنا عنهم انا بركز على خليفه وفرحته وخالتي وبس وزواج ذياب عمره مااراااح يكون فاتحه خير تاكدي .. . وبنت اختي تخسي اطب البيت لانه كل ماراح اجوفها بذكر بسببها اخوي خذ عمتهاا فراح يسكنون في بيتنا القديم وبعتبر ذياب مات .. وبنساااه .. اذا هو مااهتم فيني كاخت وغار على مشاعري وخوفي عليه بدوري بعتبره ميت بالنسبه لي يبا يتزوج خل يسكن في البيت القديم مابا اجوف حرمته توطوط وادور في بيتنا لاني كارهتها من قلبي ومابا اعيش في بيت مع بنت مريووم وماراح اتحمل وجود امها جدامي .. لاني راح اكرهم اكثر واكثر .. وانا مابا احرق بدمي واعصابي وقلبي واعيش واذكر اللي سووه بامي خلي اهلها يزورونها بالبيت الجديم بيتنا يتعذرهم .. واذا اهلي موب عايبنهم شرطي بسوي اللي براسي ساعتها انا والا هم .. الزم ماعليا اعيش مرتااحه مع خليفه وخالتي بعيد عنهم وذياب حرمني فرحتي من القلب بعرسه خلاص يسكن بعيد وبتبرى منه ويتبرى مني .. انا مجبورة اباركله واهنيه واوافق لانه رفضي مابيغير شي ا |
رد : الدنيا بعدها بخير ...
....
,,,,, مكرر |
رد : الدنيا بعدها بخير ...
اقتباس:
ماتصورين يانور انا واايد مستانسه وان شالله ربي مابيفشلنا وراح يجبر بخاطرنا وخصوصن اني كل ليله استخير ربي يسهل الموضوع ويقدرني على اسعادها |
رد : الدنيا بعدها بخير ...
اقتباس:
|
رد : الدنيا بعدها بخير ...
في صباح اليوم .. بعد ان اخبرتني اختي بان اتي اليها حتى نذهب للخاله التي حدثتكم عنها..
قررت ان تكون مفجاه لاخي خليفه حين عودته من المنزل .. لانه كان شديد الفرحه عند سماع الخبر .. ولكني عدت بمجرورة بأذيال الخيبه والأسى .. وتمالكت نفسي عند المراه ولكني انهمرت باكيه بطريق العوده لوحدي ... وذكرتني اختي بقول الله تعالى عسى ان تكرهو شيئاً وهو خيراً لكم .. لم تستطع ترك ابناءها مخافه كلام الناس .. خافت ان يتكلم الناس عن ابناءها وبذالك قررت البقاء والعيش وحيده .. حاولت اقناعها وانما ترجيتها ان تاتي .. لكنها اخذت بالدعاء لي ولاخواتي جميعهن وقالت انه الناس مايرحمووون ... ومايرحمون عيالها بكلامهم .. مازالت تفكر بهم وهم عاصون ولم تقدر وجود ابناء ليسوا من رحمها يتشوقون لاحتوائهاا .. اردها مفاجأه لحبيبي الصغير خليفه .. اردت ان يشعر بامان اكثر لانني عجزت عن توفيره له .. خلال عودتي بالطريق لم اتمالك نفسي وانفجرت بالبكااء لاادري ماذا دهاني حينها وعلى ما ابكي ولما ابكي اساسن لااادري لماذا هذه الدموع ولماذا ابكي .. وعلى من ابكي اهو على رفض المراه .. ام لانها غيرت رايها وكانت مقتنعه كثيراُ بالسكن عندنا لاادري لماذا البكااء طوال الطريج لااستطيع ان افسر لنفسي سبب بكائي .. ذهبت احلامي واحلام خليفه مع الرياااح.. اخذت اقلب الذكريات براسي وافكر بها طوال الطريق اين الخطأ ؟؟ بحثت عن خطأ.. ولكني عجزت عن ايجاده .. لماذا لاتضحك لنا الدنيا قليلاً.. وخلال عودتي قررت ان ازور والدتي واخي لكي اعتذر لهم لانني اصبحت فاشله .. اعتذرت لها بقلب مشتااق يانه لفرقاهامابال العالم سعيد ارى الجميع سعيد رغم انهم فارقوا احبتهم لماذا كلما احسست بالضعف والحزن توجهت لوالدتي لاارى الفتيات يفعلن ذالك لاارهم حزينين مثلي لماذا لااستطيع ان اعيش مثل غيري .. حاولت اقسم اني حاولت لكني ماالبث الا ان يصبح الفشل حليفي.. تحدثت مع خليفه واخبرته بدون مقدمات بعد ان تناول غداءه .. قلت له .. ام سالم ماراح تسكن عندنا .. سكت .. قليلاً ثم قال .. ليش ماتحبنا .. قلت تحب عيالها اكثر.. قالي خليفه .. بس عيالها ...مايحبونها .. لو يحبونها جان .. قاطعته قلت خلاص هذي امهم وتحبهم .. وماتبا الناس تتكلم عن عيالها باجر فهمت قالي بس نحن رتبا الحجره وفرحانين عشانها وانا بشتريلها اي شي تباه من مصروفي والله .. قلت خلاص ... الام تبا عيالها افهمني شوي .. وروح حبيبي نام وعيش حيااتك وانتبه لدراستك محد بينفعك غير شهادتك .. وصلاتك قلته بصوت مهزوم .. ذهب لغرفته وقال لاادقين الباب عليا انا بنام تعبان من المدرسه ... قلته ربي يحفظك بقومك على صلاه العصر .. لم اذهب اليه . لانني لااريد ان اضيقه اكثر .. اصبحت اشعر بالفشل كثيراً لانني لااستطيع تحقيق شي السموحه اخواني يرجى غلق الموضوع .. كنت اتمنى ان يطوول الموضوع على امل ان احدثكم عن فرحتي بها وفرحة اخي كنت اتامل ان يحدث تغير كبير في حياتي الى الافضل ولكن قدر الله ماشاء فعل ربي يحفظكم |
رد : الدنيا بعدها بخير ...
يغلق بناء على طلب صاحبة الموضوع
|
| الساعة الآن 07:30 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©