|
ساعدوني الله يخليكم خايفة من خطيبي
السلام عليكم
اليوم جانا خطيبي في البيت وتعشى معانا طبعا عندي اسئلة كثيرة واتمنى تساعدوني فيها والله من الساعه 11 وانا مترددة اسجل هنا واكتب مشكلتي او لا طبعا خطيبي بعد الملكة عمره 24-25 تقريباً , ماشاء الله ماأشوف فيه عيب ومن يوم الشوفة الشرعية ارتحت له , ووجه مريح وارتحت له من يوم شفتة الحمدلله بس مشكلتة يشتغل محقق لا ويحقق مع جرمين بعد للأسف وناس عليهم مشاكل ويوم تكلمت معاه بهالخصوص وقلت له اهم شي مايكون فيه ضرر عليك قالي مو كلهم مجرمين نصهم مرجمين ونصهم ابرياء سؤالي الاول هل كلامه صح ؟ اخاف بعدين يصير علينا تهديدات ....لاتضحكون من كلامي والله انا خايفة من الموضوع هذا المشكلة الثانية اني ماقدر اكذب عليه ابدا والله يسحب مني الكلام بدون مادري ولا احس ونظرته كذا احسه يقرى اللي بداخلي وصار لي موقفين في مناسبة جاء تعشى عندنا قبلها واكتشفت فعلا انه يدري انا وش ابي بدون ماتكلم .... ياساتر :11: احس مابقدر اعيش كذا مافي اي شيء يتخبى لاكبير ولا صغير؟ خلاصة كلامي هل تتوقعون لي حياة سعيدة مع زوج يشتغل في التحقيق والإدعاء العام مع مجرمين وسفاحين :mad: |
رد : ساعدوني الله يخليكم خايفة من خطيبي
والله ماخذه .... من غير محقق ومبتلشين معهم فمابالك اخذ محقق
قوليله عملك مع نفسك من يوم تجي زياره تنسي نفسك انك محقق لايطبق شغله عليكي ودام يحقق مع مجرمين ماهى بعيده مع العشره يسوي شي ...يعني توقعيها وانا اختك استخيري من استخار ماخاب وبالتوفيق |
رد : ساعدوني الله يخليكم خايفة من خطيبي
أنتي فهمتيني غلط
انا خايفة إنه يكون يجيه تهديدات من اللي يحقق معاهم هذا اول شي واللي مكدر خاطري واتمنى احد يفيدني فيه هو طيب بس انه ذكي جدا جدا ودقيق لأبعد حد يعني يلاحظ كل شي من تعابير وجه الى حركات....الخ بس للأمانه ماياخذ ولا يعطي في الأسئلة أبدا ولا عمره سواها حتى لو في جوال بس انه يدري بدون ماقول , والله اني ماكذبت لكن هذا اللي احسه انه يعرف كل شي بدون ماقوله ويدري باللي بخاطري مادري انا مفضوحة لهذي الدرجة او وش اللي يصير وصعبة اتراجع انا ماشفته منه اصلا الا كل خير وكل الناس يمدحونه , انا وياه خلاص ملكة مو خطبة وشوفة شرعية يعني باقي يوم الزواج بس خوفتيني يا دفى الله يسامحك |
رد : ساعدوني الله يخليكم خايفة من خطيبي
ليش حظي كذا ؟؟؟؟
|
رد : ساعدوني الله يخليكم خايفة من خطيبي
شوفي اهو وظيفته شغله محقق واكيد مر عليه قضايااااااااااااااا
شي طبيعي بيكون ذكي وليه محقق اجل حسستني ان لابس طاقيه اخفاء يوم تقول يدري بالي خاطري امكن انتي موضحتله شي وهو فهمها ياقلبي انا ماخوفك بس انتي دام مرتاحه توكلي ع الله ومن ناحيه تهديدات شيلها من راسك ياما محققين تزوجو مافي اى مشاكل بالتوفيق |
رد : ساعدوني الله يخليكم خايفة من خطيبي
اكيد يمر عليه قضايا وانا ماراح اتعب نفسي واسأل اللي فيني كافيني
بس ممكن اعرف ليش قلتي كذا ((( والله ماخذه .... من غير محقق ومبتلشين معهم فمابالك اخذ محقق )))) وربي هالكلمة احرقتني |
رد : ساعدوني الله يخليكم خايفة من خطيبي
انا من وجهة نظري ماخذ محقق صراحه لان بيواجهه قضايا كثيره
اقصد الرجل من غير مايكون شغله محقق اهو محقق بذاته فهمتي علي مثل ماقلتي ماتقدرين تكذبين لاصغيره وكبيره وحنا ياحواء لازم نكذب عشان تمشي امورنا اقصد الكذبه البيضاء لاكن انتي ادرءا بزوجك يوم تقابليه انا اتكلم من ناحيه العمل فقط استخيري الين يوم زواجك والله يكتبلك الخير |
رد : ساعدوني الله يخليكم خايفة من خطيبي
صدقتي والله
فوضت امري لربي الله يسهل حياتي وحياتكم آجمعين |
رد : ساعدوني الله يخليكم خايفة من خطيبي
هــــدي هــدي أعصابك ..
وان يعني محــقق .. تتركينه ؟؟؟ أنا ألى الآن مو شايفه فيه أي عيب .. ووضيفتــه جدا محترمه وراقيه والله يزيده من فضلــه .. وأذا على التهــديد .. الله وحده هو الحافظ وهو خير الحافظين .. والأنســان مايموت قبل يومــه أبــــــــدا .. واذا على ذكــاءه هذي نعمــه من ربي .. ومــاأتــوقع راح تضرك بشي .. أتركي عنـك الوساوس .. ماعندك أي مشكلــه ياغاليه .. وأهتمي بنفسك واستعدي لزواجــك .. ولاتلـتـلفين لأي أفكــار سلبيــه .. |
رد : ساعدوني الله يخليكم خايفة من خطيبي
بديت أستعد لحياة النكد ,يكفي حياتي الحين :(
|
رد : ساعدوني الله يخليكم خايفة من خطيبي
اقتباس:
كانت دمعتي قريبة من خدي فرحتيني الله يسعدك |
رد : ساعدوني الله يخليكم خايفة من خطيبي
اقتباس:
أشبــك متـشائمــه كــذا .. !!!!!! تفائلــوا بالخيــر .. تجــــــــــــدوه .. |
رد : ساعدوني الله يخليكم خايفة من خطيبي
مدري ضاق صدري والله كنت انام واحلم وتجيني افكار وهلاوس انه اخاف يظلم احد وتجي بعدين على حساب بيته وخصوصا ان الدنيا صارت كلها شر
وجات الاخت دفى وكملتها علي الله يخليك ويزوجك اذا كنتي مو متزوجه يلا استانسي هههه |
رد : ساعدوني الله يخليكم خايفة من خطيبي
اقتباس:
وبالنسبه لكــلامه لما قال لك .. نصهم مجرمين ونصهم بريئين .. ترا هو صــادق بكــلامه ميه بالميــه .. أنا خالي محــقــق وكثير أجلس معــاه ونتناقش في أمور القضايا ..بشكل عام .. وفعـــلا يكون نصهــم أبريــاء مالهم لاحول ولاقوه تدبسو بقضيه مالهم أي ذنب فيها .. .. عموما .. يافستــان منفوش... بس ماقلتي وش لــونه ,, <<< هههههاااي أمزح .. شوفي ياغاليه .. أدعي الله دائمـا بسجودك .. (( اللهم أني أستودعتك زوجي يارب يامن لاتضيـــع ودائعك )) وبأذن الله ربي يحفظ لك زوجك من كل شــر .. والدعـاء هذا تقوله أي زوجــه مو ضروري يكون زوجها بمكان تحقيق وقضايا .. كــل زوجــه لازم تسأل الله دايم أنه يحفظ لها زوجهــا .. فــ لاتكبرين الموضووووع .. خليك حووورمــه راكده وعاقــله ...:d:d |
رد : ساعدوني الله يخليكم خايفة من خطيبي
وجات الاخت دفى وكملتها علي
ياقلبي انا ماكملتها عليك ولاشي قلت لك نتي ادرءا فيه وانا كلامي هذي وجهه نظري لمحقق عموما وقلت لك استخيري مانتى خسرانه انا ماقولك اتركيه لا لان ي ماعرفه اتكلم من ناحيه عمله بس وبالتوفيق لك |
رد : ساعدوني الله يخليكم خايفة من خطيبي
اقتباس:
الله يحمي كل المسلمين إن شاء الله من كل شر والفستان ياهانم لونه ابيض بس مو ابيض من قلبك<<فرحانه فيك وتبي تمممممدحك ههههههااي جزاك الله خير والله اني مستحيه منك الله يحقق كل امنياتك ياختي اما خليك حورمه راكده وعاقله ........... حااااضر إن شاء الله يا امي الثانيه هههههههاي الله يوفقك |
رد : ساعدوني الله يخليكم خايفة من خطيبي
حصل خير خيتوووو دفى
|
رد : ساعدوني الله يخليكم خايفة من خطيبي
حبيبتي فستان منفوش عليك بالدعاء ثم الدعاء ثم الدعآآآآآآآآءء
اقرب م يكون العبد لربه في السجود , عليك بالدعاء وقت السجود في كل صلاه ان ربي يحفظه لك ويخليه لك كل يوم لما تصحي قولي (( أستودعت الله ديني وأمانتي وقلبي وسمعي وبصري وفرجي وجميع جوارحي ودين زوجي وقلبه وأمانته وسمعه وبصره وفرجه وجميع جوارححه )) ربي هو الوحيد اللي قادر انه يحميه والدعاء يغير القدر , أدعي كل يوووم هذا الشيطان يوسوس لك عليك بالاذكار الشيطان احلى م عنده يشغل الانسان بلا شي ويفرق بين أي إثنين متزوجين وبالنسبه للكذب , ليش تفكرين في الكذب ؟ الحياه مي حلوه بوجود الكذب زي م ترضين انه هو م يكذب عليك لا ترضينها عليه لا تسمعين كلام احد احلى شي في الحياه الزوجيه الصدق والصراحه , صدقيني لو كذبتي في شي حتى لو كذبة بيضضا ممكن تسير مشكله كبيره وانتي نيتك صآفيه ويفهمها شي مو تمام لا سمح الله , ادعيلي ان ربي يتمم ملكتي على خير ي رب |
رد : ساعدوني الله يخليكم خايفة من خطيبي
هلابك اختي
للاسف ماقريت ولا رد لاكن والله ياختي صاحبي محقق والله عاايش فسعاده مع زوجتها ماشاء الله الله يدومه عليه وبالنسبه مجرمين مادري ايش لا تخافي ولا احد يقدر يوصله بشي صدقيني ربي حيسعدك الشيطان لا يلعب عليكي يحاول يكرهك فخطيبك وضيفه حلوه وتدل على ذكااه واذا كان الرجل ذكي يعرف فالمستقبل كيف يربي اطفالك اسال الله ان يرزقك راحه البال والقناعه |
رد : ساعدوني الله يخليكم خايفة من خطيبي
من أي البلاد تكون الأخت السائلة؟
|
رد : ساعدوني الله يخليكم خايفة من خطيبي
ياحياتي أهم مافي الأمر الراحة والقبول وإذا أنت استخرتي الله وحسيتي براحة وقبول وهو كذلك فوكلي أمرك (وماخاب من استشار)بعدين عزيزتي بعد الزواج والعشرة حتصيري أذكى منه وتفهمينه من تعابير وجهه ومن دون مايتكلم والمرأة بطبيعتها أذكى من الرجل في جانب العلاقة الزوجية..وبعدين أنت لاتلتفي لمداخل الشيطان يعني ماشاءالله شاب طيب وذكي وخلوق وعملي وله مستقبل وش تبي أكثر من كذا..أقول بس لاتجعلي للشيطان عليك سبيل وأنشغلي في كيف تأسري قلب زوجك وكيف تحافظي عليه وتطوري مني حتى يصير رئيس هيئة التحقيق والإدعاء..خلي عندك هدف بحياتك مع زوجك وانشغلو في تحقيقه وماعليك من خرابيط الشيطان..موفقة أختي ودعواتك ملكتي الخميس الجاي
|
رد : ساعدوني الله يخليكم خايفة من خطيبي
اول شي مبرووووك عليك المحقق وعقبال ماتجيبين له عساكر صغار
وبالنسبه انه يعرف الكذبه قبل ماتقولينها هذا مجرد خوف والانسان حوله هالات طاقه اذا جلس يفكر بحاجه في نفسه تتغير الهالات وتتبدل وتقوى وفيه اشخاص يقدرون يحسون في الطاقه هاذي ويطورون انفسهم على فهمها مع لغة الجسد ولغة الجسد ماتقدرين تسيطرين عليها واذا حاولتي ماتبين عليك تزيد ويعني اذا بتكذبين عليه لاتفكرين في الموضوع اللي مكذبه فيه انسيه ولاراح يدري حتى لو سألك وتبين تكذبين لاتتعمقين في التفكير بالاجابه يعني جاوبي بدون ضمير يعني لاتخافين لان الروح مكانها وسط القفص الصدري المكان اللي اذا خفنا نحس فيه يكمش ومن هناك تطلع الطاقه قلبتها درس علم نفس :) |
رد : ساعدوني الله يخليكم خايفة من خطيبي
اقتباس:
ما فهمت شي غير العسكر:d |
رد : ساعدوني الله يخليكم خايفة من خطيبي
اختي .. فستان منفوش
مدري اضحك على الأسم <<<< فستان منفوش او على الموضوع خطيبي محقق خخخخ تعوذي من ابليس وكل الوظائف فيها نسبة خطر والاعمار بيد الله وفيه ناس اذكياء حتى لو ما كانو محققين . موفقه يارب |
رد : ساعدوني الله يخليكم خايفة من خطيبي
حبيبتي يعني كمان الي زوجها طبيب تنفصل منه (لانه بيقعد يدقق في صحتها و شكواها ويطلع لها امراض و يتزوج عليها
ولو سوى عملية لمريض و توفى ممكن اهله يجو ينتقموا منه (وتراها حصلت كثير) وللي زوجها طبيب اسنان تخلعه الحين عشان مايضل 24 ساعة يقول لها فرشتي اسنانك وريني تعالي اشوف :) مو منطق حبيبتي .. صح وظيفة الانسان له تاثير عليه لكن مو التاثير الي يغيره 180 درجة اهم شي اخلاقه طيبة و دينه كويس وكم من رجال غيورين و شكااكين وهم معلميين و اطباء و مهندسين وطالما انه الي براسك كله اوهام و ماشفتي منه شي (مثلا تحقيق . و نازل اسئله عليك وغيرة شديدة و شك ) اذن الحمدلله ,,, اطردي وساوس الشيطان و ربي يوفقك اما موضوع الكذب على الزوج .. فهذا اصلا المفروض ماتفكري فيه و مايكون موجود بين الزوجين من اصله المفروض الطرفين يكون صفحة بيضاء لبعض و اذا في شي صعب يقوله للشريك فالصراحة راحة تبيني لزوجك انك ماتقدري تقولي له و خلاص و هو بيحترم رايك لكن الكذب حبله قصير الله يوفقك و يتمم لك على خييييييير |
رد : ساعدوني الله يخليكم خايفة من خطيبي
هو محقق مع المجرمين والمفترض إلي يخافوا منه الناس المذنبة إلي مرتكبة جرائم
لكن أنت ليه تخافي منه؟ إلي يخاف ياغالية هم الأشخاص إلي عندهم شيء ناوين يخبونه وأنت بإذن الله ماعندك شيء يخليك تخافي وتقلقي وتخبي عزيزتي المفترض تشعري بالفخر والسعادة لأنك بتكوني زوجة رجل مهم وناجح وليس رجل فاشل والمفترض من الآن تجهزي نفسك لهذا الدور القيادي وتشجعيه يستمر في طريق تألقه مو من الآن تشحني نفسك بأفكار سلبية وتتجهزي لدور الإنسانة الغير واثقة من نفسها والخوافة وإلي ناوية تبدأ حياتها بكلمة (خايفه يحقق معي) وإذا بيحقق خليه يحقق مدام أنت صح ومرضيه ربك وناوية تبدأين حياتك بوضوح وشفافية مع شريك حياتك فليش حاطه برأسك مبدأ راح يكتشفني وراح يقرأني وراح يعرف إلي بداخلي المفترض باطنك مثل خارجك فأتركي التخوف عنك ومن الآن عززي ثقتك بنفسك وحكاية يكون عليه تهديد هذه نادرة وقليلة فلاتتأثري بالأفلام وبالعكس ماعليهم أي خوف والناس يحسبون لهم ألف حساب |
رد : ساعدوني الله يخليكم خايفة من خطيبي
الرسول صلى الله عليه وسلم أمرنا بالتفاؤل
ونهانا عن التشاؤم انظري للحياة بفرح وتفاؤل |
رد : ساعدوني الله يخليكم خايفة من خطيبي
ماشاءلله عليها الاخت نورا كفت ووفت
انتي لا تشيلي هم عشان لا تتعبي ولو تعبتي انتي راح تتعبي محد بيتعب غيرك وغير تفكيرك ان شاءلله مايصير لكم اي شيئ سيئ والله يبعد عنكم كل شر ومكرووه يآآرب الله يتمم لك على خير |
رد : ساعدوني الله يخليكم خايفة من خطيبي
وعليكم السلام....اختي ان قليل ارد على مواضيع لكن شفت موضوعك ولأني ابخص هالشغله شوي قلت ارد ....عايلتنا فيها اربع محققين منهم القديم ومنهم الجديد ماشاء الله عليهم ما ضرتهم الوظيفه ولا شي بالعكس مستانسين فيها ولافيها مضايقات. ...لكن انصحك انك تقولين له اذا طلعت من عملك انسى كل شي في عملك الى ما ترجع بكرى....(يعني لا يفكر بالعمل ) اذا صار في البيت.......وبعدين وظيفة محقق كلن يتمناه ....الله يكتب لك الخير اين ما كنتي
|
رد : ساعدوني الله يخليكم خايفة من خطيبي
بس بلا هبل
وظيفته حلوه ومرموقه لااحد يلعب بعقلك |
رد : ساعدوني الله يخليكم خايفة من خطيبي
بصراحة صعب أرد عليكم كلكم ماشاء الله ردودكم كثيره الله يسعدكم
والحمدلله على كل حال والله كلامكم اثلج صدري |
رد : ساعدوني الله يخليكم خايفة من خطيبي
يا ستي يا فستان منفوش طبعا اسم يضفي البسمه علي الوجه و شکرا لانک جعلتني ابتسم المهم الدين و الاخلاق ما دمت مرتاحه له فلا داعي للقلق، اهم شئ ان يفصل عمله عن بيته و بصراحه اکثر الرجال قادرين علي فصل العمل عن البيت، لا تعتلي هم کله ميسر باذن الله.
|
رد : ساعدوني الله يخليكم خايفة من خطيبي
وعليكم السلام ورحمة الله وبركاته الله يوفقكِ ويكتب لكِ الخير .. المثل يقول لاتسرق ولاتخاف وبعدين لاتستغربين حدّة ذكائه وقرائته للنظرات والافكار فطبيعة عمله فرضت عليه هالشي .. وهالصفآت تجعله مميّز بعمله مآشآءالله .. مسألة التهديد يااختي اعتقد ان خيآلكِ وآآسع عمي محقق والآن هو جد ربي يحفظه وتقآعد وعآيش حيآته طبيعي جدآ .. كوني وآثقه من نفسكِ صريحة دآئِمآ .. ولاتحسسيه بتوترك من ذكآئه حتى لاتحسسيه ان فيه شي .. ! فطبيعة عمله تفرض عليه الريبه وبالتوفيق |
| الساعة الآن 12:15 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©