|
خزعبلات ام حقائق؟ مارايك ؟
السلام عليكم و رحمة الله بركاته
اغلبنا (اذا مش كلنا :d) سمع او قرأ معلومات غريبة متوارثة عبر الاجيال .. منها معلومات حقيقية و لها تفسير علمي او طبي .. ومنها خزعبلات لا تغني و لا تسمن .. ومنها معلومات لا تمت للمنطق و العقل او الطب بصلة ولكن البعض متاكد من صحتها (اسال مجرب اتمنى منكم سرد بعض مما سمعتوه .. هل صدقتو او تصدقون به ؟ هل سمعتم بمعلومة لم تقتنعوا بها.. لكن رأيتم اثرها على احد الاشخاص ؟؟ ابدأ بنفسي من صغري .. اسمع (اذا اكلت الشمام مع العسل تموت :d) والمضحك رغم تاكدي و يقيني ببطلان هذه المعلومة الا انني لا اجروء على تجربتها خخخخخ اذا لبسيت القميص مقلوب (عمدا) زوجك بينقلب عليك واذا لبستيه مقلوب (بدون قصد) زوجك بيموت فيك:22: همسة: جومانة شفتي السرعة :d:d:d:d |
رد : خزعبلات ام حقائق؟ مارايك ؟
ههههههههههههههههههاى حلووووووووهـ
اووووووووووووما القميص ولا بالخيال انا سمعت معلومه ان البنت اذا اصبعها الثاني الى بعد الكبير طووووووويل فهذا معناته انها تسيطر ع زوجها اشاارريك؟ |
رد : خزعبلات ام حقائق؟ مارايك ؟
وعليكم السلام ورحمة الله وبركاته
موضوع حلو نستفيد شوي خزعبلات على إلي عندنا. أورد قليل منها يقولون خط الثمانية إلي بكف اليد إذا كانت متصله من فوق تتزوجين قريب و إذا بعيدة بعيد. والخطوط إلي بالكف توصلينها مع بعض يطلع لك اسم زوج المستقبل لووووول. الحمدلله بعيدة وطلع محمد. وينك يامحمد هع. وبعد يقولون إلي يلبس أحمر ويطلع وقت المطر يصعقه البرق مدري الرعد مافرق. والي يعد النجوم يطلع له ثالول. ٌ والي خشمها كبير محظوظة عند زوجها. و يحذرون مانخطي فوق طفل صغير يقولون مدري وش يصير له. والله فيه واجد اكتفي بهذا القدر. مابي اطلع فضائح أهل الشمال. |
رد : خزعبلات ام حقائق؟ مارايك ؟
شلون الى بخطوط الكف يطلع اسم الزوج حاولت اسويها ماعرفت كيف طريقه
|
رد : خزعبلات ام حقائق؟ مارايك ؟
دفئ منوورة
خليتيني ادور باصابعي :) .. اصبعي صغيرة وهو اللي مسيطر :) ترانا نلتقي خط الثمانية سمعت عنها و شفتها بايدي و بيد زوجي .. والاثنين متصلين احنا اقارب وبيد اخوه الخطين منفصلين .. وهو متزوج من برا العيلة و اخته نفس الشي خواتي لسه ما اتزوجو بجرب عليهم خخخخ بس الاسماء هذه ماعرف كيف اطلعها ابو الاحمر ماسمعتها .. بس اسمع اللي فيه حصبة يلبس احمر :) برضو مادري ليه اما النجوم الله يرحمها جدتي .. اتذكر كانت تطفي الكهرباء (ولازالت خخ) ونطلع ننام بالحوش وماعندنا الا عد النجوم .. احنا نعد و جدتي تسمعي صوتها لاخر الشارع لا تعدووووو بتطلع لكم حبوب بوجهوكم .. وتلاقينا الصبح نجرررري عالمرايا .. كمان عندنا الخطي على الطفل مش كويس .. وحتى تقبيله وهو نايم تقولك اتعوذي من الشيطان ؟؟؟ شكلها الخزعبلات وحدة في المحيط العربي :) نووورتي ياعسل |
رد : خزعبلات ام حقائق؟ مارايك ؟
ممم اذكر
يقولوا لما تصل يدينك ببعض لتصل الخطوط ,,,يعني مثل ما ترفعي يدك للدعاء بس قربيهم لبعض و كان الخطيين اللي فوق يشكلان قوسا واضحا http://up.arab-x.com/Mar12/qOC58265.jpg ,,, يعني زوجك بيطلع قمر:14: ههههههه:d:d الحمد لله و الشكر |
رد : خزعبلات ام حقائق؟ مارايك ؟
موضوع حلو وجميل وراق لي زين مازين عسى بس مايقولون
جالسين ننجم المهم يا ام يوسف احنا بالجنوب عكسكم اللي تلبس عبايتها بالمقلوب يقولون لها انتبهي زوجك بيتزوج عليك بس ياما لبسناها بالمقلوب بس للحين ماصار شئ ان كان بالمستقبل يصير الله اعلم بالنسبة للون الأحمر اللي يلبسة ويصير مطر وفيه برق ورعود اهله مايخلونه يطلع يقولون ان الشياطين والجن تحب اللون الأحمر ولما يجي البرق بيسعقها تقوم تتخبى ورى اللي لابس احمر ويموت الجن والإنسان مع بعض طبعا انا عن نفسي ما تصدق مثل هالأشياء ولاتدخل مزاجي بالرغم من انه كان عندنا رجل قضى معظم حياته وهو يصارع المس وحدث وصعقه البرق وهو في مزرعته يحرث واغمي عليه ولما جاء الناس ليطمأنوا عليه ويسعفوه وجدوا ملابسه من على ظهره قد احترقت وفيه مثل الحزام على ظهره وشالوه الناس واسعفوه وتحسنت حالته وسبحان الله بعدها ماعاد سمعنا ان فلان جته نوبة المس وبعدها تشافى ولا كأنه صاير فيه شئ بعد ما امه واخوانه مساكين دفعوا كل شئ قدامهم ووراهم وهم يعالجون فيه كان يرمي بنفسه في النار او بئر الماء لو جته الحاله واهله مايقدرون يمسكونه يقطع ملابسة ويصيح بس بعد ماصعقه البرق ماعاد صار له شئ |
رد : خزعبلات ام حقائق؟ مارايك ؟
وكمان نسيت عندنا اللي لها طفل ويبتدي يمشي لأول مرة
يشقون ثوبها من اسفل هههههههههههه علشان ما يتعثر ابنها في مشيته |
رد : خزعبلات ام حقائق؟ مارايك ؟
اقتباس:
دفئ ياحياتي أنتي ههههه ، شوفي جيبي قلم أحمر سائل وحددي جميع خط بيدك كبير مع صغير وبالغصب طلعي لك اسم. ‘‘ شوفي وش يطلع لك. تصدقين آخر مرة جربتها بالمتوسط. بجرب وش وررانا. عادي لإخلصتي من الشخمطه على يدتس لإتنسين تغسليهن لا أحد يشوفك يقولون انهبلت دفئ مثل البزارين تشخمط.:d |
رد : خزعبلات ام حقائق؟ مارايك ؟
هل ترانا نلتقي والله ان عندنا بالجنوب اشياء تشيب الراس
بس منتشرة بين كبار السن وفيه فئة قليلة جدا من الشباب يصدقونهم اقول لك المولود لما ينولد اهله تأذن في إذنه عندنا لا النار شابه والعجوز اللي تكوي جنبها يطلع المولود بس وطخ بالكية بين عيونه ليش علشان الشياطين والحاسدين مايقربونه ههههههه يعني تطعيمه ولقاح جاهز |
رد : خزعبلات ام حقائق؟ مارايك ؟
يحكوني.صديقاتي أغلبهم من الجنوب عن أشياء عجيبه ، بس سالفه الكي أول مرة أسمع فيها
يمه حرام عليهم. أهم شيء لا يكون تبقى آثار الكي وتشوهه. |
رد : خزعبلات ام حقائق؟ مارايك ؟
هههههههههههههههههههه اااه يا نورا مت ضحك ع العسل و الخربز
منجد تفاهات و حنا نضحك من قلب بس لا جا وقت الجد نسوي زيهم فعلا اغلب الكلام اللي قالوه البنات مر علينا الخطوط اللي بالكف و الخروج من البيت مع الصاعقة و لبس الاحمر يووووه يا كثر خزعبلاتنا حنا بالذات اذكر وانا ورعة جدتي الله يرحمها لما ننام عندها في البر تقول لا تعدون النجوم تطيح عليكم و حنا من الخوف ما نطالع فيها ههههههههههههههه الى يومك ذا لما نطلع الاستراحة و انسدح ما اقدر أطالع السما أخاف بالغلط اعد النجوم ثم تطيح < خببلة و الله ذكريات خزعبلات كثيير خالتي للحين اذا رفت عينها تقول بيجيني ضيوف و أبوي اذا حكت يده اليمين يقول بتجيني فلوس و اذا اليسار بيجيني احد يبغى فلوس خخخخخخ و الاعتقادات حقت الاربعين شي ثااااني تضحكين و انتي تسمعينها الله يخليهم لنا بس .. متأكدة بيجي يوم ع خطاهم نسير :d يسلم عمرك نورا |
رد : خزعبلات ام حقائق؟ مارايك ؟
اقتباس:
مثل حطة الإصبع بين الحواجب على قولة واحد من إخواني فلان في راسه علامة الجودة الشياطين ماتقربه . |
رد : خزعبلات ام حقائق؟ مارايك ؟
فردوس حتى احنا بالجنوب حكة اليد لها تفسير مثل تفسيركم
وكمان رمشة العين والشارب الظاهر سامعين اللي يقول عيني ترف ومبشرني بغايب عساه ياعيوني من اللي تعزين ههههههه وعندنا بعد اللي رجوله تحكه من باطن القدم تلاقيه يحكها ويقول اح اح اح رجولي اكلتني ياترى من ياكل في ظهري الحين قصده ان فيه شخص يغتابه وكمان القمر لو صار فيه خسوف الناس ترو ح تصلي بالمساجد والعجايز كل وحدة تعبي لها سطل مويه وتحط ظل القمر بين الماء علشان يبرد القمر ويرو ح الخسوف وعندنا عجوز كل يديها اكسسوارات قصدي عقد اقمشة تلف في داخلها المرة والحلتيت اذا كنتم تعرفونه وتربطه بيدينها وعلى بطنها تقول الشياطين ماتحب ريحته ولا تقدر تقرب منها الشياطين عزالله حتى الناس هربوا منها مو الشياطين وبس اللي هربت نصحناها ماتسمعنا وتقول انتم ماتفهمون كل جداتنا كانوا كذا بس انتم طالعين متخلفين المشكلة مربطة لعيال اولادها وهم صغار اطفال اعمارهم 4 و3سنوات . |
رد : خزعبلات ام حقائق؟ مارايك ؟
هههههههههههههههههه ام سلطان ذكرتيني بجدتي يحليلها يوم ولدت ولدي
جيتها به بعد الاربعين عشانها ما تمشي يوم شافته قامت تسب و تسخط في أمي تقول ولدك بيطلع خبيله عشان ما حطيت له الجنيهات ديك تعرفينها الي الأولين يربطونها من بداية الشهر التاسع لين تلد الحامل و تكون كونت لمولودها حجاب يحفظه من الجن و الشياطين يا أني انسدحت ضحك عندها تفاولت على ولدي ما اعجبها أني ما حطيت له حجاب و أني ما دهنته بالخلطة حقتهم راحت تأكل في نفسها لو أني طيبة ما أخليك تستاثمين في الورع حسستني انه ما عاد ينفع خلاص ههههههههههههههه الله يعطيها ع نيتها جدتي يحليلهم و يحليل اعتقاداتهم الحمدالله اننا درسنا بس ولا كان تلقيني مثلهم اسوي اربعينية |
رد : خزعبلات ام حقائق؟ مارايك ؟
فردوس ايه اعرفها الله يرحم جداتنا
وكمان عندنا اللي تعرس وتزور بيت اهل زوجها لأول مرة يذبحون لها خروف عند باب البيت اول ماتحط رجلها وتدخل عتبة الباب يخلون العروسة تدعس بين الدم قال لك هاذي فدية علشان هيه ماتكون دخلتها عليهم قرادة يعني مو خوف عليها ولاكن على انفسهم هههههههه |
رد : خزعبلات ام حقائق؟ مارايك ؟
تذكرت سر الطفل يوم يطيح مدري وش بالضبط.
المهم يقولون المكان إلي تحطونه يصير الطفل يحبه يوم يكبر وكنا نصدقهم ويوم أنولد أخذنا أنا وخالي. الله يرحمه السر وصارت هوشه بيننا هو عناد بي بيحطه فوق بالنخله عشان يطلع يحب النخل و أنا أقول بروح أحطه بمدرسة أبوي كان مدير مدرسة تحفيظ و أبغاه يحبها "" ياحليلي قليب من يوم أني صغيرة بس ماحد حاس بي. المهم حطه خالي بالنخله ولا شفنا شيء أخوي آخر سنه له بالثانوي والحمدلله يحب المدرسه. |
رد : خزعبلات ام حقائق؟ مارايك ؟
يا حبيلكم يا بنات .. سواليفكم ما تنمل :)
نورا .. جمييييل طرحك ... احجز مقعد عندك .. ولي عووووده مع حقائق الخزعبلات ... الان نصي نوووووووم .... شكلي ابحلم في خزعبلاتكم ،، يماااااي :24: الله يستر .. |
رد : خزعبلات ام حقائق؟ مارايك ؟
احنا عندنا اذا رمشت عينك معناته بتشوفين احد ماشفتيه من زمان
واليد اليمين تاكلك معناته بتجيك فلوس واليسار احذ ياخذ منك فلوس معناته بتروح لدرجه لما تالكني اليسار ماحكها عشان ماحذد ياخذ وقدم رجلك اذا حسيتي بحكه بتروحين لاحد يعني تدخلين بيت احد اوما النجوم مت عليك ضحك مستحيل طيح بس يابنات بعضها تسير |
رد : خزعبلات ام حقائق؟ مارايك ؟
هل ترانا نلتقي احنا عندنا سر المولود يرمونه بالبئر او في البحر
يقولون علشان يطلع يحفظ السر ومايبوح فيه لأحد او يدفنونه بحفرة عميقة وكمان المولود لما يطلع من بطن امه يحطون على صدره قطعة سلاح او حجر يقولون علشان يطلع شجاع وقوي قلبه مثل الصخر عز الله بعضهم يطلع يخاف من الصرصور من زود الشجاعة دفئ الله يسعدك حكي ايدك هههههههههه ترى انا بتسلف منك لاتصدقين امزح معاك . |
رد : خزعبلات ام حقائق؟ مارايك ؟
ههههههههههههههههههههههههههه بنت الحكمي بديت اشك انك من حارتنا
ذكرتيني بامي متنا ضحك ع سوالفها هي و خالتي مرة اجتمعو يسولفون و يتحسرون خالتي تقول ولدي البكر حطيت سره في المسجد عشان يطلع امام مسجد طلع معاق و الثاني حطيت سره في حوش المدرسة ابيه يطلع شاطر رسب في الابتدائي ثلاث سنين و النكتة أمي تقول حطيت سر أختكم في البير ابغاها تطلع كتومة و حافظة للسر طلعت اكبر ملقوفة الهرجة ما تقعد في حلقها دقايق ههههههههههههههه يا زينهم من اول قسم ان سوالفيهم تجيب العافية فلة و وناسة غير سلامة النية و القلب النظيف أنا لو افتح موضوع عن جدتي في ذمتي لا تتسدحون ضحك ع هروجها كلها اعتقادات واهمة المشكلة تزعل و تهاوش خخخخخخ الله يحفظها بس و يوم ولدت ولدي عمتي اتصلت تقول وصيه في أذنه تراه يسمع و يطلع مثل ما وصيتيه تمام انبح حلقي وانا اوصي وليدي في الاربعين الصبر يا وليدي الصبر ابغاه صبور الى يومك ذا ما اشوفه الا دلوع يبكي من اقل خبطة ع كتفه ههههههههههه لي رجعه للموضوع الغندرة هذا |
رد : خزعبلات ام حقائق؟ مارايك ؟
ههههههههه والله نفسي اكون جارتك
وامك وخالتك الله يسعدهم انا ام زوجي اول ما اولد تتصل على زوجي مخصوص علشان سر المولود تقول له فين يرميه انا احفر له وادفن عليه صراحة لاكن هي تقول لولدها دور لك بير عميقة وارميه فيها وهو يقول لها طيب طيب وهو مايدري اصلا وين حطيته لاكن فيه عجوز اعرفها حاطة اسرار عيالها كلهم في علبة ومقفلة عليها تصدقين والله ان اولادها الحين كبار متزوجين ومخلفين وهي باقي محتفظة بسرتهم في علبتها الحين هي ماتت الله يرحمها ويسكنها فسيح جناته لاكن العلبة مدري وينها . |
رد : خزعبلات ام حقائق؟ مارايك ؟
هههههههههه
والله يابنات ضحكتوني الله يسعدكم نوره مشكوره حبيبتي موفقه في موضوعك ايوه كده يقميل ^_^ ممممممممممممم والله يابنات انا صراحة اقولكم في خزعبلات لكن صرت اصدقها للاسف ههههه اولها بعد ما تجي فرده الحذاء على الفرده الاخرى مو شرط حذاء حتى اللي تلبسيه للحمام اعزكم الله المهم بعد ما تجي فرده على اختها معناها عندك طلعه حلوه يا لمه نسائيه ياسوق يا............... المهم ان عندك مشيه خلال الايام الجايه وفعلا بالتجربه هي اكيد مالها دخل لكن والله صرت اتفائل بها استغفر الله الشي الثاني لما تنكب (تتبدد) تطيح ممممممممممم خاني التعبير المهم من الفنجان او تفوج القهوه وهي على النار اذا البيت فيه آنسات بشرى لهم زواج قريب هههه وجربتها على قريباتي وعلى خوات زوجي يوم انسكبت ايوه جبتها هههههه انسكبت القهوه عالارض قلت لهم جاينكم خطابين وماشاء الله بعد كم شهر جو خطبو حماتي مممممممممم بعد ما تمشي العروس مع زوجها تجي وحده وتجلس مكان العروس يقولو تلحقها ههههه والله اول ما تنزل العروس تلقي البنات يجرو لكرسيها واشياء واجده ما تكنسو البيت وراء العروس لان الفال سيء وو............. وعندنا حكه اليد اليمين سلام حار من شخص عزيز يعني واليد اليسرى تجيك افلوس والله الناس يتفاألو بيها بالفعل للاسف ممممممماذا جلس الطفل على راسه ومؤخرته في وجهك معناتها جايك خير ههه واوووووووووووووووووووووووووووووووووووووووووووووووو ووووووووووووو خلاص عيب فظحتي اهلك ههههههه مشكوره نوره |
رد : خزعبلات ام حقائق؟ مارايك ؟
هههههههههههههههههههههههههههههههههههههه
الله يسعدكن بنت الحكمي. مسكينه أم زوجك توصي وماحد لامها و أنتم وش خسرانين كانوا سويتوا مثل ماقالت لكم ذكرتيني بدكتورة كانت من عائلة الحكمي ونيسه الله يذكرها بالخير ويسعدك يافردوس وجعلك تشوفين ولدك صبور و اصبر من الجمل هههههه. فيه بلاوي ودي أقولها بس مشكله مااعرف أترجم لكم أخاف ماتفهمونا هههههه. |
رد : خزعبلات ام حقائق؟ مارايك ؟
ماشاء الله عليكم مجتمعات من وراي :) طيب رنوا لي :)
رفه العين شي شااائع خخ .. عندنا يقولو رفة اليمين خير و رفة الشمال خبر مش كويس اتذكر مرة خال امي قعدت ترف عينه اليمين وهو يقول اكيد في شي .. اتصل على امه بالقرية قالت يابني عندنا مطر كثييير سبحان الله قام طبق السماعة و يقول شفتووو قلت لكم عيني ترف خخخخخ مفروض كان يشتغل بالنشرة الجوية هههه ومرة جدي قعدت عينه اليسار ترررف وهو نفس الشي يقول الله يستر اكيد في شي ويتصل على الاهل ... مافي شي المهم بعدها بيومين حصلت تسونامي الشهيرة . قال شفتووو قلتلكم خخخخخخخخخخخخ فطست ضحك هذاك اليوم نفس الشي موضوع اليد .. اليمين بتجيك فلوس و اليسار بتدفع فلوس... نسميه حاافي .. اذا اجاني باليمين قلت لزوجي يالله حقق النبوة و اعطيني بيدي فلوس خخخ ماعندي غيره يعطيني :( اذا البييبي رفع رجوله و انحني و شاف امه من بينهم (عرفتو قصدي :) * هكذا يعني http://1.bp.blogspot.com/-fjHO4KF11f...yBottom300.jpg معناه في بيبي بالطريق :) .. يقولو انه ينادي اخوه والله الموضوع احلو بوجودكم جمييييييعا و ننتظر المزيد من الخزعبلات مش بس المتعلقة بالغيببات و كمان بالصحة .. مثلا .. كانو يقولو لنا لا تاكلو النيدو بالمعلقة .. عشان لا يجيك دوود ببطنك خخخخخ لا تاكلو التمر الهندي (نسميه الحمر ) لانه يكبر الصدر .. مادروا اننا كنا ندور صدور خخخخ بذاك العمر فردوس .. ياحبي لجدتك عسل الله يحميها ... اسكتي بس لو افتح عن جدتي الله يرحمها وغرايب جاراتها بتموتي ضحك خاصةمع دخول الكهرب خخخخ ياالله مستنين المزيد |
رد : خزعبلات ام حقائق؟ مارايك ؟
مراحب يانوآره
سويتِي موضوع بها السرعة من ورانا نونو ترى (الشمم) مو خزعبلات هو طبياً يعني إلتهاب في مكان الجرح وحتى بعض الأطباء معترفين فيه أختي طبيبة ومع ذلك مؤمنة تماماً بإن الجرح يلتهب بسبب بعض الروائح والناس يأخذون للشمم نبات اسمه (المرة) هو مفعولة زي المضاد وذكريات الله يعطيها العافية وضعت لك صورة المرة بموضوع أونا وراجعة لكم بالخزعبلات بس الطب البديل أن ما أعتبره نهائي خزعبلات ولنا في الدكتور القحطاني رائد الطب البديل خير شاهد |
رد : خزعبلات ام حقائق؟ مارايك ؟
جوجو ..
انا معاك حبيبتي .. التهاب الجروح موجود وخطير وممكن يسبب الموت لاقدر الله مااختلفنا وهو شي معروف طبيا .. لكن اختلافي معكم في موضوع الراوائح اذا قلتو لي العطر اذا جاء على الجرح ممكن يسبب التهابه اقول ممكن منطقيا لانه دايما ينصحوا المريض بابقاء مكان الجروح نظيف و ناشف لانه حتى الماء (ارطوبة ) يسبب التهابه.. فا احتمال العطور تاثر بالملامسة لكن انه شم الروائح القوية يسبب التهاب الجرح (دون ملامسة ) ماهي داخله راسي وصرااااحة و بامانة اي شي ماله تفسير طبي او منطقي ماقدر اقتنع فيه .. فقط لانه صار لوحدة او اثنين وقد يكون حصل مصادفة مثلا . مش شرط يكون الرائحة هي السبب او حتى حالة نفسية (الانسان لما يقتنع بشي يصدقه) .. اذا الوحدة اقتنعت انها تدوخ من العطر بتدوخ يمكن لو كنت شفت بمحيطي حالات معينة صار لها اقتنع .. بس ماصار .. رغم انه الواللدة عندنا ,, 40 يوم تتعطر و تتبخر بالبخور العدني وتحط على راسها اعشاب عطرية اشكال و الوان .. والناس تجيها معطرة و مبخرة و الفل والمشموووم فوق رووسهم :) ولا صار لحد شيئ الحمدلله بالعكس المعروف ... اذا طفل انجرح بيده جرح بسيط اول شي نسويه نرش عليها عطر (لاحتواء العطر على الكحول) ومايلتهب الجرح بل انه يطيب بالنهاية تبقى موروثات مافي شي يثبتها غير تجارب المحيطين بك .. وطالما ماشفت تجارب محيطة بي فاماراح اقتنع فيها :) .. شكلي على قول اونا .. بجرب بنفسي لما اجيب الثالث باذن الله .. انتظروني :) اما الطب البديل .. فماحد ينكره بالعكس اشياء كثيرة ماقدر عليها الطب وقدر عليها الطب البديل .. و ياما ادوية طبية (اذا مو اغلبها ) مستخرجة من الطبيعة منووورة يا قمر و مستنية عودتك انتي وشقردية ترانا نلتقي .. بنت الحكمي . دفء.. فردوس .. اونا نوررررررتو ياغاليات نسيت اقولكم .. بعض المدن عندها اذا انولد المولود يرسموا على حواجبه بالكحل عشان يبشعوه :)... خوفا من العين:29: |
رد : خزعبلات ام حقائق؟ مارايك ؟
يانورة حركة الطفل وهو مقلوب عندنا كمان هاذي الحركة
يقولون عنها نفس كلامكم وكمان الطفل لو تأخر في المشي امه تجيب له علبة فشار وتحمصها وتشيلها وتصف اخوانه على شكل دائري على الطفل وتكب الفشار فوق راس الطفل واخوانه يتسابقون عليه ويجمعونه يقولون انه الطفل بعدها يمشي بسرعة وكمان الميت لو مات اهله مايكنسون بيتهم ثلاثة ايام علشان مايموت احد بعده من اهل بيته بسرعة سبحان الله اذكر يوم وفاة ابوي تحاشرنا انا وعجوز قريبة لنا انا اقول لأخواتي كنسوا البيت ونظفوا وهي شالت المكنسة وقالت والله ماتطبونها لو تطيرون وانا يا خاله ياجده ياعمه يا فلانه مانفع معاها شئ وانا اتوسلها علشان ننظف البيت وهي راسها محجر مصممه انا مانكنس البيت الى بعد ثلاثة ايام شكلها خايفة على عمرها لأنها هي اللي باقية في العائلة من كبار السن وشكلها مفجوعة وخايفة ان الميت راح يسحبها وراه هي اول وحده المهم ضحكت عليها وجريتها باحد الغرف اسولف معاها وقلت لأخواتي وبنات عمي يبنات انا بسولف معاها وانتم شوفوا شغلكم المهم انا طلعتها على انفراد وجالسة اسولف معاها والبنات كنسوا البيت ونظفوا ومسحوا البلاط ولما شافت ام البيت تنظف زعلت وعصبت وقامت تدعي علينا وقالت من قال لكم تسون كذا قالوا لها البنات ام سلطان قالت خلاص ماعاد بيني وبينها اي كلام ولا تسلم عليه ولا تهر ج معي وزعلت مني طبعا تركتها وحتى خلص العزا ورحت لها وحبيت راسها واعتذرت منها واعطيتها 200 ريال رضاوة وسافرنا العجايز طيبين يرضون بسرعة اما لوسمعت كلامها والله غير البيت يعفن ويخيس المشكلة عندنا اطفال انا واخواتي واخواني والبيت انعفس عفس تعرفون حوسة الصغار وكمان اول ماجت عندنا التلفزيونات اذكرها اللي لونها احمر انتاج شركة ناشيونال وطبعا كانت عادية مو ملونه ومافيها الا قناتين الأولى والثانية وكان جارتنا يتجمعون عندنا علشان يشوفون المسلسلات البدوية كلنوا يموتون عليها المهم امتحنونا محنة الله لا يوريكم كل ماطلعت صورة رجل بالشاشة رمت علية وحدة منهم اي قطعة قماش قال ليش حرام تغطوا يابنات يشوفونكم ولا غطوا على وجه الرجل ونسمع صوته بس يكفي والمشكلة يحلفون لنا ان الرجال بالتلفزيون يشوفونا واحنا من تناحتنا صدقناهم كل ماطلع رجل على الشاشة غطينا وجيهنا لو بكفوفنا ولا بعد تعالوا وتسمعوا لسبهم ولعنهم للممثلين والممثلات علشان ادوارهم مثلا ممثلة تمثل انها اخت هاذا الممثل وفي حلقة اخرى تمثل زوجته او امه او اخته العجايز يفلتون عليهم سب ولعن فيهم هاذولا مايستحون على وجيههم هاذولا قليلين ادب ويتكلمون على الممثلة بالشاشة كانها تسمعهم وتفهمهم يقولون لها هيه ياقليلة الأصل والحياء ماتخافين ربك مرة زوجك ومرة اخوك من جد انتي قليلة اصل لو انتي بنتي اقتلك يالخايسة والا وقت ما يبغى يقتل الممثل ممثل آخر في الدور تسمعينهم وهما انتبه تراه وراك التفت حولك اه يالقهر الحين يذبحة والله ذبحه خلاص الله لايوفقك شوفوا الظلم الله راح يكشفك ياقاتل ياقلبي على امه مسكينه المهم تنتهي المسلسل وما ندري وش صار فيها واحنا هوشة مع جاراتنا وصراخهم وكمان يتنبؤون باللي راح يصير بالحلقة الجاية لا وبعد تجيك وحدة منهم تقول والله يابناتي البارح النوم ما لمس جفوني خير ياجدة سلامتك وش صاير فيك تقول ماقدرت انام ميته قهر على فلان من هو فلان اللي بالمسلسل انذبح والله انه بطل وشهم واصيل طبعا هذا مقطع بسيط بس فيه اكثر واكثر الله يسامحك يانورة ذكرتيني بأشياء صرت اضحك لحالي كل ما اذكرها زوجي من البارح يسمعني اضحك يقول شكلك استخفيتي يا ام سلطان كل شوية واسمع صوتك تضحكين لوحدك كل مايقول علميني وش عندك اقول له بكره اقول لك واليوم جلست اقول له بالسوالف ضحك الين شرج بالقهوة بالذات على سالفة ام فردوس وخالتها وسالفة السر وبنفس الوقت ذكرني بخالته اخت امه هي ماتحب صوت الرعد يفزعها دائما لو سمعت الرعد تروح تقرب منها خيشة الثوم وتفتح في الثوم وتقطع وتفرك في جسمها وملابسها وكل شئ فيها ونقول لها ليش تقول لنا علشان الشياطين ماتقرب مني والبرق يجي صوبها وهي تستخبي وراي وتجي الصاعقة فيني انا وترو ح وتحط عل نفسها ثلاث بطانيات او انها تدخل تحت الفرش اللي على السرير وماترضى تسولف ولا تضحك معانا وتلاقينها خايفة ومرتعبة ولاتاكل ولا تشرب حتى يصحو المطر وكمان زوجي جسمه كله كي بالنار والله ان وحدهةمن الكيات احط كف ايدي عليها وما تغطيها من كبرها سألته وش هالكي اللي في جسمك يقول ما ادري يوم كنت صغير يقولون انه جاني مرض وعالجوني عند شخص يكوي بالنار وسألت ام زوجي قالت لي الكي اللي في زوجك من يوم كان عمره سنتين جت له حالة غريبة وتشنج وصار فمه في جهة من وجهه وصار يطلع من فمه مثل الزبد وتعب وديناه لواحد يعالجه واعطاه اعشاب وكواه بالنار وبفضل الله تشافى بس ايش هاذاك الكي الحمدالله ان زوجي ما مات مدري وش الشئ اللي يكوي به هل هو مطرقة ولا ساطور ولا ملعقة كبيرة والله اني ماعرفتها كيات متقاربة وشكلها كبيرة واكثر شئ تحت الإبط وعند الرقبة وفي وسط الظهر مسكين زوجي عذبوه وهو صغير شكل الولد سخن وارتفعت حرارته وتشنج وهم قالوا خلاص فيه مس من الجن ما عاد رحموه كيه فوق كيه حتى الولد اغمي عليه يوم كواه الرجل وشكله بعد الإغماء عرق و برد جسمه ونزلت حرارته وهم يقولون الكي اللي نفعه . |
رد : خزعبلات ام حقائق؟ مارايك ؟
وكمان فيه عندنا عائلة اول واحد عندنا بالقرية اشترى سيارة كان من هاذي العائلة لما جاب السيارة للبيت الناس انذهلوا وتجمعوا عليها وفيه منهم من جاب لها حزمة كبيرة من الأعلاف وجاب لها وعاء كبير وحط فيه ماء وجابه وحطه امام السيارة علشان تاكل وتشرب ظنا من البعض ان السيارة مثل الدابة تاكل علف وتشرب ماء
وكمان فيه عجوز اكلت صابون اللوكس اللي بنكهة الليمون كانت تحسبه حلوى وما شالوها عيالها من يدها ماعاد باقي منهاإلا النص من الصابونه والباقي روحت في بطنها وجلست يومين تسهل وتستفرغ حصلتها في مخبأوظنت انها حلوى وهم مخبينها منها فقالت بذوقها واكلتها وكمان نفس العجوز حصلت مزيل الشعر بالحمام اكرمكم الله حسبته شامبو ومامنها الا تفتح العلبة وتشيل وتحط وتفرك في شعرها وغسلت وطلعت الا وشعرها يتمزع في يدينها ولما سألوها وش فيه شعرك قالت حطيت له شامبو من اللي حاطينه بالحمام . |
رد : خزعبلات ام حقائق؟ مارايك ؟
وخلاص تعبت مصاريني تورمت من كثر ماضحكت من سوالفكم بس برجع لكم اشوف خزعبلاتكم وسوالفكم .
|
رد : خزعبلات ام حقائق؟ مارايك ؟
اقتباس:
كم ثوب طيب يشقون من جد قويه قويه مره وسعتو صدري صراحه بسوالفكم.. - من الخزعبلات الي تشرب بفنجال مكسور او طرفه مشطوب زوجها يتزوج عليها وجتني عقده من اي فنجال مكسور ما اطيق اشوفه :28: وإذا وحده صبت لي بالغلط احقد عليها >>> ناقصه بعد انا هههههههه يمكن اعرف انه خزعبلات بس نفسياً اثرها ثابت خلاص.. - اذا يدك اليمين فيها حكه يجيك فلوس واذا اليسرى تصرف فلوس او العكس والرجل بعد إذا حكيت اليمين تروح مشوار واذا اليسار يجيك ضيف >>> قانون نيوتن ترى ما فيه نقاش هههههه متابعه معاكم :22: |
رد : خزعبلات ام حقائق؟ مارايك ؟
اقتباس:
يعني اول مايشوفون الطفل ابتدى يمشي خطوات تغافلها وحدة من قريباتها او صديقاتها وتمسك طرف ثوب امه او تنورتها او حتى بنطلونها وتشقه من عليها بس شق بسيط لاكن بعضهم تشق التنورة حتى الركبة . |
رد : خزعبلات ام حقائق؟ مارايك ؟
وكمان فيه سالفة بعد للحرمة مع زوجها اللي تخلص الأربعين
بس هاذي مشفرة ماراح اقولها لكم |
رد : خزعبلات ام حقائق؟ مارايك ؟
اقتباس:
قال أبو سعيد الخدري رضي الله عنه : نَهى رسول الله صلى الله عليه وسلم عن الشُّرْب مِن ثُلْمة القَدَح . رواه الإمام أحمد وأبو داود . وكَرِه أبو هريرة رضي الله عنه أن يشرب الرَّجُل مِن كَسْر القدح . رواه عبد الرزاق . وروى ابن أبي شيبة عن ابن عمر وابن عباس رضي الله عنهم أنهما كانا يكرهان أن يُشْرَب مِن ثُلْمة القدح ، أو مِن عند أذْن القَدح . وروى عن إبراهيم النخعي قال : كانوا يكرهون أن يُشْرب مِن الثلمة تكون في الإناء ، أو يُشْرَب مِن قِبل أذْنِه . والنهي للكراهة . وعَلَّل الخطابي النهي بأنه إذا شَرِب منه تَصبب الماء وسال قَطْره على وجهه وثوبه ، لأن الثلمة لا يتماسك عليها شِفة الشارب ، كما يتماسك على الموضع الصحيح من الكوز والقدح . وقد عُلِّل النهي بأن الجزء المكسور أو الثُّلَْمة لا يتم تنظيفها جيدا ، فيحتمل أن تتراكم عليها الأوساخ . قال العظيم أبادي : يُحْتَمَل أن يكون المعنى في ذلك أن موضع الثلمة لا يَنَاله التنظيف التام إذا غُسِل الإناء ، فيكون شُرْبه على غير نظافة . اهـ . والكراهة لا تتعلّق بالكُوب وإنما تتعلّق بالجزء المكسور فقط ، وهو الـثُّلَْمَة . فإذا شَرِب من غير الثلمة فلا كراهة |
رد : خزعبلات ام حقائق؟ مارايك ؟
اقتباس:
اقتباس:
************ باقي خزعبلات الحمل ما تنتهي خاصة سالفة نوع جنس الجنين .... |
رد : خزعبلات ام حقائق؟ مارايك ؟
اقتباس:
لا مافيه أنا احتج يا كلنا سوى يا تظل مشفرة :29: يا حبي لك هل ترانا نلتقي تكفين طلعي طلعي اللي في جعبتك كله و مالك هم بنفهمه و نفهم ابو جده ما شي يصعب ع فردوس خخخخ أنا عندي خزعبلات كثييير بس احتريكم تقضون خلونا نتعرف ع كل خرافات المملكة وش ورانا و جعلناكم شعوبا و قبائل لتعارفو :17: بانتظاركم |
رد : خزعبلات ام حقائق؟ مارايك ؟
اذا نمتي و انتي عطشانة تجئ الغزالة و تشربك ..!!!
ياما عملت نفسي نائمة و عطشت نفسي عشان أشوفها لما تجئ لكن لأسف ما شفتها ههه كانت أمي تقولها لي لما اطلبها مويا بوقت متأخر و هي بتنام .. فتقولي نامي و الغزالة تجئ و تشربك ...!! الله يرحمك يا أمي و يغفر لك .. |
رد : خزعبلات ام حقائق؟ مارايك ؟
وعليكم السلام ورحمة الله وبركاته
عندنا وعندكم خير بنت الحكمي: استغربت ربط البرق واللون الاحمر أحنا مختلفين عنكم في اللون ههههههه فإذا كان فيه برق فأياكم والخروج إذا كنتم لابسين لون أبيض لانه يصيبه على طول وقريب صار عندنا مطر مصحوب ببرق ورعد وولد أخوي الصغير كان لابس دشداشه بيضا صار يبكي ويطلب من أمه أن تغير له ملابسه ,,,, متأثرين حدنا من الامور اللي مأثره فيني ومن وأنا صغيره أنه لا تمري على جزمه (أكرمكم الله) مقلوبه فلازم تعدليها وإلا ربما تنقلب الدنيا بالليل هههههههه وكنت اقوم في الليل ادور على الجزم في البيت اصلحهن هههههههههه لا تخبروا أحد عني :25::25: والمشكله أنه لغاية اليوم مقدر أمر على جزمه مقلوبه وما أصلحها :11: موضوع الطفل النايم لا يقبل ولا تتخطيه الكل راح يصرخ علي اذا سويتها فيه موضوع غسل الشعر وقت الحيض كنت اضحك لما اسمع هذا الشيء من عند امي او عماتي واقول معقوله اظل كم يوم ما اغسل شعري بالشمبو واستغربت لما عرفت صحت كلامهن عن تحذيرهن الدائم بعدم غسل الشعر اثناء الحيض لانه يؤثر على البويضات سبحان الله موضوع حلو الغاليه نوره تسلمي وإذا تذكرت امور ثانية راح اكتبها |
رد : خزعبلات ام حقائق؟ مارايك ؟
بنت الحكمي . يسعدك ربي ضحكتييييييييييييني ضحك
ام علف السيارة هذه حكااااية ولا الي اكلت الصاابون ياحبي لها .. فديتيك ياعسل والله ردودك تبرك القلب و تسعد الحزين .. كملي المشفرات . وصلنا للمقطع الحلو و قطعتي :) كملللي كملي ولا اعطيها ذكريات عالخاص و هي توزعها علينا منشورات عالخاص خخخخخخخخخ محلاهم عجايز زمان و قصصهم والله ماتنمل .. جدتي الله يرحمها كانت اول من تنزل من القرية للمدينة و كان اي حد عنده علاج او سفر او رايح عالمدينة يقعد عندهم بالبيت و هي تخدمهم مسكينة على كنس و طبخ و غسيل عاليد الله يرحمها و يسكنها جناته المهم خبرك كانو ينزلو عجااايز .. و جو من القرية مايعرفون اللمبات خخ وحدة دخلت الحمام و انتو بكرامة شافت اللمبة و نادت على جدتي تقول لها كيف تضوي هالفانوس خخخ كيف توصلي للسقف قالت جدتي مايهمك روحي هاتي ثيابك و انا اضويه ... المهم ضوته و العجوز كملت حمامها .. جت بتطلع نادت جدتي كيف تطفي الفانوس :( قالت جدتي انفخيه وهو يطفي والحرمة مسكينة تنفخ من قلبها و ماتنطفي اللمبة وجدتي تفول لها كمان زيدي انفخخخخخي .. انقطع نفسها المسكينة ... قامت جدتي حطت يدها على المفتاح و نفخت برقة و طفت :) قالت الحرمة .. لا والله هالفانوس متعود على نفسك خخخخخخخ نووورتي ياعسل و لا تحرمينا من هالمواقف العسل ... ودوري هنا و لا هنا لاعاد فيه خزعبلات ايه تذكرت يقولو .. اذا الطفل ما اتكلم يسوو عزيمة و ياخذو غسول الناس و يخلوا الطفل يشربه وعععععععععع ذكريات .. جومانة .. فتاة ناجحة .. منوووورااات |
رد : خزعبلات ام حقائق؟ مارايك ؟
وعليكم السلام ورحمة الله وبركاته
ههههههههههههه من جد وش هالخزعبلات طيب أنا من صغري أسمع إنه اللي يشرب لبن بعد وجبة السمك يتسمم ومادري عن صحتها بس ماتجرأت وجربتها خخخخ وحدة من الخزعبلات الهبلة إنه لو صارت عيونك اليمين ترف معناته أحد يذكرك بالخير ولو اليسار معناته يذكرك بالشر بس هي الأصل السبب يتعلق بالأعصاب بس أتذكر حاجة هبلة رح أجي |
| الساعة الآن 04:17 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©