|
ام زوجتي
السلام عليكم
كيفكم يالغالين بدخل في مشكلتي على طول وابي مشورتكم مشكلتي فيها عدة نقاط بحاول اقلكم بالتفصيل اول شي انا شاب عمري 29 سنه وزوجتي عمرها 21 سنه متزوج من سنه يعني في الصيفيه هذي تكتمل سنه على زواجي واحس انها ما راح تكتمل الله يعين كنا نعيش حياة حلوه انا وزوجتي على الرغم من ان زوجتي اشياء كثير ما تفهمها ما تتكلم كثير ما تعرف تمزح ما تعرف تضحك اذا قلت لها نكته مثلا ما تضحك لانها ما تفهمها والله يا جماعه ما ابالغ زوجتي عقلها بالمره صغير وما تفهم شي في هذي الحياة والسبب في هذا الشيء امها لانها ما تخليها تطلع من البيت زوجتي ما عندها صديقات المهم قبل شهرين اتصلت الام على بنتها وقالت لها خلي زوجك يجيب لك شغاله. جات البنت تقول لي امي تقول جيب لي شغاله قلت لها ليش شغاله؟!! بيتنا ما يحتاج كلها 3 غرف وحنا لوحدنا لا ولد ولا انتي تدرسي يعني ما عندك شي قالت مافي انا ابغى شغاله يعني تجيب لي شغاله قلت لها والله ما اجيب شغاله وقلت لها انا صرت اكره امك من كثر تدخلاتها في حياتنا المهم انا تزاعلنا وكل واحد نام بغرفه قمت لصلاة الفجر وادور للحرمه ماهي موجوده بالبيت!!! اتضح بعدين ان امها جت واخذتها بعدين كلمت امها قالت بنتي ما راح تطلع من البيت الا بشغاله قلت لها نفس الكلام شغاله ما راح اجيب قالت وبنتي ما راح تطلع قلت لها اعطوني حقي وخذوا بنتكم قالت طيب بنعطيك حقك وانا عارف انها كذابه المهم لها شهرين الحين في بيتهم .. خلال الفتره هذي جالسه تطلع علي كلام قالت اني مجنون وقالت فايز ما عنده غيره يقول لاخوه يجي ينام مع زوجته وحاجات كثيره اخرتها قبل يومين تقول اني اجي بنتها من ورا!!!!!!!! جننتني العجوز الشمطاء هذي الله ياخذها الحين انا افكر بالطلاق .. بس اللي خايف منه اني لو طلقت اكون ظلمت البنت بهالقرار غير كذا والله انا طابت نفسي من هالزواجه افيدوني بارك الله فيكم |
رد : ام زوجتي ( الله ياخذها )
يووووه معقوله لهذي الدرجه ماعندها شخصيه الله يعينك عليها بس اصبر ان الله مع الصابرين كلم ابو البنت اتفاهموا يمكن يقدر يدخل ويصلح الموضوع ويعقل بنته قلها بننفصل يمكن تخاف وتهون عن الشغاله الله يصلحها بس وكان الله في عونك00
موفق00 |
رد : ام زوجتي ( الله ياخذها )
الله يعينك عليهم
المشكلة البنت ماعندها شخصية معاهم معاهم عليهم عليهم والام نشبة والله اني مااحب انصحك بالطلاق بس مافية حل غير كذا دام لسى ماعندكم اولاد لان الام راح تتحكم فيها عطول وراح تجيب مشاكل سواء طالت او قصرت وبعدن شو الام ذي اللي تتكلم على زوج بنتها بهذي الطريقة اعوذ بالله مرة وقحة الله يعينك على مابلاك تحيياتي |
رد : ام زوجتي ( الله ياخذها )
يا زلمة شو قصتك والله حاسيتك زي الارامل اللي قاعدة وبتندب حظها ههه هذا وانت رجل وبتتشكى الله يعين النسوان
المهم نرجع لموضوعنا انصحك اتركها كمان شوي في بيت اهلها وطلع اشاعة انك ناوي تخطب وحدة ثانية واذا ما فيه فايدة دخل اخوالك وااعمامك واهلك في الموضوع للاصلاح ان يريدا اصلاح يوفق الله بينكما ومن راي انه اذا كان تدخل امها خفيف بحياتكم معليش تنازل وجيب الشغاله حتى لو بالساعة نسوان اليوم مدلعات وكل شي متوفرلهن ومع هذا مو عاجبهن شي لا حمدا ولا شكورا الله يهديهن مو كلهن علشان لا احد يزعل واذا كان تدخل امها بالشاردة والواردة يعني على كل شي بالطالعة والنازلة توكل على الله واستخير في بقائك مع الزوجة واذا ارتحت طلق وانت مرتاح الضمير والحل الاخير اجلس انت وزوجتك جلسة هدوء وخذها بعيد عن امها واعزمها برة البيت وتفاهم معها واذا حسيتها متنازلة شوي وشاريتك تحمل شوي وتعال على نفسك في النهاية القرار لك انت رجل واكيد عندك حكمة وعقل وبتعرف تدبر امورك وبنصحك نصيحة استشير استشاري اسري بمشكلتك واكيد راح يساعدك المهم خلي الطلاق اخر شي |
رد : ام زوجتي
أسمع يافايز وحط كلامي براسك زين
اللي يبيعك ويسترخصك لاتخاف أنك تظلمة ، وكرامتك فوق كل إعتبار إذا تبي حقك يجيك ثالث مثلث عليك بالآتي 1- رفع قضية نشوز في المكمة والمطالبة بالمهر كاملاً 2- رفع قضية على أم زوجتك بسبب إقتحام بيتك دون أذنك وأخذ زوجتك وحثها على العصيان والتمرد ، كما ترفع قضية أخرى وهي قذفك بشرفك ورجولتك !! 3- هي قالت بأنك تأتي زوجتك من المكان المحرم لتجنب إعطائك المهر ولتكون لهم ذريعة على ذلك ، فإن دارت عليك الدوائر ، طالب المحكمة بتحويل زوجتك للطب الشرعي للتأكد من هذا الموضوع. النوعية من هذه الحريم قليلات مروة وشيمة يافايز وجيب حقك لحد عندك وخلك رجل حازم دامهم وصلوا المواضيع للمصخرة هاذي أحتريت |
رد : ام زوجتي ( الله ياخذها )
اقتباس:
انت تقول ابو البنت ولو ابو البنت عنده شخصيه كان الام تمردت كذا!! اشكرك على رايك |
رد : ام زوجتي ( الله ياخذها )
اقتباس:
صادقه انا افكر في على المدى البعيد راح تتعبني الام هذي |
رد : ام زوجتي ( الله ياخذها )
اقتباس:
لا والله يا هدوء تدخلاتها كثيره ياخي ام تسأل بنتها عن اللي يحصل في غرفه النوم تشوف هذا تدخل خفيف!! |
رد : ام زوجتي
اقتباس:
واسال الله ان يكتب لي اللي فيه الخير |
رد : ام زوجتي
اخي العزيز:فايز
اذا الله منعم عليك طلق البنت ويعوضك الله واذا ضروفك الماديه صعبه طالب بالمهر والله يعينك ولكن البنت هذي من اولها مشاكل وكلاام يتعدا الحدود وقذف مستحيل تعيش معك بعدين هذي ام زوجتك راعية فاضيح توقع تطول السالفه بالمحكمه |
رد : ام زوجتي
انا مع اخي المتفائل بالله
تحاول ان تشوه سمعتك لسببين الاول ان تطلقها من دون مهر والثاني ان تشوه سمعتك لألا تستطيع ان تتزوج عليك بالحزم معهم واستعاد سمعتك |
رد : ام زوجتي
السلام عليكم
صراحة أنا مع الاخ المتفائل بالله!!! هذي اولها بس وما كملتوا سنة !!! في اعظم ممكن يجي بعد كذا؟؟! لا والله اشتري راحة بالك وسمعتك ولا هالدوخة بكرة ما تضمن لما يجو أولادك تقعد الجدة المحترمة تعبي راس أولادك عليك بكلام ما يقوله عاقل وتسيء لك في تربيتهم بما ان الام شخصيتها معدومة |
رد : ام زوجتي
اللي هدا اوله ينعاف تاليه !!!!!!!!! وانا اوافق المتفائل بالله بكل كلمة قالها !! واهم نقظة هي الطب الشرعي لانو لو سكتت راح ينتشر هدا الكلام عند كل الناااااااس !! سؤال صريح اخوي انت قبل لا تخطب استخرت ربي !! وانصحك بالاستخارة بكل امووورك والله ييسر لك اللي فيه الخير
ولا تطاوعها بكل شئ تقوله امها !! يا كرهي لهالنوعيات المتسلطة ,,,, والله يكتب لك اللي فيه الخير |
رد : ام زوجتي
اقتباس:
اي بالله باطالب بحقي وما راح اسامح امها والله لامرمطها بالمحاكم |
رد : ام زوجتي
اقتباس:
والطريقه الثانيه الوسخه اللي سوتها انها تقول اني اجامعها في المكان الغلط عشان تكسب القضيه على بالها مافي مستشفيات تكشف هالشيء شكرا لك اختي |
رد : ام زوجتي
طيب وش ذنب البنت تتحمل مشاكل امها
الطلاق والمشاكل كلهاوعلى راس البنت وممكن بعض الامهات تحسد بنتها اووتبي بنتها عندها وتسوي كذا ذكرتني بوحده نفس بس السالفه من الاب هو الي هاوش الزوج وهاذي البنت خربو عليها بيتها ولها فوق عشر سنين مطلقه االله يعين جد عمر الشقي بقي |
رد : ام زوجتي
اقتباس:
|
رد : ام زوجتي
اقتباس:
بس عارفه والله العظيم يا جماعه ما اكذب عليكم قبل زواجي حلمت اني شايل بنت صغيره (طفله رضيعه) بيدي المهم والناس تشاور علي وتقول هذي زوجته وانا كنت حزين مره بس للاسف ما اهتميت بالحلم .. قلت اضغاث احلام |
رد : ام زوجتي
اقتباس:
لو البنت تبغى تعيش حياة سعيدة لا تدخل اي احد بحياتها اي ااااااحد |
رد : ام زوجتي
مثل امي الغاليه تكرره كثير ..
اسأل عن امها قبل ماتضمها .. حتى الزوج لما يتقدم لنا امي تسأل عن الام واخلاقها .. اخوي انا مع الي نصحوك انك توقف الام عند حدها ..وتخليها تحسب الف حساب قبل ماتتكلم على عيال الناس .. الله يهديها دمرت حياة بنتها عشان مظااهر كذابه .. حريم بفلل ..وعندهم اطفال ماعندهم خدم .. الخدامه ضرورتها للي عندها اطفال صغار ..وصحتها تعبانه .. وعند الضروره تجيب الي بالساعه .. بس مااوصيك وانا اختك ..ان اكرمت اللئيم تمردا .. |
رد : ام زوجتي
بصراحة رد المتفائل بالله هو الحل الانسب لك و معه حق بكل كلمة ذكرها اسال الله ان يفرج همك و يسعدك الاخ
|
رد : ام زوجتي
الأم لا تريد طلاق ابنتها وكل ما تقوله ( تهويش ) لا أكثر
ولو أرادت تطليقها فالمحاكم موجودة ولتدخل أحد من طرفهم وعرض عليك فكرة الطلاق صريحة أظنها تريدك فقط أن تفعل ما تريد هي لابنتها وبالنسبة لقولها عن الوطء الحرام ستنكر إن وصلت الأمور للمحاكم وحتى من وصلهم الكلام وسمعوه منها مباشرة لا أظن منهم من سيشهد خوفاً من المشاكل لذلك خوفهم بهذا الكلام أمام العقلاء من أهلك وأهلها وأن يذهب بها أهلها لعمل فحوصات وعليه تتحمل نتيجة أخطائها وقولها الآثم ويحكم في هذه من هم أهل لها .. أعانك الله |
رد : ام زوجتي
الاخ الكريم
يبدو لي ان زوجتك عديمة الشخصية مبدئيا حاول تتخذ اي طرق اخرى غير الطلاق لانه البنت ممكن تكون قابلة للاصلاح لو صقلت شخصيتها وساعدتها تكون شخصية مستقلة ادعي لها ولامها بالهداية او انه ربي يكفيك شرهم واذاهم بدون ماتدعي على احد الله يجزاك بالخير وحاول الاصلاح واللجوء لحكم من اهلك وحكم من اهلها ولكن بدون رضوخ لطلبات امها الغير مبررة وسيكون موقفك هو القوي ولاتخلي كلام الحريم اللي ماله داعي يدمر بيتك واسرتك ناقش والدها وانتظر ماسيؤول اليه اجتماع الاسرة الذي تكلمت عنه بعد ذلك ان عادت زوجتك لك حاول تنمي ثقافتها وتخليها تدخل دورات تطوير ذات وشاركها انت بدخول بعض الدورات لتأهيل المتزوجين حتى تشجعها للحضور واجعل لها حياة اجتماعية لتخرج للمجتمع وتحتك بهم ولايكون لديها وقت فراغ ولا ضعف بشخصيتها تذكر ان اصعب سنوات الزواج هي السنوات الاولى والخلافات واردة ويجب ان يكون هناك تنازلات من الطرفين الزم الاستغفار اخي الكريم واكثر من الدعاء بان يدبرك الله بتدبيره ويكتب لك الافضل في حياتك واستخير ثم قرر القرار المناسب لك بناء على السلبيات والايجابيات لكل قرار ربي يفتح عليك فتوح العارفين بفضله |
رد : ام زوجتي
صراحه مالومك اتركها وعطهم درررررس بذات الام
خلها تعرف ومو من حقها تاخذ بنتها عشان شغاله لاكن الام عقلها صغير وذا البنت ماتقدر تتكلم اتركها افضل لو تحبك ماتتركك انا وجههة نظري الناس الي كذا ينعافون لان مو مقتنعين بحياتك لو انهم شارينك ماتكون هذي عاميلهم لاكن شارين المظاهر عشان تقول للناس والله زوجها جاب لها شغاله اتركها خلها تعرف الام ان البنت راح تجلس بحلقها وبظهرها ودام طلعت كلام اسمح لي مايستاهلون ودام مانجبت للحين افضل طلاق يكون انا ماحرض ع طلاق لاكن بدون طفل افضل من ان يكوم موجود قراراك صح وماظلمت البنت امكن الام تبغ تسوي مشاكل عشان تتطلقها بس خذ فلووووووووسك |
رد : ام زوجتي
القرار راجع لك انت وحدك
اجلس مع نفسك وفكر جيدا هل الام خذا ابنتها فقط لموضوع الخادمه وهل هم يريدون الطلاق وانت رافض وهل انت مستعد ان تبدا من جديد مع هذه البنت التي دخلت عليها والطلاق قد يوثر عليها فيما بعد وقد تكون ظلمتها بسبب تحكم امها فيها تستطيع ان توقف الام عند الحد وترجع زوجتك اذا انت تظن بان فيها ايجابيات اخرئ وبانك لا تريد ان تظلم واخيرا كان الله في عونك وكثير اسمع عن مشاكل تدخل الاهل وتنحل بسبب وقفة الزوج الجديه وبالتالي هو من يسمح للاخرين بالتدخل اما زوجتك واضح ان عقلها صغير والاختيار لك |
رد : ام زوجتي
اقتباس:
شكرا لك اختي |
رد : ام زوجتي
اقتباس:
عارفه ليش تسوي كل هذا تبغى تكون هي المسيطره على حياتنا وكلمتها هي اللي تمشي لكن بعيد عليها |
رد : ام زوجتي
اقتباس:
اتوقع راح تتعبني هذي العجوز خاصه انها بنتها مالها اي كلمه وما عندها شخصيه انا والله صابر على اشياء كثيره بس قلت يمكن مع مرور الايام تكبر وتتعلم لكنها تغلط كثير بنقلها اسرارنا لامها وفهمتها اكثر من مره ان هالشيء حرام لكن مافي فايده تصدقين ان امها تعرف كل شيء من اول دخلت البيت عندي الين اخذتها الحين كل شيء كل شيء |
رد : ام زوجتي
اقتباس:
اشكرك على مرورك دفىء |
رد : ام زوجتي
اقتباس:
لان بصراحه مافي سبب مقنع لوجود الشغاله هم يبغون يمشون كلمتهم علي كل مافي المشكله ان الام هذي محد قد قالها لا!! جيت الحين انا وقلت لها شغاله مافي فزعلت ويقولون هي عصبيه ومدري ايش لكن مع نفسها !! انا بسوي الشيء اللي مقتنع فيه واستشرت كثير ممن اكبر مني سنا قالوا اني معايه حق في اللي سويته انا بس ابغى ابري ذمتي امام الله والله يكتب اللي فيه الخير |
رد : ام زوجتي
الله يكون بعونك
هناك الكثير من الامهات والاباء يدمرون حياة ابنائهم العلاقه الزوجيه لابد ان لا يتدخل فيها احد الا في حال مشكله كبيره ويتدخل حكيم وليس شخص عادي اسال الله ان ينفرج همك وتنحل جميع مشاكلك وارجع زوجتك لصوابها وتتخلص من تحكم الام من دون مشاكل |
رد : ام زوجتي
انا من رأيي اترك بنتها دام مافي عيال
واذا هذا اوله بكرة شيطلبون منك سيارة وقصور اتركها والله يعوض عليك لانها بتقلب حياتك جحيم والبنت لو تبيك كان مارضت تروح من الاساس وخذ لك بنت بعمر 25 وراكدة وفاهمة وربي يوفقك |
رد : ام زوجتي
اقتباس:
بس ايش اسوي لها اروح اعلمها انا !! ما اقول غير حسبي الله عليهم الله يجزاك خير اختي |
رد : ام زوجتي
اقتباس:
والله يكتب اللي فيه الخير ويوفقك اختي |
رد : ام زوجتي
اقتباس:
وشلون عرفت انها نقلت كل شىء لوالدتها بهالشكل؟؟؟؟ |
رد : ام زوجتي
اقتباس:
بعطيك مثال مره جات اختي عندي البيت وكانوا يتجهزون بيروحون ملكة وحده من صديقاتهم (اختي وزوجتي) المهم جلسوا بغرفه النوم يتجهزون كل وحده تسوي للثانيه استشوار ومن هالكلام خلاص انتهت القصه هنا امها الحين بعد مشكلة الشغاله تقول فايز ما يتسحي يخلي اخته تدخل غرفه نومه وتقول ان زوجتي قالت لي قول لاختك لا تدخل غرفه النوم وانا رفضت قلت خليها عادي وقيسي عليها قصص كثيره بهالشكل بقلك قصه ثانيه مره زوجتي جتها التهابات يعني شيء عادي اغلب النساء تجيهم الام شكلها ما كان تجيها مدري ايش قصتها المهم جلست تسأل بنتها ليش الالتهابات هذي انتم كيف تتجامعون كيف يسوي لك وكيف وكيف (زوجتي اللي قالت لي الكلام هذا) |
رد : ام زوجتي
هناك رد اخي الكريم ^^^
باسم توفي وفيصل ..لاتنس قراءته |
رد : ام زوجتي
اقتباس:
تعرفين لو كنت اعرف المثل هذا ما كان حصل اللي حصل هههههههههه من جد والله انا ما اهتميت بالام سألت عن البنت قالوا طيبه وبصراحه قالوا الام كذابه شوي لكن قالوا ما عليك منها قلت فعلا ما علي منها واكيد ما راح اخلي الموضوع يمر بسهوله ومثل ما قلتي وان انت اكرمت اللئيم تمردا الله العالم اني كنت ما اقصر مع هالام اجيب لها الهدايا وازورها بشكل مستمر وناخذها نمشيها معانا الله يخليك اختي ويخلي لك امك ويجزاك الخير |
رد : ام زوجتي
الله يرضى عليك اسمع نصيحت المتفائل بالله سبقني بالرد بالاضافه لاترحم هالاشكال
وغير كذا اذا كنت تقول انك راح تجتمع اجتماع اهل لتصلح بينهم رجاااااااااااااااااء خاص خلك هادي ع الاخر ولا تطاول باي شي ولا تهدد حتى لا يمسكونها ضدك ويقلبون طاوله اللي مريت فيه مر فيه اخوي رغم انا حذرته مثل مانا جالسه احذرك لكن الله يهدي امي ضغطت عليه واجبرته يرجعها ف البدايه تدخلات ثم اخوانها جاو بيتنا يهددون نحن سكتنا حشمه لااخوي وبتهددي اخوي انه راح يركبهم قضيه تخيل رجعت ومسكت عليه انه يكلم بنت وهو بحكم مجال شغله استشاري لابد من حدوث هالشي وكلنا عارفين وتخيل طلعت من بيته مبيته النيه وانا احذر اخوي ولانها تاخذه بالحكي اخوي مصدق الى ان جلست 3 شهور عند اهلها فقلت له ترى راح يطالبونك بالنفقه وخلافه ورده يقول اصلا مايحق لها لانها هي اللي خارجه وتخيل وصلت الدنائه انها اتصلت ع اخوي تقول ابيك ورجعني وصلح ومادري ايش لان قبلها راح يرجعها ومنعوا يفتحون له البيت ومره الثانيه هذي تخيل قال اخوي ترى اذا رديتيني طلاقك قالت ابد والله اركب مااعيدها وتخيل راح دون علم احد ويوم جا ثاني يوم والا الشرطه مستدعيه اخوي بقضيه جته ع شغله انه متهجم عليهم وفيه اشهار سلاح تخيل اخوي يوقف عند بيتهم بياخذها يطلع اخوها ويرفع سلاح ع اخوي ويسحب مفاتيح السياره واخوي يدافع عن نفسه بيسحب المفتاح وصل لحد الباب هم يقالك بيضبطونها عليه قالوا متهجم عليهم اخوي الثاني قام وكفله ومن هول الصدمه وربي يبكي رغم عمره 33 سنه لانه ماضرها حتى تسوي كل هذا وغير كذا مدير مركز مرموق عندنا بالمنطقه وشخص الكل يشهد له يعني ليه التشويه !!!! ولم انتهت قام اخوي ورفع قضيه نشوز وتخيل اللي وقف بوجهه اخوي انهم راح يستدعون البنت اللي ذكر اسمها رغم والله انا شاهده عليها وكذالك زوجته قدام القاضي اعترفت انها كلمت البنت وقالت الولد مابيني وبينه غير اوراق عمل ودايم يساعدني وان كان يبيني اشهد راح احضر ولاخفت حتى هي شخصيا اتصلت ع اخوي تقول لا تتنازل عن حقك حتى لو ادخل المحكمه ماعندي اشكاليه فااخوي اضطر حتى لايورد اسم البنت كاستدعاء قدام زوجها وتدخل ف مداخلات تخيل طلقها وتنازل عن مهره وياليت سلمنا سعوا وراء البنت الين طلقوها وزوجها مو من النوع المتفاهم واستدعاء اخوي يطالبون بملابسها واغراضها هنا اخوي قال لها مهله اسبوع تجي تاخذها من البيت او ماله شي عندي قالت امها انا بجي وارقى وحمل ملابسها بنفسي هنا اخوي قال لا تبونها عند الباب بتاخذونها مااحد يدخل بيتي !! مشت الامور تتصل المحكمه بسالفه ضغط على اخوي قال اخوي للمحكمه ترى الملابس اللي عندي مو حق لها شرتهم بعد الزواج ويعطيني الحق الانكار لاني تنازلت عن حقي المهر بضغط من القاضي رغم انها هي اللي خالعه الموضوع !!! وماجوا لانهم خايفين يكون كمين لهم ونسينا الموضوع قبل يومين رافعين قضيه ثانيه يطالبون بالنفقه تخيل اخوي مطنش الامر ماحضر الجلسه,,,وله مطلق تقريبا فوق 3 شهور وربي البيت الناس تعرض عليه لما طلق يعني اخوي الحمد لله مايعيبه شي الله يحميه يارب ....لكن اهل البنت ليه كل هذا !!ياخوي رحمتها بكل السالفه يعني اخوي او غيره يمكنهم يتزوجون لكن البنات الله يستر عليهم والى الان اخوي يحكون اهلها فيه بمجالسهم من جانبنا تصدق مااحد من جماعتنا يدري بالسالفه الا الاصدقاء لانهم شهود ف المحكمه تخيل لان اخوي حجته اقوى اخوانها ازعجوه بالرسايل التهديد الى يومك وكلها اخوي حاطها محفوظه لساعه الحاجه يعني خلك حذر لا يصدر منك اي رساله تهديد لها او لااهلها او تسجيل صوت ...!!!!! لما اقول لك القصه حتى تعرف ترى هناك من يمر بنفس ازمك ويكون الضغط يسبب لك امر اخر انت ف غنى والان من كثر الضغط اخوي يبي يتزوج وبس حتى تحل عن سماها لكن لتعلم يااخوي نفس هالنصيحه نصحتها اخوي لاتتخذ قرار وانت مضغوط ..لاني قلتها له لن تترك سوى تزوجت او ماتزوجت لان بهالنوعيه ماتامنها ........................... الحمد لله وفضل من ربي ان مهره صح كبير وخساير ماراح يغير بالموضوع شي لكن ماتسوى عليك التبلي وانت ماسويت شي ياخوي لو تكون ملكه جمال ولو تكون غنيه او اهلها فيهم صفاااات زينه او تخاف ماتنقبل انك مطلق او يشوهو صورتك قدام الناس لا تتنازل او تبكي امك او ابوك حتى يصلحوا نصيحه اخت لاننا عانين نفس ماتعاني وانا من الناس اللي نصحت اخوي لكن لان الناس تقول له اسئل امك وخذ برايها وياخذ براي امي امي الله يهديها ""اميه ولا تبي مشاكل وهذي تاليها ""وانا لم يؤخذ برايي لان الجميع يقول اللي ماجرب مايحس ومادري ايش لكن احيانا هناك امور تبان من اولها!!!! لو قلنا ان زوجتك ماشاء الله ومادري ايش تقدر لما رفضت الشغاله ووضحت لها حجتك سمعت رايك وقفلت الموضوع مو تسمع امها بالحكي!!! يعني مثلا بعد سنتين بتصير ام وبعدين كيف بتدير حياتها اذا كانت القرارات امها هي اللي تقرر مو هي اجل جب امها تعيش معكم ع هالحال!!!! خلاص تزوجت اذن تحسب ع البيت هي العمود الثاني فيه وان بغت امها ف الشديد القوي لو بتاخذ رايها فيه اما كل شي اجل وش استفدت وماتسوى صدقني اذا كانت كل اسرارك تطلع بلا علمك !!! لانك مطلع على كل شي وهذا يخليك لما تقدم لااحد اختر البنت مو على عمرها على عقلها لان هناك بنات بعمر كبير لكن العقول صغيره ..خذ وحده ناضجه فوق الخمس والعشرين وسالفت التشرط الزايده مايستخدمها الا لكي مايبقى معك ريال حتى لا تاخذ ثانيه نصيحه واحفظها تمام التمااام اياااااك ثم اياك ثم اياك اذا رجعتها تامنها ع سر او شي يستخدم ضدك حتى لو كنت نظيف هناك زلات بعض الحريم الله يهديهم يكبرونه سواء هي او زوجه ثانيه احترم زوجك وقدرها ولا تظلمها لكن امورك الخاصه سواء الماليه او العمليه اياك تامن البنت لان هناك بعض بنات هم اساس البلاء وتضيع الازواج,, الله يوفقك ويحفظك ويفك ازمك ويسهل دربك ويسهل درب اخوي ويرزقه الزوجه اللي تسره وتنفعه وتعينه ع دينه ودنياه ان شاء الله تبشرنا ان حقك خذته لا تتنازل عن حقك ولاترحم وماذكرت قصه اخوي الا للعضه والا كان اكتفيت بالمشاهده وخلاص راي المتفائل كافي قو قلبك واللي اوجدها اوجد عوائل تستند عليها وعلى رجالها وماراح يخيب ربي رجاء ناس فاهمه وغير كذا لما تتناقش خل حديث مدعوم باحاديث وايات وكذالك زوجك يحرم عليها ابداء اسرار الفراش مهما كان حركت البنت ماله ذنب وغيره ...ليش يزوجوها اذا هي ماهي قد المسؤليه لو انك شكيت ان زوجك مهمله بالتنظيف او الطبخ كان قلنا تتعدل وغيره اما سالفت التعدي اللي جالسه تصير لا تنسى ذيل الكلب اكرمك الله مايعتدل ولا تاخذك الرافه ان كنت فعلا رجل بمعنى الكلمه لم تقصر بحقوقك وواجباتك الزوجيه فانت لم تظلم وان كان ماذكر تبلي لا تدخل ف سواليف الحريم ولا تراد معها ولا مع اهلها بتلفونات وغيره ولا قدام الوجاهه الناس حتى لا تحسب ضدك شهود او تسجيل صوتي احذر اللي راح يواجهك يكون هناك شهود عادلين موجودين ام سواليف الحريم والله لو تحطها قدام القاضي راح تنكر مثل مااخوي مرمطهم وصدقني القاضي ماقدر يجاوب اخوي ع كل الادعاءات لكن سمعت البنت اللي دخلت بالسالفه هي الي اجبرت اخوي يتنازل عن المهر كنوع من الستر وتخيل الله عوضه من بعدها برائسه مركز ف منطقه الوسطى مرشح اهو وكل المواقف اللي ذكرتها اخوي تعرض لها وكان ساكت مثل مانت سكت وربي يشهد رغم انه كان ساكن فوقنا لكن منعزل باب عنا وربي كان هناك زعل بينه هي وهو وربي مااطلعنا عليه ولاسمعناه ولاحتى شكى لنا وهي يوميا ترفع التلفون لااهلها حسب هو ماذكر هالشي بعدين بعد الطلاق وغير كذا صدقني مادرينا عن هالحوسه الا لما جونا الساعه عشر باليل يصارخون عند الباب بيتضاربون ومن بعدها اخوي قال لنا رؤؤس اقلام حتى يحافظ ع هيبته وصدقني ياخوي عليه هيبه ماتحصلها ياكل ويشرب معك ويسولف ويدير مركز تحت ادارته الجنسين ويرجع للبيت فوقنا رغم انها مقصره حتى بحقوقه ولكن كان ساتر ساتر ع الاخر حتى صار الموضوع علنا هو تقريبا صدر منه تصرفاته احتمال مثلك واكبر نعمه اقول له اسجد شكر انك مالك عيال منها !!! لما احكي لك صدقني مااستعرض قدامك الا حتى تتضح لك الرؤي والقلب داعي داعي لك جمد قلبك كما نلاحظ ف تجاوبك مع الردود ونضج ادارتك لحياتك ولا تنسى سالفه ان البنت عايشه بمستوى معين ومادري ايش يااخوي اي بنت بتقدم لها خلك واضح من البدايه ولا تعشمها سوى غنيه او فقيره تقبل فيك كما انت باللي يرضىي الله والا بلاها من زيجه .... لان الاحوال الماديه الحاليه الله يكفينا الشر وكرر الاستغفار والتسبيح وديمومه الوضوء والدعاء واللهم اجرني بمصيبتي ةاخلف لي خيرا منها وحسبي الله ونعم الوكيل واللهم اني مغلوب فانتصر موفق |
رد : ام زوجتي
اقتباس:
فيه شبه كبير بين قصتي وقصه اخوك الله يكون بعونه ويرزقه ببنت الحلال اللي تنسيه مشروع زواجه الاول بالنسبه لكلامك فأنا استفدت منه الكثير الله يجزاك الف خير |
| الساعة الآن 10:23 AM. |
Powered by vBulletin® Version 3.8.12 by vBS
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©