|
انقذوني
بسم الله الرحمن الرحيم السلام عليكم ورحمة الله وبركاته اليوم كان عندنا بالبيت انجاز عظيم وهو قدوم الوالد والوالده ( الله يطول باعمارهم )) على الفطور ,,, وكنت متشقق من الفرحه لانه الوضع كان هادي ,, وفطرنا وسوالف بين الوالده والمدام بكل هدووء ,,, ندخل بالموضوع ,,, الوالده الله يهداها قبل لتطلع من عندنا (( لانها يحليلها ما تحب تصلي غير بحجرتها ساروا قبل صلاة العشاء)) :30::30: حذفت قنبله على المدام قررت حلوة لبن أنه يوم الاثنين يكون الفطور على حرمي المصون ,, وفي بيت الوالد ,, طلبت من زوجتي تي من وقت عشان تعدل الفطور ,,, وطبعاً من غير أي مساعده ,, ما عدا بشكاره وحده وهي اللي عارفه أغراض المطبخ ولا مالها علاقه لا بتقطيع ولا بطبخ ,, كله على المدام ,,,, طبعاً الوالده لاحظت تغيير ملامح زوجتي واستنكارها لهذا الطلب الشنيع ,,, لكن الوالده ما قصرت قالت لها احن بكملين اسبوعين برمضان وكل حريم عيالي طبخوا لنا برمضان ,, وقالوا لها باجي دور على حرمة ولدج خالد :21::21 (( الله يهداهم فتانات )) ,,, دخلت بالموضوع بالعرض قبل ليقلب هواشه من بينهم ,, وضربت صدر لوالده وقلت لها تم فالج طيب ,, ولكن بشرط أكون انا وياها ((( فلسفتي بتضيعني :(:(:()) وافقت الوالده المسكينه وقالت اترياكم يوم الاثنين ,,,, تصدقون عاد أصلي تراويح وأنا أفكر شو بنطبخ :24::24: ,, ولا بعد حضرتي قلت لوالده فالج طيب ترا بعد لو تبين بنسويلج الحلا :d:d:d وبيني وبين نفسي أقول يتحمدون ربهم لو حصلوا شيء ياكلونه على الفطور :d:d عقب ما رديت من صلاه سألت المدام وكلي ثقه ,, ها شو رايج شو بنسويلهم :26::26::26: حزتها ياتني قنبله ثانيه (( منو قايلك تجاوب عني ,, تحمل واطبخ انت )) :25: ولكنها طلعت كريمه قالت اذا بسوي لهم شيء بسويلهم سلطة فواكه (( انجاز بصراحه :d:d)) تخيلت الوالد والوالده وأخواني وحريمهم يأكلون سلطة فواكه فقط لحين ابغي مساعدتكم بذات خواتنا طباخات ساعه كم المفروض ندش المطبخ أنا حاط بالي عقب صلاة العصر نتوجه لمطبخ الوالده ؟؟؟ عاد احن عندنا ما يملي عينهم غير طاولة الاكل تكون مليانه (( والله مساكين )) ترى لا احد يقول اعتذر ,, لاني اكتشفت من أخوي أنهم من أول رمضان وهم يفطرون بيت الوالد يتيمعون وهم حريمهم ,, وكل يوم على وحده الفطور ,,, وكنت انا وزوجتي مب في الحسبه شكلنا ولاحد ياب طارينا وعبرنا :(:(:( |
رد : انقذوني
حط من ضمن الاشياء سمبوسه سهله وسريعه
وتعلمو بعض الاكلات من طباختكم اللي في بيتكم وحاولو تشاركوها بروفى يعني تمهيد للمهمه هههه الا بسألك وين موضوعك اللي نزلته امس مالقيته؟ |
رد : انقذوني
الله يعينك الصراحة
لا تعليق |
رد : انقذوني
مع انه دموعي كانت اربع اربع وفيني قهر العالم كله الا ان موضوعك خفف عني وقلبت أضحك :) طريقتك بالسرد لطيفة ربي يسعدك انت ولجين :)
شوف عندي خطة رئيسية وخطة طوارئ :d الخطة الرئيسية ان تختار انت ولجين الطبخات اللي ناويين تعملوها وتطلعوها من النت وتختاروا من بين الوصفات اللي تحصلوها وصفة سهل فهمها عليكم .. وتجمعوا كل الوصفات وباكر الظهر تنزلوا أنت ولجين مطبخ بيتكم وتقول للطباخين نبغى نطبخ ذولي الوصفات تحت اشرافكم .. وتسوونهم كلهم والطباخين يعدلوا ويشرحوا لكم الى أن تستوعبوا الوصفة تماما .. وبعد باكر تروحوا مطبخ الوالدة الظهر مو العصر وتبدؤوا على مهل وبثقة تاااااااامة :22: خطة الطوارئ تروحوا بيت والدتك وتعملوا صينية دجاج وخضار باللحم ( أشياء سهلة ) والصعب تشتريه انت بسيارتك مثل الشاطر وتهربه تهريب لداخل مطبخ الوالدة وتكت الأكل داخل قدرهم وكأن انتو اللي طبختوه :24: وبث وسلطة الفواكه تحلية لطيفة .. ترى مو كل احد يعرف يضبطها مو مهم الأكل .. المهم انه الوالدة ما عادت متضايقة مثل قبل وطلعت اللي بقلبها ورضت عنك وعن بنتها لجين ربي يحفظها لكم ويرزقكم رضاها دوم . |
رد : انقذوني
عندك قسم الطبخ بالمنتدى ..
طب وتخير ... , اتمنى الا ياخذ الموضوع اكثر من الازم .. |
رد : انقذوني
اولا اكتب اش الاطباق اللي بتسوونها من اليوم ولا تكثرون ثلاث اصناف مع شوربه وحلا كفايه خذ الوصفات من النت والافضل كتاب طبخ عشان يكون معاكم في المطبخ ترجعون له عند الضروره اقترح صينية خظار بالدجاج وصينية مكرونه وسنبوسه او اي نوع فطاير مع سلطه و شوربه وحلا المفروض تدخلون المطبخ من قبل العصر بوقت عشان تخلصون بدري اهم شئ التنظيم وتقسيم الشغل بينكم بالتوفيق ان شاء الله |
رد : انقذوني
ماشاء الله تبارك الله يعني انت ولجين بتجهزون فطور حق العائلة يوم الإثنين طيب يابو خليفة على كذا انا اشوفك منحاس بالمرة بالشغلة انا اقترح عليك تصلي صلاة الفجر وتطلع من المسجد ولجين تكون صلت وتجهزت وتمر عليها وعلى طول بوجهك على بيت اهلك ولا يردك إلا المطبخ وشوفوا شغلكم من الفجر علشان تخلصون بدري وحتى لجين لو ماتعرف لطبخ خلها تسليك بالسوالف وانت خلص الشغل
شوف انا عندي اقتراح اسهل واحسن وهو مادام ان الوالدة الله يطول بعمرها مصممه على انه لجين اللي تطبخ لها وانت قررت تساعدها عندي لك شور وهو جد الجد وليس مزح اطبخوا الوجبات عندكم في البيت يطبخونها الطباخين وخلهم يسنعونها ويضبطونها ويطبخون وجبات تختلف من صنف لآخر وانت شيل القدور حقت اهلك وجيبها للبيت وان امكن روح شيلها من ليلة الأحد علشان الطبخ يكون فيها وبعد مايخلصون الطبخ شيلها على السريع لبيت اهلك وحط القدور على النار وفي كل قدر ملعقة وخفض النار ونادى على الوالده وخل لجين توقف وتحرك في القدر بالملعقة والبسوا ملابس المطبخ وافرك فيها شوية بصل وشوية صلصة وشوية ثوم وبهار وشمر عن سواعدك وامسك الملعقة الثانية في ايدك ونادي للوالدة وقول لها تعالي يايمه شوفي ايش رأيك اليلة بالفطور كيف تتوقعين بتطلع السفرة وحركوا القدور قدامها وقطعوا الخضار والفواكه علشان هي تنبسط وارفع الصفارة اللي بقدر الضغط وخل كل الأدوات الكهربائية بالمطبخ تزمر زمير عاد هاذي خطة ان شاء الله انها تناسبك وبقول لك كلمه واتمنى انها ماتضايقك المفروض ان الوالدة الله يحفظها وهي تدري ان زوجتك ما تتقن الطبخ ولا عندها خلفية عن المطبخ انها ما تطلب هالطلب من لجين ولا تسمع كلام زوجات اولادها الباقين وكمان هي تعرف عن وضع وظروف لجين لاكن مادام ان امك الله يحفظها لك اللي طلبت هالطلب من لجين تستاهل ولأجل عين تكرم مدينة وان شاء الله ان لجين تقوم بالواجب وازود وماراح تقصر وتكون بنت سنافيه وسنعة وماراح تفشلك ولا تخيب ظن خالتها فيها وبالتوفيق لك وللجين يارب . |
رد : انقذوني
انصحك بالمفرزنات تفك ازمه حيييييل
خل الخدامات يصلحونها قبل العزيمه بيوم ويدخلونها الفريزر واذا جاء يومكم بس شغل الزيت وواشتغلوا بالقلي اللي يصلح للتفريز سمبوسه جبنيه سبرينق رووول اصابع السمبوسه بيتزا بس تحمر على خفيف وتدخل الفريزر الحلا عادي اذا صلحتوه قبل بيوم ماراح يخترب << خلوا الخدامات يصلحونه |
رد : انقذوني
حابه اخبرك النت مو مقصر تدري انه فوني ادخله معي المطبخ اكتب اي طبخه بالصور خطواتها تطلع بالضبط وبالتفصيل يعني النت عندك مريح بحتى طريقة الشوربه والرز وكل شي بالصور بس حاول السحور تسوى طبق وبكره بروفه النص الثاني عموما اهم شي الاساسيات والحلا يكفى صنفين
بعدين خلي النيه تفطير صائمين زائد بر للوالدين يعني شوف الاجر ماشاء الله |
رد : انقذوني
صحيح مو كل شي فيت اهلك اعمله مثلا الحلا جيبه جاهز من بيتك عشان تدارك الوقت والقلى خله في ببت اهلك بس زي ماقالت وحده من الاخوات خذها مفرزنه من بيتك وبس تقليها في بيت اهلك ا
|
رد : انقذوني
اقتباس:
بصراحة الي سوتو أمك شي طيب ولصالحك انت ولجين أنا ودي أقول الكلام من زمان بس أخاف لجين تزعل أو ينفهم كلامي غلط هذا تشجيع للجين بالطبخ ويسير عندها تغير بحياتها يعني لو إنك إنت طلبت منها في يوم من الأيام إنك تحب تاكل من عمايل يدها إنت تشجعها ويمكن تسير تفكر وتبحث في النت وغيره عن الأكلات والطبخ على القليله تنسى شوي من همومها وتعرف ان حياة البنت غير حياة المتزوجة بالعكس هذا شي جميل إنت شجعها خليها تصدمهم كلهم بعمايلها وتكون أحسن منهم ويمكن تدخل فيهم أكثر خليها بداية طيبة خلي لجين تغير شوي عن هالروتين اليومي وأحلى شي إذا كنت معها والله بتنبسطو كثير وبعدين سوا أشياء بسيطة يعني مثلا المندي مع سلطة وشوربة وسنبوسة وحلو وخير ونعمه الله يوفقك يالجين وترفعي راس زوجك فيك بطبخك شدي الهمة |
رد : انقذوني
ليش ماتخلي البشكارات , يسوون الاكل - طبعا يجهزونه في صواني - ( بدون محد يدري ) وانتم بس على النار مباشره
, والحلا من بدري كمان يسوونه , وتهريب على بيت أمك , واذا أحد صادفكم بالصدفه , مثل امك اوابوك , قولهم لجين مجهزتها من بدري , لأن فتره العصر قصيره , وماتكفي طبخ , والحلا لو كاسات أفضل , عشان ماتظطر لجين تسوي شئ هناك ومن الأشياء اللي المفروض تتسوى من بدري , ورق عنب سمبوسه , معجنات , كمان سوو عصيرات - عشان تكثر السفره - من بدري وماتخرب نصيحه : لاتروحون من بعد العصر , الوقت مايكفي من قبل العصر , على الأقل تجلس تسولف ويا امك وتلهيها , وماتخليها تنتبه شي |
رد : انقذوني
هههههههههههه
معليش ابوخليفه اسلوبك موتني ضضضحك ياخي من جد ورطه, بس تدري ... الخدامه اللي بتدخل معاكم هي اللي دربوها على الطبخ من اليوووم , وخلوها تطبخ وانت وزوجتك تقطعون سلطة فاكهه:d:d سؤال: ألحين اللي عليكم كل الفطور أو الطبق الرئيسي فقط؟ وبعدين شف العضو (المتفائل بالله) مسوي مجبوس خله يعلمك الطريقه |
رد : انقذوني
ههههههه أبو خليفة.... مين داعي عليك هذا رمضان.... مصيبة وطاحت على راسك..... أنا رأيي تشتري كيس كبير وتهرب فيه طباخ أو طباخين ذو حجم صغير وسهل حملهم ينقذوك من المشكل الذي انت فيها:d..... وإذا دخلت المطبخ أغلق الباب جيدا وضع خارجه لافته ممنوع الدخول منطقة عسكرية:d:d.... من كل عقلك أنت تفكر أنك تطبخ انت ولجين للعائلة الكريمة كلها.... ولوحدكم...... صعب هاذي.... تذكر أخر مره طبخت فيها انت ولجين.... هو كان طبق سلطة فواكه.... وأكلته من الأرض:29::29: أرى أخي أبو خليفة تكتب ورقة إعتذار للوالدة الكريمة مع تبرير كامل وصريح أحسن... بان لجين ما عمرها طبخت... وتاخذ لك كلمتين من الوالدة أحسن من أنك تتبهدل أما كل العائلة.... يعني إختر أقل الأضرار..... صدقني لجين مستحيل تتحمل مسؤولية مثل هذه.... وستجد نفسك أمام النار لوحدك.... واللي يقولون لك تعلم وحمل من الأنترنت... أقول هذه عزيمة للعائلة كل.... وليست وجبت سوندويتش.... شوفلك طريقة تهرب الأكل أو تجيب معك طباخك الخاص.... أي حل أخر لايمكن ولا تفكر فيه ويعتبر محاولة فاشلة.... ولا تنتظر لجين هي من الأن زعلانه وستكون مشاهدة يوم الطبخ.... ننتظر أحر من الجمر يوم العزيمة:22::22:.... |
رد : انقذوني
..... والله شي يسر الخاطر عني خبر سار بالنسبه لي ان الوالده وزوجات اخوانك
صاروا يعتبرون لجين الغاليه وخالد المحترم عايله (العقبى نسميكم أم وأبو) ومن باب تقريب العلاقات وهذا تحدي للجين وهي قد التحدي بتثبت للكل انها طباخه ولا أطيب من طباخها وبالنسبة لطلب الوالده حابه أوضح للجين هذي بشرى لك خالتك ماترضى زوجات عيالها ينتقدونك بشي وحبت تثبت لهم انك قدها وترفعين راس خالد وأنتي نفسك بتحبين اللي سويتيه وبتكبرين بعين الكل وكلنا بدينا مانعرف شي وأول تجربة عزومه لها طعم خاص ... الله يوفقك يابو خليفه والله كلامك درر ايو الله ادخل المطبخ وأوقف مع المدام وهذي بحول الله تدفع لجين للثقة والاعتماد ع النفس ... وتدعم موضوعكم ومثل ماشفعت للجين عند الوالده يارب تشملك شفاعة الرسول اللهم آمين حاول وانت بالمطبخ تبين للجين فخرك وسعادتك .. ..( وبغيت أحط فكره دلوعه بس خفت لجين تزعل بلاها) وعادي التوتر وحتى لو ماكانت الأطباق قد المطلوب المهم ان لجين وخالد قدموا للأهل شي ولو تبي لجين نساعدها باختيار الأطباق السريعه اللذيذه اللي تجمع بين الشكل والطعم نقدم لها ومن عيوننا وماراح ننساكم من دعواتنا لجين تكفين هذي فرصه نادره تثبتين لخالد والكل انك تبارك الرحمن طباخه ماهره وأنت عاد ياخالد اشكر الوالده لتقديرها ونبه بأدب انه المرات الجايه صعب تقوم لجين لوحدها بالعمل لأنهم تبارك الرحمن كثيرين وعدد الأصناف المطلوبه كثير وهي وحدها ماتقارن بزوجات اخوانك التانين وشوي شوي وبتشوف لجين تسوي اللي ماينتسوى .... أنا اليوم عازمه اهلي واخواني والله زوجي ماقصر دخل معاي وساعدني الله لايحرمه الأجر ... ماأدري عن طريقتكم لازم لحم ورز اذا هذا جيب الرز من مطعم والمقليات روحوا لسوبر ماركت وبتلاقوا أشكال وأنواع بس حطوها بالزيت وقدموها واذا تبغى لجين لمسات للمقليات وتغيير عندي مقترحات والحلى تسويه قبل بليله نوعين حلى وأصابع عروس ماأبسط منها تلفها قبل بيوم وتقليها وتحط عليها حليب مركز وتسوي العصيرات أول العصر وصينيتين خضار وسمبوسه أكيد عند أهلك ملفوف من فتره بس يقلى المعجنات صعبه على لجين كمبتدئه تستبدله برولات من التستوالشوربه لها طرق مختلفه عندي طريقه مرره سهله ولذيذه بس ماأعرف تحبون البيضاء أو الصلصه الحمرا أو العدس .... الله يوفقكم تحمست معكم مرررا وكتبت كلام يمكن ماله داعي الخلاصه اني معاكم دعواتي ... طمنونا |
رد : انقذوني
الله يهداهم أخواني من لحين بدوا بشغل لطنازه كل ما ساعه مطرشين مسج ,,, وعاد واحد فيهم قايل شكلي بتسحر عدل يوم فطوركم (( بينقذ روحه من المجاعه اللي بتستوي )) لا تحاتون أنا متفائل (( ثقه بتضيعني )) اذا ما كلوا صوابعهم بعد من حلاة الاكل المشكله فيهم أنهم يحبون الاكل (( الله يهداهم )) عيش ولحم شوربه لقيمات بلاليط هريس فريد...........الخ أتوقع مافي جدامي غير أني اطبخ بيتي وأهرب الاكل لبيت الاهل لكن ناوي وقت الفطور أنسحب بسرعة صاروخ لي حد يتفلسف ويسال على الطريقه (( هني الوهقه )) |
رد : انقذوني
اقتباس:
|
رد : انقذوني
اقتباس:
................... |
رد : انقذوني
الله يقويكم يارب انت ولجين تنقوا الشغلات السهله شرات التوست وغيره ولاتنسون ترزون لنا صوره من فطوركم،،
وعليهم بالعافيه مقدماً . |
رد : انقذوني
اسمع ابو خليفه فيه مجال تسوون بالبيت
وتاخذونه معكم لبيت اهلك اذا فيه مجال بنزل لك وش تسوون ؟؟ الحل الوحيد تصلحون بالبيت وتاخذون معكم وتعذر اولا بالوقت مافيه وزوجتي ماتحب تشتغل بغير بيتها انتظر ردك |
رد : انقذوني
اقتباس:
الوالده قايله لجين تعالي من الوقت عشان تعدلين الفطور ,,, الله يهداج هي تدري أنه لجين ما دل صوب المطبخ ولكن هذا اللي مفكر أسويه اطبخ بيتي وحول لبيت اهلي من غير ما يحسون ولكن الوهقه لو احد سأل شنو الطريقه هم أكيد بيسألونها هي أما انا مالي علاقه بالموضوع :22::22: |
رد : انقذوني
طيب ليش ماتعزمهم في بيتك ؟؟؟ وتنحل المشكله ؟؟ ويجون ويلقون كل شي جاهز ؟؟ وعادي اذا احد سأل عن الطريقه ؟ أسأل الطباخين وخذ نبذه بسيطه ؟ مولازم تقولهم كل شي , قولهم الله يحيكم عندي ببيتي ؟
|
رد : انقذوني
الله يعينك .. أو يعينكم ..
الأخوات ماقصروا .. وكلام الأخت ريفان أفضل شيئ .. إنكم تسون الأكل في بيتكم مهما كان .. هذا أفضل .. ! وحتى يمكن الإستعانة بأحد من أقارب الزوجة لعمل بعض الأكلات .. يوووه برمضان ما فيه أفضل من الفطور مع الزوجه والأولاد وبالبيت .. عدا أن يكون مع أحد الوالدين .. غير هذا لا للفطور خارج البيت .. |
رد : انقذوني
اقتباس:
لكن مب طول الشهر لو كل اخر الاسبوع مب مشكله تجتمع ويا الاهل ,,, أهم حاجه أصحاب البيت هم اللي يتحملون الطبخ :d:d |
رد : انقذوني
اقتباس:
لا والله بيت الوالد أرحم تدرين ليش ,, لانه لو في بيتي بيكون عدة مهام مناطه علينا :22::22::22: الا وهي: استقبال الضيوف الطبخ مجابلتهم والجلوس وياهم هذه 3 مهام ولكن بيت الوالد مهمه وحده وانتهت سالفه ,,, بعدنا ما وصلنا للمرحله هذه نستقبل ونرحب ونطبخ ونقوم بالواجب إن شاء الله عقب كم سنه :d:d |
رد : انقذوني
طيب اسمع طال عمرك
الحلا نوعين بسبوسه + كنافه = كلهن سهلات ولا يحتاجن تبريد ولاتقول مابيضبطن بيسيح وكذا اسهل شي تبي الطريقه نزلت لك تراي مشهوره بضبط الكنافه 😁 الباقي 1سمبوسه باكر يشتغل عليها الطباخ يلفها ويدخلها الفيزر 2كفته بطاطس وتونه تتصلح وتتكور باكر وتدخل الفيزر لوقت القلي يوم العزيمه 3بف يتحشها دجاج طبعا بعد هو يسويه الطباخ الاحد ويدخل الفيزر لحد يوم العزيمه وقت القلي يطلع من الفيزر تبي طريقه البف ابشر فيها 4 بيتزا ولا اسرع منها ويكون بيوم العزيمه ماعند الطباخ الا يطلع من الفيزر ويسويهن بالفرن كل شي جاهز ويرتبهن بصياني جزا للحريم وجزا للرجال ويكون باقي الاطباق الاساسيه رز وهريس ع قولتك خذهن من بيتك بحافظات وبس ولو قالو شي قل اهم شي تاكلون مابيفرق طبخت بيتي او بيت ابوي والقهوه خذها من بيتك بالترامس وبس |
رد : انقذوني
ايه صح والعصيرات خذهن جاهز من السوبر ماركت مب لزم يكون شي طازج
وادخل انت وزوجتك روسكم فوق معكم صيانيكم تهبل ومرتبه ولا احد يتكلم الاكل ووصلهم وين مانطبخ مايهم |
رد : انقذوني
مادري احس ضاق صدري معكم
ودي اجي اطبخ لكم 😭😭😭 |
رد : انقذوني
اقتباس:
لا تحاتين احن ناكل على طاوله وحده اخواني وحريمهم يعني ماشي مشكله بترتيب كله بينحط بنفس المكان ,, وهم ما عليهم غير يزطون :(:( هو شكله مافي جدامي غير هالحل الطبخ بيتي |
رد : انقذوني
اخي الفاضل ابو خليفة بماان اصلاح الافطار امر لابد منه وهناك بشكارة ستكون مع زوجتك فاتبع التالي احضر احد الطباخات من منزلك بحجة انها البشكارة التي لاتستغني عنها زوجتك ومن المؤكد انها ستدخل معها المطبخ ولااظن والدتك ستركز في الامر كثيرا حتى وان جاءت والدتك الى المطبخ فاطلب منها بشكل لطيف العودة الى الصالة مثلا بحجة رغبتكما في اتمام الطبخ بمفردكما ولااظنها سترفض طلبك والبشكارة الخاصة((الطباخة))لن تقصر سقوم باللازم واكثر ولكن الاهم هو تعاون زوجتك وتفاعلها ولو من باب ايهام والدتك بانها تقوم بالطبخ::::كان الله في عونك اخي الفاضل
|
رد : انقذوني
اقتباس:
|
رد : انقذوني
مادام الدعوة تحدي وطنازه هرب طبخ جاهز من بيتك
واللي بيسأل عن الطريقه ، قل طووويله وصعععبه برسلها لك ع الايميل خخخخخ |
رد : انقذوني
لجييييين تكفين طلبتك
تدخلين المطبخ مع الطباخ باكر وتطلبين منه الاطباق وتحطينهن بالفيزر وتجهزين كل شي بيتك وتاخذينه جاهز وانا معك اي شي تبينه ابشري فيه بس تكفين تكفين الله يشفي ابوك ويرده سالم لك ترفعين راس زوجك وتسكتين حريم اخوانه هالفتانات |
رد : انقذوني
اقتباس:
والله وانا اخوك انا ويهي لوح مب هامني هم ايش قايلين ,,, أنا أحاتي ردات الفعل اللي بتصير عند طرف الثاني عشان جي ابغي الموضوع يكون 100% |
رد : انقذوني
ابوووو خليفه مب وقت استهبال وردك حيااك
تكفي اتفق مع زوجتك وش وضعكم وش بيسوي الطباخ يااااربيه احس كبدي ولعت نااار ماحب حركات هالفتانات 😡😡😡 واحب الزوجه ترفع راس زوجها بذات مثل اخوانك هالي يطنزون 😡😡 |
رد : انقذوني
اقتباس:
يا بنت الحلال لا تعصبين ولا شيء ,,, خليج مثلها يالسه بصالة رسم ولا على بالها الموضوع من أساسه :25::25: |
رد : انقذوني
اقتباس:
هههههههههه حط ع السفره لوحه (زط وانت ساكت) عشان تسلم منهم الله يعديها على خيررر |
رد : انقذوني
ياااااربيه وش رسمه هالوقت
مااقدر وربي كبدي مولعه لا وامي عندي قلت لها سالفتكم قالت ليتهم قريبين نفزع معهم 😔😔 المهم اجلس معها وتفاهمو وطمننننني تكفى |
رد : انقذوني
السلام عليكم ورحمة الله
أحس الموضوع عادي جدا لا تتوترون انت عارف ان زوجتك ما تعرف تطبخ عشان كذا ما فيه احسن من الوضوح و واماسالفة الطبخ حدد انت وزوجتك الأصناف وأنفقوا عليها وكلموا الطباخ يجهز لكم الاكل وخذوه جاهز معاكم وما فيه داعي للاحراج وزوجتك لازم تكون واثقه من نفسها وتباشر عليهم بالطعام وانت لازم تكون ريلاكس ما راح تكثر التعليقات الا اذا شافوك متوتر او محرج |
رد : انقذوني
انا من رايي ..
تحر كبدهم هالفتانات .. وتمشي انت ولجين دبي تفطرون ..وتغيرون جو .. وخل هالفتانات يموتون جوع .. تدري انا اول ماتزوجت مريت بنفس هالموقف .. او انها تسوي سلطة فواااااااااااكه بس ..والله اتكلم جد .. تمر وعصير وسلطة فواكه ولبن .. وقل لهم هذي زوجتي دلوعتي ..تحب الفواكه .. واخوانك خلهم يحترون ..قل لهم راضي فيها كيف ماكانت ؟؟؟؟؟؟؟؟؟؟؟؟ ابو خليفه تدري ..هالموقف يقهر ..لانه مو من امك ..من سلفات ؟؟ |
| الساعة الآن 06:09 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©