السلام عليكم

مشكلتي لها سنتين بدأت باعتراف زوجتي بماضيها
زوجتي هي بنت عمي كانت على علاقة حب مع أخوي قبل ما أخطبها وصلت للمكالمات الهاتفيه والهدايا والخافي الله اعلم فيه وبعد ماخطبتها استمرت علاقتهم شهور وانتهت
البنت وافقت مغصوبه مستحيه تقول لأهلها لا خاصة اني ابن عمها وبعد سنتين من الخطوبة اقتنعت فيني وبدت تحبني على قولتها بعد ماعرفت عني أكثر
خلونا من المكالمات والهدايا بقول ولد عمها وكانوا مراهقين ومن هالكلام اصبر نفسي بس المشكلة ركزوا اني حطيت خط على الخافي الله اعلم فيه وهو سبب شكوكي وهو اللي دمرني أشك انهم وصلوا للكلام الجنسي وكلام الحب والرومنسي والطلعات والخرجات

بقولكم على شكل نقاط وانتم احكموا :

• أول مابدت تكلمني قبل الزواج بشهور كانت جريئة لدرجة كانت تلمح تبيني اكلمها في الجنس
• ارسلت لي صورة صدرها من غير ما أطلب منها واحنا لا مملكين ولا شي
• بعد الزواج بعد ماصارحتني قالت انهم كانوا يحبون بعض حب اعجاب وبينهم هدايا بس وبعد فترة سالتها نفس السؤال وضغطت عليها تصارحني قالت انه كان كلامهم عادي سواليف بدون حب ولا بينهم هدايا ولاشي وحسيتها خايفه وكل ما أسألها تقول نسيت صار له سنوات ما أتذكر بس اللي كان بيننا مجرد اعجاب بس
• تذكرت انها كانت تتصل عليه عشان يوديها المدرسة اذا اخوانها مو موجودين بس كانت اختي معاهم لأنها زميلتها طبعا هذا بعد ماخطبتها وكانت اختي تشتكي لأمي تقول الطريق كله ضحك وسواليف مع بعض ولا كأني معهم محرم وكانت نيران الغيره تشتعل مني بس قلت يمكن تشوفه بحسبة اخوها مادريت انهم من وراي يكلمون بعض ويحبون بعض ذيك الفتره

أنا ما أخفيكم اني كان أحبها قبل ماتصارحني وانصدم فيها ومابي اظلم البنت يمكن صادقة مجرد اعجاب وحب عذري مثل مايصير بين الاقارب وبقول مراهقه وانتهت ولكن انا مدري وش الخافي معقوله لها سنتين تكلمه وهدايا وجرأتها معي بالكلام الجنسي بعد ماكلمتها رغم اني قلت لها لاعاد نتكلم في هالمواضيع كلها كم شهر ونتزوج ومن وين جتها الجرأة ترسل صورة صدرها قبل مانتزوج

انا مايقهرني اللا اني كنت مغفل ما أدري انها تخونني مع اخوي والمصيبة الكبيره انه اخوي وهو أكيد باقي يتذكر اللي بينهم ليتها ماوافقت علي أو على الاقل تخبر اي وحده من اخواتي انها ماتبيني كان فسخت الخطبة لكن الحين وش اسوي مع انها تحبني وتحترمني بس ماضيها يعذبني وعايش في هم وغم وكل ما اشوف اخوي يتكلم عن مواضيع خيانه او اي سالفه تشبه لسالفتنا اتذكر كلامها واموت قهر وحسره
طبعا اخوي لحد الآن مايدري اني اعرف اللي كان بينهم لأنه طلب منها ماتخبرني

شوفولي حل مع هالمصيبه اللي انا فيها
احترت وش اسوي وكيف اتصرف
حاولت انسى لكن اوقات تطري لي سالفه تشبه سالفتها ويجيني الغم والضيق والقهر والحسره
فكرت اطلقها بس اتذكر حبها لي وتعاملها معي وخوفي من خراب العلاقات العائلية بيننا وبين عمي وخصوصا ان عمي يحبني كثير ومعاملني مثل ولده

الانسان قلبه دليله
اسالني كيف
يعني قلبك مطمن لها حركاتها تصرفاتها استماعها لحديث عن اخيك تشوفها مستمعه بانصات او غير مباليه
وفي النهايه اللي عنده مصيبه يبان من وجهه
وفي الاخير قلبك دليلك

المشاركة الأصلية كتبت بواسطة ملك الحب والهوى (المشاركة 2848301) مشكورين اخواني عالمساعده بس يا أخوان انا ابي اعرف هل كانوا يتكلمون في الامور الجنسيه او لا اذا لا فأنا عفيت عنها وبنسى اذا نعم طلاق على طول حتى لو تابت بتقولون ليه تشك فيها كذا لأني اعرف اخوي وعلاقاته مع البنات وشفت مره من المرات رسالة لصديقته كله جنس وقلة حياء وياما نصحته مادريت ان زوجتي من ضمن البنات اللي يكلمهم مع العلم انه كان توه بالمراهقه وقت ماكان يكلم زوجتي وعلى كلام زوجتي انه كلام كله عفوي بس وش يضمن لي انها تلعب علي وقالت خلني اصارحه عشان مايسمع من هنا والا هنا كيف أتحقق من الشيء هذا بدون ما أظلمها واتندم اني اتهمتها ؟