|
مشروع خطوبة والوضع غريب مستجدات بالرد 115_136_ 150_181
السسلام عليكم
مسآء الخير / انا قصتي غريبه واشك في نفسي انها فترة مرآهقه وتعدي بس المسألة طولت وعجزت انسى السآلفة مآفيهآ معصيه لله عز وجل , انا طآلب بأول عمري لكني ملتزم طآحت عيني ب بنت في ابهآ كانت تصيف مع اهلهآ > ب الغلط مآعرف البنت ولا تعرفني من قبيلة ثآنيه ب الريآض وانا قبيلتي من ابهآ بس سآكن ب الرياض يعني فقط نظرة لعبت ب حسبتي السآلفة كنت اتمشى في ابهآ ب أحد الاماكن السيآحيه دخلت ورآ جبل اصور مآدريت ان فيه عآئلة هناك شفتهم من بعيد ديورت على طول مشيت بمكآن ثآني تعبت ورجعت للسيآرة وانا رآجع عالشآرع شفت العآئلة رآجعين لسيآرتهم بعد معهم بنت وحده والبآقيين مبزرة وعيال جآ هوآ شل غطوتها وطآرت وطآحت عيني على البنت وشلت نظرتي بسرعه مآبيهآ تنحرج او تتفشل وحفظت صورة وجهها تلقآئياً ب مخي وقدت اتاملهآ بخيآلي , فيهآ من الجمال سبحآن ربي طلعت مشيت نزلت بقآلة وانا شآغل بالي التفكير ب هالبنت يوم نزلت سبحآن الله لقيت نفسهم العآئلة وداخل البقآلة فيه ولدهم الكبير بس سمعته يكلم يقول معك فلان بن فلان الفلاني> اسمه على طول حمدت ربي مآصدقت واحفظ الاسم طلعت وركبت السيآرة وعلى طول رحت البيت اخذت جوال اخوي وافتح النمبر بوكك وابحث عن اسم الولد طلع لي رقمه كتبت رقمه ب قوقل طلع لي كان عآرض بضآعه للبيع بأحد الموآقع التجآرية لقيت ايميله اخذت ايميله وانا لي خبره ب الهكر قديمه رحت لنظآم اللنكس وفيه اداة تطلع لي كل المنتديآت الي مسجل فيهآ ب هالايميل مآاستفدت شي قمت كلمت واحد بالاحوآل ب منطقة القصيم طلع لي اسآمي اخوانه واخواته كلهم وعرفت اسم البنت واسآمي العآئلة الكريمه كلهم استآنست رحت كتبت اسمهآ في النمبر بوك طلع الرقم بلحآله اخذت الرقم اضفته عندي ب الجوال طلع عندها وآتسب بس مآفكرت اكلمها ابدآ > خوف من الله مآ ابغى تكون بيني وبينهآ اي علاقة بعدهآ رحت قوقل ونفس النظآم حطيت الرقم طلعت لي صفحه غير مصرح لي ب المشآهده اخترقت المنتدى واخذت صلاحية الادمن وشفت الصفحه غصب لقيت محتواها جهاز ايبآد للبيع ومكتوب ايميلهآ والبن والرقم معدل عليه عشآنه مخآلف للقوآنين قمت اخذت البن والايميل حفظتهم مآ اضفتهم رحت كلمت واحد من اخويآي ب الإتصآلات السعودية عطيته الرقم مع البن طلع لي موقع البنت وعرفت وين سآكنه رحت ادوج في حيهم ليتني القى اخوها واتعرف عليه لكن ترددت وخفت ومآعد طبيت حيهم كلمت اختي تكلم البنت بس رفضت وهددتني لو مآحذفت كل شي يتعلق فيهآ بتعلم امي قلت طيب وسوس لي ابليس يقول كلمهآ ازين لك مآمعك الا هالحل بس انا حاط خط اححمر مستحيل اتعداه الخوف من الله اهم من هالبنت فكرت اتعرف على اخوانها بس اخاف مآيرتاحون لي او يكرهوني مآ اضمن نفسي يمكن مآ اكون على جوهم كنت اتمنى اسسير خويهم بس خآيف فكرت هل فيه طريقة اخطب بدون مآ اكون متعرف على اهل البنت ؟ البنت بنت قبآيل مآعندهم هالكلام الفآضي واليوم دخلت عليكم ابي فزعتكم ابي حلول مخي انشل مآعدت اقدر افكر ابي اتزوجها كل يوم احلم فيهآ كل يوم اتخيلهآ صورتهآ بدمآغي مآرآحت دقيقه اقول احيآنآ انها مرآهقه بس وش هالمرآهقه الي تستمر سنه وشهور مع اصرآر بدآخلي ومع تفآئل اني بتزوجها يعني كذآ دآخليآ مآ اعترف انها مرآهقه الله يفرج همومكم سآعدوني |
رد : مشروع خطوبة .. لكن الوضع مختلف وغريب
كم عمرك اخوي؟
|
رد : مشروع خطوبة .. لكن الوضع مختلف وغريب
19 وانا طآلع بعثه
|
رد : مشروع خطوبة .. لكن الوضع مختلف وغريب
بما ان ضميرك حي وتعلم ان الله متصرف بك وبذويك
سنساعدك باذن الله ولكن ليس الان ننتظرك هنا بعد شهرين من دخولك بلد الابتعاث ان مازال هوسك بها سنكون بجانبك ايها المتحري الصغير |
رد : مشروع خطوبة .. لكن الوضع مختلف وغريب
وااااو كاني اقرا قصه رومانسيه خياليه
انا رائيي.. اكتب للبنت فالواتس اب كل القصه وانك حاب تتقدم لها وماخربطت باي شي شوف رايها،، عادي انا ولد عمي اضافني للواتس وسالني قال ابي اتقدم لك بتوافقين؟ قلت له لا وخلصت القصه... وفي واحد ثاني يقرب لي،،كان يحبني وماتكلم خايف اني ارفضه او ابوي يرفضه وكتم هالحب في قلبه وتزوج بنت وجاب منها عيال وماحبها وتزوج ثانيه وبرضو ماحبها وقال لاخته انا من البدايه ابي فلانه واحبها وماقدرت احب غيرها اخطبوها لي؟؟؟؟؟؟؟؟ بدري؟ شايف الفرق بين القصتين.. بس سوال محيرني؟ وش عرفك هي اي بنت فيهم؟؟؟؟؟يمكن تاخذ اسم وتطلع اختها |
رد : مشروع خطوبة .. لكن الوضع مختلف وغريب
ايوه يا المتحري الصغير.... انا اقول تعال لنا بعد ست شهور من الابتعاث و اذا بعدها في بالك بندبر لك الامور..
ما نوصيك على صلاتك و دينك و انت مسافر |
رد : مشروع خطوبة .. لكن الوضع مختلف وغريب
اختي كل هالرجآل يقربون لك > هنا مشكلتي انا
مآقدر اخطب بنت مآعرفهآ صعبه اروح عندهم اقول انا فلان واعلمهم السآلفة هذي كلهآ صعبه جدآآ البنت وحيده من بين عيآل بنت بلحآلهآ ب العآئله بطآقة العآئلة بتآعتهم عندي نسخه منها |
رد : مشروع خطوبة .. لكن الوضع مختلف وغريب
اقتباس:
زي مآقلت انا ملتزم والحمدلله وشكرآ على ردك ويآليت تعطيني حل لاني عندي تجآرة مع اخواني واقدر اكنسل البعثه وارجع السعودية واخطب ثم اكمل البزنس معهم واطلع بعثه واخذهآ معي وارجع لاموري الطبيعيه توني اول سنه لي بالخآرج |
رد : مشروع خطوبة .. لكن الوضع مختلف وغريب
شوف خالتك او حاول في اختك
مو حرام ولا عيب لو يكلمونها وعلموها القصه هي البنت مو اهلها |
رد : مشروع خطوبة .. لكن الوضع مختلف وغريب
يمكنها مخطوبه او اكبر منك او تحب شخص ما،،، ما انصحك تضيع وقتك بالخيالات
استخير ثم قرر ثم توكل |
رد : مشروع خطوبة .. لكن الوضع مختلف وغريب
اختي متزوجه وعندها بنت وصآرت قصة قديمه مع واحد من اخواني الله يهديه واخذت صورة ثآبته عن العلاقات انهآ كلهآ ورآهآ نيه خبيثه وبس
يوم قلت لهآ صآرت تكلمني بأسلوب مرعب زي التحذير والوعيد وتقول تخيل النآر وعذآب القبر حآطه ب بآلهآ اني نآويهآ ب شر كلمتهآ اكثر من مره بس مآش خالاتي كلهم كبآر تمنيت لو فيه وحده منهم صغيره تتفهم الوضع بس مآ اظن الفكرة بتنجح ابوي مطلق امي ومتزوج حرمة من برآ السعودية ب يالله تتكلم لهجتنا وصغيره واتوقع بتتفهم الوضع بس مآدري كيف اكلمهآ وكيف اتحاور معها لهجتها صعبه وانا رسمي معها توها متزوجه ابوي قريب اقرب وحده ممكن تفهمني عمتي هذي بس لكن المشكلة كيف اتحاور معها وكيف نظرة البنت لعمتي بتقول متزوج من برآ السعودية اكيد الولد ضآيع ول ولل بس عندي فكرة حلوة وابي ارآئكم فيهآ امي , لمحت لهآ مره قلت لهآ عادي اتزوج من القبيلهة الفلانيه او القبيله الفلانيه قالت ليه تسأل قلت بس قالت ايه عادي واتوقع كآنهآ فهمت وش رآيكم اكلمها ؟ وكيف افآتحهآ ب الموضوع ؟ |
رد : مشروع خطوبة .. لكن الوضع مختلف وغريب
اقتباس:
هي اكبر مني ب سنه ولا زالت تدرس خطبهآ واحد ورفضته بحجة الدرآسه اما انهآ تحب هذي مستحيله لان هالعآئلة ملتزمين ولا اظن البنت بتحب من ورآ اهلهآ بتقوولون وش درآك انها انخبطت انا يوم بحثت عن رقمهآ طلع لي ايميلهآ رحت لنظام اللنكس حطيت ايميلهآ طلعت لي منتديآت مسجله فيهآ وتشآرك وكان فيه موضوع عن الزواج وقآلت انها انخطبت ورفضت وتبي تكمل الدرآسه >> ختمت كل موآضيعهآ وردودهآ في كل المنتديآت |
رد : مشروع خطوبة .. لكن الوضع مختلف وغريب
اعرف واحد من نفس محآفظتهم
بس مآيعرفون بعض بس من محآفظة وحده يمكن يخدمني ب الموضوع بس وش اقول له |
رد : مشروع خطوبة .. لكن الوضع مختلف وغريب
ان كان لك نصيب فيها الله يسخرها لك ويسهل امرك
لكن سامحني .. اسلوب التحري هذا متي نتركة ؟؟ وتدخل بامور مثل الواسطات ؟؟ جاسوس صاير الله يصلحك؟؟ خاصة الاختراق والي صار ولاتجسسوا حتي لو مافيها مضرة لاتهتك ستر حد الله ستار وانتو بهالاختراقات الله يصلحكم |
رد : مشروع خطوبة .. لكن الوضع مختلف وغريب
^ يآخي وش اسوي طيب :(
لازم ابذل الاسبآب ولا ودي اخسر البنت مآتجسست والله مآتجسست ولا فتحت ستآر حاولت فقط اجمع كم معلومه عنهم اقدر استفيد منهااآ |
رد : مشروع خطوبة .. لكن الوضع مختلف وغريب
الله يوفقك يارب ...
|
رد : مشروع خطوبة .. لكن الوضع مختلف وغريب
تعرف على اخوها دام عنده بضاعه بالنت سهل تدخل له
اسال عنهم يمكن هم مايزوجون من برا قبيلتهم |
رد : مشروع خطوبة .. لكن الوضع مختلف وغريب
اقتباس:
اقتباس:
يزوجون من برآ عادي اخوها كبير عمره 24 سنة والي بعده البنت ثم ولد عمره 16 |
رد : مشروع خطوبة .. لكن الوضع مختلف وغريب
بغض النظر عن إعجابك بجمال البنت، كيف تبرّر لنفسك تتجسس عليهم بهذا الشكل؟
هل ترضى أحد يتجسّس على عائلتك ويبحث عن أرقامهم ويحتفظ بنسخة من بطاقة عائلتكم ؟ كنت تقدر تبني علاقة صداقة مع أخوها وأنتوا في المصياف بدون ما تلجأ لاسلوب الهكرز الذي لا يرضي الله سبحانه وتعالى؛ لأنه تجسّس مهما كانت دوافعه . عمومًا بما إنك خلاص وصلت مرحلة الهوس بهذه البنت . اعتقد إنك لن تصدقني لو قلت لك هذه مشاعر مراهقة، ولكن لا بأس فمشاعر المراهقة صادقة ومرهفة لكن هل فكّرت بشيء غير جمال هذه البنت ؟ أخلاقها الشخصية...تعاملها معك، التوافق بينكما...صفات غير الجمال الخارجي؟ ليس في الحب عقلانية، ولكنك تريد الزواج بها والعقلانية تفرض نفسها في الزواج. ثمّ أنا طرأ على بالي تساؤل وأنا أقرأ: البنت وقعت عينها عليك حين نظرت إليها...حين تخطبها ألا تظن أنها ستتذكرك وقت الرؤية الشرعية ؟ ما موقفك لو تذكرت وخافت من قدرتك على الوصول إليها.... طبعًا مجرد إحتمال ضعيف ولكنه وراد . الله يكتب لك الخير حيثما كان |
رد : مشروع خطوبة .. لكن الوضع مختلف وغريب
عندي خطوة ابغى اسويهآ :/
بس ابي شوركم اعلم اميمتي ؟ |
رد : مشروع خطوبة .. لكن الوضع مختلف وغريب
اقتباس:
كآن عندي منتدى وانا تعلمته عشآن احمي نفسي مآني هكر مخرب زي البآقين حتى مآ اسمي نفسي هكر ولا تجسست كل مآ بالموضوع اني حاولت اوصل لهآ بأي طريقة ككآنت >> بديت اقتنع بأن الي سويته تجسس :( بالنسبة للرؤية الشرعيه انا مآظنها بتخآف بقدر مآ رآح تكون مبسوطة بتتذكرني بتقول ذآ سوى الي مآيتسوى عشآن يوصل لي اكيد متولع فيني واتوقع انها بتقبل مبآشرة ولا اظنهآ رآح ترفض الا يمكن اهلهآ :( بالنسبة لاخلاقهآ الشخصيه انا سألت عنها البنت سيئة درآسيآ لكن بحيآتهآ سمعت عنها كل مآيرضي الخآطر ويوم تقول لي كنت اقدر اتعرف على اخوها صحيح كنت اقدر بس من دخلت البقآله جتني ام الركب ارجف مآعرفت اتصرف حتى اسمه يوم وصلت البيت قعدت سآعه اتذكره |
رد : مشروع خطوبة .. لكن الوضع مختلف وغريب
معليش ماعندي لك حل
بس يــــمه خوفتني يعني تقدرون تحصلون كل هالمعلومات من أسم أخوها؟! من جد زمــــن يــــخـــــــــــوف!! |
رد : مشروع خطوبة .. لكن الوضع مختلف وغريب
يا أخي موضوع سهل وبسيط. بلى اللفه كلها. وتضيع وقت.
مالك بعد الله إلا أمك؛ تكلم أم البنت بالتلفون ، وتعرف بنفسها وتقول أنها بتخطب منهم وتعطيها من هالكلام ؛ وتحدد موعد للزيارة طبعاً عشان تشوف البنت ولا تجيب طارئ لسالفتك ' انه ناس أمدحوا البنت وبس. حتى أنت ماله داعي تقول لأمك السالفه ، الكبار تفكيرهم غير. قل انه صاحبك كلمك عن العائله. وان شاءالله تبشرنا بالأخبار الزينه أسعدك المولى. |
رد : مشروع خطوبة .. لكن الوضع مختلف وغريب
كلم ميمتك
حالتك حالة والله :d ولكنها مشاعر جميلة وطيبة ذكرتني بالشعراء العذريين ... ياااه زمن ولو اني اشوفك صغير على مسؤوليات الزواج بس جرب علشان ما تبقى حسرة بقلبك |
رد : مشروع خطوبة .. لكن الوضع مختلف وغريب
هذا مو مشروع خطبه ,, هذا مشروع مريض نفسي
وأغلب الهكرات مثلك ,, يحبون يتجسسسون ويتتبعون اعراض الناس وهذا انت قلتها جبت 1-ايميلها 2- ورقم البلاك بيري 3- وجبت رقم جوالها 4-وموقع بيتهم 5-سالت عن دراستها وعن حياتها الشخصيه 6-جب برنت عن العائله كلها واسامي اخوانها واخواتها والله اعلم بنيتك لان حتى لو نيتك الزواج بها ,, كان جبت طاري ابوك وجبت رقم ابوها وخليت ابوك يكلم ابوها مو تاخذ لفه كامله وتجيب ايميلها ورقم جوالها والواتس اب والبلاكبيري دام بدايتها تسوي كل ذا الله يكفي بنات المسلمين من عيّناتك اول شي إحتمالية انهم يوافقون عليك 0% 1-منت من قبيلتهم ولا من منطقتهم 2-باقي ع بال ماتبتعث وتتوظف وتلقى وظيفه يبيلك اقل شي 5 سنوات واللي في مكانك يبغاله وظيفه كويسه وقوية لان هالايام الواحد بوظيفته 3-احتمالية انها مخطوبة او محجوزه لولد عمها كما الحال بأغلب قبائل السعوديه 4-يمكن تشوفك بالنظرة الشرعيه وتستخير وتقول لك ماأبيه ولاأرتحت له لان هالشي من ربك 5-ابوها يمكن يكون من النوع اللي مستحيل ومن سابع المستحيلات تتزوج من برا القبيله يعني احتمالية زواجك منها ضعيفه جدا وليست مستحيله لكن لاتعلّق قلبك انا اعطيك هالاحتماليات عشان لاتبني خيال واحلام ومستقبل وبالأخير تنصدم *** انا بعطيك عجالة سريعه لآن مريت بشيء مشابه لما مريّت فيه كنت متعلق بوحده قريبه لي ومتقطع وحاط براسي اني اتزوجها لاني شفت فيها جمال وقتها حسيت ان مافي بالعالم مثلها وكان عمري 22 يعني شفت خير ,, الله كتب انها تتزوج غيري لان وقتها مريت بظروف كرهت الزواج وكنسلته ثلاث سنوات ماخليت بلد بالعالم الا جيته من الشرق للغرب اخوياي يسموني ابن بطوطه وخطبت وانا مالي نفس ووصلت للنظره الشرعيه واقول بقلبي مستحيل انسى ذيك والله ان اول ماخشيت ونظرت قلت بنفسي الحمدلله اللي ماتزوجتها وإني اشوف اللي قدامي ملكة جمال *** الحين انا اضحك ع نفسي ولو تلفّ بالمواضيع اللي مشابهه لموضوعك وقصتي راح تلقى كثيرين الزبده انه حبّ مراهقه وانا مريت فيه وبالأخير اقول لك ان مافي شيء مستحيل لكن برضه كل شي مقدر ومكتوب يمكن انك مقدر لشخص ثاني الحل الوحيد تكلم امك وتعطيها رقمها وتعلم امك السالفه كلها يمكن وانت تكتب الموضوع الحين انها مخطوبه وملكتها الليله كل شي ممكن بالتوفيق |
رد : مشروع خطوبة .. لكن الوضع مختلف وغريب
أحبك .. لا أدري حدود محبتي طباعي أعاصير .. وعاطفتي سيل وأعرف أني متعبٌ ياصديقتي وأعرف أني أهوجُ .. أنني طفل أحب بأعصابي ، أحب بريشتي أحب بكلي .. لا اعتدالٌ ، ولا عقل أنا الحب عندي جِدةٌ وتطرفٌ وتكسير أبعادٍ .. ونار لها أكلُ وتحطيم أسوار الثواني بلمحة وفتح سماء كلها أعين شهل وتخطيط أكوان ، وتعميرأنجمٍ ورسم زمان .. ماله .. ماله شكل أنا ما أنا ..؟! ( فلتقبليني مغامراً ) تجارته الأشباح ، والوهم ، والليل أحبك تعتزين في خمس عشرة ونهدك في خير .. وخصرك معتل وصدرك مملوء بألف هدية وثغرك دفاق الينابيع مبتل تعيشين بي كـ العطر يحيا بوردة وكالخمر في جوف الخوابي لها فعل.. وقبلك لم أوجد فلما مررت بي تساءلت في نفسي : تُرى كنت من قبل بعينيك .. قد خبأتُ أحلا قصائدي اذا كان لي فضل الغنا .. فلكِ الفضلُ ( لا غالب الا الحب , وبعد حروف نزار لا يوجد يا صديقي ما يقال ) |
رد : مشروع خطوبة .. لكن الوضع مختلف وغريب
وييييييي لتكون مخابرات :) :)
ماشاء الله عليك و لا المحقق كونان اولا وقبل كل شي هل اهلك بيوافقو انك تخطب وانت بهالسن ؟؟؟؟؟ اذا موافقين فلا تصعبها و هي سهلة روح لامك الله يخليها لك وقولها انا نويييت اخطب بس خطوبة سنة ولا 2 لغاية مااضبط اموري بالغربة و ارجع اتزوج .. وقولها ناس دلوني على بيت فلان الفلاني انه عندهم بنت مناسبة ولاتخبرها كل القصة ووديها للبيت و خليها تشوف البنت و تخطبها و تقول ناس دلو ابني عليكم وانتهينا وبالنهاية احتمال كمان مايتم نصيب .. قد تكون مخطوبة او مكتوب كتابها او اكبر منك او هم مايوافقون و يشوفوك صغير الخ جرب حظك وشوف... |
رد : مشروع خطوبة .. لكن الوضع مختلف وغريب
المحقق كونااان هههه
الله يوفقك اخي |
رد : مشروع خطوبة .. لكن الوضع مختلف وغريب
ووربي شي يخوف طلعت ايميلها ورقم جوالها ..
.اجلس مع نفسك وفكررر ززين |
رد : مشروع خطوبة .. لكن الوضع مختلف وغريب
ريحتوني الله يريحكم
ابوهاا الله يشآفيه مريض نفسي معطينه حبوب منومه ينآم 24 سآعه يقوم يآكل ويرجع ينآم ولا اظن بيرفض لان بنت خالة هالبنت تزوجت واحد عمره 19 مثلي وطلع بهآ بعثه ولا عندهم مشكلة والله الامور سهله بس يلا بكلم امي الحين والله يوفقكم ويجزآكم خخير ومآقصرتوآآ .. |
رد : مشروع خطوبة .. لكن الوضع مختلف وغريب
اقتباس:
مآشآء الله قآعد احفظهآآ يآويلي لا تكون كآتبهآ انت ؟ بسم الله عليك |
رد : مشروع خطوبة .. لكن الوضع مختلف وغريب
اقتباس:
الي يقرآ ردك يقول اني مآخليت بنت الا ودقيت عليهآ وجرجرتهآ وخوفتهآ وهددتهآ و و و الخ يآبن الحلال انا قلت السالفة ب الضبط مآبحثت عنهآ ولا حآولت اعرفهآ عنهآ اشيآء كذآ بس من بآب المتعه ولا تتبعت عورآتهآ لا والف لا ومآ اسمح لك تتهمني من غير دليل كلامك خطير وينرفز انا مآقول انهم مآفي امل يرفضون بس العآئلة هذيك ملتزمة ولا اظنهم بيتخذون خطوة غبيه مثل هذي من اتآكم من ترضون دينه ونسبه فزوجوه وانا كلهآ الححمدلله وبعدين الوظيفه مب لازم لو اتزوجها واخذهآ معي هناك بيعطوني دبل رآتبي الي استلمه هناك تقريبآ 2700 دولار × 2 = 5400 يعني بالسعودي 20250 ريآل وغير كذآ عندي بزنس مآشي يعني الححمدلله الحآلة المآديه مآفوق الممتازة وابوهآ الله يشآفيه تعبآن ب مرض مآدري وش هو ب الضبط لكنه دخل مشتشفى الامل وقعد فيه سنتين وطلع والحين يآخذ حبوب منومه ينوم 24 سآعه ويقوم يآكل ويصلي ويرجع ينآم وهذآ حآله مآقول انهم مستحيل يرفضوني بس يآخي انا متفآئل وقآعد اعمل ب الاسبآب والدعآء مآفآرقني وذكر الله دوم على لسآني واسأل الله انه يرزقني فيهآآ مآقصرت والله يجزاك خير على ردك وآيآك يآرب |
رد : مشروع خطوبة .. لكن الوضع مختلف وغريب
الله يكتب لك اللي فيه خير
بس تصحيح من أتاكم من ترضون دينه وخلقه فزوجوه او كما قال عليه الصلاة ةالسلام وفقك الرزاق لكل خير |
رد : مشروع خطوبة .. لكن الوضع مختلف وغريب
يعطيكم العآفيه مآقصرتوآ
والله اني ممتن لكم الله يجآزيكم الخير انا كلمت امي ورحبت ب الفكرة قلت لهآ اني قررت اتزوج ونآقشتهآآ ب الموضوع قالت برآسك بنت ؟ قلت ايه في عآئلة يمدحونهآ وانا والله تحمست لهم ومرره ابيهم وعطيتهآ معلومات عن البنت ,, قالت اوكي دبر لي رقم امها وخل الموضوع علي قلت ابشري شويآت وبعطيهآآ الله يوفقكم يآآرب ولا يحرمكم الاجر واسئل الله ان يرزقكم من حيث لا تحتسبون وان يطيل في اعمآركم على طآعته ويزوج فيكم من اراد الزواج ويرزقكم الزوجات الصالح ويسعدكم ويرزق اختي "يآرب ارشدني " بالزوج الصآلح ويلين قلب ابوهآ اللهم اممين .. |
رد : مشروع خطوبة .. لكن الوضع مختلف وغريب
خبرنا وش يصير معك
متحمسة |
رد : مشروع خطوبة .. لكن الوضع مختلف وغريب
والله صحيح زمن يخوف المصيبه انك ماكتفيت بس بمعلوماتها جبت معلومات عن قرايبها بعد ؟؟؟
هي وقلنا يالله يمكن مع اني مو مقتنعه ابدا باللي سويته لكن قريبتها وش غرضك منها عشان تجيب معلوماتها الله يسترنا دنيا واخره لايمكن ارضى بواحد فكر في يوم يتجسس علي ويعرف كل شي عني مهما كان غرضه |
رد : مشروع خطوبة .. لكن الوضع مختلف وغريب
ادري ان كلامي نرفزك لاني ابي اعلمك ان اللي سويّته غلط كبير((التجسس وتتبع عورات الناس))
**** اذا رفضتك وش يخليك بكره ماتكرر هالحركه مع كل بنت تشوفها بالشارع الله يحفظ بنات المسلمين **** مسألة انك تتكلم عن ابوها بالطريقة هذي وكأنك ذئب لقيت لك فريسه سهلة الأصطياد وانا داري انك فرحت بمرضه لانك خفت يكون سبب في عدم زواجك الله يهديك ***** سؤال يطرح نفسه بماأنك تجسست وجبت الارقام والايميلات ورقم البلاك بيري وتقول ان عندك خط احمر وتخاف من الله جاوب .. كيف جبت معلومات عن مرض ابوها وانه ياخذ حبوب ومريض نفسي وقد تعالج بمستشفى الامل وتعرف ادق التفاصيل بخصوص انه تعالج سننتين وانه ينام 24 ساعه وانه يقوم بس ياكل ويصلي ؟؟؟ وكيف جبت معلومات عن بنت خالتها اللي تزوجت واحد عمره 19 مثلك وطلع بعثه ؟؟؟ وكيف عرفت انها فاشلة دراسيّاً؟؟ أنت تدّعي انه يوجد لديك خط أحمر نعم يوجد لكن غير الخط الأحمر الموجود لدى مجتمعنا المسلم |
رد : مشروع خطوبة .. لكن الوضع مختلف وغريب
اقتباس:
المعلومات بعضهآ من النت اما المعلومات الشخصيه زي مرض ابوها وبنت خالتها جبتها من من واحد من اخويآي من نفس محآفظتهم يعرفون بعض من بعيد لبعيد هو الي اعطاني هالمعلومات وسأل امه واخواته وعطوه الرد بعدين مستحيل اطبق هالفكرة على اي بنت ب الشآرع لانهآ لو رفضت بتحطم نفسياً ويمكن اكنسل البعثه وارجع وانا في اعمآق الضيقة والحزن وابوهآ يآخي مريض اوكي بس انا مآدريت الا بعدين ومآظنه بيرفض ولاني خآيف من قرآره ب العكس ودي انه سليم ومتعآفي عشآن يكون الوضع بين ابوي وبينه ويسير الموضوع اسآسي بي الرجآل والحريم بعدين وخطي الاحمر موجود والي بعد الخط هو مآ يخآلف الدين اقتباس:
يعني سألت عنها اعترف اني غلطت والله يغفر لي ويسآمحني بس والله نيتي صآفيه ولا ورآهآ لا تجسس ولا شي ورآهآ الوصول لهدفي وهي هالبنت ;( |
رد : مشروع خطوبة .. لكن الوضع مختلف وغريب
اقتباس:
مجرد سؤال سألته واحد من الي يعرفونهم وعطاني كلام طويل عريض عن هذيك العآئلة والبنت سألته انا قلت تتوقع ممكن ان اهلهآ يوآفقون عليهآ انهآ تسآفر معي ؟ قال اتوقع عادي لان بنت خالتهآ مسآفره مع زوجها وهي ب 19 سنه وزوجها اكبر منها بسنتين ^ ::) |
رد : مشروع خطوبة .. لكن الوضع مختلف وغريب
يااخي الله يهديك مادام تعرف ناس يعرفونهم كان اختصرت السالفه وسالتهم احسن من التدخل في خصوصيات الناس
بصراحه صرت اخاف حتى ارد عليك هههههههههههه |
| الساعة الآن 02:11 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©