|
حياتي بتضيع والسبب زوجي
السلام عليكم ورحمه الله وبركاته
اتمنى تقرون موضوعي ولاتملون وتسكرونه خصوصا اللي يفهمون فهالامور يعطوني رايهم انا مثل اي بنت تزوجت يوم اتزوج عمري 20 تزوجت واحد عمره 29 المهم هو انسان حساس طيب مايغلى علي شي عنده بس المشكله اول سنه زواج كانت حلوه مررررررررره كانت حياتنا فيها نوع من الخلاف بس كان بسيط مايتعدى ساعتين الا حنا متراضين وطول هالسنه ما لاحظت اي شي عليه كان بس من عيوبه انه يدخن وكنت متاكده ان ماعنده شي يخفيه المهم بعد سنه من زواجنا سافرنا انتداب عمل له فمنطقه ثانيه لفتره كم شهر انا خلال هالاشهر قررت ارجع ازور اهلي اسبوع فمنطقتنا ورجعت لهم وجلست اسبوع ورجعت لزوجي بس لقيته انسان ثاني يحبني يخاف علي صح من اول بس الحين لقيته شراره بسرعه يعصب بسرعه يفور يطلع من البيت ويروح نص ساعه ويرجع مادري وش فيه واستمرينا على ذا الموال كم اسبوع وانا اشوفه متغير من ناحيه نفسيته هو المهم جو اهله زياره لنا وقالو بنروح لمكه زياره كلنا ورحنا خذو اهله غرفه فالفندق جنبا وحنا فغرفه ولحد الحين ما شفت شي يفسر وش فيه زوجي يوم جلسنا يومين جيت ادور مقص ابي اقص ورقه بلوزه عندي وادور ودورت بين اغراضه حقت الحلاقه ابي مقص واطيح على ظرف واه ليتني مافتحته للاسف لقيت فيه حشيش زوجي يحشش متى وشلون وكيف معقوله من زمان ولا بس يوم سافرت عنه اسبوع لا اكيد يوم انا سافرت اول ما لاحظت عليه شي حشيش عاد جلست اصيح وانهرت مادري وش اسوي صرت اكذب عمري رحت نزلته فمنتدى اسالهم قلت انا حصلت هالشي وش يكون كلهم جاوبوني حشيش جاء وواجهته بكيت وطلبته وقلتله انه كسر ظهري لاني عمري ماتوقعت يصير زوجي كذا ولا انكر شفت فعيونه ندم ودموع وقالي انه ابتلاء بهالشي وانه خفيف وانه يقدر يخليه وبيخليه وسكتت وجلسنا اربع ايام مانتكلم مع بعض وانا ما اجلس اروح مع امه وين ماراحت ورجعنا لديرتنا واستمر وكل يوم اقوله وين وعدك انك بتخليه ولا خلاه الحين هو تغير مره نفسيته زفت انطوائي مايحب يشوف احد يروح لدوام ويرجع للبيت ماله اصدقاء الا قليل ولا يكلمهم الا قليل ولا يشوفهم واكتشفت مع الزمن ان اخوه معاه بنفس الشي بس مادري ايهم اللي بلاء الثاني بس صارت نظرتي لك الرجال اللي يدخنون انهم يحششون صار يصرف فلوس على هالشي وصار بس يهاوشني مال من البيت ومال مني ومال من نفسه هو بس بنفس الوقت يحبني والحين لنا اربع سنين متزوجين ماحملت كنت من اول سنه اركض من دكتوره لدكتوره مالقو شي اشياء بسيطه ماتمنع الحمل واخذ علاج لها وهو ساكت ومره يالله جبرته انه يحلل بعد ثلاث سنين زواج وحلل طلع عنده مشكله بس تعتبر بسيطه على كلام دكتورتي حتى اتحليل حلل فالبيت وانا وديته للمختبر ورحت بالنتيجه لدكتورتي قالت لازم يراجع دكتور يكشف ومشكلته بسيط لازم ياخذ علاج وعلاجه يعتبر فتامينات بس المشكله له سنه رافض يروح لدكتور ورحت طلبت من الدكتوره تعطينا علاج وعطتني حبوب له وجبتها ياكل مره منها ويخليها ماعاد ياكل المشكله هو متشوق اكثر مني للعيال هو يبيهم اكثر نص نفسيته من هالموضوع والحين لي اربع سنين لا حملت ولا وافق يروح لدكتور ولا يتقيد بالعلاج ولا يخلي الحشيش والمشكله كل ماتهاوشنا قال انتي ماتبيني كانك تبين الطلاق ماعندي مانع ضفي شنطتك وهو من داخله متقطع ياخوفي يجي يوم صدق واضف شنطتي من كثر ما قالها لي ما انكر ان نص خلافاتنا تجي مني انا انا اكون غلطانه بس ابي الحين القى حل ابي اعرف لنفسي قسم بالله احس مو نفسيتي تغيرت حتى شكلي صرت انسانه باهته حزينه كلن يقول ان فيني حزن الدنيا انا مابي اتطلق انا ابيه ابيه احبه ولا اقدر اخليه ولا اتخيل حياتي بدونه بس ابيه يترك اللي يستخدمه وابيه يروح يتعالج يساعدني على العلاج للحمل تكفون قولولي وش اسوي الحين لي معاه يومين مانتكلم مع بعض زعلانين قولولي وش اسوي شلون اغيره واذا ماتغير وش اسوي ماعليش اكتب بسرعه ولا ادقق استرو ماواجهتو من اخطاء املائيه |
رد : حياتي بتضيع والسبب زوجي
اهلين عزيزتي استهدي بالله كتبتي الموضوع اربعة الفجر واغلبهم نايمين
ماعليك حتجي الردود وعادي مافضحتي نفسك ولا شيء هنا محد يعرف احد وجهة نظري ان زوجك مبتلى والمفروض انتي اكثر وحدة توقف معه وتحاولون سوا يتركه كفايه احساس الذنب اللي عايش فيه اخاف لو استمر اسلوبك كذا ينغمس فيها اكثر عشان يهرب من المشاكل واسال الله العظيم ان يقر عينه بك وتقر عينك به ويمنعكم من كل شر |
رد : حياتي بتضيع والسبب زوجي
الاخت الفاضلة .. السلام عليكم ويسعد صباحك
انتي كتبتي موضوعك بانصاص الليول.. والمنتدى في اقل تواجد هالحين يجونك الاعضاء والعضوات وابشري بالخير ... بس ردي وتفاعلي موضوعك مو صعب.. لكن بيدك تخلينه مستحيل وبيدك تخلينه ينحل بعد مشيئة الله طبعاً التدخين مرض واتباعه بالحشيش مصيبة بس يمكن تجاوزها بالعقل.. مهي بصعبة بس حاولي ولا تيأسي انتي تحبين زوجك وهو يحبك فلا تبدأي المشاكل لانهم اللي يستخدمون الحشيش وقت مايكون معصب مثل الزوجة اذا لعبت فيها الهرمونات وقت الدورة الشهرية .. تعالي له بوقت يكون رااااايق وياكثر مايكونون رايقين .. وحاولي معك في ترك التدخين انثري له ورود الحب وامزجيها بخوفك من ان يتأثر هذا الحب ادخليه في عالم نفسي رائع ومبهر يسوده الحنان ولا يوجد به الا انتي وهو.. لانهم يستجيبون نفسياً بالغي في مدحه والاطراء عليه وانه افضل واحسن زوج بالدنيا.. اغدقي عليه من الكلام المعسول وارفعيه ارفعيه الى ان ينبسط ويصدح خياله نحو ايجابية التفكير فيك ومع كلامك بعدها اطرحي خوفك من ان يهدم كل هذا الجمال والحب والحنان موضوع التدخين والحشيش ذكريه انه لو استمر سيتطور وفي حال وجود الابناء كيف سيكون تصرفه معهم هل يريدهم يحششون مثلاً ادخلي تفكيره في نقاط سلبية التدخين واحشيش مع عودتك في كل مرة للتأكيد على حبك وخوفك عليه لا تيأسي فالتدخين والحشيش يمكن تركهما بسهوله .. وثقي بان الله سيوصلك لما تريدين لان نيتك الخير |
رد : حياتي بتضيع والسبب زوجي
الله يفرج همك ويسخره لك يااارب
ويبعده عن كل المسكرات والمخدرات والدخان و يهديه ويفتح علي قلبه عليك بالدعاااااء اخررر الليل وصلاه الوتر وكثره الاستغفار والصدقه |
رد : حياتي بتضيع والسبب زوجي
يمكن استعجلت بانكم تردون علي بس وش اسوي حالتي مايعلم فيها الا الله
انا تعبت معاه وراح استمر ماراح اوقف بس مشكلته لو يبي يخلي التدخين والثاني مايقدر من اخوه كل يوم ناقز عندنا ويدخن عندنا يتخبى عن زوجته اول زوجي بعد كان يتخبى عني الحين يوم دريت عنه صار يولعها قدامي ولا كانه يشوفني والمشاكل تصير لاني اضيق منه نفسيته زفت صايره يكره الدوام والبيت صار يتغيب عن الدوام واجد وتجيه تحقيقات بسبب الغياب واجد كل خوفي انه يستمر بالحشيش ويخسر وظيفته ويمكن يخسر بيته لاني انا بديت اتعب صرت بين حالتين صعبه بس افكر فيهم الاولى افكر ابي عيال كل اللي تزوجو بعدي صار عندهم اثنين وكلن ينظر لي نظره الشفقه وانا ماحب ذا النظره او اشوف الرحمه ويقولون ترانا ندعيلك روحي عالجي روحي سوي وطحت فاهلي اهلي يقولون اني انا سليمه خلي زوجك يحلل وقلت لهم انه حلل وهو سليم والمشكله عندي انا بس علشان اسكتهم والناحيه الثانيه اهله وامه يسالون عن السبب ومن كثر ضغط امه علي قلت خليه يروح يعالج السبب عنده هو قالت لا المستشفى يكذبون عليك هو مافيه شي انتي روحي عالجي يعني انا صادقين المستشفى فيني هو لا يكذبون وهالسبب الحمل يخليني اتعب نفسيا انا بعد مو بس زوجي والشي الثاني اللي متعبني هو زوجي خايفه على المستقبل قدامنا خايفه يخسر وظيفته يخسر نفسه يخسرني يخسر فلوسه جيته طيب جيته صراخ ابيه يفهم ماقدرت مايعطيني مجال حتى اتكلم معاه اسكت واخليه وكل ماقلت اترك ذا العله انا اخاف عليك قال اذا تبين الطلاق روحي الف غيرك يتمنوني |
رد : حياتي بتضيع والسبب زوجي
الله يهديه ويعصم قلبه من الدخان وغيره
الحمدلله زوجي صار يقدر شعوري ويدخن برا البيت حتى أحيانا صار يخفف من الشرب من الكسل مايبي يطلع برا إنتي أنصحيه بلطف واذا مانفع معه خليك حازمه وسوي نفسك طفشانه وبينيله انك ماتتحملين ريحة الدخان الله يفرج همك |
رد : حياتي بتضيع والسبب زوجي
انا جربت معاه اني انحاش عنه اقوله ماعاد طايقه ريحتك دخان ملابسك وجسمك ومرات اسوي نفسي مصدعه الا صدق صرت لا شميت صدعت قلت له مره الله لايواثمني ترا هذا مو حل لاتدخن عندي لاشميته صدعت مادري هو تعب ولا ادمان ادمنت على ريحته تكفى ابعد عني
وصار فبيتنا بس فمجلسه صرت اكره ادخل المجلس ماعاد ينظف وصخ وصخ المجلس لاراح الدوام ادخل بنظف افتح الشبابيك ولا ما افتح الريحه ثابته والارضيه انعدمت منه خصوصا ان اللي فالزقاره ذا ينتثر على الارض وصار يطردني لا انظف المجلس الا مره فالاسبوع وخلال ذا الاسبوع يصير المجلس وصخ وصخ مناديل منطله وعلب دخان فاضيه وغبره وكل شي صارو اخوانه يجونه فجاه وانا استحي منهم احسهم بيقولون وش ذا الوصخه مانظفت وهو اللي طاردني مادخل انظف قلت له انت الحين وش استفدت من الدخان صدرك انعدم اسنانك انعدمت شفايفك اسودت ثيابك تخفست فلوسك ضاعت وش استفدت ماشوف فيه اي فايده الا الضياع يقول اي والله صادقه يارب تهديني وابطله قلت اوعدني قال وعد اول ماتحملين ابطله يوم جا مره ذكرته قلت تراك وعدتني لاحملت تبطله تكفى مابي عيالنا يعيشون هالجو يكفي اني انا انعدمت رئتي من دخانك من ريحته حس ان ممكن احمل قال ابد لا طلعتي الاربعين ابطله حسيته يستهبل علي يكذب علي كني طفله قدامه |
رد : حياتي بتضيع والسبب زوجي
انا عرفت من اللي يبيع عليه الحشيش ومره فكرت ابلغ عليه قلت علشان لايبلينا ولا يبلي غيرنا وبعدين فكرت قلت يمكن يطبون عليه وزوجي رايح له وفكرت فحرمته قلت بتضيع حياتها بس زوجها بيضيع حياتي انا
بس للحين تدور فبالي اني ابلغ على ذاك الكلب ضيع اوادم بخرابيطه |
رد : حياتي بتضيع والسبب زوجي
روحي بيت اهلك ولا ترجعين الا بشروط قوية واولها يترك الحشيش والمخدرات ويتعالج منها واستخيري الله في بقائك معاه
|
رد : حياتي بتضيع والسبب زوجي
عزيزتي اذا انتي راح تواصلين نصحك له بالطريقة هاذي فتأكدي ان زوجك ما راح يتغير.
الدعوة فيها حشيش. يعني شي كبير ومميت. شي ماينسكت عنه ابد. والمشكله بعد انك تفكرين بالحمل انا عارفه حبيبتي انك من كثر ما تحبينه مؤ قادرة تفارقينه بس الموضوع يبي منك وقفه قويه. موقف يهزة يعني مثلا اطلبي منه الطلاق وقولي خلاص انا معاد ابيك ولا قادرة أتحمل العيشه معاك بس بشرط. اذا انتي واثقه انه اصلا مستحيل يطلق من اول شي. يعني متمسك فيك. اللي اقصده استخدمي الطلاق كأسلوب تهديد عشان يخاف جد ويحاول يبطل. تري والله اذا ادمن هالشي والله مايفكك منه الا السجون. الله لايقوله انشالله. ياقلبي بعضهم خلاص ممكن يضرب ويصرخ يسوي اي شي. لو احد من اهلك عرف بالموضوع انا متأكده ماراح يرضون انك تكملي حياتك معاه. فياليت تتداركين للموضوع وتهددينه بشي قوي |
رد : حياتي بتضيع والسبب زوجي
من جد قلبي معاك الله يصلح الحال ان شاء الله ويهديه يارب
|
رد : حياتي بتضيع والسبب زوجي
امممم ودي اقولك على كلام بس ماينفع تقوليه لزوجك ومايتقبله الا من خويانه او اي رجل
ومن سابع المستحيلات اصلا يروح يكشف طول ماهو مستمر على هالبلا , الله يبعده عنه ويصبرك ومليون في الميه وربي مدمن شاهي المهم اذا وعدك يبطله ويروح يكشف , 15 يوم خليه يكثر من الشاهي يوميا وتروح اثارها بالكشف الله يهديه يارب ويرجعلك احسن من اول |
رد : حياتي بتضيع والسبب زوجي
الله ييسر لك امرك يارب ...
موفقه خيتووو ولا تتحطمي ولا قلبك يحترق ... كل شيء وله حل وبالنهايه الحياه مو مستاهله نخسر انفسنا عشانهـا ... نحاول ونسسسوي الي علينا وررررربك كريم ... ررحم الله حاااااااالك .. وفررررررج همك .. وكتب اجرك .. |
رد : حياتي بتضيع والسبب زوجي
مشاكل الإدمان تبدأ من سيجارة دائماً
والخروج من هذه الدوامة يحتاج لاثنين لا ثالث لهما صبر منك + تثقيف نفسك وأخذ جرعات كافية في كيفية مساعدته تحتاجين لفهم ما تحدثه هذه المادة السامة من تغيرات في جسده وعقله ونفسيته لتتمكني بسهولة من تجاوز الآزمة أما انفعالك وبقائك في هذه الحالة النفسية لن يغير شيء من ادمانه أما كفاكِ السنوات الأربع وأنت محلك سر!!! واتركي قضية الإنجاب لما بعد شفاءه فالرجل ليس في أتم استعداد أن يكون أب وقدوة صالحة أم أن الكم يهمك أكثر من الكيف؟! |
رد : حياتي بتضيع والسبب زوجي
يجب عدم السكوت عن زوجك وأخيه .
لأبد أن تتدخل أطراف أخرى لمساعدتك لأقناعه للذهاب لعيادة مكافحة الأدمان . مع زوجك لا ينفع أنصاف الحلول ، لأنه مدمن والسكوت عنه يزيد حالته تدهور . ويجب سحب السم من جسم زوجك ليعود لطبيعته ويتنظف جسمه من هذا السم . وهذا يستغرق من أسبوعين إلى ثلاثة أسابيع في المستشفيات والعيادات المتخصصة . الله يشفيه ويعود لك سليم معافى ، وعليك بالدعاء . تحياتي . |
رد : حياتي بتضيع والسبب زوجي
المشكله اني فكرت اهدده بالطلاق بس لقيته رجال بايع يحبني ويموت فيني بس لو بقوله طلقني قال روحي بتجيك ورقتك بدون اي مشكله او شكوى هذا اولا ثاني انا لو بروح لاهلي اهلي بعد بيستغربون جلستي ويمكن يضغطون علي يشوفون فيه مشكله ولا لا ويمكن ابوي لو يدري قسم مايخليني اشوف رجلي من بعد ماشفته ابوي واعرفه
والحمل يمكن خيره اني متاخره فيه بس عاد قلبي تقطع واسلوبي يمكن متعب شوي لاني ملحه ملحه عليه بس وش اسوي اربع سنين استخدمت كل الاساليب انا الحين تايه كتبت السلبيات والايجابيات اللي فيه فورقه لقتهم متوازنين على كثر ايجابياته على ان نفس كثرها سلبيات ومن اكبر سلبياته الحشيش الحين ابي رجال هنا يفهمني هم اخبر فذا الامور صدق الحشيش مصيبه ولا على قولته هو شي خفيف ويكون فعقله انا اشوف انه يعصب يعصب يفور اقول ياربيه لايذبحني هذا ومن يروح مجلسه ويدخنها يرجع هادي يغلب على وضعه الصمت بس ساكت صديقتي تنصحني بالطلاق تقول هو اللي بيريحك لاني تعبت منه بس الطلاق بيذبحني عارفه عمري مقوى فرقاه |
رد : حياتي بتضيع والسبب زوجي
مره علقت فمجلسه صور عن اثار التدخين وحطيت له ايات قرانيه واحاديث عن اللي يضر بنفسه
قلتي يمكن هاه يدخل لقلبه خوف فجاه لقيته يناديني تعالي جيت قال ضفي خرابيطك هذي وروحي وطلع من المجلس لين ضفيتها فكرت اقول لامه علشان تتفاهم معاه ومع اخوه بس خفت من زوجي نفسه لو درى اني قايله لامه يطلقني فكرت اشوف العاقل من اخوانه الكبار واكلمه واطلبه انه ينصح زوجي من دون سيرتي ويساعدني لقيت اخوانه مثله يدخنون وواحد منهم ابصم بالعشرين انه مع زوجي حشيش والثالث اشك فيه والرابع مو متاكده وانا كنت ابي اكلم الرابع لانه الكبير بس شكل اخوانه كلهم طايحين بنفس المشكله الا الكبير لانهم دايم مطيحيين فالمجلس عندنا الا الرابع قليل يجي بس يدخن والقى بالطفايه حقت زوجي قطوف حشيش معقوله يحشش قدام اخوه الكبيير اللي يخليني مشتريه زوجي اني اشوف فيه تانيب الضمير واشوفه مو راضي عن نفسه ووده يبطل بس ماقدر من اخوه ذا اللي دايم يجي وهو ماعنده عزم انا ابي حل غير الطلاق ابي حل اقناع طنشت وتكلمت كلها مانفعت معاه يمكن انا ماعرفت يمكن فيه احد احسن مني يعرف فذا الامور قولو لي وش اسوي |
رد : حياتي بتضيع والسبب زوجي
لا اله الا الله
|
رد : حياتي بتضيع والسبب زوجي
اقتباس:
اسمحيلي ردي قاااسي ...بس والله اعتبرك مثل اختي وماارضى عليها هالشي اللي يصير ابداا |
| الساعة الآن 10:42 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©