حياتي الزوجية الجديدة [ مستجدات الرد 73- 77 ]
 

السلام عليكم و رحمة الله و بركاته

كيفكم ..

أنا ( روح الطير ) ..
بس داخلة بيوزر كنت فاتحته زمان ، عشان الإدارة رافضة تغير اسمي .. :29:

و ما احتجت لليوزر غير دحين ..

.
.

ما أبغى سي السيد يدخل و يقرأ ( أمهات أفكاري ) .. :25:

.
.

بأكتب هنا ( فضفضة عنه ، مخططاتي معه ، لفين وصلت و إيش قررت ) ..
و بالمقابل ..

أحتاج كلماتكم اللي تنير حياتي ..

.
.

و الحمد لله ،، رجعت وقفت على رجولي بسرعة و أقوى من قبل ..
و بثقة أضعاف أضعاف ما سبق و الحمد لله ..

و ما أنسى أفضالكم علي ، مع إنه فيه كثيرين تجنبوا يردوا علي ..
بس كانوا مشاهدين .. بس يالله سامحتكم .. :30:

.
.

لي عودة ..

رد : حبيت أشارك عشان أفيد ..
 

*. مخططاتي تأتي ( تلقائية ) .. لإني يومياً و كل لحظة أحاسب نفسي أول بأول ..
و أخطط أول بأول ..

*. طبعاً عودتي لزوجي ، و كلامي سابقاً بأني سأجعله ( ملكاً ) ..
ليس ضعفاً أو هواناً مني ..

بل كنت في زوبعة داخلية ، و كنت أهدف إلى الإنتقام منه ( بأنوثتي الصارخة ) ..
لكن بطريقة ذكية ..

.
.

و من أجل ذلك قمت بالتسجيل بدورات ناعمة الهاشمي للإستفادة أضعاف و أضعاف مما أعلمه ..
و حاليا سجلت بدورة ( اسبايسي ) و دورة ( الجاذبية و الجمال ) .. و كل دورة مدتها 4 أشهر أقل شي ..

و لسى راح أكمل بقية الدورات بإذن الله ..
و فيه دورة بإسم ( قوة المال ) .. بأخدها الشهر الجاي بإذن الله ..

و الحلو بدورات الدكتورة ، إنه بعد 5 دورات عالأقل ..
من الممكن إني أسجل بدورة ، أصبح فيه ( مستشارة شخصية ) :D
مع دفع رسوم طبعاً ..

و حابة وقتها أفيد الأخوات هنا و الأخوان بالإستشارة ، مما أعلم و ما سأتعلمه بإذن الله ..

.
.

يعني بأضرب أكثر من عصفور بحجر واحد .. :25:

رد : حبيت أشارك عشان أفيد ..
 

* الأمر الآخر ..

من هذاك اليوم ، كان اتفاقي معاه و بشكل صريح ..

يا فلان ، أنا من بعد الآن .. ما راح أكون مسئولة عن أي شي ..
رجاءً ،، إنت الرجل .. إنت المسئول عننا و عن كل شي ..

أنا من بعد اليوم ، أبغى أرجع ( أنثى ) ..
و إنت سيد البيت ،،

إنت المسئول عننا ..

.
.

لو صح تحبني ، و ما تبغاني عشان الوظيفة أو الراتب أو أي مصلحة ..

أنا من بعد اليوم ، ما راح أصرف أي قرش ..

.
.

قال لي ( ابشري ) ..

و من هذاك اليوم ، و أنا ( ريال واحد ) .. ما صرفته عالبيت ..
بس طبعا أشياء تلزمني أنا .. أو مثلا رسوم مدرسة ولدي و الباص تبع مدرسته ..

لإني أبغى لولدي الأفضل ..

.
.

و المرة هذه ، قراري أخدته و بقوة قلب ..
لإنه يستحق ( العقاب ) ..

رد : حبيت أشارك عشان أفيد ..
 

رد : حبيت أشارك عشان أفيد ..
 

الله يزيدك يا قلبي كمان وكمان ويهدي سركم حلووه الثقة بالنفس حلوو التفاهم والصراحه بين الزوجين علشان يوضح كل شئ وتتحط النقط على الحروف موفقه يارب والى الامام
تحياااتي

رد : حبيت أشارك عشان أفيد ..
 

طبعا هذه النقاط كنت من زمان أهتم بها ،، و كنت مخططة لها من رمضان ..
بس كنت انتظر إني مجرد ما ألاقي شغالة كويسة و يبدأ الترم بعد العيد ، إني أبدأ بالأمور اللي خططت لها ..

و كنت أقول لزوجي ، معليه فترة بس و تعدي ..

فاللي تغير الآن ( الهدف ) ..

.
.

كنت أهدف قبل ، إني أعمل و أعمل و أعمل ..
عشان تزيد محبتنا لبعض ، و اهتمامنا ببعض ، و نكسب بعض ووو إلخ ..

بس دحين هدفي تغير ..
إني أعلّقه فيا أكثر ، و انتقم منه لكن مو بالتطنيش و الإهمال ..
( بالأنوثة الصارخة و الهدوء و الإنكسار له لكن مو بتذلل ،، بتغنج و دلال )

نقاط ضعفه و أعرفها ، راح أحاربه بها ..

.
.

أخليه هو اللي ما يقدر يستغنى عني .. و ما يقدر ينام من غيري ..
راح أكثف مجهودي ( أضعاف أضعاف قبل ) ..

بشرط ..

.
.

إني أعلق قلبي ( بربنا ) ..
و اهتم ببناء مستقبلي ..
و تربية أولادي حبايبي على أسس متينة ..
و ما أكلف نفسي فوق طاقتها و لا أضحي مثل قبل ..

رد : حبيت أشارك عشان أفيد ..
 

اوناا حبيبتي ..

يعيشك يارب <-- مو كذا تقولوها بالمغربي ؟؟؟

.
.

ما أعرف ، حسيت إني لازم أكمل معاكم ..
عشان أي وحدة قدمت تضحيات لزوجها و انقرصت منه ،، أبغاها ( تكون قوية ) و ما تنهزم ..
و حبيت أكتب كل شي أعرفه و أعلمه نفسي بنفسي ..

.
.

سماري برازيلي ..

زمان كنت أقول ، ربنا ما خلى الجنة غالية و بكسب رضا الوالدين ..
إلا لإنه إرضائهم ( صعب جدا ) ..

فكنت أحاول أكسب أمي و أتحمل عصبيتها و أقول عشان كذا ربنا خلى طاعتهم ، هو سبب لدخول الجنة

.
.

و دحين كمان عرفت ليش اللي تموت و زوجها راضي عنها ..
تدخل الجنة ..

لإنه زواج المرأة ، يعني دخولها لمعترك الحياة ..
يعني إنها في جهاد مع أنانيتهم و تسلطهم ..

و قلة عقلهم و دينهم .. :p

رد : حبيت أشارك عشان أفيد ..
 

الإشراف معليه ، ما عرفت إيش اختار عنوان ..
بس رجاءً لو تغيروه ..

لا تكتبوا روح الطير بالعنوان ،، عشان سعاة البيه ما يشم ريحة و يجي هنا ..
أصلا قلت له قاطعت المنتدى خلاص ..

و ما استخدم النت قدامه ..

.
.

زمان كان ينبسط إني انشغل بالنت ، و يحاول يشغلني بأي شي أحبه ..
مو عشاني ، عشان نفسه ..

.
.

رد : حبيت أشارك عشان أفيد ..
 

واااااوراح يكون عندنا استشاريه انا والله ناويه ادخل بدورات ناعمه بس مالقيت احد ثقه مشترك فيها عشان اسأله عن رأيه فيها وانا والله احب مجال الاستشارات بس فيه ناس سبوها وقالوا بس فلوس على الفاضي فترددت لكن انا مبسوطه اني راح استفيدمنك وأسألك عنها

رد : حبيت أشارك عشان أفيد ..
 

* كنت من رمضان بأتكلم مع نورة إني بديت أحط زيوت بشعري و اهتم أكثر ..
و إنه بعد رمضان كنت ناوية أبدأ اعمل رياضة و كذا لزيادة الوزن ..

.
.

بكرة رايحة اقابل طبيبة التغذية إن شاء الله ، موجودة بمقر عملي ..
و بأقيس وزني عندها و طولي و بتكتب لي نظام غذائي معين ..
أخدت موعد عالساعة 11 الصبح إن شاء الله ..

و رحت اليوم للنادي الرياضي برضو بمقر عملي ،،
و طلبت موعد أقابل فيه المدربة و قالولي بتكون فاضية عالساعة 12 الظهر إن شاء الله ..
راح أخد عندها تدريبات ..

.
.

و اليوم ارسلت لجوال زوجي رسالة ..

" إيش رايك نتحدى بعض ، أزيد أنا 5 كيلو ،، و إنت تنزل 20 كيلو ،، خلال شهرين ..
و اللي يفوز يحكم عالتاني بأي شي "

.
.

طبعا كنت أول مع نفسي مخططة أبدأ بالبيت ..

بس اليوم شفت الفرصة أمامي و رحت سألت و استفسرت و نويت ..
كنت مترددة الترم اللي فات ، عشان ولدي كان صغير مرة و كان جدولي مضغوط جدا ..

.
.

طبعا زوجي رد علي ..
( أي شي ،، أي شي ) ؟

قلت له
( بس مو تشطح مرة )

قال لي برسالة
( حتى لو تسفرينا ماليزيا ) ؟

قلت له
( بس إنت تسفرني جزر الهاواي ) ..

.
.

قال لي
( أوديك جدة عندهم جزر هاواي ههه )

.
.

ما عطيته وعد ، لإني إلى الآن ما راح أوعد بشي إن ما شفت تغيير و تحسن منه ..
و أصلا هو ما حيقدر يسافر ، لازم يسدد مخالفاته أول شي عشان يطلع جواز ..

بس هو مرات كذا ( يتريق بس ) ..
و ما أعرف مزحه من جده ،،

إن زعلت ،، قال امزح ..
إن طنشت ،، قالي فين وعدك ؟

فأتعاملت معه بالطريقة هذه ، أقلب الموضوع عليه ..
و اطلب أنا منه طلب تعجيزي ..

رد : حبيت أشارك عشان أفيد ..
 

رد : حبيت أشارك عشان أفيد ..
 

رد : حبيت أشارك عشان أفيد ..
 

اونا

هو مو انتقام ، يعني انتقام بالمعنى السلبي ..
انتقام بالمعنى الإيجابي .. ;)

ما أقدر أشرحها كيف .. ^_^
بس خالتك قوية ما شاء الله ..

.
.

أنا زوجي فاهمته و فاهمة غرضه الرئيسي إيش كان ..

و الحمد لله ماني مقصرة معاه بالإهتمام و كذا ..

الدليل وقت أرسل صورته ، كنا أنا و هو ( نايمين ) و مبسوطين و نمزح مع بعض و نضحك و نتريق سوا ..
حتى قمت متأخر و بسرعة جريت عالمطبخ اسخن البيتزا حقة السحور عشان الفطور ..

مجرد ما خرجت من المطبخ و شفته مشغول بالجوال ، أحد ارسل له شي ..
و هو يصور صورة له متصورها من استديو ..

على طول ، قلبي قالي فيه شي .. و كذبت احساسي ..

بس جلسنا عالسفرة ..
قلت له بصريح العبارة ، مع إني و الله ما شفت أي دليل ..
و هو تفاجأ أصلا .. عشان كذا مرات كان يقول لي ( إنت ولي من أولياء الله ، أحاسيسك دايما تصيب و ما ينضحك عليك )
هههه

قلت له .. وقت كان يصور صورته قبل الأذان ..
حبيبي ، بتصور صورتك عشان ترسله لصاحبتك ؟؟؟

تغير وجهه ، و قال ( إيوة ايش يدريك ؟ ) بيحاول يبعد الشبهة ..

.
.

و مجرد ما أذن ، و أنا مشغولة بالمطبخ ..
و خلاص السفرة جاهزة و هو مشغول بالجوال و جالس ياكل ؟؟

قلت له بعصبية ..
( ما أعرف ، قلبي حس فيه شي )

قلت له :
أنا ماني شغالة عندك ، اقوم و أجهز السفرة و أأكل الأولاد ،، و إنت تجلس تكلم صحباتك ..

عصببببب و اتهمني إني أشك فيه و عمل حاله زعلان ..

.
.

و بعد العشا ،، اعتذر منه و تأسفت إني ما قصدت بس قلبي فجأة عورني ..
و تحججت له ، إني تعبانة لسى عشان موت أمي ..

و كذبت أحاسيسي و صدقته ..
و حتى ما كان يحط عينه بعيني و وجهه متغير ..
برضو كذبت أحاسيسي وقتها ..

.
.

أقصد إني ماني غافلة عنه ، و الدليل إني انتبهت لتغيره مباشرة ..

.
.

بس برضو راح ( انتقم ) بطريقتي :D
أقصد إني أخليه هو اللي يبحث عن رضاي ..

و أنا ما راح أعلق نفسي به ، بس راح أحسسه العكس ..

.
.

لإنه أي زلة لاسمح الله بعد كذا ،، هو يدري إيش بيكون المصير ..
و أنا وقتها ما راح أتراجع أبدا ..

رد : حبيت أشارك عشان أفيد ..
 

راجية عفوه

لحد دحين خلصت الفصل الأول من دورة اسبايسي ..
ما شفت هذاك الشي .. بس بأشوف بقية الفصول ..

لسى أنا بالبداية .. :)

رد : حبيت أشارك عشان أفيد ..
 

نصيحة لوجه الله عن تجربة
الرجل لا تعطوه اكبر من حجمه ولا تزيدوا بالدلال لانه الرجال مو مثل بعض يعني فيه رجل الوحدة لو تضوي له العشرة وتحرق حالها علشانه ما يبين بعينه وفيه رجل نفس الشي لو تضوي العشرة له يشيلك بعيونه وفوق راسه
اعطي لكن بعقل وبوسطيه لانه كثرة الدلال تفسد الرجل عامليه بما يرضي الله
تدرين ذكرتيني من سنة بس كنت يوميا شموع وليالي رومانسية والبيت نظيف وهادي وفواحات والاكل جاهز وملابسه مرتبه ومبخرة ومكوية وشو بدك يا عزيزي حاضر
استقبله بكاسة العصر لما يجي البيت
واخلي الاولاد ساكتين ما يتكلموا ولا نفس
طول حملي 3 مرات من بداية الحمل لنهاية الحمل وانا اعطيه حقه الشرعي وانا مكره بسبب اكتئاب الحمل
ليلة العيد وزواجنا وميلاده هدايا وهو عمره ما فكر يعطيني ورده
عمري ما طلبت منه اروح صالون او خياط او حتى اسافر معاه سنين مع بعض عمرنا ما سافرنامثل هالازواج
مقتصده بطلباتي واراعي ظروفه وما ازعل منه اذا قصر لاني كنت راضية بحياتي معاه
مساج يوميا كل ليلة
تخيلي يجي من برة وما يتحمم وتعطيه حقه وما اقوله روح تحمم علشان ما اجرحه
حرمت نفسي من كل شي حلو وجميل علشانه
تنازلت عن وظيفتي ودراستي وصديقاتي وجاراتي وحتى اهلي اجلس بالسنين ما اشوفهم علشان ما اكلف عليه
احترم مشاعره واجي على نفسي علشانه
اتفنن باصناف الاكل والحلويات
حملت اكثر من مرة وجبت له اولاد يفتخر فيهم
وخربت جسمي بالحمل والرضاعة والولاده
بعت ذهبي كله علشانه اول اسبوع العرس
كثير اشياء جميلة عملتها له ما تحضرني الحين
وفي الاخير كافئني بخيانة بشعه واتوقع انه تزوجها مسيار او عرفي
شوفتي اللي تتنازل عن حقوقها وتدلل وتدلع وتعطي الزوج اكبر من حجمه
لا افراط ولا تفريط
كان زوجي دائما يقولي الرجل لازم يكون عنده ثنتين زوجة للاولاد وعشيقة للحب والفراش والوناسة
استغفر الله العظيم مرت علي فترة اقول لو كنت عارفة انه الحياة فيها نظام العشيقات او الزواج السري وكل اسبوع يجيني مرة كان فضلتها على اني اتزوج منه واتبهدل معاه
لكن عزاي الوحيد انه الله عادل ومن اسمائه العدل والرحمة
اكيد هناك حكمة

رد : حبيت أشارك عشان أفيد ..
 

رد : حبيت أشارك عشان أفيد ..
 

ماشاءالله عليك ... باختصار المثل يقول الضربة اللي ما تقتلك تقويك ... وأيضا رب ضارة نافعة .. سبحان الله ... ... ... ... ... ... .... .... أكره الضعف في المرأة ... ... ... ... ... ... ... وعندي قناعه انه أي شيء يحدث لنا له حكمه .. وإذا ما قدرنا نغير واقعنا فعلى الأقل نطلع من تجاربنا مهما كانت صعبه .. بفوائد ... ... الله يوفقك يا رب وان شاءالله نسمع أخبار حلوة منك دائما ..

رد : حبيت أشارك عشان أفيد ..
 

عقوبة تانية ..

أحسسه إنه هو اللي ضيع ثقتي بنفسه و بيده ..

كنت بأسحب فلوس مدرسة ولدي من الصراف ..
فزوجي وقف سيارته قدام صراف ، و فتح شباك السيارة اللي بجهته ..

يطالع فيا و يستناني أعطيه البطاقة عشان يسحب لي ..

.
.

أنا سكتت و نزلت راسي و عيني و ما أطالع فيه ..

قام فهم ، و رجع سيارته ورا .. و طلعت من السيارة و سحبت الفلوس ..
( ما أبغاه يشوف كم رصيدي ، لإنه الصراف الأهبل يكتب كم بالرصيد بعد ما يسحب الفلوس ) :(

.
.

المهم ..

الأسبوع هذا ، رحت للبنك و كنت بأودع مبلغ لحسابي ..
زوجي جا بياخد مني و يعطيه للرجال ..

قلت له ( معليه لو سمحت ) ..

قام كشر و تغير وجهه ،، و طنشته ..
بعدين كلمته و قلت له ( حبيبي مو معنى إننا بالسعودية إني ما أكون مسئولة عن رصيدي ..
أحبك و اسمع كلامك ،، و إنت كلمتك عالعين و الراس .. بس حسابي معليه خليني اتصرف فيه على كيفي ) ..

.
.

قالي ( أنا مو سواق أجيبك و اجلس كذا قدام الرجال ) ..
ما رديت عليه ..

قالي ( أنا رايح السيارة إذا خلصتي تعالي ) ..

طبعا البنك هذا ما عندهم للأسف فرع نسائي بمدينتنا ..
و عشان كذا كانت كل عملياتي البنكية ، زوجي يدري عنها ..
و كنت متطمنة له إنه خلاص يدري إني أتابع حسابي أول بأول ..

.
.

بس كذا حسيت أفضل ،، عشان ( لا يطمع ) و تتغير النفوس ..

.
.

المهم .. استغليت الفرصة :D
و قلت أراضيه بعدين ، بس خليني أخلص دحين كل أشغالي بالبنك ..

- غيرت كلمة سر البطاقة ..
- طلبت تفعيل حسابي اللي بالنت ، و صرت دحين كل عملياتي المصرفية اعملها بالنت .. ^_^
- طلبت من الموظف يدخلني بالإكتتاب و يعلمني عليها ..
- سألت عن تفاصيل التمويل العقاري ..

يصير بعد كذا ، كل أشيائي بالنت أخلصه ..
زمان كانت فيه مشاكل بيوزري اللي بموقع البنك بالنت ..

.
.

بعد ما خلصت كل أموري ..

رحت أعطيت كم كلمة حلوة لزوجي :p

و قلت له ، شفت كيف صبرنا و نلنا ..
و حسسته بقيمة التعب اللي تعبناه ، إنه بيجيب نتيجة دحين ووو
و حسسته إنه هذا البيت اللي و اللي ووو إلخ ..

بنيت له أحلام كبيرة بإمتلاكنا لبيت يجمعنا ..
بنيت له أماال كبيرة عشان يشعر بالمسئولية و يشوف النتيجة اللي وصلت لها بعد التعب ..

عشان هو كمان يبني له هدف و يعبي الفراغ اللي بداخله ..

صرت كل مرة و مرة ، أحسسه بإنه تعبنا ما راح فاضي ووو إلخ
المهم ،، بأعمل له غسيل مخ .. :D

.
.

و ناوية اسجل بدورة ( قوة المال ) لناعمة الهاشمي ..
إذا حسيت إني استفدت من الدورات هذه ..

لإني أتمنى ادخل بأي استثمار أو تجارة ..
بدون ما أوكل أحد .. بس صعب و ماني عارفة كيف ؟ : (

رد : حبيت أشارك عشان أفيد ..
 

عقوبة ثالثة ..

إذا يوديني العمل ، أو ياخدني ..
ما يوقف سيارته أمام ( المدخل الرئيسي ) ..

في باب جانبي هناك مافيه أحد ، يوقفني عنده ..

.
.

لإنه الترم اللي فات ، كنت هبلة ..

كان كاتب على طاقة السيارة ( للبيع .............. )
بالخط العريض و حاط رقمه ..

على باله إنه وحدة تدق عليه ..

طبعا هو ما قال ..
بس خلاص احساسي و فهمت ..

ما كنت أدري إنه كذا تفكيره ..

الدليل ليش ما كتب الجملة هذه بالجهة المقابلة اللي ماهي بجهة البنات ؟؟؟

.
.

المهم ، سواءً صح أو غلط ..

الحركة اللي عملتها معاه دحين ..
( تحسسه يومياً .. بالدونية .. و إنه قد إيش شخص .... )
و تخليه يخجل من حاله ..

.
.

طبعا هي أريح لإنه مافيها زحمة البوابة هذه ، ولازم أمشي برجولي لحد ما أوصل للمدخل ..
بس خليه فترة أحسسه إنه شخص ( ما أثق به ) ..

رد : حبيت أشارك عشان أفيد ..
 

عزيزتي ..
كنت متابعة أحداثك بدقة وأفتح وأشوف التطورات وأقفل بس أكثر شئ يدفعني لعدم المشاركة أنك كنت مشوشة جدا فكنت بحاجة لأن تهدأي أكثر من أي شئ آخر .. ثانيا كانت هناك آراء تكتب سديدة وموفقة ولم يكن عندي جديد عليها ..
ثالثا .. دعواتي لك هي الأهم يا غالية ..:)

فرحت كثيرا بما كتبتيه فأنت مرتاحة وهذا الأهم ..
كان عندي شعور من يوم كتبتي الموضوع في قسم المطلقات وقرأته أن هذا سيكون فارق يغير زوجك وحياتكم للأفضل..

اسم روح الطير يناسبك >> قلبك مثل الطير..
عصامية يناسبك >> واضح هذا من حياتك ..

الله يوفقك يا قلبي ..

رد : حبيت أشارك عشان أفيد ..
 

عقوبة رابعة ..

المطعم هذاك ، ما يروح له و لا ندخل له أبدا ..

و أي مطعم هو يدفع لنا ..

و في حالة اشتهيت أنا مطعم ، و ما كان معاه فلوس كفاية ..
أنا أحاسب لنفسي و للأولاد .. و هو يحاسب لنفسه ..

زي ما دفع للزبالة هذيك و عرف يدبر فلوس وقتها ، خلاص يدبر حاله ..

.
.

طبعا أنا كذا اتفقت معاه ..

بس وقتها ، راح أبين له إنه خلاص عشانك كم مرة دفعت لنا ..
فما راح أبخل عليك و راح أكون أفضل منك ..

.
.

أبغاه بس يحس و يتعاقب ..

لإنه نفس اليوم 20 رمضان ..
أنا كنت سألته ، غريبة فين راتبك .؟ و قال ماعنده و لاقرش و كلها انصرفت ..

و هو معاه بفلوسه و راح المطعم ..
( سم يارب ) ..

أصلا قلت له ، الفلوس هذه اللي صرفتها بالحرام ..
تشهد عليك يوم القيامة ..

.
.

و من يومها و هو يصرف ، كيف و ما كيف ؟؟؟

ما همّني ..

رد : حبيت أشارك عشان أفيد ..
 

عقوبة خامسة ..

أنا ما راح اصبر على أي ظرف بعد كذا ..

لو انطرد من عمله بأي يوم ،، فلا يستنى مني إني اصبر أو اتحمل ..
خلاص ،،

شفت نتيجة التضحيات ، و هو كسر كل شي ..

ماني مستعدة أقدم أي تضحية ..

خليه ينطرد من عمله ، و بيشوف وقتها ..
ما راح أرحمه ..

تسعة أشهر عاطل جلس و بعد ما صبرت و تحملت ..
قال ما عمرك وقفتي معاي ،، و بدل ما يعوضنا ..

راح سمع لشيطانه ..

.
.

خلي شياطينه تنفعه ..

أنا ما راح اصبر ..

.
.

عجبه عجبه ، ما عجبه بكيفه ..
أنا ماني خسرانة شي وقتها ..

و لا أنا فاتحة ( ملجأ ) ..

هو الرجال ،، مو أنا ..

رد : حبيت أشارك عشان أفيد ..
 

هذه العقوبات اللي فاكرتها لحد دحين ..

.
.

طبعا ،، نفس الوقت مثل ما قلت ..
بأحسسه برجولته بأمور أخرى .. و إنه هو رجال البيت ..
و أعطيه من الكلام الحلو و التعامل اللي قلبه يحبه ..

بس رجاءً ،، يبعدني عن تحمل المسئوليات أو الصبر فوق طاقتي ..

.
.

هو وعدني إنه صار انسان تاني ، انسان يعرف يحافظ على أسرته ..

مسئوليات أولاده ، ما أشيل أي شي فوق طاقتي ..

.
.

التطعيم زمان كان يتأخر ..

دحين ( لأ ) ..
و الحمد لله راح و طعم ولدي ..

.
.

سواق باص المدرسة ، صح أنا دفعت لولدي ..
بس زوجي قابله و تفاهم معاه و أخد رقمه ..

.
.

اليوم ولدي مسخن ، قلت له ( تصرف )
أنا تعبني الولد أمس و تعب الشغالة و شوفه كيف تعبان ..

كان بيغيب عن عمله عشان ياخده للمستشفى ..

بس شفت ولدي نام خلاص ، فاتفقنا بكرة الصبح ناخده إن شاء الله للعيادة ..

.
.

أبوه مريض ..

أخليه يخدم أبوه و يترك أشغالي عشان أبوه ..

.
.

أخته تبغى تروح مع تاكسي و هو بالبيت ..

أقول له ( كيف ترضاها على أختك ؟ إنت بالبيت و هي تركب مع تاكسي ؟ )

.
.

يعني حتى أهله ، صرت أحسسه بالمسئولية تجاههم و خاصة أمه و أبوه ..

بالبداية كان يتضايق ، و زمان كان يقول لي ( مالك دخل ) و كان يعمل لي مشاكل معاهم ..

دحين هو بنفسه صار يقول لي ( الله يرضى عليك و يرزقك بر أولادك ) ..
صح ينقهر بالبداية ، بس بعدين أعطيه كلمتين حلوة ..

و أقوله له ( يالله حبيبي .. خلي أبوك يفرح و يشوف كيف حبيبي فلان صار رجال يفتخر به ) .. ;)

.
.

لإنه زوجي ما راح يثبت لي إنه تغير بالفعل ، إن أحسن بس معاملتي و تغير معاي للأفضل ..

لازم أشوف كيف علاقته مع ربنا تحسنت للأفضل ..
و أشوف كيف علاقته مع أمه و أبوه للأفضل ..
و أولاده كمان ..

ثم أنا بالأخير ..

رد : حبيت أشارك عشان أفيد ..
 

رد : حبيت أشارك عشان أفيد ..
 

طيب أعطيني الطريقة أخوي الرسمي ..

أنا ما صار يهمني حاليا أعيش حياة زوجية صحيحة ..
ليش أكذب عليك أو أكذب على نفسي ؟؟؟

لإنه انكسر كل شي ، مو علشان الموضوع اللي صار ..
اللي صار كان نعمة من ربنا ..

عشان تنكشف لي أمور عديدة في زوجي ..

تخيل كم سنة عايشة مع زوجي ، و كل مرة اصحيه للصلاة ( يكذب علي )
يقول لي ( صليت ؟ )

اكذب حالي و اصدقه ..

بس اكتشفت إني متزوجة شخص ( مستهتر بصلاته ؟ )

.
.

هذا شخص ( أساسه أصلا مهزوز ) ..

.
.

عاطفة و حب و بأعطيه ،،

بالمقابل ، هو يشيل عني المسؤوليات ( و هذا الي المفترض يصير )
و كل واحد فينا خلاص يعرف دوره ..

أما العقوبة ، فبالنسبة لبطاقتي و رصيدي ( لإنه انسان محتال و مكار ) هذا اللي اكتشفته مؤخراً ..
و ماني شايفة فيها أي غلط ..

الغلط منه هو ، اللي استغل طيبتي و ثقتي بالسرقة و الإحتيال ..

أما المطعم ، فعادي ماني شايفة فيه شي ,,
شئ نفسي و ما راح أغصب حالي .. و فيه مليون مطعم غيره ..

أما قميصه ،، فهذا الشي مو أفضل من إني أهجره بالفراش ؟؟؟
يعني أخف عقوبة ؟؟؟

و غصب عني ، غيري يطلبوا الطلاق ..
خاصة بوضع مثل وضعنا ، انسان ناكر للمعروف ، طفل مراهق غير مسؤول عن تصرفاته ،،
لا يخاف الله ، و يمشي خلف شهواته ، اتكالي كسول .. إلخ
ياكل أموال الآخرين و ينافق في دينه ..

.
.

أنا ما أبحث عن حياة زوجية ناجحة ..
حط عليها ( إكس كبيرة ) ..

إذا كان هو أناني ،، فهو اللي علمني الأنانية ..
تبغاني أصير مثل باقي النساء اللي تنتهي حياتها و تدمر بإختفاء زوجها ؟؟؟

لا ياخوي ..
أنا حالياً ، بأبحث عن مصادر قوتي ( و استخدمها و أبرزها ) ..

لا أم و لا أب و لا أخ و لا أخت و لا زوج ..

ربي الحمد لله معاي ، ثم أولادي مستقبلا ، و أم و أبو زوجي بأحاول إنه زوجي يكسب رضاهم ..
عالأقل اكسب أجرهم .. ( لإني اكتشفت طرق زوجي بالأكاذيب بعد اللي حصل ) ..
وظيفتي ، منزل ملك يأويني أنا و أولادي و يغنيني عن السؤال و الحاجة .. و صحتي و ثقتي بنفسي ..

.
.

و بنفس الوقت ،، بأحسن التبعل و الحمد لله ..
و لا إيش اللي يخليني أدفع ألوفات عشان دورات .. أحاول أزيد من معرفتي ؟؟؟

لإني بذلت كل الأسباب و حاولت بشتى الطرق ..
بقيت آخر محاولة ، إن فشلت فيها ..

فكل واحد خلاص يشوف حياته ، و ما راح أندم وقتها ..

.
.

إنت تعرف إيش معنى تعيش مع شخص ( حرامي + كذاب + نصاب + مستهتر بصلاته ) ؟

.
.

لو عندك نصيحة تنصحني بها ، أنا هنا بأتعلم منكم ..
لكن ترموا كلماتكم و تمشوا ؟

هذا مو حل و لا علاج ..

رد : حبيت أشارك عشان أفيد ..
 

و أنا ذكرت طرق العقاب ،، لكن ما انتهيت ..

و إنت نسيت أنا إيش كتبت بالبداية ..
أعطيه الحب اللي يبغاه ، زي ماخلاني أتعلق به ..

بس المرة هذه ( بذكاء ) ..
مثل ما عمل معاي ..

.
.

ياخي ، أنا لو انهرت أو صار فيا شي لا سمح الله ..

أولادي مالهم أحد غيري بعد الله ..
و الحمد لله معيشتهم أحسن عيشة و معززتهم و مكرمتهم ، لحد ما يشتد عودهم و يعتمدوا على حالهم ..

و أبوهم أول شي بيعمله لو مالقي أحد يهتم فيهم ( و قالها بلسانه لي و حلف .. إنه بيحطهم بدار الأيتام ) ..
أدري إنه مجرد كلام ، بس زوجي و أعرفه .. أقل شي بيحط حرته فيهم و يخليهم يكبروا معقدين و مريضين نفسيا ..

و لا أهلي و لا أهله راح يتحملوهم ..

تبغاني أجلس أفكر بزوجي و كيف أعيش معاه حياة زوجية ناجحة ؟؟؟

ما عاد يهمني ،، و الله ثم و الله ما عاد يهمني ..
بس أنا أحب أعيش بحب .. فلازم أدلع حالي لو بأعيش معاه ..

.
.

شوف الأخت أو وسن .. كيف عملت المستحيل عشان زوجها و عشانها تموت فيه و تحبه ..
و هو كيف كافئها ؟

شوف الأخت دلوعة مودي .. إيش عملت عشان زوجها و أعطته بطاقة صرافها و كل شي ..
و مو كيف كافئها ؟

شوف الأخوات اللي بالمنتدى ..

.
.

لا ياخوي ..

أنا أعرف نفسي و أعرف مكانة نفسي ..

كنت أنزل مستواي لمستواه ، عشانه و عشان حياتنا ..
للدرجة اللي خلاني أبدأ أفقد ثقتي بنفسي و ألوم حالي ..

بس ( لأ ) ..

هو دحين يا يكمل دراسته و يتعلم و يحسن دينه و أخلاقه ، و يطلع لمستواي و تربيتي ..
يا يروح يدور له على وحدة من نفس مستواه ..

.
.

طول عمري متواضعة معه ،، للدرجة اللي بدأ يصدق حاله فيه و يشوفني ( ولاشي )
و الدليل ، مجرد ما أمي مرضت و ماتت ، و أخواني و أخواتي انقلبوا ..

هو أول شخص ( طعنني بالسكين ) ..

.
.

السكينة هذه ما راح أطعنه بها ،،

أهديته ( وردة ) مكانها ..

.
.

رد : حبيت أشارك عشان أفيد ..
 

و فيه شي كمان أخوي الرسمي

زوجي ترى كذا ( عاجبه ) ..
هو غير عن بقية الناس و الرجال ..

لا تحسبه يبحث عن حياة زوجية مثل ما إنت تبحث عن أو غيرك من الرجال ..
هو كذا يشعر بطعم المغامرة ..

خلاص ، خليني أعيشه ( عالمه ) اللي يبغاه ..

.
.

و هو تعجبه المرأة القوية و المعتزة بنفسها و بكرامتها ، مو المتسلطة و أنا ما تسلطت عليه ..
بالعكس ، كل شي أقوله تحت أمرك ..

لو عندك شي ممكن يفيدني ، فأنا بالإنتظار ..

أنا جيت أتعلم منكم ،،
و أعلم النساء كذلك إنهم ما ينهزموا ..

حاولت أمسك العصا من المنتصف ..

رد : حبيت أشارك عشان أفيد ..
 

بأذكر موقف دحين حصل .. عشان أصحح المعلومة للأخ الرسمي إن كانت وصلت بطريقة غلط ؟
و أبين التغيير الحاصل بحياتنا ..

زوجي من كم يوم بيحضر دورة ( و هو طول عمره يكره شي اسمه دورات أو تلقي أي معلومة ) ..
خلصت الدورة اللي مدتها كم يوم ، و كان متحمس لها ماشاء الله من البداية ..

اليوم كان نعسان و متكاسل يروح لها ..
شجعته إنه يروح و خسارة يضيع تعب كم يوم .. و لإنه الوقت تأخر ..
قمت أجلت ( شراء الخبز و العصير للمنزل ) ..

قلت له خلاص بكرة الصبح بعد ما تخلص من شغلك ..
لإنه بعد الدورة بيروح لوظيفته و يخلص الفجر ..

و أنا من أمس قلت له مافي عيش، عشان الشغالة لازم تفطر بالصبح ..
و العصير للأولاد .. بس عشان أبوه كان مريض ..

فكان زوجي بيترك أبوه لوحده بالمستشفى و يجي عشان يجيب العيش و العصير ..
قلت له ، حبيبي لا تترك أبوك عشاننا .. نحن عادي نقدر ندبر حالنا ..

بس من التعب بالمستشفى مع أبوه ، نسي يشتري العيش و العصير ..

طبعا الغدا موجود و كل شي و الحمد لله ..

اليوم وقت العشا ..
فيه عيش قديم ، دخلته الفرن و سخنته و قطعته ..
و قلت للشغالة تاكل منه ، قلت لها معليش عشان زوجي كان مشغول مع أبوه بالمستشفى ..
بس بكرة الصبح بيجيب معاه إن شاء الله العيش ..

قالت لي الشغالة ، لا عادي لا تشيلي همي ..
فيه أكل كثير الحمد لله ..

.
.

بعد الدورة ، زوجي دق علي و قال لي ( الحمد لله خلصنا الدورة و أخدت الشهادة و هي معتمدة من و من كذا .. إلخ )
قلت له ( ماشاء الله مرة كويس )

جلس يحكي لي بالجوال عن النقاط الأساسية اللي أخدوها بالدورة و قال بيوريني الكتيب ..
و الدورة كانت تتضمن نقاط عن طرق التآلف مع الزوجة و مع الأبناء و مع الأصدقاء ..
و قالي لي على شي قاله المدرب عن التآلف مع الزوجة .. و هو نفس النصيحة الي زمان كنت أقول له عنها ..

قلت له بحماس ( خلاص ، بس تجي البيت إن شاء الله الصبح .. أكون مستنيتك ..
و أجهز لك الحمام و الفراش .. و اسمعها منك )

قال لي ( خلاص أوريك الكتيب إذا جيت ) ..

قلت له ( بأسمعها منك أحلى ) ..
و جلست أقول له إذا جيت الصبح بأعمل لك كذا و كذا و كذا ..

سألني متى رايحة الدوام ؟

قلت له : ما بأروح بدري ..

قال لي : طيب كويس فيه وقت نجلس مع بعض ..
و بعدين نودي الصغير للمستشفى بالطريق ..

و يرجع زوجي ينام ،، و أنا أدق على سواق أهلي يرجعني إذا خلصت ..

.
.

قفلت من هنا السماعة ..

لعبت أولادي ، و شبعتهم ،، و ذاكرت لولدي اللي بالتمهيدي و راجعت له سورة الناس ..
و صرت أقول له ( حبيبي إنت رجال ، و إنت و إنت .. ) و وعدته إذا حفظ القران كله بعد الترم هذا ..

راح اشتري له ( دباب ) ..
و قلت له ( إن شاء الله تكبر و تقرا قران بالمسجد ، و الناس كلهم يصلوا وراك ، خلاص حبيبي اتفقنا ؟ )
استحى و مو متخيل كيف ..

بس بأحاول إني ازرع الفكرة براسه ..

.
.

المهم ..

تأكدت إنه الشغالة أكلت و شبعانة و مبسوطة و الأولاد و الحمد لله و زوجي ..
شفت إيش باقي لي شي اخلصه للعمل ، مالقيت فيه شي ..

جلست أقرى بالدورات اللي سجلت فيها و أحاول استفيد ..

.
.

و الدورات هذه ،، أولا و أخيرا من أجلي و من أجل زوجي ..
ليه ما اخترت مثلا دورة ( قوة المال ؟ )
و اخترت دورة ( اسبايسي ) و اللي معناها معرفة أمور كنا نجهلها بالعلاقة الزوجية ..
و اخترت كذلك دورة ( الجاذبية و الجمال ) قبل لا أختار دورة بعنوان ( البوصلة الشخصية ) لمعرفة التعامل مع الآخرين ؟

لإني أصلا مهتمة بإصلاح الأمور قدر المستطاع ..

.
.

بس نفس الوقت ،،

ما أصلح الأمور ( بغباء ) ..

لإنه بالأخير ماحد راح يفيدني ( غير نفسي ) ..

أنا لو ماعندي طاقة داخلية استمدها من نفسي ،،
بالأخير راح انهار و انتهي ..

فنفسي تهمني قبل كل شي ..

و حياتي الزوجية ، بيد زوجي هو اللي يصلحها ..
بإصلاحه من نفسه ..

هو مو طفل ،،
يكفيه ( طبطبة ) إلى الآن ..

أنا دللته بما فيه الكفاية ، و بشهادة الجميع ..
من حقي انتبه لنفسي و لأولادي ..

.
.

معليه ،، كلامي كثير ..

بس نحن بالأخير بشر ..

.
.

لو واحد رجال جاء و قال ( زوجتي راحت قابلت رجال غريب بمطعم ) ..
أقل شي راح تقولوا له ( طلقها ، اضربها ، افضحها ، وديها عند أهلها ) و غيره ..

لإنه رجل و كرامته ما تسمح له ..

.
.

بس لإني إمرأة .. بمجتمع ( ذكوري ) ..

فمو من حقي إني ( أتألم ) ..

رد : حبيت أشارك عشان أفيد ..
 

ذكرت المثال و نسيت أقول إيش التغييرات و ألخصها :

*. زوجي بدأ يبحث عن الدورات و يهتم فيها و متحمس لها .. بيحكي لي عنها عشان يثبت تغييره ..
بيسمع كلامي و يقدم مصلحة أبوه على راحته .. بيحاول يسعد أبوه و كل مرة اطلب منه يقدم أي شي لأبوه و أمه و يسمع
كلامي ..

ما بأحصر نفسي في قوقعة زوجي فقط ..
لي أنا أيضاً عالمي الخاص ،، و نفس الوقت ما بأحرمه من أي تواصل أو أي عاطفة ..

بس العقوبات اللي وضعتها ( لابد منها ) ..
عشان لا يفكر بيوم من الأيام إنه يكرر أغلاطه ..

و لازم يشعر بتأنيب الضمير ما بين كل فترة و فترة ..
حتى يتوب .. و عشان يعرف إني مازلت أتألم ..

و عودتي له ( لمحبتي الكبيرة له ) ..

و أنا مالي أي تخطيط أو شي ..
الأمور تمشي هكذا ، و أنا جيت اكتب ,,

بس هدفي إنه لا وحدة بيوم تنكسر أو تنتهي حياتها بسبب أنانية زوجها ..

رد : حبيت أشارك عشان أفيد ..
 

رد : حبيت أشارك عشان أفيد ..
 

ما قصدت الإساءة لا سمح الله أخوي الرسمي ..
لكن لثقتي الكبيرة برأيك .. فأنا أتمنى أن أجد ما يفيدني من نصائحكم و توجيهاتكم ..
و خاصة إنتوا الرجال تفهموا بعض أكثر ..

.
.

و أنا بالفعل ، ما أثق بزوجي ,,
و لا أشعر معه بالأمان ..

و مجرد ما راح يحس إني بديت أثق فيه ، أو رجعت معاه تمام ..

حيرجع يتكاسل ..

بس لازم أحسسه الفترة هذه إنه ضيع ثقتي و إنه جرحني وو إلخ

عشان يستمر بمحاولة الإصلاح من نفسه ..

.
.

جربت الفترة هذه ، إني مرات أكون عادية ..
أقوم أشوفه بدأ يتكاسل ..

لكن طول ما حسسته بتأنيب الضمير ..
هو راح يتحرك ، عشان يثبت لي إنه تغير للأفضل ..

رد : حبيت أشارك عشان أفيد ..
 

باختصار:

نقاط ضعفه و أعرفها ، راح أحاربه بها .. >>>> هذه زبدة الموضوع

رد : حبيت أشارك عشان أفيد ..
 

الله يقويك ,,,عصامية (":
ماشاء الله تحسن جميل في النفسية ,,,إلى الأفضل إن شاء الله

رد : افكاري ومخططاتي لحياة زوجيه ناجحه ..
 

رد : افكاري ومخططاتي لحياة زوجيه ناجحه ..
 

السلام عليكم اختي
افكار ناعمة الهاشمي تعجبني لانها تعزز ثقة المراة بنفسها في مجتمع يحطم المراة ويستصغرها
وبصراحة انا ماتابعت من قبل مواضيعك فما ااعرف قصتك
بس اسال لك من الله التوفيق والله يجبر بخاطرك

رد : افكاري ومخططاتي لحياة زوجيه ناجحه ..
 

ماشاءالله عليك
متاااابعينك

رد : افكاري ومخططاتي لحياة زوجيه ناجحه ..
 

آنــــme ــآ ما اشوف انه انتقام زي ماقالوا بعض الأعضاء
لكن ٱنـَYOUـِت صريحة وواضحة و تطالبين بحقوقك كاملة

رد : افكاري ومخططاتي لحياة زوجيه ناجحه ..
 

سنا نجمة ..

بالضبط .. جبتيها ..

رد : افكاري ومخططاتي لحياة زوجيه ناجحه ..
 

عصاميه لو يرحع فيك الزمن لاول يوم عرسك وش كنتي بتغيرين بنفسك او بحياتك ذيك الفتره

رد : حبيت أشارك عشان أفيد ..
 

شقردية سامحيني

بس عنوان إني أهدف لحياة زوجية ناجحة ..
هذه تعور قلبي ,, و تعبتني أمس ما اخبي عليك ..

لإنه الفشل ( منه ) هو ..

.
.

إنت عارفة إني أجلس و افتح صفحات حياتي من وقت الملكة لحد دحين ..
و كل ما افتح صفحة ، اكتشف ( كذبة ) وراها ( كذبة ) .. إلخ ؟؟؟

على قد ما كنت ( مفتحة عيوني و منتبهة له ) ..
بس أمور كثيرة ( تكشفت الآن ) بشكل واضح جداً ..

عشان كذا أقول إنه الي صار ..
( خير ) ليا ,,

.
.

عنوان الموضوع ..

( حياتي الزوجية الجديدة )