|
بهدلتنا ام سعد..!!
السلام عليكم ورحمة الله تعالى وبركاته
لو يسألني احد شنو الشي المشترك بين كل البيوت في العالم ؟؟ برد علية واقولة " المشاكل " والله مافيه بيت يخلى من المشاكل والهموم ، بس الحلو بالموضوع ان هالمشاكل ماتطول .. والأحلى من هذا كلة لما تكون المشكله دمها خفيف!! مثل المشكلة اللي صارت لأمي وأبوي امس! أمي ك زوجة لها اعمال جليلة في الحياة الزوجية وكونها ذات تاريخ زوجي قديم حبت تطلب من ابوي طلب وتجرب غلاها وتشوف هل السنين والعشرة اللي فاتت مع ابوي راح تثمر ويوافق على طلبها؟؟ او راح ينكر العشرة والعيش والملح ويردها ويجحد كل هالسنين اللي عاشوها بالحلوة والمرة!! جارتنا ام سعد الله يهداها زارتنا البيت وبيدينها "مضاعد ذهب" (اساور) وقالت لأمي ان زوجها ابو سعد شراها لها ك عربون وفاء وتقدير وك دليل حب ومعزة وغلا!! وانا بصراحة ام سعد هاذي ماصدقها ابداً ، لانها بكل اختصار وكالة انباء الشارع كلة!! ونقيلة حجي درجة اولى (والنميمة عندها ابيزة) بس طيبة حييل!! مرة من المرات سمعتها تقول لأمي فلانة ماتحبك وتكلم عنك بالشينة وتقول عنك كذا وكذا!! وانا لأني امون على ام سعد (وسعد ولدها صديقي المقرب) وهي تعرف اني خبل!! مريت من عندهم وقلت لأمي ترا تكذب عليك ام سعد!! وردت علي ام سعد وقالت والله انا ما اكذب والكذب مهو فيني واسأل امك!! قلت لها اجل الحين ابتصل على فلانة واخليها تجي؟؟ قالت والله ماتتصل تبي تفشلني معها!! وقلت لها دامك تستحين منها ليه تسولفين عنها وتكرهين فيها الناس؟؟ قالتلي انثبر مو شغلك ولا اتدخل بسوالف الحريم!! المهم بعد ما انثبرت جيت عند امي انا وقلت لها يمة الشاعر يقول ""من حكالك حكى فيك .. أصبحت تكرهنا وحنا بغضناك" صدقيني ام سعد هاذي اللي تنقلك كل هالعلوم وهالسوالف هي اول وحدة تسولف عنك!! ناظرتها امي بعين قوية وقالت لها مو بعيدة عنك!! المهم امي سالفة الذهب للحين براسها (وبصراحة الذهب نقطة ضعف النساء) ف هذاك اليوم قاعد بالصالة وحالتي النفسية خايسة (مطلق) وكنت محتاج اضحك بصراحة!! دخل علي ابوي وسلم وقعد وقالي وين امك ؟؟ قلتلة تنشدني عن مرتك ؟؟ ليه طالعتن من غير اذنك؟؟ وين اللي يقول انا الحريم اختصاصي والهيبة والرجولة!! قالي كل تبن تبي تعلمني الرجولة انت ووجهك!! جت امي وباين من شكلها انها جاية اتهاوش!! سلمت وقعدت وقالها ابوي وينك من اليوم؟؟ قالتلة يعني هامك اتعرف ويني وما ويني ؟؟ سكت ابوي (وانا ماسك الضحكة لاني ادري انه يتمنى اني ماكون قاعد ب هالجلسة لان رجولتة اللي راسمها لي راح تكون بخطر) وزادت علية تقولة الرياجيل يجيبون لحريمهم كل شي ويريحونهم وانت بعمرك مافرحتني بشي!! عشت معاك 35 سنة عمرك اخذتني للصايغ وشريتلي ذهب ؟؟ شف هاذي ام سعد رجلها جايبلها "مضاعد" !! ليه هو رجال وانت منت برجال والا هي اسنع مني ؟؟ مالي نفس انا مثل باقي الحريم اللي كلهن ذهب من فوق لتحت؟؟ ف ابوي الله يسلمة ماعندة سياسة ابداً !! رد عليها رد خلاها تطلع من طورها وبهدلتنا كلنا !! قالها يابنت الحلال الذهب غالي الحين وويني ووين اللي يشتريلك!! اهنيه قامت قيامة امي قالت لاااا والله يعني مسترخصني ماتجيبلي الغالي هذا جزاء العشرة والعمر توني عرفت قيمتي عندك لكن أسمع الساني مايطب السانك!! قالها ابوي تحلفين علي ؟؟ علي الحرام ان حلفتي مرة ثانية ماتلومين الا نفسك (امي اصلاً ماحلفت بس المسكين يبي يسوي روحة حمش قدامي) !! قالتلة انا ماحلفت بس ايش عليك الحرام تبي اطلقني يعني؟؟ تبي تصير مثل ولدك؟؟؟؟ بصوت هادي قلت يمة ترى انا ولدك بعد!! قالت انثبر انت (محد محترمني أبداً اكلت من التبن والإنثبارات لما قلت بس) وجيت ابغى أهديها وقلت لها يايمة انا اجيبلك ذهب ولو تبين المحل بالصايغ اجيبة لك ولايهمك بس هدي يم محمد انت راس المال!! قالت مالك شغل انت وانثبر وكل تبن و اطلع من الموضوع (ورحت للباب لأني بقول كلمة وبعدها ابي انحاش) قلت يبة ترى ام سعد جتنا وهي اللي قالت لأمي انها شرت "مضاعد" وهي اللي عبت راسها ، ونحشت هههههه طلعت برا البيت والقى سعد ولد ام سعد ، وقلت له ياولد امك سوت لنا مشكلة بالبيت ولعبت فينا!! قال ليه قلت له الموضوع كامل كان يقولي الذهب هذا حق اختي كانت راهنتة عند الصايغ لانها مغترضة منة فلوس ورحت انا دفعت الفلوس وجبت الذهب لأمي!! قلت يعني مو حق امك قال لاااا امي لعبت عليكم هههههههه ف يازوجات ياعزيزات مو كل شي تسمعونة من الحريم اتصدقونة!! ترا اللي تقولكم انا زوجي حطلي وجابلي تلقونها اكثر وحدة متمصخرة بحياتها الزوجية ، وصدقوني مو بالضرورة قدركم ومعزتكم وغلاتكم ينعكس بلغة المادة والفلوس!! الحب الحقيقي اللي يعكسة هو الوفاء والإخلاص والإحترام وحسن المعشر والتبعل وإذا كان معاة هدايا ومادة وفلوس ف ماهي شينة بعد هههههه احبكم ف الله. |
رد : بهدلتنا ام سعد..!!
ياهلا ومرحبا بالغالي
الله يبارك فيها ام سعد اللي ردتك للقسم (: صحيح اكثر مشاكل هالحريم ماتجي الا من اشكال ام سعد. الله يكملهم بالعقل. |
رد : بهدلتنا ام سعد..!!
الحمدالله ع سلامتك وعسا ربي يجعل بسفرتك فايده لكم
وتراي ان شاء الله نهاية الاسبوع عندكم بالكويت جهز العود الهندي 😁 نرجع للموضوع هالظاهره منتشره انتشاااار غير طبيعي بين البنات الغير متزوجات ابوي جاب لي ابوي حط لي وابوها يرحم حاله مايدري عن شي والا اخوي وهو تحصله يصبحها بطراق ويمسيها مسببه مشاكل لباقي البنات مع اهلهن ع اساس ينت فلان ابوها مدلعها وكذالك الزواجات هياااااط بزياااده جاب لي ورحنا وسويتا وتحصل كل شي ع حسابها هو ضيف شرف بس هالظاهره مب كثيره عند الحريم المتزوجات عندهن ظاهره التشكي والمسبه بزوجها وانه وانه وهي تكذب بدلع وعز مثل ماقلت لك عند البنات اختي بالعيد مسويه باقة ورد ومحطه كرت انها من ابوي وعرضتها بالبلاك بيري عند زميلاتها وابوي لو يدري انها مسويه 250 باقه ورد علشان تهايط عند البنات توطي بطنها يابن الحلال حنا مانبي هداية وربي نشتري الانفسا الله يعز ابو متعب الي مغنينا بالراتب نبي نفس زينه وشكرا وتقدير وبسسسسسس |
رد : بهدلتنا ام سعد..!!
اقتباس:
أوك .. يعكسه الاخلاص والوفاء لكن كيف تترجم هذا الوفاء والاخلاص بشكل عملي ؟ يعني هل اذا زوجي ما خانني وكساني أشبعني والتزم بواجباتي على طريقة الأعرابي اللي سأل الرسول عليه السلام عن الأعمال التي تدخله الجنة فلما عرفهن قال "والذي أكرمك بالحق ، لا أتطوع شيئا ولا أنقص مما فرض الله علي شيئا"..... هل يكون عكس حبه لي ؟؟ أضحك الله سنك أخي متفائل وبارك فيك .. موضوعك دمه خفيف كالعادة |
رد : بهدلتنا ام سعد..!!
صحيح اكثر وحده تهايط هي اكثر وحده متمصخره
آنشّــÃ̸̮̮Ñ̸̮̮S̸̮̮̃Ḫ̸̮̃Ã̸̮̮D̸̮̮̃ـْھدً |
رد : بهدلتنا ام سعد..!!
استمتعت بقراءه الموضوع وقعدت اتخيل في الموقف كمان ههههه ,, ربي يسعد ايامك
|
رد : بهدلتنا ام سعد..!!
مرحبا متفائل هناك حكمه قديمه تقول (( ما افسد النساء .. الا النساء )) وخبراء الاسره يحذورن من (( المقارنات )) التى تعقدها كثير من النساء بينها وبين غيرها من النسوان والمشكله ان المقارنه ظالمه وجائره تدري لماذا ؟؟؟ لانها تقارن اطيب ما عند الناس .. با اقبح ما عند زوجها ... فتنظر الى ما عند زوجها بعين (( ذبابيه )) وتنظر الى ما عند الناس بعين (( نحليه )) وتكون هذه المقارنه هي (( المقصله )) التى تقضي على الاستقرار الاسري ... من افضل الاشياء ان تحب زوجك (( كما هو )) لا (( كما تريده ان يكون )) من الصعب ان تطلب من زوجك ان يكون كما في (( رأسك )) لان الزوج له (( قدره .. وطبيعه )) ولا يمكن ان نطالبه بشي فوق قدراته وفوق طبيعه وربنا يقول في كتابه (( خذ العفو .. )) والعفو هو ما تيسر من اخلاق الناس وما قدروا عليه وما سمحت به انفسهم كما يقوله السعدي الان اين اخذ العفو من الزوج ؟؟ هي تطالبه ان يكون في النهار هارون الرشيد .. وفي الليل قيس بن الملوح .. وفي المناسبات خالد البرمكي .. وفي الاحزان قيس بن عاصم المنقري مشكلة المشاكل حين تطلب المرأه من زوجها ان يكون ملاكا غنيا حكيما حنونا لطيفا .. وان يكون لها اب واخ وصديق وزوج ... وتنسي ان له (( طاقه )) و (( حدود )) تفترضها عليه بشريته |
رد : بهدلتنا ام سعد..!!
اهلا متفائل بيك..!! اين انت يا فخامة الاخ المقرب للنفس؟؟
الحمدلله على السلامة اولاً ثانياً لب ما ذكرت هو المقارنات المهلكة التي ذكرها الرائع عمران ثالثاً.. تعليقي على ذلك هو العشم الذي يتزايد في انفس بعض نساء المقارنات لان طريقة التفكير العاطفي عند المقارنة تغفل كثير من السلبيات وتتعاظم فيها الايجابيات مع العشم الممزوج بأمل الحصول عليه حالاً ونسجاً من الخيال.. وعند العودة للحظة الواقع يبقى العشم وتتبخر الخيالات وهنا بالضبط تبدأ بذرة المشكلة.. يارب سترك بسسسسس... الدنيا جهاد وكان الله في العون* |
رد : بهدلتنا ام سعد..!!
واما بنعمة ربك فحدث ..
وش فيها اني اتكلم بالمعقول .. بس مااتكلم بالكذب طبعا .. وانا عني تعلمت ان الحق خاصه من الزوج .. ماينوخذ الا لما اتكلم .. اما اني اسوي نفسي حاتم الطائي .. اكبر خطأ .. الله يهدي ام سعد ويكفيني شر كل ام سعد بالوجود .. |
رد : بهدلتنا ام سعد..!!
حيا الله المتفائل ..
الله يعوضك خير من طلاقك ويرحم ضعفك ويجبر كسرك يا رب الي سوته ام سعد غلط .. لانها كذبت لكن الي سوته الوالدة مو غلط ابد .. كانت تتوقع منه يقول ابسط شي : ولا يهمك على ان الذهب غالي بس ما يغلى عليك .. من حقها .. ابسط حقوقها ..بالذات عقب هالعشرة الطويلة ترى كون الشخص ما يقدر على شي ما يبرر له انه يهمله على طول ! انت الان هل تعتبر اي زوجة تطبخ لزوجها وتربي عياله وتحرص على نظافة بيته .. تحبه ؟ اكيد لا مهو دليل قطعي على الحب .. |
رد : بهدلتنا ام سعد..!!
وإذا اللي يقارن رجل !!!!
يعني استبدل مكان أم سعد والوالدة ـ الله يحفظها ـ برجال ..!! ايش الحل ..!! |
رد : بهدلتنا ام سعد..!!
المهم الحين اقنع الوالد يجيب للوالدة ذهب
لا تصير أنت وأم سعد عليها هههههه بصراحة أنا مع الوالدة قلبا وقالبا والشايب خله يبحبح جيوبه شوي , قوله ضمان مني ان احتاجهم ما بتقصر الوالدة وتبيعهم عشانه |
رد : بهدلتنا ام سعد..!!
باختصار الكلام الي دار بينك وبين سعد يندار قدامها بس بذكا
بس قبل هذا كلم اختك تودي الذهب عندها(لان ماعندها صندوق تجوري) وبس |
رد : بهدلتنا ام سعد..!!
دائما المقارنات قاتله
على العموم أسأل الله أن يعوضك خيرا دمت طيبا |
رد : بهدلتنا ام سعد..!!
المقارنات هي الي تخرب
والله انا مرات احس بالنقص والتقصير من زوجي مثلا اقول اليوم مااتصل اكيد ماني في باله وبس ادخل المنتدى واقرأ المشاكل الزوجية والمآسي والله يكبر بعيني واترك المقارنات على جنب وبالعكس اصير احمد الله واشكره على هالزوج بس يااخي انا اول مرة اعرف انك طلقت زوجتك؟؟ وش السالفة؟؟ |
رد : بهدلتنا ام سعد..!!
الله يخلي لك والدك ووالدتك ويطول بعمرهم و يعطيهم الصحة
اشتري لامك الاساور و اعطيهم والدك عشان يهديهم لها |
رد : بهدلتنا ام سعد..!!
هذه هي الحقيقة المرة وهي مؤلمة للاسف...
ولكنها تعكس عدم الوعي ومجاراة المظاهر الكاذبة الخادعة. الله يحفظ لك الوالدة ويخليها. |
رد : بهدلتنا ام سعد..!!
المشكلة الحقيقية ليست في أم سعد
المشكلة تكمن في قلة اهتمام الرجل بالكائن اللطيف الذي يعيش معه وبذل ما بذل لسعادته هو وأطفاله بل حتى عمرها وحياتها استرخصتها من أجلهم وضحت بالنفيس والغالي وأخلصت وتفانت وقدمت لسنوات وسنوات ومازالت تريد أن تقدم كل ما في استطاعتها من أجل أن تراهم سعداء وجميل أن يهتم الرجل ويبذل شيء بسيط جداً ولا يكاد يذكر أمام بذخ عطائها ولكن الرجل - الزوج - في كثير من البيوت يغط في سبات عميق ولا يستفيق إلا على نغمة فلانه أحضر لها زوجها وعلانه اشترى لها زوجها وفي كثير من الأوقات يفضل ادخار ماله لشيء أهم من وجهة نظره على إرضاء تلك القابعة في زاوية بيته ومن هنا تنطلق الإختلافات - وتولع الدنيا - والله لا يلومها اللي تمسك في تلابيب زوجها وتعلقه في وسط البيت لذلك أخي المتفائل خليك محضر خير .. الوالدة تريد من زوجها الذهب لا منك أنت لأن هذا سيسعدها كثيراً ويكون له معنى مميز في نفسها كلما وقع ناظريها عليه أو ارتدته.. |
رد : بهدلتنا ام سعد..!!
يعطيك العافية
أنسني موضوعك |
رد : بهدلتنا ام سعد..!!
ههههههههههه اسعد الله سنك يا المتفائل بالله ...
اشهد بالله البنت اللي تفارقك خسرانة علي خفة دمك ... وفعلا الحريم كثير من كلامهم خرط بخرط .. |
رد : بهدلتنا ام سعد..!!
ذكرتوني بنظرية تعلمتها بملاحظاتي لنمط حياة الرجل الذي يسخر قدراته لتخييب الرجال على زوجاتهم (( هيا نسافر او لستم رجال؟ هيا نفعل لاتفعل لزوجتك لو أني مكانك لفعلت وفعلا )) وتجده مدعيا ويحاول تعويض ضعفه ونقص في حياته من خلال الكذب أنا لا افعل لها ولا اشتري ووو. احضر لها خادمة ومنزل ملك وسفرة للخارج كل عام وترفض الخروج للنزهة معه ولا تمنحه من وقتها او اهتمامها إلا اقل القليل ويشتري لها الذهب كل عيد مهما كان وضعه وأولاده يملكون أجمل الأجهزة ولكن لا يجد في بيته اقل الاحترام او التقدير لا تغسل ثيابه او تكوى ولايجد إذنا صاغية إلا عند أصحابه الذين سمم حياتهم بنصائحه أغبياء بعض الرجال يسهل قيادته
|
رد : بهدلتنا ام سعد..!!
مرحبا بك اخي المتفائل بالله
الله يخلي ام سعد لاحبائها لانها رجعتك لنا .. المتفائل بالله ..الي كله تفاؤل حتى في عز القهر الله يخلف عليك ويسعدك يا رب |
رد : بهدلتنا ام سعد..!!
الأمير 737
هلابك اكثر ، ويامرحباً ألف سعيد جداً بوجودك في متصفحي تبقى ام سعد نسخة كربونية من كثير من النساء اللاتي يسعين جاهدات بكذبهن ونفاقهن إلى هدم البيوت!! ريفان هلا بأختي الغالية والله يسلمج من كل شر ، وتراني طلقت ياخوج والعود واهل العود والكويت كلها تحت امرج (لازلت جاد بالدعوة) اما بالنسبة للهياط ف الله يعين!! انا كنت اعتقد بس عندنا يالرجال!! طلعتوا اخس منا ضحكتيني ع سالفة اختج ههههه العمة بيتا ياعمتو يعني شو المهم ؟؟ الهدايا وإلا الحب والإخلاص!! لو الزلمة ع قد حالو ومعرفش يجيب هدايا غالية شو بيساوي؟؟ خلاص ينكتب على حياتو الزوجية الجحيم!! وهو راس مالة حب وإخلاص ووفا؟؟ خلاص مابتعيش معو مرتوا من غير الهدايا؟؟ انا بقول الحب والإحترام اهم من لغة المادة والفلوس ولو اتوفرت الهدايا خير وبركة ناني مرحبا بأختي في الله شهدتي بالحق. ام محمد الله يسعدك دنيا وآخرة اسعدني وجودك. عمران استاذي العزيز كل كلمة كتبتها هي فعلاً تستحق ان تخط بماء الذهب .. درر ماشاءالله عليك واللي يبط جبدك ياعمران انها تكون طالعة من بيت بسيط واقل من عادي ، ولما ترفض لها طلب بسبب ضيق الحال تقعد تندب حظها وتحسر وتقول انا مو متعودة على كذا ولاتربيت على كذا عند اهلي!! اتحسسك انك مطلعها من قصر باكنغهام ومشغلها راعي غنم هههههههه مشكلتي زوجتي هلا وغلا ومية مسهلا وحب اسعدني وجودك واعتذر عن الانقطاع بسبب السفر والظروف اللي صارتلي صدقت المقارنات وباء خطير ينتشر الآن في البيوت بطريقة مخيفة تجعل من اكثر البيوت صلابة عرضة للهدم والخراب ، ولو كل النساء تقلدن الرضا بما عندهن دون الإلتفات بما عند غيرهن لأكتسين من القناعة لباساً رائعاً وجذاباً لايوجد له مثيل في البيوت كلها ، ولحضين بحياة سعيدة يفتقدها هؤلاء الذين يتسببون بفعل تلك المقارنات. توفي وفيصل هلا وسهلا مافيها شي لما اتكلمين بالمعقول بس مو صحيح اتكلمين عن نعمة ربك عند ناس ضعيفين حال!! لابد من تقدير مشاعر ضعفهم ، وعدم إجبارهم على إفتعال المقارنات مع ازواجهم!! تجنباً للمشاكل مدن السلام جزاج الله خير على مشاعرج والله اني معاج بلي سوتة الوالدة قلباً وقالباً ، وأبوي الله يهداه خانة التعبير وإلا هو والله يغليها حيل وأمي بعد الله يهداها ماجتها طلبتها الا لما حرشتها ام سعد ؟؟ يهب يا ام سعد حاستنا هههههه |
رد : بهدلتنا ام سعد..!!
السلام عليكم ,,,
أنا أعتقد بأن أغلب النساء الاتي يتحدثن بطريقة الأخت - أم سعد - ,, بأن زوجها , او أبوها , او-------- يجلب لها شيئا ثمينا يكذبن , انا أعرف كثيرات على تلك الشاكله , يريدون أن يفتخرون بأنفسهم , ويعتقدون بأن طريقتهم تلك أكسبتهم مدحا من الأخرين لهم , من الأفضل ان اشتري ماأحب لأجل نفسي , لالأجل الأخرين , حتى وان لم يعجبهم , فهو في النهايه لي أنا دمت طيبا أخ متفائل |
رد : بهدلتنا ام سعد..!!
وانا صادقه بستجابه الدعوه ☺
الاهم وش طلقت 😱😱 وليه ولماذا وربي ضاق صدري كانه الي فهمت وين الحب وين وين يااارب اكون فهمتك غلط |
رد : بهدلتنا ام سعد..!!
اقتباس:
|
رد : بهدلتنا ام سعد..!!
نحلة ذكية
والله سألتي سؤال صعب مشكلة اذا هالشي يجي من الرجال بس مالهم علاج إلا الطناش!! امرك لله فاكهة الشتاء والله حتى انا متضامن معاها بس المشكلة ابوي مامعة قلت لأمي انا اجيبلك زفتني وقالت انا ابغى منه هو مو منك!! قلت لها خفي علينا يادلوعة الحين صرتي ماتبين مني ؟؟ قالت الله يخلف علي جبتلي امهبول!! unlimited احسك مافهمتي الموضوع صح هههه سعيد بوجودك فجر الاعياد صدقتي جزاكِ الله خيراً على دعائك. احب خطيبي فعلاً المقارنات نار ان تمكنت من البيوت احرقتها .. الله يكفينا شرها وباقي المسلمين اما موضوع الطلاق اي والله طلقت والموضوع في قسم المنطلقات والمتأخرات. noora الله يرحم والديكِ ويخليلك اولادك قلت لوالدي هالشي قال والله ماتجيبة (يبي يحسسني انه وحش) وأمي حلفتني قالت اذا انا امك وتحبني وتغليني لاتغشني وتعطية عشان يعطيني امي تبي منة !! من بيزاتة .. ماني عارف وش الفرق هههههه ياحبنيلها cila الله يجزاكِ خير هي حقيقة مرة ومؤلمة وعسى ربي يصلح حال البيوت. العقد الفريد كلامك فريد واؤيدك فيه وبكون محضر خير بس ابوي مامعة شنسوي!! مستشار الحب حبييييب قلبي دوم الوناسة يارب نواف الله يجزاك خير ع مشاعرك الطيبة ويسعدك دنيا واخرة. |
رد : بهدلتنا ام سعد..!!
أرزقي الحكمة
مرحبا ومسهلا صدقتي في اللي قلتية وعسى الله يحسن احوال الرجال والنساء. هبة الرحمن ياهلا وسهلا ، وعسى ربي يجزاكِ خير على روحك الطيبة وكلامك اللطيف ان شاء الله بطيح بجبدكم اهنيه بالقسم ههههههه ممنون لك. فجر الأعياد مرحباً بالكريمة الطيبة صدقتي وياكثرهم اللي يسوون كذا والمشكلة ان بعض الحريم تنقاد وراء هالنوعيات من الكذابات ، وتغيير منها وتروح تسبب على المقرود (زوجها) مشكلة وتحن على راسة إلا يجيب لها ويمكن وضعة هذاك الوقت مايسمح وتصير مشكلة وقطيعة بينهم بسبب وحدة أصلاً كذابة. الله يزيدك حكمة يافجر. ريفان اي والله طلقت والموضوع بتلقينة في قسم المنطلقات مثل ماقالت اختي توفي وفيصل |
| الساعة الآن 04:04 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©