|
ساعدوني الله يخليكم طلاق ثان او اصبر~فاكهة الشتاء والبليغ
السلام عليكم ورحمه الله وبركاته اخواني طلبتكم تعطوني الراي وتنصحوني تعبت من زوجي وانا توني عروس ماصار لي الا شهرين من زواجي .. طلبتكم بالله اعتبروني كاختكم واعطوني من بعد الله الحل معاه!! انا سبق لي الزواج قبل سنوات وربي ماكتب وانفصلنا بعد سنوات تقدم لي زوجي وبالحاح لمهد 3 سنوات ارفض ويرجع للخطبه بعدها تزوجته قلت خيره قال ابيك وشاريك كلمته ايام الخطبه كان زينوالملكه وصراحه عصبي لاحظت بالملكه وقلت لاعادي كل الرجال كذا لانصدم بكثر زعله على اتفه الامور قبل الزواج بيومين مارضى يكلمني يقاله عقاب لدرجه ظنيته تنفير وصارحته قال لا مو صحيح بيتي ماخلاني اثثه بنفسي قال لي اي اي لانصدم به ممثل بالكامل من غير ذوقي سالته وصرفني وطنشت .. ايام شهر العسل سافرنا اوربا لانصدم به شخص عصبي يخترع مشاكل ويهاوشني ويصرخ بوجهي على اتفه شى تاخرنا عن رحله الطيران لانصدم به يلومني!! ويصرخ بالمطار ويرمي الشنط بسم الله ويتركني معها ماعرفت وشو اسوي لي رحمني عامل وجاء وشالها!! وسكتت ماكلمته شك فيه لدرجه كل شخص يشوفه يحس انه انا بكلمه!! مع اني والله بنت محترمه ومالي بهالامور راح شهر عسلي بصراخ ومشاكل لاتفاجى فيه يشرب بيره وقدامي وشعرت فيها كحول!! سالته انكر ،مشيت الامر بعد يومين شرب انا لاحظت اصحاب المحلات يستغربون لما يطلب ويقول لي لا مافيها كحول هنا مسكتها وقرات وطلع فيها 5 ٪ غضبت وكلمته قال عاادي وشو فيها وفجاه بدا يصارخ لاني صمتت ووجهي قلب الوان!! قلت له ليش كذا !! ترضى لو زوج اختك!! وبدا صراخه بوجهي كرهت نفسي واشتقت لاهلي وكتمت قلت ماعليه يكفي طلاق يكفي كلام ناس خلك قويه مشت الامور كم يوم مابين صراخ على توافه تمنيت يدلعني نااادر مع انه يقول احبك! وشكله يحبني صدق مشاكل صراخ نفسيتي تعبت مايخليني انام يجلس يتكلم ويفتح النور وانا بالم وضيقه وخوف واستغراب .. ويرجع يعتذر من بكرا وانه عصبي ومايقصد يعور قلبي وقتها واضح صادق بس وشو ذنبي بعصبيته ودي يعالجها! مشاكل كل السفر لدرجه ماقدرت احبه نفرت نفور شديد مره رجال شافني انتظر زوجي عند الحمام جاء يقول السلام عليكم !! انا مارديت ابدا الا زوجي فجاه واقف بنفس اللحظه ويصرخ وسط الناس وشو قلتي له!! قلت ولاشى قال وشو يقول لك قلت يسلم ولارديت!! والله وشو ذنبي!! يعرف صادقه لكن يحب يتهمني ويهاوش بدا يسب ويشتم ويلعني قلت له ماسمح لك بس يكفي بروح اهلي تعبت من ظلمك ومشيت ولا اكلمه غضبت اهانني مفروض يصرخ بالغريب مو فيني مظلومه ياربي مشى الامر طبعا ماخلاني انام زين يتافف ويدخن وفجاه يلعن كل شى وانا بالسرير ارجف من الضيق والخوف جاء وقت الرجعه وصارت مشكله العفش زايد وزنه!!بدا صراخ وانتي وانتي والله مادفع لهم!! امشي نرجع مادفع لهم جلست اصيح ابي اشوف اهلي ابي ارجع ديرتي تحملت بمافيه الكفايه اذا شافني اصيح يرق قلبه المهم انحل الامر وفجاه عند باب الطياره بدا مشكله ثانيه ويهاوشني وانتي تستعرضين قدام الناس! مع العلم اني محجبه وماستعرض اطلاقا ويهاوش واقوله لو سمحت نتفاهم بعدين الكل يسمع ولاهمه لعن وشتم لين دموعي نزلت ربي يشهد ماغلطت عليه بكلمه ولا اقلل من احترامه ركبنا الطياره وننتظر وشفت طفله لوحت لها جاء يركض يشوف بغضب!! لمين الوح !! طنشته جلسنا وبدا المشوار صراخ انتي من زينك ليش ضيق بنطلونك رحت ولبست عبايتي عشانه بصمت وبعد يصرخ قلت له الله يخليك تعبانه يكفي! ولا خلني اروح لاهلي واتصل على اخوي يرجعني لاهلي! تعبت معاك ارتعب وبدا يغضب الي مايبيني مابيه انتي ماتحبيني اصلا كثير يرددها!! وين اوده وهو كذا يعاملني!! والله يوميا صداع المهم هدا ورحنا الفندق واعتذر وعشنا يومين حلوين وبعد رجعت لاهلي وتغير فرحت كثير بعد اسبوعين رجع للغضب لاتفه سبب يخوفني شكله ووجهه مع العلم اكبر مني ب 15 سنه ومو صغير 45 مشاكل ويضاربني وعشت معاه ماجلس معي ولايوم يطلع لاصدقائه من 7 لين 11 وقبلها يروح النادي من 4 ونص لين 6 ماشوفه ولاجلس معاه لين اليوم الا نادر عشت حياتي وبدات اطبخ وانظف وكل شى هنا فرح بس تعبت من طلعاته وبعد كله ماسك الجوال بيده وتويتر مايوقف ولا الواتس اب ولو انا امسك جوالي تضايق يبيني انتبه له المهم لما يغضب عادي يضرب بالارض وعيونه تحمر يرعبني وانا اصمت اخر امر وهو الي ابي تساعدوني فيه هو امس رجعت للبيت لالقى لابتوبه مفتوح على برنامج البالتوك!! وفيه بنات مافيه محادثات بينهم لكن وحده لقيت حاط لها بوسه ولاردت وفتحت الملفات القديمه لقيت بينهم كلام من سنتين فيها حبيبي وخرابيط ولقيت صورها وفيه بنت كاتبه له بعد بالاسم المهم سكتت!! صار اليوم تكلمت معاه بهدوء وسالته اذا يدخل هالبرنامج والسبب قال عادي فيها رومات زينه قلت له شفت وفيه بنات انكر يعرفهم قلت له فيه بوسه لها!! غضب وبدا ينكر وانا صمتت وشو تبين مني!! انتي ماتناسبني صابر عليك عشان اهلك واهلي مابيك!! قلت له امسح كل البنات من هناك ومن المسن!! انا اثق فيك ولو فيه امور قبل زواجنا فهذا ماضي لكن الحين احنا متزوجين قال انا ماكلم بنات تفهمين وسب ولعن وانه انا وهو مانناسب بعض وافضل ننفصل وخرابيط طنشني اكلمه مايرد اقوله ياليت تمسحهم راح ينام فجاه قام قال تروحين للشغل مافي بس بالبيت تطبخين لي فاهمه قلت لامو بكيفك انا حره ولا كاني انطق لين جاء يطلع قلت له ماتطلع ابي نحل الامر قال وخري لما ارجع اخذت المفتاح قلت لا لو سمحت اخذه مني وطلع بعد ساعتين كتب لي انه مو خاين ولو يخون ماكان تزوجني! وانه مايسوي شى حرام ولو يبي يتزوج ثانيه عادي يقول بكيفي قلت تتزوج ثانيه! قال اي حرام قلت لا الي تحبه وقلت له ماتهمه لكن اطلب يمسح كل البنات ولارد عصبي حار صعب التعامل معاه يغلط ولايبيني انطق! ماعرف وشو اسوي هل انفصل مع العلم كنت حامل وسقطت قبل اسبوع ووقت حملي سافر لاهله ولارضي ياخذني ولما الحيت قال يارب ينزل الي ببطنك تعبت نفسيا كل الفتره كنت اتصل اقوله معي نزف صرخ ليش تزعجيني!! ولعن وقال بطلقك وقلت انت حر انا ماغلطت بحقك كنت بحاجتك وماكلمني يومين وبعدها كتب احبك واتصل! لين رجع يتودد ولارجعت اقوله قلت كذا وسقطت وقلت من الله بس تعبت معاه!! ساعدوني الله يوفقكم دنيا واخره وشو الحل معاه! او هل انفصل واعيش طلاق ثاني وارتاح انا نفسيا مع اني ماكرهه كل مابدا حبه يسوي امور تنفرني بس ماكرهه والله وحبيته لكن مو حب قوي خاطري اكون عائله سعيده واجيب اطفال بس متعب الوضع معه وكثير كلمته ولافيه فايده والحين فوق عصبيته خايفه انه يكلم !! طباعه ومشيتها لكن خيانته!! متعبني الامر افيدوني واسفه على الاطاله |
رد : ساعدوني الله يخليكم طلاق ثان او اصبر~ابو حكيم والبليغ
أجيبي على هذه الأسئلة:
1) هل سبق لهذا الرجل الزواج قبلك؟ 2) هل أنتِ الزوجة الأولى أو الثانية؟ 3) إن كنتِ الزوجة الثانية.. هل يعيش خصاماتٍ ومشكلاتٍ مع زوجته الأولى؟ 4) هل هو رجل صاحب صلاة؟ 5) هل هو غضوب مع أهله ووالديه؟ 6) هل أنت تستثيرين غضبه أو شكه؟ 7) هل أنتِ عنيدة؟ هل تتلفظين عليه ببعض الألفاظ غير الجيدة؟ 8) هل لباسك ملفت كما قال لكِ؟ 9) هل يسب ويشتم ويلعن بدون سبب؟ 10) هل ظروفه المادية جيدة؟ 11) هل هو على وفاق أم خصام مع أهله وإخوانه وأخواته؟ |
رد : ساعدوني الله يخليكم طلاق ثان او اصبر~ابو حكيم والبليغ
أ
جيبي على هذه الأسئلة: 1) هل سبق لهذا الرجل الزواج قبلك؟ نعم قبل 8 سنوات وطلق بعد شهر 2) هل أنتِ الزوجة الأولى أو الثانية؟ ماعرف كيف يعتبر انا الثانيه لكن الاولى طلقها وتزوجت من سنوات 3) إن كنتِ الزوجة الثانية.. هل يعيش خصاماتٍ ومشكلاتٍ مع زوجته الأولى؟ لا انا زوجته الوحيده حاليا واخذني عن رغبه على كلامه سمع عني وعن اخلاقي وحاول سنوات يقنع اهلي بالموافقه وانه اوافق ووعدني بالسعاده والصراحه ماشفتها! 4) هل هو رجل صاحب صلاة؟ نعم يصلي لكن مو بالمسجد دايما 5) هل هو غضوب مع أهله ووالديه؟ هم قالو انه عصبي لامي لكن ماشفته كيف معهم الا مره وكان عادي ولاعاد ياخذني لهم!! لكن يحب اخواته ويعاملهم زين ولكن عصبي بعض الشى 6) هل أنت تستثيرين غضبه أو شكه؟ ابدا ولا اتقصد حتى اصمت لو صار بهذه الحال او اقول له ماسمح له تتلفظ علي رجاء 7) هل أنتِ عنيدة؟ هل تتلفظين عليه ببعض الألفاظ غير الجيدة؟ عنيده برايي مثلا ابي اروح للدوام وعلى فكره الصبح ماسمح لي اروح وقال تجلسين وتطبخين لي ولا تكلمت والحين اطبخ! ابدا ولا مره تلفظت بكلمه مو زينه له بالعكس محترمته وعني اشوف لو اتلفظ فانا انزل من قيمه نفسي 8) هل لباسك ملفت كما قال لكِ؟ لباسي عادي مثل المحجبات طويل لكني اهتم بالنوع واللون واحب الترتيب وبالبلاد طبعا عبايه 9) هل يسب ويشتم ويلعن بدون سبب؟ اذا طلبت يجلس معي مثلا هنا يسب اذا تكلمت بامر يضايقني مثل لما سقطت او شافني ابكي ممكن كرده فعل يسب اذا قلت له ماتهتم فيني يغضب ويقول ماني مهتم فيك يكفي دلع! 10) هل ظروفه المادية جيدة؟ اي الحمد لله 11) هل هو على وفاق أم خصام مع أهله وإخوانه وأخواته؟ هالامر ماعرفه بديت اشك لما جاء العيد ولا اخذني معاه تركني عند اهلي 11 يوم وراح لهم هنا شكيت فيه امور والاحظ مافي اتصالات بينه وبين اخوانه الاولاد مكالمات بالشهر مره ممكن |
رد : ساعدوني الله يخليكم طلاق ثان او اصبر~ابو حكيم والبليغ
اسمعي يا أختي الكريمة:
-بشكل عام الأمر لا يستحق أن يصل إلى طلاق وانفصال أبداً.. -أنتِ تحتاجين فقط لمعرفة مفاتيح شخصية هذا الرجل، والعمل عليها.. ولمواجهة غضبه يمكنك التنويع ما بين السكوت والتجاهل مرة، وأخرى نصحه بعد أن يهدأ، وأخرى الرد عليه لكن بأسلوب لا يوجد فيه ندية وتحدي للرجل، وهكذا. 1) أشبعي هذا الرجل عاطفة وحناناً ومشاعراً واحتراماً وأدباً؛ كي تستطيعي تليينه في يدك بإذن الله. 2) في حالة أنه قام بالشتم أو السب أو اللعن -لا قدر الله- قومي ببعض الخطوات: أ- لا تجيبي عليه بشيء.. واتركي المكان الذي هو فيه بعد أن يفرغ من صبّ شحنات غضبه.. أو يمكنك البكاء أمامه بصمت وأنوثة ثم اتركي المكان. ب- المرة الأخرى إن قام بالسب والشتم قولي له هذه العبارة "يا رجل.. اتقي الله.. لم يكن رسول الله صلى الله عليه وسلم فاحشاً ، ولا لعّاناً ، ولا سبّاباً". ت- لو كرر الأمر فيمكنك إرسال رسالة نصية له فيها لين ورقّة وعتب.. مع توجيه بعض الأسئلة عن أسباب غضبه وسبه ولعنه.. ثم غيضاح أنك لا تقبلين هذا على نفسك. 3) ألحّي في الدعاء بأن يهديه الله، ويرقق قلبه، ويطيب لسانه وألفاظه. 4) طبقي ما كُتبَ أعلاه ثم أخبريني بالنتائج. |
رد : ساعدوني الله يخليكم طلاق ثان او اصبر~ابو حكيم والبليغ
اشكرك اخوي حاليا بعد منعه لي للدوام وقال تطبخين لي! طبخت ولان وقال احبك وهل زعلانه مني! وانه ماتوقع اني اسمع كلامه ولا انطق بكلمه لانه والله ولارديت عليه بكلمه نفذت وحطيت امري لربي قلت له انا مستعده انفذ كل ماتحب من عيوني لكن لاتمنعني من امور احبها الدوام احبه لاتمنعني! قال وشو تبين فيه !!تعب شوفي الحين نمتي وشبعتي وفاضيه وطبختي لي مع العلم اطبخ له لما ارجع من دوامي كنت! وهالفتره اخذت اجازه بسبب الاجهاض! ولا كنت اطبخ لانه ممنوعه من الحركه بسبب النزيف الحاد قال ولا اخونك ولا اسوي شى قبل مع انه شفت محادثات قديمه مع بنات يقول لهم حبيبتي وقلبي!! وقبل يومين حاط بوسه لوحده والبنت مرعبه كانها من بنات .... !! سكتت قلت له لو تبيني ارتاح ابي قدامي تمسحهم رجاء!! قال ابشري قال بس اقدر اني ارجعهم من وراك قلت له اثق فيك انت فقط امسح لارتاح نفسيا هذا الي صار .. ،مفاتيحه شكلها انه اكبر راسي دايما زي ماحصل اليوم حسيت كبرت بعينه والامور الي قلتها بطبقها ان شاء الله لكن هل اثق انه مايكلم بنات؟! الامر مره متعبني نفسيا واشكرك من اعماق قلبي |
رد : ساعدوني الله يخليكم طلاق ثان او اصبر~ابو حكيم والبليغ
ملاحظة مهمة:
-اجلسي معه.. قولي له: أخبرني عن أحب الأكلات والأطباق إليه.. ثم اطبخيها وقدميها له. -تذكري أن أقصر طريق إلى قلب الرجل هي معدته كما يقول المثل.. وفي حالة زوجك ينطبق عليه هذا المثل بنسبة 100%.. -سأنتظر أخبارك السارة قريباً. |
رد : ساعدوني الله يخليكم طلاق ثان او اصبر~ابو حكيم والبليغ
ياخوي اطبخ له الي يحبه من تزوجنا!!
الحين يماطل اقوله احذفهم قدامي يقول ان شاء الله بحذفهم واقول لك! قلت له مو مرتاحه احذفهم متضايقه !! غضب قال مو راضي يفتح شوفي!! بالليل نحذف!! اشوفها مماطله وشو اسوي؟! |
رد : ساعدوني الله يخليكم طلاق ثان او اصبر~ابو حكيم والبليغ
السلام عليكم ورحمه الله وبركاته اخوي طبقت نصائحك واليك النتائج الحمد لله ماسمعت سب وشتم ابدا وصارحته مع انها مو اول مره اصارحه !! اشوف فيه تقبل اول مستحيل يسمعني يصرخ فقط ويروح عني خصص لي يوم يطلعني فيه ونتغدى فيه برا وبعد اي امر ابيه قال اسويه لك سوق وماشابه وفعلا سواها وسجدت لله شكر اتبعت اسلوب المدح معاه لاحظت فرق اهتمام واضح عنده فيني المشكله الي مازالت فيه هي طلعاته اليوميه يعني ماشوفه الا نصف ساعه تقريبا غير وقت الغداء وماعتبره شى بعد البنت الي مدري وشو سالفتها من جنسيه شاميه صار يجيني اتصال من شخص صامت اقول الو محد ينطق!! وجاني بعدها مسجات تغزل وكانها من رجل!! لكن اللهجه مو سعوديه ابد تميل للشاميه ويااموره وياحلوه ومسحتهم وحسيت انها بنت وطلبت من اخوي يطلع اسم صاحب الرقم بدون اقوله السالفه قلت له مزعجني فقط قالي بنت!! قلت له طنشها اجل وزوجي قلت لك من النوع الغيور جدا جدا يعني لو يشوف مسج كذا بجوالي بينجن واتوقع انها هي والله اعلم تبي توقع بيني وبينه انا اشك شك قوي انها هي وتبي تسوي بيني وبين زوجي مشاكل لتناله لانه مسحها من بال توك! اخوي وشو اسوي معها خراب بيت هذي حسبي الله ونعم الوكيل !! والامر الاخير زوجي وقت النوم كاننا غريبين عن بعض له لحاف ويبعد عني من تزوجته اتمني انام بحضنه مايخليني مايبي يقول ماحب مو متعود والله مرات انام وانا اصيح خاصه بعد فشل حملي حسيت اني بحاجه وقفته معي .. ساعدوني الله يحفظكم |
رد : ساعدوني الله يخليكم طلاق ثان او اصبر~فاكهة الشتاء والبليغ
بانتظار ردودكم اخوي البليغ وفاكهه الشتاء حاليا تغير معي صار مايضارب شكله رحمني خاصه اني بكيت قدامه وقلت له تعبت وافكر بانفصال ومو عارفه وشو اسوي بس اني مو مرتاحه سكت هو من بكرا جلس بالبيت لين 9 وسوا اشياء ماعمره سواها وبالليل رجع بدري وكنت محضره نفسي قالي احبك والله يخليك لي الحين رجع يطلع كل يوم تعبت وماحب ازن سافرنالاهله قبل اسبوع قالي انه احتاج فلوس وانه راتبه خلص وانه مره متضايق استدان مبلغ عني مستغربه وين راح راتبه؟! مع العلم راتبه محترم لانه معلم حكومي اكثر من راتبي البسيط الي مايتعدى 6 الاف الي اعرفه دفع مبلغ الشقه ! وقالي فيه دين عليه بعد شهر العسل سالته لو سدد هالشهر من راتبه شى للفيزا قال لا احس بنجن وين راح راتبه؟! اكتشفت استدان من اخته فتحت جواله وشفت المسج وقالي قبلها انه احتاج يبدل كفرات السياره بس ماقال اخذ من اخته اخته ماشاء الله عليها بنت اصول ماسالت ليش تحتاج قالت انت اخوي ومابيننا شى وهو مره يعتذر بالمسج وقالها برجعهم اول ماينزل الراتب ماقلت له اعرف عن اختك وفضلت ماقول مالي خص الامر الاخر جاني استدان مني مبلغ الفين قالي احتاج ولاسالته لوشو قالي مامعي شى! اعطيته بطاقتي واخذ الفين وقالي برجعهم وكل وقت يقول برجعهم وانا ابتسم اقوله مابيننا شى عني ماهمني ابدا اخذ اذا يحتاج وفلوسنا واحد الي مضايقني تو يقول لي مامعي فلوس مانقدر نطلع مطعم! وين راحت الالفين مع انه اخذهم الاحد على ايش يصرفهم!! مع انه ماشترى ولاشى اللهم رحنا سوبر ماركت ودفع منهم 500 اظن فتشت جواله لقيت انه مسحوب من رصيده 520 على 3 ايام يعني الف ونص تقريبا راحو بس مافهمت لوين؟! خايفه يصرفهم على بنات الحرام او شراب وانا ياغافل لك الله ساكته ولابيت اني اشك بشى لانه ماعرف وشو يسوي فكرت يمكن سدد دين!! او دفع منهم للفيزا! ماحبيت اساله خفت من غضبه صراحه وشو اسوي الله يخليكم مشورتكم !! والله احس بضيق والم وكل ماذكر مسج البنت الي تكلمه اتعذب تعبت من التمثيل ماعرف للحين يكلم بنات او لا المسج الي البنت تقوله وينك وتدلعه اتصل ماترد وتهاوشه رد علي الحين!! كان بعد زواجنا بشهر وعشر ايام والحين ادور بجواله مافي شى افكر لو يمسح !! او له جوال ثاني خاصه يطلع يوميا وشو يضمن لي مايطلع مع احد صحيح امر اخر شفت مسج بجواله يقول لزميل له بالدوام امسك عني فتره هو معلم الله يخليك ويترجاه بنفس اليوم هذا لما اخذني من دوامي!! كان الكرسي الي اجلس فيه متحرك للامام سالته لو ركب احد من اصدقائه ركب معاه قالي لي لا!! الكرسي متحرك للامام والمكان ضيق مستحيل رجال يكفيه هالمكان انا البنت مايكفيني اجلس براحه! مع العلم انا دايما اعدله على وضيعه تريحني مرات القاه راجع كثير للخلف يكون قال لي انه ركب معاه احد اصحابه هنا اصدق لانه الكرسي مرره راجع للخلف والمكان يكفي لرجل اما للامام وصغير عورني قلبي خفت انه ركب معاه بنت ولما شفت انه طلع من الدوام بنفس اليوم تضايقت ماعرف وشو اسوي سكت ابي القى دليل اما يلغي كل شك براسي او يخليني اتاكد له علاقات لاقرر قرار نهائي .. ماعندي اطفال منه اذا كذا بعيش معه بالم وشك ليش اعيش !! افيدوني ربي يرزقكم كل خير بياض |
رد : ساعدوني الله يخليكم طلاق ثان او اصبر~فاكهة الشتاء والبليغ
أختي الكريمة/ بياض
-أقدر لك ثقتك بي وانتظارك لرأيي. -أعتذر منك للتأخر في الرد؛ بسبب بعض الأمور، إضافة لأنني لا أستطيع الرد في كل وقت بشكل مطول على كل أحد. -هناك تقدمات إيجابية ممتازة مع هذا الرجل. -استخدمي معه أسلوب البكاء لترقيق قلبه من فترة لأخرى إن كان هو المخطيء. -بما أنه استدان من أخته فهذا يدل حقيقة على أنه يحتاج هذا المبلغ لوجود ظرف مادي لديه. -احذري أشد الحذر أن تتدخلي بينه وبين أخته أبداً.. فأنت الخاسرة. -أرى أن تردعي وتوقفي هذه الوساوس والأفكار وتتجنبي الاستمرارية معها؛ لأنها ستقتل لديك روح الاستمتاع في اللحظة الحاضرة. -واعلمي أنّ تفكيرك ووسوستك بشيء لا يوجد عليه برهان واقعي لا يقبل الشك أو النقض سوف يقتلك من الداخل. -وأُهيب بك أن توجهي هذه الأفكار لكيفية الاستمتاع بالحياة مع هذا الزوج، وكيفية إصلاح حياتك وإنجاحها بكل تحدي وعزم وإصرار. -وأيضاً التمسي الدعاء بأوقات الإجابة فهذا شيء له مفعول أكيد. -اقرئي هذه الآيات: 1) آية 248 من سورة البقرة. 2) آية 26 ، وآية 40 من سورة التوبة. 3) آية 4، وآية 18، وآية 26 من سورة الفتح. |
رد : ساعدوني الله يخليكم طلاق ثان او اصبر~فاكهة الشتاء والبليغ
اشكر لك نصايحك ربي يجعل لك بكل خطوه تخطيها خير واجر
اخوي بعد ماكتبت كلامي الاخير قررنا نطلع انا وهو بما انه الجمعه للطلعه قرر يوديني لمحل شعبي لناكل استاذنته بكل هدوء !مو بخاطري اكل شعبي كل يوم اطبخ رز اخوي مليت الاكل الشعبي! استاذنته لو نروح مكان ثاني واعطيته خيارات هو صعب بالاكل بس كثير اتنازل له ويختار الي يبيه بالاخير اكل اي شي ومن غير رغبه قلت له وشو رايك حل يرضينا اطلب لي تيك اواي وندخل مطعمك انا اكله معك هناك وانت تطلب وشو تحب!! قال لي اوكي رحنا طلب لي من سياره اول ماوصل الاكل قال كولي !! قلت وين هنا؟ قال اي قلت ومطعمك !! قال مو لازم اكل انا مو عبد عندك !!!!!! قلت له ليش قال اكل اي شي لما نرجع البيت مو غصب اكل زيك!! قلت له متى قلت كل مثلي ابدا ماقلت صدق اندهشت يخترع مشكله جلس يصرخ!! قلت له بس بس يكفي من حقي اطلع من غير نكد ابي انبسط انت وعدتني هاليوم لي كل الاسبوع تطلع ماقلت شي هذا يومي من حقي اسوي وشو احب معاك بتفاهم !! قال تشكين فيني انتي الا تشكين قلت له من طلعاتك اليوميه مو مني جلس يلعن ويسب مابيك روحي لاهلك !! تخيل فقط من سالفه مطعم مع اني ماعاندته ابدا هالمره قلت له ودني بيت اهلي ماتبيني مابيك مابي اعيش كذا تعبت ايش سويت لك لتعاملني هالطريقه حتى اكل مو من حقي اختار وشو احب الرحمه يارب من اكل يسوي مشكله؟! انا بشر مالي خاطر قال بوديك قلت اوكي والله فوقك ماخفته فيني ماقصرت معك ابدا بس انت مدري وشو فيك علي والله ماتلقى احسن مني واذا فيه ومقتنع الله يقويك تعبت اخوي النزف كل ماتضايق يستمر مرهقه تعبت قالي مافي طلعه خلاص قلت له مابي لو اعرف بتطلعني لتنكد علي ماكان طلعت كان جلست بالبيت وسليت نفسي بنفسي مو بحاجه تطلعني مع انه واجب توسع صدري وتعاملني زين بس انا مابي منك شي وجلست اصيح ومن اليوم مابي اطلع معك اقولها بكل جديه تعبت يطلعني اتوتر اخاف بس من اي مشكله يخترعها ويلومني على خرابيط مع انه ابتسم اظل مبتسمه واحاول بس لمتى كذا الراحه مطلوبه وانا مشدوده اعصابي اخاف يهاوشني مثلا اي امر واحنا ناكل يقول اي ماتعرفين انتي مع احترامي لك!! ماتفهمين! اطالعه امور تافهه مصحيني الفجر قبل كم يوم بليله دوام يهاوشني ليش تركت كوبي الشاهي بالمجلي !! يقول عليه صراصير! طنشته قلت بنام وزعلت منه ماكلمته قالي وشو فيك قلت له تبالغ مافي صراصير وكوب شاي مو وسخ وبداخل المجلى سكت حرام نايمه كيف كذا يسوي فيني ومريضه! صرت بعدها انتبه ماترك شى الا اغسله لافتك من شره ! ارهقت نفسي جسميا ولا يحس فيني نزيف رجع مع انه مطلوب مني راحه ولاريحت كله عشانه بس لين متى مرض قبل اسبوع جلست فوق راسه اهمزه واداويه اشوفه فرح!! حس باهتمام قلبي يحترق يحب نفسه كثير المهم هو فقط وسعادته وانا بالطقاق! المهم قال بوديك لاهلك وطلعه مافي!! قلت تناقض! بتوديني اهلي ومافي طلعه وشلون ودني تعبت اصلا كل شي احاول ارضيك فيه من اكل بسم الله نكدت علي المهم صرخ ودار بالاخير نزلني بيتنا ماوداني اهلي وقال بروح قلت مابنزل وين رايح قال بصلي ،اعرف يكذب كالعاده راح من 3 ونص للحين مارجع تعبت معاه الله يخليك ترا مو الحل اني اسكت حتى عن وشو احب اكل هذا تخلف امور عاديه يبي يتحكم فيها لدرجه خيار الاكل بزياده اناني وكل مره يوديني هالمحل جاملته كثير ماحب اكلهم مو غصب اسكت كل مره صحيح قالي تجلسين بالبيت مافي طلعات وبيت اهلك لو طلعتي ماترجعين قلت زين بروج لهم اصلا لو عرفو عنك هم مايخلوني ارجع لك و قلت نزلني السجن احسن!! يحب يحبسني يسمتع مليت لحالي والله مليت استحيت من اهلي كل شوي اطلب سواق اهلي لياخذني او يوصلني مكان او اروح لهم امي تقول وين زوجك ليه مايوصلك!! عني حاولت معاه لين مليت فقلت اسكت واريح راسي يوصلني لو يناسبه فقط وناادر حاسه اني عب عليهم وعليه ليش تزوجت استغفر الله ماله داعي وجودي ياربي قلت له يارب اموت وارتاح قال امين ماهتزت فيني شعره احس كرهته انسان قاسي عصبي زي الاطفال تغير بامور بس لانه يبيني من املاكه هو مايبي الطلاق وعرفت كلامه مجرد كلام واضح اصلا بس انا تعبت اشوفه من قل احترام لي كل شى يقول اهلك اوديك خير من الشارع جابني ايش فايده يحبني اذا مايبي يسعدني يحسسني اني من املاكه زيي زي اي قطعه بالبيت يبيني لاني ملكه وانا مو مهم وشو اشعر !! محترمته يكفي بس من تزوجته عايشه بنكد مشاكل يخترع وانا احاول احلها تعبت اتمنى ارتاح ودي اعيش ببيت لحالي فتره بمكان بعيد ابي افرح موقادره ،كاتم على قلبي كله اتوتر اخاف يسوي لي مشكله جديده |
رد : ساعدوني الله يخليكم طلاق ثان او اصبر~فاكهة الشتاء والبليغ
ابي زوج يجلس معي نسولف نضحك
نتقهوى مع بعض نتشارك سوالف نشوف برنامج ننبسط احسه بالبيت اسوي له حلا والي يحب والبس ويشوف لبسي ! اضحك معاه ويضحك معي تخيلووو بالسرير يقول مو لازم ننام مع بعض مرات جمب بعض!! عادي انا بغرفه وانتي بغرفه!!! قلت له خير اجل ليش متزوجه انام ببيت اهلي احسن ماشوفك اساسا واذا تبيني اتصل واجيمك نص ساعه وارجع لاهلي والقهر الضم محدد لي مره باليوم!! خير ههههههههههههه سكت اول الوقت انكسر خاطري بعدها قلت له انا احب كذا راضيني يومين ورجع لطبعه لاتلمسيني ماحب لمس!! مالي حريه معاه ابد بسم الله اخاف المسه صرت ابعد عنه اخاف يهاوشني بس لو هو قرب قربت مره قربت ماعجبه!! هالايام صرت اقرب غصب شوي انخرس مو مهم اجلس معاه عنده!! يجي يدخل مجلسه ويفتح مبارياته ويدخن انا وين جالسه وين ميته مو مهم المهم ينبسط والمهم اطبخ له واغسل ملابسه زي الخدم لا ولو عصب قال انا عبد عند اهلك!! اكررره هالكلمه مررره قبيحه ومو من الادب هالمره قلت له انا العبده مو انت انت ماتسوي لي شي هديه مافي مستحيل يجيب لي هديه اهم شي اغراض البيت!! هنا يشوف انه مررره ماقصر معي اغراض البيت مو لي فقط لي وله!! وبالاخير اطبخ له وشو يحب هو بعد ارجع 1 من دوامي مرهقه الاخ يطلع بدري مرات 9 من الدوام انسان لامبالي وينام يشبع نوم ويجي ياخذني مرتااااح على الاخير مافي شي يسويه بالبيت بس ينام ياكل يطلع اللهم يجيب اغراض للبيت لو طلبت !! واكل لما يرجع 11 وانا ميته جوع انتظره مرات مابي اكل بيت صرت اخلي سواق اهلي يجيب وهو طبعا مايتعشى بالبيت!! مع ربعه ولو اني ماصدقه صرت وشو هالربع الي يوميا مايجلسون ببيتهم!!! وماياكلون ببيتهم ليش متزوجين اجل!! هذا ماعنده وقت لي ابدا كله برا يوميا وشو هالعيشه! قلت له اني احب كذا واني انسانه احب البيت والدفء بايام الخطبه قالي حلوو وانا كذا كذاااب |
رد : ساعدوني الله يخليكم طلاق ثان او اصبر~فاكهة الشتاء والبليغ
الله يخليكم لي فتره انتظر رايكم
طلع يكلم مجموعه بنات مو بنت وانا توني عروس تعبت منه رحت مكه مع اهلي يومين رجعت له طبعا يالله يسال بعد زعله الاخير !! لانصدم بجواله يجيه واتس اب من بنت كان يتحمم فتحته طلعت تتفق معه متى تقابله بالامارات وليش ماتشوفني ويقولها ليتني جمبك!! لانها بالامارات تقوله تعال ابي اشوفك!! قالها لو قلتي لي قبل اسبوع كان جيت ودبرت اموري ووضعي الي هو انا الغبيه الي مدري وين ربي حاطني!! سكت كلمت امي قالت كلميه اساليه مين سالته يطالعني بنظره قله ادب وخير وشو دخلك!! اقوله مين هذه وتقولها ليتني جمبك حبيبتي تصير لك من محارمك تقابلها والله مالي علاقات محرمه يقول!! وشو هذه مسيار تعبت انا لو علاقه وحده قدرت الملم الموضوع هذا علاقات ويطنشني يوميا لين نص الليل ومايطلع ولايجلس معي من شهر العسل وكل الكلام فوق!! المهم بدا يصرخ كيفي انا حر قلت له مو حر انا اسالك مين زوجتك خطيبتك اي اي خطيبتي الشرع حلل اربع وادري كذاب من زينك يقول لي وشو يضمن مالك علاقات هاه كله جوالك صامت بالبيت!!! انصدمت من وقاحته يقول اي تكلمين الشايب لما بشهر العسل وذكرت سالفته فوق!! ماتنظفين البيت ولاتطبخين كذاب اقوله وشو خص الطبخ انا اسالك مين هذه ومو صحيح اطبخ وانظف قلت له كيف يظلمني لهالدرجه اوص اوص اسكتي قلت له مابيك عفتك وشو يضمني ماتنقل لي امراض يطالعني ماقال لا مانام مع بنات سكت!! من متى ساكته عروس جنن فيني يعامل هالقذرات بمعامله زينه كيف!! وانا كله يصرخ علي ويهاوشني واكسر راسك اقوله كيف كذا ليش واصيح تعبت بروح اهلي يقول روحي اوديك!! طلع وتركني كلمته واتس اب قلت ليش كذا يقول لا وشو يضمني مالك علاقات!!! مريض!!!! اقوله ماتخاف ربك ترا والله يحاسبك يوم الحساب ماقصرت معك احاول اجلس معه مافي فاذده وطلعت هذه تكلمه وانا جمبه وحبيبي وحبيبتي مت قهر قال روحي اهلك وشيلي اغراضك يالله قلت مين قال بجلس صراحه من قالها ومن حقارته عزت علي نفسي اجلس وشلت بعض اغراضي وطلعت امس!! كتبت له مالي كلام معك كلم اخوي ربي يسامحك يقول الله يرزقك رجال زين خير ليش تزوجني اذا يبي غيري يخاف ربه فيني انا ابي استقرار وبيت واطفال حتى اطفال حرمني!! سفر وشو يضمني مو يروح لها ومو بس هي والله لو وحده لكان حاولت واصلا لي شهرين احاول طلعو مجموعه تعبت وعمره كبير الله يخليكم من زمان اكتب مالقى رد اخوي البليغ سالتك بالله رد علي اتبعت كل نصائحك الرجال مو صاحي يقول لي وشو فيها علاقات اقوله ترضى اكلم غيرك واقوله حبيبي يقول لي اي؟!! ياربي والله انا بحاله وانا ببيت اهلي لا اتصل ولاشي لا وفوق بجاحته لقيته مسوي لي بلوك بتويتر وقليله الادب معاه ترا هناك وكم مره يهاوشني بتويتر قدام الناس ياخوفي ليستعرض قدامها!! الحل اخوي لاتبخل علي بردك والله اني بحال مايعلم فيه الا الله |
| الساعة الآن 08:04 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©