أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابومريم
 

السلام عليكم و رحمة الله و بركاته ..

أنا روح الطير ..

أبغى تساعدوني ،،

رجاءً ..

لا تقولولي لا تفتحي صفحات الماضي ..
لإني ما حأرتاح إلا إذا فهمت ( ليـــــــــــــه ) ؟؟؟

لإنه بعضها صح و بعضها غلط ..
و انتوا فكروا بدل عني رجاءً ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

معك حبيبتي روح .. بانتظارك :)

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

معك يا روح
الله يفرج همك ويسعدك يارب

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

تفضلي بما لديكِ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

السلام عليكم و رحمة الله و بركاته ..

الله يجزاكم كل خير لإعطائي وقت من وقتكم الثمين ..

الصراحة ، من بعد الموقف اللي حصل ( من شهر كامل بالتمام ) ما زلت أذكر 20 أغسطس ..
و أنا بداخل نفسي ( أفتح مجلد ، ثم مجلد ، مجلد ... إلخ ) .. من كل أمر كان ( معلّق سابقاً ) ..
و كنت أبحث له عن إجابة و لم أكن أجد ..

.
.

سامحوني لإني بأكتب من البداية ،، و من ثم راح أضع تساؤلاتي العالقة و اللي مؤثرة علي ..
زوجي أول ما تزوجني ، قالولي إنه ما يعرف غير ( مسجد - بيت - مسجد ) ..
كل فروضه كانت بالمسجد .. و كان إمام مسجد .. و عمره كان أقل من 24 وقت تقدم لي ..

و هو امام من يوم عمره كان 20 أو 21 تقريباً ..
- كانوا أهله ( يراقبوه ) فين راح ، و من فين جا .. لإنه ممنوع يصاحب أي أحد ( أبوه يكره يكون لأولاده أصحاب ) ..
يراقبوه و يمنعوه من الهواية الوحيدة اللي يلاقي نفسه فيها و هي البلياردو .. لإنهم يشوفوا ( إنه ما يجوز ) ..
- كانوا ياخدوا كل راتبه و يجلس معاه 400 ريال فقط .. يصرفها على نفسه خلال شهر ..
- كان يركب سيارة ( مقربعة ) سيارة أبوه القديمة جدا جدا ..
- أبوه بخيل .. أمه كل ما شافته ارسلته لمشوار .. أخواته كثار ماشاء الله .. هو كل شي يقوم به في بيت أهله ..
الكبير مدلل و الكل بالكل .. و الصغير مدلل ..
- يربي لحيته اجباري ، يقصر ثوبه اجباري ( مظهر شيخ ) أمام الناس .. عشان يقولوا ( أم الشيخ ) ..
- حياتهم كانت (سابقاً) صارمة ..
- ممكن يسبوه أخواته أو أخوانه أو أمه و أبوه .. و هو يسكت ما يرد .. ممكن يكتم بنفسه أو يروح غرفته و يبكي ..

^
تكونت شخصيته و فهمت كل الأمور هذه من أول سنة زواج لنا ..

.
.

بالمقابل ..
( عشان بس أبين كيف كانت كفة الميزان )
هو توه كان بيشوف الدنيا ، و أنا من طفولتي و أنا عايشة حياتي و اتعلم

أنا من طفولتي ، و كنت كاسبة ثقة أبوي و أمي الله يرحمهم و ثقة الجميع .. كنت المثالية و مرحة و نشيطة جداً ..
مثل ما يقولوا ( كنت ) محبوبة الجميع .. و أكره المشاكل و ابحث عن الحلول ،، و عندي أهلي ( قبل كل شي ) ..

كنت ألاحظ وجود عيوب بشخصية أخواتي الكبار و أخواني و بنفسي ،، مثل الخجل الزائد و الصمت .. و عشان كذا
كنت دائما دائما منشغلة بصحباتي و معلماتي .. و أبحث عن أمور تصقل شخصيتي و أتصاحب دايما مع البنات اللي
أكبر مني بعام .. و ألتزمت بمرحلة البكالوريوس و تغربت المرحلة هذه عن أهلي و تكونت قناعاتي و مبادئي و شخصيتي ..

بالمرحلة هذه ،، تعرفت على فتيات داعيات .. و كنت أحلم إني أكون داعية بيوم من الأيام ..
زادت سخرية أخواني و أخواتي كل ما رحت لهم بالإجازات ،، و بدأت الحواجز تتصنع ما بيننا ..
و زادت محبة أمي لي و افتخارها بي ..

كنت انصح و أوجه غيري ،، و كانوا صحباتي كثار مررررررررة .. و كنت مضرب المثل لهم ..
و فيه ناس التزموا و يقولولي إني أثرت بهم و إني السبب الرئيسي لتوجههم للدعوة ؟
مع إني ما أفتكر إني بيوم ( نصحتهم أو نهيتهم عن شي ) ..

كان أسلوبي مثل ما يقولوا .. يحببهم بالدين بطريقة مثل ما نقول عصرية أو بدون تشدد ..
ماني عارفة ..

المهم ، إني كنت وقتها ( مثالية بزيادة ، طموحة بزيادة ، نشيطة بزيادة ، ثقة بنفسي و بإيماني و بإلتزامي بزيادة ) ..
^
هذا سبب تحملي بالبداية لزوجي ..

.
.

تخرجت و رجعت لأهلي و تعينت مباشرة لكن مو رسميا لسى .. و كانت فيه حواجز كبيرة ماقدرت اتخلص منها ..
و كانوا يحرضوا أمي علي .. و أمي كانت يوميا تشتمني و تقسى علي .. و كنت أحط حرتي بالمنتدى الإسلامي ..
و ارجع من عملي و أتكلم مع أمي و اضحك معاها و احكي لها كل شي
( البعض منهم .. ينقهروا إني بدل ما أبكي ، أزيد تفائل و اتقرب من أمي أكثر ) ..
أمي تركت سماع الأغاني ، صارت تصوم النوافل ، و بدأت تتجه للدين و الحمد لله و تقرأ القران كل يوم .. إلخ
بسبب الضغط و الظلم اللي كنت أشوفه منهم ( كنت آكل بنفسي ) و كنت ( عنيدة جداً جداً لأبعد ما يتصوروه ) ..

فأصبحت ( عصبية جداً و عنيدة ) عشان ما ياكلوني و خلاص يعرفوا حدودهم تجاهي ..
و بالمقابل كانت طيبتي شديدة لدرجة السذاجة مرات .. و ذكية أتعلم بسرعة شديدة .. و ارادتي قوية ..
أبوي عمره ما كان قاسي مثلهم ،، أبوي كان قلبه قلب ( طفل ) .. كان ذكي جدا و نشيط و مرح
و عصبي و حازم و رجال بجد و عملي ،، لكن كان قلبه أبيض و حنون و طيب ..

هما أخذوا القسوة من أمي بعد موت أبوي ، يمكن لإني كنت بعيدة فما تأثرت -وقتها- مثلهم ؟؟؟

المهم ..
يعني العصبية و العناد ( ماهي أصلا موجودة فيا من يوم ولدت ، بالعكس كنت سهلة جدا ) ..
كتبتها لإني بعدين استخدمتها مع زوجي .. بعد ما استغل طيبتي معاه ..

-------------------------------

* كتبت المقدمة اللي فوق ، عشان هي كانت سبب من أسباب قبولي بالزواج به ،، و سبب تمسكه هو بي ..

.
.

المهم ..

جاء زوجي و تقدم لي .. يبغى يهرب من أهله ..

سمع من الجيران عني .. كنت أرفض أي شخص ( همّه دنيا و لهو و لعب و مهمل صلاته )
لدرجة إنه أمي طفشت مني ، و تحسبني إني أدور أي عيب بأي شخص بس عشان أرفضه ..

كنت معجبة بالشيوخ بشكل كبير ، و أحلم إنه يتقدم لي أي شخص ( ملتحي و ملتزم ) ..
و ما عندنا بعيلتنا أي شخص ملتحي ،، فتكونت لدي صورة إنه الملتحي بيكون مثل الشيخ العريفي أو العوضي .. إلخ

.
.

سبحان الله ،، كنت أيام أنزل عند أهلي بالإجازات و بعد تخرجي ..
وقت أذان العشا و الفجر .. كنت أفتح النافذة و اغمض عيوني و اجلس أسمع لصوت الإمام و هو يقرأ القران ..
صوته كان رائع جدا لأبعد ما تتصوروه .. و أنام على صوت الإمام و هو يقرا القران ..
بس الفجر كنت أقوم أصلي بعد ما الإمام يخلص صلاته ، و كنت أواصل عشان أصحي أمي لصلاة الفجر و اصحي الكل..

بالصدفة ،، ( و والله مو فيلم من تأليفي ) ..

بعد ما تقدم زوجي و أهله جو .. و أهلي سألوا عنه ..
و جارة أمي و اللي زوجها هو اللي دلّ زوجي ،،
هي قالت لنا إنه زوجي يصير الإمام اللي يصلي بالمسجد اللي جنب بيت أهلي ..

و اللي كنت شبه يوميا و من كم سنة ،، و أنا أنام على صوته و هو يقرا القران ..

.
.

ما حكيت لأمي عن الحكاية هذه لإني كنت أخجل من أمي ، قلت لصحبتي و قالت ( شوفي كيف سبحااااااااااااااان الله ) ..

أمي تقول برمضان هذيك السنة ، بعد الأذان سمعت صوت الشيخ يقرا قران ..
و دعت و قالت ( يارب وحدة من بناتي يتزوجها إمام مسجد ) ..

عشان كذا أمي حست إنه زوجي وقت تقدم ،، كانت استجابة لدعوتها ..

.
.

و أنا هذيك السنة حجيت ، و دعيت بعرفة و ألحيت بالدعاء
( اللهم ارزقني زوجاً صالحاً .. نقياً .. تقياً .. يحبني و أحبه .. و يدللني .. و يحبك أكثر من محبته لي ) ..

و كنت أخاف أمي تزوجني أي شخص يتقدم و يعجبها ، لإنه أخوي كان ينقهر كل ما رفضت شخص ..
و حتى رفضت أخو صاحبه و انقهر و كان يبغى يجبرني ، بس أمي قالت له ما يتدخل ..

.
.

الحلو بأهل زوجي ( إنه تربيتهم تربية دينية ) عكس أهلي ..
بالرغم من وجود ( أغلاط بطريقتهم ) .. لكن أساس تربية زوجي .. دينية نادرة جداً بالزمن هذا ..
أفتكر جدي و جدتي الله يرحمهم و أنا عمري 5 سنوات كانوا كذا .. يعني نفس البيئة اللي عاش بها أبوي الله يرحمه ..

.
.

ما أعرف ليش بأكتب كذا .. يمكن لإني جالسة أسأل حالي أسئلة كثيرة ..
يمكن لإنها ( تضعفني ) و تخليني اضعف عند اتخاذ أي قرار ,,؟؟؟؟

.
.

المهم ..

زوجي تقدم عشان يهرب من أهله ، و أهله بسبب تشددهم سألوا عني كثير و أبوه مرة كان يبغاني لولده بسبب اللي سمعه ..
و استخار أبوه كثير .. و أمه كانت تبغاني عشان سمعت إني اشتغل .. و أنا استخرت كثير ليلة الزواج و أنا استخير ..

قبل الملكة ،، أمي كان عندها عيب إنه البنت تسأل أي أسئلة ..
أهلي حسبوه أكبر مني بعشرين سنة ،، لإنه اللي يشوف زوجي يعطيه عمر أكبر من عمره .. عكسي تماماً ..
أنا كنت أتمنى يجيني شخص أكبر مني بعشر سنوات أقل شي و ناضج فكريا .. و كل اللي يتقدموا لي كانوا شباب ..

أمي حسبت إنه زوجي مرة كبير ، و لإنها وقت سألت أقاربه .. لخبطوا و كلموها عن أخوه الكبير ..
فأمي لخبطت وقتها .. و كانت أمي مبسوطة إنه دعوتها تحققت ..

سألت أمي بس سؤال واحد ( لا غير ) .. و كنت بالمطبخ جالسة و قبل الشوفة بكم يوم ..
ماما كم عمره ؟؟؟
قالت لي ( ليش تسألي ؟ مالك دخل بالأمور هذه ، أنا عارفة إنت تسألي عشان تدوري أي سبب عشان ترفضيه )
أمي كانت تحاول تغير الموضوع عشان لا أرفضه لو عرفت إنه مرة كبير ..

مع إني أنا كنت العكس ، كنت ما أبغى أتزوج واحد ( لسى شباب و طايش ) ..
زعلت و انحرجت مرة ، و أصلا سألتها بالقوة و أنا جدا منحرجة .. لإنه أمي عندها ( عيب مرة تسألي ) ,,
مع إنه أختي اللي تزوجت بعدي ،، كانت تسأل كل شي و حتى مهرها خلته بيدها ..
أنا مهري ما أعرف كم هو ؟ و لا شفته ، و لا أدري إيش كانوا يتفقوا ( كنت استحي من موضوع الزواج مرة ) ..

صحبتي قالت لي ( مو شرط إنه إمام .. يعني أخلاق ) ..
و قالت لي لا تنسي إنه أهم شي ( دينه + خلقه ) .. و مو كل إمام عنده أخلاق ..

أخواني ما اهتموا بالسؤال .. لإنهم شايفين أصلا أسباب رفضي تافهة .. إني أبغى صاحب الدين ..
قالوا إمام مسجد كفاية ..

أمي سألت أقاربهم لإنه طلعنا ( أرحام من بعيد و أقاربهم يقربوا لنا ) .. و قالوا بس لأمي عن أهل زوجي ..
و كلهم ما يعرفوا شي عن زوجي ، غير إنه ( شخص هادئ جدا و طيب جدا )

.
.

سؤالي ..

هل من الممكن إني أخطأت بقبولي الزواج منه ؟؟؟
بذلت وقتها كل الأسباب ..

لو وحدة جات بالمنتدى و كتبت الموضوع هذا و سألتكم .. أقبل به و لا أرفض ؟؟؟
كنت بصراحة راح أنصحها إنها تقبل به ..

.
.

أنا وقتها لما أعطيتهم ( الموافقة المبدئية ) قبل - الشوفة - ..

قلت بداخلي ..
أنا قبلت به عشان ( ربنا ) وعدنا إنه :
*. خذوهم فقراء يغنهم الله من فضله ..
*. إنه حافظ للقرآن ..
*. إنه ملتحي ..
*. إنه يصلي ..
*. إني قبلت فيه لدينه و أخلاقه ..
*. إني دعيت بإلحاح ، و ربي أبدا ما خيبني .. و ثقتي بالله كبيرة ..
*. استخرت كثير لحد ليلة الزواج ،، و حتى بعد الزواج كنت دايم استخير ..

.
.

جاية دحين بالتساؤلات ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

ملاحظة ..

سؤالي ..
هل من الممكن إني أخطأت بقبولي الزواج منه ؟؟؟

.
.

ما أبغى اجابة له ،، بس هذه أسئلة أسألها لنفسها بصوت عالي ..
و بعدين افتكر المواقف هذه ، و ألاقي اجابة لنفسي ..

و افتكر ثقتي بالله ، و أقول ( لعل بالأمر حكمة لا يعلمها غيره ) ؟

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

تصدقوا و الله العظيم ..

إنه وقت الشوفة ..
كل اللي شافوا زوجي و أنا منهم ..
( يقولوا .. حسوا كأنه فيه نور بوجهه ؟؟؟؟؟؟؟ )
لإنهم أخواتي و زوجة أخوي الملاقيف كانوا لابسين العبي حقتهم و يطالعوا من ورا الباب .. :(

أختي تقول لي ,,
( و الله يا عصامية .. إنه يوم الشوفة .. فيه نور كان بوجه زوجك )
شعرنا بنور بوجهه ..

و أنا نفس الشي ..
أول ما دخلت و قبل لا أطالع فيه ..
( شعرت بنور في وجهه وقتها ؟؟؟؟؟؟؟؟؟؟ )

.
.

مو مبالغة ..

هذا إيش معناه ؟؟؟؟

.
.

إنه شخص فاسد ؟؟؟

.
.

قبل الزواج ، كنت استحقر الرجل اللي يتزوج ( من أجل الجسد فقط ) ..
كنت أبغى انسان ( بمعنى انسان .. يحبني عشاني أنا ) ..

صحبتي زوجها وقت تقدم ، تقول ( أكلها بنظراته ) و قدام أبوها يقولها
قومي ، لفي و نظراته :(

.
.

فكنت حريصة جداً من قبل الشوفة ، إني أركز عالنقطة هذه ..

عجبني وقتها زوجي ، إنه وقت الشوفة ..
كان بس يطالع في عيني ، و ما شال عينه أبداً و لا طالع أي أماكن تانية ..
و كان مبتسم طول الوقت .. ابتسامته كانت جدا مريحة ..

كان حنون بكلامه و هادئ جدا و دمه خفيف ..
خلاني اضحك وقتها ..

.
.

طيب سؤالي اللي بداخلي اسأل نفسي فيه ..

هل شخص مثل هذا ، ممكن يكون ابليس ؟
ممكن يكون بقناع اخر ؟؟؟

ما أعتقد ؟؟؟

لإني أفهم لغة العيون جداً ،، و دايما في اختبارات قوة الملاحظة بأنجح و أجاوب قبل الكل ..
حتى بالعيلة كانت عمتي تقول عني إني ( قوية الملاحظة ) ..

ما أقدر أكذب نفسي ..

.
.

لحد هنا ، و أنا ماني ندمانة على زواجي منه ..

.
.

حتى يوم قلت له و أنا اعاتبه بيوم من الأيام ببريطانيا
( كان فيه نور بوجهك ، و اختفى سبحان الله )
عيونه دمعت .. و تأثر .. و افتكر نفسه كيف كان ..

قالي و الله كنت من المسجد للبيت ، و من البيت للمسجد من أيام و أنا بأولى متوسط ..

.
.

حتى مرة لما قلت له إيش كنت أدعي قبل الزواج ..

عيونه دمعت ، و قال ( يعني معقولة يكون ربي شايف إني كذا ؟ مثل ما دعيتي ؟ )
صالح ، نقي ، تقي ، يحب ربي أكثر من حبه لي ؟؟؟

.
.

كان زوجي ببداية الزواج ( دموعه قريبة جداً ) ..
دحين ( لأ ) .. ما يظهرها و يكتمها ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

المهم ..

هنا تبدأ الحكاية ..

أول موقف يحصل بالخارج في بريطانيا ..
موقف يهزني و يخليني أمتنع عن دخول الإختبارات النهائية ..
حطمتني و غيرتني و غيرت حياتنا ..

راح أحكي بالتفصيل ..
عشان أبغى اقفل الموضوع هذا نهائي .. ( بكم و معكم ) ..

لإني مالقيت له تفسير و لا إجابة ..

و رجع الموضوع انفتح من جديد ،، بسبب الموقف الأخير ..

.
.

هذا الموضوع يهمني جداً ( ألاقي اجابته ) عندكم ..
لإنه نسيانه مستحيل .. و لإنه هو اللي غيرني تماماً و مو مخليني أرجع مثل قبل مع زوجي ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

ما أبغى أدخل بتفاصيل الملكة و كذا ، حتى لا أطيل عليكم .. لكن أذكر المواقف اللي ببالي ..
عشان لا تقولوا ليش ما حافظتي على حقوقك و ليش تنازلتي من البداية و انت السبب و إنت و إنت .. إلخ

-------------------------------------------------------

*. افتكر أخوي الكبير ، كان جدا متردد و قال لأمي بالتلفون و هما رايحين خلاص للشيخ ..
اسألي بنتك ( موافقة ؟ مو إنها بتعاند ) .. أمي سألتني ( موافقة يا بنتي ؟ ترى بتتزوجي واحد فقير ..
ما عنده فلوس و على قد حاله ، لا تكوني بتعاندي ) ..

قلت لها ( أهم شي إنه إمام و مو مهم الفلوس .. و عادي أتحمل ) ..
طبعا كلهم قالولي ( شيخ ) .. و كانوا ينادوه الشيخ فلان ..

-----------------------------------------------------------

*. عندي أخ تاني ( قاسي القلب و يعاني من داء العظمة ) يغار جدا مني إلى الآن .. دايما يعارضني ..
عنده نظرة الرجل الشرقي ( إنه حرمة و لاشي ) .. مدلل ، قليل أدب ، غير محترم ، متكبر ، مغرور ،.
ينقهر ليش أنا درست و هو لأ ؟ ليش أنا توظفت ، و هو لأ ؟؟؟؟؟ أصغر مني بعام واحد فقط ..

يبحث كان عن أي فرصة عشان ( يمد يده علي ) .. لكن أمي كانت موقفته عند حده و أخوي الكبير ..
و أنا ما كنت أعطيه مجال ، و لا كنت اطلب منه أي شي لو أمووووووووووووت عشان يستنى هو الفرصة
هذه عشان يذلني .. ألفاظه جدا منحطة ، شكاك جدا ، يحب التملّك و كل شي يمشي تحت أمره ..
( تكلمت عنه ، لإنه له دخل بالموضوع اللي حصل ببريطانيا )

أبوي ما عمره مد يده علي و لا أخوي الكبير ، و مرة من المرات قبل لا أتزوج بسنة.. كنت تعبانة و نايمة بغرفة
الضيوف و مقفلة اللمبات ( لإنه الدريشة أو الطاقة هناك كان صوت الإمام ينسمع بوضوع ) و أحس بسكون..
و ما كنت أدري إنه أختي المتزوجة جاية تزورنا مع زوجها ، ماحد قال لي و أختي هذه نفس طبايع أخوي هذا
( و اللي بعد موت أمي .. هما الإثنين سببوا القطيعة و الفتن بين الجميع )

قمت على صوت أخوي هذا بيستقبل أختي المتزوجة و زوجها ،، و لسى ما دخلوا الغرفة .. و أنا قمت ماني
مستوعبة شي.. لإنه أخوي كان توه فاتح اللمبة .. و قالوا لزوج أختي يستنى شوي لحد ما عديت ..

يعني الموضوع عادي و ما يستاهل .. أخوي أخيرا جاته فرصة يطلع حرته و أخدها حجة علي ..
و جاء بيتضارب معاي و يمد يده ( أول و اخر مرة ) .. قال لي كلام في حياتي ما سمعت مثله ..

يا ........، يا ملعونة ، أنا عارف من زمان إنت حاطة عينك على زوج أختك .. إلخ ..

جلست سنتين ما كلمته .. لحد ما تزوجت و علاقتي معاه رسمية لإنه كان يشوف حاله على زوجي ..

-----------------------------------------------------------

من أول يوم الملكة ، و من يوم جلست مع زوجي .. على طول فهمت شخصيته .. إنه بدون هدف و لا
شخصية و لا رأي ،، و لا إنه ( إيمانه من قلبه ) .. قلت أجرب أسبوع و لو ما قدرت خلاص ما أقدر ..

هو كان مييييييت علي .. من أول يوم الملكة و هو يقول - أحبك - حبيتك من أول ما شفتك - ..
أنا ماني مصدق إنك قبلتي فيا و إنت تستاهلي شخص أفضل مني .. كل أقاربي مستغربين ..
الناس يحسدوننا .. قبل لا توافقوا كنت أروح الحرم و أعاهد ربنا إذا قبلتي فيا إني عمري ما أزعلك .. إلخ

و أنا كنت - صادّة عنه - لإني شفته قدام أخوي مو عارف يتكلم و يرجف و يعرّق .. و لو كلمته عن المسجد
يغير الموضوع .. كنت أقول له إنت اللي في داخل صدرك ( القرآن ) .. أكبر من شهادتي و من كل شي ..
أحسه مو مهتم و لا فاهمني ..

فجعني مرة ، جاء و يبوس رجولي و يبكي .. إني ما أتخلى عنه ..

كان ضميري يأنبني .. من أول أسبوع ..
ما أبغاه ، مو هو الشخص اللي ممكن أعيش معاه .. و نفس الوقت حزينة عليه ..

و وقت قال لي إنه عمره قريب مني ، مو مثل ما قالوا لي أكبر مني بعشر سنوات ..
وقتها بكيت عند أمي و قلتلها ( إنت السبب ، إنت رميتيني .. سألتك عن عمره و قلتي مالك دخل ..
تبغوا تتخلصوا مني بأي طريقة .. ما طلع إمام و لا شيخ .. ما عنده شخصية ، ما قدر أتحمل اجلس معاه ..
قلت لها ،، أنا ما أبغى واحد أجلس أربي فيه .. ما أبغااااااااااه )

أمي حست بتأنيب الضمير و إنها رمتني بسهولة .. و صارت تقول لي الناس إيش قالوا لها عن أهل زوجي ..
إنهم أقوياء و إنهم و إنهم .. بس ما قالت لي عشان صارت الشوفة و خافت إنه قراري يتأثر ..

أمي قررت إنها تفكني منه بأي طريقة و كلمت أمه و كلمت أخوي .. و أخوي كلم زوجي ..
زوجي انفجع و قفل الخط ، و راح ساق مسافة 400 كيلو في خلال ساعة أو ساعتين عشان يقابل أخوي
و هو يبكي و يردد ( سبحانك اللهم و بحمدك ... إني كنت من الظالمين ) دعاء سيدنا يونس ببطن الحوت ..

تكلم مع أخوي - كلام رجال لرجال و كلام موزون - و بعدين طلب يكلمني ..
*. زوجي من زمان قلت له .. إنت بداخلك شخص رائع و عاقل .. لازم بيوم من الأيام تخرجه للدنيا

أنا رفضت و أمي رفضت بقوة و شالت الجوال و خبته عشان قلبي ( لا يرق و يضعف ) لإنها تعرفني ..

أخوي الكبير كلمني و قتها بالجوال و قال لي ..
و الله بعد ما جلست معاه و تكلمت معاه ، لو تبغي رأيي الشخصي ؟ أنا لو عندي بنت .. كنت زوجته هي ..
ماشاء الله كلامه موزون و عاقل و الرجال شاريكي و يبغاك .. فكري مضبوط و اسمعيه مرة وحدة ..
وقتها وثقت برأيي أخوي الكبير و رضيت اكلم زوجي مع إنه أمي كانت رافضة و زعلت مني ..
جلس يكلمني و يسألني عن الأسباب .. و قلت له الأسباب ..

عاد من بعدها .. بدأ زوجي طول فترة الملكة - بالتمثيل علي - عشان لا يخسرني على قولته ..
يعني عرف أنا إيش أبغى بالضبط ؟ فصار يبين لي إنه و الله الرجل اللي كنت أحلم به طوال فترة الملكة ..

لإنه أهلي ليلة زواجي ، قالوا عن زوجي ( و الله إنه طلع داهية .. و عرف يجيبها ) ..
و ماهم عارفين السرّ ؟؟؟؟ و هم طول فترة الملكة و يقولوا دحين تتفركش الخطوبة و حاطين يدهم على قلبهم

القصد /
إني ماكنت متعلقة فيه ، و كنت طول فترة الملكة متخوفة و اختبره .. عشان لا أحد يحسب إني فكرت بقلبي

أعز صحباتي و اللي مرة تفهمني .. و حاليا هي بأمريكا تكمل دكتوراة .. قالت لي وقتها ..
( إنت ناس كثيرين غيرتيهم و أثرتي فيهم .. و أنا متأكدة إنك راح تغيريه و بسهولة و بتفتكري كلامي وقتها )

و قالت لي
( إذا ما حبيتيه ، رددي كل يوم .. هذا زوجي لازم أحبه .. أنا أحبه .. أنا أحبه عشانه زوجي )

و سمعت نصيحتها ..

-------------------------------------------------------------

* ماشاء الله تبارك الله ..

الصراحة ، طول فترة زواجنا .. ما عمره زوجي جرحني و لا أهانني .. و لما أقارن بينه و بين أخوي التاني ..
أشوف إنه زوجي ملائكة بالنسبة له .. زوجي يوثق فيا لأبعد حدّ .. لو أبغى أي شي و لحد دحين و يكون
تعبان ، يقوم و ينفذه لي .. بجد ، ما شفت أي وحدة من صحباتي أو قريباتي نفس الشي ..
( كان يقول و ليش أجرحك و مصيرنا نتصالح و يبقى الجرح بداخلك و تكرهيني ؟ )

تعلمت أبجديات الحب ( منه ) ..
يعني كنت أشوف مسلسل ( نور و مهند ) و أشوف الحريم يقولوا ( ياليت أزواجنا كذا يعاملونا ) ..
و أنا بداخلي أقول ( الحمد لله .. زوجي يعاملني أفضل من كذا ) .. و بجد ما أبالغ ..
تعلمت ( طولة البال و الهدوء و الصبر و الحلم و كتم الغيظ ) منه <-- ( قلبه أبيض و ما يحقد أبدا )

تعلمت معنى ( التسامح ) منه .. كان يقول لي ( ليش أعطي للشيطان فرصة إنه يفرق بيننا ؟ )

هو اللي علمني كيف ( أبرّ بأمي ) .. و الله كان يخاصمني و يزعل مني لو أمي زعلت و حتى لو انظلمت
كانت أمي تسبني و تقفل الخط بوجههي و أزعل و أنا بالغربة ، لإنها تكون مقهورة من أي أحد و تحط حرتها
فيا .. و زوجي ما يقوم من عندي لحد ما أرجع و اتصل على أمي و اكلمها .. و مرات لما كنت أرفض أقول
له أدق بعدين ،، كان يتصل و يكلم أمي و يعطيني السماعة أكلمها غصب ..

عشان كذا أمي صارت تقول لأخواتي و أخواني ، بنتي هذه إذا زعلتها و سبيتها مو مثلكم ..
ترجع تدق على طول و تكلمني و ما كأنه فيه شي ..

أفتكر قبل لا أتزوج .. كنت أدعي بقيام الليل و وقت أمي تجرحني بدون سبب ..
(( يارب ارزقني زوج يساعدني إني أكون بنت بارة بأمها .. يارب ساعدني أكون بارة بأمي ))

و الحمد لله ،، إنه ربي حقق دعواتي و قدرت أكسب قلب أمي قبل لا تموت ..
و ماتت و هي مبسوطة من زوجي و تدعي له ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

أرجو ممن قرأ رد اختنا فوق يقول معي

ما شاء الله لا قوة الا بالله .. ربي يبارك لكم ويحفظكم من العين


كملي حبيبتي .. معك وبانتظارك تفرغي ما في جعبتك :)

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

تحمليني حبيبتي بيتا ..

أحس لازم أطلع كل اللي ببالي ، لإني لو قلت الحكاية اللي صارت ببريطانيا ..
كلها مرتبطة ببعض ..

و بعدين ما عندي ( حاليا و من فترة طويلة ) الإستطاعة إني أقدم أي شي ( له ) ..

.
.

كلها بقلبي من سنوات و ماني قادرة أنسى ..
أحس ما عاد فيه شي ممكن ( يحافظ على ثبات حياتي الزوجية ) ..

تعرفي جالسة أفكر مع نفسي إني أروح أمريكا أو كندا مع أولادي ..
و هناك خلاص أعيش أو عالأقل أحاول الحصول عالجنسية ..

هذا الحل الوحيد في حالة لا سمح الله إنه ( ما استغلينا الفرصة الوحيدة لنا أنا و هو ) ..

فلازم أطلع كل شي متعبني و يخليني أرجع للخلف خطوات ..

.
.

تعرفي و أنا بالمتوسطة كنت أعمل تمارين ( تقوية الذاكرة ) .. و جدتي ماتت و عمرها فوق المية
و ما شاء الله تبارك الله ( ذاكرتها كانت حديد ) و تحكي لنا عن طفولتها ؟

فالذاكرة مرات تكون ( نعمة ) و مرات تكون ( نقمة ) ..

و هي نقمة علي بحياتي الزوجية ..
بس الحلو ،، إني مجرد ما أطلع و أفضفض .. خلاص أنسى ..

.
.

كل ما أبغى أكتب اللي صار ، افتكر شي ..

تحملوني معليه ..

و كان لازم أكتب طريقة تعامله ، لإنه ( كلهم يشككوني ) بإنه يستغلني و إنه عيوني مغمضة ..
و إني غبية لإني ما أسمع ( إلا لنفسي فقط ) و ما أرضى إنه أي شخص يتكلم عنه ..

جاية بالكلام دحين ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

اللي بأكتبه دحين ، أفتكر إني كتبته ( بس شكله طار ؟ )
دورت عليه و ما لقيته ؟؟؟
( و بأقوله لإنه صحباتي و أزواجهم و أخوي اللي كتبت عنه ، داخلين بالحكاية )
و لإني كل ما نسيت الحكاية فكروني به من جديد ..

المهم ..
أول سنة لنا ببريطانيا ..

رحنا بريطانيا و نزلت عند صحباتي ( اعتبرهم أهل لي ) .. هما 2 .. و أكبر مني بالعمر ..
وحدة اكبر مني بـ 14 سنة تقريبا و التانية بخمس سنوات .. أحسهم عاقلين و حكيمات ..

اللي أكبر مني بـ 14 سنة .. الصراحة كانت رافضة زواجي منه من البداية .. و مو عاجبها زوجي أبدا
التزامها وسط .. يعني مو مقتنعة بأسباب قبولي به .. تحب المظاهر و الناس الكشخة ..

المهم ، كان فيه يوم سعودي بجامعتهم ..
أنا و زوجي رحنا هناك نغير جو .. و كان ماسك يدي ..

و من أيام الملكة و من بعد زواجنا و حتى سافرنا بريطانيا .. زوجي كان حريص إنه دايما ( يمسك يدي )
فوقت شافتنا صحبتي هذه ، زوجي تركني و راح يقابل زوج صحبتي و أنا رحت قابلتها و رحت مكتبها ..

قالت لي و قبل كيف حالك و قبل كل شي :
وي وي وي .. إيش هذا يا عصامية ؟ نزلتي من عيني .. لا لا لا لا .. ما يصير كذا ؟
أحرجتي زوجك وسط الرجال السعوديين ، و دحين يقولوا ما صدقوا نزلوا بريطانيا و صاروا مثلهم ؟

سألتها : إيش فيه ؟

قالت : كذا تفشلي زوجك و تمسكي يده وسط الناس ؟ بسرعة تأثرتوا بالغرب ؟ لا لا لا ما يصير كذا ..
و الله لو زوجي بيذبحني ..

قلت لها : يا أبلة .... ،، ترى هو اللي ماسك يدي مو أنا .. و من قبل ما نجي بريطانيا و من الملكة
و زوجي زي كذا .. مو أنا اللي مسكت يده ..

سكتتت و جلست تفكر ..

بعدين قالت بحسرة :
تصدقي ؟ زوجي ما عمره مسك يدي و دايما يمشي قدامي مسافة ؟؟؟
بس تدري إنه يا سلام احساس حلو .. لو زوجي كذا يمسك يدي ؟؟؟
بس برضو برضو .. ما يصير ..

.
.

قلت لزوجي بعدين و قال لي ( يحسدوك ، طنشيهم .. و قولي أنا عاجبني )

.
.

هذه صحبتي لها يد بالحكاية اللي صارت ببريطانيا و هزت ( أعمدة زواجنا ) ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

صحبتي هذه كانت حاقدة مرة على زوجي ، لإنها شافتني كيف كنت أعاني و تعبانة عشان ولدي بعيد عني ..
و كانت تنقهر مرة من زوجي لإنه حرمني من ولدي ، و لإنه ما يبغى ولده .. و قلبها كان ينحرق علي لما تشوفني
تعبانة و أبغى ولدي يجي بأي طريقة ..

و بمرة من المرات ، قلت لها ( لو زوجي مو عاجبك عشان ماعنده شهادة .. فهذا مو مقياس ) و قلت لها ما تتدخل بيننا ..
هي مرة طيبة و رائعة ، بس من الناس اللي تحب الهرج الكثير .. و مرات تبالغ .. فما كنت أحكي لها كل شي ..

.
.

صحبتي التانية ، من كثر ما أمي تحبها .. كانت تشتري لها أي شي مثل ما تشتري لي ..
كنت أثق فيها لدرجة كنت أعتبرها إنها ( هي = أنا ) ، أثق فيها أكثر من ثقتي بنفسي ..
بس حصلت أمور بعدين .. خلتني أتوب أثق بأحد بالعالم كله و إلى الآن ما أثق بأي أحد ..
و تعلمت درس بالحياة ..

مشكلتي معاها فين كانت - بالفترة هذيك - ؟؟؟
كان في ( زوجها ) ..

.
.

زوجها بعد مرور ( سنة و نص بوجودنا في بريطانيا ) ..
نشر كلام عن زوجي ، قاله لزوجته ،، و زوجته راحت قالت للتانية ..

الكلام اللي قاله عن زوجي ، هززززززني .. كسر كل شي ..
غيرني ..

بس للأسف ، مافي أي دليل على إنه صادق و مافي أي دليل على إنه كاذب ..
أمور تخليني أصدقه ، و أمور تخليني أكذبه ..

إلى الآن ما نسيت ..

.
.

راجعة ..
و جدا أعتذر عن الإطالة .. بس ما عاد فيه شي يخليني ( أتحمل و اسكت ) ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

قبل لا أقول إيش قال زوجها ، عن زوجي ..
( لإنه هنا المشكلة )

حابة أتكلم عن زوجها و مواقف حصلت منه ..
فمرات أصدقه ، و مرات أكذبه ..

لو زوجي كان انسان ( ثقة ) .. ما كنت اضطريت أسمع لأي شي يجيني من برة ..
بس كفاية ، كل مرة أدافع عنه أمام الجميع ..

كان لازم أحط له ( حدّ ) ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

كملي حبيبتي
معاااك باذن الله

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

ملاحظة /
أنا حالياً ، كل شي بداخلي انكسر .. و بينكسر كل شي و راه شي ..

( بديت أكذب كل الأحاسيس و المشاعر اللي قدمها زوجي سابقاً و الآن .. بديت أصدق إنه كان - يستغل مشاعري - ..
و إنه كل اللي قالوه الناس ،، إنه ما يحبني و يستغل طيبتي .. بديت أصدقها )
مشاعر تكذيب و تصديق ..

و اللي يثبت ( صدقها ) أو ( كذبها ) ..
هو ( تعامله الحالي ) ..

بس احساسي يقول إنه صادق ، لإني أنا كمان ( عندي عيوب لابد ) و هو تحملني مثل ما تحملته ..
الفرق ، إني كنت صادقة جداً و أسعى لإصلاح نفسي و إصلاحه ..

.
.

متلخبطة بداخلي .. لكن ظاهرياً ( ثابتة ) ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

نسيت أقول ، إنه زوجي في حياته مع أهله .. كان مختلف عنهم ..
- هو شخص اجتماعي جداً و مرح و دمه خفيف .. لكن كان ممنوع ببيت أهله .. و حتى أخواته بعد ما
يتزوجوا ، يبدأوا يعملوا كل شي كانوا محرومين منه .. و بعدين يرجعوا يعقلوا ..
- شخص مبدع بالبلياردو .. لكن كان (محرّم) عند أهله ..

وقت تزوجني ، أهله أول سنة و نص ( تعبوني و تعبوه ) .. يبغوا يعاملوني مثل ما يعاملوه ..
و أنا ببيت أهلي تعودت (عالإستقلالية) .. و أنا أرفض إنه أي أحد يستعبدني أو يفرض علي قيود ..
ما تزوجت علشان يربوني من جديد ؟؟؟ و هما كانوا يبغوا يفرضوا علي طريقة حياتهم بطريقة الإذلال ..

كنت اجتماعية جداً و علاقاتي كثيرة ، زوجي لقي الشي هذا يتفق معاه ..
شافني أرفض قيود أهله و ما أخاف منهم .. أرد بإحترام و بلباقة ،، و قدرت اكسب احترامهم ..
( لقي زوجي الشي اللي يبعده عن قيود أهله ، فبدأ يلعب عالحبلين .. يبعدني عنهم و يبعدهم عني ..
عشان مصلحته الشخصية .. و عشان راحته .. و كنت كل ما قربت منهم ، ألاقي تجريح و مضايقات) ..

.
.

أول سنة و نص لي أنا و زوجي قبل ما نروح بريطانيا .. كانت مشاكلنا فقط ( بسبب أهله ) ..
بس كان زوجي وقتها ( ملك الرومانسية ) مثل ما يقولوا .. و ما قصر معاي أبدا .. لدرجة كنت حامل
و أجهضت و ما تركني أبدا بالمستشفى ،، و بحملي بولدي كنت خايفة أجهض مرة تانية ..

رحنا زرنا أقاربه ،، و قام شالني غصب عني أربع أدوار ( و ما خجل منهم ) و كنت حامل بالشهر 4 ..
أقاربه كلهم اتريقوا عليه ، أولاد خالاته و أخواله و أزواج خالاته
( يا تيس ،، إنت تيس عند حرمتك ،، خلاص ركبتك .. إلخ )
كنت بغرفة الضيوف التانية و اسمعهم يتريقوا عليه كلهم .. و يضحكوا ..

زوجي رد عليهم و ما يدري إني أسمعهم .. و قال ( إيوة أشيلها فوق راسي .. زي ما هي شايلتني ) ..

.
.

كنت أنا وقتها رائعة جداً معاه ، و احترمه و أقدره و أوقف معاه كثير .. ما كنت أبدا اطلب أي شي من زوجي
كنت أحسب إنه ما عنده فلوس ، و كنت كل ما نزلت السوق اشتري لنفسي و له .. بدأ هو يستغل طيبتي
و يوعدني إنه يعوضني و يحلف و أنا أصدق ..

دلعته و دلعي شكله خربه .. ( مثل ما قالوا أهله ) .. كنت أحاول أبني ثقته بنفسه و أقوي ايمانه بالله ..
كنت أزعل إذا ما قام للصلاة ، كان مستواي الثقافي و الديني جدا عالي .. حسيت إنه لازم أنزل لمستواه
حتى نصعد سوا لفوق مع بعض .. كان يعشق الأفلام الأجنبية ، و كان محروم ببيت أهله منه ..

صرت أجلس اتفرج معاه عشان لا يروح يتفرج مع صحبة سيئة ..
حالياً ما يتابع أبدا أي أفلام و لا يهتم ..

فكان تعاملي معاه على أساس إني أبغاه يعمل كل شي كان محروم منه ببيت أهله ..
لكن بنفس الوقت ، أبين له القيود بطريقة محببة و ما تكرهه بالشي ..

ما حرمته من شي ، مفاجآت رومانسية و هدايا أجيبها له .. و هو كان طاير بيا ..
و كل يوم يخرجني يمشيني .. لو نلف نص ساعة بالسيارة ..

لو رحت عند أهله مرات ، و اشتهي مثلا هارديز و هما كلهم يبغوا ماكدونالدز ..
كانوا يرسلوه و يجيب طلباتهم ، و طلبي أنا ( يخصصه لي ) و يقول لهم هذا لـ ( عصوووم ) ..
يتريقوا عليه أخواته ، و ما كان يعطيهم أذنه و يطنشششش ..

.
.

ما كان عندهم كمبيوتر ببيتهم و لا لاب توب .. و لا عنده ايميل و أنا كنت خبيرة بالكمبيوتر ..

مرة من المرات رحت بيت أهلي ، و رجعت بيتي .. و شفت بالهيستوري لكمبيوتري ..
زوجي مسجل دخول ( شات الحب ) ..

تزاعلت معاه ، و قلت له ( الشات للناس الوسخين ) ليه تدخل له ؟؟؟

قال صاحبي أعطاني العنوان و قال لي ( تعال نتقابل هناك ) ..

كلمته و فهمته إنه الشات مكان مو كويس ، و إنه و إنه ..
و وعدني ما عاد يدخل ،، و إنه ما كان يدري ..

و من يومها لا شفته دخل شات لا بكمبيوتري و لا بكمبيوتري و لا بجوالاته ..

.
.

كان بيجرب كل شي .. و أنا أعطيه ( القيود لكل ) ، مو افرضها عليه ..؟؟ كنت أبين له فقط ..

مثلا البلياردو .. كنت أقول له ( مو حرام الهواية هذه ، بالعكس أشجعك عليها ) ..
بس بشرط ما يكونوا فيه ( حريم ) و بشرط إنه وقت الصلاة .. تقوم تصلي ..

(( هذا قبل سفرنا لبريطانيا ))

و ما أفتكر إني وقتها قلت له ( أبغى ) أو ( جيب لي ) ..

يمكن لإني كنت حاطة ببالي إنه ماعنده فلوس ، و ماكنت متعودة ببيت أهلي أطلب شي ؟؟؟
فكان يكفيني ( حبه و تدلليه و تقديره ) ؟؟؟

و كنت أصدق وعوده إنه ( يعوضني ) و كان مقدار الإيمان بداخلي كبير جداً ..
فكنت أخاف أضيع الأجر و كل شي أقول ( ربي يعوضني و ربي شايف ) ..

و مرات كنت انفجر بالبكا لما خلاص ما أتحمل ،، و خاصة بفترة وحامي و حملي و ضغوطات أهله ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

يمكن بأكتب كذا ، لإني ( مكذبة مشاعره ) ؟؟؟
فبأسترجع كل شي .. و أسأل نفسي ؟؟؟

و أبغى أوصل للموقف اللي حصل ببريطانيا ، لإنها غيرت كل شي ..
و قلبت كل شي ..

و يمكن هي السبب بالشي اللي حصل دحين ؟ ماني عارفة ..

راجعة

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

بعد ما سافرنا بريطانيا ..
أنا عشت الحرمان من كل شي ، و هو العكس ..
صابني مثل الإكتئاب ما بعد الولادة لإني تركت ولدي و عمره 40 يوم عند أمي .. و اكتئاب الغربة ..
الفلوس تخلص بسرعة ، سنة كاملة ما اشتريت فيه لبس واحد جديد لنفسي .. بطاقة الصراف كان
ينزل فيها راتبي و راتبه .. و كنت تاركته بيده ، يا دوب نخرج منه إيجار البيت و الفواتير و الباقي مادري عنه

مليت من أكل السوق ، ما أعرف كيف أطبخ و لا أعرف كيف أغسل الملابس و لا أعرف شي ..
و لا أعرف أتفاهم مع أهل البلد .. و زوجي بالبداية كان دايما معايا ..

بدأ يمشي مع زوج صحبتي ، و هو يعيش بمدينة قريبة مننا ..
تعرف زوجي على صاحب زوج صحبتي ..

بدأ كل جمعة يقول يروح يسهر مع السعوديين .. كنت بكل شي أصدقه و ماشية معاه تمام ..
لحد ما اكتشفت بالنهاية إنه يستغل طيبتي ، و إنه مشاكلنا بالسعودية كانت نصها بسببه و بسبب أكاذيبه
مو كلها بسبب أهله ..

صار يقول لي ، تبغي ترجعي السعودية ارجعي بنفسك .. أنا بأجلس هنا ..
وعوده بالسعودية إنه بيعوضني و إنه و إنه .. كلها ( كذب ) ..

كنت مشغولة بالدراسة ، بدأ يتعرف على السعوديين و يغيب عن البيت من النهار لحد الليل ..
قلت له فين كلامك و وعودك ، ولدك بأجيبه لك الشهر الجاي ؟
و فرصة نستغلها نجلس سوا أنا و إنت ..

طبعا خلاص ، دحين أنا صرت وحدة مشغولة بالدراسة .. و الملحقية تطالبني إني أكون مستمرة بالدراسة ..
الراتب بيد زوجي ( كان همي وقتها ، ولدي و بس يجيني بأي طريقة ) ، ولدي بالسعودية أهلي يصرفوا عليه
أنا كنت أعطي لأمي من راتبي اللي ينزل بالسعودية ألف ريال ،، و لحد ما هي من نفسها رفضت تاخد
لما جات و شافت الأوضاع عندنا كيف و حلفت ما أعطيها .. صحباتي تغربت عندهم و تفرقنا ..
(( زوجي استفرد بيا )) ..

و كل وقته مع أصحابه ..
إذا مرة تعبت بالأخير و بكييييييت .. جلس يراضيني و يهتم فيا ..
كان يساعدني بتنظيف البيت .. بس ما كان يدرس ..

المهم ..
أنا مرة نحفت وقتها ، و الراتب ما يبقى منه شي ..

صحبتي هذيك سألتني ، معقولة ما يبقى شي من الراتب ؟
قلت لها : ما أعرف ؟ زوجي من يوم تزوجته و هو مسرف ..

قالت لي :
معلييييييه .. هنا الفلوس تنصرف يا على ( خمر ، أو قمار ، أو حريم ) ..

.
.

زوجي قبل لا نسافر بريطانيا .. اشترطت عليه إنه لو بيلعب بلياردو برة ..
لو المكان فيه ( حريم ) .. ما يروح .. و قال لي طيب ..

وقت كنت أسأله ، كان يقول لي ( بلياردو إيش يجيب الحريم ) ..
بس الحقيقة اللي عرفتها بعدين .. إنه فيه صح حريم لإنه بلد مختلط ..
لكن وحدة تجي مع صاحبها مثلا و تلعب معاه أو تتفرج عليه يلعب ..

فكان زوجي يخبي علي إنه يروح يلعب بلياردو عشان ما أمنعه و أتضارب معاه ..

.
.

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

أعتذر عن الإطالة ،، بس أحس حالي مثل اللي بأشيل ( شاش ) تبع الجروح من فوق ( جرح ) ..
ما أندمل حتى الآن ..

فكل مرة أشيل شوي ، و أشعر بألم شديد .. أقوم أتوقف ..
لإنها تفكرني بأصعب أيام عشتها بحياتي ..

اللي عشته دحين مع الموقف اللي حصل ( و لاشي ) ..

.
.

فكل مرة ارجع أفتح شي ،. و بعد ما أكتبه هنا ..
أحس إنه الجرح بيتعرض ( للهواء ) و يبدأ يتخثر و يندمل تدريجياً ..

.
.

قبل شوي شفت رسائل زوجي على جوالي ..

فكرت مع نفسي و قلت ؟؟؟
لو زوجي يمثل ( الحب ) .. هل راح يمثّل سنوات ؟؟؟

من يوم الملكة و إلى الآن ، و رسائله لي بجوالي ..
لازم يكتب فيها ( كلمة تطيب الخاطر ) ..
حتى في عز الغضب ، لازم رسالته تكون فيها كلمة ( حبي ، أو قلبو ، أو ... )

.
.

إيش اللي يجبره ؟؟؟

.
.

حابة أكتب عن زوج صحبتي ، لإنه هو اللي ( قال كل شي عن زوجي بالغربة ) ..
و الكل يأكد كلامه .. لكن مافي أي أدلة أو ثوابت أو شهود ,,

.
.

محبة زوجي و رومانسيته اللي ببداية الحياة ( ما كنت أشعر بطعمها أبدا ) ..
لإنه كان جدا ناعم ، و خوااااااااف ، و جبان ، و ماله شخصية رجولية يمكن لإنه عاش وسط أخواته
و كان قريب من أمه و بعيد عن أبوه و أخوانه الكبار ما يحبهم لإنهم قاسيين ،،

ما كنت أحس بالأمان أو بالرجولة معاه ..

يعني مثلاً ..
أنا كنت اتصف بصفة ( النعومة ) مثلاً ..
يجي يقول لي ( إيش رايك بصوتي ؟ ناعم ؟؟؟ مغري ؟؟؟ )
يستخدم عطوراتي و كريماتي ، و مرة استخدم عدساتي و الماسكرا حقتي و يبغاني أتغزل فيه ..

واااااااااااااااااااااااااه .. كيف بالله راح أحب واحد زي كذا ؟؟؟

انشغلت بإني ( أبرز رجولته ) اللي كان دافنها ..
( حالياً عشان كذا بأقول إنه - تغيّر - تماما .. و عشان كذا هو يقول لي إنت اللي غيرتيني و ما أنساها لك )

أصحابه يدرسوا معاي بنفس الفصل ، و يكلموه عني و يجي يقول لي و هو يضحك ..
يقولوا له ( فينها فلانة ما جات اليوم ،، فلانة زوجتك اسمها مو معاي بنفس الكلاس ) ..
ينظروا لي بنظرات وقت أكون بالجامعة مع صحباتي ،، و زوجي ماخد كلامهم بحسن نية ..
و يتهمني إني غلطانة و إني أسيئ الظن ..

هو كان حاس بداخل قلبه إني ( صادقة ) ..
بس كان يخاف يواجه أصحابه أو يدافع عني ، لإنه كان يخاف من المواجهة ..

فما كنت أحس بحبه و لا حنانه و لا رومانسيته هذه .. و لا كلماته اللي مليانة أشعار و غزل ..

.
.

و كان يفشلني قدام الناس و الجيران ..

ياخد فلوسهم و ما يرجعها لهم ، و كل الرسايل اللي تجي على جواله ..
( دعاوي قوية عليه ، و على زوجته و ولده و بيته ) ..

كنت جالسة بالغربة متحملة بعد ولدي عني ،، عشان جالسة أربي - زوجي من جديد - ..
كيف أرمي مسئوليات عليه ، و هو ما يعرف .. و هو جاهل ..

أنا حاليا قربت مرة من أهله ..
زوجي معذور بطريقة تفكيره ،،

أمه تكذب على زوجها ، أخواته يكذبوا على أزواجهم ..
أخواته كل كلامهم عن الفلوس و عن الجوالات و حتى أمه .. و عن المصالح و الإستغلال ..

طيبين و كويسين ،، و خلاص كلنا صرنا عارفين و فاهمين بعض ..
بس التفكير و الأهداف مختلفة ..

ما أبغى أحط له ( مبررات ) ..
بس أنا لما نزلت السعودية و تقربت من أمي الله يرحمها و أخواني و أخواتي فترة ..
( بديت بدون ما أحس .. قلبي يقسى و لساني يصير جارح و غيره من طبايع ) ..

.
.

أرجع اكتب عن زوج صحبتي ( لإنه هو اللي عارف كل شي ) ..
و هو اللي نقل لنا كل شي ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

ليت أبو مريم الفاضل ،، يتواجد أيضاً ..

.
.

زوج صحبتي هذا ..

اللي يشوفه ، يقول ( مسكين ، غلبان ، و درويش و على نياته و يخاف الله ) .. و الكل يصدّقه ..
أنا كمان كنت أصدقه لولا إني بأذني سمعته يكذب يقول إني قلت كلام أنا ما قلته ..

و هو ( طيّب ) .. أنا ما أنكر .. بس زي الحريم يحب يقرقر كثير .. و يمشي تحت أمر زوجته ..
و زوجته لإنها صحبتي ، فهو قدامها يحترمني و يحترم حاله و يحترم زوجي .. لإنها ممكن تحرجه و تسكته

.
.

أول ما نزلنا بريطانيا ، جلسنا عندهم مؤقتا لحد ما نلاقي بيت .. و ما كنت أتكلم معاه ، و لا أرضى إني
أجلس معاه بسفرة وحدة .. كنت راسمة حدود لنفسي .. ما أضحك و لا أنكّت مع الرجال ..
و هو ما عجبه الشي هذا ..

عالأسابيع الأخيرة من جلوسنا عندهم .. صار كم موقف منه .. بس ما كان عندي مكان أروح اجلس فيه ..
و معاي ( زوج ) ما يعرف يعمل شي ..

المواقف اللي صارت :
*. صحبتي كانت تعبانة و عندها اختبار .. و ( أنا ما كنت أعرف أطبخ شي وقت سافرت بريطانيا و لا أغسل صحون
و لاشي ) و هي كل يوم تطبخ أو زوجها يطبخ .. بيوم من الأيام قلت لها روحي نامي إنت ، و قمت مسكت المطبخ ..
انحرجت منها و قلت أساعدها .. و دايما كنت أحاول أعمل اللي أقدر عليه، و لو أروح اشتري من برة و أخفف عنها ..

فجلست اغسل الصحون و القدور .. ( هناك الوجبة الأساسية كانت - العشاء - ) .. فالكل كان نايم و أولادها وو إلخ ..
و أنا بالمطبخ واقفة عند المغسلة أغسل و الباب ( رادته ) وو مع هدوء الليل .. حسيت بوجود حركة خفيفة عند باب المطبخ..
( و المطبخ خلاص كلهم عارفين إنه أنا و صحبتي نجلس فيه ، و الرجال ما يدخلوا فيه .. )

و الحمد لله لبسي كان ساتر ، بس ما كنت لابسة الطرحة و الطرحة معلقتها عند باب المطبخ .. زوجها كان واقف عند الباب
و يطااااااالع .. و أنا بأغسل الصحون،، حسيت بشي بس طنشت لإنه الكل نايم و زوجي كان برة ..
و بعد شوي ،، إلا حسيت كأنه فيه شخص واقف عند الباب و لمحت بطرف عيوني إنه فيه شخص واااااقف
بمكانه و يطالع .. لما حس إني حسيت بشي و توقفت بمكاني و أنا دايرة ظهري .. اختفى و راح لغرفته ..
( مو إنه عدى بالغلط ، و راح .. واحد جالس يراقب و واقف عند الباب ) و كل شي كنت أحكيه لزوجي
بس صرت أخذ حذري منه أكثر ..


*. الموقف التاني .. وصلني أنا و زوجي لمكان بسيارته ، و صحبتي كانت بالجامعة ..
و هو بالسيارة .. جلس يتريق و يسخر مني قدام زوجي .. و شوي و يشتمني ..
أنا ساكتة احتراما لصحبتي و لزوجي و ما أبغى أغلط عليه ،، أستنى زوجي يسكته أو يرد عليه .. و زوجي يضحك و يجامله

زوج صحبتي كان يتريق علي ، لإني ما كنت أرضى أكشف عليه أو أجلس معاه و أمزح معاه .. و لا كنت أكلم الرجال ..
جلس يسميني معقدة ، و يتريق على حجابي و ما ترك شي ما قاله عني .. و يتريق على خجلي بعدم الرد عالرجال ..
و هو صحيح دمه خفيف و جالس ينكت ،، بس كان كلامه ( جد ) مو مزح .. بس يضيف تعليقات ساخرة جدا ..
استغفر الله ،، كأنه كان يتريق عالدين ..

و زوجي وقتها جالس يضحك بس .. و أنا خلاص أغلي من داخلي .. متعودة أخواني يغاروا علينا و يدافعوا عننا ..

و زوج صحبتي لإنه زوجته تمشي كلامها عليه و هو قدامها يسكت و هي اللي تكلم الرجال ..
ففي الأخير خلاص غصب عني تكلمت و رديت و قلت له
( أنا وقت ما أسكت و ما أرد على الرجال .. لإني بأحترم وجود زوجي و احترم رجولته ،، مو لإني ما أعرف أتكلم ) ..

المهم ..
بس حبيت أوضح بعض المواقف من زوج صحبتي .. و إنه زوجي و سكوته و مجاملته له ..
خلت زوج صحبتي يتمادى و ما يعطي لزوجي اعتبار ..

و كنت بالمقابل أتخاصم مع زوجي بيني و بينه ،، و أعلمه و أقول ( دافع عني ، أنا زوجتك ، أنا و أنا .. )
و هو يتهمني إني ( سيئة الظن ) و إنه الرجال على نياته .. قلت له ( و الله ماحد على نياته غيرك إنت ) ..
الرجال نظراته لي ماهي طبيعية و إنت تضحك له .. بس سكوتي عشان بأحترم صحبتي اللي فتحت لي بيتها ..
و قمت كذبت نفسي و صدقت زوجي .. و قلت مسكين درويش ما يقصد ..


*. الموقف الثالث ..
زوجي بعد شهرين من وجودنا ببريطانيا و جلوسنا ببيتنا هناك ،، سافر للسعودية لشغلة ضرورية لمدة أقل من أسبوع ..
ماكنت أعرف أحد و مدينة غريبة و بيت لوحدي و جيران انجليز و سكرانيين ..

أمي قالت لي ( يا بنتي روحي اجلسي عند صحبتك فلانة ، هذه زي أختك ، و لا تجلسي لوحدك عشان أخاف عليك ) ..
رحت لبيت صحبتي ، و استقبلتني هي من محطة القطار .. بيننا و بينهم مسافة قصيرة مرة ..
من يوم ركبت سيارتهم ، و زوجها بدأ يتكلم كلام ( قلة أدب ) .. طبعا الكل يعذره لإنه على قولتهم - درويييييش - ..

قال لي وسط أولاده و زوجته و زوجته انحرجت و قالت له بالأخير ( سوووق و إنت ساكت ) ..
و أنا ما قلت و لا كلمة ، بس الدموع نازلة من عيوني ،،

قال لي ( هذا زوجك مو فالح بشي ، غير إنه ....... ) <--- كلمة مرة وسخة .. معناها علاقة .......

و يوم وصلت بيتهم ،، ما جلست أصلا غير يمكن 6 ساعات و بس .. ما قدرت أتحمل ..
بدل ما كان يناديني قبل ( أم فلان ) أو ( أستاذة فلانة ) .. صار يناديني من الغرفة التانية ( بإسمي حاف )
و يموووووون علي مرة .. و زوجته كانت تنحرج ..

و يبغاني اجلس و أكل معاهم ، مع إنه يدري إني ما أجلس مع الرجال بسفرة وحدة و لا أتكلم معاهم ..
بس زي اللي شاف زوجي ماهو فيه ، يعني راح أخد راحتي مثلا بغياب زوجي ؟

و أنا طول الوقت ، أفكر بطريقة أرجع خلاص لبيتي ،، و ما أسبب احراج لصحبتي مع زوجها ..
و أروح بكرامتي و لا أحد يزعل مني ..

كنت بالمطبخ مع صحبتي و جالسة عالكرسي و لابسة الطرحة - احتياط - و ظهري عالباب ..
زوجها دخل و واقف وراي و يتكلم معانا ، و أنا ساااااااااااااااكتة خلاص ما رديت ..

هي صحبتي هذه و التانية ، يكشفوا على أزواج بعض و عادي يتكلموا بحدود .. خاصة ببريطانيا ..

.
.

المهم ..

أنا كلمته الوصخة اللي قالها بالسيارة وسط أولاده و حرمته ، مرة حرقت لي قلبي ..

كلمت صحبتي قبل المغرب و ماجلست عندهم نص يوم ..
و قلت لها ،، معليه لازم أروح دحين لبيتي .. زوجي كلمني و قال بيوصل بكرة و لازم أرتب البيت قبل لا يجي و أعطره له ..
ما رضيت ، بس بالقوووووووة رضيت لي ،، و حست هي من وجهي إني متضايقة و وجهي مقلوب فما غصبتني اجلس ..

و رحت بيتي و جلست فيه .. و افتكر وقتها ..
كنت أول مرة امشي لوحدي بمحطة القطار و قبل غروب الشمس ، و أوصل بيتي بعد المغرب و امشي لحالي ..
و ابكييييييييييييييييي ، دموع بس تنزل ..

زوجي رجع تاني يوم ، و كنت طايرة من الفرحة ..
قدّم رحلته بالسعودية مجرد ما خلص الشغلة .. و شاف أمي و اهله و رجع بسرعة ..

بعد ما تغدينا بالمطعم و رجعنا البيت ،، حكيت له اللي حصل ..
و قلت له ( عشان لا تقول إني كنت أسيئ الظن ، الرجال ما يحبك و إنت اللي عطيته المجال إنه يتجرأ علي ..
لإنه ما لقي رجال يدافع عني و يخاف علي ) ..

*. الموقف الرابع ..
سبحان الله ،، و أنا بأقول لزوجي كذا و كنت فاتحة توي اللاب توب .. و الماسنجر ينفتح و ألاقي صحبتي أون لاين ..
و يدخل زوجها و يرد علي ، و أحسبها صحبتي بأطمنها إنه زوجي رجع بدري و قدم رحلته ..
طبعا طول عمره ماسنجرها ،، لو كان زوجها هو اللي جالس وقتها ،، ما يرد و يسكت أو يقول فلانة ماهي موجودة ..

المرة هذه ،، دخل و جلس يقول أهلاااااااااااااااااااااااااااااااااااا بفلانة ،، هاااااااااااااااه ... و يتكلم و يتريق و ينكت
و يموووووووووووووووون علي مرة .. و يقول ترى أنا أبو فلان .. و أنا ما رديت و لا بكلمة ..
و ما يدري زوجها إنه زوجي رجع ..

سكتت ،، و أعطيت اللاب توب لزوجي و قلت له ..
شوف و احكم إنت بنفسك .. لا تقول لي الرجال طيب و مادري إيش ..
ليش قدامك يعاملني بإحترام و من وراك يعاملني كأني صحبته ؟؟؟

يالله أنا زوجتك ، رد و تكلم ..

زوجي شاف الماسنجر و شايف هذاك ينكت و يحط نكت و يتريق و يالله يافلانة ،، تعالي و اطبخي لنا الطبخة الفلانية وو إلخ

قام زوجي استلمه ..
هذاك ما توقع إنه زوجي اللي ماعنده شخصيه و الخجول ، يطلع منه كذا ..
و زوجي ما ترك و لا خلى شي و ما خلاني أقرأ و لا كلمة .. قريت اللي بالبداية ..

.
.

من يومها ..
زوج صحبتي ما يكلمني و لا كلمة ..

.
.

زوجي أعرفه ، ينسى بسرعة و يسامح أي شخص يغلط عليه ..

زوجي رجع بعد فترة يتكلم مع زوج صحبتي عادي و يضحك معاه ..
بس هذاك كانت نظراته غريبة ..

.
.

كنت أشوف زوج صحبتي يطالع فينا نظرات غريبة ..
( نظرات غضب ، قهر ) ..

.
.

هل هو زعلان و مقهور من زوجي ؟
و لا زعلان ( علي ) ؟؟؟

الله أعلم ..

.
.

كنت أقول لزوجي ، الرجال يطالع نظرات غضب .. و قهر ..
زوجي يقول لي ( لا .. تتخيلي ) ..

.
.

بس هذا زوج صحبتي ..
و هذاك أخوي اللي تكلمت عنه ..
و هذيك صحبتي التانية ..

كلهم بالحكاية اللي حصلت ..
و الكلام اللي وصلني ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

زوجي ( كان ) مرة طيب و قلبه أبيض و نظيف ..
يحسب كل الناس ينظروا لي على إني أختهم ..

بس مثلا فيه واحد من أصحابه كان يدرس معاي و طول الوقت في الفصل يستناني أطالع فيه عشان يبتسم و ماكنت أطالع..
يلصق بالبنات و يمسك يدهم بطريقة تقشعر البدن .. و يخلي زوجته تلبس عباية سودا و هو ماخذ راحته بالمعهد ..

كان زوجي يستعير مثلا منه أي شي ،، و يرسل الشي هذا معاي تاني يوم عشان أسلمه لصاحبه هذا ..
كنت أقول لزوجي إنت أعطيه بنفسك ، لا تفتح المجال لأصحابك إنهم يكلموني بسبب أو بدون سبب ..
كان يقول لي ( عادي ، لا تسئي الظن و هو يحتاجها ضروري بكرة الصبح ) ..

كنا واقفين برة الكلاس ،، الشباب السعوديين كلهم الصراحة محترمين كانوا .. واقفين مع بعض
و أنا كنت أجي و أوقف بعييييد و أستنى الطلاب يدخلوا كلهم ،، بعدين اختار كرسي على الطرف و أحط شنطتي بالكرسي
التاني ،، إذا جات وحدة أجنبية ،، أنزل شنطتي عشان تجلس جنبي ..

المهم ..
و نحن واقفين برة الكلاس .. يجي صاحب زوجي ، و يلصق جنبي و يقول ( هاه يا فلانة ،، جبتي الفلاش ميموري حقتي ؟؟ )
قلت له ( ايوة )
يقول لي ( بعد الكلاس أخده منك )
و أرد عليه ( إن شاء الله )

بعد ما الأستاذة تخرج من الكلاس ..
يجي عندي و يقول ( يالله يالله بسرررعة .. طلعي اللي عندك )
و يجلس يضحك و يتريق .. حتى الشباب استغربوا منه ؟ مرة شايل كل الحواجز بيني و بينه ؟

أعطيته الفلاش و مشيت ..

رحنا الكلاس التاني ،، كان عندنا بريزينتيشن ..
البنات العربيات كلهم جالسين جنب بعض ،، جلست جنب آخر وحدة .. و كل الكراسي فاااااااضية ..

دخلوا الشباب السعوديين كلهم ، و بالعادة يجلسوا هما مقابلنا و بالنص الأجانب يجلسوا ..

فعن يميني كانوا العربيات جالسين ، المصرية ، الليبية ,, إلخ .. و عن يساري الكراسي كلها فاضية
جاء هذاك صاحب زوجي و ما جلس جنب أصحابه ، و جاب كرسي و حطه جنبي ( لاصق مرة ) ما يحتاج أشرح ..
و جلس يتكلم و يهرج و يسألني أسئلة خاصة و شخصية .. و أرد كلمتين و رد غطاها ..
و ماقدرت أغير مكاني لإنه الأستاذة بدأت العرض و قمت بعدت نفسي و حركت الكرسي بس مافي مكان عن يميني ..

خلص البريزينتيشن .. و خرج من القاعة و جلس يستناني برة ..
خرجت بعد ما لميت أغراضي ، و شفته واقف ..
جلس يقول لي ( زوجك ايش ناقصه ؟ انتبهي له ) ..
و يالله خلينا نشوفك ،..

و أصحابه يستنوه و ينادوه ..
طبعا الشباب أغلبهم متزوجين كانوا و موظفين بالدولة و محترمين ..

بس هذا ( مصدّق حاله كان ) ..
و شكله شاف زوجي على نياته ، كل ما قال لزوجي ( فينها زوجتك فلانة )
زوجي ضحك و رد عليه عادي ..


و مرة زوجي دق عليه ، و هو ما رد كان نايم ..
جاء يسألني و أنا واقفة مع البنات و ناداني.. قال لي زوجك دق علي و ما شفت اتصاله ..
إيش كان يبغى ؟؟؟ قلت له ( ما أدري ، دق عليه و أسأله )


.
.

ما أعرف ؟؟؟

المهم ،، حكيت لزوجي كل اللي صار ..
و راح زوجي تضارب مع صاحبه و من يومها قاطعوا بعض ..
و قال له ( لو شفت زوجتي بيوم ،، و قلت لها بس - السلام عليكم - .. و الله يكون اخر يوم بحياتك ) ..
و من يومها ما عاد يطالع و الطريق اللي امشي منه ، ما يمشي هو منه ..

و ماعاد أحد يكلمني من أصحاب زوجي ..

.
.

حاليا جالسة أفكر ؟؟؟

هل زوجي انقهر عشان الرجال أخذ راحته مرة ؟؟؟
و لا عشان الرجال كان بيحذرني من شي ؟؟؟

بس زوجي من يومها ..
تعلم يدافع عني و ما يضحك إذا أحد اتريق علي قدامه من الرجال .. و حط حدّ للكل ..
و صار يحس إني ( شيئ ملكه هو .. و هو اللي المفروض يدافع عني و يقاتل عشاني ) ..

.
.

لا أحد يقول إني أعطيت المجال لأي أحد ..

الحمد لله كنت محترمة حالي و ما أكلم و لا أضحك مع أي رجال ..
و لبسي ساتر و محترم ..

******************************

طبعا أخوي وقتها جا عندنا ، و كان يدرس بنفس جامعة زوجي .. و أصحابهم تقريبا مشتركين ..
يعني لو الكلام اللي قاله - زوج صحبتي - صحيح ؟؟؟

كان وصل لأخوي ؟؟؟
صح و لا أنا غلطانة ؟؟؟

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

المهم ..

جملة صاحبه ..

( زوجك إيش ناقصه ؟؟؟ و انتبهي له و اهتمي فيه ) ..
جلست براسي ..

و ردة فعل زوجي ،، و غضبه الشديد وقتها ؟؟؟
و راح بيتضارب معاه ، و ماتوقعت ردة فعله ..
متعودة إنه ( يضحك و يطنش ) ..

.
.

ما أعرف ؟ الشيطان بدأ يوسوس لي دحين ؟؟؟
هل كان بيحذرني من شي وقتها و أنا عيوني مغمضة ؟؟؟

و لا زوجي انقهر ؟؟؟

.
.

لإني استفزيت زوجي وقتها ..
و قلت له ( خلاص .. صاحبك فلان صار صاحبي من اليوم )

قال لي ( ليش ؟ )

و قلت له اللي صار بالمعهد بعد ما أعطيت له الفلاش ميموري ..
لإني من أول حذرت زوجي ، لا يفتح المجال لأصحابه إنهم يتكلموا معاي ..
و هو يتعامل معاهم بنفسه .. و كان يقول لي ( لأ ،، إنت تسئي الظن ) ..
كنت أقول له ( أعرف أفرق بين الشخص المحترم و الغير محترم ) ..

فالموقف هذا ، كنت بأثبت له صحة كلامي ..
و إنه مو كل الناس ( مثله ) ..

أو ( مثل ما كنت متخيلة زوجي ؟؟؟ و راسمة له صورة )

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

أول سنة لنا بالغربة ، زوجي كان مثل ما قلت .. لأبعد مدى يحاول يسعدني و يراضيني ..
بس كانت الفلوس تخلص بيده بسرعة ،، و كنت أوفّر كل مرة على أمل أجيب ولدي ..
و هو يصرف من هنا و يدلع حاله و ما يبخل على نفسه ..

و نسي وعوده لي بالسعودية إنه بيعوضني عن كل وقفاتي معاه بالسعودية و ببداية الحياة ..
و عرفت وقتها ، إني ما انتظر منه شي .. و إنه مجرد ما تجي الفلوس بيده .. بيتنكر لي ..

بعد ما جبت ولدي و شغالتي ( جبتهم من الفلوس اللي كنت أجمعه من راتبي بالسعودية ) ..
زوجي اشترط إنه ماله دخل بولده و بهدلني عشان أجيب ولدي ..

أنام كنت كل يوم و أحلم إنه ولدي قدامي و أجي أبغى أحضنه ، و يجي أحد و ياخده و يبعده عني ..
و أقوم مفجوعة و أبكيييييييييي .. يجلس زوجي يحضني و يطمني إنه الشهر الجاي يجيبه و أصدقه ..
بس كان يكذب علي و يمشيني بكلمتين ..

.
.

أعلنت التمرّد وقتها .. و بديت أصحى على حالي

صرت أنا اللي أخد قرارات ( و تتنفذ ) غصب عنه ..
صرت أنا اللي ( أفكر و أخطط ) بعد كذا ، أخدت بطاقة الصراف منه و صارت مشاكل مالها نهاية ,,
حجزت و نزلت السعودية و طننننننشت الملحقية و المشرفين و الجامعة و زوجي و كل الدنيا ..

قلت لزوجي ، ما أبغى ( بعثة ) ،، ما أبغى ( وظيفة ) ،، ما أبغى ( أدرس ) ..
أبغى ( ولدي ) و بسسسسسسس .. و اعملوا اللي تبغوا تعملوه ..

و لا دخلت اختبار اللغة .. و قلت لهم ( بحريييييييقة ) كلكم ..

.
.

(( أبغى أوصّل .. إني ما كنت من البداية متمردة .. هو زوجي اللي ما يستاهل و لا يستحق اللي يثق فيه
و لا ينفع إني أكون مطيعة له .. لإنه يستغل ثقة الإنسان لمصالحه الشخصية .. ))

لو ما عملت كذا ، ما كان جاب ولدي أبداااااااااااااااااااااااااااااا ..

.
.

لإنه من يومها بدأ زوجي ( يتغير ) ..

و صار يسهر بكثرة و تعامله معاي تغير ، و صار يكره الجلوس بالبيت ..
ما كأنه ( ولده ) .. و لحد اليوم ما يحب ولده الكبير ..

عشان كذا الصغير كنت دايم أقربه من أبوه ، أو اترك أبوه مرات معاه و اطلب منه يساعدني فيه ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

الفاضل / أبو مريم ..

جزاكم الله كل خير ..
اعتذر لأني أطلت بالكلام ..

لكن كلها ملفات تتفتح كل مرة و ماهي راضية تتقفل ..
غصب عني ..

مؤثرة على حياتي ..
لإنها كانت نقطة التغيير بحياتي ..

و أقسمت وقتها لنفسي ( إني بأنتقم ) مجرد ما أخلص دراستي و أرجع للسعودية و استلم شهادتي ..

صرت أخاف على حياتي ( من نفسي ) مو من زوجي ..

رد : أبو حكيم. البليغ. خالد بوووس. المتفائل بالله. نورة. فاكهة الشتاء. بيتا
 

بدأ يسهر بكثرة و كل مرة يقول مع أصحابي ،،
كان متعرف على ( صاحب .. زوج صحبتي ) .. و واحد تاني معاهم ..
هما أكثر شي مع بعض .. و زوج صحبتي مرات قليلة يكون معاهم ..

أخوي قال لي ( زوجك ترى ما بيداوم في الجامعة أبدا و يغيب بكثرة ) ..
و زوجي يقول ( أخوك كذاب ،، إلا أداوم و هو إيش يدريه ؟؟؟ )

.
.

احترت أصدق مين و أكذب مين ؟؟؟

راجعة ..

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

الي يقولوا انت السبب اخدتي زوجك للغربة وانت تعرفي عيوبه

عيوبه تكشفت لما عشنا لوحدنا بالغربة
كنت أشوفه ملاك ومستحيل يكذب

من ايام الملكة وهو يقول لي متى نسافر برة ونعيش لوحدنا سوا
كنت اقوله ترى بدري لسى و لاتفكر

كان يقول طفشان من اهلي وابغى انا وانت نروح بعيد

بداية الزواج ما أثث البيت بحجة البعثة مع اني ماقلتله لسى باسافر
بس هو خلاها حجة

تركنا الشقة بعد ستة أشهر
جلسنا في بيت اهلي شهرين
بعدين جلسنا في شقة مفروشة شهرين
وهو يقولي ياللا خلصي اوراق البعثة عشان نسافر
و انا ماقلتله لسى انه الاوراق بتخلص و لا لا ؟

استاجرت شقة على حسابي لمدة ست اشهر بسبب المرمطة هذه
بعت ذهباتي وعطيتها لزوجي عشان كذب علي وقال مديون
دخلوه السجن بسبب مخالفات متراكمة قبل الزواج مرورية
و ماحد وقف معاه و امه قالت هذا زوجك مالنا دخل فيه
و دفعتها له

انطرد من المسجد قبل لانسافر باربعة اشهر بسبب اهماله
ماكان يروح يصليبالمسجد و شغله التاني انطرد منه برضو بسبب غياباته

اهله كانوا مضايقيني
وهو عاطل و راتبه يعطيه لأبوه
و بيت و مو قادر زوجي يفتح بيت
و ماطلع امام ولاشي

و هو يوعدني انها بس فترة لحد مانسافر برة ونصنع حياتنا من جديد

انه حيكمل دراسته و انه حيلاقي شغل
و انه حنربي الولد مع بعض
و يعوضني عن الايام هذه

.
.

وانا بالحياة لا انا المغرورة ولا المتكبرة

لكن انا طريقتي بارسال رسائل ايجابية لنفسي
اني اعطي لنفسي كلمات تدفعني حتى اكون ايجابية قدر المستطاع
عشان ما أسمح لأي شخص يكسرني

اي انثى بحاجة لانسان تحس بالامان معاه
انا مستعدة أعيش لوحدي
عشان كذا لازم اكون واقفة على رجولي
وما اسمح لاي شخص يهز ثثقتي بنفسي

و فرق بين الثقة و الغرور

.
.

انا كنت بالغربة لوحدي و تلقيت صدمات
كانت بتنهي حياتي
كنت وحدة مالي سلاح غير البكا و زوجي لما شافني تعلقت فيه
و مالي احد غيره.. شاف حاله

عشان كذا.. حاليا لازم اكون كذا

لانه حطمني هو واهله

بس تعلمت اوقف على رجولي بنفسي

انا ماني متكبرة مثل ماوصفت وحدة هناك

و الناس الي قلت عيوبهم مين هما ؟
زوج صحبتي ؟
بالمقابل كتبت صفاته

واخوي لانه طرف بالموضوع
باكتب الصفات الي يتصف بها
مثلا اخوي كريم جدا.. لو كتبت هذه الصفة
ايش تستفيدوا ؟

انا ماذكرت عيوب الناس ومدحت بحالي
انا باكتب كل اللي لي و اللي علي
و باختصر قدر المستطاع عشان اوصل للشي الي دمرني

حاليا بنيت نفسي من الحطام بنفسي
يحق لي أفتخر بنفسي مع نفسي

.
.

رضيت بالبداية يا عزيزتي بيتا بفقره و شفتي كيف وقفت معاه و لاكنت اطلب شي كم سنة

بس لما اكتشف انه خدعني لما جا تزوجني و اوهمني انه شيخ و بلسانه اعترف انه كان لازم يعمل
كذا عشان نتزوج

وبعدين نسافر برة و كل فلوسه هناك من الراتب الي يستلمه بدل مايصرفه عالبيت و يجمع شوي
يروح يصرفه على نفسه و اصحابه

طبيعي راح اخد موقف و اقول له لحد هنا و كفاية
و ارسم خطط جديدة لحياتنا

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

ما شوف فيك صفة تكبر حبيبتي

صحيح في شي مو صحيح بشخصيتك بتعامك م زوجك لكن هذا نتيجة طبيعة شخصية زوجك وظروف زواجكم

وكل شيء ممكن اصلاح سواء عند زوجك أو عندك

وقت زواجكم كانت شخصيتك شخصية ناضجة ومسؤوله وشخصية زوجك شخية مراهق سافروا أهله وظل بحاله بالبيت ومعاه المصروف

لكن شخصيته هذه تغيرت بعض الشيء الان وانتِ كنثى تعبتِ من أداء دور مولك .. فلا تتضايقي من الردود .. اللي متابعينك فاهمين ..

كملي ونتظر الحدث نفسه وان شاء الله نحلل معك حتى ترتاح نفسك وتهدى .. خاصة بوجود الأخ الفاضل بو حكيم وتحليله المفصل المحكم

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

اعتذر تأخرت ما أعرف أرد من الجوال خاصة بالموضوع هذا ، لإني اكتب فيه
و أحس أصابعي تمشي فيه بدون إرادة مني ..

- زوجي أول سنة و نص و قبل لا يجي ولدي ( كانت علاقتنا كالعرسان ) و ما يحتاج أشرح ..
لإنه الموضوع هذا له علاقة بالكلام اللي جاني .. و الزوجة تشعر مثل ما يقولوا ..
كنت أجمع فلوسي بالسعودية عشان احجز تذاكر و أنزل أجلس مع ولدي بالإجازات القصيرة اللي مدتها أسبوع أو عشرة أيام
كل بعد شهرين أو 3 أشهر ..

- زوجي يصرف راتبي و راتبه و يقول فواتير و يكذب .. و يجلس طول اليوم مع أصحابه و ما يروح المعهد ..
يرجع متأخر ، يصرف فلوسه على مطاعم و أكل مع أصحابه و بلياردوا .. ما كان يقول لي طبعا ..
و كان ينزل عند زوج صحبتي مرات بالنادر .. و تعرف على صاحب زوج صحبتي ..

بدأوا صحباتي يتدخلوا بالموضوع ، لما شافوني ( ضعفت مرررررة .. و مو أنا اللي يعرفوها ) ..
سألوني الراتب فين بيروح ؟ ليش ما تجيبي ولدك و تحطيه بحضانة قدام عيونك ؟
إنت ماعندك قلب و إنت أم قاسية ووو إلخ ..

قلت لهم ما أعرف فين تنصرف الفلوس ؟ زوجي يقول عالفواتير بس كلها تخلص بأسبوع أو اسبوعين ..

صحبتي اللي فرق العمر بيني و بينها 15 ..
قالت لي معليييييه .. لازم تعرفي زوجك فين بيصرف الفلوس ؟؟؟
ما ركزت بكلامها ، لإني أعرف لو سألت زوجي بنتخاصم و يقول لي ما توثقي فيا ..؟؟؟

.
.

كان كل ما زعلت عشان ما أشوفه طول اليوم ، و لا بيدرس و لاشي ؟؟؟
صار يقول لي ( ارجعي السعودية لو تبغي .. أنا بأجلس هنا )
يهدد مرات إنه ما راح يجيب ولدي ( طبعا لازم موافقته )

صرت بس أبغاه يجيب ولدي بأي طريقة ..

المهم ..
ولدي جبته مع الشغالة ،، في خلال الست أشهر هذيك ..

طلع عيوني زوجي ، بدأ يسهر لحد الفجر شبه يومياً .. ما يروح لجامعته ..
سرق ألفين ريال من حسابي السعودي و اتهم الشغالة إنها حرامية ، و قال لي اخصمي من راتبها وقت ما تسافر ..
أمي دقت علي و قالت لي ، إذا مانت متأكدة إنها الشغالة اللي سرقته .. خلاص سامحيها عشان ربنا ..
قالت لي أمي و لو هي سرقته ، اعتبريه صدقة بس لا تخصمي من راتبها ..

طبعا عرفت إنه زوجي ، لإني طلبت طباعة كشف الحساب و عرفت مكائن الصرف من فين انصرفت و بأية وقت ..
و زوجي يعرف الرقم السري ..

مو مشكلة الموضوع هذا ،، تويي اللي تأكدت إنه هو .. و لا كنت شاكة قبل بينه و بين الشغالة و ماتوقعتها منه ..
المهم ..

اشترى سيارة و صار يروح يتمشى مع أصحابه و يروح لمدينة تانية و يرجع نفس اليوم ..
و ماله دخل بولده ..

فلوسه ما يجمعها أبدا .. كلمته و قلت له ( ماني مستعدة أتبهدل بالسعودية إذا رجعنا )
كان يقول ( لا تشيلي هم ، أنا المسئول ) ..

يتأخر و يسهر و ماله دخل بأي شي بالبيت و لا بالمصاريف ..
أجبرته يعطيني مبلغ معين كل شهر من راتبه ، بدأ يعطيني ..

بديت أجبره إنه يتحمل مسئوليات خفيفة ، يجيب من البقالة كم غرض و زي كذا بالتدريج ..

بعد ما تأكد إنه ألتحق للبعثة ، بدأ يقول لي ( تبغي ترجعي ارجعي ، ماهمني .. أنا بأعيش هنا )
بدأ لسانه يطول و أخلاقه تخرب .. و لا يدري عننا ..

من يوم جاء ولدي و هو كذا .. لحد دحين و هو ما يحب ولده ..
نقلنا من بيتنا ، و حملته مسئوليات أكبر لما شفته يصرف هنا و هناك و سيارة وووو إلخ
طبعا التغيير ما يصير بين يوم و ليلة .. نقاشات و بكا و زعل ووو ..

المهم ..
بدأت صحبتي تقول لي ( خلي عينك مفتحة على زوجك ) ..
و التانية تلمح لأشياء ..؟؟؟
بس ساكتين .. خايفين و ما يبغوا يخربوا بيتي ..

زوجي متغير معاي .. مشغول بأصحابه .. و مثل الفترة هذه دحين اللي تغير فيها ..
كان يقول لي ( على بالك اجلس معاك طول الوقت ؟ )
كنت أقول له لا يسهر كل يوم ..

اتفقنا بس يوم الجمعة يسهر مع أصحابه ..
( مثل ما قلت .. اتفاقاتنا تجي بعد حروب نفسية و محاولات و حرب أعصاب )

.
.

بيوم من الأيام .. تركنا و غاب يومين مقفل جواله و جالس بالبلياردو يلعب ..
و لا سأل عننا و نحن بالغربة لوحدنا .. و الفلوس خلاص تجيه كل شهر و يصرف مو بحاجة لأحد ..

.
.

صحبتي دقت علي ، و قالت لي :
إنت معقولة ما عمرك حاولتي تفتشي جيوبه ، تلاقي أي شي مثلا ؟
قلت لها مثل إيش ؟
قالت مثلا عناوين كابريهات ؟ أو فواتير شي و أماكن غريبة ؟

قلت لها ما أعرف ؟
الشغالة تغسل الملابس .. بس ما عمري شفت أنا ..

قالت :
طيب معقولة ما عمرك شميتي ريحة كذا و لا كذا .. و لا رجع دايخ أو أي شي ؟
قلت لها :
لأ .. ما عمره جاء كذا ..

قالت لي :
ترى اللي يشرب ما يبين عليه .. فيه ناس يشربوا شي خفيف و يبان إنهم نشيطين و يضحكوا و مبسوطين ؟
قلت لها :
ما فهمت .. بس زوجي و أعرفه ..
صح يكذب ، صح مسرف ،.. لكن ما يقرب للكباير لا سمح الله ..
و سكتتها و ما خليتها تكمل ..

.
.

قالت لي
الفلوس تنصرف هنا بثلاثة أشياء ، يا قمار ، يا شراب ، يا حريم ..

.
.

طيب أخويا كان يدرس مع زوجي بس مو بنفس الكلاس ..
بس نفس الجامعة ؟؟؟

و أخوي هذا بالذات ( ما يطيق زوجي و يكره ، و يدور زلات على زوجي من زمان ، و شكاك مثل ما قلت و ذكي مرة ) ؟؟؟
يعني كان عالأقل وصل له خبر من الأولاد بالمعهد ؟؟؟

ما أعرف ، أنا كذا فكرت وقتها ..

.
.

بعد كم يوم ..

لما غاب زوجي يومين و مقفل جواله ..
و صار يقول ( أنا مبتعث دحين و أقدر افصل بعثتي عنك و اجلس هنا على طول )

حسيت بتلميحات من صحباتي ..
فييييه شي يخبوه و ما يبغووا يقولولي ..

و أخوي يقول زوجك ما يروح الجامعة ..
و زوجي يقول أخوك كذاب ..

و طلع زوجي الكذاب ..

.
.

ماحد بيتكلم ..

في الأخير قلت ، صحباتي واصل لهم خبر من ( زوج صحبتي ) لإنه يعرف أصحاب زوجي و مرات يتقابلوا ..
قلت مافي غير ( زوج صحبتي ) يقول لي ( إيش الحكاية اللي كلهم مخبينها علي .؟ و زوجي فينه مختفي يومين ؟ )

.
.

ملاحظة /
علاقته الفترة هذيك اللي تغير فيها ، كانت شبه روتينية و كان مرة منزعج من تحمله للمسئوليات
و من وجود الولد بحياتنا ..

نفس الشي و نفس الحالة تصيبه دحين ، وقت يكونوا الأولاد صاحيين ..
بس لما أجلس لوحدي معاه ، يرجع مثل ما كان كويس ..

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

كثر التلميح .. و زوجي متغييييير ..

دقيت على زوج صحبتي ،، قلت له :
( أسألك بالله تجاوبني ، أنا زي وحدة من أخواتك أو بناتك )
إيش الشي اللي زوجتك و فلانة صحبتنا يعرفوه عن زوجي ،، و يخبوه عني ؟
ليش يلمحوا كل شوي من فترة لفترة ؟؟؟

.
.

قال لي :
شوفي .. أنا و الله دايما لما كنت أشوفك ، كنت أحزن عليك و أقول مسكينة و الله ما تستاهل اللي يصير لها
كنت أكلم زوجتي و كانت تقول لاتتدخل و تخرب بيتهم ..

بس إنت بنت حلال و حرام اللي يعمله زوجك فيك ،، بكرة يجيك مرض لا سمح الله و أنا تحمل ذنبك ؟


.
.

قلت له :
ما فهمت كيف يعني ؟؟؟

.
.

قال لي :
إنت ما عمرك بحياتك شفتي زوجك داخل البيت دايخ و مدروخ ؟

قلت له :
لا .. عادي و طبيعي يكون و وقت ما أدق عليه .. يرد علي بسرعة عالجوال ؟؟؟

.
.

قال لي :
زوجك و الله بيشرب الخمر ..

قلت له :
إييييه .. كيف ؟؟؟
و كييييف ما حسيت ؟؟؟
متأكد إنت ؟؟؟

قال لي :
إيوة متأكد ..
قدام عيني شرب ..

.
.

قلت له :
كيف ما حسيت ؟

يقول لي :
و الله مو شرط يبان ..

.
.

المهم ..
كمل كلامه و قال ،، زوجك يروح أماكن الله العالم إيش هي ..

قلت له كيف يعني ؟؟؟

قال يعني بارات و خمر و حريم ..

قلت له :
فلان ؟؟؟؟؟؟؟ و الدموع خلاص انفجرت من عيوني مو مصدقة أبدا ..

قال لي :
إيوة و الله ، الله يعينك ..

قلت له :
يعني بيوت دعارة ؟

قال لي :
ايوة .. و أكثر كمان ..

قلت له :
يعني ينام مع حريم ؟؟؟

قال لي :
ايوة عاد حبيت احذرك منه ، لا يجيك بيوم مرض منه ..
و إنت الله يهديك ، كلهم يخبوا عليك و ما يقولوا لك من زمان ..

لإنك تدافعي عن زوجك دايما و ما تخلي أحد يتكلم عنه .. بس هو مو عارف قيمتك ..
حتى لما أقول له ( زوجتك سألت زوجتي عنك ) يقول لي ( فكني يا شيخ منها )

إنت المشكلة ما تصدقي أي شي ينقال عن زوجك ، و عيونك مغمضة و يضحك عليك ..
مسكينة .. تحسبي إنه مافي رجال في الدنيا غير زوجك و بس .. و ما تشوفي غيره ؟
و يااااااااااااااااااا ويله اللي يتكلم عنه قدامك .. عشان كذا كلهم ساكتين من زمان ..

.
.

قلت له :
إنت شفت بعيونك الشي هذا ؟ ( أقصد الحريم )

قال :
و الله الصراحة ما شفت ، بس يقولواااا ..

قلت له :
مين اللي يقولوا ؟

رفض يقول لي ..

.
.

قلت له :
و من متى ؟

قال لي :
من يوم جيتوا بريطانيا ..
كان يجي بسيارته البيضا .. و يروح هذه الأماكن ..

.
.

بالصدفة كان نفس الوقت أخوي جاء يزورني البيت ..
و الشغالة فتحت له الباب ،، و أنا أتكلم بالجوال ..

خرجت من غرفتي و الدمووووووووووووووع ..
خلاص ما عاد فيه أحد أثق فيه ( غير أخوي اللي من لحمي و دمي ) ..
هو انفجع مني و قال لي ( إيش بك ؟ )

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

و قال زوج صحبتي ، زوجك هو اللي يسحب الباقيين معاه و يخرب أصحابه ..

.
.

صحبتي قالت لي :
ايوة عارفين من ست أشهر بس ساكتين عشان ما نخرب بيتك ؟

قلت لها :
شفتوا بعيونكم ؟

قالت :
لأ .. بس سمعنا ..

سألتها من مين ؟

قالت واحد و بس هو اللي قال لنا ..

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

جاتني صدمة قوييييييييييييييييييية .. كنت أثق بزوجي أكثر من أي شخص اخر بالدنيا ..
كانوا يقولولي كذاب و ما أصدق .. كنت أشوفه ملاك ..

عملت أشياء جنونية ..
قلت له كل شي ..

صار يهديني ،، و بعدين أنكر ..
بس عمره ما اعترف بشي ..

.
.

من قوة الصدمة باالفترة هذيك .. جلست فترة طويلة مرة لحد ما أنسى ..
و ما دخلت الإختبارات النهائية بالجامعة .. دخلت بس كذا و أنا مسرحة و أسلم الورقة فاضية ..

كان خلاص كل شي بيتدمر ..

بعثتي ، و عملي و كل شي ..
ما صرت أقدر أفكر .. كنت بس أبكي و أصيييييييح ..

أنفي الله يعزكم ، صار ينزف دم من جوة ..
و أعصابي و يديني صار فيها زي الشددددد .. ما أقدر أحرك يدي من قوة الأعصاب ..

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

صح حاولت أتصرف و أتأكد من الخبر ..

بأكتب إيش عملت و كيف تصرفت ..

بالبداية كنت مصدقة الكلام لإنه زوجي زمان ما كان يحكي لي أي شي أبداااااااااااااااااااااااااااااا و لا أعرف أي شي عنه ،،
طبعا ما كنت لسى ( أعرف إنه فيه ناس نفوسهم غير صافية ) أو افترض افتراضات و غيره ..
كنت أحسب كل الناس ( طيبين ) .. لحد ما تعلمت من الغربة و اندقيت على راسي مليون مرة ..

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

ذكريات

بأستمر هنا..
لكن هناك الاعضاء هما يعلقوا على كلامي هنا
و انا كتبت هنا لاني مابغى الي اكتبه يكون للاخذ والعطا

لاني بأقفل عالسيرة هذه نهائيا
ومابغى احد يناقشني باللي اكتبه هنا غير المذكورة اساميهم

لاني ماصرت افرق بين العدو والصديق
بعد ما اهتزت صورة زوجي

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

منتظراك حبيبتي ..

رد : أبو حكيم. البليغ. خالدبوس.المتفائل بالله. نورة. فاكهة الشتاء. بيتا.ابو
 

السنة هذيك انصدمت بعيوب زوجي و باكاذيبه علي و كل شي
من فترة الملكة مو من السنة هذيك

استغل حبي و ثقتي فيه و طيبتي و كل شي
وقتها انا بنفسي تغيرت و عرفت اني كنت عايشة بعالم خيالي و مثالي
و نزلت للعالم الواقعي و تعلمت كيف اكون انا ( ملكة نفسي )

المشكلة اني وقتها ارتبطت فيه عاطفيا لاشعوريا
ماحبيته صح ايام الملكة.. بس جاهدت نفسي عشان احبه
لحد ماوصلت لمرحلة اني حبيته

قبل الصدمة هذه كنت استشرت الصائمة لله و علمتني كيف أحبه
و كيف كيف و كيف
وكنت اسعى لاصلاح حياتنا و كنت ادلعه و اهتم فيه
لكن هو الفلوس بدأت تجيه بسهولة من راتب الملحقية
و بدأ يهملني و يشوف حاله و يطنشني و غيره

بعد الصدمة هذه.. انا خلاص بديت اصحى
سواء الكلام الي انقال صح او غلط
بس كنت كأني اعيش مع طفل و طايش ومخادع وووو الخ

المهم