|
معي حق ارفضه. ولا ؛لا.
السلام عليكم ورحمة الله وبركاته.
مساء الخير والرضا من رب رحيم. قررت أخبركم بالعرض الله عارضه الوالد علي (يأني مقهورة ). وشاقة بسمة غضب ؛ الموضوع الوالد دايم يمدح واحد هو على قولته ساعده ووقف بجنبه وطلعه على الدنيا. ( وعشان أجاريه اي ماشاء الله الله يوفقه ). وطالب منه ياعمي زوجني " طبعاً ماتجرأ وطلب منه الا انه يمدحه وانت طموح ووووو. الزبدة بالموضوع الوالد جاني وقال : عندي لك واحد وانا الي اخترته تثقين بي ولا لا. ؟! بس عمره 22 والباقي مايهم. ؛ أخذت الموضوع بمزحه ) عصب مني قال ؛: انتي انتبهي نفسك وخوذي الموضوع بجد. أنا رديت لأبوي بوقته لا تجيب لي طارئ واحد صغير عارف كم بيني وبينه ولا تخليني مضحكة للي مايسوي. يبي يقنعني انت بس ماشاء الله مؤ بين عليك قالت أمي اي كثير يقولون تدرس ؟! على بالهم تمشي علي تزليق. فوق العمر ياعالم مافيه اي تكافؤ أبداً ؛ دراسة مامعه شهادة ولا شي ؛ الوالد عاجبه عشان يمشيه على كيفه مصلحته عند الوالد أكيد بيسمع له ولا يطلع من شوره. اعتبروها فضفضة قهر اخر عمري أخذ بزر ؛ منقهرة من نظرت الوالد لي يعني هذا همه أتزوج وبس " وين الي كان يقول الثقافة والمستوى الي مدري ايش " يعني خلاص يقرر مصيري ؛ الحمدلله انه الارزاق بيده ماهي بيد خلقه. الحين بالله عليكم ماهو معي حق ارفضه ؟! |
رد : معي حق ارفضه. ولا ؛لا.
لك الحق الرفض بما انو اصغر منك ومجرد مدح لااكثر ... لك الحق الرفض ومو من حق اي احد حتى لو الوالدين الله يحفظهم لكي هما عليهم التوجيه والنصح وليس اجبارا على ما لاتردينه وبعدين كم عمرك وفقك الله لكل خير واعطاكي الله ماتتمنين اللهم آمييييييييييين |
رد : معي حق ارفضه. ولا ؛لا.
بصراحه ياختي عمر 22 كثير تزوجوا من جماعتي بذا العمر وبعد سنه او سنتين طلق قال وقتها كنت صغير وماخترت زين <<امحق مخ
بذا السن من جد مايصلح انه يفتح بيت بعد وكمان ماعنده شهاده يعني مخه بيجيك متحجر شوي هذا وش تبين فيه الى اذا ودك تربين صغار لا لا مانصحك ابدا البزوره بزوره حتى بالزواج استغفر الله بس وانتي فكري هل ابوك دايم تكون قرارته صائبه ؟ او لا |
رد : معي حق ارفضه. ولا ؛لا.
أنا 25 سنة
وزوجي 23 سنة صغر سنه اذا عنده أخلاق راح يكون له مميزات منها تشكله مع الزمن على ما تحبين طبعا له عيوب بس مادام الرجل شاري فمافي مشكلة برايي اسالي زين عنه ولو ارتحتي له وشلتي من راسك انه بزر بتحبينه انا زوجي باشياء كثيرة ما يسويها ابو الثلاثين منها الصبر على تقلبات الزوجة ما يجاري الحريم بالكلام تحسينه بجد رجل لما انا في ثورة غضبي وهو يرد علي الله يهديج يعني الرجولة مالها مقياس عزيزتي المهم تشيلين من راسج انه بزر وتعيشين معاه ع حسب صفاته بالتوفيق |
رد : معي حق ارفضه. ولا ؛لا.
مع احترامي له قولي له كلمه قولي يبه انا اللي راح اتزوج رجاء الخاص المطلوب من ولي الامر السؤال واعطائي المعلومات غير كذا انا اللي بقرر..اما مسئله يكون مزاج ابوك اليوم رايق يصير الرجال والنعم يجي يوم يصير ابوك متضايق بامريخص الزوجه الثانيه يجي يصدر منه تصرفات تطفيش مثل ماسوى بالخطاب السابقين
××الله اعلم ابوك حس بتانيب ضمير لانه تسبب بتاخر زواجك وماصدق يقالك تراني مهتم بك اذن اخترت لك فلان..المشكله ياعزيزتي الوالدين ع عيني وراسي ابركم الا قرار زواجي اتنمى ماتتخذون قراره لما ابوي فكر يتزوج الثاني بالنسبه لحالك مافكر بمصير البقيه انت واخواتك وامك.. لما دخلتي جامعه بتخصص وعانيتي ابوك ماذاكر عنك واخذ الشهاده لما اختار اسمك وماكان لك قرار طيب ابوك متى راح يخليك تتخذي قرار بنفسك عزيزتي لابد من تدخل احد وله رايئه بالعائله ام اخو او اخت كبيره تنصحه عزيزتي قولي يبه ان كان ودك انت من تعرضني ع احد اعرضني ع شخص كبري او اكبر مني بسنه سنتين..قدرته ع فتح بيت وماتهمني الشهاده ..راع صلاه ومخاف الله فقط لاني هناك من يملك شهاده وبيته اخر اهتماماته لاتربطي كل شي عزيزتي بمستوى وشهاده وغيره اربطيه بقدرته الشخص العقليه والماديه ليريحك بحدود المعقول وفوق هذا قربه من الله بافعاله مو شكلا .................... حاسه جدا بمعاناتك..البنت شي يقهر لما يصادر رايها ولايؤخذ به اطلاقا لكن ادعوك الى الاتي وطبقيه رجيتك وانا اختك..ولا عليك من ابو ولا ام ولا احد اطلاقا ××يوميا اقري سوره البقره ××اكثري الاستغفار التسبيح الدعاء الانبياء ربي اني لماانزلت لي من خير فقير رب اني مسني الضر وانت ارحم الراحمين حسبي الله ونعم الوكيل ××الوضوء ××ارقي نفسك وارقي غرفتك ××التزمي اللبس الساتر خارجيا البيت وداخليا ××تقربي الى ربي واي قرار تتاخذيه استخيري ربك وابسالك اذا كانت اكبر منه 4 سنوات او اقل عادي لاتحكمي عليه الا اذا شفتي عقله.. علشان تطيحيه من راسك اطلبي من واحد من الشباب عندكم بالعائله قريب منك اخو او ولد اخته او ولد اخت يسال عنه ويشوفه ويطقس اخباره قولي وحده من صاحباتي موصتني وبشوف ذوقها..هنا اخوك بيعطي راي نابع عن الصدق لو يعرف انه لك..بيحط فيه عيوب الدنيا كلها وان كان كفو عزيزتي لاتفكري بعمره كثير ولا تعطي الشي فوق حجمه استخيري واسئلي عن مميزات غير كذا فيه مثلا الصلاه الدخان الاستراحات السهر فيها يعني لاتوقفي ع جانب وتغفلي جوانب وحطي ببالك عمر مستوى الثقافه بالشهاده لان هاك من شهادتهم ورق عزيزتي لاتعطي رايك حاليا بالموافقه والرفض خذي واعطي ع اخر شي وشوفي عمرك بالوسط العشرينات مافيه مشكله لكن ان كنت ممن اعمارهم 28 وفوق استخيري لان صعوبه التوافق والله اعلم لانك بتكوني بتدخلي سن الثلاثين وتمشي فيه وهو ببدايته وتبدى المقارنات الله يهدي ابوك ويسخر لك والشكوى لله استمعي لرابط ياليت يبعث الامل فيك وفيه من القصص تجعلنا نفكر ان امورنا اسهل ممن يوجد هنا http://www.youtube.com/watch?v=usQYi0nqIxY http://www.youtube.com/watch?v=ImPOL_TGmck بالختام عليك ان لاتعطي والدك رائي الان وقولي له بفكر عليك بالدعاء+الاستغفار+الاستخاره+الصدقه+السؤال عنه جيدا من طرف غير ابوك,,ومن بعده ستتوصلين الى نتيجه والله يوفقك ويحميك يارب |
رد : معي حق ارفضه. ولا ؛لا.
معك حق ترفضي ..
بس اعطي لوالدك العذر الله يعطيه العافية .. خايف عليك و حابب يطمن عليك بهالدنيا .. باذن الله ربي يرزقك بالي يسعدك و يهنيك |
رد : معي حق ارفضه. ولا ؛لا.
موفقه حبيبتي بس العمر مو عيب تذكري الفرق بين السدة خديجة رضي الله عنها والرسول عليه الصلاة والسلام ربي يسعدك |
رد : معي حق ارفضه. ولا ؛لا.
:* |
رد : معي حق ارفضه. ولا ؛لا.
اذا انتي مو مقتنعه فيه هذا من حقج..
بس ترا العمر مو سبب كافي للرفض |
رد : معي حق ارفضه. ولا ؛لا.
كم عمرك عزيزتي
اذا كان الفارق خمس سنوات واقل لا ارى اشكالية ابداً |
رد : معي حق ارفضه. ولا ؛لا.
طمنينا عنك هل وافقتي او رفضتي ؟ الله يوفقك لكل خير |
رد : معي حق ارفضه. ولا ؛لا.
الله يوفقك ويكتبلك كل خير.وصالح
بشرينا ياحلوه |
رد : معي حق ارفضه. ولا ؛لا.
همس القلوب ; انتي اجمل ؛فاكهة الشتاء؛سرب الخيال
نورا ؛ لعيون نوف ؛ سيدة الموقف ؛ امل ؛ مستقبل غامض ؛أفهمني تملكني. الف الف شكر لردودكم والله كلها فكرت فيها وحاولت اقنع نفسي "لكن أنا اعرف حالي مااتقبل يكون فرق العمر بيننا كثير ؛ لا يكلف الله نفسا الا وسعها. قلت لامي تقول للوالد خليه يخطب من خواتي الي اصغر مني ؛ أنا مااقدر أوافق على شي نفسياً مااتقبل. رديت عليهم بالسرعة ماابيهم يتعشمون ولا ابي افكر اكثر " ولا بعد ينتشر الموضوع بالعائلة. اعذروني خواتي مارديت عليكم بردود كل وحدة لحالها " تعبانة مااشوف زين.حبيت اقولكم رأيي النهائي واتمنى تدعون لي ربي لا يجعلني حمل ثقيل على احد من خلقه ويرزقني من حيث لا احتسب. جزاكن الله خير ماانساكم بإذن الله الواحد من الدعاء. |
رد : معي حق ارفضه. ولا ؛لا.
ماالومك ادا رفضيتيه خصوصا ادا كان فارق العمر بينكم اكثر من ثلاث سنوات
الله يرزقك بافضل منه يارب عاجلا غير اجل |
رد : معي حق ارفضه. ولا ؛لا.
اتصلت أمي على أبوي يوم قالت له ; قفل التلفون بوجه أمي.
وعرفت من اخوي انه أبوي مرسل له رسالة يقول اقنع امك وأختك ومعكم ساعة تردون علي ! وخلونا نملك لهم وماحد يدري ويخرب عليها. سالت إخواني بالله تشفونه مناسب لي قالوا:لا. الليلة بيجي أبوي عندنا؛ قلت لامي من القهر يمه انتي دايم مواقف سلبية ليه ما تصرين مثل الحريم الي كلمتهن تمشي على الرجل أبوي مااستهان بي ويتصرف بمزاجه الا يوم سافك ساكتة له. ماهو على كيفه الي ابيه يرفضه والي ماابيه يحاول يفرض رأيه علي. الله يسامحك يمه تراني بنتكم ؛ لا تتركيني اتمنى يكون لك رأي ماهو بس ساكتة أنا صراحة تعبت من كل شي بالدنيا. ناوية الليلة يوم يجئ أبوي ماراح اسكت ؛ ابي افتح معه الموضوع.ومااخليه يسوي الي برأسه ماني صغيرة يقرر عني. بي غصة وقهر وحزن وخوف ؛ حسبي الله ونعم الوكيل. |
رد : معي حق ارفضه. ولا ؛لا.
معك حق وبعدين ليه محد يدري ويخرب عليها ... ليه شايفك بايره لا ابوكي مرة غلطااااااااااان خليكي على موقفك وبقرارك طالما منتي مرتاحه نفسيه ولست متقبله بس بأدب وذوق ان شاء الله امورك ميسره كما تريدين ان شاء الله الا اقول كم عمرك الحين الله يرزقك ماتمنين عاجلا غير آجلا اللهم آمييييييييييين |
رد : معي حق ارفضه. ولا ؛لا.
كثير اللي يعاني بمستوى تفكير ابوك..
والله اذكر اني رديت عليك بموضوع غير هذا وحتى ردي السابق ذكرت هالشي لك ..ابوك ع كيفه حاط بباله يبخص الناس والله ياغناتي الخاطب مهما اظهر من محاسن ومساوء مايبان الا اذا صكوا الباب عليك وعليه.. الان الحياه تخوف والمشاكل كثيره.. اياك ثم اياك ثم اياك احد يلعب عليك ويحط الرفض انه عقوق لاابوك..هذا زواج لاابوك ولاامك ولااخونك بيحسون بمعاناتك اذا اغلقوا عليكم الباب .. ياعزيزتي تكلمي ودافعي عن حقك واللي يزعل يطق راسه بالجدار واقري ردي السابق وذكرت لك امثله قوليه بوجه ابوك..خلي الضمير يحيا عزيزتي كثير بنات تاخروا بييوت اهلهم بسبب قرارات الاهل الغير مباليه والمزاجيه الشكوى لك يالهي فانت اعلم بالحال ............ز يارب افرج همك ويسر دربك ويزقك الزوج اللي يسرك .. |
رد : معي حق ارفضه. ولا ؛لا.
اذا لم تتقبلي الموضوع ارفضيه ومن حقك ذلك وكوني ثابته لان العقل والشرع معك...
وكلم اباك بالحسنى واقرئي عليه الحديث الشريف عَنْ عَائِشَةَ رضي الله عنها ، قَالَتْ : " جَاءَتْ فَتَاةٌ إِلَى رَسُولِ اللَّهِ صَلَّى اللَّهُ عَلَيْهِ وَسَلَّمَ ، فَقَالَتْ : إِنَّ أَبِي زَوَّجَنِي ابْنَ أَخِيهِ ، لِيَرْفَعَ خَسِيسَتَهُ ، فَجَعَلَ رَسُولُ اللَّهِ صَلَّى اللَّهُ عَلَيْهِ وَسَلَّمَ الأَمْرَ إِلَيْهَا ، قَالَتْ : فَإِنِّي أَجَزْتُ مَا صَنَعَ أَبِي ، أَرَدْتُ أَنْ تَعْلَمَ النِّسَاءُ ، أَنْ لَيْسَ إِلَى الآبَاءِ مِنَ الأَمْرِ شَيْءٌ " وهناك فروق فرديه بين النساء من حيث نظرتها لمن هو اصغر منها وغالبا ما ترفض النساء اللاتي يتمتعن بحس والديه عالي اختار الله لك بخيرته وسيرضى اباك غدا واعلمي تماما من المحال ان يستثقل اب فاضل ابنته مهما كانت ولكن الانسان عجول ويريد تزويجك ليرتاح نفسيا ... تحياتي |
رد : معي حق ارفضه. ولا ؛لا.
من حقك ان ترفضي.
ابوك ينظر للامور من رويته هو، لا يعني هذا انه مستبد او لا يفكر بك. حاولي تفهمه و ارفضي برفق فهو ابوك و يرى انه الافضل لك. لا احد يستطيع ان يجبرك على شئ، سيغضب ابوك و لكنه سيرضى بعد ذلك عندما يرى مرونتك و ادبك. |
رد : معي حق ارفضه. ولا ؛لا.
همس القلوب ؛ سرب الخيال ؛ صفاء ؛ لينة العريكة.
جزاكن الله خير على الرد المقنع ولله الحمد. أبوي مثل ماذكرت أختي سرب الخيال الله لا يحرمها الأجر يوم حللت تصرفاته وخاصة في مسالة انه الآن ندمان وكانه حاس بالذنب ويمكن ضميره صحى بعد فوات الأوان جالس يتعذر أنا يوم رفضت فلان لان فيه ومافيه ؛ يمكن هو كان شايف شي أنا مدري خلاص قلت له اصلاًٍ مؤ هذا موضوعنا وش فائدة الكلام الحين ; شي واحد فلان أنا هذا ماني موافقة عليه واسبابي واضحة مايحتاج أعيد وأزيد ؛ وبعدين ترضاها علي أخذ واحد صغير وتفكيره حده سادس ابتدائي وبين سوق الغنم مدري الخضار يمكن يفهم بالحسابات لكن فيه أشياء بالحياة اهم ؛ هذا كيف بتكلم معاه وش الاشياء والاهتمامات الي بيننا ؛ تفكير كل واحد شرق وغرب بالنسبة لي اعتبره مراهق جاء برأسه العرس قال ليه مااتزوج فلانة هو الكسبان ؛ بالنسبة لي ماراح اكسب الا زيادة هم واقعد أراقب تصرفات مراهقين واعدل فيها ،.فكان رد أبوي اني تتكبرين على خلقه وكأني كفرت جلس يقول لي ما تخافين تصبحين ويسلب الله منك نعمته. وقعد يقولوا العنوسة ومدري ايش;عندي اجلس من دون زواج افضل بكثير من القبول بفلان وأضيع عمري الحمدلله مرتاحة ماهو ناقصني شي ولا محتاجة لاحد بالدنيا حاجتي عند رب العالمين اطلبها منه وهو الرحيم. للأسف أبوي على كثر ما تكلمت حاولت اقنع فيه ؛ماهو مقتنع بكلامي ويقول يجيبك يوم تندمين على العناد ؛هو فاهم اني جالسة اعناد. لكن يعلم الله اني ما اعناد أبوي ؛حاط بباله انتي تبغي فلان "وش الفائدة من الكلام الحين بغيته ولا ما بغيته !؟ ماهو انت صادرت رأيي وسمعت لناس حاسدة وغيرانة ؛الله فوقهم ولابد يجئ يوم ويجازيهم ربي. حالياً كرهت طارئ الزواج ولا ابي أتزوج ؛قلت لهم لاحد يجيب لي طارئ ابي ارتاح احس الزواج لي راح يسبب لي مشاكل فوق مشاكلنا أنا ماني ناقصة تعب وهم. |
رد : معي حق ارفضه. ولا ؛لا.
الحمدالله لك الحق الرفض وللأسف الأغلب الوالدين ليس كلهم يهمشوا بناتهم في ابسط الحقوق منها الزواج وهي الأهم ماالومك يااختي الله يعطيكي ماتمنين واكثر مما تمنين اللهم آميييييييييييين |
| الساعة الآن 02:30 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©