|
اكتشفت ان والدي حق مخدرات !((مستجدات في الرد17))
السلام عليكم ورحمه الله وبركاته
اللهم صلي وسلم على محمد للأسف الشديد وبعد مدة طويلة صراحة ماحسيت لا من بعيد ولا من قريب ولا شكيت فيه أبد لحسن أخلاقه واجتهاده بـ عبادة الله اكتشفت بالأخير إن أبوي يتعاطى نوعين من المخدرات !!!! النوع الأول الكبتاجون والنوع الثاني الإنفيتامين ابوي يعاني من أمراض نفسية سببها المخدرات ماقدر أوصف لكم الصدمة اللي انصدمت فيها لا حول ولا قوة إلا بالله أبوي يتعاطى مخدرات ؟؟؟؟؟؟؟؟؟؟؟؟؟؟؟؟؟؟؟ لا حول ولا قوة الا بالله أنا الآن خايف على صحته وخايف على أهلي لا يقتل واحد فيهم نسمع كثير بمتعاطين المخدرات اللي نحر راس ولده والي نحر راس زوجته لا حول ولا قوة الا بالله أبوي مايدري اني ادري انه يتعاطى مخدرات فقط الوالدة تدري وياما نصحته امي وهددته لكن مافيه فايدة اللي يقهر انه يصلي ويقرا قران ويقوم الليل ويتعاطى مخدرات وش هالتناقض ؟؟؟؟؟؟؟؟ يوم تقوله امي انه حرام واقرى فتواها من النت يقول لا ماهي حرام ويهاوش ويقول انها منشطات فقط ويصرخ ورافض انه يتعالج بمستشفى الأمل لمرضى المخدرات حاط نفسه انه مو مريض واللي يسويه مو حرام شي عادي المستشفى قالوا احنا مانقدر نسوي شي مانقدر نشيله بالغصب ونجيبه عندنا لازم المرضى بنفسه يقتنع انه مريض وعنده الرغبة انه يتعالج لا حول ولا قوة الا بالله هم دكاترة ومستشفى مختص بهالشي المفروض اللي زيهم يعرفون ان متعاطين المخدرات مستحيل يقتنعون انهم مرضى ومستحيل يتعالجون بنفسهم ليه كذا مايصير والله ؟ الحين يا جماعة الخير وش الحل مع ابوي ابيه يتعالج بالأمل لكن هو رافض ؟ ودي بـ حل سكاتي يعني بدون فضايح يعني لو مثلا المستشفى تتكفل بسيارة غير حكومية ويجون ويشيلونه .. هل هذا ممكن ؟ وكيف ؟ |
رد : اكتشفت ان والدي حق مخدرات !
السلام عليكم ورحمة الله وبركاته شف وناخوك الحل سهل بإذن الله تبين لأبوك إن هذا حرام مثلا تتصل على أحد المشايخ المعروفين ويكون الوالد جنبك وتكلم الشيخ بس ماتقول إن أبوي متعاطي لالالا تقول ياشيخ نبي حكم تعاطي المخدرات وزي كذا بعدين إذا اقتنع بالحكم وده انت لا تدق على المستشفى ولا يجونك ولا شيئ بس هالفتره خلك اخلاق مع أبوك طيب سؤال مهم وشلون دريت إنه يتعاطى مخدرات ووشلون دريت بالنوعين يمكنه زي ماقال أبوك منشطات والوالدة الله يحفظها لك تحسبها مخدرات أسأل الله ان يهدي أبوك وأن يحفظكم كلكم من الشر ويكتب لكم الخير |
رد : اكتشفت ان والدي حق مخدرات !
الله يرد له عقله ويهديه
صارت هذه الحبوب من ضمن مكوناتها الهروين نصيحتي لك بلغ عنه المكافحه |
رد : اكتشفت ان والدي حق مخدرات !
اقتباس:
|
رد : اكتشفت ان والدي حق مخدرات !
اقتباس:
النوعين هو قالها لأمي وهي فعلاً بعد مابحثت بالنت عنها تبين انها منشطات وهي اختراع ياباني اختُرع في الثمانينات وكان مصرح طبياً لكن في وقتنا هذا حُظر دولياً ويُقال أيضاً حسب ماقرأت بالنت ان مكوناتها بالدول العربية تختلف عن الخارج لكن اجمعوا بالنهاية تعاطيها بكثرة تسبب هلوسة المخ او الجنون فكرة الاتصال بالشيخ ممتازة لكن بنفس الوقت انا مابيه يحس اني دريت انه يتعاطى منشطات حتى مايزعل هو كافي اللي فيه ذابحه التفكير وعازل نفسه |
رد : اكتشفت ان والدي حق مخدرات !
يمكن فعلا أحد أقنعه انها منشطات ومو مخدرات .. تدري الرجال بهالعمر يتكلمون بهالأمور وينصحون بعض بأمور تزيد عندهم النشاط وتعطيهم قوة تبعد عنهم حالة الضعف وكأنها نبع الشباب والفتوة .
أول خطوة انه يفهم انها فعلا مخدرات وشنهي مكوناتها بالضبط أشوف انك تعطي الوالدة نشرة أو نسخة تطبعها من النت عن النوعين مع كمان نوعين وكأنها نشرة شاملة مو قاصدينه فيها فيهم شرح للمكونات وتصنيفها كمخدرات وأثرها على الجسم وحكم الشرع فيها والوالدة تحطها بغرفتهم تحت عين والدك الله يحفظه دام انه محافظ على صبلاته وعباداته فطمن قلبك وعين خير :) |
رد : اكتشفت ان والدي حق مخدرات !
السلام عليكم ورحمة الله وبركاته طيب مثلا إذا كان ابوك جالس بالصالحة أدخل وانت حزين وسلم عليه ثم اجلس أكيد بيسألك وش فيك قل إن صديق عزيز لي طاح في المخدرات بس موب مقتنع بالحكم ثم طلع الجوال وقل بصوت واطي الحين بتأكد من الشخ وأنت من جد دق على أي شيخ معروف وشغل السبيكر وسئل الشيخ طبعا الوالد يكون جنبك ويا حبذا لو تكونون أنت وأبوك وأمك على شان ماحد مايشك بس بس إختار الوقت المناسب موب تطب عليه يكون متضايق بعدين بدل مابتكحلها بتعميها إسأل الوالدة متى أبوك يكون مروق ومزاجه هادي لأنك ذكرت إن الوالد يعاني من أمراض نفسية فانتبه للنقطه هاذي زين أسأل الله أن يهدي والدك |
رد : اكتشفت ان والدي حق مخدرات !
انا اعتذر لو ردي ضايقك ياخوي
بس والله فيه ناس كثير حاولو يتركونها بس عجزو عن ذلك وكل مالهم يكون وضعهم اسوء من قبل هو يمكن حاليا يستخدمها فأوقات معينه بحيث انها ماتغيب عقله عن صلاته وعبادته بس احتمال فأي لحظه تدهور حالته ماشاء الله الاخ ابو ندى ماقصر بنصايحه وكل ماسارعت بتنفيذها كل ماكان افضل لصحة الوالد اسأل الله ان يهديه ويشفيه لكم من كل شر ويبعد عنه كل من اراد به سوء |
رد : اكتشفت ان والدي حق مخدرات !
طيب إيش رأيك لو انت تدور على الحبوب اللي ياخذها ابوك وتخبيها في اي مكان وهو لما يفتقدها بينحاس ويقوم يدور عليها ويرتبك وبيسأل عنها امك وانت حاول تبني خطة مع امك على اساس انها هي تسألك عنها وانت بدورك بالبداية تخاف وترتبك قدامها وياحبذا لو كان الوالد موجود عندك وقول لها بصوت انك خايف ومرتبك وانك كان راسك مصدع واخذتها واكلتها تحسبها حبوب صداع وعقبها حسيت مزاجك رايق وصرت تبحث عنوالمزيد منها وقول لها رحت الين الصيدلية ادور عليها كل ماسألت عن اسمها صيدلي يقول لي اتكل على الله قبل ما اتصل لدورية الشرطة تجي تاخذك من هنا وخفت لا اقول لكم عن اللي صار والحين بشوف لي صديق لو قدر يجيب لي من نفس الحبوب هاذي الصراحة انها ريحتني كثير لما اكلتها وطالع لأبوك واسأله قول له انت من فين لاقيت هالحبوب من اي صيدلية اشتريتها وشوف ردة فعله ناظر بس بوجهه وخل امك تحسسه ان الخطر وصل حتى لكم انتم يالأبناء بس يكون بينها وبينه وتنصحه وتقول له ذنب ولدي برقبتك انت اللي تبغاهم يصيرون كذا لو انت حريص على اولادك وتحبهم كان من زمان اقلعت عن هالشئ وتركته وتقوم تصيح وتقول ياربي وش اسوي مصيبتي صارت مصيبتين زوجي وولدي يارب صبرني
وتجلس تدعي إن الله يهديكم ويصلحكم حتى نفسية الوالد تتأثر ويقتنع ويقلع عن تعاطيها ويوافق يتعالج من ادمانها طبعا امك تحط عليه حرام عليك هذا ولدنا وسندنا بعد الله عز وجل وانت تبغى تضيعه وتدمر مستقبله ومن هالكلام حتى هو يتأثر وان شاء الله ان الله يقذف الخوف في قلبه من تعاطيها ويصرفه عنها وان يهديه ويصلحه ويرده لطريق الحق وفيه شئ ثاني هو ماله علاقة بموضوع ابوك بس قريت لك موضوع في قسم الطفل تتكلم فيه عن اخوك انه يمتر البيت تمتير وهو يمشي ويسولف مع نفسه انتبه لأخوك لا يكون يبلع مع الشايب في هالحبوب بدون علمكم وابتدت تلعب بمخ الصغير لا سمح الله انتبهوا له زين وحاولوا تراقبون تصرفاته زين والله يخليه لكم يارب . |
رد : اكتشفت ان والدي حق مخدرات !
اقتباس:
بسم الله على اخوي ههههههههههههههه لا لا الحبوب اصلا مايحطها بالبيت اضحك الله ضرسك |
رد : اكتشفت ان والدي حق مخدرات !
بيتا وأبو ندى
جزاكم الله خير على الاقتراحات الممتازة اضافة انا اللي مهون صدمتي للمووضوع هذا ان ابوي ما اانحرف أخلاقياً وهذا شي طيّب يصلي ويصوم ويقوم الليل وماعمره غلط على أحد محترم الله يعطيه الصحة والعافية |
رد : اكتشفت ان والدي حق مخدرات !
السلام عليكم ورحمة الله وبركاته لالالالالالالالالالا ياخوي وش إنحراف أبوك فيه الخير والبركة بس خلك مع أبوك وسارعوا بالعلاج علشان مايتفاقم الوضع ويزداد سوء كل ما كان العلاج بدري كان في صالح ابوك أسأل الله ان يقر عينكم بشفاء أبوكم ويحفظ لكم أمكم |
رد : اكتشفت ان والدي حق مخدرات !
اهلا ولد الدمام / ..
الله يعطيك العافيه ويصبرك .. ويلهمك الثبات وحسن التصرف .. هالامور تحتآج حسن التصرف والحكمه دائمآآآآآآآآآآآآآآآ وانصحك بالارقام المجانيه في كل مدينه .. ارقام خيريه للمساعده في الجانب الاسري .. ويقوم عليها كبار الاطباء ومشايخ ومتخصصين ... وصدقني بيفيدونك وينصحوك .. لان فيه نآس جابت معاهم افضل النتايج الحمد لله .. |
رد : اكتشفت ان والدي حق مخدرات !
نعم أتفق مع الأخ عاشق الأروى عليك الإستعانة بمختصين وتثقيف نفسك وأمك لتحسنوا التعامل معه وسرعة إقناعه بالعلاج |
رد : اكتشفت ان والدي حق مخدرات !
ما عندي خبره بالموضوع
و دخلت لكي ادعو لك اخي الكريم شفا الله والدك مما هو عليه، و مادام يصلي و يقف بين يدي الله فلا تخف عليه كثيرا سينتشله الله من ايدي الشيطان الهي اعطي لابيه القوه لترك ما لا يرضيك وفقك الله اخي و جعلك ابنا بارا محبا لوالديه الجنه و ادخلك الجنه بهما و معهما |
رد : اكتشفت ان والدي حق مخدرات !
الله يعينك ويحفظك من كل سوء الحمدالله انه محافظ على الصلاة وقيام الليل فهذه نعمه لكن طبيعي ان الاب لايتقبل النصيحه من ابنه لكن الكتيبات الدينيه و الصحيه التي تبين ضرر المخدرات تجيب نتيجه معه ولكن لاتنسى ربك كريم الان يبدأ برك بوالدك بالقيام والصلاة والدعاء في اخر الليل والصدقه ابني الدعاء لب العباده فاكثر منها بان يعافي والدك ويشفيه اللهم ياحي ياقيوم ان يفرج كربتك ويشفي والدك وان ان يحفظك من شياطين الجن والانس عليك بالذكار والورد اليومي
|
والدي العزيز .. !
السلام عليكم ورحمه الله وبركاته
.. والدي يتعاطى الأدوية النفسية منذ سنوات ولا نرى أي تحسن ! ففكرت بيني وبين نفسي قليلاً -بعيد عن العاطفة- قلت من الممكن إنه يتعاطى أي نوع من المنشطات ! رغم ان الوالد الله يحفظه شخص محترم جداً بشهادة الجميع بحياته كلها ما سوى مشاكل مع أحد لا مع أهله ولا مع الجيران ومحافظ على صلاته والضحى والوتر وقراءة القرآن وهذا الي مهون مصيبتي شوي فالحمدلله وفعلاً طلع يتعاطى نوع واحد من المنشطات اللي هو الإنفيتامين أو الكبتاجون .. وبداية القصة طويلة لكن باختصار واحد من الي مايخافون الله طيح الوالد بهالشي وتعرفون سوالفهم هذا ينشط هذا فيتامين مايسوي شي هذا مدري وشو وخرابيط الله حسيبهم بس والوالد جربه ويوم جربه حس بالراحة والسعادة لأن الوالد يعاني من اكتئاب من هو صغير فيوم جرب هالمنشط ارتاح له لكن وصل الوالد لمراحل سيئة جداً واللي بسببها خلاه يتعاطى ويتعالج بالطب النفسي عموماً أكثر شغلة متعبة الوالد هي الفلـــــــــــــــــــوس والديــــــــــــــــــــون عليه قروض وديون وحالته حالة .. الله يفرجها بس ويرزقنا من حيث لا نحتسب أنا كأبن واجبي أتابع حالة والدي وأهلي وأشيل المسؤولية اقسم لكم بالله إني حرمت نفسي من ملذات الحياة من اللعب ما اللعب .. اللعب ماعرفه اصلاً .. حرمت نفسي من الأصدقاء والخروج معهم .. صار وقتي كله امشي اهلي برى حتى اوسع صدورهم شوي وابعدهم عن جو البيت وظروفنا السيئة احاول اسعد الوالدة والصغيرين وانسيهم ظروف البيت وانمي الثقة وقوة الشخصية فيهم انا ما اقول هالكلام منة او شي هذا واجب غصبن علي اسويه واسويه بقناعة وانا والله يوم اشوف اهلي مبسوطين ارتاح ولا ابي شي من هالدنيا الا فرحهم مابي اصدقاء ولا ابي شي ثاني ابي اشوف امي وابوي واخواني مبسوطين مرتاحين عايشين حياة كريمة وسعيدة وبس هذا الي ابيه انا قريت كثير حول الأدوية النفسية ومدى آثارها السلبية على الجسم وعلى المدى البعيد فوالله خايف على صحة الوالد كثير جداً ... اشتريت للوالد فيتامينات حتى تصلح جسمه من الادوية النفسية وتصلح جسمه من حالة الحزن والاكتئاب الي يعيشها وتصلح صحته كلها بشكل عام سواء الذهنية او النفسية او الجسدية اشتريت له جزمة وانتم بكرامة حتى يمارس رياضة قلت له شارك معي بنادي رياضي وادربك انا قلت له اقلع عن التدخين وانه يسوي ويسوي واوديك واجيبك لمكافحة التدخين حتى يساعدوك على الاقلاع ياما نصحته واعطيه كورسات حول التغذية ما التغذية كل هالامور ماطبق منها ولا شي ولا يفكر اصلا الله يهديه .. خلاص هو حاط نفسه منتهي يبي يموت مع انه رجال توه مو هذاك الشايب يقدر يمشي ويروح ويجي بس انا مو عاجبتني حياته ابداً حياته عبارة عن تدخين على السرير .. قاعد لحاله بالغرفة يفكر .. نوم ... وهكذا بس تخيلوا !!!! ابوي يشتكي من الفقر وقلة الفلوس .. وهو قاعد مايتحرك لا هو الي يدور وظيفة ولا هو الي يسويله شي خلاص كاره الحياة وده يموت .. حتى ينبسط يبي تجيه فلوس لحد رجوله بدون مايخطي ولا خطوة ! بالمختصر انا خايف على صحة اهلي بشكل عام والمشكلة مافيهم الي يسمع كلامي ويتبع نصائحي والمشكلة الاكبر هي قلة الفلوس والديون الي مدري وش الحل معها ؟ والله ودي اشوفهم بصحة ممتازة ومبسوطين ودي اسفرهم في الخارج لكن الفلوس الفلووووس اه بس ودي ابسطهم واشتريلهم واوديهم واجيبهم ووووووووووووووووو .. إلخ خلوها على ربكم بس حبيت افضفض .. والي عنده تعليق يتفضل .. شكراً |
رد : والدي العزيز .. !
السلام عليكم ورحمة الله وبركاته أخوي الفاضل أسأل الله أن يفرج همك وأن يرزقكم من لا تحتسبوا أسأل الله أن يلبس والدك لباس الصحة والعافية وأن يكتب لكم الخير ويصرف عنكم الشر |
رد : اكتشفت ان والدي حق مخدرات !
نسال الله ان يرفع عن والدك مابه عاجلا غير آجل
تم دمج الموضوعين لارتباط المحتوى |
رد : والدي العزيز .. !
اقتباس:
من رأيي تروح لطبيبه اللي يتعالج عنده والذي يكتب له على أدويته هذه وتتابع معاه . وأنت ما لي غير أن أشعر بغصة ورغبة قوية بالدعاء لك بفرج قريب .. لكني لن اكون أرحم من رب رحيم عادل لا بد وله حكمة بما تعانيه وعندي يقين تام بأن جزاء الصبر لا يكون إلا الفرج والثواب والأجر الجزيل من رب كريم لا أعلم عن حالتك المادية لكن إذا كانت مرتاحه فأنصحك بالبحث عن زوجة والمضي بحياتك مع الاستمرار بالعناية بأهل بيتك .. ما تفعله من أجلهم رائع لكن لا تبذل العطاء للجميع ثم تتوقف عند نفسك بل حاول الموازنة بين الجميع . وفقك الله وشافى والدك |
رد : والدي العزيز .. !
الله يفرج همك أخوي ويشفي والدك ويصرف عن قلبه السوء
ويرزقك بالزوجه الصالحه يارب ولايضيع لك تعب يارب |
رد : اكتشفت ان والدي حق مخدرات !((مستجدات في الرد17))
ماشاء الله تبارك الرحمن ،،
أهنؤك على مشاعرك النبيلة تجاه أسرتك ،، والأهم ،، برك بوالديك ،، زادك الله من فضله ورزقك خيري الدارين ،، أنصحك باستشارة الدكتور : د عبدالله السلمان أتوقع راح يدلك على طريقة التعامل الصحيحة |
رد : والدي العزيز .. !
اقتباس:
أبوي الله يهديه مايتابع مع الطبيب النفسي انا بنفسي انزل للرياض واقابل طبيبه النفسي واعطيه المستجدات وشرح تفصيلي عن حالته طبعاً انزل للرياض بشكل دوري شهرياً اقابل طبيب ابوي النفسي واعطيه من جديد وكذا الدكتور يدري بموضوع المنشطات وقال لي الدكتور اذ ابوك يتعاطى المنشطات او الانفيتامين او الكبتاجون مع الادوية النفسية كانه يشرب ماء يعني مافي نتيجة ابد وتبطل مفعول الادوية النفسية الوالدة جلست مع ابوي وحسب كلامه يقول انه من مان تركها وحلف لها بس ماندري والله وهو طول وقته بالبيت مرات يطلع ويجي بسرعة يقولكم اذا عرف السبب بطل العجب ، انا شايف مافيه افضل من مستوصف الأمل حتى يصفون دمه وجسمه ويهتمون فيه ويقولون له الي تسويه غلط واهتمام من إلى لكن هو رافض وبنفس الوقت مابي الفضايح شرطة ما شرطة لابوي او احد يوديه بالغصب ماهي زينة بنفس الوقت انا مابيه ينومونه سنين عندهم احسها تضيع من حياته لكن بنفس الوقت اقول ازين من حالته الحين .. والله مدري هو المشكلة مايبي يتعالج حاط نفسه مو مريض وكاره الدنيا مايساعد الله يعين |
رد : اكتشفت ان والدي حق مخدرات !((مستجدات في الرد17))
كلمت الدكتور طارق الحبيب وشرحت له حالة الوالد
وقلت له احنا على قد حالنا يا دكتور لو تتبرع بعلاج والدي مجاناً لوجه الله عسى ربي يخلي لك عيالك ويحفظك الدكتور جزاه الله خير وافق وقال لي ابشر والدك والدي وراح اعالجه مجاناً .. والله انه ماقصر ورحت اقول لابوي هالخبر الدكتور طارق الحبيب بيقابلك هو بنفسه ويعالجك ويتكفل بالادوية وبكل شي مجاناً رفض وعصب ..! حاولنا فيه بشتى الطرق مانبي نضيع هالفرصة ، مافيه فايدة ..! |
رد : اكتشفت ان والدي حق مخدرات !((مستجدات في الرد17))
اقتباس:
لعل يكون عنده دواء تبدأ فيه ويخفف حدة الكآبة وقتها ممكن والدك بوافق يروح معاك . او يعطيك حيله تحتال بها عليك بالدعاء ... استخارة ودعاء واطلب من والدتك واخوانك الصغار أن يدعوا له أن ربنا يهديه ويوافق يروح . |
رد : اكتشفت ان والدي حق مخدرات !((مستجدات في الرد17))
اقتباس:
|
رد : اكتشفت ان والدي حق مخدرات !((مستجدات في الرد17))
اقتباس:
قول له خايف عليك يا غالي .. خايف عليك يا والدي وما أحب إلا تكون بينا ومظلل بيتنا .. وكل خوفي تكون أدوية الطبيب مو مناسبة لك لأنه ما شافك من زمان .. وهذا الطبيب الجديد مشهور ومعروف وياخذ دورات ويجدد علمه على طول . ارجوك يا والدي اذا لي خاطر عندك تروح معي بس هالمرة وان ما عجبك الطبيب وما ارتحت له لا ترجع عليه حاول بوالدك مرة ومرتين وثلاث .. وخل والدتك تحاول من جهتها معاه على انفراد أهم شي أن تكون كلماتكم أنت وهي تحمل معاني المحبة .. واذا قدرت ارجع كلم الدكتور طارق وبلغه ان والدك رافض يروح |
رد : اكتشفت ان والدي حق مخدرات !((مستجدات في الرد17))
اقتباس:
مثل ماقلت سابقاً هو خلاص كاره الدنيا وكاره كل شي وينتظر ساعة موته الله يهديه حتى ينبسط يبي يشوف ديونه تسددت ويبي فلوس تجيه عنده بدون مايسوي شي هذا الي يبيه :/ مع اني اقول بقلبي وامي تقوله هالكلام بعد .. كيف الأجانب يتغربون هنا ويشتغلون بأضعف الوظائف وأضعفها رواتب ومتعبة جداً وفيها مساس للكرامة وفوق هذا يتلقون عنصرية من الصغير والكبير هنا ومع ذلك ماشاء الله عليهم يتمتعون بصحة ممتازة حتى من الجهة النفسية وبعض الي يعانون من ضعف المادة يسعى ورا رزقه باكثر من طريقه مو يطيح بالفراش وبس ينام ويفكر الله يهديه مع انه والله ماينلام عشانه مريض الله يعطيه الصحة والعافية وطولة العمر بس الحالة سقيمة ما باليد حيلة |
رد : اكتشفت ان والدي حق مخدرات !((مستجدات في الرد17))
اقتباس:
رسلت له رسالة على صفحته في الفيس بوك وانتظر رده |
رد : اكتشفت ان والدي حق مخدرات !((مستجدات في الرد17))
تاركـ رقمـ جوال في صفحته بتويتر وبرامجه بدليل وبيوت مطمئنة بإذاعة القران جدا راااائعة ولا تنسى الاستخارة في أمركـ كله وفقك الله لخيري الدارين |
| الساعة الآن 11:18 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©