|
زوجتي تثير المشاكل (معدل )((مشكلة محلولة في الرد 118))
السلام عليكم يا اسريين
انا ما ارجع لكم الا لاطحت بورطة وكلن تخلى عني بس وش اسوي مالي الله ثم انتم ويشهد الله اني معكم قلباً وقالباً بس بحكم المراقبة اللصقية واللحظية عبر الاقمار الصناعية واجهزة تجسس FBI ما ادخل النت قدام المعزبه :11: طبعاً البعض هينا عارفين منهو متورط بمرته وخاصة اخوي البليغ الله يجزاه خير ويوفقة والبعض الاخر قد يكون متابع لي وافادني برأئية عموما مالكم من طولتها :d ثورة 2013 ثورة غير من نوع اخر السالفه باختصار طبعاً انا عندي انسانه عنيدة ولا تحب احد يقهرها ولا تحب احد يكون احسن منها ودها كل شي يصير في البيت اول وحدة عندها خبر هي وودها تكون الشخص المسيطر على هالبيت كله وتهميش دور الاخرين الله يصبرنا بس:29: سنة 2012 كانت سنة هادئة لكن كان يشوبها بعض التهديدات من الشعب الي هي مرتي ماقول غير ااه بس مادري وين كان مخي يوم اعرس :confused: البنت سلمكم الله خلال سنة الثورات العربيه شكلها كانت تخطط على ثورة وناويه تخربها معي وكان يجي تلميح وقط كلام ترى بيجي يوم بروح لا اهلي ولا عاد ارجع ترى انا عرفت ان السواق يقدر يوديني الجامعة من بيت اهلي طبعاً بيت اهلها برى الرياض قلت يعني مبيته النية شكلك:( المهم البنت سلمكم الله برنامجها اليومي كالتالي: جامعة بيت ملسل تركي العصر في الام بي سي ملسل تركي في الاب توب بي بي مسن في الجوال هذا البرنامج من يوم تصحى لين تنام عين في التلفزيون وعين في الجوال الكيبورد تكسر من كثر ماتسولف مع خلق الله وكل مره خواتي ولا قروب الجامعة الزبده يوم الثورة طبعاً كانت فترة اختبارات وكانت تواصل طبعاً تواصل مذاكرة + مسلسل تركي + بي بي مسن المهم في ذلك اليوم جيت من الدوام العصر دخلت الاخت ونامت ونمت جنبها مثلي مثل اي زوج مغلوب على امره :cool: نمت وصحيت على قبل العشاء وقعدت دبرت نفسي بعشاء وقعدت اتفرج واطقطق في جوالاتي صحت الاخت في الله على الساعة 12 ونص ودخلت علي وجلست وراحت وجابت لها حليب ومرت من عندي عشان تشوف وش اسوي مسويه اني بقفطك يعني :15: قالت وش تسوي قلت ماسوي جالس وش تبين اسوي نايمه يعني ماتفرج ولا اسوي شي مثلاً !!! المهم قالت طويلة العمر وهي تطالع بجوالها ترى بكره بروح لا اهلي قلت سمي طال عمرك ابشري قالت طيب ترى بحلق الولد قلت خليه لما ترجعين وقبل الزواج بحلقة انا قالت معصي بحلقة يعني بحلقة :11: قلت خير ....! ترى مرتين اخليك تحلقينه عند اهلك وبعدين شعره طالع حلو عليه قالت تتوقع اني مواعده احد بالسوق يعني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ قلت انا قلت شي ! قالت اجل تبي توديه لحلاقينك المروحين :d قلت يابنت الناس لاتحلقينه الله يهديك خلاص مرتين معطيك ومخليك تحلقينه هالمره انا بحلقة قالت لا قلت الموضوع عناد يعني ولا وش السالفه قالت لا بس تراه شعر وقلت يوم انه شعر ورى ماتسمعين كلامي وانا زوجك قالت محلقته محلقته طالعت وانا متنرفز منها كلامها قلت ولله ماتحلقينه قالت بحلقة غصب قلت حلقيه وياويلك قالت بحلقة ولا راح تدري قلت فكيني شرك خلاص قفلي الموضوع قلت لاتحلقينه خلاص اسمعي كلامي وفكينا من المشاكل الا رايك هو الي يمشي غصب ؟؟؟؟؟؟؟ ترى انا رجل لي راي في هالبيت قالت بحلقة ولا علي وهي تعطيني النظرة الخطيرة حقتها قلت طلاق ماتحلقينه قالت بعد تطلق وتسوي ذيك الحركة حقت البزران الي اول الي تحطية يدها على وجها وتقول اوريك قلت اسكتي لا يجيك الكوب الحين في وجهك ماسكتت وراحت تلاسن اخذت الكوب طبعاً كوب كابتشينو رايح اشتري لي قهوه وجبته معي وارميها فيه طبعاً ماجا فيها مره من جنبها قامت الاخت في الله ومعها كوب قزاز وترميه فيني وتبي تكمل اخذت الاب توب تبي تطقني واقوم عليها وادبغها طبعاً ضربي كله امسكها بشعها ادفها ضرب مبرح مافيه لكن هي حسبي الله عليها والله ينصرني عليها مشختني في يدي :mad: المهم قعدنا اسبوع يمكن كل واحد مايكلم الثاني ومصرة على اني غلطت عليها وارد عليها واقول لها لكل فعل ردة فعل وانا تعوذت من شرك وحذرتك بس انتي ماتسمعين الكلام ولا غلطت عليك انا جالس لحالي كافي خيري شري وجيتي انتي توك صاحية ورايقة وتستفزيني بكلامك وتعصين امري واقول فكيني شرك ولا انتي راضية وتبيني اعتذر بعد شلون تجي ؟ المهم مر اسبوع وانا مشكلتي قلبي الصغير لايتحمل يكون الجو مشحون واجي والطف الجو وتصير سالفه في البيت وتبدا هي تتفاعل معها وقعدنا نسولف ونسينا الموضوع بس للاسف كان تمثيل منها المهم كنت بالدوام قالت بروح مع البنات للسوق قلت اوكي روحي والليلة نروح لا اهلك راحت وجيت من الدوام ونمت وصحيت وكنت صراحه ناوي نسوي الي بالي بالكم اول مادخلت قالت يالله مشينا قلت لا وين ياعمري تونا خلينا نخلص بعدين نروح قالت معصي مافيه قلت ليه قالت كذا انا حالفة ماتلمسني يووووووه قلت ليه قالت كذا ولا تناظرني بحتقار قلت مافيه روحه وانتي بكيفك خلينا نخلص ونروح مبسوطين قالت معصي قلت اجل تراني بروح لا اهليك لحالك لاتخربين على نفسك خلينا ننبسط قالت انسى قلت تعوذي من ابليس قالت انسى قلت تراني رايح قالت رح قلت اكيد قالت اكيد ركبت سيارتي وكنت رايح لهم لان فيه عشا بحضره البنت ماتوقعت اني اروح يوم درت من اهلها اني جاي لحالي وترسل من هالتهديدات ومن هالدعاوي طبعاً لسانها اوصخ منه مافيه تسبني بسب لا يمكن لاي رجل يقبله ورغم هذا والله ماني ساكت الا حشيمة لا اهلها ولا هي ولله انها بلسانها الوصخه جزمة وانتم كرامه طبعاً السب سب شوراع يعني مستحيل وحدة فيها عقل تقوله لزوجها لكن ارجع واقولكم مشكلتي قلبي الصغير لايتحمل يعني بالعربي انا التمس الاعذار دايم وابدي حسن النية واقول حالة غضب ومن هالكلام رجعت البيت بعد ماتعشيت عند اهلها ونمت ورحت الدوام واجي للبيت واحصلها ماخذه الولد ورايحه المهم كلمتها قالت ايه رحت قلت بدون اذن قالت مو لازم قلت زين اقعدي لين تشبعين المهم اتصلت على امها وسألتها قلت هي جتكم قالت ايه قلت وتطلع بدون ماتعلمني ولا كأني موجود قالت تبي ارجعها لك رجعتها الحين قلت لا خليها لين تشبع المهم ترسل لي انا ماطلعت الا عارفة اني ماني راجعة وانت انسان مريض وانت الي فيك مايخطيك وانا ماتربيت قلت الي لسانها وصخ تتوقعين انها متربية ؟ قلت يابنت الناس لاتخليني اكبر الموضوع واعلم اهلك بلسانك الوصخ وتعاملك الوصخ وكلامك الي مايقوله الا بنات الشوارع يمكن حتى بنت الشوارع تستحي شوي المهم الجدال مع هالانسانه عقيم ! خليتها فترة وارسلت لها عن التسامح وخلي الامور تمشي ولا تعقدينها والا مصرة على اني مديت يدي ولازم تعترف بخطاك عشان مو كل يوم تمد يدك قلت شوي يابنت الناس انا ماطقيت افرد عضلاتي عليك انا طقيت بسبب وانتي عارفة والمشكلة انك ماتبين تناقشين فيه يعني اعتذر وانطم وبس ليه ماتعترفي انك استفزيتيني قالت عادي ترى الموضوع شعر قلت انا تعوذت منك ومن شرك لكن ماسمعتي وانتي المفروض تطيعين كلامي المهم قالت شوف انا بروح مع اهلي بالاجازة ولا ابي قروشه وابي استانس حول فلوس لولدك بس قلت ماشاء الله يعني هذا اسلوب مايهمك الا الوناسة وان خواتك جو نسيتني وانتي كل سفرة ناطة معي واجي اخذك ويوم يجون اهلك ماتعرفيني يعني حاطتني حق تمشيتك بس حاولت ابين لها موقفي ولا هي راضية الا اعتذر وانا بصراحه مستحيل اعتذر عن خطاء انا مقتنع اني ما اخطيت انا انسان استفزني وتعوذت منه يتحمل مايجيه خلاص حذرته وقلت لها بس مافهمت اكلم ماكلم الا البنت اسلوب اوقح من اول ومصرة على اني علة في حياتها وان العمر قدامها وتبي تعتذر ولا لا اشوف وجهك ويالله بلوك برب بنام !!! زبدة الموضوع ابي رايكم ياجماعة انا بصراحه من يوم شفت اسلوبها كذا معي وقح ولا صرت اعني لها شي ولسانها وصخ اكرهك الله ياخذك فكني وانت ماتسوى شي وانواع السب والشتم صرت احس ان في حياتها شخص ثاني وتبي تفتك مني بأي عذر انا سويت لها بلوك هي وامها وكل رقم تتصل منه سويت له بلوك في جولاتي كلها ابي انساها وانسى كلامها الي قطع قلبي عقب الي سويته لها كله فضلتها على ناس واجد ياعالم وسفرتها ودلعتها ولا يبان في عينها حتى لما اقول اني اسفرك تقول مو منك مره من الدوام يادورة ومره تكون منك يعني حتى مافيه اعتراف قلت يكفي اني اخذك دوام ولا غيرة بصراحه انصدمت هالمره صدمة قويه وابي الحل استمر بالتطنيش ولا كيف ؟ بالمناسبة انا متوقع مخطط في راسها والي هو تتمشى ولا انتهت الاجازة وراحو خواتها بتخلي اخوها يوديها للبيت طبعاً بدون مادري عشان اجي واحصلها واكيد هي اخذت على قلبي الطيب بيقعد يهاوش شوي ويضحك بعدها وش رايكم ياجماعة تكفون والله اني ادور احد اسافر معه عشان تنتهي الاجازة وتدق ولا تجي ولا تحصلني |
رد : عدنا والعود احمدووووووووو ثورة 2013
بصراحه مب معقوووول ...!!
فيه وحده تتصرف كذا ؟؟! او هذى مبالغة منك ... و الاغرب من تصرفها ، تصرفاتك انت ... ليش كل هالسلبية و البرود ؟؟! شو عندها مب عند غيرها و شو هالحياة اللى عايشنها انت و هي ... و حكاية السوق و الحلاق موضوع ثااااني .. تاكد منه و اعرف ايش و راه ؟ انا ما اشكك لكن فعلا مب طبيعي الحين صدقت انه كل ما كانت الزوجة سئية كل ما كان لها احترام اكثر ... سبحان الله ملاحظة .. ما اعرف موضوعاتك السابقة .. |
رد : عدنا والعود احمدووووووووو ثورة 2013
أشوف الوضع طبيعي معاك ،،، أكون صادق معك " من يهُنْ يسهل الهوان عليه ".
أنت تعودت ومتعود على أسلوبها معك ،،، حتى لو تجلدك بالسوط ... ما راح تقول شيء .. رأس مالها أسبوع وتجيها خاضع غصب !! ما أقدر أقولك خلك حازم ،، ولا تخليها عند أهلها تتأدب ،،، لا ما راح أقولك شيء لأنه ما ينفع معك !! أهم شيء عندك ما تطلع من البيت ،،، لكــــن: تتلفــظ بألفاظ الشوارع وبـلغة قذرة عليك إيزي عندك -- احترامك عندها معدوم -- التقـــدير لما تفعل علشانها تحت الصفر " الله يسلم الدوام :) " -- ولا يوجد منك مبادرات جادة لوقف المسرحة الهابطة اللي مقرها بيتك والبطلة حرمك المصون ... والحين نقلت المسرح لبيت أهلها ... ولا تستطيع حتى علي الثبات على موقفك. ==== حبيبــي ،،، نصيحة منــي علشان تتأدب وتحرم تخرج من البيت بدون إذنك ،،، خلها تنقع عند أهلها لييييين تطلع ريحتها عند محيطها ويحسوا أنها مطوله عندهم. أنت اقرصها مره واحدة وبشدة ،،، وحتى عند رجوعها غير نمط حياتك الخضوعية والرضى بالأهانات وسوء الأدب معك ... " القلب الطيب لا يعني الخنوع !! " وتأكد بشكل جيد ... أن مافي حياتها حد غيرك !! لا تثق كثيرا بعد مقولتها اللي تثير الشك !! كود:
قالت تتوقع اني مواعده احد بالسوق يعني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟بالتوفيق لك ... |
رد : عدنا والعود احمدووووووووو ثورة 2013
السلام عليكم
اخوي متورط بمرتي عودة حميدة كنت اظن انك غيرت لقبك بسبب انقطاعي فترة عن المنتدى اصلح الله حالك ويسر امورك اعتقد انها عرفت اسلوبك وانها مهما تسووي بتلاقي انت لها عذر وتعذرها وتسامحها من رايي انك تعلم اهلها عن كل الي صار بالموقف الاخير وتعلمهم سبب الزعل والمسجات توريهم اياها حتى ما تحط الحق عليك وتخليهم يعلمونها السنع لان هم المسؤولين عن تربيتها وخلها عندهم الى ان تعرف ان الي سوته خطا كبير مو بالسهل تتجاوزة في اشياء كثيرة تصير بين الرجل وزوجته بس عمرها ما توصل للسب وبالفاظ سيئة الله يهددها ويسامحها ويصلح لكم الحال |
رد : عدنا والعود احمدووووووووو ثورة 2013
اقتباس:
ولله يابنت الحلال اهلها الظاهر عجزو فيها وهي مليون بالمية عرفت اسلوبي اني مهما زعلت ارضى بس المفروض الشي هذا يقابله انسانه تعرف معنى القلب الابيض لكن للاسف انا حطيتها براسي ومن اليوم بعرف شلون اراقبها |
رد : عدنا والعود احمدووووووووو ثورة 2013
اقتباس:
البنت زي الي كانت ماخذه فكرة عن الزواج بصورة ثانيه يعني انا احس انها عايشة في وهم او احد يوهمها بأن الزواج كله رومانسية او ان المسلسلات التركية لعبت فيها بالنسبة لا اهلها والله مادري وش اقول ولا وش اخلي ان علمت الام ماحصلت عندها خبر وان علمت الاخو الا هو ضعيف مثل البنات لو نزلت دمعة ينهار لو انها مسويه السبع الموبقات صراحه احترت مادري من الشخص المؤثر فيها احس اني جربت الطرق كلها |
رد : زوجتي تثير المشاكل (معدل )
وبصراحه طاري في بالي فكرة بحكم انها مسافرة وجوالها مغلق وانا بصراحه شاك فيها البنت تجلس على البي بي بالساعات وكله كلام يعني تكتب لو برودكاست كان بتقرى وترمي الجوال بس الجوال في يدها على طول تكسر الكيبورد وخرب الماوس والشاشة من كثر ماتكتب
وخاطر في بالي فكرة اني اطلع شريحه بدل فاقد واراقب من بيكلمها على الواتس علماً بأنها صاكته بقفل ولا قفل خزنة ولو اخذه منها عيونها يطلع منها شرار بصراحه انا متردد اسوي الطريقة هاذي خايف من الصدمة وبنفس الوقت ودي اقطع الشك باليقين ابي رايكم |
رد : زوجتي تثير المشاكل (معدل )
اقتباس:
هل كنت تعرفها قبل الزواج ؟وكيف كانت وانت كمان الله يهديك حرك دمك شوي وافرض شخصيتك مش بالضرب والصراخ خلي عندك جديه لما تتكلم معها ولا تتصادم معها كثير ارمي كلمة وقول الموضوع انتهى حاول تحرمها لفترة من اللاب توب والتلفيزيون وقلها اذا عدلتي اخلاقك معي ارجعهم اذا ماتغيرت هددها بأي شي تخاف منه. |
رد : زوجتي تثير المشاكل (معدل )
الله يعينك يا اخي عليها بس انت ليش ماحاولت تمسك اعصابك ولا ترميها بالكاس اللي في يدك جالسين تتعاركون وتترامون بالأشياء اللي موجودة مثل البزارين لا انت فيك صبرولا حكمة ولا هي فيها عقل ولا ركادة هذا وعندكم طفل يعني لو عندكم اكثر من طفل وبأعمار متفاوته كيف بتكون نفسيتهم وكيف بتكون نظرتهم لكم وانت مطاققه انت وامهم
بالنسبة لسب اللي تسبك فيه هذا لازم انك توقفها فيه عند حدها وتمنعها من انها تتلفظ عليك بالفاظ وسخة بس مو بالضرب والعنف الله يهداك فيه طرق اخرى مثل انك تقاطعها وتهجرها وماتعطيها وجه وتحرمها من الأشياء اللي هي تحبها واهم شئ إنك تحقرها لعلى وعسى تتراجع وتتعدل في تعاملها معاك بالنسبة لطريقة مراقبتك لها إذا سمح الله إنك شايف عليها شئ او ملاحظات ملفته لنظر يحق لك مراقبتها وهاذي زوجتك من الحق والواجب عليك رعايتها والحفاظ عليها لاكن إذا كان مافيه هناك شئ يستدعي انك تراقبها وانت واثق منها ومن اخلاقها ماله داعي إنك تجلس تراقب وراها بالنسبة لكلمتها تحسب اني مواعده احد بالسوق اتوقع ان هي تبغى تستفزك بكلمتها فقط لاغير وكان وديتها انت بنفسك لسوق وتدخل معاها وانت وياها تحلقون للولد وكان قصرتوا الشر من اوله الصراحة انا ما ادري عن مشاكلك من اول او اني قد مريت عليها وناسية تفاصيلها لاكن زوجتك متأثرة الظاهر بصحبة ورفقة سيئة ويعطونها من هالنصايح اللي تخرب البيوت وكمان المسلسلات اللي تشاهدها كملة الناقص وصارت زوجتك عايشة بحياة حالمة وتعلمت لتمرد والعناد وطولة اللسان من اللي تتلقاه من رفيقات السوء ومن هالمسلسلات اللي دمرت الكثير من البيوت المسلمة وانت حاول تمسك العصا من النصف وفكر بهدوء بينك وبين نفسك بحل يخليها تحترمك وتسمع كلامك ولو تركتها في بيت اهلها فترة ماتسأل عنها يمكن هي تعيد حساباتها وكمان اذا كانت امها ماتقدرعليها واخوها مايقدر عليها شوف عمها او خالها لو ابوها متوفي شوف واحد كبير وعاقل وحكيم واجلس معاه بوجود اخوها او امها اذا كان خالهاموجود واعطيهم السالفة وفهمهم انك انت تبغى زوجة تحترمك وتحترم كلمتك وتسمعك وتطيعك مو تعاندك الند بالند وقول لهم بعطيها مهلة تفكر فيها وتعيد حساباتها اذا ما تسنعت بنات الحلال واجد اللي يقدرون الزوج ويحترمونه وتحطه الوحده منهم فوق راسها وانا ماني بعاجز مثل ماجبتها بجيب غيرها لاكن علشان ما اظلمها معاي بعطيها فرصة وتعيد حساباتها ولو انكرت الكلام اللي هي تقوله لك قدام امها وقريبها بإمكانك توريهم رسايلها اللي ترسلها لك بالجوال علشان يصدقونك واتوقع لوانت غيرت من تعاملك معاها وتطنشها وتخليها لو شفتها ناوية على الشر وتتركها وتطلع من البيت ولا ترجع الا وقت النوم وتطنشها تطنيشة تخليها تطفش من عمرها وترجع تعدل نفسها اما إنك انت تقول كلمة وهي تردها لك وانت بالمثل وفي النهاية تتضاربون لا هذا مو بحل ولا عاد صارت هاذي حياة زوجية والله يعينك ويصبرك عليها ويصلحها ويهديها لك . |
رد : زوجتي تثير المشاكل (معدل )
اقتباس:
والله اول شي وانا اخوك بسويه الاب توب باخذه منها والشي الثاني الليلة بطلع شريحه بدل فاقد لرقمها وبراقب الجوال وانا متوقع الصدمة بس عسى مايصير فيني شي لاني ممكن ارتكب جريمة واروح لها عند اهلها لو في المريخ وافضح فيها زين اذا ماذبحتها انا سكت سكت بما فيه الكفاية والان الهواجيس تلعب في مخي يمين ويسار والجوال هو الي بيثبت كل شي |
رد : زوجتي تثير المشاكل (معدل )
معليش ياخوي سؤال انت سبق ومسكت عليها شئ ولا كل هذا الشك فيك مجرد ظنون اذا كان مجرد شك في داخلك انتبه ترى في العجلة الندامه وفي التأني السلامه .
|
رد : زوجتي تثير المشاكل (معدل )
اقتباس:
هجرنا ووديناها لا اهلها وطنشناها بالفراش وعلمنا امها وعلمنا اخوها بس لاحياة لمن تنادي بالعربي الاشياء الي تسويها هي تخاف من اخوانها الكبار يدرون وخاصة ابوها وابوها شايب كبير وصحة لك عليها بعد ولا ودي ادخله في هالامور بالنسبة للشك انا مثل ماذكرت البنت البي البي والواتس تكسر الكيبورد وهي تكتب يابنات تشرح لهم وش يصير انا وياها ولا شي ثاني البنت طالعة من البيت وحاطه في راسها انها ماهي راجعة وتقول اصلا ماعاد ابي اتزوج رح دور لك وحدة ثانيه واقول لها هذا الي طلع منك نسيتي كل الي سويته عشانك نسيتي يوم اخوانك كلهم يرمونك علي يوم انك تعبانه حتى مستشفى ماودوك ماحد وداك غيري وقعد معك في العناية الا انا وتقول ماعاد ابي زواج خلاص مادام امي حية مابي شي قلت لها طيب اول ساكت بس الحين ماني فاكها لين اعرف من الي يحرضها علي |
رد : زوجتي تثير المشاكل (معدل )
اقتباس:
اخي الكريم انا اسفه اني اثقلت عليك او ان المتك بكلامي، صدقني اخي لايوجد شئ احلى من الحوار الراقي. و ارى ان تذهبا معا الى استشاري لتعلم بعض اساليب الحوار |
رد : زوجتي تثير المشاكل (معدل )
اخي الكريم لاتستعجل في اي خطوه الشيطان حريص انا اتوقع يبي لك حزم شوي وشد عليها وعلمها ان للبيت نطام وان للزوج حق لاكن مسئله انك تراضيها بعد فتره فهذا الي خلاها تامن انك بترضى متى مابغت انا رايي انك هالحين تقفل جوالك
وتروح تسافر لك كم يوم تريح وتغير جووو وتبدا تفكر وترسم حياتك من جديد وتخطط كيف تدير حياتك ولاجيت ابدا من جديد وعدل في نظام حياتك عموما وفي زوجتك اخوي الكريم الرجال قوامون على النساء وان صار اي شي غير هالكلام معناها فيه خلل تحياتي لك |
رد : زوجتي تثير المشاكل (معدل )
انصحك لا تسافر هذي الفتره عشان بكره لا تتهمك انك راعي خرابيط وبربسه وانك انت الي راميها عند اهلها وتفتعل مشاكل عشان تسافر مع اصحابك .. وبهذا العذر الكل بيصدقوها ويكذبوك ..
الحل برايي الان تكلم بيتهم وتطلب من ابوها موعد عشان تقابلهم .. تروح ووجهك جدي وتجلس الام والاب واحرص انه الاب يصير موجود لا تقول صحته ما صحته (البنت عارفه انه ما وراها رجال عشان كذا مستقويه عليك ) تقولهم انا صبرت على بنتكم وهذي فعايلها وتوريهم رسايلها وسبها وقول انا دفيتها او ضربتها لانها استفزتني المهم احكي كل المواقف بالتفصيل وقول بالاخير انه نفسك عافتها وما عاد تبغاها وشووفو ايش طلباتكم وكيف نرتب زيارات الطفل وبقية اجراءات الطلاق .. هما بيحاولو معاك يمين شمال خليك حازم ومعند على رايك وقول انا انتظر اتصالكم ..واطلع طبعا الحقيقه انت مارح تطلق بس تهديد عشان تصحى وتفوق الزوجه وتعرف انه الموضوع جدي .. انت اغطس بعدها فتره حبذا لو تقفل جوالك بالمره غيب لك حول الشهر وبعدين افتح جوالك واصبر وشوف رح تلاقي اهلها يكلموك ويقولولك نبغى نوجد حل وسط وابغض الحلال عند الله الطلاق طاوعهم بس تثيقل ووقتها ترجع الزوجه بشروطك وان شاء الله تتعدل الامور.. |
رد : زوجتي تثير المشاكل (معدل )
ابوها ماعندها اعرفه ردة فعله بيقول طلقها خلها تنطق ونفس الحكاية حتى اخوها الكبير راح يقول كذا
هم عندهم حل الي هو طلقها وخلها تنطق بالعربي البنت تبي الطلاق وتبحث عن اي سبب |
رد : زوجتي تثير المشاكل (معدل )
ماأدري مااقدر اقول لك شي اخاف اخرب عليك بس الظاهر ان قلبك جدا طيب وتعودت ان المبادره تبدأ منك دايم وصارت تمصخها لان تعرفك انت بتتعذر لها الحين لك فرصة التأديب والله يصلح مابينكم
|
رد : زوجتي تثير المشاكل (معدل )
ا
اخي الكريم احسن الظن بزوجتك ام ابنك هداها الله وهداك حسب ما اتذكر من مواضيعك القديمه ان هذا طبعها بالتعامل معاك وما تغير شي يعطيك مبرر لهذا الشك ليش تظن فيها الظنون ان بعض الظن اثم ان كان بسبب كلمتها فاعتقد انها قالتها بلحظه غباء واعتذر كثيرا على هالكلمه لانها كانت تبي تستفزك اكثر واكثر لا غير وان كان على الواتس اب والمسلسلات فاعتقد ان لك دور كبير في هذا كان لازم من البدايه تحط حد وقانون لوقت استعمال التلفون وطريقه استعماله وبالغالب اكثر المتزوجات يهربون من واقع اهمال الزوج لهم للعيش في حلم وسراب هالمسلسلات الي كانت سبب في خراب الكثير من البيوت العامرة انصحك اخي الكريم لا تفتح باب الشك لان اول من سيخسر هو انت للاسف وابنك المسكين سيكون الضحيه مهما كانت نتيجه هذا الشك لا تترك للشيطان منفذ اليك وان كان هذا توقعك من رد فعل ابوها واهلها فاتركها بدون تواصل وخلها تحتار شنو انت ناوي عليه حسب ما فهمت هي ببيت اهلها وجمعه اخواتها المتزوجات مووووو خلها هاي الفترة تشوف اخواتها شلون يتعاملون مع ازواجهم ومن كل وحدة فيهم ترجع لبيتها مع عيالها وتبقى هي لوحدها يمكن يمكن ساعتها بتحس بالنعمه الي هي كانت عايشه فيها وتحس بغلطتها يمكن ربي يهديها ان شاء الله ربي يصلح حالك ويبدله لاحسن حال |
رد : زوجتي تثير المشاكل (معدل )
بصراحه انا عارف مخططها لما تخلص من جمعة خواتها بتقول لا اخوها يالله ودني وتجي البيت ولا كأنها سوت شي اهم شي مثل ماقالت انها تستانس وحتى تقول ترى ماعلمت امي عشان مايضيق صدرها في الطلعة
هذا المخطط الي بتسويه لكن ماراح اخليها تسويه لاني سويت حظر على كل ارقامهم لو يدقون يطلع مقفل |
رد : زوجتي تثير المشاكل (معدل )
هلا فيك متورط
كيف صلاة زوجتك الآن؟ |
رد : زوجتي تثير المشاكل (معدل )
اقتباس:
طيب انت متى صليت المغرب ؟ وهي متى صلت المغرب والعشا ؟ ولا واحد فيكم ينصح الثاني بالصلاه ! مادام هذا وضعكم شي طبيعي جدا اللي يصير بينكم الله يهديكم ويصلح احوالكم |
رد : زوجتي تثير المشاكل (معدل )
اقتباس:
صلاتها الله بالخير يعني ماتصلي ولو هاوشتها عن الصلاة تشب شبايبها ويطلع لها الف جني |
رد : زوجتي تثير المشاكل (معدل )
اقتباس:
واذا صحيت قمت اصلي بس ساحبة بالمره |
رد : زوجتي تثير المشاكل (معدل )
مشاكلكم سببها ..
انكم ما تقوموا لصلاة الفجر .. |
رد : زوجتي تثير المشاكل (معدل )
بصراحه كل الي ردوا علي كل واحد له وجهة نظر معينة وكل واحد يقول سبب
ودي اشوف اجماع على رأي واحد |
رد : زوجتي تثير المشاكل (معدل )
سبحان الله العظيم
اسمع وانا اخوك اقسم لك بالله العظيم ان جميع ماذكرته عن زوجتك وعن احداث المشكله بالتفصيل وكأنك تتكلم عن اسلوب وتصرفات زوجتي لا بل يمكن وفرت علي كتابه موضوع عن مشكلتي ،، زوجتك وزوجتي نفس المشاكل ونفس النفسيه الخايسه ونفس الطبع ونفس الاسلوب الزفت ونفس الرسايل بالجوال ولكن الصلاة تصلي الصلاه بوقتها اما الفجر احيانا قليله تغفو وانا كذلك اغفو الله يعفو عنا وايضا مالها علاقات ولا اشك ولكن تكثر الكلام مع الرجال بالنت خصوصا تويتر وهذا الشي يوترني احيانا ولما ذكرت ان عندك ولد منها انا نفس الشي عندي ولد عمره 3 سنوات الله يحفظه،،، المهم مالك بالطويله شفت الي صاير معك انا صار معي بالضبط مسكت نفسي 5 سنوات تمد يدها وتشتم وتتكلم بكلام شوارعي سوقي الى ابعد الحدود ومع ذلك صابر ولامديت يدي عليها ابدا ولا حتى تلفظت الفاظ قبيحه على العكس منها ولكن ،،،،،،،، دوام الحال من المحال وفي ليله قد غفى فيها القمر وهاجت رياح الكرامه عندي !!!! تمادت ومدت يدها وصرخت كالعاده (فشلتنا بالعماره) الكل يسمع وماقطع قلبي الا منظر ولدي المسكين يصرخ من الروعه وانا دائما احذرها ماتصارخ عنده ويوم شفت الولد بينهبل منها ماتمالكت اعصابي ولخمتها بكف اقسم لك بالله ان يدي اوجعتني من قوته واعتقد انه جاها اختلال عصبي في المخ :d وبكت حتى جف دمعها وهي ترتب الشنطه وطلبت الطلاق للمره المليون من تزوجنا واخذتها لبيت اهلها وغدفتها خامره من الدموع ونزلتها غير مأسوف عليها وماحرق قلبي الا شوفه ولدي ،،، وانا اخوك هناك نساء هن حطب جهنم كما قال الرسول صلى الله عليه وسلم وعلاجهن الناجع النار وبئس المصير هالنوعيه ماتعرف قدر الزوج وحلمه وتغاظيه عن كثير ،،،،، حسبنا الله ونعم الوكيل انا الان وحيد انام وحيد اصحى وحيد اكل وحيد ولكن اسأل الله العوض ،،، لها الان اكثر من 3 شهور ببيت اهلها وانا الى الان مارميت اليمين وانتظر قدر الله ومايشائه سبحانه خير بلاشك ،،، على فكره انا ما ازكي نفسي ابدا ولاني نادم على الي سويته ولكن ااخر العلاج الكي واسأل الله العون والتوفيق لي ولك ونصيحه مني لاتطلق لاااااتطلق ،،، |
رد : زوجتي تثير المشاكل (معدل )
يا اخي انت ماخذ السلم بالعرض ليش ؟؟؟
لانو كل الي تبيه زوجتك تطنيييييييييش احنا نساء ونعرف وش الشي الي يقهرنا طنشها وبس ترى تحتر اكثر مما تتوقع يمكن تبين لك عكس ذلك انها قويه لكنها لاء ما تقدر على العموم ما انصحك انك طلع شريحه وتراقبها نهائيا شيل الفكره من رأسك اذا هي ما تحبك يبااااااااااان عليها وانت عارف انها تحبك لكن عناد ومسبات بس مش اكتر اكيد المسلسلات مأثره فيها بس لا تقول لها هذا الكلام لانها بتعند اكثر خليها تتركها براحتها انت شوي شوي اسحبها منها يعني خليك شوي رومنسي حبيبتي ابي اجلس معك ومن هالكلام انت الان معصب منها والشيطان يلعب في مخك انا ما اقول صالحها بالوقت الحالي لازم تعرف انها غلطانه لانها غلطاااااااااااااانه لا محال بس مثل ما قلت لك تبيها ترجع لك مكسوره وحاسه بتأنيب الضمير انت لا تصالح هذا الي خلها تضمنك وتقول اخرته برجع لي واذا حاولت تصالحك لا تتصالح من اول مره قول لها انت تبقي معززه مكرمه مع اولادك وانا اجيب وحده تهتم فيني وتحترمين خليك جازم معها ترى الكلام الي اكتبه لك فعااااااااااال لانه من امرأه:) وهي رح تيجي تتسامح منك لو بقيتو كذا شهر ما تتكلمو مع بعض اتحمل هالشهر اعرف انه صعب عليك لكن يجب عليك التحمل لو رجعت ولقيتها بالبيت اعمل نفسك ولا كأنها موجوده لا سلام ولا كلام اتمنى اكون افتدك وان شاء الله تنحل مشاكلكم من غير ما تكبر كبر عقلك والله يوفقكم للخير ترى مو كل المتزوجين مبسوطين ومرتاحين لكن العبره بالي يعرف يتصرف وبالذات الرجال في رعايه الله |
رد : زوجتي تثير المشاكل (معدل )
اقتباس:
:22::22::22::22::22::22: |
رد : زوجتي تثير المشاكل (معدل )
اخوي متورط اهلا بك.. عوداً حميداً ايها المتورط .. وياما اكثر المتورطين
اقول يا عزيزي اركد .. وخلك ثقيل قلبك الصغير هو اللي ناكب عفشك.. لابد من اجراءات حازمة .. اولها قفل الباب تغيره.. ثانياً عط الست الوالدة ايحاء بما تعمله زوجتك من تصرفات وان هذا لا يصب في مصلحة حياتك.. تحسباً لاي ضغوط او انقلابات ثورية ثالثاً .. الاجازة هي كلها اسبوع وبتجيك تدربي دمجتها.. في وقتها تصرف بحزم واتخذ موقف غير شكل الزوجة اللي تطلع من بيت زوجها بهذه الطريقة اعتقد ان عقلها رح يوديها بستين داهية.. هنا ادفن قلبك الصغير واجعله بالحكمة والحزم اقوى قلب رابعاً شكك ومحاولة مراقبتها انا لا اشجع على هذه الامور لانها ظنون قابلة للصواب والخطأ..وترى ماوراها غير دوخة الراس والقلق.. واذا اكتشفت شي يمكن يضرب عندك عرق وتتهور ويصير امور انت في غنى عنها.. فريح بالك واسفهها وحاول تعالج نفسك قبل ان تحاول تمسك عليها شي.. علاجك لنفسك سيعدل نفسك وزوجتك وبيتك كله وفقك الله |
رد : زوجتي تثير المشاكل (معدل )
اقتباس:
طيب ابي افهم النوعيات الي مثلهم ليه يتزوجون بس كذا يجيبون امراض لزواجهم صراحه انا كرهت شي اسمه حريم |
رد : زوجتي تثير المشاكل (معدل )
اقتباس:
ياكثر ما طنشت بس مافيه فائده والمشكلة تسوي مثلي تطنش وتسوي انو ماعلي ولاهمني لكن المره هاذي بسوي طريقة جديدة وهي بلوك لا ارقامهم كلهم بخليها تضرب في مخها ليه مقفل جوالاته |
رد : زوجتي تثير المشاكل (معدل )
اقتباس:
لكن هالمره ابشرك والشريحه طلعتها وقاعد اراقب عشان اريح مخي من الي فيه وعاد اعرف وش يصير فيها لما تحصل الجوال مايشتغل بتجن جنونها الشي الثاني والي اكتشفته البارح اكتشفت ان الاخت ماخذه مفتاح غرفة النوم والباب الرئيسي يعني شكلها مبيته النية ترجع وانا مو في البيت واكيد تقول اكيد بيهاوش شوي ويسكت ولا تقول بجي وبنام قبل يجي من دوامه وش رايكم اغير اقفال الباب |
رد : زوجتي تثير المشاكل (معدل )
ارجع و اقول يا اخي الكريم الحياة ليست حرب،
هناك حوار و يمكن ان تحزم الامور معها. انت الان تثار لنفسك فقط، نعم ان كنت تريد العقاب فاعلمها ان تصرفها له عواقب لتعرف انك لا تكلمها لتثار بل انك تعاقب. الحمد لله ان الله اعطاك فرصة لتفكر جيدا ما هي الاخطاء التي اوصلت حياتكما الى ما هي عليه الان. و حاول ان تضع شروطا لها و لنفسك ايضا فنحن يا اخي غيرو معصومين و كلنا نخطأ. و لم يكن الخطأ منها فقط هداها الله. و كن حازما كلمه الحزم لا تعني القسوه بل تعني الحكمه لحل المشاكل. بعد التفكير و كتابه ما تريد تغييره سواء فيها او فيك، مثلا اكتب لها رساله جاده لنتكلم عن حياتها و نحسم الامر و حدد لها موعدا. و اختار المكان المناسب للحوار و ليكن ابنكما بعيد عن تلك الجلسه و انتظر الجواب. للاسف الشيطان يعبث عندما يبعد الزوج و الزوجه عن بعضهما. ارجو لك كل التوفيق |
رد : زوجتي تثير المشاكل (معدل )
نسيت ان اضيف و لتكن الصلاة ضمن الشروط لكما معا حتى لا تشعر انها هي مجبره على شئ و انت غير مجبر.
فو الله ما ترك عبد الصلاه الا و ابتلاه الله بصده عنه. و عندما يحرم العبد من علاقته بالله فستكون حياته مرتعا للشيطان. اخي الكريم حاول ان تسمعا معا لمحضرات عن اهميه الصلاه. اسعدكما الله بقربه في الدنيا و الاخره ان شاء الله |
رد : زوجتي تثير المشاكل (معدل )
اقتباس:
البنت اخذت على اني ازعل وارضى من كيفي تخيلي لو مهما اسوي لها تنكر فضله حتى السفر معي تنكره احيانا اطلع دورات واجي اقول لها تراني ماخليك لحالك اخذك معي تقول ماهو من جيبك من حساب الدوام !!!!!!!!!!! هذا منطق ياناس يعني مستحيل تقول الله يخليه لي يوديني ويمشيني حتى السفر على حسابي بعد لابد تبعد فضله عني احسن حل والي شفته من ردود الاعضاء والي اعرف انه بيسوي لها مصايب الي هو التطنيش بحيث انها ماتقدر توصل لي لان هي عارفه اني حساس وتلعب على الوتر هذا وتسوي لي حرب نفسيه بالرسايل وبالكلام واول شي بتحصله لما تشغل جوالها وتشوفه مايشتغل راح تشب شبايبها ولما تحاول تتصل وتحصل رقمي مقفل ولما تروح البيت اذا كان نيتها تروح وتحصل الاقفال مغيره |
رد : زوجتي تثير المشاكل (معدل )
اخوي انا بعلق على مقطع بسيط وجزء صغير من مشكلتك لفت نظري ..
انا اشوف ان زوجتك ماتبادرك بالكلام وانت تهمك هذي النقطه جدآ يعني زوجتك مايهمها انها تشكرك وتثني قولآ لكن راقبها فعلآ تلاقيها تترجم الكلام لفعل اما انت فسهل عليك انك تتكلم بلين وحب وشكر وهذي اطباع بالناس والاحظ انك ركزت على نقطة السفر وانت مصدوم ومقهور اننها تقول مو منك السفره من العمل ابي اقولك شي انا اشعر ان زوجتك ماقالت هذا الكلام تقلل من قيمتك او قيمة تعبك لكن هي ردة فعل لانك تكرر عليها وكأنك تتمنن عليها انا سفرتك وانا ماخليتك وانا ماقصرت فتحس زوجتك انك قاعد تقولها بين قوسين انا احسن منك اعطيك واقدرك واسويلك اما انتي ماتسوين شي لي ) وهذا يجرح حتى لو ماتكلمت جرب تقلل من الكلام اني انا سويت هذا الشي لك عشانك انا فعلت كذا لاني احبك !! قلل منها كثير وجرب |
رد : زوجتي تثير المشاكل (معدل )
اقتباس:
اذا صارت مطيعة لي ولا تعاندني اسوي لها اكثر من كذا اذا صار لي احترام اسوي لها اكثر من كذا اما من اليوم كل شي بتنحرم منه واوله الولد لا اخليها تنحرق حرق حرق عليه لين تتوب ولا تقعد عند اهلها تدور لها واحد من الشارع مثل اسلوبها |
رد : زوجتي تثير المشاكل (معدل )
الله يعينك
اذكر زوجتك كانت مهملة بعمل البيت...في مشكلة سابقة..هل لا زالت كذلك؟ |
رد : زوجتي تثير المشاكل (معدل )
اقتباس:
|
رد : زوجتي تثير المشاكل (معدل )
يا اختي الفاضلة مليون مره جلسنا مليون مره فهمنا مليون مره شكينا بس ماحد يفهم اكلم جدار انا
هل تتیح لها مجال هي ايضا تتكلم ام يجب ان تكون المستمعه العاقله و تفهم و تعمل فقط البنت اخذت على اني ازعل وارضى من كيفي الرضا السريع ممدوح و لكن يجب الحوار بعد الرضا مثلا حبيبتي لو تعملي هيك كنت اسعد انسان على الوجود تخيلي لو مهما اسوي لها تنكر فضله حتى السفر معي تنكره احيانا اطلع دورات واجي اقول لها تراني ماخليك لحالك اخذك معي تقول ماهو من جيبك من حساب الدوام !!!!!!!!!!! ممكن استبدال هذه الجمله بعبارة اخرى: لا احب السفر و انت بعيدة عني وجودك بجنبي يسعدني هذا منطق ياناس يعني مستحيل تقول الله يخليه لي يوديني ويمشيني حتى السفر على حسابي بعد لابد تبعد فضله عني احسن حل والي شفته من ردود الاعضاء والي اعرف انه بيسوي لها مصايب الي هو التطنيش بحيث انها ماتقدر توصل لي لان هي عارفه اني حساس وتلعب على الوتر هذا وتسوي لي حرب نفسيه بالرسايل وبالكلام هذا هي الحرب التي عنيت، المشاكل الزوجيه تحل بالتفاهم لا بالتطنيش واول شي بتحصله لما تشغل جوالها وتشوفه مايشتغل راح تشب شبايبها ولما تحاول تتصل وتحصل رقمي مقفل ولما تروح البيت اذا كان نيتها تروح وتحصل الاقفال مغيره اليست هذه هي الحرب بعينها؟؟؟؟؟ |
| الساعة الآن 04:56 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©