|
أشعر بأني وصلت للنهاية"' أرجو مساعدتي رجل الرجال ..Beta 2"'
السلام عليكم ورحمة الله وبركاته
اخي الكريم وضعت مشكلتي قبل شهرين في قسم المتزوجين وطلبت مساعدة الاعضاء ولم يقصروا في ذلك لكن مشكلتي مازالت قائمه ولا أدري هل انا أفعل الصواب باصراري على موقفي موضوعي في قسم المتزوجين بعنوان حياتي على وشك الإنهيار تكلمت فيه عن بعض مشاكلي مع زوجي وتكلمت عن تفاصيل المشكله الاخيره القائمة منذ مايقارب الثلاثة أشهر *تعرضت ﻷذى نفسي كبير من جراء مايحدث من مشاكل متواصله مشكله تلو الاخرى زوجي انسان صعب التعامل معه دائم الانتقاد أفعل كل مأستطيع لإرضائه لكن سرعان مايجحد وينكر يريد شيء متواصل لاينقطع يعني لو طول السنه أنا أداريه واهتم به ويوم واحد بالسنه اغفل عنه او أتكاسل من فعل اي شي ء بسيط سرعان ماينكر ويصفني بالمقصره والمهمله ويبدأ بالمقارنات بامه وزوجات أخوانه .. *بحكم سكني مع اهله في منزل واحد اضطريت اني أتخلى عن خصوصيتي واصير كتاب مفتوح لهم في كل مايخطر علىبالك من اتفه الامور الى اعظمها لدرجة ان زوجي يستشيرهم في موضوع مواصلتي الدراسه الجامعيه من عدمها ومايشيرون عليه به هو مصيري ومستقبلي *مستقبلي يحدد بجلسه عائليه تحتوي على امه واخوانه واخواته ويشاركهم باتخاذ القرار ابناء عمه وهم ازواج اخواته في كل شي تعقد هذه الجلسات أردت من فتره عمل تقويم ﻷسناني فعرض الموضوع عليهم ووصل بأخته ان تأتي لتعاين اسناني ان كانو بحاجه لتقويم اسنان! *مصاريفي ومصاريف ابنائه بيد والدته تحسب معاه الراتب وتحط معاه الأولويات وطبعا في النهايه تطلع متطلباتنا مو من أولويات الحسبه ومالها داعي من الأساس يتكلم بلسان امه دائما (والله قبل كانوا عايشيين وماتعطلوا على عطر او كريم ) (والنعمه زوالة كافي لاقيه تاكلين وتشربين غيرك يبي خبزه مو لاقي وانتي موقفه الدنيا عندك على عطر وكريم) *وصلت بوالدته ان تشير عليه بأن لا يشتري حتى مؤونه للبيت هو يأكل من طبخها وأنا يوديني يوميا عند اهلي اتغدىوأتعشى عندهم والله اني تعبت من محاولة اصلاح ماتفسد امه ذقت ذرعا بهم *في الفتره الأخيره اصبح يرفض حتى الخروج من المنزل بمنطق ان الطلعه يبغالها فلووس وحتى لو بنروح البحر يقول خسارة بنزين ! حياة ممله مليئة بالمشادات الكلاميه والمشاكل التي لاتتوقف .. يظهر لي قوته وعناده وهو في الحقيقه عكس ذلك لايستطيع اتخاد اي قرار بمفرده.. مشاكلي معه تكبر من التدخلات موقف أمه الاخير يثبت كل ما أقول بعد ماسمعت صراخ زوجي وكلماته الجارحه وصفعه لي على عيني جاءت هي لتشجيع ابنها على مايفعل وتنهي مابدأه من صراخ ووصفتني بأني ماكله خير ولدها وجابت سيرة دراستي وان زين سمحلي ادرس وعايرتني بالغداء إللي زوجي يجيبه من المطعم في حال رجعت متأخره من الجامعه قالت بصريح العباره موعاجبك روحي لاهلك طلعت من البيت ووقفت انتظر اهلي في الحوش لكن رفضت اني انتظر في البيت قامت تصارخ وتقول خلها تطلع برا¶ طلعوني في الشارع ثم انكروا كل هذا أنا في بيت اهلي من جراء هذه المشكله عقد اجتماع بطلب من أهلي لحل المشكله وقاموا بعرض مساعدات ماليه لحل مشكلة السكن ولم يتوصلوا معه لحل كأنه اتى للإجتماع لتبرأة نفسه وتبرأة امه فقط اصريت عليه بسكن مستقل او باب خاجي لتقليل احتكاكي بهم لكن كلا الحلين رفضهم يبيني ارجع بدون شروط اﻵن علاقتي منقطعه فيه فقط ياتي لاصطحاب ابنائه ويخرج معهم لمدة ساعتين يوميا اويوم ويوم ولا أدري ما هو مصير حياتي معاه.. أعلم اني أطلت في حديثي عن مشكلتي ولكن آمل ان يتيسر لكم قراءة ماكتبت وان استطعتم الاطلاع على موضوعي في قسم المتزوجين ففيه تفاصيل لم اذكرها هنا أنا في انتظار نصحكم لي. |
رد : أشعر بأني وصلت للنهاية"' أرجو مساعدتي رجل الرجال ..البليغ"'
ابنتي الكريمة دموع بريئة:
موضوعك سبق أن اطلعت على حالات مماثلة ووعيته جيداً بدون الحاجة للتفاصيل ولتعالجيه لا بدأن تتصوري الوضع من رؤية كاملة برؤية مدرب وليس كلاعب في القضية كما أتوقع من قصتك عرفت بيئتك التي تعيشين فيها وهي محكومة بنظام اجتماعي صارم يتصف بالآتي 1- ينبني على مصلحة الأسرة الكبيرة وحمايتها على حساب الفرد وعلى حساب الأسرة الصغيرة فكل شي لا بد أن يمر أولا على هل يفيد الأسرة الكبيرة أو ينقصها 2- أي فرد من خارج الأسرة فهو ضد الأسرة مهما كانت صلته. 3- لا كلام للصغير بحضور الكبير. 4- تقاس الرجولة بالزيادة والنقص بمقدار نفع فرد الأسرة الكبيرة لمجمل الأسرة الكبيرة والانضباط بنظامها العام أي ينفذ توجيهات الكبار. 5- ترضي الأسرة الكبيرة غرورها بقوة سيطرتها على أفرادها وأسرهم الصغيرة وبالتالي تفخر على غيرها من الأسر بأن الجميع يحترمنا ولا أحد يطلع من شورنا أي نقدم مصالحنا على مصلحة أي واحد ليس من الأسرة 6- تتم التضحية بكل شيء بمقابل حماية الأسرة الكبيرة. 7- يتم تكييف الدين وضوابط الأخلاق بما يحقق هدف الأسرة الكبيرة. بمقابل ما سبق هناك ضحايا من الطرفين أبناء الأسرة المغلوب على أمرهم بين العقوق أو الظلم ومن يتبع هؤلاء الأفراد من زوجات ومنهم أنت. 8- نشأت في المجتمع من توالي هذه السلبيات مجموعة من الأمثال التي تحكي هذا التصور مثل ( اللي ماله ظهر ينجلد على بطنة) يعني الحماية من الضرب هو أن يكون لك سند يحميك وليس إنصاف الضارب أي يتسلطون على من لا يقاوم. ما تقومين به هو انتظار ان يبادروا لمعاملتك بالمثل. 9- لماذا أنت بالذات الجواب أوضحتيه بكلمة أزواج أخواته أولاد عمهم أي من الأسرة الكبيرة والكل مصلحتة متشابكة وخاضعين للكبار فيها وبالتالي منتظمين. 10- وضحوا لك الموقف يا تتبعين هذا النظام أو تخرجين. النصيحة: أوصلي لأسرتك ما تعانين وأن الموضوع لا يخصك كفرد مع فرد زوج وزوجته بل هو نظام أسرة مقابل أسرة وبالتالي تظهر قيمتك عن أسرة زوجك فيفرضوا على زوجك احترامك. ولا تراهني على زوجك بموضوع الإنفصال فموقعه من الأسرة لا يجعل له امتياز صناعة قرار وإن كان أول المتضررين بفقد وجودك في بيته من خدمتك وصبرك. أين الجانب الديني في هذا الموضوع غالبا يتدخل أهل الخير والدين في مثل هذه المواضيع بحساسية الخوف من نشوب حرب أسرية فينظرون حماية المجتمع من المشاكل الأكبر على حساب المشاكل الأصغر. ختاماً إذا كان هذا التحليل صحيح فحسن وإلا فأرجو إفادتي بالصحيح لنتابع. لعلك تطلبين الأستاذة بيتا فهي خبيرة بمثل هذا وتعرف الوضع أدق مني وستشير عليك بخير بإذن الله. |
رد : أشعر بأني وصلت للنهاية"' أرجو مساعدتي رجل الرجال ..البليغ"'
السلام عليكم ورحمة الله
تحليلك للمشكله فيه من الصحه بشكل كبير اضرب لك مثال يقرب لك أكثر أخو زوجي متزوج من خارج العايله بعد وساكن معانا بالبيت بس شخصيته تختلف تماما عن زوجي انسان كتوم لأبعد حد لما تشوفه امه واهو طالع مع زوجته وعياله وتسألهم وين رايحين مستحيل يعطيها اي تفاصيل طالعين نغير جو بدون ذكر وين وليش.. * واذا عنده اغراض مايدخلها البيت إلا في وقت الكل نايم يعني الصبح مثلا وانا طالعه بروح الجامعه اشوفه ينزل اكياس من سيارته **زوجي العكس تماما .. بدون ما أحد يسأله اهو يقول بطلع المكان الفلاني بشتري الغرض الفلاني اي شي أطلبه منه يروح يستشيرهم فيه يعني مثلا طلبت منه اشتري شوية اغراض يقولي إلبسي ولبسي العيال وانزلي لاني بنزل اجلس مع امي على ماتخلصون وما انزل الا إهو قال لهم اني طالبه منه اغراض وكل وحده من أخواته تعطيه راي ويقولون له انتظر للتخفيضات لاتشتري ألحين وامه تقوله لا ليش المخاسير ماله داعي وبعدها نطلع ويجلس يدور بالسياره ويرجعنا البيت أو يقول مالي خلق اتسوق خليها بعدين. إذا ناقشته وقلت له انت وعدتني) اوليش غيرت رايك )) او انت لاغي شخصيتي وشخصيتك ومخلي اهلك يمشونا بكيفهم) يسويها مشكله توصل للتهديد بالطلاق وصراخ وسب وطرد والكل يسمع ويتفرج .. وتوصل المشكله لأهلي يتكلمون معاه احترم خل امورك بينك وبين زوجتك يقول أنا مافيني شي غلط انصحوا بنتكم اهي تنرفزني وتوصلني لهالحد والله يعلم مجرد عتاب بسيط مني او كلمة" ليش "ويسوي اللي يسويه.. ودراستي مثلا امه كانت تقوله اهم شي ماتدفع ولا ريال اهي تبي تدرس تتكفل بمصاريفها وفعلا مايعطيني ولا ريال بالعكس انا اعطيه اوقات قيمة الغداء عشان لاتصير مشكله ويشيش علي ويطلعني من الجامعه و اهله يدخلون له من باب زوجتك ماطبخت ومشغوله عنك بدراستها وهاملتك ووو.... من جهه ثانيه أهله كتومين لابعد حد يعني امه مستحيل تاخذ منها كلمتين على بعض حتى زوجي تخبي عليه وتلف وتدور بالسوالف وتكذب خواته نفس الشي ساكنين في البيت إللي جنبنا ومتواجدين يوميا مع امهم واخبارهم ماندري عنها كل شي سر ويتطفلون ويتدخلون في خصوصياتنا *التناقض في شخصيته ذابحني 1/انسان عصبي 2/مايمسك إلسانه من الشتم والسب 3/شكاك كل شي يفسره غلط يتصيد علي الزله'عشان يبرر شكه خواته يعطف ويحن عليهم وحده من خواته متزوجه من برا العايله واي مشكله تواجهها مع زوجها يستعينون بزوجي يحلها وأغلب مشاكل اخته تمر علينا بس تصرفه يكون عكس ونقيض للنصايح والمبدأ اللي يسويه على زوج اخته احس المشكله بنسبه اكبر في زوجي .. اولا عاطي اهله مجال كبير للتدخل فيما لايعنيهم واتخاذ القرارات .. وثانيا تصرفاته الشنيعه اللي مالها سبب.. اتمنى ان وضحت لك الصوره بشكل اكبر |
رد : أشعر بأني وصلت للنهاية"' أرجو مساعدتي رجل الرجال ..البليغ"'
[SIZE="3"]قانون القسم يمنع تنفيذ الطلب والسبب هنا ::: http://www.66n.com/forums/showthread.php?t=240566
|
رد : أشعر بأني وصلت للنهاية"' أرجو مساعدتي رجل الرجال ..البليغ"'
اقتباس:
اتمنى استفيد من عضوين على الاقل وهذا شروط القسم اتمنى مساعدتك بتغيير العنوان «مارد الجنوب» |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
أعتذر إن كنت تأخرت عليكِ عزيزتي .. ما شفت اني مطلوبة الا الان
برجع برد أوسع بعد ما أطلع على مواضيعك الأخرى لكني لدي كم سؤال فهمت بأن زواجك منذ سنوات .. هل وضعك معه ومع أهله من أول زواجك ؟ كيف وضع أهلك ورجال عائلتك مع عائلته ومعاه ؟ هل لهم احترام عندهم وإن لم بكن فهل لأحد ما وزن وكلمة لديهم ؟ هل توضحين لزوجك سواء بالتلميح أو التصريح الفرق بينه وبين أخوانه وكيف أنهم حافظين لزوجاتهم ولأنفسهم خصوصيتهم وكذلك أخواته ؟ كم عمر اطفالكم وهل تعرض أحدهم سابقا لنقد من أهله وكيف كانت حميته عليهم ؟؟ هل هانوا عليه مثلما هنتِ كيف علاقتكم الخاصة قبل المشاكل أو بفترات الهدوء؟ |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
[QUOTE=Beta2;2924917][COLOR="Purple"]أعتذر إن كنت تأخرت عليكِ عزيزتي .. ما شفت اني مطلوبة الا الان
برجع برد أوسع بعد ما أطلع على مواضيعك الأخرى لكني لدي كم سؤال فهمت بأن زواجك منذ سنوات .. هل وضعك معه ومع أهله من أول زواجك ؟ متزوجه من 4سنوات ..نعم من بداية زواجي يتدخلون في كل شي ويسببون لي مشاكل مع زوجي كيف وضع أهلك ورجال عائلتك مع عائلته ومعاه ؟ هل لهم احترام عندهم وإن لم بكن فهل لأحد ما وزن وكلمة لديهم ؟ اهلي ناس طيبين كثير زوجي في وقت المشاكل يهينهم ويقط كلام ماينقال وبعد ماتنتهي المشكله ترجع علاقتهم مع الايام اهله مالهم علاقه بأهلي مايباانون الا وقت المشاكل ابوي عجز يتكلم مع زوجي وتكلم مع اخوانه طبعا باحترام وبهدؤ بس مافي نتيجه خالي بعد تكلم معاهم في مشكلتين صاروا قبل هالمشكله ومره راح لهم في بيتهم لان امه كانت مسويه مشكله وعاطيه رقم زوجي وحده كان يحبها وصارت تدق عليه ورسايل حب وتقوله امك عطتني رقمك وابي اشوفك كلمهم خالي بس مالقيت نتيجه المره هذي صار إجتماع في بيت عمي لان زوجي رافض يتفاهم مع اهلي او حتى يدخل بيتنا وعمي تكلم معاه وبدون فايده هل توضحين لزوجك سواء بالتلميح أو التصريح الفرق بينه وبين أخوانه وكيف أنهم حافظين لزوجاتهم ولأنفسهم خصوصيتهم وكذلك أخواته ؟ ايه اكثر من مره قلت له شوف شلون اخوك يسافر ويروح ويجي وماحد يدري ماحد يملي عليه سوي كذا او لاتسوي كذا وكثير اقوله واقضوا اموركم بالكتمان وان مو كل شي ينقال في اشياء مفروض بيني وبينك وانت اللي تقرر مو تسمع من هذا وهذاك وتاخذ برايهم طبعا رده دائما لاتكلميني بالاسلوب هذا ترى ماني طفل تعلميني او اسكتي لااتنرفز عليك كم عمر اطفالكم وهل تعرض أحدهم سابقا لنقد من أهله وكيف كانت حميته عليهم ؟؟ هل هانوا عليه مثلما هنتِ بنت عمرها3سنوات وولد عمره سنه اطفالي ماينزلون لأهله لان شفت اسلوب امه مع عيال اخوه وشلون تتضايق منهم فرفضت ينزلون بدوني او بدونه مرات اعياله يتعرضون للضرب ويتأذون ونروح المستشفى نعالجهم والسبب عيال اخوه وعيال خواته وعادي عنده حتى كلمه مايتكلم كيف علا قتكم الخاصة قبل المشاكل أو بفترات الهدوء؟ [/OLOR][/QOTE] علاقتنا الخاصه مرتاحين من بعض اوقات يقولي ما اقدر اصبر عنك اشتاق لك بسرعه انتي تريحيني وقت المشاكل طبعا لما تكون مشكله بسيطه يقولي كان نفسي فيك اليوم بس سديتي نفسي عن كل شي واهو يكون طبعاا اللي مفتعل مشكله بس دايما يرمي اللوم علي ..* اتمنى اني اكون جاوبتك بالشكل الصحيح واي استفسار انا في انتظارك |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
قرأت مواضيعك السابقة .. وإجابتك على أسئلتي اخر شيء من زوجك كان لما قال أنه بيمر ياخذك السبت على أساس أنك وقفتي القضية ووالدك ما كان موافق على رجوعك معاه هل رجع زوجك تواصل معك بطريقة مباشرة أو غير مباشرة بعدها ؟؟ وما هو رأي والدك الان ؟؟ ما الطريقة التي يراها مناسبة للتصرف الان ؟ سأعود لقراءة مواضيعك لوضع تصور نهائي لشخصيته وشخصيتك |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
[QUOTE=Beta2;2925002][COLOR="Purple"]
قرأت مواضيعك السابقة .. وإجابتك على أسئلتي اخر شيء من زوجك كان لما قال أنه بيمر ياخذك السبت على أساس أنك وقفتي القضية ووالدك ما كان موافق على رجوعك معاه هل رجع زوجك تواصل معك بطريقة مباشرة أو غير مباشرة بعدها ؟؟ انا رسلت له في الواتساب اني ابي اتفاهم و اتكلم معاه عن كل شي وطلبت اني اشوفه في البدايه رفض نلتقي وقالي تكلمي شنو اللي بتقولينه اصريت اني اشوفه ونتكلم طبعا ابوي مايدري امي بس اللي تدري طلعنا يوم الاربعاء الساعه 8الصبح شراء لي قهوه ورحنا البحر نزلنامن السياره مسك ايدي وقالي شيلي النقاب ابي اشوف وجهك وحشتيني تكلمت قلت له اني عشت معاك سنين انجرحت فيهم كثير خواتك ماقصروا و امك الله يسامحها ماقصرت بعد كلام مثل السم تقطه علي وانا حتى كلمه ماسمعت مني عاملتها باحترام واخر شي تطردني انت معاها قدام الكل شنو اكثر من هذا تبيه يصير عشان اتخذ قرار وأوقف كل هالمهزله اللي تصير كافي تدخلاتهم بكل شي كانك جاهل مو رجال تدير عايله لما قلت له هالكلمتين طالعني بنظرة الاستحقار مالته وقالي انا رجال غصبا عنك قلت له طيب انا نغسيتي ماتنقبل اني ارجع واعيش مع هالاوادم مره ثانيه شنو الحل عندك قالي ايجار ماني طالع ومابي احد يعطيني فلوس قلت طيب الدرج مو اسهل حل عشان الكل يرتاح قالي الدرج لازم اسنده على بيت خواتي وعيال عمي رافضين اني اسوي درج بطوفهم ما اقدر قلت له خلاص الظاهر مافي حل قالي رجعي معاي وبعيشك ايام ماعشتيها طول الاربع سنين قلت له ما أقدر اعيش في بيت اهلك وكأن شي ماصار يمكن امرض نفسيتي تعبانه للحين كل ما أتذكر قلبي يعورني على اللي سويتوه شلون تبيني اعيش معاك هناك ركبنا السياره راح وداني طريق الشاليه وقالي مااشتقتيلي اشرايك ننزل قلت رجعني البيت خلاص انت ماتبي حل نزل الشاليه وقام يكلم الرجال اللي للحجوزات وركب السياره قالي يالله نزلي قلت له انت ماتحس بدل ماتشوف حل حق حياتك تفكر هالتفكير قالي خلاص ماتبين بكيفك ومشينا وصلني البيت وقالي لمي اغراضك وجهزي عيالي ويالله نرجع بيتنا بعد ساعه بمر عليك قلت له لاتعب نفسك ولاتغصبني على شي ما ابيه قالي بجي وبترجعين معاي دخلت بيت اهلي امي كانت تنتظرني قلت لها اللي صار اخوي درى اني طلعت معاه تضايق وقالي انتي بدون كرامه ترى وبيدوسك اكثر الساعه4 العصر دق علي وقالي بمر أخذك قلت له لاتجي واصلا اهلي مو مو راضين اني ارجع معاك بدون حل قالي قولي لاهلك ان احنا تفاهمنا وخلاص حياتنا بتتغير وبتشوفين قلت لامي تقول لابوي وقال ابوي نفس كل مره مايصير الا كل خير وخلاص ماراح اصارخ وماراح اسبها ويومين ويرجع مر زوجي الساعه10 الليل فتحت له امي قال ابي زوجتي وينها وين عيالي طلع له ابوي وتكلم معاه وقال له بنتي انذلت ذل كم مره طردتها وهالمره امك تطردها يعني مافي احترام لامنك ولا من الاهل شلون اخليها تعيش في بيتكم مره ثانيه لا اسمح لي ترى عندها بيت وعندها ابو اذا انت راخص فيها ترى اهي غاليه عندي ارتفع صوت زوجي وطلعت انا من الغرفه ووقفت جنب ابوي قال زوجي انا تفاهمت مع زوجتي وابيها ترجع واهي بتعيش وبتشوف قاله ابوي اهي تبي سكن مستغل او على الاقل باب خاص فيها وتدخل على طول شقتها بدون ماتحتك بأحد قال المشكله مو في السكن المشكله فينا احنا لو تفاهمنا خلاص قاله ابوي لا انت ماتبي تحل المشكله من الاساس ووارد انها تتكرر لان البيئه نفسها ماتغيرت قال زوجي براحتكم وطلع. .. |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
..
وما هو رأي والدك اﻻن ؟؟ ما الطريقة التي يراها مناسبة للتصرف اﻻن ؟ احس موضوعي ماحد يتكلم فيه حتى خواتي تعودوا اني معاهم وامي تقولي ادعي وتقربي من.ربك عشان يفرج همك ابوي الله يشافيه مريض من 3اسابيع تقريبا معاه القدم السكري ورجله متورمه ويادوب يروح المستشفى يوميا ويرجع يرتاح ماتكلمت معاه في شي من صار تعبان .. سأعود لقراءة مواضيعك لوضع تصور نهائي لشخصيته وشخصيتك* يعطيك العافيه تعبتك معاي .. |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
حسيت من اللي قرأته أن زوجك يحبك لكنه ضعيف أمام أهله وما يحب يسمع منهم نقد عليه لأنه لما أنتي تنقديه يقدر يعصب عليك ويسكتك لكن ما يقدر يعصب على والدته مثلا وبالتالي بيحاول يسكتها بأنه يطيعها ويظهر لها قوته عليك .
انتي جربتي النقاش المنطقي معاه وما فاد لأنه هو أساسا فاهم ومقتنع بكل كلامك وما يحتاج تقنعينه لكن ما عنده القدرة أو الدافع القوي اللي يخليه ينفذ القناعة والكلام المنطقي هذا . واللي ممكن يخليه ينفذ حاجة من ثنتين أو الحاجتين سوا .. الخوف من رجالك وعزوتك .. والعاطفة . العاطفة بأن يظل عارف وفاهم بطرق غير مباشره أنك تحبيه وتشوفيه رجلك , ومشكلتك بتدخلات أهله فقط . ولو ناقشك فهميه بأن أمرك الان والكلمة لوالدك مو لك .. ومع أنك زوجته وتحبي ترجعي وتلمي شمل عائلتك لكن عدم الشعور بالأمان معاه يخليك ما تقطعي حبلك مع والدك ولا تقدري تخرجي عن طوعه أو تزعليه لأنك ما تضمني يجيك الطلاق بأي لحظة بما أنه صار طرد وسب من قبل وفقدتي الشعور بالأمان . فهمتيني ..أقصد تشدي عن طريق أهلك وترخي وما تقطعي الحبل معاه على أساس أنه انتي بعد عندك الرغبة ترجعي لكن ما تقدري في ظل استمرار وضعكم الحالي مع أهله . الخوف من عزوتك ورجالك هو اللي ممكن يفرض الاحترام بعلاقتك مع زوجك ولهذا أنصحك تسمعي لكلام والدك وأخوك وتطيعيه لأن لو رجعتي الحين بدون أي وعود منه أو أي شروط مهما كانت بسييطة ممكن يرجع اسوأ من أول ما أعرف اذا كان زوجك وعدك قبل هالمرة وأخلف بوعوده ... هل من معرفتك فيه ممكن يلتزم بكلامه اللي قاله لك يوم طلعتي معاه ؟؟؟ هل فعلا ممكن يغير أسلوبه معك ؟ اذا كان نعم فارجعي لوالدك وقولي له أن زوجك كلمك ووعدك بكذا وكذا وحاولي تقنعيه أن يتقبل منه وأنه أخذ درس باللي صار للحين .... اطلبي من زوجك يقعد مع والدك وخالك واخوك ويوعدك أمامهم وبالتفصيل كيف راح يتعامل معك وكيف راح يفصل بينك وبين أهله وما يسمح لهم يتدخلوا بحياتكم بدون درج وبدون شقة منفصله لأن فعلا المشكلة فيه وبشخصيته مو بالبيت نفسه ... أما إذا ما تثقين بوعود زوجك فأنصحك تتركي الأمر لوالدك لأنه أكيد شايل همك وما يحب لك الطلاق مثلك وأكثر بعد لكنه رجل ويعرف الرجال كيف تفكر ويعرف زوجك ونوعيته . تصرف زوجك والفرق بين تعامله أول المشكلة واستكباره على أهلك ورفضه يجتمع ببيت والدك وأصر يجتمع ببيت عمك .. أما الان تنازل ودخل وتكلم ويا والدك وبهدوء .. هذا يدل على أن والدك رأيه صحيح .. وان زوجك يحتاج موقف قوي حتى يتعدل . سؤال متى طلعتي معاه ؟؟ تقولي من يوم مرض والدك من 3 أسابيع ما راجعتي والدك بالموضوع ..أفهم من هذا أن طلعتك مع زوجك كانت قبل ال 3 أسابيع ومن بعدها ما تواصلتو وصار يجي ياخذ أولاده كل كم يوم ساعتين ويرجعهم . ان شاء الله يكون ردي واضح ... مجال المفاوضات بين الزوجين وكيف تقدري توصلي لأفضل وضع مع زوجك بعد الرجوع أتوقع الأخ البليغ أفضل مني فيه .. وبما أنه ما انتبه لموضوعك فتقدري ترسلي له على ادارة القسم وتطلبي من المشرفات يوصلوا له رسالتك . أعطيه رابط هذا الموضوع وان شاء الله يكون له إضافة مفيدة . أي سؤال أو متابعه أو تطورات أنا حاضره أساعد باللي أقدر عليه . |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
سؤال*متى طلعتي معاه ؟؟ تقولي من يوم مرض والدك من 3 أسابيع ما راجعتي والدك بالموضوع ..أفهم من هذا أن طلعتك مع زوجك
كانت قبل ال 3 أسابيع ومن بعدها ما تواصلتو وصار يجي ياخذ أوﻻده كل كم يوم ساعتين ويرجعهم . طلعت معاه بنفس اليوم اللي كان مستدعيني فيه بالمحكمه 8-6 ومن بعد ماطلع من بيت اهلي ماتواصلنا صار يجي ياخذ اولاده ويطلع معاهم بس اشلون اوصله بعد اللي صار اني ابيه بس مشكلتي بتدخلات اهله؟* ابوي قاله هالكلام وانا قلته له بس ألحين مادري شلون يفكر اكيد راسه متروس علي لان تفكيرهم الجماعي عمره ماصار بصفي كل ضدي .. |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
اقتباس:
ولو تستشيري والدتك وأخوك قبل تتصرفي يكون أحسن . وطمنيني عليك لو صار تطورات ..ربي يسخر لك زوجك ويحنن قلبه عليكم |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
بإنتظار تعقيبك مستشارنا رجل الرجال بارك الله فيك
|
رد : أشعر بأني وصلت للنهاية"' أرجو مساعدتي رجل الرجال ..Beta 2"'
بقولك عن مشكلة صارت لي معاه في بداية زواجنا وشوفي شلون ردة فعله
انا يوم اتزوجه راعيته كثير بمهري عطاني مبلغ بسيط جداا واهله كان عندهم فلوس وعايشيين بخير لكن الكل رفض يساعده بالمهر حتى طلب سلف من امه ماوافقت قبل حفلة الملكه بيومين دقت امه على امي وقالت مانبي حفله لان عندنا حالة وفاة قالت امي دام عندكم وفاه عادي نأجل الملكه قالت امه لا بس الحفله مانبي بعد الملكه كلمت زوجي وقلت له ان كان نفسي بحفله بس الظروف الوفاه اللي صارت عندكم خلتنا نكنسل كل شي تدرين انه استغرب !وقالي اي وفاه ..قلت له بنت خالتك اللي توفت قالي ايه بس بنت خالتي صار لها سنه من توفت تخيلي كانت مسويه هالخطه هذي عشان لايدفعون فلوس الحفله.. وقبل زواجي بكم اسبوع زوجي سيارته تعطلت فيها المكينه ويبي احد يساعده ويعطيه فلوس اهله كل واحد قام يتحجج جاني وقالي عطيني 5آلاف من مهرك وبس كم يوم وبجيبهم لاني متعطل بدون سياره وماني قادر حتى اجيب كروت الزواج عطيته المبلغ وانا كنت محتاجته بس قلت كم يوم وبيجيبه قرب زواجي كان باقي كم يوم بس وما عطاني ولا ريال قالي ماقدرت ادبر الفلوس توهقت حجز التصوير مادفعت له وفستاني ماجبته ابوي عطاني وجاب لي كل اللي ناقصني بعد الزواج زوجي كان يقولي مجرد مايصير عندي بعطيك مهرك اللي اخذته تقريبا وانا حامل بالشهر الثاني زوجي باع سيارته وصار عنده المبلغ سألته بتعطيني فلوسي ؟ تغير وجهه وقالي يصير خير وبعد كم يوم قالي اخوي بيخطب ويبيني اساعده بالمهر قلت له بتعطيه فلوسك كلهم قالي مدري قلت له ساعده بس مو بفلوسك كلهم قالي بشوف طلع راح لاهله وقال لهم ان بيرجع لي مهري وانا في هالوقت كنت انام بيت اهلي لان كان معاي نزيف ومنعتني الدكتوره اركب درج فصرت ابات عند اهلي المهم دقت اخته الساعه 12بالليل على أمي وقامت تقول لها اخوي بيخطب وتوه بس قال لنا نخطب له وبدل مايعطي بنتك فلوس يجمعهم حق العروس الجديده وبيسكنها في شقته هنا عندنا وبنتك خليها عندك واخذت التلفون امه وقامت تصرخ وتقول حسبي الله عليكم تفرقون الأخوان عن بعضهم وماتبونهم يتساعدون وبعد ماسكروا الخط جاء زوجي عندنا وجلس يلم اغراضه كلها واخذ مفتاح الشقه من عندي وقام يقولي وامي واقفه ماحد طقك على ايدك وقالك تساعدي معاي وعطيني من مهرك وترى كل الزوجات يساعدون ازواجهم لاتاخذين مقلب بنفسك اما انك تقولين لاتعطي اخوك افلوسك كلهم وعطني منهم هذا لأنك تحقدين على أهلي وماتبين أساعدهم وبعد عشرين يوم من المشكله جاء بيت اهلي ومعاه امه وخواته واخوانه دخل المجلس هو واخوانه مع ابوي وامه وخواته جلسوا معاي ومع امي ..امه كل كلامها عن الفلوس واخته تقول اخوي والله ماكان يبي يجي بس احنا غصبنا عليه عشان اللي في بطنها خلوني احس ان مالي قيمه ذلوني عشان بس طلبت فلوسي.. ولعلمك اخوهم اللي سوو المشاكل هذي كلها عشانه لاخطب ولا تزوج للحين.. بعد ماطلعوا من بيت أهلي جلست اصيح قدام اهلي وقلت خلاص ما أبيه ابي اتطلق منه وبنفس اليوم الفجر جاني نزيف وتقلصات في الرحم وتنومت في المستشفى ويوم عرف اني في المستشفى زارني وقالي ان اللي في بطنك شكله مشوه ولا معاق لان رب العالمين يبيه ينزل وكل مره يجيك نزيف عشان ينزل بس المستشفى يضربونك ابر ومثبتات و امي بعد تقول لو ينزل احسن لان شكله فيه بلاء وانا والله ماجاني النزيف الا من مشاكلهم.. طلعت من المستشفى صار زوجي يمر ويطمن علي وانا عند اهلي وانا قلبي مقهور وامي توصيني اني ماأفتح معاه مواضيع عشان لا أتعب نفسي ويرجع النزيف بس ما قدرت واجهته بكلام امه واخته انه يبي يخطب .وبيجمع حق العروس الجديده بدل مايعطيني فلوس وكلام اخته بأنه مغصوب على جيته بيت اهلي واهم اللي جابوه بالغصب قالي ماقلت لهم هالكلام وانا اللي لزمت اجي بيت اهلك واجيبهم معاي عشان القلوب تتصافى احترت مدري اصدقه ولا اصدقهم اوقات أفكر اقول أهم يبون يعرفون كل شي ويتدخلون بكل شي بس هل بتوصل معاهم انهم يألفون كلام ويقولون لي هذا كلام زوجك ليش طيب؟! لذي الدرجه يبون يخربون بيني وبينه لحد مانتطلق ولا اهو يقول هالكلام واهو معصب واهم ينقلونه لي وبعد مايهدى ينكر كل شي!! من الكلام اللي وصلوه لي وجرحني وللحين يأثر فيني كل ماأتذكره "غيرها عشر ماتهمني لاهي ولا اللي في بطنها تبي تسوي اللي في بطنها سلاح ضدي بس ماهمني بطلقها وبيني وبينهم محاكم ماوراها الا المخساير والهم ولدنا يبي يخطب وحده احسن منك مره واجهتهم مع بعض زوجي واخته.. زوجي عصب وماقبل يتكلم وعصب على اخته وقالها خلاص روحي انا بتفاهم مع زوجتي.. جالسه اتذكر مشاكلي معاه ومع أهله واتذكر شلون كان يخذلني ويكسر بخاطري حتى كلمة حق مايقول مواقفه معاي في كل مره كذا احس ان هذي حياتي معاه ماراح تتغير يا اني اقبل بالوضع كما هو مثل ماقال لي او ان كل واحد يروح في طريق.. |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
اقتباس:
ومع أنه حاس فيهم أحيانا لكنه أحيان ثانية يسمع لهم .... انا أعتذر اني أتكلم بطريقة المؤامرة عن أهل وأم ..لكن أسلوبهم يقول هذا .. من طريقتهم بالتهرب من حفلة الملكة ومن طريقة اتهامهم لك تدل على أنهم يفكروا بهذي الطريقة ..لما يتهموك أنك طلبتي فلوسك عشان تفرقي بين الأخوان وكانك ترمي خطط يدل على انهم هم يرسمون خطط ولهم أهداف فمو غريبة أبدا أن يقولون لك كلام تأليف من عندهم ما قاله زوجك ابدا ... أحسه رجل طيب وصادق وإلا ما كان تم تحت سيطرتهم للان . اجلسي مع والدك واشرحي له الوضع وأن اهل زوجك بيظلوا يزنوا عليه ومستفردين فيه طالما هو بعيد .. وممكن جدا تنتهوا بالطلاق ... بينما لو رجعتي بطريقة فيها شيء من حفظ ماء وجهك ممكن لما ترجعي بيتك تقدري تتعاملي معاهم ومعاه وتخففي من تأثيرهم عليه واسمعي من والدك وشوفي رأيه ... أنا أثق برأي والدك شنو كان رأي والدتك بموضوع إرسال تلميح أو راسئل بطريقة غير مباشره عن طريق بنتك مثلا أو لما يجي باخذ الأولاد انتي توصليهم له وتستعملي لغة العيون أو بلمسه يد سريعة وكأنها بالغلط تعبري له عن شوقك له بدون كلام .. أو عن طريق حالتك بالواتس اب ....تقدري تكتبي مثلا أن كل الناس ببيوتها مرتاحه وما يحس بالنار الا اللي واطيها ومفترق عن عياله وأحبابه . تستميليه عشان يخطو خطوة تجاهك ويرجع يحاول يرجعك ... تستميليه عشان يحاول يرجعك ولما يكلمك تفهميه انه انتِ تحبي ترجعي بيتك لكن الأمر مو بيدك وانما بيد والدك وما تقري تطلعي عن طوع والدك لأنك مو حاسه بالأمان لأنه تخلى عنك هالفترة .. خلاكِي تحسي أنه ممكن يطلقك بسهوله ووقتها وين بتروحي لو كنتي مزعله والدك منك وراجعه غصب عنه .. خليه يجلس مع والدك ويتفاهم معاه عشان يحس أنه وراك رجال ما أعرف كيف كان أسلوبك مع زوجك ؟؟؟ هل كنتي تلفتي نظره لأهدافهم ولأغلاطهم عليه بطريقة غير مباشرة ... بقولك الطريقة اللي أتخيل انها تنجح معاه بأمثلة وانتي علقي عليها وقوليلي هل سبق جربتيها وهل برأيك ممكن تنجح ؟؟ مثلا لما قال لك أن طفلكم معاق وأحسن انه ينزل بدل ما يعطوكِ ابر ومثبتات ... أكيد هذا كلامهم هم سمعه منهم ... لما ولدتي تحملي طفلكم وتقولين لزوجك شايف كيف سبحان الله الطفل ما أحد يحبه كثر امه وأبوه ... أهلنا ( خلي الكلام عن أهلك وأهله لأن أمك بعد كانت من رأي زوجك) ..... أهلنا يئسوا من طفلنا وفكروه معاق لكن احنا عيلته واحنا اهله ما يهون علينا ..شوف كم حلو ولدنا ؟ هنا أنتي توصلي له رسالة أن انتي واياه وأطفالكم عباره عن جبهة واحده .. وأهله جبهة مختلفة ... مو مثل ما هم يقنعونه أنه هو واياهم جبهة وانتي وعيلك وأهلك جبهة ثانية على موضوع الفلوس ... تقولين له لازم تعطي اهلك لأن الأهل يتوقعوا أن ولدهم ملك لهم ... عادي هذا الشعور .. يعني هم ربوه وكبروه فيحسوا أنه لازم يعطيهم كل حاجة يملكها تدري حبيبي لأن انا واياك بنفس المركب أظل حريصه على تعبك وفلوسك عشان أنت تنبسط فيهم ... يعني حقك تستفيد من تعبك .. تصلح سيارتك مثلا أو ترتاح ببيتك ... أوك الرجل المسؤول واللي يتحمل مسؤولية مثلك ما شاء الله عليك ... رجل ... ( مع ابتسامة اعجاب ) يساعد أهله لكن يوازن وما يظلم نفسه .. وأنا والله مثل ما جربتني وعرفتني ما بقصر بأي شيء أقدر عليه مثل يوم تنازلت عن حفلة الملكة أو ساعدت بالسيارة .. لأن انا وانت مالنا إلا بعض . لما أخذوا فلوسه بحجة خطبة أخوه ... تقولي له والله أني احبك على طيبة قلبك .. ما في اطيب من قلبك أعطيت أخوك كل تعبك ولو اني مستغربة لأن ما تزوج فيهم وبدل ما أنت تنبسط فيهم وتريح عمرك هو اللي تمتع فيهم . ما عليه .. يظل اخوك وأكيد هو بيسوي معاك نفس الشي .. يعني الحين لو انت طلبت من أمك أو أخوك فلوس لعرسك أو لحاجة محتاجها معقوله ما يعطونك ؟؟؟؟ لا مو معقول وغيري الموضوع .. قربي منه ولامسي جسمه وقوليله أنا اعطيك عمري كله .... خلي كل كلامك ونظراتك خلال كلامك وكأنه غزل فيه ومقدمات لعلاقة ... وقت تنتقلي من الكلام للفعل واللمسات راح يندمج معك وما يرد عليك .. هدفنا من اللمسات أن ما ينقلب كلامك لنقاش ...لأن الهدف مو نقاش الموضوع انما بعض الرسائل الضمنية وجهتيها من خلال كلامك لعقله الباطن . |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
البارح كان جاي ياخذ عياله فقلت لبنتي اسألي البابا متى راح يجيب لنا بيت ونعيش فيه كلنا...
لما رجعوا سألتها قلتي للبابا عن البيت قالت البابا يقول خلاص مايحبك وماراح يجيب بيت لان عنده بيت جاتني ضيقه وجالسه افكر واقول ليش يقول لبنته خلاص ما احب امك...بدون لف ودوران.؟. وبخصوص تعاملي معاه اتجنب أذكر اهله على قد ماأقدر والطريقه الغير مباشره جربت مرات اوصله بس بدون ما أجيب سيرتهم لان اكيد بيطلع حجج واعذار لهم فمثلا أمه تملك أراضي ومزارع مأجرتهم ورصيد بالبنك وما عمرها ساعدت احد من عيالها بالعكس تبي فلوس من عيالها وتلومهم اذا ماجابوا اغراض للبيت وماعطوها مصروف وزوجي قبل فتره احتاج سوى حادث ويطالبونه بثلاثين ألف وطلب من امه وردته يوم طلب منها قالت له انا من وين لي اجيب لك فلوس لا ني رجال ولا أشتغل وبعد فتره جبت له سالفة مرت عمي يوم اورثت بيت وفلوس من ابوها وزوجت ولدها بالفلوس وعطته البيت له ولزوجته.. وانا قصدي بالكلام الفرق بين امه وبين الامهات اللي قلوبهم على عيالهم ويدورون راحتهم والطريقه المباشره اني اقول امك قالت واختك سوت ما استخدمها معاه الا وقت ما افقد اعصابي منه لما يتكلم عني إني أنا سبب المشاكل انا الحقوده انا.... ساعتها ما اقدر أمسك نفسي يعني مثلا يوم صارت هالمشكله انا طلبت فلوسي وانا ماأدري عن سالفة خطوبة اخوه اللي ألفوها ويوم راح وقال لهم ودقوا علينا رجع واهو مقتنع وقالي نفس الكلام اني مخططه على الفلوس عشان اهو مايساعد اخوه ويوم رجع يزورني بيت اهلي كان يبيني أرجع معاه البيت ولما قلت له برجع معاك لما اخلص الشهر الثالث يقولي امك تشيشك عشان لاترجعين واهو بنفسه كان معاي عند الدكتوره وسمع يوم قالت اني ما أصعد درج على الأقل الثلاث شهور الاولى فهمتيني اهو معاي ويسمع ويشوف كل شي ومجرد جلسه وحده معاهم يرجع بأفكار جديده ويقلب علي يصير شخص ثاني اكثر من مره يقولي انتي تبين مصالح مني وانتي ماوقفتي الا على ظهري يمن علي دائما بأي شي يسويه حتى مشوار بيت اهلي الخمس دقايق يذكره لي وديتك وجبتك اكلتك وشربتك و عطيتك وسويت لك اذا قلت له هذي مسؤوليتك وكل هذا من حقي يقول ايه بس بحدود وانا عطيتك كل شي وانتي مايملي عيونك الا التراب واذا سكت ومارديت يعصب ويقول لاتحقريني ليش ساكته اذا قلت له ماقصرت وهذا كله بفضلك؟! يزودها ويحسسني اني ولا شي واهو الكل بالكل واي شي زين يصير لي ينسبه له ويقول كله بفضلي ولو ما أنا انتي ماسويتي شي المشكله يفكر ان امه اهي اللي تحبه حب صادق وانا ابي مصالح ومصاريف منه وبس واهو من هالناحيه مو مقصر مايدفع الريال الا بعد مية استشاره اكثر من موقف يمر عليه يثبت انهم مايراعونه جاي من الدوام ولسه ماتغدى وامه تطلب منه يوصلها شقة بنتها تبعد ساعه كامله عنا ومايتضايق منها ولاشي يرجع واهو مبتسم وانا مشوار بيت اهلي تعبان ماتحسين ماتقدرين وطبعا مستحيل اطلب واهو تعبان او راجع من شغله بس مايحس وخواته يستلمونه من عند الباب يقولي خمس دقايق وانا عندك ويطول ادق عليه يقولي طلعت مع خواتي بوديهم السوق او بوصل امي بتشتري أغراض او ........ وانا ماعمري حسسته اني متضايقه بخدمته لهم واخوانه مبديهم علينا كل سلف يوم الراتب ما أشوفه امه قبل فتره من المشكله قنعته ان يعطيها شهريا نص الراتب عشان اليوم الاسود! طبعا حيله جديده من بعد ماكانت تاخذ راتبه كامل وتحطه عندها بالتجوري بعدها صار لنا مواقف تعطلنا نبي فلوس واهي تقفل الغرفه وتطلع وبعد عناء وجهد اقتنع يخلي الراتب بحسابه ويسحب وقت مايحتاج وألحين حيلتها نص الراتب اخوه اللي اكبر منه لازم كل شهر ياخذ منه وحجته عطني وبعدين اسحب من الصراف واعطيك وماعمره عطاه والثاني دايما مفلس وماعنده قيمة الايجار ومع هذا أنا اللي يحاسب علي اذا تكلمت مثلا قلت له انت تضيق علينا بدون فايده اللي تجمعه مولنا يجرحني ويقولي فلوسي وبكيفي وش حارك تعبانه فيهم ! زود لي المصروف مايكفي يقول هذي امكانياتي ولاتنرفزيني مو ناقصك شي تاكلين وتشربين لا تطلعين حجج علي ترى مو مقصر معاك وماتلقين رجال مثلي قايم فيك طيب ناقصتني هالشغله جيبها لي صرفي من المكافئه ... حاولت بكل الوسائل لاقناعه بالشده بالطيب والدلع وعمري وحبيبي مافيه نتيجه مايحس فيني يحس بس فيهم وبمعاناتهم مشاكلي معاه كلها تافهه وانا أكبرها وكلامه الجارح لي لاني سويت ولاني قلت واهو مايمسك نفسه هذا عذره .مايبي يتناقش او يسمع على طول صراخ وتهديد لكن خواته مشاكلهم قضايا ولازم تنحل خواته مظلومين ولازم ينصرهم تخيلي امه لما تشوفني واهو في دوامه واسلم عليها ماترد تسوي نفسها ماتسمع ولما اكون معاه اهي اللي تبدأ بالسلام تعبت من هالحياه خبث وحيله إلى متى؟!! كثير امور وسوالف شايلتها بقلبي لاني عارفه النتيجه فاختصرها على نفسي واسكت عشان المركب يمشي وياريت على كذا وحياتنا ماشيه مشاكل يطلعها من تحت اﻷرض انتقاد وفلسفه وتسلط إللي مضايقني اكثر ألحين لما أشوف الصور أللي يحطها في الواتساب صور له واهو مسافر انقهر كنت اتمنى نسافر واهو يروح ويشاورهم ويرجع لي يحسب ويضرب بقيمة التذاكر وباللي بنصرفه في السفر وبعدين يقول ماتسوى نخسر كل هالمبلغ على كم يوم وألحين تسوى يروح من بلد لبلد وينهم عنه اللي يشاورهم ! ما مسكوه لايروح يخسر... ولا بس علي وعلى عيالي .. آه صج شقاء تعبت من هالحياه .. |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
زوجك حبيبتي متأثر بأفكار ومبادئ هي اللي تحركه وتخليه حنون لأهله وقاسي عليك ... وتدخلات أمه شيء جانبي لأنه لو ما عنده هذي القناعات لكن وقفها عند حدها ولا سمح لها تتدخل ... يعني مشكلة زوجك فيه هو مو بأحد ثاني إلى الان ما كبر وحس وعرف قيمة العائلة والزوجة والولد .. وفاهم الرجولة غلط .
سوهء أهله زنوا عليه حاليا أو لأ فما راح تفرق كثير لأن مشكلته بداخله هو . ولهذا السبب والدك مصر على موقفه لأنه فاهم زوجك تماما . أتركي الموضوع لوالدك وبما ان زوجك مو سائل فيك فالأفضل تحفظي كرامتك لأن الرجل يهين الحرمة اللي ترمي نفسها عليه ...وأتوقع عناده الحالي سببه أنك طلعتي معاه اخر مرة ,,, فلا تعاودي تحاولي تتصلي فيه لا بطريقة مباشره ولا غير مباشره الى أن يقرر هو أنه يرغب بعائلته , الحين ومن بعد رده على بنتكم عرفتي موقفه منك وعرفتي كيف يفكر . يظن أنك انتي رايحه تحني وتضعفي وتقبلي بشروطه وتكملي معاه على حالكم وأسوأ بعد ... مهملك ويترك لك اخبار بالواتس وغيره عن قصد عشان تفهمي انه عايش حياته ومو مهتم فيك ولا متأثر . من رأيي تسوي له حظر بالواتس وتقطعي أي طريقة تواصل ممكن يتواصلها معك إلا عن طريق والدك ..خل يفهم ان وراكي رجال ولك قيمتك وقتها بيجي هو بيوافق على شروطك ولو ما جا يكون ما يستاهلك ...مافي شي بالدنيا يستاهل أن تظلي عايشه ذليله عشانه ,واذا قرر أنه ما يريد عائلته وما يتحمل مسؤوليتكم وعاجبه الوضع الحالي فلكم رب كريم لأن لو رحتي عنده وهو على حالته الحالية بتشوفي منه الويل أكثر من قبل . |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
أنا في حالة نفسيه سيئه عملت حضر لزوجي في الواتساب وقافله على نفسي باب الغرفه جااالسه اتذكر كل شي مر بحياتي معاه لليوم اتذكر يوم ولادتي ببنتي ويوم ولادتي بولدي اتذكر طلعاتنا مع بعض اتذكر يوم عيد ميلادي اتذكر يوم عيد زواجنا
اتذكر ايامنا الحلوه اتذكر مشاكلنا اتذكر العيد اللي راح يوم نخيم يومين في البر اتذكر ايام رمضان وشلون كان يهلكني بطلباته كل يوم يبي ورق عنب اتخيل رمضان الجاي والعيد شلون بيكون عيالي بيعيدون معاي ولا معاه شلون راح تكون حياتي وحياة الاطفال افكر ليش يصير لي كل هذا كان يقول يحبني و مايقدر يستغنى عني آخر مره شفته حسيته متمسك فيني ليش تغير كلامه ! الوضع اللي انا فيه صعب مدري وش مصيري معاه.. |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
السلام عليكم
شلونك اختي بيتا حبيت اخذ رايك زوجي قبل شوي رسل لي رساله ""ليش رافضه نبدأ من جديد ليش رافضه تعطيني وتعطين نفسك وتعطين عيالنا فرصه ثانيه شيلي من راسك كل شي صار وان شاء الله الجاي احسن انا فكرت بكل شي وانا غلطان مية بالميه ومستعد اغير تعاملي معاك واحترمك فكري شوي ماتسوى نعيش بعيد عن بعضنا وترى عيالنا متشتتين راح تنحل كل مشاكلك بس سامحيني من قلبك "" زوجك أبو ........... هذي رسالته بس شلون اتصرف ماذكر بكلامه ان موافق على موضوع السكن ولاشي أرد عليه شقوله ؟؟ |
رد : أشعر بأني وصلت للنهاية"' أرجو مساعدتي رجل الرجال ..Beta 2"'
أعتذر عالتأخير بالرد .. مريضة وما ادخل المنتدى كثير هالأيام
هل لا زلت تنتظري ردي أم جدت مستجدات ؟ |
| الساعة الآن 10:11 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©